༡༥. ཨུ་པ་ཛ྄ཛྷཱ་ཡ་ཝ་ཏྟ་ཀ་ཐཱ
༦༤. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ནུ་པ་ཛ྄ཛྷཱ་ཡ་ཀཱ ཨ་ནཱ་ཙ་རི་ཡ་ཀཱ [ཨི་དཾ པ་དཾ སཱི. སྱཱ. པོ་ཏྠ་ཀེ་སུ ན་ཏྠི] ཨ་ནོ་ཝ་དི་ཡ་མཱ་ནཱ ཨ་ན་ནུ་སཱ་སི་ཡ་མཱ་ནཱ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་ར་ནྟི; མ་ནུ་སྶཱ་ནཾ [ཏེ མ་ནུ་སྶཱ་ནཾ (ཀ.)] བྷུ་ཉྫ་མཱ་ནཱ་ནཾ ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་ཁཱ་ད་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་སཱ་ཡ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི; སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫ་ནྟི; བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་ར་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་རི་སྶ་ནྟི; མ་ནུ་སྶཱ་ནཾ བྷུ་ཉྫ་མཱ་ནཱ་ནཾ, ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་ཁཱ་ད་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་སཱ་ཡ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི; སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫི་སྶ་ནྟི; བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་རི་སྶ་ནྟི སེ་ཡྻ་ཐཱ་པི བྲཱ་ཧྨ་ཎཱ བྲཱ་ཧྨ་ཎ་བྷོ་ཛ་ནེ’’ཏི.
ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ ས་ནྟུ་ཊྛཱ ལ་ཛྫི་ནོ ཀུ་ཀྐུ་ཙྩ་ཀཱ སི་ཀྑཱ་ཀཱ་མཱ, ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་རི་སྶ་ནྟི; མ་ནུ་སྶཱ་ནཾ བྷུ་ཉྫ་མཱ་ནཱ་ནཾ, ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་ཁཱ་ད་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་སཱ་ཡ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི; སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫི་སྶ་ནྟི; བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་རི་སྶ་ནྟཱི’’ཏི. ཨ་ཐ ཁོ ཏེ བྷི་ཀྑཱུ…པེ… བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་ར་ནྟི, མ་ནུ་སྶཱ་ནཾ བྷུ་ཉྫ་མཱ་ནཱ་ནཾ ཨུ་པ་རི བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་ཁཱ་ད་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་སཱ་ཡ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫ་ནྟི, བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་ར་ནྟཱི’’ཏི? ‘‘ས་ཙྩཾ བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, བྷི་ཀྑ་ཝེ, ཏེ་སཾ མོ་གྷ་པུ་རི་སཱ་ནཾ ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་རི་སྶ་ནྟི, མ་ནུ་སྶཱ་ནཾ བྷུ་ཉྫ་མཱ་ནཱ་ནཾ ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་ཁཱ་ད་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་སཱ་ཡ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫི་སྶ་ནྟི, བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་རི་སྶ་ནྟི. ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ, པ་ས་ནྣཱ་ནཾ ཝཱ བྷི་ཡྻོ་བྷཱ་ཝཱ་ཡ. ཨ་ཐ ཁྭེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ན་ཉྩེ་ཝ ཨ་པྤ་སཱ་དཱ་ཡ, པ་ས་ནྣཱ་ན་ཉྩ ཨེ་ཀ་ཙྩཱ་ནཾ ཨ་ཉྙ་ཐ་ཏྟཱ་ཡཱ’’ཏི. ཨ་ཐ ཁོ བྷ་ག་ཝཱ ཏེ བྷི་ཀྑཱུ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ དུ་པྤོ་ས་ཏཱ་ཡ མ་ཧི་ཙྪ་ཏཱ་ཡ ཨ་ས་ནྟུ་ཊྛི་ཏཱ་ཡ [ཨ་ས་ནྟུ་ཊྛི་ཡཱ (སཱི.), ཨ་ས་ནྟུ་ཊྛ་ཏཱ་ཡ (སྱཱ)] ས་ངྒ་ཎི་ཀཱ་ཡ ཀོ་ས་ཛྫ་སྶ ཨ་ཝ་ཎྞཾ བྷཱ་སི་ཏྭཱ ཨ་ནེ་ཀ་པ་རི་ཡཱ་ཡེ་ན སུ་བྷ་ར་ཏཱ་ཡ སུ་པོ་ས་ཏཱ་ཡ ཨ་པྤི་ཙྪ་སྶ ས་ནྟུ་ཊྛ་སྶ ས་ལླེ་ཁ་སྶ དྷུ་ཏ་སྶ པཱ་སཱ་དི་ཀ་སྶ ཨ་པ་ཙ་ཡ་སྶ ཝཱི་རི་ཡཱ་ར་མྦྷ་སྶ [ཝི་རི་ཡཱ་ར་མྦྷ་སྶ (སཱི. སྱཱ.)] ཝ་ཎྞཾ བྷཱ་སི་ཏྭཱ བྷི་ཀྑཱུ་ནཾ ཏ་ད་ནུ་ཙྪ་ཝི་ཀཾ ཏ་ད་ནུ་ལོ་མི་ཀཾ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༦༥. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པ་ཛ྄ཛྷཱ་ཡཾ. ཨུ་པ་ཛ྄ཛྷཱ་ཡོ, བྷི་ཀྑ་ཝེ, ས་དྡྷི་ཝི་ཧཱ་རི་ཀ་མྷི པུ་ཏྟ་ཙི་ཏྟཾ ཨུ་པ་ཊྛ་པེ་སྶ་ཏི, ས་དྡྷི་ཝི་ཧཱ་རི་ཀོ ཨུ་པ་ཛ྄ཛྷཱ་ཡ་མྷི པི་ཏུ་ཙི་ཏྟཾ ཨུ་པ་ཊྛ་པེ་སྶ་ཏི. ཨེ་ཝཾ ཏེ ཨ་ཉྙ་མ་ཉྙཾ ས་གཱ་ར་ཝཱ ས་པྤ་ཏི་སྶཱ ས་བྷཱ་ག་ཝུ་ཏྟི་ནོ ཝི་ཧ་ར་ནྟཱ ཨི་མ་སྨིཾ དྷ་མྨ་ཝི་ན་ཡེ ཝུ་ཌྜྷིཾ ཝི་རུ་ལ༹ྷིཾ ཝེ་པུ་ལླཾ ཨཱ་པ་ཛྫི་སྶ་ནྟི. ཨེ་ཝ་ཉྩ པ་ན, བྷི་ཀྑ་ཝེ, ཨུ་པ་ཛ྄ཛྷཱ་ཡོ ག་ཧེ་ཏ་བྦོ – ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨུ་པ་ཛ྄ཛྷཱ་ཡོ མེ, བྷ་ནྟེ, ཧོ་ཧི; ཨུ་པ་ཛ྄ཛྷཱ་ཡོ མེ, བྷ་ནྟེ, ཧོ་ཧི; ཨུ་པ་ཛ྄ཛྷཱ་ཡོ མེ, བྷ་ནྟེ, ཧོ་ཧཱི’ཏི. སཱ་ཧཱུ་ཏི ཝཱ ལ་ཧཱུ་ཏི ཝཱ ཨོ་པཱ་ཡི་ཀ་ནྟི ཝཱ པ་ཏི་རཱུ་པ་ནྟི ཝཱ པཱ་སཱ་དི་ཀེ་ན ས་མྤཱ་དེ་ཧཱི་ཏི ཝཱ ཀཱ་ཡེ་ན ཝི་ཉྙཱ་པེ་ཏི, ཝཱ་ཙཱ་ཡ ཝི་ཉྙཱ་པེ་ཏི, ཀཱ་ཡེ་ན ཝཱ་ཙཱ་ཡ [ན ཝཱ་ཙཱ་ཡ (ཀ.)] ཝི་ཉྙཱ་པེ་ཏི, ག་ཧི་ཏོ ཧོ་ཏི ཨུ་པ་ཛ྄ཛྷཱ་ཡོ; ན ཀཱ་ཡེ་ན ཝི་ཉྙཱ་པེ་ཏི, ན ཝཱ་ཙཱ་ཡ ཝི་ཉྙཱ་པེ་ཏི, ན ཀཱ་ཡེ་ན ཝཱ་ཙཱ་ཡ ཝི་ཉྙཱ་པེ་ཏི, ན ག་ཧི་ཏོ ཧོ་ཏི ཨུ་པ་ཛ྄ཛྷཱ་ཡོ.
