༡༦. ས་དྡྷི་ཝི་ཧཱ་རི་ཀ་ཝ་ཏྟ་ཀ་ཐཱ

༦༧. [ཙཱུ་ལ༹་ཝ. ༣༧༨ ཨཱ་ད་ཡོ] ‘‘ཨུ་པ་ཛ྄ཛྷཱ་ཡེ་ན, བྷི་ཀྑ་ཝེ, ས་དྡྷི་ཝི་ཧཱ་རི་ཀ་མྷི ས་མྨཱ ཝ་ཏྟི་ཏ་བྦཾ. ཏ་ཏྲཱ་ཡཾ ས་མྨཱ་ཝ་ཏྟ་ནཱ –

‘‘ཨུ་པ་ཛ྄ཛྷཱ་ཡེ་ན, བྷི་ཀྑ་ཝེ, ས་དྡྷི་ཝི་ཧཱ་རི་ཀོ ས་ངྒ་ཧེ་ཏ་བྦོ ཨ་ནུ་གྒ་ཧེ་ཏ་བྦོ ཨུ་དྡེ་སེ་ན པ་རི་པུ་ཙྪཱ་ཡ ཨོ་ཝཱ་དེ་ན ཨ་ནུ་སཱ་ས་ནི་ཡཱ. ས་ཙེ ཨུ་པ་ཛ྄ཛྷཱ་ཡ་སྶ པ་ཏྟོ ཧོ་ཏི, ས་དྡྷི་ཝི་ཧཱ་རི་ཀ་སྶ པ་ཏྟོ ན ཧོ་ཏི, ཨུ་པ་ཛ྄ཛྷཱ་ཡེ་ན ས་དྡྷི་ཝི་ཧཱ་རི་ཀ་སྶ པ་ཏྟོ དཱ་ཏ་བྦོ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ པ་ཏྟོ ཨུ་པྤ་ཛྫི་ཡེ་ཐཱ་ཏི. ས་ཙེ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ ཧོ་ཏི, ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ན ཧོ་ཏི, ཨུ་པ་ཛ྄ཛྷཱ་ཡེ་ན ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ དཱ་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ཨུ་པྤ་ཛྫི་ཡེ་ཐཱ་ཏི. ས་ཙེ ཨུ་པ་ཛ྄ཛྷཱ་ཡ་སྶ པ་རི་ཀྑཱ་རོ ཧོ་ཏི, ས་དྡྷི་ཝི་ཧཱ་རི་ཀ་སྶ པ་རི་ཀྑཱ་རོ ན ཧོ་ཏི, ཨུ་པ་ཛ྄ཛྷཱ་ཡེ་ན ས་དྡྷི་ཝི་ཧཱ་རི་ཀ་སྶ པ་རི་ཀྑཱ་རོ དཱ་ཏ་བྦོ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ པ་རི་ཀྑཱ་རོ ཨུ་པྤ་ཛྫི་ཡེ་ཐཱ་ཏི.

‘‘ས་ཙེ ས་དྡྷི་ཝི་ཧཱ་རི་ཀོ གི་ལཱ་ནོ ཧོ་ཏི, ཀཱ་ལ་སྶེ་ཝ ཨུ་ཊྛཱ་ཡ ད་ནྟ་ཀ་ཊྛཾ དཱ་ཏ་བྦཾ, མུ་ཁོ་ད་ཀཾ དཱ་ཏ་བྦཾ, ཨཱ་ས་ནཾ པ་ཉྙ་པེ་ཏ་བྦཾ. ས་ཙེ ཡཱ་གུ ཧོ་ཏི, བྷཱ་ཛ་ནཾ དྷོ་ཝི་ཏྭཱ ཡཱ་གུ ཨུ་པ་ནཱ་མེ་ཏ་བྦཱ. ཡཱ་གུཾ པཱི་ཏ་སྶ ཨུ་ད་ཀཾ ད་ཏྭཱ བྷཱ་ཛ་ནཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ པ་ཊི་སཱ་མེ་ཏ་བྦཾ. ས་དྡྷི་ཝི་ཧཱ་རི་ཀ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.

