༡༣. བི་མྦི་སཱ་ར་ས་མཱ་ག་མ་ཀ་ཐཱ
༥༥. ཨ་ཐ ཁོ བྷ་ག་ཝཱ ག་ཡཱ་སཱི་སེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན རཱ་ཛ་ག་ཧཾ ཏེ་ན ཙཱ་རི་ཀཾ པ་ཀྐཱ་མི, མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ བྷི་ཀྑུ་ས་ཧ་སྶེ་ན ས་བྦེ་ཧེ་ཝ པུ་རཱ་ཎ་ཛ་ཊི་ལེ་ཧི. ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན རཱ་ཛ་ག་ཧཾ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ལ་ཊྛི་ཝ་ནེ [ལ་ཊྛི་ཝ་ནུ་ཡྻཱ་ནེ (སྱཱ.)] སུ་པྤ་ཏི་ཊྛེ ཙེ་ཏི་ཡེ. ཨ་སྶོ་སི ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ – ས་མ་ཎོ ཁ་ལུ བྷོ གོ་ཏ་མོ ས་ཀྱ་པུ་ཏྟོ ས་ཀྱ་ཀུ་ལཱ པ་བྦ་ཛི་ཏོ རཱ་ཛ་ག་ཧཾ ཨ་ནུ་པྤ་ཏྟོ རཱ་ཛ་ག་ཧེ ཝི་ཧ་ར་ཏི ལ་ཊྛི་ཝ་ནེ སུ་པྤ་ཏི་ཊྛེ ཙེ་ཏི་ཡེ. ཏཾ ཁོ པ་ན བྷ་ག་ཝ་ནྟཾ [བྷ་ཝ་ནྟཾ (ཀ.)] གོ་ཏ་མཾ ཨེ་ཝཾ ཀ་ལྱཱ་ཎོ ཀི་ཏྟི་ས་དྡོ ཨ་བྦྷུ་གྒ་ཏོ – ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ [བྷ་ག་ཝཱ་ཏི (ཀ.)]. སོ ཨི་མཾ ལོ་ཀཾ ས་དེ་ཝ་ཀཾ ས་མཱ་ར་ཀཾ ས་བྲ་ཧྨ་ཀཾ ས་སྶ་མ་ཎ་བྲཱ་ཧྨ་ཎིཾ པ་ཛཾ ས་དེ་ཝ་མ་ནུ་སྶཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ཏི. སོ དྷ་མྨཾ དེ་སེ་ཏི ཨཱ་དི་ཀ་ལྱཱ་ཎཾ མ་ཛ྄ཛྷེ་ཀ་ལྱཱ་ཎཾ པ་རི་ཡོ་སཱ་ན་ཀ་ལྱཱ་ཎཾ སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ པ་ཀཱ་སེ་ཏི. སཱ་དྷུ ཁོ པ་ན ཏ་ཐཱ་རཱུ་པཱ་ནཾ ཨ་ར་ཧ་ཏཾ ད་སྶ་ནཾ ཧོ་ཏཱི་ཏི.
ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ དྭཱ་ད་ས་ན་ཧུ་ཏེ་ཧི [དྭཱ་ད་ས་ནི་ཡུ་ཏེ་ཧི (ཡོ་ཛ་ནཱ)] མཱ་ག་དྷི་ཀེ་ཧི བྲཱ་ཧྨ་ཎ་ག་ཧ་པ་ཏི་ཀེ་ཧི པ་རི་ཝུ་ཏོ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཏེ་པི ཁོ དྭཱ་ད་ས་ན་ཧུ་ཏཱ མཱ་ག་དྷི་ཀཱ བྲཱ་ཧྨ་ཎ་ག་ཧ་པ་ཏི་ཀཱ ཨ་པྤེ་ཀ་ཙྩེ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ, ཨ་པྤེ་ཀ་ཙྩེ བྷ་ག་ཝ་ཏཱ ས་དྡྷིཾ ས་མྨོ་དིཾ་སུ, ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ, ཨ་པྤེ་ཀ་ཙྩེ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ, ཨ་པྤེ་ཀ་ཙྩེ བྷ་ག་ཝ་ཏོ ས་ནྟི་ཀེ ནཱ་མ་གོ་ཏྟཾ སཱ་ཝེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ, ཨ་པྤེ་ཀ་ཙྩེ ཏུ་ཎྷཱི་བྷཱུ་ཏཱ ཨེ་ཀ་མ་ནྟཾ ནི་སཱི་དིཾ་སུ. ཨ་ཐ ཁོ ཏེ་སཾ དྭཱ་ད་ས་ན་ཧུ་ཏཱ་ནཾ [དྭཱ་ད་ས་ནི་ཡུ་ཏཱ་ནཾ (ཡོ་ཛ་ནཱ)] མཱ་ག་དྷི་ཀཱ་ནཾ བྲཱ་ཧྨ་ཎ་ག་ཧ་པ་ཏི་ཀཱ་ནཾ ཨེ་ཏ་ད་ཧོ་སི – ‘‘ཀིཾ ནུ ཁོ མ་ཧཱ་ས་མ་ཎོ ཨུ་རུ་ཝེ་ལ་ཀ་སྶ་པེ བྲ་ཧྨ་ཙ་རི་ཡཾ ཙ་ར་ཏི, ཨུ་དཱ་ཧུ ཨུ་རུ་ཝེ་ལ་ཀ་སྶ་པོ མ་ཧཱ་ས་མ་ཎེ བྲ་ཧྨ་ཙ་རི་ཡཾ ཙ་ར་ཏཱི’’ཏི? ཨ་ཐ ཁོ བྷ་ག་ཝཱ ཏེ་སཾ དྭཱ་ད་ས་ན་ཧུ་ཏཱ་ནཾ མཱ་ག་དྷི་ཀཱ་ནཾ བྲཱ་ཧྨ་ཎ་ག་ཧ་པ་ཏི་ཀཱ་ནཾ ཙེ་ཏ་སཱ ཙེ་ཏོ་པ་རི་ཝི་ཏ་ཀྐ་མ་ཉྙཱ་ཡ ཨཱ་ཡ་སྨ་ནྟཾ ཨུ་རུ་ཝེ་ལ་ཀ་སྶ་པཾ གཱ་ཐཱ་ཡ ཨ་ཛ྄ཛྷ་བྷཱ་སི –
‘‘ཀི་མེ་ཝ དི་སྭཱ ཨུ་རུ་ཝེ་ལ་ཝཱ་སི, པ་ཧཱ་སི ཨ་གྒིཾ ཀི་ས་ཀོ་ཝ་དཱ་ནོ;
པུ་ཙྪཱ་མི ཏཾ ཀ་སྶ་པ, ཨེ་ཏ་མ་ཏྠཾ ཀ་ཐཾ པ་ཧཱི་ནཾ ཏ་ཝ ཨ་གྒི་ཧུ་ཏྟ་ནྟི.
‘‘རཱུ་པེ ཙ ས་དྡེ ཙ ཨ་ཐོ ར་སེ ཙ;
ཀཱ་མི་ཏྠི་ཡོ ཙཱ་བྷི་ཝ་ད་ནྟི ཡ་ཉྙཱ;
ཨེ་ཏཾ མ་ལ་ནྟི ཨུ་པ་དྷཱི་སུ ཉ་ཏྭཱ;
ཏ་སྨཱ ན ཡི་ཊྛེ ན ཧུ་ཏེ ཨ་ར་ཉྫི་ནྟི.
‘‘ཨེ་ཏྠེ་ཝ ཏེ མ་ནོ ན ར་མི་ཏྠ (ཀ་སྶ་པཱ་ཏི བྷ་ག་ཝཱ);
རཱུ་པེ་སུ ས་དྡེ་སུ ཨ་ཐོ ར་སེ་སུ;
ཨ་ཐ ཀོ ཙ་ར་ཧི དེ་ཝ་མ་ནུ་སྶ་ལོ་ཀེ;
ར་ཏོ མ་ནོ ཀ་སྶ་པ, བྲཱུ་ཧི མེ་ཏ་ནྟི.