༦༦. [ཙཱུ་ལ༹་ཝ. ༣༧༦ ཨཱ་ད་ཡོ]‘‘ས་དྡྷི་ཝི་ཧཱ་རི་ཀེ་ན, བྷི་ཀྑ་ཝེ, ཨུ་པ་ཛ྄ཛྷཱ་ཡ་མྷི ས་མྨཱ ཝ་ཏྟི་ཏ་བྦཾ. ཏ་ཏྲཱ་ཡཾ ས་མྨཱ་ཝ་ཏྟ་ནཱ –
‘‘ཀཱ་ལ་སྶེ་ཝ ཝུ་ཊྛཱ་ཡ ཨུ་པཱ་ཧ་ནཱ ཨོ་མུ་ཉྩི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ད་ནྟ་ཀ་ཊྛཾ དཱ་ཏ་བྦཾ, མུ་ཁོ་ད་ཀཾ དཱ་ཏ་བྦཾ, ཨཱ་ས་ནཾ པ་ཉྙ་པེ་ཏ་བྦཾ. ས་ཙེ ཡཱ་གུ ཧོ་ཏི, བྷཱ་ཛ་ནཾ དྷོ་ཝི་ཏྭཱ ཡཱ་གུ ཨུ་པ་ནཱ་མེ་ཏ་བྦཱ. ཡཱ་གུཾ པཱི་ཏ་སྶ ཨུ་ད་ཀཾ ད་ཏྭཱ བྷཱ་ཛ་ནཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ པ་ཊི་སཱ་མེ་ཏ་བྦཾ. ཨུ་པ་ཛ྄ཛྷཱ་ཡ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨུ་པ་ཛ྄ཛྷཱ་ཡོ གཱ་མཾ པ་ཝི་སི་ཏུ་ཀཱ་མོ ཧོ་ཏི, ནི་ཝཱ་ས་ནཾ དཱ་ཏ་བྦཾ, པ་ཊི་ནི་ཝཱ་ས་ནཾ པ་ཊི་གྒ་ཧེ་ཏ་བྦཾ, ཀཱ་ཡ་བ་ནྡྷ་ནཾ དཱ་ཏ་བྦཾ, ས་གུ་ཎཾ ཀ་ཏྭཱ ས་ངྒྷཱ་ཊི་ཡོ དཱ་ཏ་བྦཱ, དྷོ་ཝི་ཏྭཱ པ་ཏྟོ སོ་ད་ཀོ [ས་ཨུ་ད་ཀོ (ཀ.)] དཱ་ཏ་བྦོ. ས་ཙེ ཨུ་པ་ཛ྄ཛྷཱ་ཡོ པ་ཙྪཱ་ས་མ་ཎཾ ཨཱ་ཀ་ངྑ་ཏི, ཏི་མ་ཎྜ་ལཾ པ་ཊི་ཙྪཱ་དེ་ནྟེ་ན པ་རི་མ་ཎྜ་ལཾ ནི་ཝཱ་སེ་ཏྭཱ ཀཱ་ཡ་བ་ནྡྷ་ནཾ བ་ནྡྷི་ཏྭཱ ས་གུ་ཎཾ ཀ་ཏྭཱ ས་ངྒྷཱ་ཊི་ཡོ པཱ་རུ་པི་ཏྭཱ ག་ཎྛི་ཀཾ པ་ཊི་མུ་ཉྩི་ཏྭཱ དྷོ་ཝི་ཏྭཱ པ་ཏྟཾ ག་ཧེ་ཏྭཱ ཨུ་པ་ཛ྄ཛྷཱ་ཡ་སྶ པ་ཙྪཱ་ས་མ་ཎེ་ན ཧོ་ཏ་བྦཾ. ནཱ་ཏི་དཱུ་རེ ག་ནྟ་བྦཾ, ནཱ་ཙྩཱ་ས་ནྣེ ག་ནྟ་བྦཾ, པ་ཏྟ་པ་རི་ཡཱ་པ་ནྣཾ པ་ཊི་གྒ་ཧེ་ཏ་བྦཾ. ན ཨུ་པ་ཛ྄ཛྷཱ་ཡ་སྶ བྷ་ཎ་མཱ་ན་སྶ ཨ་ནྟ་ར་ནྟ་རཱ ཀ་ཐཱ ཨོ་པཱ་ཏེ་ཏ་བྦཱ. ཨུ་པ་ཛ྄ཛྷཱ་ཡོ ཨཱ་པ་ཏྟི་སཱ་མ་ནྟཱ བྷ་ཎ་མཱ་ནོ ནི་ཝཱ་རེ་ཏ་བྦོ.
