༡. ཨཱ་ག་ནྟུ་ཀ་ཝ་ཏྟ་ཀ་ཐཱ
༣༥༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་ག་ནྟུ་ཀཱ བྷི་ཀྑཱུ ས་ཨུ་པཱ་ཧ་ནཱ་པི ཨཱ་རཱ་མཾ པ་ཝི་ས་ནྟི, ཚ་ཏྟ་པ་གྒ་ཧི་ཏཱ་པི ཨཱ་རཱ་མཾ པ་ཝི་ས་ནྟི, ཨོ་གུ་ཎྛི་ཏཱ་པི ཨཱ་རཱ་མཾ པ་ཝི་ས་ནྟི, སཱི་སེ་པི ཙཱི་ཝ་རཾ ཀ་རི་ཏྭཱ ཨཱ་རཱ་མཾ པ་ཝི་ས་ནྟི, པཱ་ནཱི་ཡེ་ན་པི པཱ་དེ དྷོ་ཝ་ནྟི, ཝུ་ཌྜྷ་ཏ་རེ་པི ཨཱ་ཝཱ་སི་ཀེ བྷི་ཀྑཱུ ན ཨ་བྷི་ཝཱ་དེ་ནྟི, ན་པི སེ་ནཱ་ས་ནཾ པུ་ཙྪ་ནྟི. ཨ་ཉྙ་ཏ་རོ་པི ཨཱ་ག་ནྟུ་ཀོ བྷི་ཀྑུ ཨ་ན་ཛ྄ཛྷཱ་ཝུ་ཊྛཾ ཝི་ཧཱ་རཾ གྷ་ཊི་ཀཾ ཨུ་གྒྷཱ་ཊེ་ཏྭཱ ཀ་ཝཱ་ཊཾ པ་ཎཱ་མེ་ཏྭཱ ས་ཧ་སཱ པཱ་ཝི་སི. ཏ་སྶ ཨུ་པ་རི་པི་ཊྛི་ཏོ [ཨུ་པ་རི་པི་ཊྛ་ཏོ (?)] ཨ་ཧི ཁ་ནྡྷེ པ་པ་ཏི. སོ བྷཱི་ཏོ ཝི་སྶ་ར་མ་ཀཱ་སི. བྷི་ཀྑཱུ ཨུ་པ་དྷཱ་ཝི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨཱ་ཝུ་སོ, ཝི་སྶ་ར་མ་ཀཱ་སཱི’’ཏི? ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨཱ་ག་ནྟུ་ཀཱ བྷི་ཀྑཱུ ས་ཨུ་པཱ་ཧ་ནཱ་པི ཨཱ་རཱ་མཾ པ་ཝི་སི་སྶ་ནྟི, ཚ་ཏྟ་པ་གྒ་ཧི་ཏཱ་པི ཨཱ་རཱ་མཾ པ་ཝི་སི་སྶ་ནྟི, ཨོ་གུ་ཎྛི་ཏཱ་པི ཨཱ་རཱ་མཾ པ་ཝི་སི་སྶ་ནྟི, སཱི་སེ་པི ཙཱི་ཝ་རཾ ཀ་རི་ཏྭཱ ཨཱ་རཱ་མཾ པ་ཝི་སི་སྶ་ནྟི, པཱ་ནཱི་ཡེ་ན་པི པཱ་དེ དྷོ་ཝི་སྶ་ནྟི, ཝུ་ཌྜྷ་ཏ་རེ་པི ཨཱ་ཝཱ་སི་ཀེ བྷི་ཀྑཱུ ན ཨ་བྷི་ཝཱ་དེ་སྶ་ནྟི, ན་པི སེ་ནཱ་ས་ནཾ པུ་ཙྪི་སྶ་ནྟཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, ‘‘ཨཱ་ག་ནྟུ་ཀཱ བྷི་ཀྑཱུ ས་ཨུ་པཱ་ཧ་ནཱ་པི ཨཱ་རཱ་མཾ པ་ཝི་ས་ནྟི, ཚ་ཏྟ་པ་གྒ་ཧི་ཏཱ་པི ཨཱ་རཱ་མཾ པ་ཝི་ས་ནྟི, ཨོ་གུ་ཎྛི་ཏཱ་པི ཨཱ་རཱ་མཾ པ་ཝི་ས་ནྟི, སཱི་སེ་པི ཙཱི་ཝ་རཾ ཀ་རི་ཏྭཱ ཨཱ་རཱ་མཾ པ་ཝི་ས་ནྟི, པཱ་ནཱི་ཡེ་ནི་པི པཱ་དེ དྷོ་ཝ་ནྟི, ཝུ་ཌྜྷ་ཏ་རེ་པི ཨཱ་ཝཱ་སི་ཀེ བྷི་ཀྑཱུ ན ཨ་བྷི་ཝཱ་དེ་ནྟི, ན་པི སེ་ནཱ་ས་ནཾ པུ་ཙྪ་ནྟཱི་ཏི. ས་ཙྩཾ བྷ་ག་ཝཱ་ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ བྷི་ཀྑ་ཝེ ཨཱ་ག་ནྟུ་ཀཱ བྷི་ཀྑཱུ ས་ཨུ་པཱ་ཧ་ནཱ་པི ཨཱ་རཱ་མཾ པ་ཝི་སི་སྶ་ནྟི, ཚ་ཏྟ་པ་གྒ་ཧི་ཏཱ་པི ཨཱ་རཱ་མཾ པ་ཝི་སི་སྶ་ནྟི, ཨོ་གུ་ཎྛི་ཏཱ་པི ཨཱ་རཱ་མཾ པ་ཝི་སི་སྶ་ནྟི, སཱི་སེ་པི ཙཱི་ཝ་རཾ ཀ་རི་ཏྭཱ ཨཱ་རཱ་མཾ པ་ཝི་སི་སྶ་ནྟི, པཱ་ནཱི་ཡེ་ན་པི པཱ་དེ དྷོ་ཝི་སྶ་ནྟི, ཝུ་ཌྜྷ་ཏ་རེ་པི ཨཱ་ཝཱ་སི་ཀེ བྷི་ཀྑཱུ ན ཨ་བྷི་ཝཱ་དེ་སྶ་ནྟི, ན་པི སེ་ནཱ་ས་ནཾ པུ་ཙྪི་སྶ་ནྟི, ནེ་ཏཾ བྷི་ཀྑ་ཝེ ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
༣༥༧. ‘‘ཏེ་ན ཧི, བྷི་ཀྑ་ཝེ, ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཝ་ཏྟཾ པ་ཉྙ་པེ་སྶཱ་མི ཡ་ཐཱ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦཾ. ཨཱ་ག་ནྟུ་ཀེ་ན, བྷི་ཀྑ་ཝེ, བྷི་ཀྑུ་ནཱ ‘ཨི་དཱ་ནི ཨཱ་རཱ་མཾ པ་ཝི་སི་སྶཱ་མཱི’ཏི ཨུ་པཱ་ཧ་ནཱ ཨོ་མུ་ཉྩི་ཏྭཱ ནཱི་ཙཾ ཀ་ཏྭཱ པ་པྥོ་ཊེ་ཏྭཱ ག་ཧེ་ཏྭཱ ཚ་ཏྟཾ ཨ་པ་ནཱ་མེ་ཏྭཱ སཱི་སཾ ཝི་ཝ་རི་ཏྭཱ སཱི་སེ ཙཱི་ཝ་རཾ [ཝི་ཝ་རི་ཏྭཱ ཙཱི་ཝ་རཾ (ཀ.)] ཁ་ནྡྷེ ཀ་ཏྭཱ སཱ་དྷུ་ཀཾ ཨ་ཏ་ར་མཱ་ནེ་ན ཨཱ་རཱ་མོ པ་ཝི་སི་ཏ་བྦོ. ཨཱ་རཱ་མཾ པ་ཝི་ས་ནྟེ་ན ས་ལླ་ཀྑེ་ཏ་བྦཾ – ‘ཀ་ཏྠ ཨཱ་ཝཱ་སི་ཀཱ བྷི་ཀྑཱུ པ་ཊི་ཀྐ་མ་ནྟཱི’ཏི? ཡ་ཏྠ ཨཱ་ཝཱ་སི་ཀཱ བྷི་ཀྑཱུ པ་ཊི་ཀྐ་མ་ནྟི – ཨུ་པ་ཊྛཱ་ན་སཱ་ལཱ་ཡ ཝཱ མ་ཎྜ་པེ ཝཱ རུ་ཀྑ་མཱུ་ལེ ཝཱ – ཏ་ཏྠ ག་ནྟྭཱ ཨེ་ཀ་མ་ནྟཾ པ་ཏྟོ ནི་ཀྑི་པི་ཏ་བྦོ; ཨེ་ཀ་མ་ནྟཾ ཙཱི་ཝ་རཾ ནི་ཀྑི་པི་ཏ་བྦཾ; པ་ཏི་རཱུ་པཾ ཨཱ་ས་ནཾ ག་ཧེ་ཏྭཱ ནི་སཱི་དི་ཏ་བྦཾ; པཱ་ནཱི་ཡཾ པུ་ཙྪི་ཏ་བྦཾ, པ་རི་བྷོ་ཛ་ནཱི་ཡཾ པུ་ཙྪི་ཏ་བྦཾ – ‘ཀ་ཏ་མཾ པཱ་ནཱི་ཡཾ, ཀ་ཏ་མཾ པ་རི་བྷོ་ཛ་ནཱི་ཡ’ནྟི? ས་ཙེ པཱ་ནཱི་ཡེ་ན ཨ་ཏྠོ ཧོ་ཏི, པཱ་ནཱི་ཡཾ ག་ཧེ་ཏྭཱ པཱ་ཏ་བྦཾ. ས་ཙེ པ་རི་བྷོ་ཛ་ནཱི་ཡེ་ན ཨ་ཏྠོ ཧོ་ཏི, པ་རི་བྷོ་ཛ་ནཱི་ཡཾ ག་ཧེ་ཏྭཱ པཱ་དཱ དྷོ་ཝི་ཏ་བྦཱ. པཱ་དེ དྷོ་ཝ་ནྟེ་ན ཨེ་ཀེ་ན ཧ་ཏྠེ་ན ཨུ་ད་ཀཾ ཨཱ་སི་ཉྩི་ཏ་བྦཾ, ཨེ་ཀེ་ན ཧ་ཏྠེ་ན པཱ་དཱ དྷོ་ཝི་ཏ་བྦཱ. ཏེ་ནེ་ཝ ཨུ་ད་ཀཾ ཨཱ་སི་ཉྩི་ཏ་བྦཾ [ཡེ་ན ཧ་ཏྠེ་ན ཨུ་ད་ཀཾ ཨཱ་སི་ཉྩི་ཏ་བྦཾ (སྱཱ.)] ན ཏེ་ནེ་ཝ ཧ་ཏྠེ་ན པཱ་དཱ དྷོ་ཝི་ཏ་བྦཱ. ཨུ་པཱ་ཧ་ན་པུ་ཉྪ་ན་ཙོ་ལ༹་ཀཾ པུ་ཙྪི་ཏྭཱ ཨུ་པཱ་ཧ་ནཱ པུ་ཉྪི་ཏ་བྦཱ. ཨུ་པཱ་ཧ་ནཱ པུ་ཉྪ་ནྟེ་ན པ་ཋ་མཾ སུ་ཀྑེ་ན ཙོ་ལ༹་ཀེ་ན པུ་ཉྪི་ཏ་བྦཱ, པ་ཙྪཱ ཨ་ལླེ་ན. ཨུ་པཱ་ཧ་ནཱ་པུ་ཉྪ་ན་ཙོ་ལ༹་ཀཾ དྷོ་ཝི་ཏྭཱ [པཱི་ལེ༹་ཏྭཱ (སྱཱ.)] ཨེ་ཀ་མ་ནྟཾ ཝི་སྶ་ཛྫེ་ཏ་བྦཾ.
