༢. ཨཱ་ཝཱ་སི་ཀ་ཝ་ཏྟ་ཀ་ཐཱ
༣༥༨. ཏེ་ན ཁོ པ་ན ས་མ་ཡེ་ན ཨཱ་ཝཱ་སི་ཀཱ བྷི་ཀྑཱུ ཨཱ་ག་ནྟུ་ཀེ བྷི་ཀྑཱུ དི་སྭཱ ནེ་ཝ ཨཱ་ས་ནཾ པ་ཉྙ་པེ་ནྟི, ན པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པ་ནྟི, ན པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཎྷ་ནྟི, ན པཱ་ནཱི་ཡེ་ན པུ་ཙྪ་ནྟི [ན པཱ་ནཱི་ཡེ་ན པུ་ཙྪ་ནྟི, ན པ་རི་བྷོ་ཛ་ནཱི་ཡེ་ན པུ་ཙྪ་ནྟི (སྱཱ. ཀཾ.)], ན ཝུ་ཌྜྷ་ཏ་རེ་པི ཨཱ་ག་ནྟུ་ཀེ བྷི་ཀྑཱུ ཨ་བྷི་ཝཱ་དེ་ནྟི, ན སེ་ནཱ་ས་ནཾ པ་ཉྙ་པེ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཝཱ་སི་ཀཱ བྷི་ཀྑཱུ ཨཱ་ག་ནྟུ་ཀེ བྷི་ཀྑཱུ དི་སྭཱ ནེ་ཝ ཨཱ་ས་ནཾ པ་ཉྙ་པེ་སྶ་ནྟི, ན པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་སྶ་ནྟི, ན པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧི་སྶ་ནྟི, ན པཱ་ནཱི་ཡེ་ན པུ་ཙྪི་སྶ་ནྟི, ཝུ་ཌྜྷ་ཏ་རེ་པི ཨཱ་ག་ནྟུ་ཀེ བྷི་ཀྑཱུ ན ཨ་བྷི་ཝཱ་དེ་སྶ་ནྟི, ན སེ་ནཱ་ས་ནཾ པ་ཉྙ་པེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་རཾ, བྷི་ཀྑ་ཝེ…པེ… ས་ཙྩཾ བྷ་ག་ཝཱ་ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༣༥༩. ‘‘ཏེ་ན ཧི, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ ཝ་ཏྟཾ པ་ཉྙ་པེ་སྶཱ་མི ཡ་ཐཱ ཨཱ་ཝཱ་སི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦཾ. ཨཱ་ཝཱ་སི་ཀེ་ན, བྷི་ཀྑ་ཝེ, བྷི་ཀྑུ་ནཱ ཨཱ་ག་ནྟུ་ཀཾ བྷི་ཀྑུཾ ཝུ་ཌྜྷ་ཏ་རཾ དི་སྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏ་བྦཾ, པཱ་ནཱི་ཡེ་ན པུ་ཙྪི་ཏ་བྦོ [པཱ་ནཱི་ཡེ་ན པུ་ཙྪི་ཏ་བྦོ, པ་རི་བྷོ་ཛ་ནཱི་ཡེ་ན པུ་ཙྪི་ཏ་བྦོ (སྱཱ.)]. ས་ཙེ ཨུ་སྶ་ཧ་ཏི, ཨུ་པཱ་ཧ་ནཱ པུ་ཉྪི་ཏ་བྦཱ. ཨུ་པཱ་ཧ་ནཱ པུ་ཉྪ་ནྟེ་ན པ་ཋ་མཾ སུ་ཀྑེ་ན ཙོ་ལ༹་ཀེ་ན པུ་ཉྪི་ཏ་བྦཱ, པ་ཙྪཱ ཨ་ལླེ་ན. ཨུ་པཱ་ཧ་ནཱ་པུ་ཉྪ་ན་ཙོ་ལ༹་ཀཾ དྷོ་ཝི་ཏྭཱ [དྷོ་ཝི་ཏྭཱ པཱི་ལེ༹་ཏྭཱ (སྱཱ.)] ཨེ་ཀ་མ་ནྟཾ ཝི་སྶ་ཛྫེ་ཏ་བྦཾ.