‘‘ས་ཙེ ས་དྡྷི་ཝི་ཧཱ་རི་ཀོ གཱ་མཾ པ་ཝི་སི་ཏུ་ཀཱ་མོ ཧོ་ཏི, ནི་ཝཱ་ས་ནཾ དཱ་ཏ་བྦཾ, པ་ཊི་ནི་ཝཱ་ས་ནཾ པ་ཊི་གྒ་ཧེ་ཏ་བྦཾ, ཀཱ་ཡ་བ་ནྡྷ་ནཾ དཱ་ཏ་བྦཾ, ས་གུ་ཎཾ ཀ་ཏྭཱ ས་ངྒྷཱ་ཊི་ཡོ དཱ་ཏ་བྦཱ, དྷོ་ཝི་ཏྭཱ པ་ཏྟོ སོ་ད་ཀོ དཱ་ཏ་བྦོ. ཨེ་ཏྟཱ་ཝ་ཏཱ ནི་ཝ་ཏྟི་སྶ་ཏཱི་ཏི ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏ་བྦཾ, པ་ཊི་ནི་ཝཱ་ས་ནཾ དཱ་ཏ་བྦཾ, ནི་ཝཱ་ས་ནཾ པ་ཊི་གྒ་ཧེ་ཏ་བྦཾ. ས་ཙེ ཙཱི་ཝ་རཾ སི་ནྣཾ ཧོ་ཏི, མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦཾ, ན ཙ ཨུ་ཎྷེ ཙཱི་ཝ་རཾ ནི་ད་ཧི་ཏ་བྦཾ; ཙཱི་ཝ་རཾ ས་ངྒྷ་རི་ཏ་བྦཾ, ཙཱི་ཝ་རཾ ས་ངྒྷ་ར་ནྟེ་ན ཙ་ཏུ་ར་ངྒུ་ལཾ ཀ་ཎྞཾ ཨུ་སྶཱ་རེ་ཏྭཱ ཙཱི་ཝ་རཾ ས་ངྒྷ་རི་ཏ་བྦཾ – མཱ མ་ཛ྄ཛྷེ བྷ་ངྒོ ཨ་ཧོ་སཱི་ཏི. ཨོ་བྷོ་གེ ཀཱ་ཡ་བ་ནྡྷ་ནཾ ཀཱ་ཏ་བྦཾ.

‘‘ས་ཙེ པི་ཎྜ་པཱ་ཏོ ཧོ་ཏི, ས་དྡྷི་ཝི་ཧཱ་རི་ཀོ ཙ བྷུ་ཉྫི་ཏུ་ཀཱ་མོ ཧོ་ཏི, ཨུ་ད་ཀཾ ད་ཏྭཱ པི་ཎྜ་པཱ་ཏོ ཨུ་པ་ནཱ་མེ་ཏ་བྦོ. ས་དྡྷི་ཝི་ཧཱ་རི་ཀོ པཱ་ནཱི་ཡེ་ན པུ་ཙྪི་ཏ་བྦོ. བྷུ་ཏྟཱ་ཝི་སྶ ཨུ་ད་ཀཾ ད་ཏྭཱ པ་ཏྟཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ ཝོ་ད་ཀཾ ཀ་ཏྭཱ མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦོ, ན ཙ ཨུ་ཎྷེ པ་ཏྟོ ནི་ད་ཧི་ཏ་བྦོ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ. ས་དྡྷི་ཝི་ཧཱ་རི་ཀ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ པ་ཊི་སཱ་མེ་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.

