༡༤. ཨ་ནྟེ་ཝཱ་སི་ཀ་ཝ་ཏྟ་ཀ་ཐཱ
༣༨༡. ཏེ་ན ཁོ པ་ན ས་མ་ཡེ་ན ཨཱ་ཙ་རི་ཡཱ ཨ་ནྟེ་ཝཱ་སི་ཀེ་སུ ན ས་མྨཱ ཝ་ཏྟ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ཙ་རི་ཡཱ ཨ་ནྟེ་ཝཱ་སི་ཀེ་སུ ན ས་མྨཱ ཝ་ཏྟི་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, ཨཱ་ཙ་རི་ཡཱ ཨ་ནྟེ་ཝཱ་སི་ཀེ་སུ ན ས་མྨཱ ཝ་ཏྟ་ནྟཱི’’ཏི? ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༣༨༢. ‘‘ཏེ་ན ཧི, བྷི་ཀྑ་ཝེ, ཨཱ་ཙ་རི་ཡཱ་ནཾ ཨ་ནྟེ་ཝཱ་སི་ཀེ་སུ ཝ་ཏྟཾ པ་ཉྙ་པེ་སྶཱ་མི ཡ་ཐཱ ཨཱ་ཙ་རི་ཡེ་ཧི ཨ་ནྟེ་ཝཱ་སི་ཀེ་སུ ས་མྨཱ ཝ་ཏྟི་ཏ་བྦཾ. [མ་ཧཱ་ཝ. ༧༩] ཨཱ་ཙ་རི་ཡེ་ན, བྷི་ཀྑ་ཝེ, ཨ་ནྟེ་ཝཱ་སི་ཀ་མྷི ས་མྨཱ ཝ་ཏྟི་ཏ་བྦཾ. ཏ་ཏྲཱ་ཡཾ ས་མྨཱ་ཝ་ཏྟ་ནཱ –
‘‘ཨཱ་ཙ་རི་ཡེ་ན, བྷི་ཀྑ་ཝེ, ཨ་ནྟེ་ཝཱ་སི་ཀོ ས་ངྒ་ཧེ་ཏ་བྦོ ཨ་ནུ་གྒ་ཧེ་ཏ་བྦོ ཨུ་དྡེ་སེ་ན པ་རི་པུ་ཙྪཱ་ཡ ཨོ་ཝཱ་དེ་ན ཨ་ནུ་སཱ་ས་ནི་ཡཱ. ས་ཙེ ཨཱ་ཙ་རི་ཡ་སྶ པ་ཏྟོ ཧོ་ཏི, ཨ་ནྟེ་ཝཱ་སི་ཀ་སྶ པ་ཏྟོ ན ཧོ་ཏི, ཨཱ་ཙ་རི་ཡེ་ན ཨ་ནྟེ་ཝཱ་སི་ཀ་སྶ པ་ཏྟོ དཱ་ཏ་བྦོ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ པ་ཏྟོ ཨུ་པྤ་ཛྫི་ཡེ་ཐཱ་ཏི. ས་ཙེ ཨཱ་ཙ་རི་ཡ་སྶ ཙཱི་ཝ་རཾ ཧོ་ཏི, ཨ་ནྟེ་ཝཱ་སི་ཀ་སྶ ཙཱི་ཝ་རཾ ན ཧོ་ཏི, ཨཱ་ཙ་རི་ཡེ་ན ཨ་ནྟེ་ཝཱ་སི་ཀ་སྶ ཙཱི་ཝ་རཾ དཱ་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ ཙཱི་ཝ་རཾ ཨུ་པྤ་ཛྫི་ཡེ་ཐཱ་ཏི. ས་ཙེ ཨཱ་ཙ་རི་ཡ་སྶ པ་རི་ཀྑཱ་རོ ཧོ་ཏི, ཨ་ནྟེ་ཝཱ་སི་ཀ་སྶ པ་རི་ཀྑཱ་རོ ན ཧོ་ཏི, ཨཱ་ཙ་རི་ཡེ་ན ཨ་ནྟེ་ཝཱ་སི་ཀ་སྶ པ་རི་ཀྑཱ་རོ དཱ་ཏ་བྦོ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ པ་རི་ཀྑཱ་རོ ཨུ་པྤ་ཛྫི་ཡེ་ཐཱ་ཏི.
‘‘ས་ཙེ ཨ་ནྟེ་ཝཱ་སི་ཀོ གི་ལཱ་ནོ ཧོ་ཏི, ཀཱ་ལ་སྶེ་ཝ ཨུ་ཊྛཱ་ཡ ད་ནྟ་ཀ་ཊྛཾ དཱ་ཏ་བྦཾ, མུ་ཁོ་ད་ཀཾ དཱ་ཏ་བྦཾ, ཨཱ་ས་ནཾ པ་ཉྙ་པེ་ཏ་བྦཾ. ས་ཙེ ཡཱ་གུ ཧོ་ཏི, བྷཱ་ཛ་ནཾ དྷོ་ཝི་ཏྭཱ ཡཱ་གུ ཨུ་པ་ནཱ་མེ་ཏ་བྦཱ. ཡཱ་གུཾ པཱི་ཏ་སྶ ཨུ་ད་ཀཾ ད་ཏྭཱ བྷཱ་ཛ་ནཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ པ་ཊི་སཱ་མེ་ཏ་བྦཾ. ཨ་ནྟེ་ཝཱ་སི་ཀ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨ་ནྟེ་ཝཱ་སི་ཀོ གཱ་མཾ པ་ཝི་སི་ཏུ་ཀཱ་མོ ཧོ་ཏི, ནི་ཝཱ་ས་ནཾ དཱ་ཏ་བྦཾ, པ་ཊི་ནི་ཝཱ་ས་ནཾ པ་ཊི་གྒ་ཧེ་ཏ་བྦཾ, ཀཱ་ཡ་བ་ནྡྷ་ནཾ དཱ་ཏ་བྦཾ, ས་གུ་ཎཾ ཀ་ཏྭཱ ས་ངྒྷཱ་ཊི་ཡོ དཱ་ཏ་བྦཱ, དྷོ་ཝི་ཏྭཱ པ་ཏྟོ སོ་ད་ཀོ དཱ་ཏ་བྦོ.
