༨. ཨ་དྷི་ཀ་ར་ཎཾ
༢༡༥. ཏེ་ན ཁོ པ་ན ས་མ་ཡེ་ན (བྷི་ཀྑཱུ་པི བྷི་ཀྑཱུ་ཧི ཝི་ཝ་ད་ནྟི,) [( ) ན་ཏྠི (སཱི. སྱཱ. ཀཾ.)] བྷི་ཀྑཱུ་པི བྷི་ཀྑུ་ནཱི་ཧི ཝི་ཝ་ད་ནྟི, བྷི་ཀྑུ་ནི་ཡོ་པི བྷི་ཀྑཱུ་ཧི ཝི་ཝ་ད་ནྟི, ཚ་ནྣོ་པི བྷི་ཀྑུ བྷི་ཀྑུ་ནཱི་ནཾ ཨ་ནུ་པ་ཁ་ཛྫ བྷི་ཀྑཱུ་ཧི ས་དྡྷིཾ ཝི་ཝ་ད་ཏི, བྷི་ཀྑུ་ནཱི་ནཾ པ་ཀྑཾ གཱ་ཧེ་ཏི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་ནྣོ བྷི་ཀྑུ བྷི་ཀྑུ་ནཱི་ནཾ ཨ་ནུ་པ་ཁ་ཛྫ བྷི་ཀྑཱུ་ཧི ས་དྡྷིཾ ཝི་ཝ་དི་སྶ་ཏི, བྷི་ཀྑུ་ནཱི་ནཾ པ་ཀྑཾ གཱ་ཧེ་སྶ་ཏཱི་ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ…པེ… ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
[པ་རི. ༢༧༥] ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཨ་དྷི་ཀ་ར་ཎཱ་ནི – ཝི་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དཱ་དྷི་ཀ་ར་ཎཾ, ཨཱ་པ་ཏྟཱ་དྷི་ཀ་ར་ཎཾ, ཀི་ཙྩཱ་དྷི་ཀ་ར་ཎཾ [ཀི་ཙྩཱ་དྷི་ཀ་ར་ཎ་ཉྩ (ཀ.)].
‘‘ཏ་ཏྠ ཀ་ཏ་མཾ ཝི་ཝཱ་དཱ་དྷི་ཀ་ར་ཎཾ [པ་རི. ༣༡༤]? ཨི་དྷ པ་ན, བྷི་ཀྑ་ཝེ, བྷི་ཀྑཱུ [བྷི་ཀྑཱུ བྷི་ཀྑུཾ (ཀ.)] ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ, ཝི་ན་ཡོ་ཏི ཝཱ ཨ་ཝི་ན་ཡོ་ཏི ཝཱ, བྷཱ་སི་ཏཾ ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ ཨ་བྷཱ་སི་ཏཾ ཨ་ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ, ཨཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ ཨ་ནཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ, པ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ ཨ་པྤ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ, ཨཱ་པ་ཏྟཱི་ཏི ཝཱ ཨ་ནཱ་པ་ཏྟཱི་ཏི ཝཱ, ལ་ཧུ་ཀཱ ཨཱ་པ་ཏྟཱི་ཏི ཝཱ ག་རུ་ཀཱ ཨཱ་པ་ཏྟཱི་ཏི ཝཱ, སཱ་ཝ་སེ་སཱ ཨཱ་པ་ཏྟཱི་ཏི ཝཱ ཨ་ན་ཝ་སེ་སཱ ཨཱ་པ་ཏྟཱི་ཏི ཝཱ, དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ? ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་གཾ – ཨི་དཾ ཝུ་ཙྩ་ཏི ཝི་ཝཱ་དཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨ་ནུ་ཝཱ་དཱ་དྷི་ཀ་ར་ཎཾ? [པ་རི. ༣༡༥] ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ཨ་ནུ་ཝ་ད་ནྟི སཱི་ལ་ཝི་པ་ཏྟི་ཡཱ ཝཱ ཨཱ་ཙཱ་ར་ཝི་པ་ཏྟི་ཡཱ ཝཱ དི་ཊྛི་ཝི་པ་ཏྟི་ཡཱ ཝཱ ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ – ཨི་དཾ ཝུ་ཙྩ་ཏི ཨ་ནུ་ཝཱ་དཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨཱ་པ་ཏྟཱ་དྷི་ཀ་ར་ཎཾ? པ་ཉྩ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ, ས་ཏྟ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ – ཨི་དཾ ཝུ་ཙྩ་ཏི ཨཱ་པ་ཏྟཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཀི་ཙྩཱ་དྷི་ཀ་ར་ཎཾ? [པ་རི. ༣༡༧] ཡཱ ས་ངྒྷ་སྶ ཀི་ཙྩ་ཡ་ཏཱ, ཀ་ར་ཎཱི་ཡ་ཏཱ, ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་དཾ ཝུ་ཙྩ་ཏི ཀི་ཙྩཱ་དྷི་ཀ་ར་ཎཾ.