‘‘ནི་ཝ་ཏྟ་ནྟེ་ན པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏ་བྦཾ, པ་ཊི་ནི་ཝཱ་ས་ནཾ དཱ་ཏ་བྦཾ, ནི་ཝཱ་ས་ནཾ པ་ཊི་གྒ་ཧེ་ཏ་བྦཾ. ས་ཙེ ཙཱི་ཝ་རཾ སི་ནྣཾ ཧོ་ཏི, མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦཾ, ན ཙ ཨུ་ཎྷེ ཙཱི་ཝ་རཾ ནི་ད་ཧི་ཏ་བྦཾ; ཙཱི་ཝ་རཾ ས་ངྒྷ་རི་ཏ་བྦཾ, ཙཱི་ཝ་རཾ ས་ངྒྷ་ར་ནྟེ་ན ཙ་ཏུ་ར་ངྒུ་ལཾ ཀ་ཎྞཾ ཨུ་སྶཱ་རེ་ཏྭཱ ཙཱི་ཝ་རཾ ས་ངྒྷ་རི་ཏ་བྦཾ – མཱ མ་ཛ྄ཛྷེ བྷ་ངྒོ ཨ་ཧོ་སཱི་ཏི. ཨོ་བྷོ་གེ ཀཱ་ཡ་བ་ནྡྷ་ནཾ ཀཱ་ཏ་བྦཾ.
‘‘ས་ཙེ པི་ཎྜ་པཱ་ཏོ ཧོ་ཏི, ཨུ་པ་ཛ྄ཛྷཱ་ཡོ ཙ བྷུ་ཉྫི་ཏུ་ཀཱ་མོ ཧོ་ཏི, ཨུ་ད་ཀཾ ད་ཏྭཱ པི་ཎྜ་པཱ་ཏོ ཨུ་པ་ནཱ་མེ་ཏ་བྦོ. ཨུ་པ་ཛ྄ཛྷཱ་ཡོ པཱ་ནཱི་ཡེ་ན པུ་ཙྪི་ཏ་བྦོ. བྷུ་ཏྟཱ་ཝི་སྶ ཨུ་ད་ཀཾ ད་ཏྭཱ པ་ཏྟཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ ཝོ་ད་ཀཾ ཀ་ཏྭཱ མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦོ, ན ཙ ཨུ་ཎྷེ པ་ཏྟོ ནི་ད་ཧི་ཏ་བྦོ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ. ཨུ་པ་ཛ྄ཛྷཱ་ཡ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ པ་ཊི་སཱ་མེ་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨུ་པ་ཛ྄ཛྷཱ་ཡོ ན་ཧཱ་ཡི་ཏུ་ཀཱ་མོ ཧོ་ཏི, ན་ཧཱ་ནཾ པ་ཊི་ཡཱ་དེ་ཏ་བྦཾ. ས་ཙེ སཱི་ཏེ་ན ཨ་ཏྠོ ཧོ་ཏི, སཱི་ཏཾ པ་ཊི་ཡཱ་དེ་ཏ་བྦཾ. ས་ཙེ ཨུ་ཎྷེ་ན ཨ་ཏྠོ ཧོ་ཏི, ཨུ་ཎྷཾ པ་ཊི་ཡཱ་དེ་ཏ་བྦཾ.