‘‘ཨེ་ཏྟཱ་ཝ་ཏཱ ནི་ཝ་ཏྟི་སྶ་ཏཱི་ཏི ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏ་བྦཾ, པ་ཊི་ནི་ཝཱ་ས་ནཾ དཱ་ཏ་བྦཾ, ནི་ཝཱ་ས་ནཾ པ་ཊི་གྒ་ཧེ་ཏ་བྦཾ. ས་ཙེ ཙཱི་ཝ་རཾ སི་ནྣཾ ཧོ་ཏི, མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦཾ, ན ཙ ཨུ་ཎྷེ ཙཱི་ཝ་རཾ ནི་ད་ཧི་ཏ་བྦཾ. ཙཱི་ཝ་རཾ ས་ངྒྷ་རི་ཏ་བྦཾ. ཙཱི་ཝ་རཾ ས་ངྒྷ་ར་ནྟེ་ན ཙ་ཏུ་ར་ངྒུ་ལཾ ཀ་ཎྞཾ ཨུ་སྶཱ་རེ་ཏྭཱ ཙཱི་ཝ་རཾ ས་ངྒྷ་རི་ཏ་བྦཾ – མཱ མ་ཛ྄ཛྷེ བྷ་ངྒོ ཨ་ཧོ་སཱི་ཏི. ཨོ་བྷོ་གེ ཀཱ་ཡ་བ་ནྡྷ་ནཾ ཀཱ་ཏ་བྦཾ.
‘‘ས་ཙེ པི་ཎྜ་པཱ་ཏོ ཧོ་ཏི, ཨ་ནྟེ་ཝཱ་སི་ཀོ ཙ བྷུ་ཉྫི་ཏུ་ཀཱ་མོ ཧོ་ཏི, ཨུ་ད་ཀཾ ད་ཏྭཱ པི་ཎྜ་པཱ་ཏོ ཨུ་པ་ནཱ་མེ་ཏ་བྦོ. ཨ་ནྟེ་ཝཱ་སི་ཀོ པཱ་ནཱི་ཡེ་ན པུ་ཙྪི་ཏ་བྦོ. བྷུ་ཏྟཱ་ཝི་སྶ ཨུ་ད་ཀཾ ད་ཏྭཱ པ་ཏྟཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ ཝོ་ད་ཀཾ ཀ་ཏྭཱ མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦོ, ན ཙ ཨུ་ཎྷེ པ་ཏྟོ ནི་ད་ཧི་ཏ་བྦོ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན…པེ… ཙཱི་ཝ་རཾ ནི་ཀྑི་པ་ནྟེ་ན…པེ… པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ. ཨ་ནྟེ་ཝཱ་སི་ཀ་མྷི ཨུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ པ་ཊི་སཱ་མེ་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨ་ནྟེ་ཝཱ་སི་ཀོ ན་ཧཱ་ཡི་ཏུ་ཀཱ་མོ ཧོ་ཏི, ན་ཧཱ་ནཾ པ་ཊི་ཡཱ་དེ་ཏ་བྦཾ. ས་ཙེ སཱི་ཏེ་ན ཨ་ཏྠོ ཧོ་ཏི, སཱི་ཏཾ པ་ཊི་ཡཱ་དེ་ཏ་བྦཾ. ས་ཙེ ཨུ་ཎྷེ་ན ཨ་ཏྠོ ཧོ་ཏི, ཨུ་ཎྷཾ པ་ཊི་ཡཱ་དེ་ཏ་བྦཾ.
‘‘ས་ཙེ ཨ་ནྟེ་ཝཱ་སི་ཀོ ཛ་ནྟཱ་གྷ་རཾ པ་ཝི་སི་ཏུ་ཀཱ་མོ ཧོ་ཏི, ཙུ་ཎྞཾ ས་ནྣེ་ཏ་བྦཾ, མ་ཏྟི་ཀཱ ཏེ་མེ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ [ཨཱ་དཱ་ཡ ཨ་ནྟེ་ཝཱ་སི་ཀ་སྶ པི་ཊྛི་ཏོ པི་ཊྛི་ཏོ (ཀ.)] ག་ནྟྭཱ ཛ་ནྟཱ་གྷ་ར་པཱི་ཋཾ ད་ཏྭཱ ཙཱི་ཝ་རཾ པ་ཊི་གྒ་ཧེ་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ, ཙུ་ཎྞཾ དཱ་ཏ་བྦཾ, མ་ཏྟི་ཀཱ དཱ་ཏ་བྦཱ. ས་ཙེ ཨུ་སྶ་ཧ་ཏི ཛ་ནྟཱ་གྷ་རཾ པ་ཝི་སི་ཏ་བྦཾ. ཛ་ནྟཱ་གྷ་རཾ པ་ཝི་ས་ནྟེ་ན མ་ཏྟི་ཀཱ་ཡ མུ་ཁཾ མ་ཀྑེ་ཏྭཱ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཾ པ་ཝི་སི་ཏ་བྦཾ. ན ཐེ་རེ བྷི་ཀྑཱུ ཨ་ནུ་པ་ཁ་ཛྫ ནི་སཱི་དི་ཏ་བྦཾ. ན ན་ཝཱ བྷི་ཀྑཱུ ཨཱ་ས་ནེ་ན པ་ཊི་བཱ་ཧི་ཏ་བྦཱ. ཛ་ནྟཱ་གྷ་རེ ཨ་ནྟེ་ཝཱ་སི་ཀ་སྶ པ་རི་ཀ་མྨཾ ཀཱ་ཏ་བྦཾ. ཛ་ནྟཱ་གྷ་རཱ ནི་ཀྑ་མ་ནྟེ་ན ཛ་ནྟཱ་གྷ་ར་པཱི་ཋཾ ཨཱ་དཱ་ཡ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཱ ནི་ཀྑ་མི་ཏ་བྦཾ.