‘‘ས་ཙེ ས་དྡྷི་ཝི་ཧཱ་རི་ཀོ ན་ཧཱ་ཡི་ཏུ་ཀཱ་མོ ཧོ་ཏི, ན་ཧཱ་ནཾ པ་ཊི་ཡཱ་དེ་ཏ་བྦཾ. ས་ཙེ སཱི་ཏེ་ན ཨ་ཏྠོ ཧོ་ཏི, སཱི་ཏཾ པ་ཊི་ཡཱ་དེ་ཏ་བྦཾ. ས་ཙེ ཨུ་ཎྷེ་ན ཨ་ཏྠོ ཧོ་ཏི, ཨུ་ཎྷཾ པ་ཊི་ཡཱ་དེ་ཏ་བྦཾ.

‘‘ས་ཙེ ས་དྡྷི་ཝི་ཧཱ་རི་ཀོ ཛ་ནྟཱ་གྷ་རཾ པ་ཝི་སི་ཏུ་ཀཱ་མོ ཧོ་ཏི, ཙུ་ཎྞཾ ས་ནྣེ་ཏ་བྦཾ, མ་ཏྟི་ཀཱ ཏེ་མེ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ ག་ནྟྭཱ ཛ་ནྟཱ་གྷ་ར་པཱི་ཋཾ ད་ཏྭཱ ཙཱི་ཝ་རཾ པ་ཊི་གྒ་ཧེ་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ, ཙུ་ཎྞཾ དཱ་ཏ་བྦཾ, མ་ཏྟི་ཀཱ དཱ་ཏ་བྦཱ. ས་ཙེ ཨུ་སྶ་ཧ་ཏི, ཛ་ནྟཱ་གྷ་རཾ པ་ཝི་སི་ཏ་བྦཾ. ཛ་ནྟཱ་གྷ་རཾ པ་ཝི་ས་ནྟེ་ན མ་ཏྟི་ཀཱ་ཡ མུ་ཁཾ མ་ཀྑེ་ཏྭཱ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཾ པ་ཝི་སི་ཏ་བྦཾ. ན ཐེ་རེ བྷི་ཀྑཱུ ཨ་ནུ་པ་ཁ་ཛྫ ནི་སཱི་དི་ཏ་བྦཾ. ན ན་ཝཱ བྷི་ཀྑཱུ ཨཱ་ས་ནེ་ན པ་ཊི་བཱ་ཧི་ཏ་བྦཱ. ཛ་ནྟཱ་གྷ་རེ ས་དྡྷི་ཝི་ཧཱ་རི་ཀ་སྶ པ་རི་ཀ་མྨཾ ཀཱ་ཏ་བྦཾ. ཛ་ནྟཱ་གྷ་རཱ ནི་ཀྑ་མ་ནྟེ་ན ཛ་ནྟཱ་གྷ་ར་པཱི་ཋཾ ཨཱ་དཱ་ཡ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཱ ནི་ཀྑ་མི་ཏ་བྦཾ.

‘‘ཨུ་ད་ཀེ་པི ས་དྡྷི་ཝི་ཧཱ་རི་ཀ་སྶ པ་རི་ཀ་མྨཾ ཀཱ་ཏ་བྦཾ. ན་ཧཱ་ཏེ་ན པ་ཋ་མ་ཏ་རཾ ཨུ་ཏྟ་རི་ཏྭཱ ཨ་ཏྟ་ནོ ག་ཏྟཾ ཝོ་ད་ཀཾ ཀ་ཏྭཱ ནི་ཝཱ་སེ་ཏྭཱ ས་དྡྷི་ཝི་ཧཱ་རི་ཀ་སྶ ག་ཏྟ་ཏོ ཨུ་ད་ཀཾ པ་མ་ཛྫི་ཏ་བྦཾ, ནི་ཝཱ་ས་ནཾ དཱ་ཏ་བྦཾ, ས་ངྒྷཱ་ཊི དཱ་ཏ་བྦཱ. ཛ་ནྟཱ་གྷ་ར་པཱི་ཋཾ ཨཱ་དཱ་ཡ པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ. ས་དྡྷི་ཝི་ཧཱ་རི་ཀོ པཱ་ནཱི་ཡེ་ན པུ་ཙྪི་ཏ་བྦོ.