‘‘ས་ཙེ ཨཱ་ཝཱ་སི་ཀོ བྷི་ཀྑུ ཝུ་ཌྜྷོ ཧོ་ཏི, ཨ་བྷི་ཝཱ་དེ་ཏ་བྦོ. ས་ཙེ ན་ཝ་ཀོ ཧོ་ཏི, ཨ་བྷི་ཝཱ་དཱ་པེ་ཏ་བྦོ. སེ་ནཱ་ས་ནཾ པུ་ཙྪི་ཏ་བྦཾ – ‘ཀ་ཏ་མཾ མེ སེ་ནཱ་ས་ནཾ པཱ་པུ་ཎཱ་ཏཱི’ཏི? ཨ་ཛ྄ཛྷཱ་ཝུ་ཊྛཾ ཝཱ ཨ་ན་ཛ྄ཛྷཱ་ཝུ་ཊྛཾ ཝཱ པུ་ཙྪི་ཏ་བྦཾ, གོ་ཙ་རོ པུ་ཙྪི་ཏ་བྦོ, ཨ་གོ་ཙ་རོ པུ་ཙྪི་ཏ་བྦོ, སེ་ཀྑ་ས་མྨ་ཏཱ་ནི [སེ་ཁ་ས་མྨ་ཏཱ་ནི (ཀ.)] ཀུ་ལཱ་ནི པུ་ཙྪི་ཏ་བྦཱ་ནི, ཝ་ཙྩ་ཊྛཱ་ནཾ པུ་ཙྪི་ཏ་བྦཾ, པ་སྶཱ་ཝ་ཊྛཱ་ནཾ པུ་ཙྪི་ཏ་བྦཾ, པཱ་ནཱི་ཡཾ པུ་ཙྪི་ཏ་བྦཾ, པ་རི་བྷོ་ཛ་ནཱི་ཡཾ པུ་ཙྪི་ཏ་བྦཾ, ཀ་ཏྟ་ར་ད་ཎྜོ པུ་ཙྪི་ཏ་བྦོ, ས་ངྒྷ་སྶ ཀ་ཏི་ཀ་ས་ཎྛཱ་ནཾ པུ་ཙྪི་ཏ་བྦཾ – ‘ཀཾ ཀཱ་ལཾ པ་ཝི་སི་ཏ་བྦཾ, ཀཾ ཀཱ་ལཾ ནི་ཀྑ་མི་ཏ་བྦ’ནྟི? ས་ཙེ ཝི་ཧཱ་རོ ཨ་ན་ཛ྄ཛྷཱ་ཝུ་ཊྛོ ཧོ་ཏི, ཀ་ཝཱ་ཊཾ ཨཱ་ཀོ་ཊེ་ཏྭཱ མུ་ཧུ་ཏྟཾ ཨཱ་ག་མེ་ཏྭཱ གྷ་ཊི་ཀཾ ཨུ་གྒྷཱ་ཊེ་ཏྭཱ ཀ་ཝཱ་ཊཾ པ་ཎཱ་མེ་ཏྭཱ བ་ཧི ཋི་ཏེ་ན ནི་ལློ་ཀེ་ཏ་བྦོ.
‘‘ས་ཙེ ཝི་ཧཱ་རོ ཨུ་ཀླཱ་པོ ཧོ་ཏི, མ་ཉྩེ ཝཱ མ་ཉྩོ ཨཱ་རོ་པི་ཏོ ཧོ་ཏི, པཱི་ཋེ ཝཱ པཱི་ཋཾ ཨཱ་རོ་པི་ཏཾ ཧོ་ཏི, སེ་ནཱ་ས་ནཾ ཨུ་པ་རི པུ་ཉྫཱི་ཀ་ཏཾ [པུ་ཉྫ་ཀི་ཏཾ (ཀ.)] ཧོ་ཏི, ས་ཙེ ཨུ་སྶ་ཧ་ཏི, སོ་དྷེ་ཏ་བྦོ. [མ་ཧཱ་ཝ. ༦༦-༦༧ (ཐོ་ཀཾ ཝི་ས་དི་སཾ)] ཝི་ཧཱ་རཾ སོ་དྷེ་ནྟེ་ན པ་ཋ་མཾ བྷཱུ་མ་ཏྠ་ར་ཎཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩ་པ་ཊི་པཱ་ད་ཀཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཱ; བྷི་སི་བི་བྦོ་ཧ་ནཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; ནི་སཱི་ད་ན་པ་ཙྩ་ཏྠ་ར་ཎཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩོ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; པཱི་ཋཾ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; ཁེ་ལ༹་མ་ལླ་ཀོ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; ཨ་པ་སྶེ་ན་ཕ་ལ་ཀཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. ས་ཙེ ཝི་ཧཱ་རེ ས་ནྟཱ་ན་ཀཾ ཧོ་ཏི, ཨུ་ལློ་ཀཱ པ་ཋ་མཾ ཨོ་ཧཱ་རེ་ཏ་བྦཾ, ཨཱ་ལོ་ཀ་ས་ནྡྷི་ཀ་ཎྞ་བྷཱ་གཱ པ་མ་ཛྫི་ཏ་བྦཱ. ས་ཙེ གེ་རུ་ཀ་པ་རི་ཀ་མྨ་ཀ་ཏཱ བྷི་ཏྟི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཀཱ་ལ༹་ཝ་ཎྞ་ཀ་ཏཱ བྷཱུ་མི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཨ་ཀ་ཏཱ ཧོ་ཏི བྷཱུ་མི, ཨུ་ད་ཀེ་ན པ་རི་པྥོ་སི་ཏྭཱ ས་མྨ་ཛྫི་ཏ་བྦཱ – མཱ ཝི་ཧཱ་རོ ར་ཛེ་ན ཨུ་ཧ་ཉྙཱི་ཏི [ཨཱུ་ཧ་ཉྙཱི་ཏི (སཱི. སྱཱ.)]. ས་ངྐཱ་རཾ ཝི་ཙི་ནི་ཏྭཱ ཨེ་ཀ་མ་ནྟཾ ཚ་ཌྜེ་ཏ་བྦཾ.
