༩. པཱ་ཏི་མོ་ཀྑ་ཊྛ་པ་ན་ཀྑ་ནྡྷ་ཀཾ
༡. པཱ་ཏི་མོ་ཀྑུ་དྡེ་ས་ཡཱ་ཙ་ནཱ
༣༨༣. [ཨུ་དཱ. ༤༥; ཨ. ནི. ༨.༢༠] ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ པཱ་སཱ་དེ. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ད་ཧུ་པོ་ས་ཐེ བྷི་ཀྑུ་ས་ངྒྷ་པ་རི་ཝུ་ཏོ ནི་སི་ནྣོ ཧོ་ཏི. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཨ་བྷི་ཀྐ་ནྟཱ་ཡ ར་ཏྟི་ཡཱ ནི་ཀྑ་ནྟེ པ་ཋ་མེ ཡཱ་མེ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཱ, བྷ་ནྟེ, ར་ཏྟི, ནི་ཀྑ་ནྟོ པ་ཋ་མོ ཡཱ་མོ, ཙི་ར་ནི་སི་ནྣོ བྷི་ཀྑུ་ས་ངྒྷོ. ཨུ་དྡི་ས་ཏུ, བྷ་ནྟེ, བྷ་ག་ཝཱ བྷི་ཀྑཱུ་ནཾ པཱ་ཏི་མོ་ཀྑ’’ནྟི. ཨེ་ཝཾ ཝུ་ཏྟེ བྷ་ག་ཝཱ ཏུ་ཎྷཱི ཨ་ཧོ་སི. དུ་ཏི་ཡ་མྤི ཁོ ཨཱ་ཡ་སྨཱ ཨཱ་ན་ནྡོ ཨ་བྷི་ཀྐ་ནྟཱ་ཡ ར་ཏྟི་ཡཱ ནི་ཀྑ་ནྟེ མ་ཛ྄ཛྷི་མེ ཡཱ་མེ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཱ, བྷ་ནྟེ, ར་ཏྟི, ནི་ཀྑ་ནྟོ མ་ཛ྄ཛྷི་མོ ཡཱ་མོ, ཙི་ར་ནི་སི་ནྣོ བྷི་ཀྑུ་ས་ངྒྷོ. ཨུ་དྡི་ས་ཏུ, བྷ་ནྟེ, བྷ་ག་ཝཱ བྷི་ཀྑཱུ་ནཾ པཱ་ཏི་མོ་ཀྑ’’ནྟི. དུ་ཏི་ཡ་མྤི ཁོ བྷ་ག་ཝཱ ཏུ་ཎྷཱི ཨ་ཧོ་སི. ཏ་ཏི་ཡ་མྤི ཁོ ཨཱ་ཡ་སྨཱ ཨཱ་ན་ནྡོ ཨ་བྷི་ཀྐ་ནྟཱ་ཡ ར་ཏྟི་ཡཱ ནི་ཀྑ་ནྟེ པ་ཙྪི་མེ ཡཱ་མེ ཨུ་དྡྷ་སྟེ ཨ་རུ་ཎེ ན་ནྡི་མུ་ཁི་ཡཱ ར་ཏྟི་ཡཱ ཨུ་ཊྛཱ་ཡཱ་ས་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཡེ་ན བྷ་ག་ཝཱ ཏེ་ན་ཉྫ་ལིཾ པ་ཎཱ་མེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཱ, བྷ་ནྟེ, ར་ཏྟི, ནི་ཀྑ་ནྟོ པ་ཙྪི་མོ ཡཱ་མོ, ཨུ་དྡྷ་སྟཾ ཨ་རུ་ཎཾ ན་ནྡི་མུ་ཁི ར་ཏྟི, ཙི་ར་ནི་སི་ནྣོ བྷི་ཀྑུ་ས་ངྒྷོ. ཨུ་དྡི་ས་ཏུ, བྷ་ནྟེ, བྷ་ག་ཝཱ བྷི་ཀྑཱུ་ནཾ པཱ་ཏི་མོ་ཀྑ’’ནྟི. ‘‘ཨ་པ་རི་སུ་དྡྷཱ, ཨཱ་ན་ནྡ, པ་རི་སཱ’’ཏི.
ཨ་ཐ ཁོ ཨཱ་ཡ་སྨ་ཏོ མ་ཧཱ་མོ་གྒ་ལླཱ་ན་སྶ ཨེ་ཏ་ད་ཧོ་སི – ‘‘ཀཾ ནུ ཁོ བྷ་ག་ཝཱ པུ་གྒ་ལཾ ས་ནྡྷཱ་ཡ ཨེ་ཝ་མཱ་ཧ – ‘ཨ་པ་རི་སུ་དྡྷཱ, ཨཱ་ན་ནྡ, པ་རི་སཱ’’’ཏི? ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ས་བྦཱ་ཝ་ནྟཾ བྷི་ཀྑུ་ས་ངྒྷཾ ཙེ་ཏ་སཱ ཙེ་ཏོ པ་རི་ཙྩ མ་ན་སཱ་ཀཱ་སི. ཨ་དྡ་སཱ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ པུ་གྒ་ལཾ དུ་སྶཱི་ལཾ པཱ་པ་དྷ་མྨཾ ཨ་སུ་ཙི་ས་ངྐ་སྶ་ར་ས་མཱ་ཙཱ་རཾ པ་ཊི་ཙྪ་ནྣ་ཀ་མྨ་ནྟཾ ཨ་སྶ་མ་ཎཾ ས་མ་ཎ་པ་ཊི་ཉྙཾ ཨ་བྲ་ཧྨ་ཙཱ་རིཾ བྲ་ཧྨ་ཙཱ་རི་པ་ཊི་ཉྙཾ ཨ་ནྟོ་པཱུ་ཏིཾ ཨ་ཝ་སྶུ་ཏཾ ཀ་ས་མྦུ་ཛཱ་ཏཾ [ཀ་ས་མྦུ་ཀ་ཛཱ་ཏཾ (ཀ.)] མ་ཛ྄ཛྷེ བྷི་ཀྑུ་ས་ངྒྷ་སྶ ནི་སི་ནྣཾ. དི་སྭཱ་ན ཡེ་ན སོ པུ་གྒ་ལོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཏཾ པུ་གྒ་ལཾ ཨེ་ཏ་ད་ཝོ་ཙ – ‘‘ཨུ་ཊྛེ་ཧི, ཨཱ་ཝུ་སོ, དི་ཊྛོ་སི བྷ་ག་ཝ་ཏཱ; ན་ཏྠི ཏེ བྷི་ཀྑཱུ་ཧི ས་དྡྷིཾ སཾ་ཝཱ་སོ’’ཏི. ཨེ་ཝཾ ཝུ་ཏྟེ སོ པུ་གྒ་ལོ ཏུ་ཎྷཱི ཨ་ཧོ་སི. དུ་ཏི་ཡ་མྤི ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ པུ་གྒ་ལཾ ཨེ་ཏ་ད་ཝོ་ཙ – ‘‘ཨུ་ཊྛེ་ཧི, ཨཱ་ཝུ་སོ, དི་ཊྛོ་སི བྷ་ག་ཝ་ཏཱ; ན་ཏྠི ཏེ བྷི་ཀྑཱུ་ཧི ས་དྡྷིཾ སཾ་ཝཱ་སོ’’ཏི. དུ་ཏི་ཡ་མྤི ཁོ སོ པུ་གྒ་ལོ ཏུ་ཎྷཱི ཨ་ཧོ་སི. ཏ་ཏི་ཡ་མྤི ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ པུ་གྒ་ལཾ ཨེ་ཏ་ད་ཝོ་ཙ – ‘‘ཨུ་ཊྛེ་ཧི, ཨཱ་ཝུ་སོ, དི་ཊྛོ་སི བྷ་ག་ཝ་ཏཱ; ན་ཏྠི ཏེ བྷི་ཀྑཱུ་ཧི ས་དྡྷིཾ སཾ་ཝཱ་སོ’’ཏི. ཏ་ཏི་ཡ་མྤི ཁོ སོ པུ་གྒ་ལོ ཏུ་ཎྷཱི ཨ་ཧོ་སི. ཨ་ཐ ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ པུ་གྒ་ལཾ བཱ་ཧཱ་ཡཾ ག་ཧེ་ཏྭཱ བ་ཧི་དྭཱ་ར་ཀོ་ཊྛ་ཀཱ ནི་ཀྑཱ་མེ་ཏྭཱ སཱུ་ཙི་གྷ་ཊི་ཀཾ ད་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ནི་ཀྑཱ་མི་ཏོ སོ, བྷ་ནྟེ, པུ་གྒ་ལོ མ་ཡཱ; སུ་དྡྷཱ པ་རི་སཱ; ཨུ་དྡི་ས་ཏུ, བྷ་ནྟེ, བྷ་ག་ཝཱ བྷི་ཀྑཱུ་ནཾ པཱ་ཏི་མོ་ཀྑ’’ནྟི.
‘‘ཨ་ཙྪ་རི་ཡཾ, མོ་གྒ་ལླཱ་ན, ཨ་བྦྷུ་ཏཾ, མོ་གྒ་ལླཱ་ན, ཡཱ་ཝ བཱ་ཧཱ་ག་ཧ་ཎཱ་པི ནཱ་མ སོ མོ་གྷ་པུ་རི་སོ ཨཱ་ག་མེ་སྶ་ཏཱི’’ཏི! ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི –
༢. མ་ཧཱ་ས་མུ་དྡེ་ཨ་ཊྛ་ཙྪ་རི་ཡཾ
༣༨༤. [ཨུ་དཱ. ༤༥; ཨ. ནི. ༨.༡༩] ‘‘ཨ་ཊྛི་མེ, བྷི་ཀྑ་ཝེ, མ་ཧཱ་ས་མུ་དྡེ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ, ཡེ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི. ཀ་ཏ་མེ ཨ་ཊྛ?