‘‘ཨུ་ད་ཀེ་པི ཨ་ནྟེ་ཝཱ་སི་ཀ་སྶ པ་རི་ཀ་མྨཾ ཀཱ་ཏ་བྦཾ. ན་ཧཱ་ཏེ་ན པ་ཋ་མ་ཏ་རཾ ཨུ་ཏྟ་རི་ཏྭཱ ཨ་ཏྟ་ནོ ག་ཏྟཾ ཝོ་ད་ཀཾ ཀ་ཏྭཱ ནི་ཝཱ་སེ་ཏྭཱ ཨ་ནྟེ་ཝཱ་སི་ཀ་སྶ ག་ཏྟ་ཏོ ཨུ་ད་ཀཾ པ་མ་ཛྫི་ཏ་བྦཾ, ནི་ཝཱ་ས་ནཾ དཱ་ཏ་བྦཾ, ས་ངྒྷཱ་ཊི དཱ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, ཨ་ནྟེ་ཝཱ་སི་ཀོ པཱ་ནཱི་ཡེ་ན པུ་ཙྪི་ཏ་བྦོ.
‘‘ཡ་སྨིཾ ཝི་ཧཱ་རེ ཨ་ནྟེ་ཝཱ་སི་ཀོ ཝི་ཧ་ར་ཏི, ས་ཙེ སོ ཝི་ཧཱ་རོ ཨུ་ཀླཱ་པོ ཧོ་ཏི, ས་ཙེ ཨུ་སྶ་ཧ་ཏི, སོ་དྷེ་ཏ་བྦོ. ཝི་ཧཱ་རཾ སོ་དྷེ་ནྟེ་ན པ་ཋ་མཾ པ་ཏྟ་ཙཱི་ཝ་རཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ…པེ… ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ.
‘‘ས་ཙེ ཨ་ནྟེ་ཝཱ་སི་ཀ་སྶ ཨ་ན་བྷི་ར་ཏི ཨུ་པྤ་ནྣཱ ཧོ་ཏི, ཨཱ་ཙ་རི་ཡེ་ན ཝཱུ་པ་ཀཱ་སེ་ཏ་བྦོ, ཝཱུ་པ་ཀཱ་སཱ་པེ་ཏ་བྦོ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨ་ནྟེ་ཝཱ་སི་ཀ་སྶ ཀུ་ཀྐུ་ཙྩཾ ཨུ་པྤ་ནྣཾ ཧོ་ཏི, ཨཱ་ཙ་རི་ཡེ་ན ཝི་ནོ་དེ་ཏ་བྦཾ, ཝི་ནོ་དཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨ་ནྟེ་ཝཱ་སི་ཀ་སྶ དི་ཊྛི་ག་ཏཾ ཨུ་པྤ་ནྣཾ ཧོ་ཏི, ཨཱ་ཙ་རི་ཡེ་ན ཝི་ཝེ་ཙེ་ཏ་བྦཾ, ཝི་ཝེ་ཙཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨ་ནྟེ་ཝཱ་སི་ཀོ ག་རུ་དྷ་མྨཾ ཨ་ཛ྄ཛྷཱ་པ་ནྣོ ཧོ་ཏི, པ་རི་ཝཱ་སཱ་ར་ཧོ, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨ་ནྟེ་ཝཱ་སི་ཀ་སྶ པ་རི་ཝཱ་སཾ ད་དེ་ཡྻཱ་ཏི. ས་ཙེ ཨ་ནྟེ་ཝཱ་སི་ཀོ མཱུ་ལཱ་ཡ་པ་ཊི་ཀ་སྶ་ནཱ་ར་ཧོ ཧོ་ཏི, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨ་ནྟེ་ཝཱ་སི་ཀཾ མཱུ་ལཱ་ཡ པ་ཊི་ཀ་སྶེ་ཡྻཱ་ཏི. ས་ཙེ ཨ་ནྟེ་ཝཱ་སི་ཀོ མཱ་ན་ཏྟཱ་ར་ཧོ ཧོ་ཏི, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨ་ནྟེ་ཝཱ་སི་ཀ་སྶ མཱ་ན་ཏྟཾ ད་དེ་ཡྻཱ་ཏི. ས་ཙེ ཨ་ནྟེ་ཝཱ་སི་ཀོ ཨ་བྦྷཱ་ནཱ་ར་ཧོ ཧོ་ཏི, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨ་ནྟེ་ཝཱ་སི་ཀཾ ཨ་བྦྷེ་ཡྻཱ་ཏི. ས་ཙེ ས་ངྒྷོ ཨ་ནྟེ་ཝཱ་སི་ཀ་སྶ ཀ་མྨཾ ཀ་ཏྟུ་ཀཱ་མོ ཧོ་ཏི, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨ་ནྟེ་ཝཱ་སི་ཀ་སྶ ཀ་མྨཾ ན ཀ་རེ་ཡྻ, ལ་ཧུ་ཀཱ་ཡ ཝཱ པ་རི་ཎཱ་མེ་ཡྻཱ་ཏི. ཀ་ཏཾ ཝཱ པ་ན་སྶ ཧོ་ཏི, ས་ངྒྷེ་ན ཀ་མྨཾ, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨཱ་ཙ་རི་ཡེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀོ ས་མྨཱ ཝ་ཏྟེ་ཡྻ, ལོ་མཾ པཱ་ཏེ་ཡྻ, ནེ་ཏྠཱ་རཾ ཝ་ཏྟེ་ཡྻ, ས་ངྒྷོ ཏཾ ཀ་མྨཾ པ་ཊི་པྤ་སྶ་མྦྷེ་ཡྻཱ་ཏི.