‘‘བྷཱུ་མ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ [ཡ་ཐཱ་པ་ཉྙ་ཏྟཾ (སཱི. སྱཱ.), ཡ་ཐཱ་བྷཱ་གཾ (ཀ.)] པ་ཉྙ་པེ་ཏ་བྦཾ. མ་ཉྩ་པ་ཊི་པཱ་ད་ཀཱ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ [ཡ་ཐཱ་བྷཱ་གཾ (སྱཱ. ཀ.)] ཋ་པེ་ཏ་བྦཱ. མ་ཉྩོ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་ཋཱ་ནེ [ཡ་ཐཱ་བྷཱ་གཾ (སྱཱ. ཀ.)] པ་ཉྙ་པེ་ཏ་བྦོ. པཱི་ཋཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་ཋཱ་ནེ [ཡ་ཐཱ་བྷཱ་གཾ (སྱཱ. ཀ.)] པ་ཉྙ་པེ་ཏ་བྦཾ. བྷི་སི་བི་བྦོ་ཧ་ནཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་བྷཱ་གཾ པ་ཉྙ་པེ་ཏ་བྦཾ. ནི་སཱི་ད་ན་པ་ཙྩ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་བྷཱ་གཾ པ་ཉྙ་པེ་ཏ་བྦཾ. ཁེ་ལ༹་མ་ལླ་ཀོ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་བྷཱ་གཾ ཋ་པེ་ཏ་བྦོ. ཨ་པ་སྶེ་ན་ཕ་ལ་ཀཾ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་བྷཱ་གཾ ཋ་པེ་ཏ་བྦཾ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ.
‘‘ས་ཙེ པུ་ར་ཏྠི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པུ་ར་ཏྠི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ པ་ཙྪི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པ་ཙྪི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ཨུ་ཏྟ་རཱ ས་ར་ཛཱ ཝཱ་ཏཱ ཝཱ་ཡ་ནྟི, ཨུ་ཏྟ་རཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ད་ཀྑི་ཎཱ ས་ར་ཛཱ ཝཱ་ཏཱ ཝཱ་ཡ་ནྟི, ད་ཀྑི་ཎཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ སཱི་ཏ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཝི་ཝ་རི་ཏ་བྦཱ, ར་ཏྟིཾ ཐ་ཀེ་ཏ་བྦཱ. ས་ཙེ ཨུ་ཎྷ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཐ་ཀེ་ཏ་བྦཱ, ར་ཏྟིཾ ཝི་ཝ་རི་ཏ་བྦཱ.
‘‘ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཨུ་པ་ཊྛཱ་ན་སཱ་ལཱ ཨུ་ཀླཱ་པཱ ཧོ་ཏི, ཨུ་པ་ཊྛཱ་ན་སཱ་ལཱ ས་མྨ་ཛྫི་ཏ་བྦཱ. ས་ཙེ ཨ་གྒི་སཱ་ལཱ ཨུ་ཀླཱ་པཱ ཧོ་ཏི, ཨ་གྒི་སཱ་ལཱ ས་མྨ་ཛྫི་ཏ་བྦཱ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ས་ཙེ པཱ་ནཱི་ཡཾ ན ཧོ་ཏི, པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ པ་རི་བྷོ་ཛ་ནཱི་ཡཾ ན ཧོ་ཏི, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ. ཨི་དཾ ཁོ, བྷི་ཀྑ་ཝེ, ཨཱ་ག་ནྟུ་ཀཱ་ནཾ བྷི་ཀྑཱུ་ནཾ ཝ་ཏྟཾ ཡ་ཐཱ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་མྨཱ ཝ་ཏྟི་ཏ་བྦ’’ནྟི.