༢༡༦. ‘‘ཝི་ཝཱ་དཱ་དྷི་ཀ་ར་ཎ་སྶ ཀིཾ མཱུ་ལཾ? ཚ ཝི་ཝཱ་ད་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ. ཏཱི་ཎི་པི ཨ་ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ, ཏཱི་ཎི་པི ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ. [པ་རི. ༢༧༢; ཨ. ནི. ༢.༣༥-༣༦; མ. ནི. ༣.༤༤] ཀ་ཏ་མཱ་ནི ཚ ཝི་ཝཱ་ད་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑུ ཀོ་དྷ་ནོ ཧོ་ཏི ཨུ་པ་ནཱ་ཧཱི. ཡོ སོ, བྷི་ཀྑ་ཝེ, བྷི་ཀྑུ ཀོ་དྷ་ནོ ཧོ་ཏི ཨུ་པ་ནཱ་ཧཱི, སོ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, ས་ངྒྷེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, སི་ཀྑཱ་ཡ་པི ན པ་རི་པཱུ་ར་ཀཱ་རཱི ཧོ་ཏི. ཡོ སོ, བྷི་ཀྑ་ཝེ, བྷི་ཀྑུ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི…པེ… ས་ངྒྷེ་པི…པེ… སི་ཀྑཱ་ཡ་པི ན པ་རི་པཱུ་ར་ཀཱ་རཱི, སོ ས་ངྒྷེ ཝི་ཝཱ་དཾ ཛ་ནེ་ཏི. ཡོ ཧོ་ཏི ཝི་ཝཱ་དོ བ་ཧུ་ཛ་ནཱ་ཧི་ཏཱ་ཡ བ་ཧུ་ཛ་ནཱ་སུ་ཁཱ་ཡ བ་ཧུ་ནོ ཛ་ན་སྶ ཨ་ན་ཏྠཱ་ཡ ཨ་ཧི་ཏཱ་ཡ དུ་ཀྑཱ་ཡ དེ་ཝ་མ་ནུ་སྶཱ་ནཾ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཝི་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཝི་ཝཱ་ད་མཱུ་ལ་སྶ པ་ཧཱ་ནཱ་ཡ ཝཱ་ཡ་མེ་ཡྻཱ་ཐ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཝི་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ན ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཝི་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝཱ་ཡ པ་ཊི་པ་ཛྫེ་ཡྻཱ་ཐ. ཨེ་ཝ་མེ་ཏ་སྶ པཱ་པ་ཀ་སྶ ཝི་ཝཱ་ད་མཱུ་ལ་སྶ པ་ཧཱ་ནཾ ཧོ་ཏི. ཨེ་ཝ་མེ་ཏ་སྶ པཱ་པ་ཀ་སྶ ཝི་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝོ ཧོ་ཏི.
[པ་རི.༢༧༢] ‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ མ་ཀྑཱི ཧོ་ཏི པ་ལཱ༹་སཱི…པེ… ཨི་སྶུ་ཀཱི ཧོ་ཏི མ་ཙྪ་རཱི, ས་ཋོ ཧོ་ཏི མཱ་ཡཱ་ཝཱི, པཱ་པི་ཙྪོ ཧོ་ཏི མི་ཙྪཱ་དི་ཊྛཱི, ས་ནྡི་ཊྛི་པ་རཱ་མཱ་སཱི ཧོ་ཏི ཨཱ་དྷཱ་ན་གྒཱ་ཧཱི དུ་པྤ་ཊི་ནི་སྶ་གྒཱི. ཡོ སོ, བྷི་ཀྑ་ཝེ, བྷི་ཀྑུ ས་ནྡི་ཊྛི་པ་རཱ་མཱ་སཱི ཧོ་ཏི ཨཱ་དྷཱ་ན་གྒཱ་ཧཱི དུ་པྤ་ཊི་ནི་སྶ་གྒཱི, སོ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, ས་ངྒྷེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, སི་ཀྑཱ་ཡ་པི ན པ་རི་པཱུ་ར་ཀཱ་རཱི ཧོ་ཏི. ཡོ སོ, བྷི་ཀྑ་ཝེ, བྷི་ཀྑུ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི…པེ… ས་ངྒྷེ་པི…པེ… སི་ཀྑཱ་ཡ་པི ན པ་རི་པཱུ་ར་ཀཱ་རཱི, སོ ས་ངྒྷེ ཝི་ཝཱ་དཾ ཛ་ནེ་ཏི. ཡོ ཧོ་ཏི ཝི་ཝཱ་དོ བ་ཧུ་ཛ་ནཱ་ཧི་ཏཱ་ཡ བ་ཧུ་ཛ་ནཱ་སུ་ཁཱ་ཡ བ་ཧུ་ནོ ཛ་ན་སྶ ཨ་ན་ཏྠཱ་ཡ ཨ་ཧི་ཏཱ་ཡ དུ་ཀྑཱ་ཡ དེ་ཝ་མ་ནུ་སྶཱ་ནཾ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཝི་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཝི་ཝཱ་ད་མཱུ་ལ་སྶ པ་ཧཱ་ནཱ་ཡ ཝཱ་ཡ་མེ་ཡྻཱ་ཐ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཝི་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ན ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཝི་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝཱ་ཡ པ་ཊི་པ་ཛྫེ་ཡྻཱ་ཐ. ཨེ་ཝ་མེ་ཏ་སྶ པཱ་པ་ཀ་སྶ ཝི་ཝཱ་ད་མཱུ་ལ་སྶ པ་ཧཱ་ནཾ ཧོ་ཏི. ཨེ་ཝ་མེ་ཏ་སྶ པཱ་པ་ཀ་སྶ ཝི་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝོ ཧོ་ཏི. ཨི་མཱ་ནི ཚ ཝི་ཝཱ་ད་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མཱ་ནི ཏཱི་ཎི ཨ་ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ལུ་དྡྷ་ཙི་ཏྟཱ ཝི་ཝ་ད་ནྟི, དུ་ཊྛ་ཙི་ཏྟཱ ཝི་ཝ་ད་ནྟི, མཱུ་ལ༹ྷ་ཙི་ཏྟཱ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ, ཝི་ན་ཡོ་ཏི ཝཱ ཨ་ཝི་ན་ཡོ་ཏི ཝཱ, བྷཱ་སི་ཏཾ ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ ཨ་བྷཱ་སི་ཏཾ ཨ་ལ་པི་ཏཾ ཏ་ཐཱ་ག་ཏེ་ནཱ་ཏི ཝཱ, ཨཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ ཨ་ནཱ་ཙི་ཎྞཾ ཏ་ཐཱ་ག་ཏེ་ནཱ་ཏི ཝཱ, པ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ ཨ་པྤ་ཉྙ་ཏྟཾ ཏ་ཐཱ་ག་ཏེ་ནཱ་ཏི ཝཱ, ཨཱ་པ་ཏྟཱི་ཏི ཝཱ ཨ་ནཱ་པ་ཏྟཱི་ཏི ཝཱ, ལ་ཧུ་ཀཱ ཨཱ་པ་ཏྟཱི་ཏི ཝཱ ག་རུ་ཀཱ ཨཱ་པ་ཏྟཱི་ཏི ཝཱ, སཱ་ཝ་སེ་སཱ ཨཱ་པ་ཏྟཱི་ཏི ཝཱ ཨ་ན་ཝ་སེ་སཱ ཨཱ་པ་ཏྟཱི་ཏི ཝཱ, དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཨི་མཱ་ནི ཏཱི་ཎི ཨ་ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མཱ་ནི ཏཱི་ཎི ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ཨ་ལུ་དྡྷ་ཙི་ཏྟཱ ཝི་ཝ་ད་ནྟི, ཨ་དུ་ཊྛ་ཙི་ཏྟཱ ཝི་ཝ་ད་ནྟི, ཨ་མཱུ་ལ༹ྷ་ཙི་ཏྟཱ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ…པེ… དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཨི་མཱ་ནི ཏཱི་ཎི ཀུ་ས་ལ་མཱུ་ལཱ་ནི ཝི་ཝཱ་དཱ་དྷི་ཀ་ར་ཎ་སྶ མཱུ་ལཾ.