‘‘མ་ཧཱ་ས་མུ་དྡོ, བྷི་ཀྑ་ཝེ, ཨ་ནུ་པུ་བྦ་ནི་ནྣོ ཨ་ནུ་པུ་བྦ་པོ་ཎོ ཨ་ནུ་པུ་བྦ་པ་བྦྷཱ་རོ ན ཨཱ་ཡ་ཏ་ཀེ་ནེ་ཝ པ་པཱ་ཏོ. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ ཨ་ནུ་པུ་བྦ་ནི་ནྣོ ཨ་ནུ་པུ་བྦ་པོ་ཎོ ཨ་ནུ་པུ་བྦ་པ་བྦྷཱ་རོ ན ཨཱ་ཡ་ཏ་ཀེ་ནེ་ཝ པ་པཱ་ཏོ – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ པ་ཋ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, མ་ཧཱ་ས་མུ་དྡོ ཋི་ཏ་དྷ་མྨོ ཝེ་ལཾ ནཱ་ཏི་ཝ་ཏྟ་ཏི. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ ཋི་ཏ་དྷ་མྨོ ཝེ་ལཾ ནཱ་ཏི་ཝ་ཏྟ་ཏི – ཨ་ཡཾ [ཨ་ཡ་མྤི (སྱཱ.)], བྷི་ཀྑ་ཝེ, མ་ཧཱ་ས་མུ་དྡེ དུ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, མ་ཧཱ་ས་མུ་དྡོ ན མ་ཏེ་ན ཀུ་ཎ་པེ་ན སཾ་ཝ་ས་ཏི. ཡཾ ཧོ་ཏི མ་ཧཱ་ས་མུ་དྡེ མ་ཏཾ ཀུ་ཎ་པཾ, ཏཾ ཁི་པྤ་ཉྙེ་ཝ ཏཱི་རཾ ཝཱ་ཧེ་ཏི, ཐ་ལཾ ཨུ་སྶཱ་རེ་ཏི. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ ན མ་ཏེ་ན ཀུ་ཎ་པེ་ན སཾ་ཝ་ས་ཏི, ཡཾ ཧོ་ཏི མ་ཧཱ་ས་མུ་དྡེ མ་ཏཾ ཀུ་ཎ་པཾ, ཏཾ ཁི་པྤ་ཉྙེ་ཝ ཏཱི་རཾ ཝཱ་ཧེ་ཏི, ཐ་ལཾ ཨུ་སྶཱ་རེ་ཏི – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ ཏ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, ཡཱ ཀཱ་ཙི མ་ཧཱ་ན་དི་ཡོ, སེ་ཡྻ་ཐི་དཾ – ག་ངྒཱ, ཡ་མུ་ནཱ, ཨ་ཙི་ར་ཝ་ཏཱི, ས་ར་བྷཱུ, མ་ཧཱི, ཏཱ མ་ཧཱ་ས་མུ་དྡཾ པ་ཏྟཱ ཛ་ཧ་ནྟི པུ་རི་མཱ་ནི ནཱ་མ་གོ་ཏྟཱ་ནི, མ་ཧཱ་ས་མུ་དྡོ ཏྭེ་ཝ ས་ངྑཾ ག་ཙྪ་ནྟི. ཡ་མྤི, བྷི་ཀྑ་ཝེ, ཡཱ་ཀཱ་ཙི མ་ཧཱ་ན་དི་ཡོ, སེ་ཡྻ་ཐི་དཾ – ག་ངྒཱ, ཡ་མུ་ནཱ, ཨ་ཙི་ར་ཝ་ཏཱི, ས་ར་བྷཱུ, མ་ཧཱི, ཏཱ མ་ཧཱ་ས་མུ་དྡཾ པ་ཏྟཱ ཛ་ཧ་ནྟི པུ་རི་མཱ་ནི ནཱ་མ་གོ་ཏྟཱ་ནི, མ་ཧཱ་ས་མུ་དྡོ ཏྭེ་ཝ ས་ངྑཾ ག་ཙྪ་ནྟི – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ ཙ་ཏུ་ཏྠོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, ཡཱ ཙ [ཡཱ་ཀཱ་ཙི (སྱཱ.)] ལོ་ཀེ ས་ཝ་ནྟི་ཡོ མ་ཧཱ་ས་མུ་དྡཾ ཨ་པྤེ་ནྟི, ཡཱ ཙ ཨ་ནྟ་ལི་ཀྑཱ དྷཱ་རཱ པ་པ་ཏ་ནྟི, ན ཏེ་ན མ་ཧཱ་ས་མུ་དྡ་སྶ ཨཱུ་ན་ཏྟཾ ཝཱ པཱུ་ར་ཏྟཾ ཝཱ པ་ཉྙཱ་ཡ་ཏི. ཡ་མྤི, བྷི་ཀྑ་ཝེ, ཡཱ ཙ ལོ་ཀེ ས་ཝ་ནྟི་ཡོ མ་ཧཱ་ས་མུ་དྡཾ ཨ་པྤེ་ནྟི, ཡཱ ཙ ཨ་ནྟ་ལི་ཀྑཱ དྷཱ་རཱ པ་པ་ཏ་ནྟི, ན ཏེ་ན མ་ཧཱ་ས་མུ་དྡ་སྶ ཨཱུ་ན་ཏྟཾ ཝཱ པཱུ་ར་ཏྟཾ ཝཱ པ་ཉྙཱ་ཡ་ཏི – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ པ་ཉྩ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, མ་ཧཱ་ས་མུ་དྡོ ཨེ་ཀ་ར་སོ ལོ་ཎ་ར་སོ. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ ཨེ་ཀ་ར་སོ ལོ་ཎ་ར་སོ – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ ཚ་ཊྛོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, མ་ཧཱ་ས་མུ་དྡོ བ་ཧུ་ར་ཏ་ནོ [བ་ཧཱུ་ཏ་ར་ཏ་ནོ (ཀ.)] ཨ་ནེ་ཀ་ར་ཏ་ནོ. ཏ་ཏྲི་མཱ་ནི ར་ཏ་ནཱ་ནི, སེ་ཡྻ་ཐི་དཾ – མུ་ཏྟཱ, མ་ཎི, ཝེ་ལུ༹་རི་ཡོ, ས་ངྑོ, སི་ལཱ, པ་ཝཱ་ལ༹ཾ, ར་ཛ་ཏཾ, ཛཱ་ཏ་རཱུ་པཾ, ལོ་ཧི་ཏ་ཀོ, མ་སཱ་ར་ག་ལླཾ. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ བ་ཧུ་ར་ཏ་ནོ ཨ་ནེ་ཀ་ར་ཏ་ནོ, ཏ་ཏྲི་མཱ་ནི ར་ཏ་ནཱ་ནི, སེ་ཡྻ་ཐི་དཾ – མུ་ཏྟཱ, མ་ཎི, ཝེ་ལུ༹་རི་ཡོ, ས་ངྑོ, སི་ལཱ, པ་ཝཱ་ལ༹ཾ, ར་ཛ་ཏཾ, ཛཱ་ཏ་རཱུ་པཾ, ལོ་ཧི་ཏ་ཀོ, མ་སཱ་ར་ག་ལླཾ – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ ས་ཏྟ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི.
‘‘པུ་ན ཙ་པ་རཾ, བྷི་ཀྑ་ཝེ, མ་ཧཱ་ས་མུ་དྡོ མ་ཧ་ཏཾ བྷཱུ་ཏཱ་ནཾ ཨཱ་ཝཱ་སོ. ཏ་ཏྲི་མེ བྷཱུ་ཏཱ – ཏི་མི, ཏི་མི་ངྒ་ལོ, ཏི་མི་ཏི་མི་ངྒ་ལོ [ཏི་མི་ར་པི་ངྒ་ལོ (སཱི.), ཏི་མི་ཏི་མི་ངྒ་ལོ མ་ཧཱ་ཏི་མི་ངྒ་ལོ (སྱཱ. ཀཾ.)], ཨ་སུ་རཱ, ནཱ་གཱ, ག་ནྡྷ་བྦཱ. ས་ནྟི མ་ཧཱ་ས་མུ་དྡེ ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, དྭི་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, ཏི་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, ཙ་ཏུ་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, པ་ཉྩ་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ. ཡ་མྤི, བྷི་ཀྑ་ཝེ, མ་ཧཱ་ས་མུ་དྡོ མ་ཧ་ཏཾ བྷཱུ་ཏཱ་ནཾ ཨཱ་ཝཱ་སོ, ཏ་ཏྲི་མེ བྷཱུ་ཏཱ – ཏི་མི, ཏི་མི་ངྒ་ལོ, ཏི་མི་ཏི་མི་ངྒ་ལོ, ཨ་སུ་རཱ, ནཱ་གཱ, ག་ནྡྷ་བྦཱ; ས་ནྟི མ་ཧཱ་ས་མུ་དྡེ, ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ…པེ… པ་ཉྩ་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ – ཨ་ཡཾ, བྷི་ཀྑ་ཝེ, མ་ཧཱ་ས་མུ་དྡེ ཨ་ཊྛ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ་ནྟི. ཨི་མེ ཁོ, བྷི་ཀྑ་ཝེ, མ་ཧཱ་ས་མུ་དྡེ ཨ་ཊྛ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ, ཡེ དི་སྭཱ དི་སྭཱ ཨ་སུ་རཱ མ་ཧཱ་ས་མུ་དྡེ ཨ་བྷི་ར་མ’’ནྟི.
༣. ཨི་མ་སྨིཾ་དྷ་མྨ་ཝི་ན་ཡེ་ཨ་ཊྛ་ཙྪ་རི་ཡཾ
༣༨༥. ‘‘ཨེ་ཝ་མེ་ཝ ཁོ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཨ་ཊྛ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ, ཡེ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི. ཀ་ཏ་མེ ཨ་ཊྛ?
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ ཨ་ནུ་པུ་བྦ་ནི་ནྣོ ཨ་ནུ་པུ་བྦ་པོ་ཎོ ཨ་ནུ་པུ་བྦ་པ་བྦྷཱ་རོ ན ཨཱ་ཡ་ཏ་ཀེ་ནེ་ཝ པ་པཱ་ཏོ; ཨེ་ཝ་མེ་ཝ ཁོ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཨ་ནུ་པུ་བྦ་སི་ཀྑཱ ཨ་ནུ་པུ་བྦ་ཀི་རི་ཡཱ ཨ་ནུ་པུ་བྦ་པ་ཊི་པ་དཱ ན ཨཱ་ཡ་ཏ་ཀེ་ནེ་ཝ ཨ་ཉྙཱ་པ་ཊི་ཝེ་དྷོ. ཡ་མྤི, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཨ་ནུ་པུ་བྦ་སི་ཀྑཱ ཨ་ནུ་པུ་བྦ་ཀི་རི་ཡཱ ཨ་ནུ་པུ་བྦ་པ་ཊི་པ་དཱ ན ཨཱ་ཡ་ཏ་ཀེ་ནེ་ཝ ཨ་ཉྙཱ་པ་ཊི་ཝེ་དྷོ – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ པ་ཋ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ ཋི་ཏ་དྷ་མྨོ ཝེ་ལཾ ནཱ་ཏི་ཝ་ཏྟ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡཾ མ་ཡཱ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་ཏྟཾ, ཏཾ མ་མ སཱ་ཝ་ཀཱ ཛཱི་ཝི་ཏ་ཧེ་ཏུ་པི ནཱ་ཏི་ཀྐ་མ་ནྟི. ཡ་མྤི, བྷི་ཀྑ་ཝེ, མ་ཡཱ མ་མ སཱ་ཝ་ཀཱ་ནཾ སི་ཀྑཱ་པ་དཾ པ་ཉྙ་ཏྟཾ, ཏཾ མ་མ སཱ་ཝ་ཀཱ ཛཱི་ཝི་ཏ་ཧེ་ཏུ་པི ནཱ་ཏི་ཀྐ་མ་ནྟི – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ དུ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ ན མ་ཏེ་ན ཀུ་ཎ་པེ་ན སཾ་ཝ་ས་ཏི, ཡཾ ཧོ་ཏི མ་ཧཱ་ས་མུ་དྡེ མ་ཏཾ ཀུ་ཎ་པཾ ཏཾ ཁི་པྤ་མེ་ཝ ཏཱི་རཾ ཝཱ་ཧེ་ཏི, ཐ་ལཾ ཨུ་སྶཱ་རེ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, ཡོ སོ པུ་གྒ་ལོ དུ་སྶཱི་ལོ པཱ་པ་དྷ་མྨོ ཨ་སུ་ཙི་ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ, ན ཏེ་ན ས་ངྒྷོ སཾ་ཝ་ས་ཏི, ཁི་པྤ་མེ་ཝ ནཾ ས་ནྣི་པ་ཏི་ཏྭཱ ཨུ་ཀྑི་པ་ཏི, ཀི་ཉྩཱ་པི ཁོ སོ ཧོ་ཏི མ་ཛ྄ཛྷེ བྷི་ཀྑུ་ས་ངྒྷ་སྶ ནི་སི་ནྣོ. ཨ་ཐ ཁོ སོ ཨཱ་ར་ཀཱ་ཝ ས་ངྒྷ་མྷཱ, ས་ངྒྷོ ཙ ཏེ་ན. ཡ་མྤི, བྷི་ཀྑ་ཝེ, ཡོ སོ པུ་གྒ་ལོ དུ་སྶཱི་ལོ པཱ་པ་དྷ་མྨོ ཨ་སུ་ཙི་ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ, ན ཏེ་ན ས་ངྒྷོ སཾ་ཝ་ས་ཏི, ཁི་པྤ་མེ་ཝ ནཾ ས་ནྣི་པཱུ་ཏི་ཏྭཱ ཨུ་ཀྑི་པ་ཏི, ཀི་ཉྩཱ་པི ཁོ སོ ཧོ་ཏི མ་ཛ྄ཛྷེ བྷི་ཀྑུ་ས་ངྒྷ་སྶ ནི་སི་ནྣོ, ཨ་ཐ ཁོ སོ ཨཱ་ར་ཀཱ་ཝ ས་ངྒྷ་མྷཱ, ས་ངྒྷོ ཙ ཏེ་ན – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཏ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, ཡཱ ཀཱ་ཙི མ་ཧཱ་ན་དི་ཡོ, སེ་ཡྻ་ཐི་དཾ – ག་ངྒཱ, ཡ་མུ་ནཱ, ཨ་ཙི་ར་ཝ་ཏཱི, ས་ར་བྷཱུ, མ་ཧཱི, ཏཱ མ་ཧཱ་ས་མུ་དྡཾ པ་ཏྟཱ ཛ་ཧ་ནྟི པུ་རི་མཱ་ནི ནཱ་མ་གོ་ཏྟཱ་ནི, མ་ཧཱ་ས་མུ་དྡོ ཏྭེ་ཝ ས་ངྑཾ ག་ཙྪ་ནྟི; ཨེ་ཝ་མེ་ཝ ཁོ, བྷི་ཀྑ་ཝེ, ཙ་ཏྟཱ་རོ་མེ ཝ་ཎྞཱ – ཁ་ཏྟི་ཡཱ, བྲཱ་ཧྨ་ཎཱ, ཝེ་སྶཱ, སུ་དྡཱ. ཏེ ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏྭཱ [པ་བྦ་ཛི་ཏཱ (སཱི.)] ཛ་ཧ་ནྟི པུ་རི་མཱ་ནི ནཱ་མ་གོ་ཏྟཱ་ནི, ས་མ་ཎཱ ས་ཀྱ་པུ་ཏྟི་ཡཱ ཏྭེ་ཝ ས་ངྑཾ ག་ཙྪ་ནྟི. ཡ་མྤི, བྷི་ཀྑ་ཝེ, ཙ་ཏྟཱ་རོ་མེ ཝ་ཎྞཱ ཁ་ཏྟི་ཡཱ བྲཱ་ཧྨ་ཎཱ ཝེ་སྶཱ སུ་དྡཱ, ཏེ ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏྭཱ ཛ་ཧ་ནྟི པུ་རི་མཱ་ནི ནཱ་མ་གོ་ཏྟཱ་ནི, ས་མ་ཎཱ ས་ཀྱ་པུ་ཏྟི་ཡཱ ཏྭེ་ཝ ས་ངྑཾ ག་ཙྪ་ནྟི – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཙ་ཏུ་ཏྠོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, ཡཱ ཙ ལོ་ཀེ ས་ཝ་ནྟི་ཡོ མ་ཧཱ་ས་མུ་དྡཾ ཨ་པྤེ་ནྟི, ཡཱ ཙ ཨ་ནྟ་ལི་ཀྑཱ དྷཱ་རཱ པ་པ་ཏ་ནྟི, ན ཏེ་ན མ་ཧཱ་ས་མུ་དྡ་སྶ ཨཱུ་ན་ཏྟཾ ཝཱ པཱུ་ར་ཏྟཾ ཝཱ པ་ཉྙཱ་ཡ་ཏི; ཨེ་ཝ་མེ་ཝ ཁོ, བྷི་ཀྑ་ཝེ, བ་ཧཱུ ཙེ་པི བྷི་ཀྑཱུ ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ པ་རི་ནི་བྦཱ་ཡ་ནྟི, ན ཏེ་ན ནི་བྦཱ་ན་དྷཱ་ཏུ་ཡཱ ཨཱུ་ན་ཏྟཾ ཝཱ པཱུ་ར་ཏྟཾ ཝཱ པ་ཉྙཱ་ཡ་ཏི. ཡ་མྤི, བྷི་ཀྑ་ཝེ, བ་ཧཱུ ཙེ་པི བྷི་ཀྑཱུ ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ པ་རི་ནི་བྦཱ་ཡ་ནྟི, ན ཏེ་ན ནི་བྦཱ་ན་དྷཱ་ཏུ་ཡཱ ཨཱུ་ན་ཏྟཾ ཝཱ པཱུ་ར་ཏྟཾ ཝཱ པ་ཉྙཱ་ཡ་ཏི – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ པ་ཉྩ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ ཨེ་ཀ་ར་སོ ལོ་ཎ་ར་སོ, ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ ཨེ་ཀ་ར་སོ ཝི་མུ་ཏྟི་ར་སོ. ཡ་མྤི, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ ཨེ་ཀ་ར་སོ ཝི་མུ་ཏྟི་ར་སོ – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཚ་ཊྛོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ བ་ཧུ་ར་ཏ་ནོ ཨ་ནེ་ཀ་ར་ཏ་ནོ, ཏ་ཏྲི་མཱ་ནི ར་ཏ་ནཱ་ནི, སེ་ཡྻ་ཐི་དཾ – མུ་ཏྟཱ, མ་ཎི, ཝེ་ལུ༹་རི་ཡོ, ས་ངྑོ, སི་ལཱ, པ་ཝཱ་ལ༹ཾ, ར་ཛ་ཏཾ, ཛཱ་ཏ་རཱུ་པཾ, ལོ་ཧི་ཏ་ཀོ, མ་སཱ་ར་ག་ལླཾ; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ བ་ཧུ་ར་ཏ་ནོ ཨ་ནེ་ཀ་ར་ཏ་ནོ. ཏ་ཏྲི་མཱ་ནི ར་ཏ་ནཱ་ནི, སེ་ཡྻ་ཐི་དཾ – ཙ་ཏྟཱ་རོ ས་ཏི་པ་ཊྛཱ་ནཱ, ཙ་ཏྟཱ་རོ ས་མྨ་པྤ་དྷཱ་ནཱ, ཙ་ཏྟཱ་རོ ཨི་དྡྷི་པཱ་དཱ, པ་ཉྩི་ནྡྲི་ཡཱ་ནི, པ་ཉྩ བ་ལཱ་ནི, ས་ཏྟ བོ་ཛ྄ཛྷ་ངྒཱ, ཨ་རི་ཡོ ཨ་ཊྛ་ངྒི་ཀོ མ་གྒོ. ཡ་མྤི, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ བ་ཧུ་ར་ཏ་ནོ ཨ་ནེ་ཀ་ར་ཏ་ནོ, ཏ་ཏྲི་མཱ་ནི ར་ཏ་ནཱ་ནི, སེ་ཡྻ་ཐི་དཾ – ཙ་ཏྟཱ་རོ ས་ཏི་པ་ཊྛཱ་ནཱ…པེ… ཨ་རི་ཡོ ཨ་ཊྛ་ངྒི་ཀོ མ་གྒོ – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ས་ཏྟ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, མ་ཧཱ་ས་མུ་དྡོ མ་ཧ་ཏཾ བྷཱུ་ཏཱ་ནཾ ཨཱ་ཝཱ་སོ, ཏ་ཏྲི་མེ བྷཱུ་ཏཱ – ཏི་མི, ཏི་མི་ངྒ་ལོ, ཏི་མི་ཏི་མི་ངྒ་ལོ, ཨ་སུ་རཱ, ནཱ་གཱ, ག་ནྡྷ་བྦཱ, ས་ནྟི མ་ཧཱ་ས་མུ་དྡེ ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, དྭི་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, ཏི་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, ཙ་ཏུ་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ, པ་ཉྩ་ཡོ་ཛ་ན་ས་ཏི་ཀཱ་པི ཨ་ཏྟ་བྷཱ་ཝཱ; ཨེ་ཝ་མེ་ཝ ཁོ, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ མ་ཧ་ཏཾ བྷཱུ་ཏཱ་ནཾ ཨཱ་ཝཱ་སོ. ཏ་ཏྲི་མེ བྷཱུ་ཏཱ – སོ་ཏཱ་པ་ནྣོ, སོ་ཏཱ་པ་ཏྟི་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ; ས་ཀ་དཱ་གཱ་མཱི, ས་ཀ་དཱ་གཱ་མི་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ; ཨ་ནཱ་གཱ་མཱི, ཨ་ནཱ་གཱ་མི་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ; ཨ་ར་ཧཱ, ཨ་ར་ཧ་ཏྟ་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ. ཡ་མྤི, བྷི་ཀྑ་ཝེ, ཨ་ཡཾ དྷ་མྨ་ཝི་ན་ཡོ མ་ཧ་ཏཾ བྷཱུ་ཏཱ་ནཾ ཨཱ་ཝཱ་སོ, ཏ་ཏྲི་མེ བྷཱུ་ཏཱ – སོ་ཏཱ་པ་ནྣོ, སོ་ཏཱ་པ་ཏྟི་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ…པེ… ཨ་ར་ཧཱ, ཨ་ར་ཧ་ཏ་ཕ་ལ་ས་ཙྪི་ཀི་རི་ཡཱ་ཡ པ་ཊི་པ་ནྣོ – ཨ་ཡཾ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཨ་ཊྛ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ, ཡཾ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟི. ‘‘ཨི་མེ ཁོ, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ ཨ་ཊྛ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ, ཡེ དི་སྭཱ དི་སྭཱ བྷི་ཀྑཱུ ཨི་མ་སྨིཾ དྷ་མྨ་ཝི་ན་ཡེ ཨ་བྷི་ར་མ་ནྟཱི’’ཏི.
ཨ་ཐ ཁོ བྷ་ག་ཝཱ ཨེ་ཏ་མ་ཏྠཾ ཝི་དི་ཏྭཱ ཏཱ་ཡཾ ཝེ་ལཱ་ཡཾ ཨི་མཾ ཨུ་དཱ་ནཾ ཨུ་དཱ་ནེ་སི –
[ཨུ་དཱ. ༤༥] ‘‘ཚ་ནྣ་མ་ཏི་ཝ་སྶ་ཏི [སུ་ཚ་ནྣ་མ་ཏི་ཝ་སྶ་ཏི (ཀ.)], ཝི་ཝ་ཊཾ ནཱ་ཏི་ཝ་སྶ་ཏི;
ཏ་སྨཱ ཚ་ནྣཾ ཝི་ཝ་རེ་ཐ, ཨེ་ཝཾ ཏཾ ནཱ་ཏི་ཝ་སྶ་ཏཱི’’ཏི.
༤. པཱ་ཏི་མོ་ཀྑ་ས་ཝ་ནཱ་ར་ཧོ
༣༨༦. ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ན་དཱ་ནཱ་ཧཾ, བྷི་ཀྑ་ཝེ, ཨི་ཏོ པ་རཾ ཨུ་པོ་ས་ཐཾ ཀ་རི་སྶཱ་མི, པཱ་ཏི་མོ་ཀྑཾ ཨུ་དྡི་སི་སྶཱ་མི. ཏུ་མྷེ་ཝ་དཱ་ནི, བྷི་ཀྑ་ཝེ, ཨི་ཏོ པ་རཾ ཨུ་པོ་ས་ཐཾ ཀ་རེ་ཡྻཱ་ཐ, པཱ་ཏི་མོ་ཀྑཾ ཨུ་དྡི་སེ་ཡྻཱ་ཐ. ཨ་ཊྛཱ་ན་མེ་ཏཾ, བྷི་ཀྑ་ཝེ, ཨ་ན་ཝ་ཀཱ་སོ ཡཾ ཏ་ཐཱ་ག་ཏོ ཨ་པ་རི་སུ་དྡྷཱ་ཡ པ་རི་སཱ་ཡ ཨུ་པོ་ས་ཐཾ ཀ་རེ་ཡྻ, པཱ་ཏི་མོ་ཀྑཾ ཨུ་དྡི་སེ་ཡྻ. ན ཙ, བྷི་ཀྑ་ཝེ [ན ཙ བྷི་ཀྑ་ཝེ བྷི་ཀྑུ་ནཱ (སྱཱ. ཀཾ.)], སཱ་པ་ཏྟི་ཀེ་ན པཱ་ཏི་མོ་ཀྑཾ སོ་ཏ་བྦཾ. ཡོ སུ་ཎེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཡོ སཱ་པ་ཏྟི་ཀོ པཱ་ཏི་མོ་ཀྑཾ སུ་ཎཱ་ཏི, ཏ་སྶ པཱ་ཏི་མོ་ཀྑཾ ཋ་པེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཋ་པེ་ཏ་བྦཾ. ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རི་ཏ་བྦཾ –
‘སུ་ཎཱ་ཏུ མེ བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ སཱ་པ་ཏྟི་ཀོ, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ’ནྟི ཋ་པི་ཏཾ ཧོ་ཏི པཱ་ཏི་མོ་ཀྑ’’ནྟི.
ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ‘ནཱ་མྷེ ཀོ་ཙི ཛཱ་ནཱ་ཏཱི’ཏི སཱ་པ་ཏྟི་ཀཱ་ཝ པཱ་ཏི་མོ་ཀྑཾ སུ་ཎ་ནྟི. ཐེ་རཱ བྷི་ཀྑཱུ པ་ར་ཙི་ཏྟ་ཝི་དུ་ནོ བྷི་ཀྑཱུ་ནཾ ཨཱ་རོ་ཙེ་ནྟི – ‘‘ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ‘ནཱ་མྷེ ཀོ་ཙི ཛཱ་ནཱ་ཏཱི’ཏི སཱ་པ་ཏྟི་ཀཱ་ཝ པཱ་ཏི་མོ་ཀྑཾ སུ་ཎ་ནྟཱི’’ཏི. ཨ་སྶོ་སུཾ ཁོ ཚ་བྦ་གྒི་ཡཱ བྷི་ཀྑཱུ – ‘‘ཐེ་རཱ ཀི་ར བྷི་ཀྑཱུ པ་ར་ཙི་ཏྟ་ཝི་དུ་ནོ ཨ་མྷེ བྷི་ཀྑཱུ་ནཾ ཨཱ་རོ་ཙེ་ནྟི – ཨི་ཏྠ་ནྣཱ་མོ ཙ ཨི་ཏྠ་ནྣཱ་མོ ཙ, ཨཱ་ཝུ་སོ, ཚ་བྦ་གྒི་ཡཱ བྷི་ཀྑཱུ ‘ནཱ་མྷེ ཀོ་ཙི ཛཱ་ནཱ་ཏཱི’ཏི སཱ་པ་ཏྟི་ཀཱ་ཝ པཱ་ཏི་མོ་ཀྑཾ སུ་ཎ་ནྟཱི’’ཏི.
ཏེ – པུ་ར་མྷཱ་ཀཾ པེ་ས་ལཱ བྷི་ཀྑཱུ པཱ་ཏི་མོ་ཀྑཾ ཋ་པེ་ནྟཱི་ཏི – པ་ཊི་ཀ་ཙྩེ་ཝ སུ་དྡྷཱ་ནཾ བྷི་ཀྑཱུ་ནཾ ཨ་ནཱ་པ་ཏྟི་ཀཱ་ནཾ ཨ་ཝ་ཏྠུ་སྨིཾ ཨ་ཀཱ་ར་ཎེ པཱ་ཏི་མོ་ཀྑཾ ཋ་པེ་ནྟི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ སུ་དྡྷཱ་ནཾ བྷི་ཀྑཱུ་ནཾ ཨ་ནཱ་པ་ཏྟི་ཀཱ་ནཾ ཨ་ཝ་ཏྠུ་སྨིཾ ཨ་ཀཱ་ར་ཎེ པཱ་ཏི་མོ་ཀྑཾ ཋ་པེ་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑཱུ སུ་དྡྷཱ་ནཾ བྷི་ཀྑཱུ་ནཾ ཨ་ནཱ་པ་ཏྟི་ཀཱ་ནཾ ཨ་ཝ་ཏྠུ་སྨིཾ ཨ་ཀཱ་ར་ཎེ པཱ་ཏི་མོ་ཀྑཾ ཋ་པེ་ནྟཱི’’ཏི? ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, སུ་དྡྷཱ་ནཾ བྷི་ཀྑཱུ་ནཾ ཨ་ནཱ་པ་ཏྟི་ཀཱ་ནཾ ཨ་ཝ་ཏྠུ་སྨིཾ ཨ་ཀཱ་ར་ཎེ པཱ་ཏི་མོ་ཀྑཾ ཋ་པེ་ཏ་བྦཾ. ཡོ ཋ་པེ་ཡྻ, ཨཱ་པ་ཏྟི དུ་ཀྐ་ཊ་སྶ’’.
༥. དྷ་མྨི་ཀཱ་དྷ་མྨི་ཀ་པཱ་ཏི་མོ་ཀྑ་ཊྛ་པ་ནཾ
༣༨༧. ‘‘ཨེ་ཀཾ, བྷི་ཀྑ་ཝེ, ཨ་དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ, ཨེ་ཀཾ དྷ་མྨི་ཀཾ; པཱ་ཏི་མོ་ཀྑ་ཊྛ་པ་ནཾ [ཨེ་ཀཾ དྷ་མྨི་ཀཾ (སཱི. སྱཱ.)], དྭེ ཨ་དྷ་མྨི་ཀཱ་ནི; པཱ་ཏི་མོ་ཀྑ་ཊྛ་པ་ནཱ་ནི, དྭེ དྷ་མྨི་ཀཱ་ནི; ཏཱི་ཎི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ཏཱི་ཎི དྷ་མྨི་ཀཱ་ནི, ཙ་ཏྟཱ་རི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ཙ་ཏྟཱ་རི དྷ་མྨི་ཀཱ་ནི; པ་ཉྩ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, པ་ཉྩ དྷ་མྨི་ཀཱ་ནི; ཚ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ཚ དྷ་མྨི་ཀཱ་ནི; ས་ཏྟ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ས་ཏྟ དྷ་མྨི་ཀཱ་ནི; ཨ་ཊྛ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ཨ་ཊྛ དྷ་མྨི་ཀཱ་ནི; ན་ཝ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ན་ཝ དྷ་མྨི་ཀཱ་ནི; ད་ས ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི, ད་ས དྷ་མྨི་ཀཱ་ནི.
‘‘ཀ་ཏ་མཾ ཨེ་ཀཾ ཨ་དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་དཾ ཨེ་ཀཾ ཨ་དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ. ཀ་ཏ་མཾ ཨེ་ཀཾ དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་དཾ ཨེ་ཀཾ དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
‘‘ཀ་ཏ་མཱ་ནི དྭེ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི དྭེ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི དྭེ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི དྭེ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ཏཱི་ཎི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ཏཱི་ཎི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ཏཱི་ཎི དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ཏཱི་ཎི དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ཙ་ཏྟཱ་རི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ཨ་མཱུ་ལི་ཀཱ་ཡ ཨཱ་ཛཱི་ཝ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ཙ་ཏྟཱ་རི ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ཙ་ཏྟཱ་རི དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི, ས་མཱུ་ལི་ཀཱ་ཡ ཨཱ་ཛཱི་ཝ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ཙ་ཏྟཱ་རི དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི པ་ཉྩ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལ་ཀེ་ན པཱ་རཱ་ཛི་ཀེ་ན པཱ་ཏི་མོ་ཀྑཾ ཋ་པེ་ཏི, ཨ་མཱུ་ལ་ཀེ་ན ས་ངྒྷཱ་དི་སེ་སེ་ན…པེ… ཨ་མཱུ་ལ་ཀེ་ན པཱ་ཙི་ཏྟི་ཡེ་ན… ཨ་མཱུ་ལ་ཀེ་ན པཱ་ཊི་དེ་ས་ནཱི་ཡེ་ན… ཨ་མཱུ་ལ་ཀེ་ན དུ་ཀྐ་ཊེ་ན པཱ་ཏི་མོ་ཀྑཾ ཋ་པེ་ཏི – ཨི་མཱ་ནི པ་ཉྩ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི པ་ཉྩ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལ་ཀེ་ན པཱ་རཱ་ཛི་ཀེ་ན པཱ་ཏི་མོ་ཀྑཾ ཋ་པེ་ཏི, ས་མཱུ་ལ་ཀེ་ན ས་ངྒྷཱ་དི་སེ་སེ་ན…པེ… པཱ་ཙི་ཏྟི་ཡེ་ན… པཱ་ཊི་དེ་ས་ནཱི་ཡེ་ན… དུ་ཀྐ་ཊེ་ན པཱ་ཏི་མོ་ཀྑཾ ཋ་པེ་ཏི – ཨི་མཱ་ནི པ་ཉྩ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ཚ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ; ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ; ཨ་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ཨ་མཱུ་ལི་ཀཱ་ཡ དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ – ཨི་མཱ་ནི ཚ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ཚ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ; ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ…པེ… དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ…པེ… ཀ་ཏཱ་ཡ – ཨི་མཱ་ནི ཚ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ས་ཏྟ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལ་ཀེ་ན པཱ་རཱ་ཛི་ཀེ་ན པཱ་ཏི་མོ་ཀྑཾ ཋ་པེ་ཏི, ཨ་མཱུ་ལ་ཀེ་ན ས་ངྒྷཱ་དི་སེ་སེ་ན…པེ… ཐུ་ལླ་ཙྩ་ཡེ་ན པཱ་ཙི་ཏྟི་ཡེ་ན པཱ་ཊི་དེ་ས་ནཱི་ཡེ་ན དུ་ཀྐ་ཊེ་ན དུ་བྦྷཱ་སི་ཏེ་ན པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ས་ཏྟ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ས་ཏྟ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལ་ཀེ་ན པཱ་རཱ་ཛི་ཀེ་ན པཱ་ཏི་མོ་ཀྑཾ ཋ་པེ་ཏི, ས་མཱུ་ལ་ཀེ་ན ས་ངྒྷཱ་དི་སེ་སེ་ན…པེ… ཐུ་ལླ་ཙྩ་ཡེ་ན པཱ་ཙི་ཏྟི་ཡེ་ན པཱ་ཊི་དེ་ས་ནཱི་ཡེ་ན དུ་ཀྐ་ཊེ་ན དུ་བྦྷཱ་སི་ཏེ་ན པཱ་ཏི་མོ་ཀྑཾ ཋ་པེ་ཏི – ཨི་མཱ་ནི ས་ཏྟ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ཨ་ཊྛ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ; ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ …པེ… དི་ཊྛི་ཝི་པ་ཏྟི་ཡཱ…པེ… ཨཱ་ཛཱི་ཝ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ…པེ… ཀ་ཏཱ་ཡ – ཨི་མཱ་ནི ཨ་ཊྛ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ཨ་ཊྛ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ; ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ…པེ… དི་ཊྛི་ཝི་པ་ཏྟི་ཡཱ…པེ… ཨཱ་ཛཱི་ཝ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ…པེ… ཀ་ཏཱ་ཡ. ཨི་མཱ་ནི ཨ་ཊྛ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ན་ཝ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ, ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཀ་ཏཱ་ཡ; ཨ་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ…པེ… དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ…པེ… ཀ་ཏཱ་ཡ…པེ… ཀ་ཏཱ་ཀ་ཏཱ་ཡ ཨི་མཱ་ནི ན་ཝ ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ན་ཝ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ, ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཡ, ས་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཀ་ཏཱ་ཀ་ཏཱ་ཡ; ས་མཱུ་ལི་ཀཱ་ཡ ཨཱ་ཙཱ་ར་ཝི་པ་ཏྟི་ཡཱ…པེ… དི་ཊྛི་ཝི་པ་ཏྟི་ཡཱ པཱ་ཏི་མོ་ཀྑཾ ཋ་པེ་ཏི ཨ་ཀ་ཏཱ་ཡ…པེ… ཀ་ཏཱ་ཡ – ཀ་ཏཱ་ཀ་ཏཱ་ཡ…པེ… ཨི་མཱ་ནི ན་ཝ དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
‘‘ཀ་ཏ་མཱ་ནི ད་ས ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? ན པཱ་རཱ་ཛི་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི, ན པཱ་རཱ་ཛི་ཀ་ཀ་ཐཱ ཝི་པྤ་ཀ་ཏཱ ཧོ་ཏི; ན སི་ཀྑཾ པ་ཙྩ་ཀྑཱ་ཏ་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི, ན སི་ཀྑཾ པ་ཙྩ་ཀྑཱ་ཏ་ཀ་ཐཱ ཝི་པྤ་ཀ་ཏཱ ཧོ་ཏི; དྷ་མྨི་ཀཾ སཱ་མ་གྒིཾ ཨུ་པེ་ཏི, ན དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏི, ན དྷ་མྨི་ཀཱ་ཡ སཱ་མ་གྒི་ཡཱ པ་ཙྩཱ་དཱ་ན་ཀ་ཐཱ ཝི་པྤ་ཀ་ཏཱ ཧོ་ཏི; ན སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, ན ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, ན དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི – ཨི་མཱ་ནི ད་ས ཨ་དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི. ཀ་ཏ་མཱ་ནི ད་ས དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི? པཱ་རཱ་ཛི་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི, པཱ་རཱ་ཛི་ཀ་ཀ་ཐཱ ཝི་པྤ་ཀ་ཏཱ ཧོ་ཏི; སི་ཀྑཾ པ་ཙྩ་ཀྑཱ་ཏ་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི, སི་ཀྑཾ པ་ཙྩ་ཀྑཱ་ཏ་ཀ་ཐཱ ཝི་པྤ་ཀ་ཏཱ ཧོ་ཏི; དྷ་མྨི་ཀཾ སཱ་མ་གྒིཾ ན ཨུ་པེ་ཏི, དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏི, དྷ་མྨི་ཀཱ་ཡ སཱ་མ་གྒི་ཡཱ པ་ཙྩཱ་དཱ་ན་ཀ་ཐཱ ཝི་པྤ་ཀ་ཏཱ ཧོ་ཏི; སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི – ཨི་མཱ་ནི ད་ས དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནི.