‘‘ཡ་སྨིཾ ཝི་ཧཱ་རེ ས་དྡྷི་ཝི་ཧཱ་རི་ཀོ ཝི་ཧ་ར་ཏི, ས་ཙེ སོ ཝི་ཧཱ་རོ ཨུ་ཀླཱ་པོ ཧོ་ཏི, ས་ཙེ ཨུ་སྶ་ཧ་ཏི, སོ་དྷེ་ཏ་བྦོ. ཝི་ཧཱ་རཾ སོ་དྷེ་ནྟེ་ན པ་ཋ་མཾ པ་ཏྟ་ཙཱི་ཝ་རཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; ནི་སཱི་ད་ན་པ་ཙྩ་ཏྠ་ར་ཎཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; བྷི་སི་བི་བྦོ་ཧ་ནཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩོ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; པཱི་ཋཾ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩ་པ་ཊི་པཱ་ད་ཀཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཱ; ཁེ་ལ༹་མ་ལླ་ཀོ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; ཨ་པ་སྶེ་ན་ཕ་ལ་ཀཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; བྷཱུ་མ་ཏྠ་ར་ཎཾ ཡ་ཐཱ་པ་ཉྙ་ཏྟཾ ས་ལླ་ཀྑེ་ཏྭཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. ས་ཙེ ཝི་ཧཱ་རེ ས་ནྟཱ་ན་ཀཾ ཧོ་ཏི, ཨུ་ལློ་ཀཱ པ་ཋ་མཾ ཨོ་ཧཱ་རེ་ཏ་བྦཾ, ཨཱ་ལོ་ཀ་ས་ནྡྷི་ཀ་ཎྞ་བྷཱ་གཱ པ་མ་ཛྫི་ཏ་བྦཱ. ས་ཙེ གེ་རུ་ཀ་པ་རི་ཀ་མྨ་ཀ་ཏཱ བྷི་ཏྟི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཀཱ་ལ༹་ཝ་ཎྞ་ཀ་ཏཱ བྷཱུ་མི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཨ་ཀ་ཏཱ ཧོ་ཏི བྷཱུ་མི, ཨུ་ད་ཀེ་ན པ་རི་པྥོ་སི་ཏྭཱ ས་མྨ་ཛྫི་ཏ་བྦཱ – མཱ ཝི་ཧཱ་རོ ར་ཛེ་ན ཨུ་ཧ་ཉྙཱི་ཏི. ས་ངྐཱ་རཾ ཝི་ཙི་ནི་ཏྭཱ ཨེ་ཀ་མ་ནྟཾ ཚ་ཌྜེ་ཏ་བྦཾ.

‘‘བྷཱུ་མ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. མ་ཉྩ་པ་ཊི་པཱ་ད་ཀཱ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཱ. མ་ཉྩོ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦོ. པཱི་ཋཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. བྷི་སི་བི་བྦོ་ཧ་ནཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ནི་སཱི་ད་ན་པ་ཙྩ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ཁེ་ལ༹་མ་ལླ་ཀོ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦོ. ཨ་པ་སྶེ་ན་ཕ་ལ་ཀཾ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཾ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ.

‘‘ས་ཙེ པུ་ར་ཏྠི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པུ་ར་ཏྠི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ པ་ཙྪི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པ་ཙྪི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ཨུ་ཏྟ་རཱ ས་ར་ཛཱ ཝཱ་ཏཱ ཝཱ་ཡ་ནྟི, ཨུ་ཏྟ་རཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ད་ཀྑི་ཎཱ ས་ར་ཛཱ ཝཱ་ཏཱ ཝཱ་ཡ་ནྟི, ད་ཀྑི་ཎཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ སཱི་ཏ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཝི་ཝ་རི་ཏ་བྦཱ, ར་ཏྟིཾ ཐ་ཀེ་ཏ་བྦཱ. ས་ཙེ ཨུ་ཎྷ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཐ་ཀེ་ཏ་བྦཱ, ར་ཏྟིཾ ཝི་ཝ་རི་ཏ་བྦཱ.