‘‘ས་ཙེ ཨ་ནྟེ་ཝཱ་སི་ཀ་སྶ ཙཱི་ཝ་རཾ དྷོ་ཝི་ཏ་བྦཾ ཧོ་ཏི, ཨཱ་ཙ་རི་ཡེ་ན ཨཱ་ཙི་ཀྑི་ཏ་བྦཾ – ཨེ་ཝཾ དྷོ་ཝེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ ཙཱི་ཝ་རཾ དྷོ་ཝི་ཡེ་ཐཱ་ཏི. ས་ཙེ ཨ་ནྟེ་ཝཱ་སི་ཀ་སྶ ཙཱི་ཝ་རཾ ཀཱ་ཏ་བྦཾ ཧོ་ཏི, ཨཱ་ཙ་རི་ཡེ་ན ཨཱ་ཙི་ཀྑི་ཏ་བྦཾ – ཨེ་ཝཾ ཀ་རེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ ཙཱི་ཝ་རཾ ཀ་རི་ཡེ་ཐཱ་ཏི. ས་ཙེ ཨ་ནྟེ་ཝཱ་སི་ཀ་སྶ ར་ཛ་ནཾ པ་ཙི་ཏ་བྦཾ ཧོ་ཏི, ཨཱ་ཙ་རི་ཡེ་ན ཨཱ་ཙི་ཀྑི་ཏ་བྦཾ – ཨེ་ཝཾ པ་ཙེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ ར་ཛ་ནཾ པ་ཙི་ཡེ་ཐཱ་ཏི. ས་ཙེ ཨ་ནྟེ་ཝཱ་སི་ཀ་སྶ ཙཱི་ཝ་རཾ ར་ཛི་ཏ་བྦཾ ཧོ་ཏི, ཨཱ་ཙ་རི་ཡེ་ན ཨཱ་ཙི་ཀྑི་ཏ་བྦཾ – ཨེ་ཝཾ ར་ཛེ་ཡྻཱ་སཱི་ཏི, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨ་ནྟེ་ཝཱ་སི་ཀ་སྶ ཙཱི་ཝ་རཾ ར་ཛི་ཡེ་ཐཱ་ཏི. ཙཱི་ཝ་རཾ ར་ཛ་ནྟེ་ན སཱ་དྷུ་ཀཾ ས་མྤ་རི་ཝ་ཏྟ་ཀཾ ས་མྤ་རི་ཝ་ཏྟ་ཀཾ ར་ཛི་ཏ་བྦཾ. ན ཙ ཨ་ཙྪི་ནྣེ ཐེ་ཝེ པ་ཀྐ་མི་ཏ་བྦཾ. ས་ཙེ ཨ་ནྟེ་ཝཱ་སི་ཀོ གི་ལཱ་ནོ ཧོ་ཏི, ཡཱ་ཝ་ཛཱི་ཝཾ ཨུ་པ་ཊྛཱ་ཏ་བྦོ, ཝུ་ཊྛཱ་ན་མ་སྶ ཨཱ་ག་མེ་ཏ་བྦཾ. ཨི་དཾ ཁོ, བྷི་ཀྑ་ཝེ, ཨཱ་ཙ་རི་ཡཱ་ནཾ ཨ་ནྟེ་ཝཱ་སི་ཀེ་སུ ཝ་ཏྟཾ ཡ་ཐཱ ཨཱ་ཙ་རི་ཡེ་ཧི ཨ་ནྟེ་ཝཱ་སི་ཀེ་སུ ས་མྨཱ ཝ་ཏྟི་ཏ་བྦ’’ནྟི.
ཝ་ཏྟ་ཀྑ་ནྡྷ་ཀོ ཨ་ཊྛ་མོ.
ཨི་མ་མྷི ཁ་ནྡྷ་ཀེ ཝ་ཏྠཱུ ཨེ་ཀཱུ་ན་ཝཱི་ས་ཏི, ཝ་ཏྟཱ ཙུ་དྡ་ས.
ཏ་སྶུ་དྡཱ་ནཾ –
ས་ཨུ་པཱ་ཧ་ནཱ ཚ་ཏྟཱ ཙ, ཨོ་གུ་ཎྛི སཱི་སཾ པཱ་ནཱི་ཡཾ;
ནཱ་བྷི་ཝཱ་དེ ན པུ་ཙྪ་ནྟི, ཨ་ཧི ཨུ་ཛ྄ཛྷ་ནྟི པེ་ས་ལཱ.
ཨོ་མུ་ཉྩི ཚ་ཏྟཾ ཁ་ནྡྷེ ཙ, ཨ་ཏ་ར་ཉྩ པ་ཊི་ཀྐ་མཾ;
པ་ཏྟ་ཙཱི་ཝ་རཾ ནི་ཀྑི་པཱ, པ་ཏི་རཱུ་པ་ཉྩ པུ་ཙྪི་ཏཱ.
ཨཱ་སི་ཉྩེ་ཡྻ དྷོ་ཝི་ཏེ་ན, སུ་ཀྑེ་ན་ལླེ་ནུ་པཱ་ཧ་ནཱ;
ཝུ་ཌྜྷོ ན་ཝ་ཀོ པུ་ཙྪེ་ཡྻ, ཨ་ཛ྄ཛྷཱ་ཝུ་ཊྛ་ཉྩ གོ་ཙ་རཱ.
སེ་ཀྑཱ ཝ་ཙྩཱ པཱ་ནཱི པ་རི, ཀ་ཏྟ་རཾ ཀ་ཏི་ཀཾ ཏ་ཏོ;
ཀཱ་ལཾ མུ་ཧུ་ཏྟཾ ཨུ་ཀླཱ་པོ, བྷཱུ་མ་ཏྠ་ར་ཎཾ ནཱི་ཧ་རེ.
པ་ཊི་པཱ་དོ བྷི་སི་བི་བྦོ, མ་ཉྩ་པཱི་ཋ་ཉྩ མ་ལླ་ཀཾ;
ཨ་པ་སྶེ་ནུ་ལློ་ཀ་ཀ་ཎྞཱ, གེ་རུ་ཀཱ ཀཱ་ལ༹ ཨ་ཀ་ཏཱ.
ས་ངྐཱ་ར་ཉྩ བྷཱུ་མ་ཏྠ་ར་ཎཾ, པ་ཊི་པཱ་ད་ཀཾ མ་ཉྩ་པཱི་ཋཾ;
བྷི་སི ནི་སཱི་ད་ན་མྤི, མ་ལླ་ཀཾ ཨ་པ་སྶེ་ན ཙ.
པ་ཏྟ་ཙཱི་ཝ་རཾ བྷཱུ་མི ཙ, པཱ་ར་ནྟཾ ཨོ་ར་ཏོ བྷོ་གཾ;
པུ་ར་ཏྠི་མཱ པ་ཙྪི་མཱ ཙ, ཨུ་ཏྟ་རཱ ཨ་ཐ ད་ཀྑི་ཎཱ.
སཱི་ཏུ་ཎྷེ ཙ དི་ཝཱ་ར་ཏྟིཾ, པ་རི་ཝེ་ཎ་ཉྩ ཀོ་ཊྛ་ཀོ;
ཨུ་པ་ཊྛཱ་ན་གྒི སཱ་ལཱ ཙ, ཝ་ཏྟཾ ཝ་ཙྩ་ཀུ་ཊཱི་སུ ཙ.