༦. དྷ་མྨི་ཀ་པཱ་ཏི་མོ་ཀྑ་ཊྛ་པ་ནཾ
༣༨༨. ‘‘ཀ་ཐཾ པཱ་རཱ་ཛི་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི? ཨི་དྷ, བྷི་ཀྑ་ཝེ, ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི པཱ་རཱ་ཛི་ཀ་སྶ དྷ་མྨ་སྶ ཨ་ཛ྄ཛྷཱ་པ་ཏྟི ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ཛྫ་ནྟཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ཛྫ་ནྟཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣོ’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ཛྫ་ནྟཾ, ནཱ་པི [ནཱ་པི ཙ (ཀ.)] ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣོ’ཏི, ཨ་པི་ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣོ’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣོ, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༨༩. ‘‘བྷི་ཀྑུ་སྶ པཱ་ཏི་མོ་ཀྑེ ཋ་པི་ཏེ པ་རི་སཱ ཝུ་ཊྛཱ་ཏི, ད་ས་ནྣཾ ཨ་ནྟ་རཱ་ཡཱ་ནཾ ཨ་ཉྙ་ཏ་རེ་ན [ཨ་ཉྙ་ཏ་རེ་ན ཨ་ནྟ་རཱ་ཡེ་ན (སྱཱ. ཀཾ.)] – རཱ་ཛ་ནྟ་རཱ་ཡེ་ན ཝཱ, ཙོ་ར་ནྟ་རཱ་ཡེ་ན ཝཱ, ཨ་གྱ་ནྟ་རཱ་ཡེ་ན ཝཱ, ཨུ་ད་ཀ་ནྟ་རཱ་ཡེ་ན ཝཱ, མ་ནུ་སྶ་ནྟ་རཱ་ཡེ་ན ཝཱ, ཨ་མ་ནུ་སྶ་ནྟ་རཱ་ཡེ་ན ཝཱ, ཝཱ་ལ༹་ནྟ་རཱ་ཡེ་ན ཝཱ, ས་རཱི་ས་པ་ནྟ་རཱ་ཡེ་ན ཝཱ, ཛཱི་ཝི་ཏ་ནྟ་རཱ་ཡེ་ན ཝཱ, བྲ་ཧྨ་ཙ་རི་ཡ་ནྟ་རཱ་ཡེ་ན ཝཱ. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏ་སྨིཾ ཝཱ ཨཱ་ཝཱ་སེ, ཨ་ཉྙ་སྨིཾ ཝཱ ཨཱ་ཝཱ་སེ, ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ པཱ་རཱ་ཛི་ཀ་ཀ་ཐཱ ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ ཝ་ཏྠུཾ ཝི་ནི་ཙྪི་ནེ་ཡྻཱ་ཏི.
‘‘ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རི་ཏ་བྦཾ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ པཱ་རཱ་ཛི་ཀ་ཀ་ཐཱ ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༠. ‘‘ཀ་ཐཾ སི་ཀྑཾ པ་ཙྩ་ཀྑཱ་ཏ་ཀོ ཏ་སྶཾ པ་རི་སཱ་ཡཾ ནི་སི་ནྣོ ཧོ་ཏི? ཨི་དྷ པ་ན, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི སི་ཀྑཱ པ་ཙྩ་ཀྑཱ་ཏཱ ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི སི་ཀྑཾ པ་ཙྩ་ཀྑ་ནྟཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི སི་ཀྑཾ པ་ཙྩ་ཀྑ་ནྟཾ, ཨ་པི་ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མེ་ན, ཨཱ་ཝུ་སོ, བྷི་ཀྑུ་ནཱ སི་ཀྑཱ པ་ཙྩ་ཀྑཱ་ཏཱ’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི སི་ཀྑཾ པ་ཙྩ་ཀྑ་ནྟཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མེ་ན, ཨཱ་ཝུ་སོ, བྷི་ཀྑུ་ནཱ སི་ཀྑཱ པ་ཙྩ་ཀྑཱ་ཏཱ’ཏི, ཨ་པི་ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘མ་ཡཱ, ཨཱ་ཝུ་སོ, སི་ཀྑཱ པ་ཙྩ་ཀྑཱ་ཏཱ’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མེ་ན པུ་གྒ་ལེ་ན སི་ཀྑཱ པ་ཙྩ་ཀྑཱ་ཏཱ, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༡. ‘‘བྷི་ཀྑུ་སྶ པཱ་ཏི་མོ་ཀྑེ ཋ་པི་ཏེ པ་རི་སཱ ཝུ་ཊྛཱ་ཏི, ད་ས་ནྣཾ ཨ་ནྟ་རཱ་ཡཱ་ནཾ ཨ་ཉྙ་ཏ་རེ་ན – རཱ་ཛ་ནྟ་རཱ་ཡེ་ན ཝཱ …པེ… བྲ་ཧྨ་ཙ་རི་ཡ་ནྟ་རཱ་ཡེ་ན ཝཱ, ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏ་སྨིཾ ཝཱ ཨཱ་ཝཱ་སེ, ཨ་ཉྙ་སྨིཾ ཝཱ ཨཱ་ཝཱ་སེ, ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ སི་ཀྑཾ པ་ཙྩ་ཀྑཱ་ཏ་ཀ་ཐཱ [སི་ཀྑཱ་པ་ཙྩ་ཀྑཱ་ཏ་ཀ་ཐཱ (སཱི.)] ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ ཝ་ཏྠུཾ ཝི་ནི་ཙྪི་ནེ་ཡྻཱ་ཏི.
‘‘ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རི་ཏ་བྦཾ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ སི་ཀྑཾ པ་ཙྩ་ཀྑཱ་ཏ་ཀ་ཐཱ ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༢. ‘‘ཀ་ཐཾ དྷ་མྨི་ཀཾ སཱ་མ་གྒིཾ ན ཨུ་པེ་ཏི? ཨི་དྷ པ་ན, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི དྷ་མྨི་ཀཱ་ཡ སཱ་མ་གྒི་ཡཱ་ནུ་པ་ག་མ་ནཾ ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ ན ཨུ་པེ་ནྟཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ ན ཨུ་པེ་ནྟཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དྷ་མྨི་ཀཾ སཱ་མ་གྒིཾ ན ཨུ་པེ་ཏཱི’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ ན ཨུ་པེ་ནྟཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དྷ་མྨི་ཀཾ སཱ་མ་གྒིཾ ན ཨུ་པེ་ཏཱི’ཏི, ཨ་པི ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, དྷ་མྨི་ཀཾ སཱ་མ་གྒིཾ ན ཨུ་པེ་མཱི’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ དྷ་མྨི་ཀཾ སཱ་མ་གྒིཾ ན ཨུ་པེ་ཏི, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༣. ‘‘ཀ་ཐཾ དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏི? ཨི་དྷ, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི དྷ་མྨི་ཀཱ་ཡ སཱ་མ་གྒི་ཡཱ པ་ཙྩཱ་དཱ་ནཾ ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ནྟཾ ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ནྟཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏཱི’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ནྟཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏཱི’ཏི, ཨ་པི ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, དྷ་མྨི་ཀཾ སཱ་མ་གྒིཾ པ་ཙྩཱ་དི་ཡཱ་མཱི’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ དྷ་མྨི་ཀཾ སཱ་མ་གྒིཾ པ་ཙྩཱ་དི་ཡ་ཏི, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༤. ‘‘བྷི་ཀྑུ་སྶ པཱ་ཏི་མོ་ཀྑེ ཋ་པི་ཏེ པ་རི་སཱ ཝུ་ཊྛཱ་ཏི, ད་ས་ནྣཾ ཨ་ནྟ་རཱ་ཡཱ་ནཾ ཨ་ཉྙ་ཏ་རེ་ན – རཱ་ཛ་ནྟ་རཱ་ཡེ་ན ཝཱ…པེ… བྲ་ཧྨ་ཙ་རི་ཡ་ནྟ་རཱ་ཡེ་ན ཝཱ. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏ་སྨིཾ ཝཱ ཨཱ་ཝཱ་སེ, ཨ་ཉྙ་སྨིཾ ཝཱ ཨཱ་ཝཱ་སེ, ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ དྷ་མྨི་ཀཱ་ཡ སཱ་མ་གྒི་ཡཱ པ་ཙྩཱ་དཱ་ན་ཀ་ཐཱ ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏཾ ཝ་ཏྠུཾ ཝི་ནི་ཙྪི་ནེ་ཡྻཱ་ཏི.