༢༡༧. [པ་རི. ༢༧༢] ‘‘ཨ་ནུ་ཝཱ་དཱ་དྷི་ཀ་ར་ཎ་སྶ ཀིཾ མཱུ་ལཾ? ཚ ཨ་ནུ་ཝཱ་ད་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ. ཏཱི་ཎི་པི ཨ་ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ, ཏཱི་ཎི་པི ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ, ཀཱ་ཡོ་པི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ, ཝཱ་ཙཱ་པི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ. ‘‘ཀ་ཏ་མཱ་ནི ཚ ཨ་ནུ་ཝཱ་ད་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑུ ཀོ་དྷ་ནོ ཧོ་ཏི ཨུ་པ་ནཱ་ཧཱི. ཡོ སོ, བྷི་ཀྑ་ཝེ, བྷི་ཀྑུ ཀོ་དྷ་ནོ ཧོ་ཏི ཨུ་པ་ནཱ་ཧཱི, སོ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, ས་ངྒྷེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, སི་ཀྑཱ་ཡ་པི ན པ་རི་པཱུ་ར་ཀཱ་རཱི ཧོ་ཏི. ཡོ སོ, བྷི་ཀྑ་ཝེ, བྷི་ཀྑུ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི…པེ… ས་ངྒྷེ་པི…པེ… སི་ཀྑཱ་ཡ་པི ན པ་རི་པཱུ་ར་ཀཱ་རཱི, སོ ས་ངྒྷེ ཨ་ནུ་ཝཱ་དཾ ཛ་ནེ་ཏི. ཡོ ཧོ་ཏི ཨ་ནུ་ཝཱ་དོ བ་ཧུ་ཛ་ནཱ་ཧི་ཏཱ་ཡ བ་ཧུ་ཛ་ནཱ་སུ་ཁཱ་ཡ བ་ཧུ་ནོ ཛ་ན་སྶ ཨ་ན་ཏྠཱ་ཡ ཨ་ཧི་ཏཱ་ཡ དུ་ཀྑཱ་ཡ དེ་ཝ་མ་ནུ་སྶཱ་ནཾ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཨ་ནུ་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ པ་ཧཱ་ནཱ་ཡ ཝཱ་ཡ་མེ་ཡྻཱ་ཐ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཨ་ནུ་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ན ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝཱ་ཡ པ་ཊི་པ་ཛྫེ་ཡྻཱ་ཐ. ཨེ་ཝ་མེ་ཏ་སྶ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ པ་ཧཱ་ནཾ ཧོ་ཏི. ཨེ་ཝ་མེ་ཏ་སྶ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝོ ཧོ་ཏི.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ མ་ཀྑཱི ཧོ་ཏི པ་ལཱ༹་སཱི…པེ… ཨི་སྶུ་ཀཱི ཧོ་ཏི མ་ཙྪ་རཱི, ས་ཋོ ཧོ་ཏི མཱ་ཡཱ་ཝཱི, པཱ་པི་ཙྪོ ཧོ་ཏི མི་ཙྪཱ་དི་ཊྛཱི, ས་ནྡི་ཊྛི་པ་རཱ་མཱ་སཱི ཧོ་ཏི ཨཱ་དྷཱ་ན་གྒཱ་ཧཱི དུ་པྤ་ཊི་ནི་སྶ་གྒཱི. ཡོ སོ, བྷི་ཀྑ་ཝེ, བྷི་ཀྑུ ས་ནྡི་ཊྛི་པ་རཱ་མཱ་སཱི ཧོ་ཏི ཨཱ་དྷཱ་ན་གྒཱ་ཧཱི དུ་པྤ་ཊི་ནི་སྶ་གྒཱི, སོ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, ས་ངྒྷེ་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, སི་ཀྑཱ་ཡ་པི ན པ་རི་པཱུ་ར་ཀཱ་རཱི ཧོ་ཏི. ཡོ སོ, བྷི་ཀྑ་ཝེ, བྷི་ཀྑུ ས་ཏྠ་རི་པི ཨ་གཱ་ར་ཝོ ཝི་ཧ་ར་ཏི ཨ་པྤ་ཏི་སྶོ, དྷ་མྨེ་པི…པེ… ས་ངྒྷེ་པི…པེ… སི་ཀྑཱ་ཡ་པི ན པ་རི་པཱུ་ར་ཀཱ་རཱི, སོ ས་ངྒྷེ ཨ་ནུ་ཝཱ་དཾ ཛ་ནེ་ཏི. ཡོ ཧོ་ཏི ཨ་ནུ་ཝཱ་དོ བ་ཧུ་ཛ་ནཱ་ཧི་ཏཱ་ཡ བ་ཧུ་ཛ་ནཱ་སུ་ཁཱ་ཡ བ་ཧུ་ནོ ཛ་ན་སྶ ཨ་ན་ཏྠཱ་ཡ ཨ་ཧི་ཏཱ་ཡ དུ་ཀྑཱ་ཡ དེ་ཝ་མ་ནུ་སྶཱ་ནཾ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཨ་ནུ་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ པ་ཧཱ་ནཱ་ཡ ཝཱ་ཡ་མེ་ཡྻཱ་ཐ. ཨེ་ཝ་རཱུ་པ་ཉྩེ ཏུ་མྷེ, བྷི་ཀྑ་ཝེ, ཨ་ནུ་ཝཱ་ད་མཱུ་ལཾ ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ ན ས་མ་ནུ་པ་སྶེ་ཡྻཱ་ཐ, ཏ་ཏྲ ཏུ་མྷེ, བྷི་ཀྑ་ཝེ, ཏ་སྶེ་ཝ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ ཨཱ་ཡ་ཏྟིཾ ཨ་ན་ཝ་སྶ་ཝཱ་ཡ པ་ཊི་པ་ཛྫེ་ཡྻཱ་ཐ. ཨེ་ཝ་མེ་ཏ་སྶ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ པ་ཧཱ་ནཾ ཧོ་ཏི. ཨེ་ཝ་མེ་ཏ་སྶ པཱ་པ་ཀ་སྶ ཨ་ནུ་ཝཱ་ད་མཱུ་ལ་སྶ ཨཱ་ཡ་ཏིཾ ཨ་ན་ཝ་སྶ་ཝོ ཧོ་ཏི. ཨི་མཱ་ནི ཚ ཨ་ནུ་ཝཱ་ད་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མཱ་ནི ཏཱི་ཎི ཨ་ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ལུ་དྡྷ་ཙི་ཏྟཱ ཨ་ནུ་ཝ་ད་ནྟི, དུ་ཊྛ་ཙི་ཏྟཱ ཨ་ནུ་ཝ་ད་ནྟི, མཱུ་ལ༹ྷ་ཙི་ཏྟཱ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙཱ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཨི་མཱ་ནི ཏཱི་ཎི ཨ་ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མཱ་ནི ཏཱི་ཎི ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ཨ་ལུ་དྡྷ་ཙི་ཏྟཱ ཨ་ནུ་ཝ་ད་ནྟི, ཨ་དུ་ཊྛ་ཙི་ཏྟཱ ཨ་ནུ་ཝ་ད་ནྟི, ཨ་མཱུ་ལ༹ྷ་ཙི་ཏྟཱ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཨི་མཱ་ནི ཏཱི་ཎི ཀུ་ས་ལ་མཱུ་ལཱ་ནི ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མོ ཀཱ་ཡོ [ཀ་ཏ་མོ ཙ ཀཱ་ཡོ (སྱཱ. ཀཾ.)] ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷེ་ཀ་ཙྩོ དུ་བྦ་ཎྞོ ཧོ་ཏི, དུ་དྡ་སྶི་ཀོ, ཨོ་ཀོ་ཊི་མ་ཀོ, བ་ཧྭཱ་བཱ་དྷོ, ཀཱ་ཎོ ཝཱ, ཀུ་ཎཱི ཝཱ, ཁ་ཉྫོ ཝཱ, པ་ཀྑ་ཧ་ཏོ ཝཱ, ཡེ་ན ནཾ ཨ་ནུ་ཝ་ད་ནྟི. ཨ་ཡཾ ཀཱ་ཡོ ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ.
‘‘ཀ་ཏ་མཱ ཝཱ་ཙཱ ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ? ཨི་དྷེ་ཀ་ཙྩོ དུ་བྦ་ཙོ ཧོ་ཏི, མ་མྨ་ནོ, ཨེ་ལ༹་ག་ལ་ཝཱ་ཙོ, ཡཱ་ཡ ནཾ ཨ་ནུ་ཝ་ད་ནྟི. ཨ་ཡཾ ཝཱ་ཙཱ ཨ་ནུ་ཝཱ་དཱ་དྷི་ཀ་ར་ཎ་སྶ མཱུ་ལཾ.
༢༡༨. ‘‘ཨཱ་པ་ཏྟཱ་དྷི་ཀ་ར་ཎ་སྶ ཀིཾ མཱུ་ལཾ? ཚ ཨཱ་པ་ཏྟི་ས་མུ་ཊྛཱ་ནཱ ཨཱ་པ་ཏྟཱ་དྷི་ཀ་ར་ཎ་སྶ མཱུ་ལཾ. ཨ་ཏྠཱ་པ་ཏྟི ཀཱ་ཡ་ཏོ ས་མུ་ཊྛཱ་ཏི, ན ཝཱ་ཙ་ཏོ, ན ཙི་ཏྟ་ཏོ. ཨ་ཏྠཱ་པ་ཏྟི ཝཱ་ཙ་ཏོ ས་མུ་ཊྛཱ་ཏི, ན ཀཱ་ཡ་ཏོ, ན ཙི་ཏྟ་ཏོ. ཨ་ཏྠཱ་པ་ཏྟི ཀཱ་ཡ་ཏོ ཙ ཝཱ་ཙ་ཏོ ཙ ས་མུ་ཊྛཱ་ཏི, ན ཙི་ཏྟ་ཏོ. ཨ་ཏྠཱ་པ་ཏྟི ཀཱ་ཡ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཝཱ་ཙ་ཏོ. ཨ་ཏྠཱ་པ་ཏྟི ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི, ན ཀཱ་ཡ་ཏོ. ཨ་ཏྠཱ་པ་ཏྟི ཀཱ་ཡ་ཏོ ཙ ཝཱ་ཙ་ཏོ ཙ ཙི་ཏྟ་ཏོ ཙ ས་མུ་ཊྛཱ་ཏི. ཨི་མེ ཚ ཨཱ་པ་ཏྟི་ས་མུ་ཊྛཱ་ནཱ ཨཱ་པ་ཏྟཱ་དྷི་ཀ་ར་ཎ་སྶ མཱུ་ལཾ.
༢༡༩. ‘‘ཀི་ཙྩཱ་དྷི་ཀ་ར་ཎ་སྶ ཀིཾ མཱུ་ལཾ? ཀི་ཙྩཱ་དྷི་ཀ་ར་ཎ་སྶ ཨེ་ཀཾ མཱུ་ལཾ – ས་ངྒྷོ.