‘‘དི་སྭཱ པ་དཾ ས་ནྟ་མ་ནཱུ་པ་དྷཱི་ཀཾ;
ཨ་ཀི་ཉྩ་ནཾ ཀཱ་མ་བྷ་ཝེ ཨ་ས་ཏྟཾ;
ཨ་ན་ཉྙ་ཐཱ་བྷཱ་ཝི་མ་ན་ཉྙ་ནེ་ཡྻཾ;
ཏ་སྨཱ ན ཡི་ཊྛེ ན ཧུ་ཏེ ཨ་ར་ཉྫི’’ནྟི.
༥༦. ཨ་ཐ ཁོ ཨཱ་ཡ་སྨཱ ཨུ་རུ་ཝེ་ལ་ཀ་སྶ་པོ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ བྷ་ག་ཝ་ཏོ པཱ་དེ་སུ སི་ར་སཱ ནི་པ་ཏི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ཏྠཱ མེ, བྷ་ནྟེ, བྷ་ག་ཝཱ, སཱ་ཝ་ཀོ་ཧ་མ་སྨི; ས་ཏྠཱ མེ, བྷ་ནྟེ, བྷ་ག་ཝཱ, སཱ་ཝ་ཀོ་ཧ་མ་སྨཱི’’ཏི. ཨ་ཐ ཁོ ཏེ་སཾ དྭཱ་ད་ས་ན་ཧུ་ཏཱ་ནཾ མཱ་ག་དྷི་ཀཱ་ནཾ བྲཱ་ཧྨ་ཎ་ག་ཧ་པ་ཏི་ཀཱ་ནཾ ཨེ་ཏ་ད་ཧོ་སི – ‘‘ཨུ་རུ་ཝེ་ལ་ཀ་སྶ་པོ མ་ཧཱ་ས་མ་ཎེ བྲ་ཧྨ་ཙ་རི་ཡཾ ཙ་ར་ཏཱི’’ཏི. ཨ་ཐ ཁོ བྷ་ག་ཝཱ ཏེ་སཾ དྭཱ་ད་ས་ན་ཧུ་ཏཱ་ནཾ མཱ་ག་དྷི་ཀཱ་ནཾ བྲཱ་ཧྨ་ཎ་ག་ཧ་པ་ཏི་ཀཱ་ནཾ ཙེ་ཏ་སཱ ཙེ་ཏོ་པ་རི་ཝི་ཏ་ཀྐ་མ་ཉྙཱ་ཡ ཨ་ནུ་པུ་བྦིཾ ཀ་ཐཾ ཀ་ཐེ་སི, སེ་ཡྻ་ཐི་དཾ – དཱ་ན་ཀ་ཐཾ སཱི་ལ་ཀ་ཐཾ ས་གྒ་ཀ་ཐཾ ཀཱ་མཱ་ནཾ ཨཱ་དཱི་ན་ཝཾ ཨོ་ཀཱ་རཾ སཾ་ཀི་ལེ་སཾ ནེ་ཀྑ་མྨེ ཨཱ་ནི་སཾ་སཾ པ་ཀཱ་སེ་སི. ཡ་དཱ ཏེ བྷ་ག་ཝཱ ཨ་ཉྙཱ་སི ཀ་ལླ་ཙི་ཏྟེ མུ་དུ་ཙི་ཏྟེ ཝི་ནཱི་ཝ་ར་ཎ་ཙི་ཏྟེ ཨུ་ད་གྒ་ཙི་ཏྟེ པ་ས་ནྣ་ཙི་ཏྟེ, ཨ་ཐ ཡཱ བུ་དྡྷཱ་ནཾ སཱ་མུ་ཀྐཾ་སི་ཀཱ དྷ་མྨ་དེ་ས་ནཱ, ཏཾ པ་ཀཱ་སེ་སི – དུ་ཀྑཾ, ས་མུ་ད་ཡཾ, ནི་རོ་དྷཾ, མ་གྒཾ. སེ་ཡྻ་ཐཱ་པི ནཱ་མ སུ་དྡྷཾ ཝ་ཏྠཾ ཨ་པ་ག་ཏ་ཀཱ་ལ༹་ཀཾ ས་མྨ་དེ་ཝ ར་ཛ་ནཾ པ་ཊི་གྒ་ཎྷེ་ཡྻ, ཨེ་ཝ་མེ་ཝ ཨེ་ཀཱ་ད་ས་ན་ཧུ་ཏཱ་ནཾ མཱ་ག་དྷི་ཀཱ་ནཾ བྲཱ་ཧྨ་ཎ་ག་ཧ་པ་ཏི་ཀཱ་ནཾ བི་མྦི་སཱ་ར་པྤ་མུ་ཁཱ་ནཾ ཏ་སྨིཾ ཡེ་ཝ ཨཱ་ས་ནེ ཝི་ར་ཛཾ ཝཱི་ཏ་མ་ལཾ དྷ་མྨ་ཙ་ཀྑུཾ ཨུ་ད་པཱ་དི – ཡཾ ཀི་ཉྩི ས་མུ་ད་ཡ་དྷ་མྨཾ, ས་བྦཾ ཏཾ ནི་རོ་དྷ་དྷ་མྨ་ནྟི. ཨེ་ཀ་ན་ཧུ་ཏཾ ཨུ་པཱ་ས་ཀ་ཏྟཾ པ་ཊི་ཝེ་དེ་སི.