‘‘ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རི་ཏ་བྦཾ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མ་སྶ པུ་གྒ་ལ་སྶ དྷ་མྨི་ཀཱ་ཡ སཱ་མ་གྒི་ཡཱ པ་ཙྩཱ་དཱ་ན་ཀ་ཐཱ ཝི་པྤ་ཀ་ཏཱ, ཏཾ ཝ་ཏྠུ ཨ་ཝི་ནི་ཙྪི་ཏཾ. ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༥. ‘‘ཀ་ཐཾ སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི? ཨི་དྷ པ་ན, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི, ཨ་པི ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ་མྷཱི’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ སཱི་ལ་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ, [དི་ཊྛ་སུ་ཏ་པ་རི་ས་ངྐི་ཏོ ཧོ་ཏི (སྱཱ. ཀཾ.)] ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༦. ‘‘ཀ་ཐཾ ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི? ཨི་དྷ པ་ན, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི, ཨ་པི ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ་མྷཱི’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ ཨཱ་ཙཱ་ར་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
༣༩༧. ‘‘ཀ་ཐཾ དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི? ཨི་དྷ པ་ན, བྷི་ཀྑ་ཝེ, བྷི་ཀྑུ ཡེ་ཧི ཨཱ་ཀཱ་རེ་ཧི ཡེ་ཧི ལི་ངྒེ་ཧི ཡེ་ཧི ནི་མི་ཏྟེ་ཧི དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ ཧོ་ཏི, ཏེ་ཧི ཨཱ་ཀཱ་རེ་ཧི ཏེ་ཧི ལི་ངྒེ་ཧི ཏེ་ཧི ནི་མི་ཏྟེ་ཧི བྷི་ཀྑུ བྷི་ཀྑུཾ པ་སྶ་ཏི དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ཨ་པི ཙ ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི. ན ཧེ་ཝ ཁོ བྷི་ཀྑུ བྷི་ཀྑུཾ པ་སྶ་ཏི དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏཾ, ནཱ་པི ཨ་ཉྙོ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨི་ཏྠ་ནྣཱ་མོ, ཨཱ་ཝུ་སོ, བྷི་ཀྑུ དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ’ཏི, ཨ་པི ཙ སོ་ཝ བྷི་ཀྑུ བྷི་ཀྑུ་སྶ ཨཱ་རོ་ཙེ་ཏི – ‘ཨ་ཧཾ, ཨཱ་ཝུ་སོ, དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ་མྷཱི’ཏི. ཨཱ་ཀ་ངྑ་མཱ་ནོ, བྷི་ཀྑ་ཝེ, བྷི་ཀྑུ ཏེ་ན དི་ཊྛེ་ན ཏེ་ན སུ་ཏེ་ན ཏཱ་ཡ པ་རི་ས་ངྐཱ་ཡ ཏ་ད་ཧུ་པོ་ས་ཐེ ཙཱ་ཏུ་དྡ་སེ ཝཱ པ་ནྣ་ར་སེ ཝཱ ཏ་སྨིཾ པུ་གྒ་ལེ ས་མྨུ་ཁཱི་བྷཱུ་ཏེ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་ཏྠ་ནྣཱ་མོ པུ་གྒ་ལོ དི་ཊྛི་ཝི་པ་ཏྟི་ཡཱ དི་ཊྛ་སུ་ཏ་པ་རི་ས་ངྐི་ཏོ, ཏ་སྶ པཱ་ཏི་མོ་ཀྑཾ ཋ་པེ་མི, ན ཏ་སྨིཾ ས་མྨུ་ཁཱི་བྷཱུ་ཏེ པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི – དྷ་མྨི་ཀཾ པཱ་ཏི་མོ་ཀྑ་ཊྛ་པ་ནཾ.
‘‘ཨི་མཱ་ནི ད་ས དྷ་མྨི་ཀཱ་ནི པཱ་ཏི་མོ་ཀྑ་ཊྛ་པ་ནཱ་ནཱི’’ཏི.
པ་ཋ་མ་བྷཱ་ཎ་ཝཱ་རོ ནི་ཊྛི་ཏོ.
༧. ཨ་ཏྟཱ་དཱ་ན་ཨ་ངྒཾ
༣༩༨. ཨ་ཐ ཁོ ཨཱ་ཡ་སྨཱ ཨུ་པཱ་ལི ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་པཱ་ལི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ན, བྷ་ནྟེ, བྷི་ཀྑུ་ནཱ ཀ་ཏ་མ་ངྒ་ས་མ་ནྣཱ་ག་ཏཾ [ཀ་ཏ་ངྒ་ས་མ་ནྣཱ་ག་ཏཾ (ཀ.)] ཨ་ཏྟཱ་དཱ་ནཾ ཨཱ་དཱ་ཏ་བྦ’’ནྟི?
[པ་རི. ༤༤༠] ‘‘ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ན, ཨུ་པཱ་ལི, བྷི་ཀྑུ་ནཱ པ་ཉྩ་ངྒ་ས་མ་ནྣཱ་ག་ཏཾ ཨ་ཏྟཱ་དཱ་ནཾ ཨཱ་དཱ་ཏ་བྦཾ. ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མེ་ན, ཨུ་པཱ་ལི, བྷི་ཀྑུ་ནཱ ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ, ཀཱ་ལོ ནུ ཁོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ ཨུ་དཱ་ཧུ ནོ’ཏི? ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་ཀཱ་ལོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ, ནོ ཀཱ་ལོ’ཏི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཀཱ་ལོ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུཾ, ནོ ཨ་ཀཱ་ལོ’ཏི, ཏེ་ནུ་པཱ་ལི, བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ, བྷཱུ་ཏཾ ནུ ཁོ ཨི་དཾ ཨ་ཏྟཱ་དཱ་ནཾ ཨུ་དཱ་ཧུ ནོ’ཏི? ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་བྷཱུ་ཏཾ ཨི་དཾ ཨ་ཏྟཱ་དཱ་ནཾ, ནོ བྷཱུ་ཏ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘བྷཱུ་ཏཾ ཨི་དཾ ཨ་ཏྟཱ་དཱ་ནཾ, ནོ ཨ་བྷཱུ་ཏ’ནྟི, ཏེ་ནུ་པཱ་ལི, བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཡཾ ཁོ ཨ་ཧཾ ཨི་མཾ ཨ་ཏྟཱ་དཱ་ནཾ ཨཱ་དཱ་ཏུ་ཀཱ་མོ, ཨ་ཏྠ་ས་ཉྷི་ཏཾ ནུ ཁོ ཨི་དཾ ཨ་ཏྟཱ་དཱ་ནཾ ཨུ་དཱ་ཧུ ནོ’ཏི? ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་ན་ཏྠ་ས་ཉྷི་ཏཾ ཨི་དཾ ཨ་ཏྟཱ་དཱ་ནཾ, ནོ ཨ་ཏྠ་ས་ཉྷི་ཏ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨ་ཏྠ་ས་ཉྷི་ཏཾ ཨི་དཾ ཨ་ཏྟཱ་དཱ་ནཾ, ནོ ཨ་ན་ཏྠ་ས་ཉྷི་ཏ’ནྟི, ཏེ་ནུ་པཱ་ལི, བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཨི་མཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ ཨུ་དཱ་ཧུ ནོ’ཏི? ས་ཙེ, ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ན ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ’ཏི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ.
‘‘ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ ཨ་ཧཾ ཨ་ཏྟཱ་དཱ་ནཾ ཨཱ་དི་ཡ་མཱ་ནོ ལ་བྷི་སྶཱ་མི ས་ནྡི་ཊྛེ ས་མྦྷ་ཏྟེ བྷི་ཀྑཱུ དྷ་མྨ་ཏོ ཝི་ན་ཡ་ཏོ པ་ཀྑེ’ཏི, ཏེ་ནུ་པཱ་ལི, བྷི་ཀྑུ་ནཱ ཨུ་ཏྟ་རི པ་ཙྩ་ཝེ་ཀྑི་ཏ་བྦཾ – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ ཨུ་དཱ་ཧུ ནོ’ཏི? ས་ཙེ ཨུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, ན ཏཾ, ཨུ་པཱ་ལི, ཨ་ཏྟཱ་དཱ་ནཾ ཨཱ་དཱ་ཏ་བྦཾ. ས་ཙེ པ་ནུ་པཱ་ལི, བྷི་ཀྑུ པ་ཙྩ་ཝེ་ཀྑ་མཱ་ནོ ཨེ་ཝཾ ཛཱ་ནཱ་ཏི – ‘ཨི་མཾ ཁོ མེ ཨ་ཏྟཱ་དཱ་ནཾ ཨཱ་དི་ཡ་ཏོ ན བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, ཨཱ་དཱ་ཏ་བྦཾ ཏཾ, ཨུ་པཱ་ལི, ཨ་ཏྟཱ་དཱ་ནཾ. ཨེ་ཝཾ པ་ཉྩ་ངྒ་ས་མ་ནྣཱ་ག་ཏཾ ཁོ, ཨུ་པཱ་ལི, ཨ་ཏྟཱ་དཱ་ནཾ ཨཱ་དི་ནྣཾ, པ་ཙྪཱ་པི ཨ་ཝི་པྤ་ཊི་སཱ་ར་ཀ་རཾ བྷ་ཝི་སྶ་ཏཱི’ཏི.
༨. ཙོ་ད་ཀེ་ན་པ་ཙྩ་ཝེ་ཀྑི་ཏ་བྦ་དྷ་མྨཱ
༣༩༩. [པ་རི. ༤༣༦ (ཨ. ནི. ༡༠.༤༤ ཐོ་ཀཾ ཝི་ས་དི་སཾ)] ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ན, ཨུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ.
‘‘ཙོ་ད་ཀེ་ན, ཨུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘པ་རི་སུ་དྡྷ་ཀཱ་ཡ་ས་མཱ་ཙཱ་རོ ནུ ཁོ་མྷི, པ་རི་སུ་དྡྷེ་ན་མྷི ཀཱ་ཡ་ས་མཱ་ཙཱ་རེ་ན ས་མ་ནྣཱ་ག་ཏོ – ཨ་ཙྪི་དྡེ་ན ཨ་པྤ་ཊི་མཾ་སེ་ན? སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི? ནོ ཙེ, ཨུ་པཱ་ལི, བྷི་ཀྑུ པ་རི་སུ་དྡྷ་ཀཱ་ཡ་ས་མཱ་ཙཱ་རོ ཧོ་ཏི, པ་རི་སུ་དྡྷེ་ན ཀཱ་ཡ་ས་མཱ་ཙཱ་རེ་ན ས་མ་ནྣཱ་ག་ཏོ – ཨ་ཙྪི་དྡེ་ན ཨ་པྤ་ཊི་མཾ་སེ་ན, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ ཏཱ་ཝ ཨཱ་ཡ་སྨཱ ཀཱ་ཡི་ཀཾ སི་ཀྑ་སྶཱུ’ཏི. ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘པ་རི་སུ་དྡྷ་ཝ་ཙཱི་ས་མཱ་ཙཱ་རོ ནུ ཁོ་མྷི, པ་རི་སུ་དྡྷེ་ན་མྷི ཝ་ཙཱི་ས་མཱ་ཙཱ་རེ་ན ས་མ་ནྣཱ་ག་ཏོ – ཨ་ཙྪི་དྡེ་ན ཨ་པྤ་ཊི་མཾ་སེ་ན? སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི? ནོ ཙེ, ཨུ་པཱ་ལི, བྷི་ཀྑུ པ་རི་སུ་དྡྷ་ཝ་ཙཱི་ས་མཱ་ཙཱ་རོ ཧོ་ཏི, པ་རི་སུ་དྡྷེ་ན ཝ་ཙཱི་ས་མཱ་ཙཱ་རེ་ན ས་མ་ནྣཱ་ག་ཏོ – ཨ་ཙྪི་དྡེ་ན ཨ་པྤ་ཊི་མཾ་སེ་ན, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ ཏཱ་ཝ ཨཱ་ཡ་སྨཱ ཝཱ་ཙ་སི་ཀཾ སི་ཀྑ་སྶཱུ’ཏི. ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘མེ་ཏྟཾ ནུ ཁོ མེ ཙི་ཏྟཾ པ་ཙྩུ་པ་ཊྛི་ཏཾ ས་བྲ་ཧྨ་ཙཱ་རཱི་སུ ཨ་ནཱ་གྷཱ་ཏཾ, སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི? ནོ ཙེ, ཨུ་པཱ་ལི, བྷི་ཀྑུ་ནོ མེ་ཏྟ་ཙི་ཏྟཾ པ་ཙྩུ་པ་ཊྛི་ཏཾ ཧོ་ཏི ས་བྲ་ཧྨ་ཙཱ་རཱི་སུ ཨ་ནཱ་གྷཱ་ཏཾ, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ ཏཱ་ཝ ཨཱ་ཡ་སྨཱ ས་བྲ་ཧྨ་ཙཱ་རཱི་སུ མེ་ཏྟ་ཙི་ཏྟཾ ཨུ་པ་ཊྛཱ་པེ་ཧཱི’ཏི. ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘བ་ཧུ་སྶུ་ཏོ ནུ ཁོ་མྷི, སུ་ཏ་དྷ་རོ, སུ་ཏ་ས་ནྣི་ཙྩ་ཡོ? ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ, སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི, ཏ་ཐཱ་རཱུ་པཱ མེ དྷ་མྨཱ བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ? སཾ་ཝི་ཛྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི? ནོ ཙེ, ཨུ་པཱ་ལི, བྷི་ཀྑུ བ་ཧུ་སྶུ་ཏོ ཧོ་ཏི, སུ་ཏ་དྷ་རོ, སུ་ཏ་ས་ནྣི་ཙྩ་ཡོ; ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ, སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི, ཏ་ཐཱ་རཱུ་པ་སྶ དྷ་མྨཱ ན བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ, ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ ཏཱ་ཝ ཨཱ་ཡ་སྨཱ ཨཱ་ག་མཾ པ་རི་ཡཱ་པུ་ཎ་སྶཱུ’ཏི. ཨི་ཏི་སྶ བྷ་ཝ་ནྟི ཝ་ཏྟཱ་རོ.