༢༢༠. ‘‘ཝི་ཝཱ་དཱ་དྷི་ཀ་ར་ཎཾ ཀུ་ས་ལཾ, ཨ་ཀུ་ས་ལཾ, ཨ་བྱཱ་ཀ་ཏཾ. ཝི་ཝཱ་དཱ་དྷི་ཀ་ར་ཎཾ སི་ཡཱ ཀུ་ས་ལཾ, སི་ཡཱ ཨ་ཀུ་ས་ལཾ, སི་ཡཱ ཨ་བྱཱ་ཀ་ཏཾ. ཏ་ཏྠ ཀ་ཏ་མཾ ཝི་ཝཱ་དཱ་དྷི་ཀ་ར་ཎཾ ཀུ་ས་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ཀུ་ས་ལ་ཙི་ཏྟཱ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ…པེ… དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་གཾ – ཨི་དཾ ཝུ་ཙྩ་ཏི ཝི་ཝཱ་དཱ་དྷི་ཀ་ར་ཎཾ ཀུ་ས་ལཾ.
‘‘ཏ་ཏྠ ཀ་ཏ་མཾ ཝི་ཝཱ་དཱ་དྷི་ཀ་ར་ཎཾ ཨ་ཀུ་ས་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ཨ་ཀུ་ས་ལ་ཙི་ཏྟཱ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ…པེ… དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་གཾ – ཨི་དཾ ཝུ་ཙྩ་ཏི ཝི་ཝཱ་དཱ་དྷི་ཀ་ར་ཎཾ ཨ་ཀུ་ས་ལཾ.
‘‘ཏ་ཏྠ ཀ་ཏ་མཾ ཝི་ཝཱ་དཱ་དྷི་ཀ་ར་ཎཾ ཨ་བྱཱ་ཀ་ཏཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ཨ་བྱཱ་ཀ་ཏ་ཙི་ཏྟཱ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ…པེ… དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་གཾ – ཨི་དཾ ཝུ་ཙྩ་ཏི ཝི་ཝཱ་དཱ་དྷི་ཀ་ར་ཎཾ ཨ་བྱཱ་ཀ་ཏཾ.
༢༢༡. ‘‘ཨ་ནུ་ཝཱ་དཱ་དྷི་ཀ་ར་ཎཾ ཀུ་ས་ལཾ, ཨ་ཀུ་ས་ལཾ, ཨ་བྱཱ་ཀ་ཏཾ. ཨ་ནུ་ཝཱ་དཱ་དྷི་ཀ་ར་ཎཾ སི་ཡཱ ཀུ་ས་ལཾ, སི་ཡཱ ཨ་ཀུ་ས་ལཾ, སི་ཡཱ ཨ་བྱཱ་ཀ་ཏཾ. ཏ་ཏྠ ཀ་ཏ་མཾ ཨ་ནུ་ཝཱ་དཱ་དྷི་ཀ་ར་ཎཾ ཀུ་ས་ལཾ? ཨི་དྷ, བྷི་ཀྑ་ཝེ, བྷི་ཀྑཱུ བྷི་ཀྑུཾ ཀུ་ས་ལ་ཙི་ཏྟཱ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙཱ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ – ཨི་དཾ ཝུ་ཙྩ་ཏི ཨ་ནུ་ཝཱ་དཱ་དྷི་ཀ་ར་ཎཾ ཀུ་ས་ལཾ.
‘‘ཏ་ཏྠ ཀ་ཏ་མཾ ཨ་ནུ་ཝཱ་དཱ་དྷི་ཀ་ར་ཎཾ ཨ་ཀུ་ས་ལཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ཨ་ཀུ་ས་ལ་ཙི་ཏྟཱ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙཱ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ – ཨི་དཾ ཝུ་ཙྩ་ཏི ཨ་ནུ་ཝཱ་དཱ་དྷི་ཀ་ར་ཎཾ ཨ་ཀུ་ས་ལཾ.
‘‘ཏ་ཏྠ ཀ་ཏ་མཾ ཨ་ནུ་ཝཱ་དཱ་དྷི་ཀ་ར་ཎཾ ཨ་བྱཱ་ཀ་ཏཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ཨ་བྱཱ་ཀ་ཏ་ཙི་ཏྟཱ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙཱ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ – ཨི་དཾ ཝུ་ཙྩ་ཏི ཨ་ནུ་ཝཱ་དཱ་དྷི་ཀ་ར་ཎཾ ཨ་བྱཱ་ཀ་ཏཾ.
༢༢༢. ‘‘ཨཱ་པ་ཏྟཱ་དྷི་ཀ་ར་ཎཾ ཀུ་ས་ལཾ [ཨི་དཾ པ་དཾ ཀེ་སུ་ཙི ན་ཏྠི], ཨ་ཀུ་ས་ལཾ, ཨ་བྱཱ་ཀ་ཏཾ? ཨཱ་པ་ཏྟཱ་དྷི་ཀ་ར་ཎཾ སི་ཡཱ ཨ་ཀུ་ས་ལཾ, སི་ཡཱ ཨ་བྱཱ་ཀ་ཏཾ; ན་ཏྠི ཨཱ་པ་ཏྟཱ་དྷི་ཀ་ར་ཎཾ ཀུ་ས་ལཾ. ཏ་ཏྠ ཀ་ཏ་མཾ ཨཱ་པ་ཏྟཱ་དྷི་ཀ་ར་ཎཾ ཨ་ཀུ་ས་ལཾ? ཡཾ ཛཱ་ན་ནྟོ ས་ཉྫཱ་ན་ནྟོ ཙེ་ཙྩ ཨ་བྷི་ཝི་ཏ་རི་ཏྭཱ ཝཱི་ཏི་ཀྐ་མོ – ཨི་དཾ ཝུ་ཙྩ་ཏི ཨཱ་པ་ཏྟཱ་དྷི་ཀ་ར་ཎཾ ཨ་ཀུ་ས་ལཾ.
