༧. ཨཱ་ར་ཉྙི་ཀ་ཝ་ཏྟ་ཀ་ཐཱ

༣༦༧. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ ཨ་ར་ཉྙེ ཝི་ཧ་ར་ནྟི. ཏེ ནེ་ཝ པཱ་ནཱི་ཡཾ ཨུ་པ་ཊྛཱ་པེ་ནྟི, ན པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ནྟི, ན ཨ་གྒིཾ ཨུ་པ་ཊྛཱ་པེ་ནྟི, ན ཨ་ར་ཎི་ས་ཧི་ཏཾ ཨུ་པ་ཊྛཱ་པེ་ནྟི, ན ན་ཀྑ་ཏྟ་པ་དཱ་ནི ཛཱ་ན་ནྟི, ན དི་སཱ་བྷཱ་གཾ ཛཱ་ན་ནྟི. ཙོ་རཱ ཏ་ཏྠ ག་ནྟྭཱ ཏེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཨ་ཏྠི, བྷ་ནྟེ, པཱ་ནཱི་ཡ’’ནྟི? ‘‘ན་ཏྠཱ་ཝུ་སོ’’ཏི. ‘‘ཨ་ཏྠི, བྷ་ནྟེ, པ་རི་བྷོ་ཛ་ནཱི་ཡ’’ནྟི? ‘‘ན་ཏྠཱ་ཝུ་སོ’’ཏི. ‘‘ཨ་ཏྠི, བྷ་ནྟེ, ཨ་གྒཱི’’ཏི? ‘‘ན་ཏྠཱ་ཝུ་སོ’’ཏི. ‘‘ཨ་ཏྠི, བྷ་ནྟེ, ཨ་ར་ཎི་ས་ཧི་ཏ’’ནྟི? ‘‘ན་ཏྠཱ་ཝུ་སོ’’ཏི. ( ) [(ཨ་ཏྠི བྷ་ནྟེ ན་ཀྑ་ཏྟ་པ་དཱ་ནཱི་ཏི, ན ཛཱ་ནཱ་མ ཨཱ་ཝུ་སོ་ཏི, ཨ་ཏྠི བྷ་ནྟེ དི་སཱ་བྷཱ་ག་ནྟི, ན ཛཱ་ནཱ་མ ཨཱ་ཝུ་སོ་ཏི.) སཱི. ཝི་མ་ཏི་ཊཱི་ཀཱ་ཡ པ་ན ས་མེ་ཏི] ‘‘ཀེ་ན་ཛྫ, བྷ་ནྟེ, ཡུ་ཏྟ’’ནྟི? ‘‘ན ཁོ མ་ཡཾ, ཨཱ་ཝུ་སོ, ཛཱ་ནཱ་མཱ’’ཏི. ‘‘ཀ་ཏ་མཱ་ཡཾ, བྷ་ནྟེ, དི་སཱ’’ཏི? ‘‘ན ཁོ མ་ཡཾ, ཨཱ་ཝུ་སོ, ཛཱ་ནཱ་མཱ’’ཏི. ཨ་ཐ ཁོ ཏེ ཙོ་རཱ – ‘ནེ་ཝི་མེ་སཾ པཱ་ནཱི་ཡཾ ཨ་ཏྠི, ན པ་རི་བྷོ་ཛ་ནཱི་ཡཾ ཨ་ཏྠི, ན ཨ་གྒི ཨ་ཏྠི, ན ཨ་ར་ཎི་ས་ཧི་ཏཾ ཨ་ཏྠི, ན ན་ཀྑ་ཏྟ་པ་དཱ་ནི ཛཱ་ན་ནྟི, ན དི་སཱ་བྷཱ་གཾ ཛཱ་ན་ནྟི; ཙོ་རཱ ཨི་མེ, ན་ཡི་མེ བྷི་ཀྑཱུ’ཏི – ཨཱ་ཀོ་ཊེ་ཏྭཱ པ་ཀྐ་མིཾ་སུ. ཨ་ཐ ཁོ ཏེ བྷི་ཀྑཱུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –

༣༦༨. ‘‘ཏེ་ན ཧི, བྷི་ཀྑ་ཝེ, ཨཱ་ར་ཉྙི་ཀཱ་ནཾ བྷི་ཀྑཱུ་ནཾ ཝ་ཏྟཾ པ་ཉྙ་པེ་སྶཱ་མི ཡ་ཐཱ ཨཱ་ར་ཉྙི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦཾ. ཨཱ་ར་ཉྙི་ཀེ་ན, བྷི་ཀྑ་ཝེ, བྷི་ཀྑུ་ནཱ ཀཱ་ལ་སྶེ་ཝ ཨུ་ཊྛཱ་ཡ པ་ཏྟཾ ཐ་ཝི་ཀཱ་ཡ པ་ཀྑི་པི་ཏྭཱ ཨཾ་སེ ཨཱ་ལ་གྒེ་ཏྭཱ ཙཱི་ཝ་རཾ ཁ་ནྡྷེ ཀ་རི་ཏྭཱ ཨུ་པཱ་ཧ་ནཱ ཨཱ་རོ་ཧི་ཏྭཱ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ པ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཐ་ཀེ་ཏྭཱ སེ་ནཱ་ས་ནཱ ཨོ་ཏ་རི་ཏ་བྦཾ – ཨི་དཱ་ནི གཱ་མཾ པ་ཝི་སི་སྶཱ་མཱི་ཏི. ཨུ་པཱ་ཧ་ནཱ ཨོ་མུ་ཉྩི་ཏྭཱ ནཱི་ཙཾ ཀ་ཏྭཱ པ་པྥོ་ཊེ་ཏྭཱ ཐ་ཝི་ཀཱ་ཡ པ་ཀྑི་པི་ཏྭཱ ཨཾ་སེ ཨཱ་ལ་གྒེ་ཏྭཱ ཏི་མ་ཎྜ་ལཾ པ་ཊི་ཙྪཱ་དེ་ནྟེ་ན པ་རི་མ་ཎྜ་ལཾ ནི་ཝཱ་སེ་ཏྭཱ ཀཱ་ཡ་བ་ནྡྷ་ནཾ བ་ནྡྷི་ཏྭཱ ས་གུ་ཎཾ ཀ་ཏྭཱ ས་ངྒྷཱ་ཊི་ཡོ པཱ་རུ་པི་ཏྭཱ ག་ཎྛི་ཀཾ པ་ཊི་མུ་ཉྩི་ཏྭཱ དྷོ་ཝི་ཏྭཱ པ་ཏྟཾ ག་ཧེ་ཏྭཱ སཱ་དྷུ་ཀཾ ཨ་ཏ་ར་མཱ་ནེ་ན གཱ་མོ པ་ཝི་སི་ཏ་བྦོ. སུ་པྤ་ཊི་ཙྪ་ནྣེ་ན ཨ་ནྟ་ར་གྷ་རེ ག་ནྟ་བྦཾ…པེ… ན ཁ་མྦྷ་ཀ་ཏེ་ན ཨ་ནྟ་ར་གྷ་རེ ག་ནྟ་བྦཾ. ན ཨོ་གུ་ཎྛི་ཏེ་ན ཨ་ནྟ་ར་གྷ་རེ ག་ནྟ་བྦཾ. ན ཨུ་ཀྐུ་ཊི་ཀཱ་ཡ ཨ་ནྟ་ར་གྷ་རེ ག་ནྟ་བྦཾ.