‘‘ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཨུ་པ་ཊྛཱ་ན་སཱ་ལཱ ཨུ་ཀླཱ་པཱ ཧོ་ཏི, ཨུ་པ་ཊྛཱ་ན་སཱ་ལཱ ས་མྨ་ཛྫི་ཏ་བྦཱ. ས་ཙེ ཨ་གྒི་སཱ་ལཱ ཨུ་ཀླཱ་པཱ ཧོ་ཏི, ཨ་གྒི་སཱ་ལཱ ས་མྨ་ཛྫི་ཏ་བྦཱ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ས་ཙེ པཱ་ནཱི་ཡཾ ན ཧོ་ཏི, པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ པ་རི་བྷོ་ཛ་ནཱི་ཡཾ ན ཧོ་ཏི, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ.

‘‘ས་ཙེ ས་དྡྷི་ཝི་ཧཱ་རི་ཀ་སྶ ཨ་ན་བྷི་ར་ཏི ཨུ་པྤ་ནྣཱ ཧོ་ཏི, ཨུ་པ་ཛ྄ཛྷཱ་ཡེ་ན ཝཱུ་པ་ཀཱ་སེ་ཏ་བྦོ, ཝཱུ་པ་ཀཱ་སཱ་པེ་ཏ་བྦོ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ས་དྡྷི་ཝི་ཧཱ་རི་ཀ་སྶ ཀུ་ཀྐུ་ཙྩཾ ཨུ་པྤ་ནྣཾ ཧོ་ཏི, ཨུ་པ་ཛ྄ཛྷཱ་ཡེ་ན ཝི་ནོ་དེ་ཏ་བྦཾ, ཝི་ནོ་དཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ས་དྡྷི་ཝི་ཧཱ་རི་ཀ་སྶ དི་ཊྛི་ག་ཏཾ ཨུ་པྤ་ནྣཾ ཧོ་ཏི, ཨུ་པ་ཛ྄ཛྷཱ་ཡེ་ན ཝི་ཝེ་ཙེ་ཏ་བྦཾ, ཝི་ཝེ་ཙཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ས་དྡྷི་ཝི་ཧཱ་རི་ཀོ ག་རུ་དྷ་མྨཾ ཨ་ཛ྄ཛྷཱ་པ་ནྣོ ཧོ་ཏི པ་རི་ཝཱ་སཱ་ར་ཧོ, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ས་དྡྷི་ཝི་ཧཱ་རི་ཀ་སྶ པ་རི་ཝཱ་སཾ ད་དེ་ཡྻཱ་ཏི. ས་ཙེ ས་དྡྷི་ཝི་ཧཱ་རི་ཀོ མཱུ་ལཱ་ཡ པ་ཊི་ཀ་སྶ་ནཱ་ར་ཧོ ཧོ་ཏི, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ས་དྡྷི་ཝི་ཧཱ་རི་ཀཾ མཱུ་ལཱ་ཡ པ་ཊི་ཀ་སྶེ་ཡྻཱ་ཏི. ས་ཙེ ས་དྡྷི་ཝི་ཧཱ་རི་ཀོ མཱ་ན་ཏྟཱ་ར་ཧོ ཧོ་ཏི, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ས་དྡྷི་ཝི་ཧཱ་རི་ཀ་སྶ མཱ་ན་ཏྟཾ ད་དེ་ཡྻཱ་ཏི. ས་ཙེ ས་དྡྷི་ཝི་ཧཱ་རི་ཀོ ཨ་བྦྷཱ་ནཱ་ར་ཧོ ཧོ་ཏི, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ས་དྡྷི་ཝི་ཧཱ་རི་ཀཾ ཨ་བྦྷེ་ཡྻཱ་ཏི. ས་ཙེ ས་ངྒྷོ ས་དྡྷི་ཝི་ཧཱ་རི་ཀ་སྶ ཀ་མྨཾ ཀ་ཏྟུ་ཀཱ་མོ ཧོ་ཏི, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ས་དྡྷི་ཝི་ཧཱ་རི་ཀ་སྶ ཀ་མྨཾ ན ཀ་རེ་ཡྻ, ལ་ཧུ་ཀཱ་ཡ ཝཱ པ་རི་ཎཱ་མེ་ཡྻཱ་ཏི. ཀ་ཏཾ ཝཱ པ་ན་སྶ ཧོ་ཏི ས་ངྒྷེ་ན ཀ་མྨཾ, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨུ་པ་ཛ྄ཛྷཱ་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀོ ས་མྨཱ ཝ་ཏྟེ་ཡྻ, ལོ་མཾ པཱ་ཏེ་ཡྻ, ནེ་ཏྠཱ་རཾ ཝ་ཏྟེ་ཡྻ, ས་ངྒྷོ ཏཾ ཀ་མྨཾ པ་ཊི་པྤ་སྶ་མྦྷེ་ཡྻཱ་ཏི.