༥༧. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ དི་ཊྛ་དྷ་མྨོ པ་ཏྟ་དྷ་མྨོ ཝི་དི་ཏ་དྷ་མྨོ པ་རི་ཡོ་གཱ་ལ༹ྷ་དྷ་མྨོ ཏི་ཎྞ་ཝི་ཙི་ཀི་ཙྪོ ཝི་ག་ཏ་ཀ་ཐཾ་ཀ་ཐོ ཝེ་སཱ་ར་ཛྫ་པྤ་ཏྟོ ཨ་པ་ར་པྤ་ཙྩ་ཡོ ས་ཏྠུ་སཱ་ས་ནེ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘པུ་བྦེ མེ, བྷ་ནྟེ, ཀུ་མཱ་ར་སྶ ས་ཏོ པ་ཉྩ ཨ་སྶཱ་ས་ཀཱ ཨ་ཧེ་སུཾ, ཏེ མེ ཨེ་ཏ་ར་ཧི ས་མི་དྡྷཱ. པུ་བྦེ མེ, བྷ་ནྟེ, ཀུ་མཱ་ར་སྶ ས་ཏོ ཨེ་ཏ་ད་ཧོ་སི – ‘ཨ་ཧོ ཝ་ཏ མཾ ར་ཛྫེ ཨ་བྷི་སི་ཉྩེ་ཡྻུ’ནྟི, ཨ་ཡཾ ཁོ མེ, བྷ་ནྟེ, པ་ཋ་མོ ཨ་སྶཱ་ས་ཀོ ཨ་ཧོ་སི, སོ མེ ཨེ་ཏ་ར་ཧི ས་མི་དྡྷོ. ‘ཏ་སྶ ཙ མེ ཝི་ཛི་ཏཾ ཨ་ར་ཧཾ ས་མྨཱ་ས་མྦུ་དྡྷོ ཨོ་ཀྐ་མེ་ཡྻཱ’ཏི, ཨ་ཡཾ ཁོ མེ, བྷ་ནྟེ, དུ་ཏི་ཡོ ཨ་སྶཱ་ས་ཀོ ཨ་ཧོ་སི, སོ མེ ཨེ་ཏ་ར་ཧི ས་མི་དྡྷོ. ‘ཏ་ཉྩཱ་ཧཾ བྷ་ག་ཝ་ནྟཾ པ་ཡི་རུ་པཱ་སེ་ཡྻ’ནྟི, ཨ་ཡཾ ཁོ མེ, བྷ་ནྟེ, ཏ་ཏི་ཡོ ཨ་སྶཱ་ས་ཀོ ཨ་ཧོ་སི, སོ མེ ཨེ་ཏ་ར་ཧི ས་མི་དྡྷོ. ‘སོ ཙ མེ བྷ་ག་ཝཱ དྷ་མྨཾ དེ་སེ་ཡྻཱ’ཏི, ཨ་ཡཾ ཁོ མེ, བྷ་ནྟེ, ཙ་ཏུ་ཏྠོ ཨ་སྶཱ་ས་ཀོ ཨ་ཧོ་སི, སོ མེ ཨེ་ཏ་ར་ཧི ས་མི་དྡྷོ. ‘ཏ་སྶ ཙཱ་ཧཾ བྷ་ག་ཝ་ཏོ དྷ་མྨཾ ཨཱ་ཛཱ་ནེ་ཡྻ’ནྟི, ཨ་ཡཾ ཁོ མེ, བྷ་ནྟེ, པ་ཉྩ་མོ ཨ་སྶཱ་ས་ཀོ ཨ་ཧོ་སི, སོ མེ ཨེ་ཏ་ར་ཧི ས་མི་དྡྷོ. པུ་བྦེ མེ, བྷ་ནྟེ, ཀུ་མཱ་ར་སྶ ས་ཏོ ཨི་མེ པ་ཉྩ ཨ་སྶཱ་ས་ཀཱ ཨ་ཧེ་སུཾ, ཏེ མེ ཨེ་ཏ་ར་ཧི ས་མི་དྡྷཱ. ཨ་བྷི་ཀྐ་ནྟཾ, བྷ་ནྟེ, ཨ་བྷི་ཀྐ་ནྟཾ, བྷ་ནྟེ, སེ་ཡྻ་ཐཱ་པི, བྷ་ནྟེ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི – ཨེ་ཝ་མེ་ཝཾ བྷ་ག་ཝ་ཏཱ ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ, བྷ་ནྟེ, བྷ་ག་ཝ་ནྟཾ ས་ར་ཎཾ ག་ཙྪཱ་མི, དྷ་མྨ་ཉྩ, བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ [མཾ བྷ་ནྟེ (ཀ.)], བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏཾ, ཨ་དྷི་ཝཱ་སེ་ཏུ ཙ མེ, བྷ་ནྟེ, བྷ་ག་ཝཱ, སྭཱ་ཏ་ནཱ་ཡ བྷ་ཏྟཾ ས་དྡྷིཾ བྷི་ཀྑུ་ས་ངྒྷེ་ནཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བྷ་ག་ཝ་ཏོ ཨ་དྷི་ཝཱ་ས་ནཾ ཝི་དི་ཏྭཱ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ ཏ་སྶཱ ར་ཏྟི་ཡཱ ཨ་ཙྩ་ཡེ་ན པ་ཎཱི་ཏཾ ཁཱ་ད་ནཱི་ཡཾ བྷོ་ཛ་ནཱི་ཡཾ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, བྷ་ནྟེ, ནི་ཊྛི་ཏཾ བྷ་ཏྟ’’ནྟི.
༥༨. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ རཱ་ཛ་ག་ཧཾ པཱ་ཝི་སི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ བྷི་ཀྑུ་ས་ཧ་སྶེ་ན ས་བྦེ་ཧེ་ཝ པུ་རཱ་ཎ་ཛ་ཊི་ལེ་ཧི. ཏེ་ན ཁོ པ་ན ས་མ་ཡེ་ན ས་ཀྐོ དེ་ཝཱ་ན་མི་ནྡོ མཱ་ཎ་ཝ་ཀ་ཝ་ཎྞཾ ཨ་བྷི་ནི་མྨི་ནི་ཏྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ པུ་ར་ཏོ པུ་ར་ཏོ ག་ཙྪ་ཏི ཨི་མཱ གཱ་ཐཱ་ཡོ གཱ་ཡ་མཱ་ནོ –
‘‘ད་ནྟོ ད་ནྟེ་ཧི ས་ཧ པུ་རཱ་ཎ་ཛ་ཊི་ལེ་ཧི, ཝི་པྤ་མུ་ཏྟོ ཝི་པྤ་མུ་ཏྟེ་ཧི;
སི་ངྒཱི་ནི་ཀྑ་ས་ཝ་ཎྞོ, རཱ་ཛ་ག་ཧཾ པཱ་ཝི་སི བྷ་ག་ཝཱ.
‘‘མུ་ཏྟོ མུ་ཏྟེ་ཧི ས་ཧ པུ་རཱ་ཎ་ཛ་ཊི་ལེ་ཧི, ཝི་པྤ་མུ་ཏྟོ ཝི་པྤ་མུ་ཏྟེ་ཧི;
སི་ངྒཱི་ནི་ཀྑ་ས་ཝ་ཎྞོ, རཱ་ཛ་ག་ཧཾ པཱ་ཝི་སི བྷ་ག་ཝཱ.
