༡༠. ཝ་ཙྩ་ཀུ་ཊི་ཝ་ཏྟ་ཀ་ཐཱ
༣༧༣. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ བྲཱ་ཧྨ་ཎ་ཛཱ་ཏི་ཀོ ཝ་ཙྩཾ ཀ་ཏྭཱ ན ཨི་ཙྪ་ཏི ཨཱ་ཙ་མེ་ཏུཾ – ཀོ ཨི་མཾ ཝ་ས་ལཾ དུ་གྒ་ནྡྷཾ ཨཱ་མ་སི་སྶ་ཏཱི་ཏི [ཨཱ་ཙ་མི་སྶ་ཏཱི་ཏི (ཀ.)]. ཏ་སྶ ཝ་ཙྩ་མ་གྒེ ཀི་མི ས་ཎྛཱ་ཏི. ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ‘‘ཀིཾ པ་ན ཏྭཾ, ཨཱ་ཝུ་སོ, ཝ་ཙྩཾ ཀ་ཏྭཱ ན ཨཱ་ཙ་མེ་སཱི’’ཏི? ‘‘ཨེ་ཝ་མཱ་ཝུ་སོ’’ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ ཝ་ཙྩཾ ཀ་ཏྭཱ ན ཨཱ་ཙ་མེ་སྶ་ཏཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར ཏྭཾ, བྷི་ཀྑུ, ཝ་ཙྩཾ ཀ་ཏྭཱ ན ཨཱ་ཙ་མེ་སཱི’’ཏི? ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཝ་ཙྩཾ ཀ་ཏྭཱ ས་ཏི ཨུ་ད་ཀེ ནཱ་ཙ་མེ་ཏ་བྦཾ. ཡོ ནཱ་ཙ་མེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི.
ཏེ་ན ཁོ པ་ན ས་མ་ཡེ་ན བྷི་ཀྑཱུ ཝ་ཙྩ་ཀུ་ཊི་ཡཱ ཡ་ཐཱ་ཝུ་ཌྜྷཾ ཝ་ཙྩཾ ཀ་རོ་ནྟི. ན་ཝ་ཀཱ བྷི་ཀྑཱུ པ་ཋ་མ་ཏ་རཾ ཨཱ་ག་ནྟྭཱ ཝ་ཙྩི་ཏཱ ཨཱ་ག་མེ་ནྟི. ཏེ ཝ་ཙྩཾ ས་ནྡྷཱ་རེ་ནྟཱ མུ་ཙྪི་ཏཱ པ་པ་ཏ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར བྷི་ཀྑ་ཝེ…པེ… ས་ཙྩཾ བྷ་ག་ཝཱ་ཏི…པེ… ‘‘ན, བྷི་ཀྑ་ཝེ, ཝ་ཙྩ་ཀུ་ཊི་ཡཱ ཡ་ཐཱ་ཝུ་ཌྜྷཾ ཝ་ཙྩོ ཀཱ་ཏ་བྦོ. ཡོ ཀ་རེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་ག་ཏ་པ་ཊི་པཱ་ཊི་ཡཱ ཝ་ཙྩཾ ཀཱ་ཏུ’’ནྟི.
ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཨ་ཏི་ས་ཧ་སཱ་པི ཝ་ཙྩ་ཀུ་ཊིཾ པ་ཝི་ས་ནྟི, ཨུ་བྦྷ་ཛི་ཏྭཱ་པི [ཨུ་བྦྷུ་ཛྫི་ཏྭཱ་པི (སཱི.), ཨུ་བྦྷུ་ཛི་ཏྭཱ (སྱཱ.)] པ་ཝི་ས་ནྟི, ནི་ཏྠུ་ན་ནྟཱ་པི ཝ་ཙྩཾ ཀ་རོ་ནྟི, ད་ནྟ་ཀ་ཊྛཾ ཁཱ་ད་ནྟཱ་པི ཝ་ཙྩཾ ཀ་རོ་ནྟི, བ་ཧི་དྡྷཱ་པི ཝ་ཙྩ་དོ་ཎི་ཀཱ་ཡ ཝ་ཙྩཾ ཀ་རོ་ནྟི, བ་ཧི་དྡྷཱ་པི པ་སྶཱ་ཝ་དོ་ཎི་ཀཱ་ཡ པ་སྶཱ་ཝཾ ཀ་རོ་ནྟི, པ་སྶཱ་ཝ་དོ་ཎི་ཀཱ་ཡ་པི ཁེ་ལ༹ཾ ཀ་རོ་ནྟི, ཕ་རུ་སེ་ན་པི ཀ་ཊྛེ་ན ཨ་ཝ་ལེ་ཁ་ནྟི, ཨ་ཝ་ལེ་ཁ་ན་ཀ་ཊྛ་མྤི ཝ་ཙྩ་ཀཱུ་པ་མྷི པཱ་ཏེ་ནྟི, ཨ་ཏི་ས་ཧ་སཱ་པི ནི་ཀྑ་མ་ནྟི, ཨུ་བྦྷ་ཛི་ཏྭཱ་པི ནི་ཀྑ་མ་ནྟི, ཙ་པུ་ཙ་པུ་ཀཱ་ར་ཀ་མྤི ཨཱ་ཙ་མེ་ནྟི, ཨཱ་ཙ་མ་ན་ས་རཱ་ཝ་ཀེ་པི ཨུ་ད་ཀཾ སེ་སེ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨ་ཏི་ས་ཧ་སཱ་པི ཝ་ཙྩ་ཀུ་ཊིཾ པ་ཝི་སི་སྶ་ནྟི, ཨུ་བྦྷ་ཛི་ཏྭཱ་པི པ་ཝི་སི་སྶ་ནྟི, ནི་ཏྠུ་ན་ནྟཱ་པི ཝ་ཙྩཾ ཀ་རི་སྶ་ནྟི, ད་ནྟ་ཀ་ཊྛཾ ཁཱ་ད་ནྟཱ་པི ཝ་ཙྩཾ ཀ་རི་སྶ་ནྟི, བ་ཧི་དྡྷཱ་པི ཝ་ཙྩ་དོ་ཎི་ཀཱ་ཡ ཝ་ཙྩཾ ཀ་རི་སྶ་ནྟི, བ་ཧི་དྡྷཱ་པི པ་སྶཱ་ཝ་དོ་ཎི་ཀཱ་ཡ པ་སྶཱ་ཝཾ ཀ་རི་སྶ་ནྟི, པ་སྶཱ་ཝ་དོ་ཎི་ཀཱ་ཡ་པི ཁེ་ལ༹ཾ ཀ་རི་སྶ་ནྟི, ཕ་རུ་སེ་ན་པི ཀ་ཊྛེ་ན ཨ་ཝ་ལེ་ཁི་སྶ་ནྟི, ཨ་ཝ་ལེ་ཁ་ན་ཀ་ཊྛ་མྤི ཝ་ཙྩ་ཀཱུ་པ་མྷི པཱ་ཏེ་སྶ་ནྟི, ཨ་ཏི་ས་ཧ་སཱ་པི ནི་ཀྑ་མི་སྶ་ནྟི, ཨུ་བྦྷ་ཛི་ཏྭཱ་པི ནི་ཀྑ་མི་སྶ་ནྟི, ཙ་པུ་ཙ་པུ་ཀཱ་ར་ཀ་མྤི ཨཱ་ཙ་མེ་སྶ་ནྟི, ཨཱ་ཙ་མ་ན་ས་རཱ་ཝ་ཀེ་པི ཨུ་ད་ཀཾ སེ་སེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ…པེ… ས་ཙྩཾ བྷ་ག་ཝཱ་ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༣༧༤. ‘‘ཏེ་ན ཧི, བྷི་ཀྑ་ཝེ, བྷི་ཀྑཱུ་ནཾ ཝ་ཙྩ་ཀུ་ཊི་ཝ་ཏྟཾ པ་ཉྙ་པེ་སྶཱ་མི