‘‘ས་ཙེ ཨུ་པ་ཛ྄ཛྷཱ་ཡོ ཛ་ནྟཱ་གྷ་རཾ པ་ཝི་སི་ཏུ་ཀཱ་མོ ཧོ་ཏི, ཙུ་ཎྞཾ ས་ནྣེ་ཏ་བྦཾ, མ་ཏྟི་ཀཱ ཏེ་མེ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ ཨུ་པ་ཛ྄ཛྷཱ་ཡ་སྶ པི་ཊྛི་ཏོ པི་ཊྛི་ཏོ ག་ནྟྭཱ ཛ་ནྟཱ་གྷ་ར་པཱི་ཋཾ ད་ཏྭཱ ཙཱི་ཝ་རཾ པ་ཊི་གྒ་ཧེ་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ, ཙུ་ཎྞཾ དཱ་ཏ་བྦཾ, མ་ཏྟི་ཀཱ དཱ་ཏ་བྦཱ. ས་ཙེ ཨུ་སྶ་ཧ་ཏི, ཛ་ནྟཱ་གྷ་རཾ པ་ཝི་སི་ཏ་བྦཾ. ཛ་ནྟཱ་གྷ་རཾ པ་ཝི་ས་ནྟེ་ན མ་ཏྟི་ཀཱ་ཡ མུ་ཁཾ མ་ཀྑེ་ཏྭཱ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཾ པ་ཝི་སི་ཏ་བྦཾ. ན ཐེ་རེ བྷི་ཀྑཱུ ཨ་ནུ་པ་ཁ་ཛྫ ནི་སཱི་དི་ཏ་བྦཾ. ན ན་ཝཱ བྷི་ཀྑཱུ ཨཱ་ས་ནེ་ན པ་ཊི་བཱ་ཧི་ཏ་བྦཱ. ཛ་ནྟཱ་གྷ་རེ ཨུ་པ་ཛ྄ཛྷཱ་ཡ་སྶ པ་རི་ཀ་མྨཾ ཀཱ་ཏ་བྦཾ. ཛ་ནྟཱ་གྷ་རཱ ནི་ཀྑ་མ་ནྟེ་ན ཛ་ནྟཱ་གྷ་ར་པཱི་ཋཾ ཨཱ་དཱ་ཡ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཱ ནི་ཀྑ་མི་ཏ་བྦཾ.
‘‘ཨུ་ད་ཀེ་པི ཨུ་པ་ཛ྄ཛྷཱ་ཡ་སྶ པ་རི་ཀ་མྨཾ ཀཱ་ཏ་བྦཾ. ན་ཧཱ་ཏེ་ན པ་ཋ་མ་ཏ་རཾ ཨུ་ཏྟ་རི་ཏྭཱ ཨ་ཏྟ་ནོ ག་ཏྟཾ ཝོ་ད་ཀཾ ཀ་ཏྭཱ ནི་ཝཱ་སེ་ཏྭཱ ཨུ་པ་ཛ྄ཛྷཱ་ཡ་སྶ ག་ཏྟ་ཏོ ཨུ་ད་ཀཾ པ་མ་ཛྫི་ཏ་བྦཾ, ནི་ཝཱ་ས་ནཾ དཱ་ཏ་བྦཾ, ས་ངྒྷཱ་ཊི དཱ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, ཨུ་པ་ཛ྄ཛྷཱ་ཡོ པཱ་ནཱི་ཡེ་ན པུ་ཙྪི་ཏ་བྦོ. ས་ཙེ ཨུ་དྡི་སཱ་པེ་ཏུ་ཀཱ་མོ ཧོ་ཏི, ཨུ་དྡི་སི་ཏ་བྦོ. ས་ཙེ པ་རི་པུ་ཙྪི་ཏུ་ཀཱ་མོ ཧོ་ཏི, པ་རི་པུ་ཙྪི་ཏ་བྦོ.
‘‘ཡ་སྨིཾ ཝི་ཧཱ་རེ ཨུ་པ་ཛ྄ཛྷཱ་ཡོ ཝི་ཧ་ར་ཏི, ས་ཙེ སོ ཝི་ཧཱ་རོ ཨུ་ཀླཱ་པོ ཧོ་ཏི, ས་ཙེ ཨུ་སྶ་ཧ་ཏི, སོ་དྷེ་ཏ་བྦོ. ཝི་ཧཱ་རཾ སོ་དྷེ་ནྟེ་ན པ་ཋ་མཾ པ་ཏྟ་ཙཱི་ཝ་རཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. ནི་སཱི་ད་ན་པ་ཙྩ་ཏྠ་ར་ཎཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. བྷི་སི་བི་བྦོ་ཧ་ནཾ [བྷི་སི་བི་མྦོ་ཧ་ནཾ (སཱི. སྱཱ.)] ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. མ་ཉྩོ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ. པཱི་ཋཾ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. མ་ཉྩ་པ་ཊི་པཱ་ད་ཀཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཱ. ཁེ་ལ༹་མ་ལླ་ཀོ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ. ཨ་པ་སྶེ་ན་ཕ་ལ་ཀཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. བྷཱུ་མ་ཏྠ་ར་ཎཾ ཡ་ཐཱ་པ་ཉྙ་ཏྟཾ ས་ལླ་ཀྑེ་ཏྭཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. ས་ཙེ ཝི་ཧཱ་རེ ས་ནྟཱ་ན་ཀཾ ཧོ་ཏི, ཨུ་ལློ་ཀཱ པ་ཋ་མཾ ཨོ་ཧཱ་རེ་ཏ་བྦཾ, ཨཱ་ལོ་ཀ་ས་ནྡྷི་ཀ་ཎྞ་བྷཱ་གཱ པ་མ་ཛྫི་ཏ་བྦཱ. ས་ཙེ གེ་རུ་ཀ་པ་རི་ཀ་མྨ་ཀ་ཏཱ བྷི་ཏྟི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཀཱ་ལ༹་ཝ་ཎྞ་ཀ་ཏཱ བྷཱུ་མི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཨ་ཀ་ཏཱ ཧོ་ཏི བྷཱུ་མི, ཨུ་ད་ཀེ་ན པ་རི་པྥོ་སི་ཏྭཱ ས་མྨ་ཛྫི་ཏ་བྦཱ – མཱ ཝི་ཧཱ་རོ ར་ཛེ་ན ཨུ་ཧ་ཉྙཱི་ཏི. ས་ངྐཱ་རཾ ཝི་ཙི་ནི་ཏྭཱ ཨེ་ཀ་མ་ནྟཾ ཚ་ཌྜེ་ཏ་བྦཾ.
