༩. ཛ་ནྟཱ་གྷ་ར་ཝ་ཏྟ་ཀ་ཐཱ

༣༧༡. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཛ་ནྟཱ་གྷ་རེ ཐེ་རེ་ཧི བྷི་ཀྑཱུ་ཧི ནི་ཝཱ་རི་ཡ་མཱ་ནཱ ཨ་ནཱ་ད་རི་ཡཾ པ་ཊི་ཙྩ པ་ཧཱུ་ཏཾ ཀ་ཊྛཾ ཨཱ་རོ་པེ་ཏྭཱ ཨ་གྒིཾ ད་ཏྭཱ དྭཱ་རཾ ཐ་ཀེ་ཏྭཱ དྭཱ་རེ ནི་སཱི་ད་ནྟི. བྷི་ཀྑཱུ [ཐེ་རཱ ཙ བྷི་ཀྑཱུ (སྱཱ. ཀཾ.)] ཨུ་ཎྷཱ་བྷི་ཏ་ཏྟཱ དྭཱ་རཾ ཨ་ལ་བྷ་མཱ་ནཱ མུ་ཙྪི་ཏཱ པ་པ་ཏ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཛ་ནྟཱ་གྷ་རེ ཐེ་རེ་ཧི བྷི་ཀྑཱུ་ཧི ནི་ཝཱ་རི་ཡ་མཱ་ནཱ ཨ་ནཱ་ད་རི་ཡཾ པ་ཊི་ཙྩ པ་ཧཱུ་ཏཾ ཀ་ཊྛཾ ཨཱ་རོ་པེ་ཏྭཱ ཨ་གྒིཾ ད་ཏྭཱ དྭཱ་རཾ ཐ་ཀེ་ཏྭཱ དྭཱ་རེ ནི་སཱི་དི་སྶ་ནྟི! བྷི་ཀྑཱུ ཨུ་ཎྷཱ་བྷི་ཏ་ཏྟཱ དྭཱ་རཾ ཨ་ལ་བྷ་མཱ་ནཱ མུ་ཙྪི་ཏཱ པ་པ་ཏ་ནྟཱི’’ཏི. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑཱུ ཛ་ནྟཱ་གྷ་རེ ཐེ་རེ་ཧི བྷི་ཀྑཱུ་ཧི ནི་ཝཱ་རི་ཡ་མཱ་ནཱ ཨ་ནཱ་ད་རི་ཡཾ པ་ཊི་ཙྩ པ་ཧཱུ་ཏཾ ཀ་ཊྛཾ ཨཱ་རོ་པེ་ཏྭཱ ཨ་གྒིཾ ད་ཏྭཱ དྭཱ་རཾ ཐ་ཀེ་ཏྭཱ དྭཱ་རེ ནི་སཱི་ད་ནྟི; བྷི་ཀྑཱུ ཨུ་ཎྷཱ་བྷི་ཏ་ཏྟཱ དྭཱ་རཾ ཨ་ལ་བྷ་མཱ་ནཱ མུ་ཙྪི་ཏཱ པ་པ་ཏ་ནྟཱི’’ཏི? ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཛ་ནྟཱ་གྷ་རེ ཐེ་རེ་ན བྷི་ཀྑུ་ནཱ ནི་ཝཱ་རི་ཡ་མཱ་ནེ་ན ཨ་ནཱ་ད་རི་ཡཾ པ་ཊི་ཙྩ པ་ཧཱུ་ཏཾ ཀ་ཊྛཾ ཨཱ་རོ་པེ་ཏྭཱ ཨ་གྒི དཱ་ཏ་བྦོ. ཡོ ད་དེ་ཡྻ, ཨཱ་པ་ཏྟི དུ་ཀྐ་ཊ་སྶ. ན, བྷི་ཀྑ་ཝེ, དྭཱ་རཾ ཐ་ཀེ་ཏྭཱ དྭཱ་རེ ནི་སཱི་དི་ཏ་བྦཾ. ཡོ ནི་སཱི་དེ་ཡྻ, ཨཱ་པ་ཏྟི དུ་ཀྐ་ཊ་སྶ.

༣༧༢. ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ ཛ་ནྟཱ་གྷ་ར་ཝ་ཏྟཾ པ་ཉྙ་པེ་སྶཱ་མི ཡ་ཐཱ བྷི་ཀྑཱུ་ཧི ཛ་ནྟཱ་གྷ་རེ ས་མྨཱ ཝ་ཏྟི་ཏ་བྦཾ. ཡོ པ་ཋ་མཾ ཛ་ནྟཱ་གྷ་རཾ ག་ཙྪ་ཏི, ས་ཙེ ཚཱ་རི་ཀཱ ཨུ་སྶ་ནྣཱ ཧོ་ཏི, ཚཱ་རི་ཀཱ ཚ་ཌྜེ་ཏ་བྦཱ. ས་ཙེ ཛ་ནྟཱ་གྷ་རཾ ཨུ་ཀླཱ་པཾ ཧོ་ཏི, ཛ་ནྟཱ་གྷ་རཾ ས་མྨ་ཛྫི་ཏ་བྦཾ. ས་ཙེ པ་རི་བྷ་ཎྜཾ ཨུ་ཀླཱ་པཾ ཧོ་ཏི, པ་རི་བྷ་ཎྜཾ ས་མྨ་ཛྫི་ཏ་བྦཾ. ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཛ་ནྟཱ་གྷ་ར་སཱ་ལཱ ཨུ་ཀླཱ་པཱ ཧོ་ཏི, ཛ་ནྟཱ་གྷ་ར་སཱ་ལཱ ས་མྨ་ཛྫི་ཏ་བྦཱ.

‘‘ཙུ་ཎྞཾ ས་ནྣེ་ཏ་བྦཾ, མ་ཏྟི་ཀཱ ཏེ་མེ་ཏ་བྦཱ, ཨུ་ད་ཀ་དོ་ཎི་ཀཱ་ཡ ཨུ་ད་ཀཾ ཨཱ་སི་ཉྩི་ཏ་བྦཾ. ཛ་ནྟཱ་གྷ་རཾ པ་ཝི་ས་ནྟེ་ན མ་ཏྟི་ཀཱ་ཡ མུ་ཁཾ མ་ཀྑེ་ཏྭཱ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཾ པ་ཝི་སི་ཏ་བྦཾ. ན ཐེ་རེ བྷི་ཀྑཱུ ཨ་ནུ་པ་ཁ་ཛྫ ནི་སཱི་དི་ཏ་བྦཾ. ན ན་ཝཱ བྷི་ཀྑཱུ ཨཱ་ས་ནེ་ན པ་ཊི་བཱ་ཧི་ཏ་བྦཱ. ས་ཙེ ཨུ་སྶ་ཧ་ཏི, ཛ་ནྟཱ་གྷ་རེ ཐེ་རཱ་ནཾ བྷི་ཀྑཱུ་ནཾ པ་རི་ཀ་མྨཾ ཀཱ་ཏ་བྦཾ. ཛ་ནྟཱ་གྷ་རཱ ནི་ཀྑ་མ་ནྟེ་ན ཛ་ནྟཱ་གྷ་ར་པཱི་ཋཾ ཨཱ་དཱ་ཡ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཱ ནི་ཀྑ་མི་ཏ་བྦཾ. ས་ཙེ ཨུ་སྶ་ཧ་ཏི, ཨུ་ད་ཀེ་པི ཐེ་རཱ་ནཾ བྷི་ཀྑཱུ་ནཾ པ་རི་ཀ་མྨཾ ཀཱ་ཏ་བྦཾ. ན ཐེ་རཱ་ནཾ བྷི་ཀྑཱུ་ནཾ པུ་ར་ཏོ་པི ན་ཧཱ་ཡི་ཏ་བྦཾ, ན ཨུ་པ་རི་ཏོ་པི ན་ཧཱ་ཡི་ཏ་བྦཾ. ན་ཧཱ་ཏེ་ན ཨུ་ཏྟ་ར་ནྟེ་ན ཨོ་ཏ་ར་ནྟཱ་ནཾ མ་གྒོ དཱ་ཏ་བྦོ. ཡོ པ་ཙྪཱ ཛ་ནྟཱ་གྷ་རཱ ནི་ཀྑ་མ་ཏི, ས་ཙེ ཛ་ནྟཱ་གྷ་རཾ ཙི་ཀྑ་ལླཾ ཧོ་ཏི, དྷོ་ཝི་ཏ་བྦཾ. མ་ཏྟི་ཀཱ་དོ་ཎི་ཀཾ དྷོ་ཝི་ཏྭཱ ཛ་ནྟཱ་གྷ་ར་པཱི་ཋཾ པ་ཊི་སཱ་མེ་ཏྭཱ ཨ་གྒིཾ ཝི་ཛ྄ཛྷཱ་པེ་ཏྭཱ དྭཱ་རཾ ཐ་ཀེ་ཏྭཱ པ་ཀྐ་མི་ཏ་བྦཾ. ཨི་དཾ ཁོ, བྷི་ཀྑ་ཝེ, བྷི་ཀྑཱུ་ནཾ ཛ་ནྟཱ་གྷ་ར་ཝ་ཏྟཾ ཡ་ཐཱ བྷི་ཀྑཱུ་ཧི ཛ་ནྟཱ་གྷ་རེ ས་མྨཱ ཝ་ཏྟི་ཏ་བྦ’’ནྟི.