‘‘ནི་ཝེ་ས་ནཾ པ་ཝི་ས་ནྟེ་ན ས་ལླ་ཀྑེ་ཏ་བྦཾ – ‘ཨི་མི་ནཱ པ་ཝི་སི་སྶཱ་མི, ཨི་མི་ནཱ ནི་ཀྑ་མི་སྶཱ་མཱི’ཏི. ནཱ་ཏི་ས་ཧ་སཱ པ་ཝི་སི་ཏ་བྦཾ. ནཱ་ཏི་ས་ཧ་སཱ ནི་ཀྑ་མི་ཏ་བྦཾ. ནཱ་ཏི་དཱུ་རེ ཋཱ་ཏ་བྦཾ. ནཱ་ཙྩཱ་ས་ནྣེ ཋཱ་ཏ་བྦཾ. ནཱ་ཏི་ཙི་རཾ ཋཱ་ཏ་བྦཾ. ནཱ་ཏི་ལ་ཧུཾ ནི་ཝ་ཏྟི་ཏ་བྦཾ. ཋི་ཏ་ཀེ་ན ས་ལླ་ཀྑེ་ཏ་བྦཾ – ‘བྷི་ཀྑཾ དཱ་ཏུ་ཀཱ་མཱ ཝཱ ཨ་དཱ་ཏུ་ཀཱ་མཱ ཝཱ’ཏི. ས་ཙེ ཀ་མྨཾ ཝཱ ནི་ཀྑི་པ་ཏི, ཨཱ་ས་ནཱ ཝཱ ཝུ་ཊྛཱ་ཏི, ཀ་ཊ་ཙྪུཾ ཝཱ པ་རཱ་མ་ས་ཏི, བྷཱ་ཛ་ནཾ ཝཱ པ་རཱ་མ་ས་ཏི, ཋ་པེ་ཏི ཝཱ – དཱ་ཏུ་ཀཱ་མ་སྶཱ་ཏི ཋཱ་ཏ་བྦཾ. བྷི་ཀྑཱ་ཡ དི་ཡྻ་མཱ་ནཱ་ཡ ཝཱ་མེ་ན ཧ་ཏྠེ་ན ས་ངྒྷཱ་ཊིཾ ཨུ་ཙྩཱ་རེ་ཏྭཱ ད་ཀྑི་ཎེ་ན ཧ་ཏྠེ་ན པ་ཏྟཾ པ་ཎཱ་མེ་ཏྭཱ ཨུ་བྷོ་ཧི ཧ་ཏྠེ་ཧི པ་ཏྟཾ པ་ཊི་གྒ་ཧེ་ཏྭཱ བྷི་ཀྑཱ པ་ཊི་གྒ་ཧེ་ཏ་བྦཱ. ན ཙ བྷི་ཀྑཱ་དཱ་ཡི་ཀཱ་ཡ མུ་ཁཾ ཨུ་ལློ་ཀེ་ཏ་བྦཾ. ས་ལླ་ཀྑེ་ཏ་བྦཾ – ‘སཱུ་པཾ དཱ་ཏུ་ཀཱ་མཱ ཝཱ ཨ་དཱ་ཏུ་ཀཱ་མཱ ཝཱ’ཏི. ས་ཙེ ཀ་ཊ་ཙྪུ ཝཱ པ་རཱ་མ་ས་ཏི, བྷཱ་ཛ་ནཾ ཝཱ པ་རཱ་མ་ས་ཏི, ཋ་པེ་ཏི ཝཱ – དཱ་ཏུ་ཀཱ་མ་སྶཱ་ཏི ཋཱ་ཏ་བྦཾ. བྷི་ཀྑཱ་ཡ དི་ནྣཱ་ཡ ས་ངྒྷཱ་ཊི་ཡཱ པ་ཏྟཾ པ་ཊི་ཙྪཱ་དེ་ཏྭཱ སཱ་དྷུ་ཀཾ ཨ་ཏ་ར་མཱ་ནེ་ན ནི་ཝ་ཏྟི་ཏ་བྦཾ.

‘‘སུ་པྤ་ཊི་ཙྪ་ནྣེ་ན ཨ་ནྟ་ར་གྷ་རེ ག་ནྟ་བྦཾ…པེ… ན ཨུ་ཀྐུ་ཊི་ཀཱ་ཡ ཨ་ནྟ་ར་གྷ་རེ ག་ནྟ་བྦཾ. གཱ་མ་ཏོ ནི་ཀྑ་མི་ཏྭཱ པ་ཏྟཾ ཐ་ཝི་ཀཱ་ཡ པ་ཀྑི་པི་ཏྭཱ ཨཾ་སེ ཨཱ་ལ་གྒེ་ཏྭཱ ཙཱི་ཝ་རཾ ས་ངྒྷ་རི་ཏྭཱ སཱི་སེ ཀ་རི་ཏྭཱ ཨུ་པཱ་ཧ་ནཱ ཨཱ་རོ་ཧི་ཏྭཱ ག་ནྟ་བྦཾ.

‘‘ཨཱ་ར་ཉྙི་ཀེ་ན, བྷི་ཀྑ་ཝེ, བྷི་ཀྑུ་ནཱ པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ, ཨ་གྒི ཨུ་པ་ཊྛཱ་པེ་ཏ་བྦོ, ཨ་ར་ཎི་ས་ཧི་ཏཾ ཨུ་པ་ཊྛཱ་པེ་ཏ་བྦཾ, ཀ་ཏྟ་ར་ད་ཎྜོ ཨུ་པ་ཊྛཱ་པེ་ཏ་བྦོ, ན་ཀྑ་ཏྟ་པ་དཱ་ནི ཨུ་གྒ་ཧེ་ཏ་བྦཱ་ནི – ས་ཀ་ལཱ་ནི ཝཱ ཨེ་ཀ་དེ་སཱ་ནི ཝཱ, དི་སཱ་ཀུ་ས་ལེ་ན བྷ་ཝི་ཏ་བྦཾ. ཨི་དཾ ཁོ, བྷི་ཀྑ་ཝེ, ཨཱ་ར་ཉྙི་ཀཱ་ནཾ བྷི་ཀྑཱུ་ནཾ ཝ་ཏྟཾ ཡ་ཐཱ ཨཱ་ར་ཉྙི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦ’’ནྟི.