༣. ག་མི་ཀ་ཝ་ཏྟ་ཀ་ཐཱ
༣༦༠. ཏེ་ན ཁོ པ་ན ས་མ་ཡེ་ན ག་མི་ཀཱ བྷི་ཀྑཱུ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ ཨ་པྤ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཝི་ཝ་རི་ཏྭཱ སེ་ནཱ་ས་ནཾ ཨ་ནཱ་པུ་ཙྪཱ པ་ཀྐ་མ་ནྟི. དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ ན་སྶ་ཏི. སེ་ནཱ་ས་ནཾ ཨ་གུ་ཏྟཾ ཧོ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ག་མི་ཀཱ བྷི་ཀྑཱུ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ ཨ་པྤ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཝི་ཝ་རི་ཏྭཱ སེ་ནཱ་ས་ནཾ ཨ་ནཱ་པུ་ཙྪཱ པ་ཀྐ་མི་སྶ་ནྟི! དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ ན་སྶ་ཏི. སེ་ནཱ་ས་ནཾ ཨ་གུ་ཏྟཾ ཧོ་ཏཱི’’ཏི. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ…པེ… ས་ཙྩཾ བྷ་ག་ཝཱ་ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༣༦༡. ‘‘ཏེ་ན ཧི, བྷི་ཀྑ་ཝེ, ག་མི་ཀཱ་ནཾ བྷི་ཀྑཱུ་ནཾ ཝ་ཏྟཾ པ་ཉྙ་པེ་སྶཱ་མི ཡ་ཐཱ ག་མི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦཾ. ག་མི་ཀེ་ན, བྷི་ཀྑ་ཝེ, བྷི་ཀྑུ་ནཱ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ པ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཐ་ཀེ་ཏྭཱ སེ་ནཱ་ས་ནཾ ཨཱ་པུ་ཙྪཱ པ་ཀྐ་མི་ཏ་བྦཾ [ཨཱ་པུ་ཙྪི་ཏ་བྦཾ (སྱཱ.)]. ས་ཙེ བྷི་ཀྑུ ན ཧོ་ཏི, སཱ་མ་ཎེ་རོ ཨཱ་པུ་ཙྪི་ཏ་བྦོ. ས་ཙེ སཱ་མ་ཎེ་རོ ན ཧོ་ཏི, ཨཱ་རཱ་མི་ཀོ ཨཱ་པུ་ཙྪི་ཏ་བྦོ. ས་ཙེ ཨཱ་རཱ་མི་ཀོ ན ཧོ་ཏི, ཨུ་པཱ་ས་ཀོ ཨཱ་པུ་ཙྪི་ཏ་བྦོ. ས་ཙེ ན ཧོ་ཏི བྷི་ཀྑུ ཝཱ སཱ་མ་ཎེ་རོ ཝཱ ཨཱ་རཱ་མི་ཀོ ཝཱ ཨུ་པཱ་ས་ཀོ ཝཱ, ཙ་ཏཱུ་སུ པཱ་སཱ་ཎེ་སུ མ་ཉྩཾ པ་ཉྙ་པེ་ཏྭཱ མ་ཉྩེ མ་ཉྩཾ ཨཱ་རོ་པེ་ཏྭཱ པཱི་ཋེ པཱི་ཋཾ ཨཱ་རོ་པེ་ཏྭཱ སེ་ནཱ་ས་ནཾ ཨུ་པ་རི པུ་ཉྫཾ ཀ་རི་ཏྭཱ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ པ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཐ་ཀེ་ཏྭཱ པ་ཀྐ་མི་ཏ་བྦཾ. ས་ཙེ ཝི་ཧཱ་རོ ཨོ་ཝ་སྶ་ཏི, ས་ཙེ ཨུ་སྶ་ཧ་ཏི, ཚཱ་དེ་ཏ་བྦོ, ཨུ་སྶུ་ཀཾ ཝཱ ཀཱ་ཏ་བྦཾ – ‘ཀི་ནྟི ནུ ཁོ ཝི་ཧཱ་རོ ཚཱ་དི་ཡེ་ཐཱ’ཏི. ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཡོ དེ་སོ ཨ་ནོ་ཝ་སྶ་ཀོ ཧོ་ཏི, ཏ་ཏྠ ཙ་ཏཱུ་སུ པཱ་སཱ་ཎེ་སུ མ་ཉྩཾ པ་ཉྙ་པེ་ཏྭཱ མ་ཉྩེ མ་ཉྩཾ ཨཱ་རོ་པེ་ཏྭཱ པཱི་ཋེ པཱི་ཋཾ ཨཱ་རོ་པེ་ཏྭཱ སེ་ནཱ་ས་ནཾ ཨུ་པ་རི པུ་ཉྫཾ ཀ་རི་ཏྭཱ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ པ་ཊི་སཱ་མེ་ཏྭཱ དྭཱ་ར་ཝཱ་ཏ་པཱ་ནཾ ཐ་ཀེ་ཏྭཱ པ་ཀྐ་མི་ཏ་བྦཾ. ས་ཙེ ས་བྦོ ཝི་ཧཱ་རོ ཨོ་ཝ་སྶ་ཏི, ས་ཙེ ཨུ་སྶ་ཧ་ཏི, སེ་ནཱ་ས་ནཾ གཱ་མཾ ཨ་ཏི་ཧ་རི་ཏ་བྦཾ, ཨུ་སྶུ་ཀཾ ཝཱ ཀཱ་ཏ་བྦཾ – ‘ཀི་ནྟི ནུ ཁོ སེ་ནཱ་ས་ནཾ གཱ་མཾ ཨ་ཏི་ཧ་རི་ཡེ་ཐཱ’ཏི. ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཨ་ཛ྄ཛྷོ་ཀཱ་སེ ཙ་ཏཱུ་སུ པཱ་སཱ་ཎེ་སུ མ་ཉྩཾ པ་ཉྙ་པེ་ཏྭཱ མ་ཉྩེ མ་ཉྩཾ ཨཱ་རོ་པེ་ཏྭཱ པཱི་ཋེ པཱི་ཋཾ ཨཱ་རོ་པེ་ཏྭཱ སེ་ནཱ་ས་ནཾ ཨུ་པ་རི པུ་ཉྫཾ ཀ་རི་ཏྭཱ དཱ་རུ་བྷ་ཎྜཾ མ་ཏྟི་ཀཱ་བྷ་ཎྜཾ པ་ཊི་སཱ་མེ་ཏྭཱ ཏི་ཎེ་ན ཝཱ པ་ཎྞེ་ན ཝཱ པ་ཊི་ཙྪཱ་དེ་ཏྭཱ པ་ཀྐ་མི་ཏ་བྦཾ – ཨ་པྤེ་ཝ ནཱ་མ ཨ་ངྒཱ་ནི་པི སེ་སེ་ཡྻུ་ནྟི. ཨི་དཾ ཁོ, བྷི་ཀྑ་ཝེ, ག་མི་ཀཱ་ནཾ བྷི་ཀྑཱུ་ནཾ ཝ་ཏྟཾ ཡ་ཐཱ ག་མི་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦ’’ནྟི.