‘‘ཨཱ་ག་ནྟུ་ཀོ བྷི་ཀྑུ ཝུ་ཌྜྷ་ཏ་རོ ཨ་བྷི་ཝཱ་དེ་ཏ་བྦོ. སེ་ནཱ་ས་ནཾ པ་ཉྙ་པེ་ཏ་བྦཾ – ‘ཨེ་ཏཾ ཏེ སེ་ནཱ་ས་ནཾ པཱ་པུ་ཎཱ་ཏཱི’ཏི. ཨ་ཛ྄ཛྷཱ་ཝུ་ཊྛཾ ཝཱ ཨ་ན་ཛ྄ཛྷཱ་ཝུ་ཊྛཾ ཝཱ ཨཱ་ཙི་ཀྑི་ཏ་བྦཾ. གོ་ཙ་རོ ཨཱ་ཙི་ཀྑི་ཏ་བྦོ. ཨ་གོ་ཙ་རོ ཨཱ་ཙི་ཀྑི་ཏ་བྦོ. སེ་ཀྑ་ས་མྨ་ཏཱ་ནི ཀུ་ལཱ་ནི ཨཱ་ཙི་ཀྑི་ཏ་བྦཱ་ནི. ཝ་ཙྩ་ཊྛཱ་ནཾ ཨཱ་ཙི་ཀྑི་ཏ་བྦཾ. པ་སྶཱ་ཝ་ཊྛཱ་ནཾ ཨཱ་ཙི་ཀྑི་ཏ་བྦཾ. པཱ་ནཱི་ཡཾ ཨཱ་ཙི་ཀྑི་ཏ་བྦཾ. པ་རི་བྷོ་ཛ་ནཱི་ཡཾ ཨཱ་ཙི་ཀྑི་ཏ་བྦཾ. ཀ་ཏྟ་ར་ད་ཎྜོ ཨཱ་ཙི་ཀྑི་ཏ་བྦོ. ས་ངྒྷ་སྶ ཀ་ཏི་ཀ་ས་ཎྛཱ་ནཾ ཨཱ་ཙི་ཀྑི་ཏ་བྦཾ – ‘ཨི་མཾ ཀཱ་ལཾ པ་ཝི་སི་ཏ་བྦཾ, ཨི་མཾ ཀཱ་ལཾ ནི་ཀྑ་མི་ཏ་བྦ’ནྟི.
‘‘ས་ཙེ ན་ཝ་ཀོ ཧོ་ཏི, ནི་སི་ནྣ་ཀེ་ནེ་ཝ ཨཱ་ཙི་ཀྑི་ཏ་བྦཾ – ‘ཨ་ཏྲ པ་ཏྟཾ ནི་ཀྑི་པཱ་ཧི, ཨ་ཏྲ ཙཱི་ཝ་རཾ ནི་ཀྑི་པཱ་ཧི, ཨི་དཾ ཨཱ་ས་ནཾ ནི་སཱི་དཱ་ཧཱི’ཏི. པཱ་ནཱི་ཡཾ ཨཱ་ཙི་ཀྑི་ཏ་བྦཾ. པ་རི་བྷོ་ཛ་ནཱི་ཡཾ ཨཱ་ཙི་ཀྑི་ཏ་བྦཾ. ཨུ་པཱ་ཧ་ནཱ་པུ་ཉྪ་ན་ཙོ་ལ༹་ཀཾ ཨཱ་ཙི་ཀྑི་ཏ་བྦཾ. ཨཱ་ག་ནྟུ་ཀོ བྷི་ཀྑུ ན་ཝ་ཀོ ཨ་བྷི་ཝཱ་དཱ་པེ་ཏ་བྦོ. སེ་ནཱ་ས་ནཾ ཨཱ་ཙི་ཀྑི་ཏ་བྦཾ – ‘ཨེ་ཏཾ ཏེ སེ་ནཱ་ས་ནཾ པཱ་པུ་ཎཱ་ཏཱི’ཏི. ཨ་ཛ྄ཛྷཱ་ཝུ་ཊྛཾ ཝཱ ཨ་ན་ཛ྄ཛྷཱ་ཝུ་ཊྛཾ ཝཱ ཨཱ་ཙི་ཀྑི་ཏ་བྦཾ. གོ་ཙ་རོ ཨཱ་ཙི་ཀྑི་ཏ་བྦོ. ཨ་གོ་ཙ་རོ ཨཱ་ཙི་ཀྑི་ཏ་བྦོ. སེ་ཀྑ་ས་མྨ་ཏཱ་ནི ཀུ་ལཱ་ནི ཨཱ་ཙི་ཀྑི་ཏ་བྦཱ་ནི. ཝ་ཙྩ་ཊྛཱ་ནཾ ཨཱ་ཙི་ཀྑི་ཏ་བྦཾ. པ་སྶཱ་ཝ་ཊྛཱ་ནཾ ཨཱ་ཙི་ཀྑི་ཏ་བྦཾ. པཱ་ནཱི་ཡཾ ཨཱ་ཙི་ཀྑི་ཏ་བྦཾ. པ་རི་བྷོ་ཛ་ནཱི་ཡཾ ཨཱ་ཙི་ཀྑི་ཏ་བྦཾ. ཀ་ཏྟ་ར་ད་ཎྜོ ཨཱ་ཙི་ཀྑི་ཏ་བྦོ. ས་ངྒྷ་སྶ ཀ་ཏི་ཀ་ས་ཎྛཱ་ནཾ ཨཱ་ཙི་ཀྑི་ཏ་བྦཾ – ‘ཨི་མཾ ཀཱ་ལཾ པ་ཝི་སི་ཏ་བྦཾ, ཨི་མཾ ཀཱ་ལཾ ནི་ཀྑ་མི་ཏ་བྦ’ནྟི. ཨི་དཾ ཁོ, བྷི་ཀྑ་ཝེ, ཨཱ་ཝཱ་སི་ཀཱ་ནཾ བྷི་ཀྑཱུ་ནཾ ཝ་ཏྟཾ ཡ་ཐཱ ཨཱ་ཝཱ་སི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦ’’ནྟི.