‘‘བྷཱུ་མ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. མ་ཉྩ་པ་ཊི་པཱ་ད་ཀཱ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཱ. མ་ཉྩོ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦོ. པཱི་ཋཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. བྷི་སི་བི་བྦོ་ཧ་ནཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ནི་སཱི་ད་ན་པ་ཙྩ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ཁེ་ལ༹་མ་ལླ་ཀོ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦོ. ཨ་པ་སྶེ་ན་ཕ་ལ་ཀཾ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཾ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ.
‘‘ས་ཙེ པུ་ར་ཏྠི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པུ་ར་ཏྠི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ པ་ཙྪི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པ་ཙྪི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ཨུ་ཏྟ་རཱ ས་ར་ཛཱ ཝཱ་ཏཱ ཝཱ་ཡ་ནྟི, ཨུ་ཏྟ་རཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ད་ཀྑི་ཎཱ ས་ར་ཛཱ ཝཱ་ཏཱ ཝཱ་ཡ་ནྟི, ད་ཀྑི་ཎཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ སཱི་ཏ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཝི་ཝ་རི་ཏ་བྦཱ, ར་ཏྟིཾ ཐ་ཀེ་ཏ་བྦཱ. ས་ཙེ ཨུ་ཎྷ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཐ་ཀེ་ཏ་བྦཱ, ར་ཏྟིཾ ཝི་ཝ་རི་ཏ་བྦཱ.
‘‘ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཨུ་པ་ཊྛཱ་ན་སཱ་ལཱ ཨུ་ཀླཱ་པཱ ཧོ་ཏི, ཨུ་པ་ཊྛཱ་ན་སཱ་ལཱ ས་མྨ་ཛྫི་ཏ་བྦཱ. ས་ཙེ ཨ་གྒི་སཱ་ལཱ ཨུ་ཀླཱ་པཱ ཧོ་ཏི, ཨ་གྒི་སཱ་ལཱ ས་མྨ་ཛྫི་ཏ་བྦཱ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ས་ཙེ པཱ་ནཱི་ཡཾ ན ཧོ་ཏི, པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ པ་རི་བྷོ་ཛ་ནཱི་ཡཾ ན ཧོ་ཏི, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ.