པཱ་ནཱི པ་རི་བྷོ་ཛ་ནི་ཡཱ, ཀུ་མྦྷི ཨཱ་ཙ་མ་ནེ་སུ ཙ;
ཨ་ནོ་པ་མེ་ན པ་ཉྙ་ཏྟཾ, ཝ་ཏྟཾ ཨཱ་ག་ནྟུ་ཀེ་ཧི་མེ [ཝེ (ཀ. ཨེ་ཝ་མུ་པ་རི་པི)].
ནེ་ཝཱ་ས་ནཾ ན ཨུ་ད་ཀཾ, ན པ་ཙྩུ ན ཙ པཱ་ནི་ཡཾ;
ནཱ་བྷི་ཝཱ་དེ ན་པ་ཉྙ་པེ, ཨུ་ཛ྄ཛྷཱ་ཡ་ནྟི ཙ པེ་ས་ལཱ.
ཝུ་ཌྜྷཱ་ས་ན་ཉྩ ཨུ་ད་ཀཾ, པ་ཙྩུ་གྒ་ནྟྭཱ ཙ པཱ་ནི་ཡཾ;
ཨུ་པཱ་ཧ་ནེ ཨེ་ཀ་མ་ནྟཾ, ཨ་བྷི་ཝཱ་དེ ཙ པ་ཉྙ་པེ.
ཝུ་ཏྠཾ གོ་ཙ་ར་སེ་ཀྑོ ཙ, ཋཱ་ནཾ པཱ་ནི་ཡ་བྷོ་ཛ་ནཾ;
ཀ་ཏྟ་རཾ ཀ་ཏི་ཀཾ ཀཱ་ལཾ, ན་ཝ་ཀ་སྶ ནི་སི་ནྣ་ཀེ.
ཨ་བྷི་ཝཱ་ད་ཡེ ཨཱ་ཙི་ཀྑེ, ཡ་ཐཱ ཧེ་ཊྛཱ ཏ་ཐཱ ན་ཡེ;
ནི་དྡི་ཊྛཾ ས་ཏྠ་ཝཱ་ཧེ་ན ཝ་ཏྟཾ ཨཱ་ཝཱ་སི་ཀེ་ཧི་མེ.
ག་མི་ཀཱ དཱ་རུ་མ་ཏྟི ཙ, ཝི་ཝ་རི་ཏྭཱ ན པུ་ཙྪི་ཡ;
ན་སྶ་ནྟི ཙ ཨ་གུ་ཏྟ་ཉྩ, ཨུ་ཛ྄ཛྷཱ་ཡ་ནྟི ཙ པེ་ས་ལཱ.
པ་ཊི་སཱ་མེ་ཏྭཱ ཐ་ཀེ་ཏྭཱ, ཨཱ་པུ་ཙྪི་ཏྭཱ་ཝ པ་ཀྐ་མེ;
བྷི་ཀྑུ ཝཱ སཱ་མ་ཎེ་རོ ཝཱ, ཨཱ་རཱ་མི་ཀོ ཨུ་པཱ་ས་ཀོ.
པཱ་སཱ་ཎ་ཀེ་སུ ཙ པུ་ཉྫཾ, པ་ཊི་སཱ་མེ ཐ་ཀེ་ཡྻ ཙ;
ས་ཙེ ཨུ་སྶ་ཧ་ཏི ཨུ་སྶུ་ཀྐཾ, ཨ་ནོ་ཝ་སྶེ ཏ་ཐེ་ཝ ཙ.
ས་བྦོ ཨོ་ཝ་སྶ་ཏི གཱ་མཾ, ཨ་ཛ྄ཛྷོ་ཀཱ་སེ ཏ་ཐེ་ཝ ཙ;
ཨ་པྤེ་ཝ་ངྒཱ་ནི སེ་སེ་ཡྻུཾ, ཝ་ཏྟཾ ག་མི་ཀ་བྷི་ཀྑུ་ནཱ.
ནཱ་ནུ་མོ་ད་ནྟི ཐེ་རེ་ན, ཨོ་ཧཱ་ཡ ཙ་ཏུ་པ་ཉྩ་ཧི;
ཝ་ཙྩི་ཏོ མུ་ཙྪི་ཏོ ཨཱ་སི, ཝ་ཏྟཱ་ནུ་མོ་ད་ནེ་སུ་མེ.
ཚ་བྦ་གྒི་ཡཱ དུ་ནྣི་ཝ་ཏྠཱ, ཨ་ཐོ་པི ཙ དུ་པྤཱ་རུ་ཏཱ;
ཨ་ནཱ་ཀ་པྤཱ ཙ ཝོ་ཀྐ་མྨ, ཐེ་རེ ཨ་ནུ་པ་ཁ་ཛྫ་ནེ.
ན་ཝེ བྷི་ཀྑཱུ ཙ ས་ངྒྷཱ་ཊི, ཨུ་ཛ྄ཛྷཱ་ཡ་ནྟི ཙ པེ་ས་ལཱ;
ཏི་མ་ཎྜ་ལཾ ནི་ཝཱ་སེ་ཏྭཱ, ཀཱ་ཡ་ས་གུ་ཎ་ག་ཎྛི་ཀཱ.
ན ཝོ་ཀྐ་མྨ པ་ཊི་ཙྪ་ནྣཾ, སུ་སཾ་ཝུ་ཏོ་ཀྑི་ཏྟ་ཙ་ཀྑུ;
ཨུ་ཀྑི་ཏྟོ་ཛྫ་གྒྷི་ཀཱ་ས་དྡོ, ཏ་ཡོ ཙེ་ཝ པ་ཙཱ་ལ་ནཱ.
ཁ་མྦྷོ་གུ་ཎྛི་ཨུ་ཀྐུ་ཊི་ཀཱ, པ་ཊི་ཙྪ་ནྣཾ སུ་སཾ་ཝུ་ཏོ;
ཨོ་ཀྑི་ཏྟུ་ཀྑི་ཏྟ་ཨུ་ཛྫ་གྒྷི, ཨ་པྤ་ས་དྡོ ཏ་ཡོ ཙ་ལཱ.