‘‘ཏི་ཎྞོ ཏི་ཎྞེ་ཧི ས་ཧ པུ་རཱ་ཎ་ཛ་ཊི་ལེ་ཧི;
ཝི་པྤ་མུ་ཏྟོ ཝི་པྤ་མུ་ཏྟེ་ཧི;
སི་ངྒཱི་ནི་ཀྑ་སུ་ཝ་ཎྞོ;
རཱ་ཛ་ག་ཧཾ པཱ་ཝི་སི བྷ་ག་ཝཱ.
‘‘ས་ནྟོ ས་ནྟེ་ཧི ས་ཧ པུ་རཱ་ཎ་ཛ་ཊི་ལེ་ཧི;
ཝི་པྤ་མུ་ཏྟོ ཝི་པྤ་མུ་ཏྟེ་ཧི;
སི་ངྒཱི་ནི་ཀྑ་ས་ཝ་ཎྞོ;
རཱ་ཛ་ག་ཧཾ པཱ་ཝི་སི བྷ་ག་ཝཱ.
‘‘ད་ས་ཝཱ་སོ ད་ས་བ་ལོ, ད་ས་དྷ་མྨ་ཝི་དཱུ ད་ས་བྷི ཙུ་པེ་ཏོ;
སོ ད་ས་ས་ཏ་པ་རི་ཝཱ་རོ [པ་རི་ཝཱ་ར་ཀོ (ཀ.)] རཱ་ཛ་ག་ཧཾ, པཱ་ཝི་སི བྷ་ག་ཝཱ’’ཏི.
མ་ནུ་སྶཱ ས་ཀྐཾ དེ་ཝཱ་ན་མི་ནྡཾ པ་སྶི་ཏྭཱ ཨེ་ཝ་མཱ་ཧཾ་སུ – ‘‘ཨ་བྷི་རཱུ་པོ ཝ་ཏཱ་ཡཾ མཱ་ཎ་ཝ་ཀོ, ད་སྶ་ནཱི་ཡོ ཝ་ཏཱ་ཡཾ མཱ་ཎ་ཝ་ཀོ, པཱ་སཱ་དི་ཀོ ཝ་ཏཱ་ཡཾ མཱ་ཎ་ཝ་ཀོ. ཀ་སྶ ནུ ཁོ ཨ་ཡཾ མཱ་ཎ་ཝ་ཀོ’’ཏི? ཨེ་ཝཾ ཝུ་ཏྟེ ས་ཀྐོ དེ་ཝཱ་ན་མི་ནྡོ ཏེ མ་ནུ་སྶེ གཱ་ཐཱ་ཡ ཨ་ཛ྄ཛྷ་བྷཱ་སི –
‘‘ཡོ དྷཱི་རོ ས་བྦ་དྷི ད་ནྟོ, སུ་དྡྷོ ཨ་པྤ་ཊི་པུ་གྒ་ལོ;
ཨ་ར་ཧཾ སུ་ག་ཏོ ལོ་ཀེ, ཏ་སྶཱ་ཧཾ པ་རི་ཙཱ་ར་ཀོ’’ཏི.