‘‘ས་ཙེ ཨུ་པ་ཛ྄ཛྷཱ་ཡ་སྶ ཨ་ན་བྷི་ར་ཏི ཨུ་པྤ་ནྣཱ ཧོ་ཏི, ས་དྡྷི་ཝི་ཧཱ་རི་ཀེ་ན ཝཱུ་པ་ཀཱ་སེ་ཏ་བྦོ, ཝཱུ་པ་ཀཱ་སཱ་པེ་ཏ་བྦོ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨུ་པ་ཛ྄ཛྷཱ་ཡ་སྶ ཀུ་ཀྐུ་ཙྩཾ ཨུ་པྤ་ནྣཾ ཧོ་ཏི, ས་དྡྷི་ཝི་ཧཱ་རི་ཀེ་ན ཝི་ནོ་དེ་ཏ་བྦཾ, ཝི་ནོ་དཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨུ་པ་ཛ྄ཛྷཱ་ཡ་སྶ དི་ཊྛི་ག་ཏཾ ཨུ་པྤ་ནྣཾ ཧོ་ཏི, ས་དྡྷི་ཝི་ཧཱ་རི་ཀེ་ན ཝི་ཝེ་ཙེ་ཏ་བྦཾ, ཝི་ཝེ་ཙཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨུ་པ་ཛ྄ཛྷཱ་ཡོ ག་རུ་དྷ་མྨཾ ཨ་ཛ྄ཛྷཱ་པ་ནྣོ ཧོ་ཏི པ་རི་ཝཱ་སཱ་ར་ཧོ, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨུ་པ་ཛ྄ཛྷཱ་ཡ་སྶ པ་རི་ཝཱ་སཾ ད་དེ་ཡྻཱ་ཏི. ས་ཙེ ཨུ་པ་ཛ྄ཛྷཱ་ཡོ མཱུ་ལཱ་ཡ པ་ཊི་ཀ་སྶ་ནཱ་ར་ཧོ ཧོ་ཏི, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨུ་པ་ཛ྄ཛྷཱ་ཡཾ མཱུ་ལཱ་ཡ པ་ཊི་ཀ་སྶེ་ཡྻཱ་ཏི. ས་ཙེ ཨུ་པ་ཛ྄ཛྷཱ་ཡོ མཱ་ན་ཏྟཱ་ར་ཧོ ཧོ་ཏི, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨུ་པ་ཛ྄ཛྷཱ་ཡ་སྶ མཱ་ན་ཏྟཾ ད་དེ་ཡྻཱ་ཏི. ས་ཙེ ཨུ་པ་ཛ྄ཛྷཱ་ཡོ ཨ་བྦྷཱ་ནཱ་ར་ཧོ ཧོ་ཏི, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨུ་པ་ཛ྄ཛྷཱ་ཡཾ ཨ་བྦྷེ་ཡྻཱ་ཏི. ས་ཙེ ས་ངྒྷོ ཨུ་པ་ཛ྄ཛྷཱ་ཡ་སྶ ཀ་མྨཾ ཀ་ཏྟུ་ཀཱ་མོ ཧོ་ཏི ཏ་ཛྫ་ནཱི་ཡཾ ཝཱ ནི་ཡ་སྶཾ [ནི་ཡ་སཾ (ཀ.)] ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨུ་པ་ཛ྄ཛྷཱ་ཡ་སྶ ཀ་མྨཾ ན ཀ་རེ་ཡྻ ལ་ཧུ་ཀཱ་ཡ ཝཱ པ་རི་ཎཱ་མེ་ཡྻཱ་ཏི. ཀ་ཏཾ ཝཱ པ་ན་སྶ ཧོ་ཏི ས་ངྒྷེ་ན ཀ་མྨཾ ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ས་དྡྷི་ཝི་ཧཱ་རི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ཨུ་པ་ཛ྄ཛྷཱ་ཡོ ས་མྨཱ ཝ་ཏྟེ་ཡྻ, ལོ་མཾ པཱ་ཏེ་ཡྻ, ནེ་ཏྠཱ་རཾ ཝ་ཏྟེ་ཡྻ, ས་ངྒྷོ ཏཾ ཀ་མྨཾ པ་ཊི་པྤ་སྶ་མྦྷེ་ཡྻཱ་ཏི.
‘‘ས་ཙེ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ དྷོ་ཝི་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན དྷོ་ཝི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ དྷོ་ཝི་ཡེ་ཐཱ་ཏི. ས་ཙེ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ ཀཱ་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན ཀཱ་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ ཀ་རི་ཡེ་ཐཱ་ཏི. ས་ཙེ ཨུ་པ་ཛ྄ཛྷཱ་ཡ་སྶ ར་ཛ་ནཾ པ་ཙི་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན པ་ཙི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨུ་པ་ཛ྄ཛྷཱ་ཡ་སྶ ར་ཛ་ནཾ པ་ཙི་ཡེ་ཐཱ་ཏི. ས་ཙེ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ ར་ཛི་ཏ་བྦཾ [ར་ཛེ་ཏ་བྦཾ (སཱི. སྱཱ.)] ཧོ་ཏི, ས་དྡྷི་ཝི་ཧཱ་རི་ཀེ་ན ར་ཛི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨུ་པ་ཛ྄ཛྷཱ་ཡ་སྶ ཙཱི་ཝ་རཾ ར་ཛི་ཡེ་ཐཱ་ཏི. ཙཱི་ཝ་རཾ ར་ཛ་ནྟེ་ན [ར་ཛེ་ནྟེ་ན (སཱི. སྱཱ.)] སཱ་དྷུ་ཀཾ ས་མྤ་རི་ཝ་ཏྟ་ཀཾ ས་མྤ་རི་ཝ་ཏྟ་ཀཾ ར་ཛི་ཏ་བྦཾ, ན ཙ ཨ་ཙྪི་ནྣེ ཐེ་ཝེ པ་ཀྐ་མི་ཏ་བྦཾ.