‘‘ཏ་ཏྠ ཀ་ཏ་མཾ ཨཱ་པ་ཏྟཱ་དྷི་ཀ་ར་ཎཾ ཨ་བྱཱ་ཀ་ཏཾ? ཡཾ ཨ་ཛཱ་ན་ནྟོ ཨ་ས་ཉྫཱ་ན་ནྟོ ཨ་ཙེ་ཙྩ ཨ་ན་བྷི་ཝི་ཏ་རི་ཏྭཱ ཝཱི་ཏི་ཀྐ་མོ – ཨི་དཾ ཝུ་ཙྩ་ཏི ཨཱ་པ་ཏྟཱ་དྷི་ཀ་ར་ཎཾ ཨ་བྱཱ་ཀ་ཏཾ.
༢༢༣. ‘‘ཀི་ཙྩཱ་དྷི་ཀ་ར་ཎཾ ཀུ་ས་ལཾ, ཨ་ཀུ་ས་ལཾ, ཨ་བྱཱ་ཀ་ཏཾ? ཀི་ཙྩཱ་དྷི་ཀ་ར་ཎཾ སི་ཡཱ ཀུ་ས་ལཾ, སི་ཡཱ ཨ་ཀུ་ས་ལཾ, སི་ཡཱ ཨ་བྱཱ་ཀ་ཏཾ. ཏ་ཏྠ ཀ་ཏ་མཾ ཀི་ཙྩཱ་དྷི་ཀ་ར་ཎཾ ཀུ་ས་ལཾ? ཡཾ ས་ངྒྷོ ཀུ་ས་ལ་ཙི་ཏྟོ ཀ་མྨཾ ཀ་རོ་ཏི – ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་དཾ ཝུ་ཙྩ་ཏི ཀི་ཙྩཱ་དྷི་ཀ་ར་ཎཾ ཀུ་ས་ལཾ.
‘‘ཏ་ཏྠ ཀ་ཏ་མཾ ཀི་ཙྩཱ་དྷི་ཀ་ར་ཎཾ ཨ་ཀུ་ས་ལཾ? ཡཾ ས་ངྒྷོ ཨ་ཀུ་ས་ལ་ཙི་ཏྟོ ཀ་མྨཾ ཀ་རོ་ཏི – ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་དཾ ཝུ་ཙྩ་ཏི ཀི་ཙྩཱ་དྷི་ཀ་ར་ཎཾ ཨ་ཀུ་ས་ལཾ.
‘‘ཏ་ཏྠ ཀ་ཏ་མཾ ཀི་ཙྩཱ་དྷི་ཀ་ར་ཎཾ ཨ་བྱཱ་ཀ་ཏཾ? ཡཾ ས་ངྒྷོ ཨ་བྱཱ་ཀ་ཏ་ཙི་ཏྟོ ཀ་མྨཾ ཀ་རོ་ཏི – ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་དཾ ཝུ་ཙྩ་ཏི ཀི་ཙྩཱ་དྷི་ཀ་ར་ཎཾ ཨ་བྱཱ་ཀ་ཏཾ.
༢༢༤. [པ་རི. ༣༥༥] ‘‘ཝི་ཝཱ་དོ ཝི་ཝཱ་དཱ་དྷི་ཀ་ར་ཎཾ, ཝི་ཝཱ་དོ ནོ ཨ་དྷི་ཀ་ར་ཎཾ, ཨ་དྷི་ཀ་ར་ཎཾ ནོ ཝི་ཝཱ་དོ, ཨ་དྷི་ཀ་ར་ཎ་ཉྩེ་ཝ ཝི་ཝཱ་དོ ཙ. སི་ཡཱ ཝི་ཝཱ་དོ ཝི་ཝཱ་དཱ་དྷི་ཀ་ར་ཎཾ, སི་ཡཱ ཝི་ཝཱ་དོ ནོ ཨ་དྷི་ཀ་ར་ཎཾ, སི་ཡཱ ཨ་དྷི་ཀ་ར་ཎཾ ནོ ཝི་ཝཱ་དོ, སི་ཡཱ ཨ་དྷི་ཀ་ར་ཎ་ཉྩེ་ཝ ཝི་ཝཱ་དོ ཙ.
‘‘ཏ་ཏྠ ཀ་ཏ་མོ ཝི་ཝཱ་དོ ཝི་ཝཱ་དཱ་དྷི་ཀ་ར་ཎཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ ཝི་ཝ་ད་ནྟི – དྷ་མྨོ་ཏི ཝཱ ཨ་དྷ་མྨོ་ཏི ཝཱ…པེ… དུ་ཊྛུ་ལླཱ ཨཱ་པ་ཏྟཱི་ཏི ཝཱ ཨ་དུ་ཊྛུ་ལླཱ ཨཱ་པ་ཏྟཱི་ཏི ཝཱ. ཡཾ ཏ་ཏྠ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ནཱ་ནཱ་ཝཱ་དོ ཨ་ཉྙ་ཐཱ་ཝཱ་དོ ཝི་པ་ཙྩ་ཏཱ་ཡ ཝོ་ཧཱ་རོ མེ་དྷ་གཾ – ཨ་ཡཾ ཝི་ཝཱ་དོ ཝི་ཝཱ་དཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མོ ཝི་ཝཱ་དོ ནོ ཨ་དྷི་ཀ་ར་ཎཾ? མཱ་ཏཱ་པི པུ་ཏྟེ་ན ཝི་ཝ་ད་ཏི, པུ་ཏྟོ་པི མཱ་ཏ་རཱ ཝི་ཝ་ད་ཏི, པི་ཏཱ་པི པུ་ཏྟེ་ན ཝི་ཝ་ད་ཏི, པུ་ཏྟོ་པི པི་ཏ་རཱ ཝི་ཝ་ད་ཏི, བྷཱ་ཏཱ་པི བྷཱ་ཏ་རཱ ཝི་ཝ་ད་ཏི, བྷཱ་ཏཱ་པི བྷ་གི་ནི་ཡཱ ཝི་ཝ་ད་ཏི, བྷ་གི་ནཱི་པི བྷཱ་ཏ་རཱ ཝི་ཝ་ད་ཏི, ས་ཧཱ་ཡོ་པི ས་ཧཱ་ཡེ་ན ཝི་ཝ་ད་ཏི – ཨ་ཡཾ ཝི་ཝཱ་དོ ནོ ཨ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎཾ ནོ ཝི་ཝཱ་དོ? ཨ་ནུ་ཝཱ་དཱ་དྷི་ཀ་ར་ཎཾ, ཨཱ་པ་ཏྟཱ་དྷི་ཀ་ར་ཎཾ, ཀི་ཙྩཱ་དྷི་ཀ་ར་ཎཾ – ཨི་དཾ ཨ་དྷི་ཀ་ར་ཎཾ ནོ ཝི་ཝཱ་དོ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎ་ཉྩེ་ཝ ཝི་ཝཱ་དོ ཙ? ཝི་ཝཱ་དཱ་དྷི་ཀ་ར་ཎཾ ཨ་དྷི་ཀ་ར་ཎ་ཉྩེ་ཝ ཝི་ཝཱ་དོ ཙ.