‘‘ས་ཙེ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ དྷོ་ཝི་ཏ་བྦཾ ཧོ་ཏི, ཨུ་པ་ཛ྄ཛྷཱ་ཡེ་ན ཨཱ་ཙི་ཀྑི་ཏ་བྦཾ ཨེ་ཝཾ དྷོ་ཝེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ དྷོ་ཝི་ཡེ་ཐཱ་ཏི. ས་ཙེ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ཀཱ་ཏ་བྦཾ ཧོ་ཏི, ཨུ་པ་ཛ྄ཛྷཱ་ཡེ་ན ཨཱ་ཙི་ཀྑི་ཏ་བྦཾ ཨེ་ཝཾ ཀ་རེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ཀ་རི་ཡེ་ཐཱ་ཏི. ས་ཙེ ས་དྡྷི་ཝི་ཧཱ་རི་ཀ་སྶ ར་ཛ་ནཾ པ་ཙི་ཏ་བྦཾ ཧོ་ཏི, ཨུ་པ་ཛ྄ཛྷཱ་ཡེ་ན ཨཱ་ཙི་ཀྑི་ཏ་བྦཾ ཨེ་ཝཾ པ་ཙེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ ར་ཛ་ནཾ པ་ཙི་ཡེ་ཐཱ་ཏི. ས་ཙེ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ར་ཛི་ཏ་བྦཾ ཧོ་ཏི, ཨུ་པ་ཛ྄ཛྷཱ་ཡེ་ན ཨཱ་ཙི་ཀྑི་ཏ་བྦཾ, ཨེ་ཝཾ ར་ཛེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ས་དྡྷི་ཝི་ཧཱ་རི་ཀ་སྶ ཙཱི་ཝ་རཾ ར་ཛི་ཡེ་ཐཱ་ཏི. ཙཱི་ཝ་རཾ ར་ཛ་ནྟེ་ན སཱ་དྷུ་ཀཾ ས་མྤ་རི་ཝ་ཏྟ་ཀཾ ས་མྤ་རི་ཝ་ཏྟ་ཀཾ ར་ཛི་ཏ་བྦཾ. ན ཙ ཨ་ཙྪི་ནྣེ ཐེ་ཝེ པ་ཀྐ་མི་ཏ་བྦཾ. ས་ཙེ ས་དྡྷི་ཝི་ཧཱ་རི་ཀོ གི་ལཱ་ནོ ཧོ་ཏི, ཡཱ་ཝ་ཛཱི་ཝཾ ཨུ་པ་ཊྛཱ་ཏ་བྦོ, ཝུ་ཊྛཱ་ན་མ་སྶ ཨཱ་ག་མེ་ཏ་བྦ’’ནྟི.

ས་དྡྷི་ཝི་ཧཱ་རི་ཀ་ཝ་ཏྟཾ ནི་ཊྛི་ཏཾ.