ཁ་མྦྷོ་གུ་ཎྛི་པ་ལླ་ཏྠི ཙ, ཨ་ནུ་པ་ཁ་ཛྫ ནཱ་ས་ནེ;
ཨོ་ཏྠ་རི་ཏྭཱ་ན ཨུ་ད་ཀེ, ནཱི་ཙཾ ཀ་ཏྭཱ་ན སི་ཉྩི་ཡཱ.
པ་ཊི སཱ་མ་ནྟཱ ས་ངྒྷཱ་ཊི, ཨོ་ད་ནེ ཙ པ་ཊི་གྒ་ཧེ;
སཱུ་པཾ ཨུ་ཏྟ་རི་བྷ་ངྒེ་ན, ས་བྦེ་སཾ ས་མ་ཏི་ཏྠི ཙ.
ས་ཀྐ་ཙྩཾ པ་ཏྟ་ས་ཉྙཱི ཙ, ས་པ་དཱ་ན་ཉྩ སཱུ་པ་ཀཾ;
ན ཐཱུ་པ་ཏོ པ་ཊི་ཙྪཱ་དེ, ཝི་ཉྙ་ཏྟུ་ཛ྄ཛྷཱ་ན་ས་ཉྙི་ནཱ.
མ་ཧ་ནྟ་མ་ཎྜ་ལ་དྭཱ་རཾ, ས་བྦ་ཧ་ཏྠོ ན བྱཱ་ཧ་རེ;
ཨུ་ཀྑེ་པོ ཚེ་ད་ནཱ་ག་ཎྜ, དྷུ་ནཾ སི་ཏྠཱ་ཝ་ཀཱ་ར་ཀཾ.
ཛི་ཝ྄ཧཱ་ནི་ཙྪཱ་ར་ཀ་ཉྩེ་ཝ, ཙ་པུ་ཙ་པུ སུ་རུ་སུ་རུ;
ཧ་ཏྠ་པ་ཏྟོ་ཊྛ་ནི་ལླེ་ཧཾ, སཱ་མི་སེ་ན པ་ཊི་གྒ་ཧེ.
ཡཱ་ཝ ན ས་བྦེ ཨུ་ད་ཀེ, ནཱི་ཙཾ ཀ་ཏྭཱ་ན སི་ཉྩི་ཡཾ;
པ་ཊི སཱ་མ་ནྟཱ ས་ངྒྷཱ་ཊི, ནཱི་ཙཾ ཀ་ཏྭཱ ཚ་མཱ་ཡ ཙ.
ས་སི་ཏྠ་ཀཾ ནི་ཝ་ཏྟ་ནྟེ, སུ་པྤ་ཊི་ཙྪ་ནྣ་མུ་ཀྐུ་ཊི;
དྷ་མྨ་རཱ་ཛེ་ན པ་ཉྙ་ཏྟཾ, ཨི་དཾ བྷ་ཏྟ་གྒ་ཝ་ཏྟ་ནཾ.
དུ་ནྣི་ཝ་ཏྠཱ ཨ་ནཱ་ཀ་པྤཱ, ཨ་ས་ལླེ་ཀྑེ་ཏྭཱ ཙ ས་ཧ་སཱ;
དཱུ་རེ ཨ་ཙྩ ཙི་རཾ ལ་ཧུཾ, ཏ་ཐེ་ཝ པི་ཎྜ་ཙཱ་རི་ཀོ.
པ་ཊི་ཙྪ་ནྣོ་ཝ ག་ཙྪེ་ཡྻ, སུཾ་ས་ཝུ་ཏོ་ཀྑི་ཏྟ་ཙ་ཀྑུ;
ཨུ་ཀྑི་ཏྟོ་ཛྫ་གྒྷི་ཀཱ་ས་དྡོ, ཏ་ཡོ ཙེ་ཝ པ་ཙཱ་ལ་ནཱ.
ཁ་མྦྷོ་གུ་ཎྛི་ཨུ་ཀྐུ་ཊི་ཀཱ, ས་ལླ་ཀྑེ་ཏྭཱ ཙ ས་ཧ་སཱ;
དཱུ་རེ ཨ་ཙྩ ཙི་རཾ ལ་ཧུཾ, ཨཱ་ས་ན་ཀཾ ཀ་ཊ་ཙྪུ་ཀཱ.
བྷཱ་ཛ་ནཾ ཝཱ ཋ་པེ་ཏི ཙ, ཨུ་ཙྩཱ་རེ་ཏྭཱ པ་ཎཱ་མེ་ཏྭཱ;
པ་ཊི་གྒ་ཧེ ན ཨུ་ལློ་ཀེ, སཱུ་པེ་སུ་པི ཏ་ཐེ་ཝ ཏཾ.
བྷི་ཀྑུ ས་ངྒྷཱ་ཊི་ཡཱ ཚཱ་དེ, པ་ཊི་ཙྪ་ནྣེ་ཝ ག་ཙྪི་ཡཾ;
སཾ་ཝུ་ཏོ་ཀྑི་ཏྟ་ཙ་ཀྑུ ཙ, ཨུ་ཀྑི་ཏྟོ་ཛྫ་གྒྷི་ཀཱ་ཡ ཙ;
ཨ་པྤ་ས་དྡོ ཏ་ཡོ ཙཱ་ལཱ, ཁ་མྦྷོ་གུ་ཎྛི་ཀ་ཨུ་ཀྐུ་ཊི.
པ་ཋ་མཱ་ས་ན་ཝ་ཀྐཱ་ར, པཱ་ནི་ཡཾ པ་རི་བྷོ་ཛ་ནཱི;
པ་ཙྪཱ་ཀ་ངྑ་ཏི བྷུ་ཉྫེ་ཡྻ, ཨོ་པི་ལཱ་པེ་ཡྻ ཨུ་དྡྷ་རེ.
པ་ཊི་སཱ་མེ་ཡྻ ས་མྨ་ཛྫེ, རི་ཏྟཾ ཏུ་ཙྪཾ ཨུ་པ་ཊྛ་པེ;
ཧ་ཏྠ་ཝི་ཀཱ་རེ བྷི་ནྡེ་ཡྻ, ཝ་ཏྟི་དཾ པི་ཎྜ་ཙཱ་རི་ཀེ.