༢༢༥. [པ་རི. ༣༥༦] ‘‘ཨ་ནུ་ཝཱ་དོ ཨ་ནུ་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དོ ནོ ཨ་དྷི་ཀ་ར་ཎཾ, ཨ་དྷི་ཀ་ར་ཎཾ ནོ ཨ་ནུ་ཝཱ་དོ, ཨ་དྷི་ཀ་ར་ཎ་ཉྩེ་ཝ ཨ་ནུ་ཝཱ་དོ ཙ. སི་ཡཱ ཨ་ནུ་ཝཱ་དོ ཨ་ནུ་ཝཱ་དཱ་དྷི་ཀ་ར་ཎཾ, སི་ཡཱ ཨ་ནུ་ཝཱ་དོ ནོ ཨ་དྷི་ཀ་ར་ཎཾ, སི་ཡཱ ཨ་དྷི་ཀ་ར་ཎཾ ནོ ཨ་ནུ་ཝཱ་དོ, སི་ཡཱ ཨ་དྷི་ཀ་ར་ཎ་ཉྩེ་ཝ ཨ་ནུ་ཝཱ་དོ ཙ.
‘‘ཏ་ཏྠ ཀ་ཏ་མོ ཨ་ནུ་ཝཱ་དོ ཨ་ནུ་ཝཱ་དཱ་དྷི་ཀ་ར་ཎཾ? ཨི་དྷ པ་ན, བྷི་ཀྑ་ཝེ, བྷི་ཀྑཱུ བྷི་ཀྑུཾ ཨ་ནུ་ཝ་ད་ནྟི – སཱི་ལ་ཝི་པ་ཏྟི་ཡཱ ཝཱ, ཨཱ་ཙཱ་ར་ཝི་པ་ཏྟི་ཡཱ ཝཱ, དི་ཊྛི་ཝི་པ་ཏྟི་ཡཱ ཝཱ, ཨཱ་ཛཱི་ཝ་ཝི་པ་ཏྟི་ཡཱ ཝཱ. ཡོ ཏ་ཏྠ ཨ་ནུ་ཝཱ་དོ ཨ་ནུ་ཝ་ད་ནཱ ཨ་ནུ་ལླ་པ་ནཱ ཨ་ནུ་བྷ་ཎ་ནཱ ཨ་ནུ་ས་མྤ་ཝ་ངྐ་ཏཱ ཨ་བྦྷུ་སྶ་ཧ་ན་ཏཱ ཨ་ནུ་བ་ལ་པྤ་དཱ་ནཾ – ཨ་ཡཾ ཨ་ནུ་ཝཱ་དོ ཨ་ནུ་ཝཱ་དཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མོ ཨ་ནུ་ཝཱ་དོ ནོ ཨ་དྷི་ཀ་ར་ཎཾ? མཱ་ཏཱ་པི པུ་ཏྟཾ ཨ་ནུ་ཝ་ད་ཏི, པུ་ཏྟོ་པི མཱ་ཏ་རཾ ཨ་ནུ་ཝ་ད་ཏི, པི་ཏཱ་པི པུ་ཏྟཾ ཨ་ནུ་ཝ་ད་ཏི, པུ་ཏྟོ་པི པི་ཏ་རཾ ཨ་ནུ་ཝ་ད་ཏི, བྷཱ་ཏཱ་པི བྷཱ་ཏ་རཾ ཨ་ནུ་ཝ་ད་ཏི, བྷཱ་ཏཱ་པི བྷ་གི་ནིཾ ཨ་ནུ་ཝ་ད་ཏི, བྷ་གི་ནཱི་པི བྷཱ་ཏ་རཾ ཨ་ནུ་ཝ་ད་ཏི, ས་ཧཱ་ཡོ་པི ས་ཧཱ་ཡཾ ཨ་ནུ་ཝ་ད་ཏི – ཨ་ཡཾ ཨ་ནུ་ཝཱ་དོ ནོ ཨ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎཾ ནོ ཨ་ནུ་ཝཱ་དོ? ཨཱ་པ་ཏྟཱ་དྷི་ཀ་ར་ཎཾ, ཀི་ཙྩཱ་དྷི་ཀ་ར་ཎཾ, ཝི་ཝཱ་དཱ་དྷི་ཀ་ར་ཎཾ – ཨི་དཾ ཨ་དྷི་ཀ་ར་ཎཾ ནོ ཨ་ནུ་ཝཱ་དོ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎ་ཉྩེ་ཝ ཨ་ནུ་ཝཱ་དོ ཙ? ཨ་ནུ་ཝཱ་དཱ་དྷི་ཀ་ར་ཎཾ ཨ་དྷི་ཀ་ར་ཎ་ཉྩེ་ཝ ཨ་ནུ་ཝཱ་དོ ཙ.