ཡ་ཐཱ བྷི་ཀྑཱུ་ཧི ཝ་ཙྩ་ཀུ་ཊི་ཡཱ ས་མྨཱ ཝ་ཏྟི་ཏ་བྦཾ. ཡོ ཝ་ཙྩ་ཀུ་ཊིཾ ག་ཙྪ་ཏི ཏེ་ན བ་ཧི ཋི་ཏེ་ན [བ་ཧི ཋི་ཏེ་ན (སཱི. ཀ.)] ཨུ་ཀྐཱ་སི་ཏ་བྦཾ. ཨ་ནྟོ ནི་སི་ནྣེ་ན་པི ཨུ་ཀྐཱ་སི་ཏ་བྦཾ. ཙཱི་ཝ་ར་ཝཾ་སེ ཝཱ ཙཱི་ཝ་ར་ར་ཛྫུ་ཡཱ ཝཱ ཙཱི་ཝ་རཾ ནི་ཀྑི་པི་ཏྭཱ སཱ་དྷུ་ཀཾ ཨ་ཏ་ར་མཱ་ནེ་ན ཝ་ཙྩ་ཀུ་ཊཱི པ་ཝི་སི་ཏ་བྦཱ. ནཱ་ཏི་ས་ཧ་སཱ པ་ཝི་སི་ཏ་བྦཱ. ན ཨུ་བྦྷ་ཛི་ཏྭཱ པ་ཝི་སི་ཏ་བྦཱ. ཝ་ཙྩ་པཱ་དུ་ཀཱ་ཡ ཋི་ཏེ་ན ཨུ་བྦྷ་ཛི་ཏ་བྦཾ. ན ནི་ཏྠུ་ན་ནྟེ་ན ཝ་ཙྩོ ཀཱ་ཏ་བྦོ. ན ད་ནྟ་ཀ་ཊྛཾ ཁཱ་ད་ནྟེ་ན ཝ་ཙྩོ ཀཱ་ཏ་བྦོ. ན བ་ཧི་དྡྷཱ ཝ་ཙྩ་དོ་ཎི་ཀཱ་ཡ ཝ་ཙྩོ ཀཱ་ཏ་བྦོ. ན བ་ཧི་དྡྷཱ པ་སྶཱ་ཝ་དོ་ཎི་ཀཱ་ཡ པ་སྶཱ་ཝོ ཀཱ་ཏ་བྦོ. ན པ་སྶཱ་ཝ་དོ་ཎི་ཀཱ་ཡ ཁེ་ལོ༹ ཀཱ་ཏ་བྦོ. ན ཕ་རུ་སེ་ན ཀ་ཊྛེ་ན ཨ་ཝ་ལེ་ཁི་ཏ་བྦཾ. ན ཨ་ཝ་ལེ་ཁ་ན་ཀ་ཊྛཾ ཝ་ཙྩ་ཀཱུ་པ་མྷི པཱ་ཏེ་ཏ་བྦཾ. ཝ་ཙྩ་པཱ་དུ་ཀཱ་ཡ ཋི་ཏེ་ན པ་ཊི་ཙྪཱ་དེ་ཏ་བྦཾ. ནཱ་ཏི་ས་ཧ་སཱ ནི་ཀྑ་མི་ཏ་བྦཾ. ན ཨུ་བྦྷ་ཛི་ཏྭཱ ནི་ཀྑ་མི་ཏ་བྦཾ. ཨཱ་ཙ་མ་ན་པཱ་དུ་ཀཱ་ཡ ཋི་ཏེ་ན ཨུ་བྦྷ་ཛི་ཏ་བྦཾ. ན ཙ་པུ་ཙ་པུ་ཀཱ་ར་ཀཾ ཨཱ་ཙ་མེ་ཏ་བྦཾ. ན ཨཱ་ཙ་མ་ན་ས་རཱ་ཝ་ཀེ ཨུ་ད་ཀཾ སེ་སེ་ཏ་བྦཾ. ཨཱ་ཙ་མ་ན་པཱ་དུ་ཀཱ་ཡ ཋི་ཏེ་ན པ་ཊི་ཙྪཱ་དེ་ཏ་བྦཾ.
‘‘ས་ཙེ ཝ་ཙྩ་ཀུ་ཊི ཨུ་ཧ་ཏཱ [ཨཱུ་ཧ་ཏཱ (སཱི. སྱཱ.)] ཧོ་ཏི, དྷོ་ཝི་ཏ་བྦཱ. ས་ཙེ ཨ་ཝ་ལེ་ཁ་ན་པི་དྷ་རོ པཱུ་རོ ཧོ་ཏི, ཨ་ཝ་ལེ་ཁ་ན་ཀ་ཊྛཾ ཚ་ཌྜེ་ཏ་བྦཾ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ས་ཙེ པ་རི་བྷ་ཎྜཾ ཨུ་ཀླཱ་པཾ ཧོ་ཏི, པ་རི་བྷ་ཎྜཾ ས་མྨ་ཛྫི་ཏ་བྦཾ. ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ. ཨི་དཾ ཁོ, བྷི་ཀྑ་ཝེ, བྷི་ཀྑཱུ་ནཾ ཝ་ཙྩ་ཀུ་ཊི་ཝ་ཏྟཾ ཡ་ཐཱ བྷི་ཀྑཱུ་ཧི ཝ་ཙྩ་ཀུ་ཊི་ཡཱ ས་མྨཱ ཝ་ཏྟི་ཏ་བྦ’’ནྟི.