༥༩. ཨ་ཐ ཁོ བྷ་ག་ཝཱ ཡེ་ན ར་ཉྙོ མཱ་ག་དྷ་སྶ སེ་ནི་ཡ་སྶ བི་མྦི་སཱ་ར་སྶ ནི་ཝེ་ས་ནཾ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི ས་དྡྷིཾ བྷི་ཀྑུ་ས་ངྒྷེ་ན. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་ཏྭཱ ས་མྤ་ཝཱ་རེ་ཏྭཱ བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣ་སྶ ཁོ ར་ཉྙོ མཱ་ག་དྷ་སྶ སེ་ནི་ཡ་སྶ བི་མྦི་སཱ་ར་སྶ ཨེ་ཏ་ད་ཧོ་སི [ཙཱུ་ལ༹་ཝ. ༣༠༧] – ‘‘ཀ་ཏྠ ནུ ཁོ བྷ་ག་ཝཱ ཝི་ཧ་རེ་ཡྻ? ཡཾ ཨ་སྶ གཱ་མ་ཏོ ནེ་ཝ ཨ་ཝི་དཱུ་རེ ན ཨ་ཙྩཱ་ས་ནྣེ, ག་མ་ནཱ་ག་མ་ན་ས་མྤ་ནྣཾ, ཨ་ཏྠི་ཀཱ་ནཾ ཨ་ཏྠི་ཀཱ་ནཾ མ་ནུ་སྶཱ་ནཾ ཨ་བྷི་ཀྐ་མ་ནཱི་ཡཾ, དི་ཝཱ ཨ་པྤཱ་ཀི་ཎྞཾ [ཨ་པྤ་ཀི་ཎྞཾ (སཱི. སྱཱ.), ཨ་བྦྷོ་ཀི་ཎྞཾ (ཀ.)], ར་ཏྟིཾ ཨ་པྤ་ས་དྡཾ ཨ་པྤ་ནི་གྒྷོ་སཾ ཝི་ཛ་ན་ཝཱ་ཏཾ, མ་ནུ་སྶ་རཱ་ཧ་སྶེ་ཡྻ་ཀཾ, པ་ཊི་ས་ལླཱ་ན་སཱ་རུ་པྤ’’ནྟི. ཨ་ཐ ཁོ ར་ཉྙོ མཱ་ག་དྷ་སྶ སེ་ནི་ཡ་སྶ བི་མྦི་སཱ་ར་སྶ ཨེ་ཏ་ད་ཧོ་སི – ‘‘ཨི་དཾ ཁོ ཨ་མྷཱ་ཀཾ ཝེ་ལུ༹་ཝ་ནཾ ཨུ་ཡྻཱ་ནཾ གཱ་མ་ཏོ ནེ་ཝ ཨ་ཝི་དཱུ་རེ ན ཨ་ཙྩཱ་ས་ནྣེ ག་མ་ནཱ་ག་མ་ན་ས་མྤ་ནྣཾ ཨ་ཏྠི་ཀཱ་ནཾ ཨ་ཏྠི་ཀཱ་ནཾ མ་ནུ་སྶཱ་ནཾ ཨ་བྷི་ཀྐ་མ་ནཱི་ཡཾ དི་ཝཱ ཨ་པྤཱ་ཀི་ཎྞཾ ར་ཏྟིཾ ཨ་པྤ་ས་དྡཾ ཨ་པྤ་ནི་གྒྷོ་སཾ ཝི་ཛ་ན་ཝཱ་ཏཾ མ་ནུ་སྶ་རཱ་ཧ་སྶེ་ཡྻ་ཀཾ པ་ཊི་ས་ལླཱ་ན་སཱ་རུ་པྤཾ. ཡཾ་ནཱུ་ནཱ་ཧཾ ཝེ་ལུ༹་ཝ་ནཾ ཨུ་ཡྻཱ་ནཾ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ད་དེ་ཡྻ’’ནྟི. ཨ་ཐ ཁོ རཱ་ཛཱ མཱ་ག་དྷོ སེ་ནི་ཡོ བི་མྦི་སཱ་རོ སོ་ཝ་ཎྞ་མ་ཡཾ བྷི་ངྐཱ་རཾ ག་ཧེ་ཏྭཱ བྷ་ག་ཝ་ཏོ ཨོ་ཎོ་ཛེ་སི – ‘‘ཨེ་ཏཱ་ཧཾ, བྷ་ནྟེ, ཝེ་ལུ༹་ཝ་ནཾ ཨུ་ཡྻཱ་ནཾ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ད་མྨཱི’’ཏི. པ་ཊི་གྒ་ཧེ་སི བྷ་ག་ཝཱ ཨཱ་རཱ་མཾ. ཨ་ཐ ཁོ བྷ་ག་ཝཱ རཱ་ཛཱ་ནཾ མཱ་ག་དྷཾ སེ་ནི་ཡཾ བི་མྦི་སཱ་རཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་ཏྭཱ ས་མཱ་ད་པེ་ཏྭཱ ས་མུ་ཏྟེ་ཛེ་ཏྭཱ ས་མྤ་ཧཾ་སེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་རཱ་མ’’ནྟི.
བི་མྦི་སཱ་ར་ས་མཱ་ག་མ་ཀ་ཐཱ ནི་ཊྛི་ཏཱ.