༢༢༦. [པ་རི. ༣༥༧] ‘‘ཨཱ་པ་ཏྟི ཨཱ་པ་ཏྟཱ་དྷི་ཀ་ར་ཎཾ, ཨཱ་པ་ཏྟི ནོ ཨ་དྷི་ཀ་ར་ཎཾ, ཨ་དྷི་ཀ་ར་ཎཾ ནོ ཨཱ་པ་ཏྟི, ཨ་དྷི་ཀ་ར་ཎ་ཉྩེ་ཝ ཨཱ་པ་ཏྟི ཙ. སི་ཡཱ ཨཱ་པ་ཏྟི ཨཱ་པ་ཏྟཱ་དྷི་ཀ་ར་ཎཾ, སི་ཡཱ ཨཱ་པ་ཏྟི ནོ ཨ་དྷི་ཀ་ར་ཎཾ, སི་ཡཱ ཨ་དྷི་ཀ་ར་ཎཾ ནོ ཨཱ་པ་ཏྟི, སི་ཡཱ ཨ་དྷི་ཀ་ར་ཎ་ཉྩེ་ཝ ཨཱ་པ་ཏྟི ཙ. ‘‘ཏ་ཏྠ ཀ་ཏ་མཾ ཨཱ་པ་ཏྟི ཨཱ་པ་ཏྟཱ་དྷི་ཀ་ར་ཎཾ? པ་ཉྩ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ, ས་ཏྟ་པི ཨཱ་པ་ཏྟི་ཀྑ་ནྡྷཱ ཨཱ་པ་ཏྟཱ་དྷི་ཀ་ར་ཎཾ – ཨ་ཡཾ ཨཱ་པ་ཏྟི ཨཱ་པ་ཏྟཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨཱ་པ་ཏྟི ནོ ཨ་དྷི་ཀ་ར་ཎཾ? སོ་ཏཱ་པ་ཏྟི ས་མཱ་པ་ཏྟི – ཨ་ཡཾ ཨཱ་པ་ཏྟི ནོ ཨ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎཾ ནོ ཨཱ་པ་ཏྟི? ཀི་ཙྩཱ་དྷི་ཀ་ར་ཎཾ, ཝི་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དཱ་དྷི་ཀ་ར་ཎཾ – ཨི་དཾ ཨ་དྷི་ཀ་ར་ཎཾ ནོ ཨཱ་པ་ཏྟི.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎ་ཉྩེ་ཝ ཨཱ་པ་ཏྟི ཙ? ཨཱ་པ་ཏྟཱ་དྷི་ཀ་ར་ཎཾ ཨ་དྷི་ཀ་ར་ཎ་ཉྩེ་ཝ ཨཱ་པ་ཏྟི ཙ.
༢༢༧. [པ་རི. ༣༥༨] ‘‘ཀི་ཙྩཾ ཀི་ཙྩཱ་དྷི་ཀ་ར་ཎཾ, ཀི་ཙྩཾ ནོ ཨ་དྷི་ཀ་ར་ཎཾ, ཨ་དྷི་ཀ་ར་ཎཾ ནོ ཀི་ཙྩཾ, ཨ་དྷི་ཀ་ར་ཎ་ཉྩེ་ཝ ཀི་ཙྩ་ཉྩ. སི་ཡཱ ཀི་ཙྩཾ ཀི་ཙྩཱ་དྷི་ཀ་ར་ཎཾ, སི་ཡཱ ཀི་ཙྩཾ ནོ ཨ་དྷི་ཀ་ར་ཎཾ, སི་ཡཱ ཨ་དྷི་ཀ་ར་ཎཾ ནོ ཀི་ཙྩཾ, སི་ཡཱ ཨ་དྷི་ཀ་ར་ཎ་ཉྩེ་ཝ ཀི་ཙྩ་ཉྩ.
‘‘ཏ་ཏྠ ཀ་ཏ་མཾ ཀི་ཙྩཾ ཀི་ཙྩཱ་དྷི་ཀ་ར་ཎཾ? ཡཱ ས་ངྒྷ་སྶ ཀི་ཙྩ་ཡ་ཏཱ, ཀ་ར་ཎཱི་ཡ་ཏཱ, ཨ་པ་ལོ་ཀ་ན་ཀ་མྨཾ, ཉ་ཏྟི་ཀ་མྨཾ, ཉ་ཏྟི་དུ་ཏི་ཡ་ཀ་མྨཾ, ཉ་ཏྟི་ཙ་ཏུ་ཏྠ་ཀ་མྨཾ – ཨི་དཾ ཀི་ཙྩཾ ཀི་ཙྩཱ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཀི་ཙྩཾ ནོ ཨ་དྷི་ཀ་ར་ཎཾ? ཨཱ་ཙ་རི་ཡ་ཀི་ཙྩཾ, ཨུ་པ་ཛ྄ཛྷཱ་ཡ་ཀི་ཙྩཾ, ས་མཱ་ནུ་པ་ཛ྄ཛྷཱ་ཡ་ཀི་ཙྩཾ, ས་མཱ་ནཱ་ཙ་རི་ཡ་ཀི་ཙྩཾ – ཨི་དཾ ཀི་ཙྩཾ ནོ ཨ་དྷི་ཀ་ར་ཎཾ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎཾ ནོ ཀི་ཙྩཾ? ཝི་ཝཱ་དཱ་དྷི་ཀ་ར་ཎཾ, ཨ་ནུ་ཝཱ་དཱ་དྷི་ཀ་ར་ཎཾ, ཨཱ་པ་ཏྟཱ་དྷི་ཀ་ར་ཎཾ – ཨི་དཾ ཨ་དྷི་ཀ་ར་ཎཾ ནོ ཀི་ཙྩཾ.
‘‘ཏ་ཏྠ ཀ་ཏ་མཾ ཨ་དྷི་ཀ་ར་ཎ་ཉྩེ་ཝ ཀི་ཙྩ་ཉྩ? ཀི་ཙྩཱ་དྷི་ཀ་ར་ཎཾ ཨ་དྷི་ཀ་ར་ཎ་ཉྩེ་ཝ ཀི་ཙྩ་ཉྩ.