པཱ་ནཱི པ་རི ཨ་གྒི་ར་ཎི, ན་ཀྑ་ཏྟ་དི་ས་ཙོ་རཱ ཙ;
ས་བྦཾ ན་ཏྠཱི་ཏི ཀོ་ཊྚེ་ཏྭཱ, པ་ཏྟཾ་སེ ཙཱི་ཝ་རཾ ཏ་ཏོ.
ཨི་དཱ་ནི ཨཾ་སེ ལ་གྒེ་ཏྭཱ, ཏི་མ་ཎྜ་ལཾ པ་རི་མ་ཎྜ་ལཾ;
ཡ་ཐཱ པི་ཎྜ་ཙཱ་རི་ཝ་ཏྟཾ, ན་ཡེ ཨཱ་ར་ཉྙ་ཀེ་སུ་པི.
པ་ཏྟཾ་སེ ཙཱི་ཝ་རཾ སཱི་སེ, ཨཱ་རོ་ཧི་ཏྭཱ ཙ པཱ་ནི་ཡཾ;
པ་རི་བྷོ་ཛ་ནི་ཡཾ ཨ་གྒི, ཨ་ར་ཎཱི ཙཱ་པི ཀ་ཏྟ་རཾ.
ན་ཀྑ་ཏྟཾ ས་པྤ་དེ་སཾ ཝཱ, དི་སཱ་པི ཀུ་ས་ལོ བྷ་ཝེ;
ས་ཏྟུ་ཏྟ་མེ་ན པ་ཉྙ་ཏྟཾ, ཝ་ཏྟཾ ཨཱ་ར་ཉྙ་ཀེ་སུ་མེ.
ཨ་ཛ྄ཛྷོ་ཀཱ་སེ ཨོ་ཀི་རིཾ་སུ, ཨུ་ཛ྄ཛྷཱ་ཡ་ནྟི ཙ པེ་ས་ལཱ;
ས་ཙེ ཝི་ཧཱ་རོ ཨུ་ཀླཱ་པོ, པ་ཋ་མཾ པ་ཏྟ་ཙཱི་ཝ་རཾ.
བྷི་སི་བི་བྦོ་ཧ་ནཾ མ་ཉྩཾ, པཱི་ཋ་ཉྩ ཁེ་ལ༹་མ་ལླ་ཀཾ;
ཨ་པ་སྶེ་ནུ་ལློ་ཀ་ཀ་ཎྞཱ, གེ་རུ་ཀཱ ཀཱ་ལ༹ ཨ་ཀ་ཏཱ.
ས་ངྐཱ་རཾ བྷི་ཀྑུ་སཱ་མ་ནྟཱ, སེ་ནཱ་ཝི་ཧཱ་ར་པཱ་ནི་ཡཾ;
པ་རི་བྷོ་ཛ་ན་སཱ་མ་ནྟཱ, པ་ཊི་ཝཱ་ཏེ ཙ ཨ་ངྒ་ཎེ.
ཨ་དྷོ་ཝཱ་ཏེ ཨ་ཏྠ་ར་ཎཾ, པ་ཊི་པཱ་ད་ཀ་མ་ཉྩོ ཙ;
པཱི་ཋཾ བྷི་སི ནི་སཱི་ད་ནཾ, མ་ལླ་ཀཾ ཨ་པ་སྶེ་ན ཙ.
པ་ཏྟ་ཙཱི་ཝ་རཾ བྷཱུ་མི ཙ, པཱ་ར་ནྟཾ ཨོ་ར་ཏོ བྷོ་གཾ;
པུ་ར་ཏྠི་མཱ ཙ པ་ཙྪི་མཱ, ཨུ་ཏྟ་རཱ ཨ་ཐ ད་ཀྑི་ཎཱ.
སཱི་ཏུ་ཎྷེ ཙ དི་ཝཱ ར་ཏྟིཾ, པ་རི་ཝེ་ཎ་ཉྩ ཀོ་ཊྛ་ཀོ;
ཨུ་པ་ཊྛཱ་ན་གྒི་སཱ་ལཱ ཙ, ཝ་ཙྩ་ཀུ་ཊཱི ཙ པཱ་ནི་ཡཾ.
ཨཱ་ཙ་མ་ན་ཀུ་མྦྷི ཝུ་ཌྜྷེ ཙ, ཨུ་དྡེ་ས་པུ་ཙྪ་ནཱ ས་ཛ྄ཛྷཱ;
དྷ་མྨོ པ་དཱི་པཾ ཝི་ཛ྄ཛྷཱ་པེ, ན ཝི་ཝ་རེ ན་པི ཐ་ཀེ.
ཡེ་ན ཝུ་ཌྜྷོ པ་རི་ཝ་ཏྟི, ཀ་ཎྞེ་ན་པི ན གྷ་ཊྚ་ཡེ;
པ་ཉྙ་པེ་སི མ་ཧཱ་ཝཱི་རོ, ཝ་ཏྟཾ སེ་ནཱ་ས་ནེ་སུ ཏཾ.
ནི་ཝཱ་རི་ཡ་མཱ་ནཱ དྭཱ་རཾ, མུ་ཙྪི་ཏུ་ཛ྄ཛྷ་ནྟི པེ་ས་ལཱ;
ཚཱ་རི་ཀཾ ཚ་ཌྜ་ཡེ ཛ་ནྟཱ, པ་རི་བྷ་ཎྜཾ ཏ་ཐེ་ཝ ཙ.
པ་རི་ཝེ་ཎཾ ཀོ་ཊྛ་ཀོ སཱ་ལཱ, ཙུ་ཎྞ་མ་ཏྟི་ཀ་དོ་ཎི་ཀཱ;
མུ་ཁཾ པུ་ར་ཏོ ན ཐེ་རེ, ན ན་ཝེ ཨུ་སྶ་ཧ་ཏི ས་ཙེ.
པུ་ར་ཏོ ཨུ་པ་རི་མ་གྒོ, ཙི་ཀྑ་ལླཾ མ་ཏྟི པཱི་ཋ་ཀཾ;
ཝི་ཛ྄ཛྷཱ་པེ་ཏྭཱ ཐ་ཀེ་ཏྭཱ ཙ, ཝ་ཏྟཾ ཛ་ནྟཱ་གྷ་རེ་སུ་མེ.