‘‘ན ཨུ་པ་ཛ྄ཛྷཱ་ཡཾ ཨ་ནཱ་པུ་ཙྪཱ ཨེ་ཀ་ཙྩ་སྶ པ་ཏྟོ དཱ་ཏ་བྦོ, ན ཨེ་ཀ་ཙྩ་སྶ པ་ཏྟོ པ་ཊི་གྒ་ཧེ་ཏ་བྦོ; ན ཨེ་ཀ་ཙྩ་སྶ ཙཱི་ཝ་རཾ དཱ་ཏ་བྦཾ, ན ཨེ་ཀ་ཙྩ་སྶ ཙཱི་ཝ་རཾ པ་ཊི་གྒ་ཧེ་ཏ་བྦཾ; ན ཨེ་ཀ་ཙྩ་སྶ པ་རི་ཀྑཱ་རོ དཱ་ཏ་བྦོ, ན ཨེ་ཀ་ཙྩ་སྶ པ་རི་ཀྑཱ་རོ པ་ཊི་གྒ་ཧེ་ཏ་བྦོ; ན ཨེ་ཀ་ཙྩ་སྶ ཀེ་སཱ ཚེ་དེ་ཏ་བྦཱ [ཚེ་ཏྟ་བྦཱ (སཱི.), ཚེ་དི་ཏ་བྦཱ (ཀ.)], ན ཨེ་ཀ་ཙྩེ་ན ཀེ་སཱ ཚེ་དཱ་པེ་ཏ་བྦཱ; ན ཨེ་ཀ་ཙྩ་སྶ པ་རི་ཀ་མྨཾ ཀཱ་ཏ་བྦཾ, ན ཨེ་ཀ་ཙྩེ་ན པ་རི་ཀ་མྨཾ ཀཱ་རཱ་པེ་ཏ་བྦཾ; ན ཨེ་ཀ་ཙྩ་སྶ ཝེ་ཡྻཱ་ཝ་ཙྩོ [ཝེ་ཡྻཱ་ཝ་ཙྩཾ (ཀ་ཏྠ་ཙི)] ཀཱ་ཏ་བྦོ, ན ཨེ་ཀ་ཙྩེ་ན ཝེ་ཡྻཱ་ཝ་ཙྩོ ཀཱ་རཱ་པེ་ཏ་བྦོ; ན ཨེ་ཀ་ཙྩ་སྶ པ་ཙྪཱ་ས་མ་ཎེ་ན ཧོ་ཏ་བྦཾ, ན ཨེ་ཀ་ཙྩོ པ་ཙྪཱ་ས་མ་ཎོ ཨཱ་དཱ་ཏ་བྦོ; ན ཨེ་ཀ་ཙྩ་སྶ པི་ཎྜ་པཱ་ཏོ ནཱི་ཧ་རི་ཏ་བྦོ, ན ཨེ་ཀ་ཙྩེ་ན པི་ཎྜ་པཱ་ཏོ ནཱི་ཧ་རཱ་པེ་ཏ་བྦོ; ན ཨུ་པ་ཛ྄ཛྷཱ་ཡཾ ཨ་ནཱ་པུ་ཙྪཱ གཱ་མོ པ་ཝི་སི་ཏ་བྦོ; ན སུ་སཱ་ནཾ ག་ནྟ་བྦཾ; ན དི་སཱ པ་ཀྐ་མི་ཏ་བྦཱ. ས་ཙེ ཨུ་པ་ཛ྄ཛྷཱ་ཡོ གི་ལཱ་ནོ ཧོ་ཏི, ཡཱ་ཝ་ཛཱི་ཝཾ ཨུ་པ་ཊྛཱ་ཏ་བྦོ; ཝུ་ཊྛཱ་ན་མ་སྶ ཨཱ་ག་མེ་ཏ་བྦ’’ནྟི.
ཨུ་པ་ཛ྄ཛྷཱ་ཡ་ཝ་ཏྟཾ ནི་ཊྛི་ཏཾ.