‘‘པུ་ན ཙ་པ་རཾ, ཨུ་པཱ་ལི, ཙོ་ད་ཀེ་ན བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨེ་ཝཾ པ་ཙྩ་ཝེ་ཀྑི་ཏ་བྦཾ – ‘ཨུ་བྷ་ཡཱ་ནི ཁོ མེ པཱ་ཏི་མོ་ཀྑཱ་ནི ཝི་ཏྠཱ་རེ་ན སྭཱ་ག་ཏཱ་ནི ཧོ་ནྟི, སུ་ཝི་བྷ་ཏྟཱ་ནི, སུ་པྤ་ཝ་ཏྟཱི་ནི, སུ་ཝི་ནི་ཙྪི་ཏཱ་ནི – སུ་ཏྟ་སོ, ཨ་ནུ་བྱ་ཉྫ་ན་སོ? སཾ་ཝི་ཉྫ་ཏི ནུ ཁོ མེ ཨེ་སོ དྷ་མྨོ ཨུ་དཱ་ཧུ ནོ’ཏི? ནོ ཙེ, ཨུ་པཱ་ལི, བྷི་ཀྑུ་ནོ ཨུ་བྷ་ཡཱ་ནི པཱ་ཏི་མོ་ཀྑཱ་ནི ཝི་ཏྠཱ་རེ་ན སྭཱ་ག་ཏཱ་ནི ཧོ་ནྟི, སུ་ཝི་བྷ་ཏྟཱ་ནི, སུ་པྤ་ཝ་ཏྟཱི་ནི, སུ་ཝི་ནི་ཙྪི་ཏཱ་ནི – སུ་ཏྟ་སོ, ཨ་ནུ་བྱ་ཉྫ་ན་སོ, ‘ཨི་དཾ པ་ནཱ་ཝུ་སོ, ཀ་ཏྠ ཝུ་ཏྟཾ བྷ་ག་ཝ་ཏཱ’ཏི, ཨི་ཏི པུ་ཊྛོ ན ས་མྤཱ་ཡ་ཏི [ན ས་མྤཱ་ད་ཡ་ཏི (ཀ.)], ཏ་སྶ བྷ་ཝ་ནྟི ཝ་ཏྟཱ་རོ – ‘ཨི་ངྒྷ ཏཱ་ཝ ཨཱ་ཡ་སྨཱ, ཝི་ན་ཡཾ པ་རི་ཡཱ་པུ་ཎ་སྶཱུ’ཏི. ཨི་ཏི་སྶ བྷ་ཝ་ནྟི ཝ་ཏྟཱ་རོ. ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ པ་ཙྩ་ཝེ་ཀྑི་ཏྭཱ པ་རོ ཙོ་དེ་ཏ་བྦོ’’ཏི.
༩. ཙོ་ད་ཀེ་ན་ཨུ་པ་ཊྛཱ་པེ་ཏ་བྦ་དྷ་མྨཱ
༤༠༠. ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ – ཀཱ་ལེ་ན ཝ་ཀྑཱ་མི, ནོ ཨ་ཀཱ་ལེ་ན; བྷཱུ་ཏེ་ན ཝ་ཀྑཱ་མི, ནོ ཨ་བྷཱུ་ཏེ་ན; ས་ཎྷེ་ན ཝ་ཀྑཱ་མི, ནོ ཕ་རུ་སེ་ན; ཨ་ཏྠ་སཾ་ཧི་ཏེ་ན ཝ་ཀྑཱ་མི, ནོ ཨ་ན་ཏྠ་སཾ་ཧི་ཏེ་ན; མེ་ཏྟ་ཙི་ཏྟོ ཝ་ཀྑཱ་མི, ནོ དོ་ས་ནྟ་རོ་ཏི. ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ ཨུ་པ་ཊྛཱ་པེ་ཏྭཱ པ་རོ ཙོ་དེ་ཏ་བྦོ’’ཏི.
༡༠. ཙོ་ད་ཀ་ཙུ་དི་ཏ་ཀ་པ་ཊི་སཾ་ཡུ་ཏྟ་ཀ་ཐཱ
༤༠༡. ‘‘ཨ་དྷ་མྨ་ཙོ་ད་ཀ་སྶ, བྷ་ནྟེ, བྷི་ཀྑུ་ནོ ཀ་ཏཱི་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི? ‘‘ཨ་དྷ་མྨ་ཙོ་ད་ཀ་སྶ, ཨུ་པཱ་ལི, བྷི་ཀྑུ་ནོ པ་ཉྩ་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ – ཨ་ཀཱ་ལེ་ནཱ་ཡ་སྨཱ ཙོ་དེ་སི, ནོ ཀཱ་ལེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; ཨ་བྷཱུ་ཏེ་ནཱ་ཡ་སྨཱ ཙོ་དེ་སི, ནོ བྷཱུ་ཏེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; ཕ་རུ་སེ་ནཱ་ཡ་སྨཱ ཙོ་དེ་སི, ནོ ས་ཎྷེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; ཨ་ན་ཏྠ་སཾ་ཧི་ཏེ་ནཱ་ཡ་སྨཱ ཙོ་དེ་སི, ནོ ཨ་ཏྠ་སཾ་ཧི་ཏེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; དོ་ས་ནྟ་རོ ཨཱ་ཡ་སྨཱ ཙོ་དེ་སི, ནོ མེ་ཏྟ་ཙི་ཏྟོ, ཨ་ལཾ ཏེ ཝི་པྤ་ཊི་སཱ་རཱ་ཡཱ་ཏི. ཨ་དྷ་མྨ་ཙོ་ད་ཀ་སྶ, ཨུ་པཱ་ལི, བྷི་ཀྑུ་ནོ ཨི་མེ་ཧི པ་ཉྩ་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ. ཏཾ ཀི་སྶ ཧེ་ཏུ? ཡ་ཐཱ ན ཨ་ཉྙོ་པི བྷི་ཀྑུ ཨ་བྷཱུ་ཏེ་ན ཙོ་དེ་ཏ་བྦཾ མ་ཉྙེ་ཡྻཱ’’ཏི.
‘‘ཨ་དྷ་མྨ་ཙུ་དི་ཏ་སྶ པ་ན, བྷ་ནྟེ, བྷི་ཀྑུ་ནོ ཀ་ཏི་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི? ‘‘ཨ་དྷ་མྨ་ཙུ་དི་ཏ་སྶ, ཨུ་པཱ་ལི, བྷི་ཀྑུ་ནོ པ་ཉྩ་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ – ཨ་ཀཱ་ལེ་ནཱ་ཡ་སྨཱ ཙུ་དི་ཏོ, ནོ ཀཱ་ལེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; ཨ་བྷཱུ་ཏེ་ནཱ་ཡ་སྨཱ ཙུ་དི་ཏོ, ནོ བྷཱུ་ཏེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; ཕ་རུ་སེ་ནཱ་ཡ་སྨཱ ཙུ་དི་ཏོ, ནོ ས་ཎྷེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; ཨ་ན་ཏྠ་སཾ་ཧི་ཏེ་ནཱ་ཡ་སྨཱ ཙུ་དི་ཏོ, ནོ ཨ་ཏྠ་སཾ་ཧི་ཏེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; དོ་ས་ནྟ་རེ་ནཱ་ཡ་སྨཱ ཙུ་དི་ཏོ, ནོ མེ་ཏྟ་ཙི་ཏྟེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡཱ་ཏི. ཨ་དྷ་མྨ་ཙུ་དི་ཏ་སྶ, ཨུ་པཱ་ལི, བྷི་ཀྑུ་ནོ ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི.
‘‘དྷ་མྨ་ཙོ་ད་ཀ་སྶ, བྷ་ནྟེ, བྷི་ཀྑུ་ནོ ཀ་ཏི་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི? ‘‘དྷ་མྨ་ཙོ་ད་ཀ་སྶ, ཨུ་པཱ་ལི, བྷི་ཀྑུ་ནོ པ་ཉྩ་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ – ཀཱ་ལེ་ནཱ་ཡ་སྨཱ ཙོ་དེ་སི, ནོ ཨ་ཀཱ་ལེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; བྷཱུ་ཏེ་ནཱ་ཡ་སྨཱ ཙོ་དེ་སི, ནོ ཨ་བྷཱུ་ཏེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; ས་ཎྷེ་ནཱ་ཡ་སྨཱ ཙོ་དེ་སི, ནོ ཕ་རུ་སེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; ཨ་ཏྠ་སཾ་ཧི་ཏེ་ནཱ་ཡ་སྨཱ ཙོ་དེ་སི, ནོ ཨ་ན་ཏྠ་སཾ་ཧི་ཏེ་ན, ཨ་ལཾ ཏེ ཨ་ཝི་པྤ་ཊི་སཱ་རཱ་ཡ; མེ་ཏྟ་ཙི་ཏྟོ ཨཱ་ཡ་སྨཱ ཙོ་དེ་སི, ནོ དོ་ས་ནྟ་རོ, ཨ་ལཾ ཏེ ཨ་ཝི་པྤ་ཊི་སཱ་རཱ་ཡཱ་ཏི. དྷ་མྨ་ཙོ་ད་ཀ་སྶ, ཨུ་པཱ་ལི, བྷི་ཀྑུ་ནོ ཨི་མེ་ཧི པ་ཉྩ་ཧཱ་ཀཱ་རེ་ཧི ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ. ཏཾ ཀི་སྶ ཧེ་ཏུ? ཡ་ཐཱ ཨ་ཉྙོ་པི བྷི་ཀྑུ བྷཱུ་ཏེ་ན ཙོ་དེ་ཏ་བྦཾ མ་ཉྙེ་ཡྻཱ’’ཏི.