ནཱ་ཙ་མེ་ཏི ཡ་ཐཱ་ཝུ་ཌྜྷཾ, པ་ཊི་པཱ་ཊི ཙ ས་ཧ་སཱ;
ཨུ་བྦྷ་ཛི ནི་ཏྠུ་ནོ ཀ་ཊྛཾ, ཝ་ཙྩཾ པ་སྶཱ་ཝ ཁེ་ལ༹་ཀཾ.
ཕ་རུ་སཱ ཀཱུ་པ ས་ཧ་སཱ, ཨུ་བྦྷ་ཛི ཙ་པུ སེ་སེ་ན;
བ་ཧི ཨ་ནྟོ ཙ ཨུ་ཀྐཱ་སེ, ར་ཛྫུ ཨ་ཏ་ར་མཱ་ན་ཉྩ.
ས་ཧ་སཱ ཨུ་བྦྷ་ཛི ཋི་ཏེ, ནི་ཏྠུ་ནེ ཀ་ཊྛ ཝ་ཙྩ་ཉྩ;
པ་སྶཱ་ཝ ཁེ་ལ༹ ཕ་རུ་སཱ, ཀཱུ་པ་ཉྩ ཝ་ཙྩ་པཱ་དུ་ཀེ.
ནཱ་ཏི་ས་ཧ་སཱ ཨུ་བྦྷ་ཛི, པཱ་དུ་ཀཱ་ཡ ཙ་པུ་ཙ་པུ;
ན སེ་ས་ཡེ པ་ཊི་ཙྪཱ་དེ, ཨུ་ཧ་ཏ་པི་དྷ་རེ་ན ཙ.
ཝ་ཙྩ་ཀུ་ཊཱི པ་རི་བྷ་ཎྜཾ, པ་རི་ཝེ་ཎ་ཉྩ ཀོ་ཊྛ་ཀོ;
ཨཱ་ཙ་མ་ནེ ཙ ཨུ་ད་ཀཾ, ཝ་ཏྟཾ ཝ་ཙྩ་ཀུ་ཊཱི་སུ་མེ.
ཨུ་པཱ་ཧ་ནཱ ད་ནྟ་ཀ་ཊྛཾ, མུ་ཁོ་ད་ཀ་ཉྩ ཨཱ་ས་ནཾ;
ཡཱ་གུ ཨུ་ད་ཀཾ དྷོ་ཝི་ཏྭཱ, ཨུ་དྡྷཱ་རུ་ཀླཱ་པ གཱ་མ ཙ.
ནི་ཝཱ་ས་ནཱ ཀཱ་ཡ་བ་ནྡྷཱ, ས་གུ་ཎཾ པ་ཏྟ་སོ་ད་ཀཾ;
པ་ཙྪཱ ཏི་མ་ཎྜ་ལོ ཙེ་ཝ, པ་རི་མ་ཎྜ་ལ བ་ནྡྷ་ནཾ.
ས་གུ་ཎཾ དྷོ་ཝི་ཏྭཱ པ་ཙྪཱ, ནཱ་ཏི་དཱུ་རེ པ་ཊི་གྒ་ཧེ;
བྷ་ཎ་མཱ་ན་སྶ ཨཱ་པ་ཏྟི, པ་ཋ་མཱ་ག་ནྟྭཱ་ན ཨཱ་ས་ནཾ.
ཨུ་ད་ཀཾ པཱི་ཋ་ཀ་ཐ་ལི, པ་ཙྩུ་གྒ་ནྟྭཱ ནི་ཝཱ་ས་ནཾ;
ཨོ་ཏཱ་པེ ནི་ད་ཧི བྷ་ངྒོ, ཨོ་བྷོ་གེ བྷུ་ཉྫི་ཏུ ན་མེ.
པཱ་ནཱི་ཡཾ ཨུ་ད་ཀཾ ནཱི་ཙཾ, མུ་ཧུ་ཏྟཾ ན ཙ ནི་ད་ཧེ;
པ་ཏྟ་ཙཱི་ཝ་རཾ བྷཱུ་མི ཙ, པཱ་ར་ནྟཾ ཨོ་ར་ཏོ བྷོ་གཾ.
ཨུ་དྡྷ་རེ པ་ཊི་སཱ་མེ ཙ, ཨུ་ཀླཱ་པོ ཙ ན་ཧཱ་ཡི་ཏུཾ;
སཱི་ཏཾ ཨུ་ཎྷཾ ཛ་ནྟཱ་གྷ་རཾ, ཙུ་ཎྞཾ མ་ཏྟི་ཀ པི་ཊྛི་ཏོ.
པཱི་ཋ་ཉྩ ཙཱི་ཝ་རཾ ཙུ་ཎྞཾ, མ་ཏྟི་ཀུ་སྶ་ཧ་ཏི མུ་ཁཾ;
པུ་ར་ཏོ ཐེ་རེ ན་ཝེ ཙ, པ་རི་ཀ་མྨ་ཉྩ ནི་ཀྑ་མེ.
པུ་ར་ཏོ ཨུ་ད་ཀེ ནྷཱ་ཏེ, ནི་ཝཱ་སེ་ཏྭཱ ཨུ་པ་ཛ྄ཛྷཱ་ཡཾ;
ནི་ཝཱ་ས་ན་ཉྩ ས་ངྒྷཱ་ཊི, པཱི་ཋ་ཀཾ ཨཱ་ས་ནེ་ན ཙ.
པཱ་དོ པཱི་ཋཾ ཀ་ཐ་ལི་ཉྩ, པཱ་ནཱི་ཡུ་དྡེ་ས་པུ་ཙྪ་ནཱ;
ཨུ་ཀླཱ་པཾ སུ་སོ་དྷེ་ཡྻ, པ་ཋ་མཾ པ་ཏྟ་ཙཱི་ཝ་རཾ.
ནི་སཱི་ད་ན་པ་ཙྩ་ཏྠ་ར་ཎཾ, བྷི་སི བི་བྦོ་ཧ་ནཱ་ནི ཙ;
མ་ཉྩོ པཱི་ཋཾ པ་ཊི་པཱ་དཾ, མ་ལླ་ཀཾ ཨ་པ་སྶེ་ན ཙ.