‘‘དྷ་མྨ་ཙུ་དི་ཏ་སྶ པ་ན, བྷ་ནྟེ, བྷི་ཀྑུ་ནོ ཀ་ཏི་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི? ‘‘དྷ་མྨ་ཙུ་དི་ཏ་སྶ, ཨུ་པཱ་ལི, བྷི་ཀྑུ་ནོ པ་ཉྩ་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ – ཀཱ་ལེ་ནཱ་ཡ་སྨཱ ཙུ་དི་ཏོ, ནོ ཨ་ཀཱ་ལེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; བྷཱུ་ཏེ་ནཱ་ཡ་སྨཱ ཙུ་དི་ཏོ, ནོ ཨ་བྷཱུ་ཏེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; ས་ཎྷེ་ནཱ་ཡ་སྨཱ ཙུ་དི་ཏོ, ནོ ཕ་རུ་སེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; ཨ་ཏྠ་སཾ་ཧི་ཏེ་ནཱ་ཡ་སྨཱ ཙུ་དི་ཏོ, ནོ ཨ་ན་ཏྠ་སཾ་ཧི་ཏེ་ན, ཨ་ལཾ ཏེ ཝི་པྤ་ཊི་སཱ་རཱ་ཡ; མེ་ཏྟ་ཙི་ཏྟེ་ནཱ་ཡ་སྨཱ ཙུ་དི་ཏོ, ནོ དོ་ས་ནྟ་རེ་ན, ཨ་ལཾ ཏེ ཝི་པྤ་ཊི་སཱ་རཱ་ཡཱ་ཏི. དྷ་མྨ་ཙུ་དི་ཏ་སྶ, ཨུ་པཱ་ལི, བྷི་ཀྑུ་ནོ ཨི་མེ་ཧི པ་ཉྩ་ཧཱ་ཀཱ་རེ་ཧི ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོ’’ཏི.
[པ་རི. ༤༣༨] ‘‘ཙོ་ད་ཀེ་ན, བྷ་ནྟེ, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཀ་ཏི དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ’’ཏི? ‘‘ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན པ་ཉྩ དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ – ཀཱ་རུ་ཉྙ་ཏཱ, ཧི་ཏེ་སི་ཏཱ, ཨ་ནུ་ཀ་མྤི་ཏཱ, [ཨ་ནུ་ཀ་མྤ་ཏཱ (ཀ.)] ཨཱ་པ་ཏྟི་ཝུ་ཊྛཱ་ན་ཏཱ, ཝི་ན་ཡ་པུ་རེ་ཀྑཱ་ར་ཏཱ་ཏི. ཙོ་ད་ཀེ་ནུ་པཱ་ལི, བྷི་ཀྑུ་ནཱ པ་རཾ ཙོ་དེ་ཏུ་ཀཱ་མེ་ན ཨི་མེ པ་ཉྩ དྷ་མྨེ ཨ་ཛ྄ཛྷ་ཏྟཾ མ་ན་སི ཀ་རི་ཏྭཱ པ་རོ ཙོ་དེ་ཏ་བྦོ’’ཏི.
‘‘ཙུ་དི་ཏེ་ན པ་ན, བྷ་ནྟེ, བྷི་ཀྑུ་ནཱ ཀ་ཏི་སུ དྷ་མྨེ་སུ པ་ཏི་ཊྛཱ་ཏ་བྦ’’ནྟི? ‘‘ཙུ་དི་ཏེ་ནུ་པཱ་ལི, བྷི་ཀྑུ་ནཱ དྭཱི་སུ དྷ་མྨེ་སུ པ་ཏི་ཊྛཱ་ཏ་བྦཾ – ས་ཙྩེ ཙ ཨ་ཀུ་པྤེ ཙཱ’’ཏི.
དུ་ཏི་ཡ་བྷཱ་ཎ་ཝཱ་རོ ནི་ཊྛི་ཏོ.
པཱ་ཏི་མོ་ཀྑ་ཊྛ་པ་ན་ཀྑ་ནྡྷ་ཀོ ན་ཝ་མོ.
ཨི་མ་མྷི ཁ་ནྡྷ་ཀེ ཝ་ཏྠཱུ ཏིཾ་ས.
ཏ་སྶུ་དྡཱ་ནཾ –
ཨུ་པོ་ས་ཐེ ཡཱ་ཝ་ཏི་ཀཾ, པཱ་པ་བྷི་ཀྑུ ན ནི་ཀྑ་མི;
མོ་གྒ་ལླཱ་ནེ་ན ནི་ཙྪུ་དྡྷོ, ཨ་ཙྪེ་རཱ ཛི་ན་སཱ་ས་ནེ.
ནི་ནྣོ་ནུ་པུ་བྦ་སི་ཀྑཱ ཙ, ཋི་ཏ་དྷ་མྨོ ནཱ་ཏི་ཀྐ་མྨ;
ཀུ་ཎ་པུ་ཀྑི་པ་ཏི ས་ངྒྷོ, ས་ཝ་ནྟི་ཡོ ཛ་ཧ་ནྟི ཙ.
ས་ཝ་ནྟི པ་རི་ནི་བྦ་ནྟི, ཨེ་ཀ་ར་ས ཝི་མུ་ཏྟི ཙ;
བ་ཧུ དྷ་མྨ་ཝི་ན་ཡོ་པི, བྷཱུ་ཏ་ཊྛཱ་རི་ཡ་པུ་གྒ་ལཱ.
ས་མུ་དྡཾ ཨུ་པ་མཾ ཀ་ཏྭཱ, ཝཱ་ཙེ་སི [ཋཱ་པེ་སི (ཀ.)] སཱ་ས་ནེ གུ་ཎཾ;
ཨུ་པོ་ས་ཐེ པཱ་ཏི་མོ་ཀྑཾ, ན ཨ་མྷེ ཀོ་ཙི ཛཱ་ནཱ་ཏི.
པ་ཊི་ཀ་ཙྩེ་ཝ ཨུ་ཛ྄ཛྷ་ནྟི, ཨེ་ཀོ དྭེ ཏཱི་ཎི ཙ་ཏྟཱ་རི;
པ་ཉྩ ཚ ས་ཏྟ ཨ་ཊྛཱ་ནི, ན་ཝཱ ཙ ད་ས་མཱ་ནི ཙ.
སཱི་ལ-ཨཱ་ཙཱ་ར-དི་ཊྛི ཙ, ཨཱ་ཛཱི་ཝཾ ཙ་ཏུ་བྷཱ་གི་ཀེ;
པཱ་རཱ་ཛི་ཀ་ཉྩ ས་ངྒྷཱ་དི, པཱ་ཙི་ཏྟི པཱ་ཊི་དེ་ས་ནི.
དུ་ཀྐ་ཊཾ པ་ཉྩ་བྷཱ་གེ་སུ, སཱི་ལཱ་ཙཱ་ར་ཝི་པ་ཏྟི ཙ;
ཨ་ཀ་ཏཱ་ཡ ཀ་ཏཱ་ཡ ཙ, ཚ་བྷཱ་གེ་སུ ཡ་ཐཱ་ཝི་དྷི.
པཱ་རཱ་ཛི་ཀ་ཉྩ ས་ངྒྷཱ་དི, ཐུ་ལླཾ པཱ་ཙི་ཏྟི་ཡེ་ན ཙ;
པཱ་ཊི་དེ་ས་ནི་ཡ་ཉྩེ་ཝ, དུ་ཀྐ་ཊ་ཉྩ དུ་བྦྷཱ་སི་ཏཾ.
སཱི་ལཱ་ཙཱ་ར་ཝི་པ་ཏྟི ཙ, དི་ཊྛི་ཨཱ་ཛཱི་ཝ་ཝི་པ་ཏྟི;
ཡཱ ཙ ཨ་ཊྛཱ ཀ་ཏཱ་ཀ་ཏེ, ཏེ་ནེ་ཏཱ སཱི་ལཱ་ཙཱ་ར་དི་ཊྛི་ཡཱ.
ཨ་ཀ་ཏཱ་ཡ ཀ་ཏཱ་ཡཱ་པི, ཀ་ཏཱ་ཀ་ཏཱ་ཡ་མེ་ཝ ཙ;
ཨེ་ཝཾ ན་ཝ་ཝི་དྷཱ ཝུ་ཏྟཱ, ཡ་ཐཱ་བྷཱུ་ཏེ་ན ཉཱ་ཡ་ཏོ.
པཱ་རཱ་ཛི་ཀོ ཝི་པྤ་ཀ་ཏཱ, པ་ཙྩ་ཀྑཱ་ཏོ ཏ་ཐེ་ཝ ཙ;
ཨུ་པེ་ཏི པ་ཙྩཱ་དི་ཡ་ཏི, པ་ཙྩཱ་དཱ་ན་ཀ་ཐཱ ཙ ཡཱ.
སཱི་ལཱ་ཙཱ་ར་ཝི་པ་ཏྟི ཙ, ཏ་ཐཱ དི་ཊྛི་ཝི་པ་ཏྟི་ཡཱ;
དི་ཊྛ་སུ་ཏ་པ་རི་ས་ངྐི་ཏཾ, ད་ས་དྷཱ ཏཾ ཝི་ཛཱ་ནཱ་ཐ.
བྷི་ཀྑུ ཝི་པ་སྶ་ཏི བྷི་ཀྑུཾ, ཨ་ཉྙོ ཙཱ་རོ་ཙ་ཡཱ་ཏི ཏཾ;
སོ ཡེ་ཝ ཏ་སྶ ཨ་ཀྑཱ་ཏི [ཝི་པ་སྶ་ཉྙོ ཙཱ་རོ་ཙ་ཏི; ཏཾ སུ་དྡྷེ་ཝ ཏ་སྶ ཨ་ཀྑཱ་ཏི (ཀ.)], པཱ་ཏི་མོ་ཀྑཾ ཋ་པེ་ཏི སོ.
ཝུ་ཊྛཱ་ཏི ཨ་ནྟ་རཱ་ཡེ་ན, རཱ་ཛ་ཙོ་ར་གྒུ་ད་ཀཱ ཙ;
མ་ནུ་སྶ་ཨ་མ་ནུ་སྶཱ ཙ, ཝཱ་ལ༹་ས་རཱི་ས་པཱ ཛཱི་ཝི་བྲ་ཧྨཾ.
ད་ས་ནྣ་མ་ཉྙ་ཏ་རེ་ན, ཏ་སྨིཾ ཨ་ཉྙ་ཏ་རེ་སུ ཝཱ;
དྷ་མྨི་ཀཱ་དྷ་མྨི་ཀཱ ཙེ་ཝ, ཡ་ཐཱ མ་གྒེ་ན ཛཱ་ནཱ་ཐ.
ཀཱ་ལ་བྷཱུ་ཏ་ཏྠ་སཾ་ཧི་ཏཾ, ལ་བྷི་སྶཱ་མི བྷ་ཝི་སྶ་ཏི;
ཀཱ་ཡ་ཝཱ་ཙ་སི་ཀཱ མེ་ཏྟཱ, བཱ་ཧུ་ས་ཙྩཾ ཨུ་བྷ་ཡཱ་ནི.
ཀཱ་ལ་བྷཱུ་ཏེ་ན ས་ཎྷེ་ན, ཨ་ཏྠ་མེ་ཏྟེ་ན ཙོ་ད་ཡེ;
ཝི་པྤ་ཊི་སཱ་ར་དྷ་མྨེ་ན, ཏ་ཐཱ ཝཱ་ཙཱ [ཏ་ཐེ་ཝཱ་པི (སྱཱ.)] ཝི་ནོ་ད་ཡེ.
དྷ་མྨ་ཙོ་ད་ཙུ་དི་ཏ་སྶ, ཝི་ནོ་དེ་ཏི ཝི་པྤ་ཊི་སཱ་རོ;
ཀ་རུ་ཎཱ ཧི་ཏཱ་ནུ་ཀ་མྤི, ཝུ་ཊྛཱ་ན་པུ་རེ་ཀྑཱ་ར་ཏོ.
ཙོ་ད་ཀ་སྶ པ་ཊི་པ་ཏྟི, ས་མྦུ་དྡྷེ་ན པ་ཀཱ་སི་ཏཱ;
ས་ཙྩེ ཙེ་ཝ ཨ་ཀུ་པྤེ ཙ, ཙུ་དི་ཏ་སྶེ་ཝ དྷ་མྨ་ཏཱ་ཏི.
པཱ་ཏི་མོ་ཀྑ་ཊྛ་པ་ན་ཀྑ་ནྡྷ་ཀཾ ནི་ཊྛི་ཏཾ.