༤. པ་ཊི་ཉྙཱ་ཏ་ཀ་ར་ཎཾ

༢༠༠. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ཨ་པྤ་ཊི་ཉྙཱ་ཡ བྷི་ཀྑཱུ་ནཾ ཀ་མྨཱ་ནི ཀ་རོ་ནྟི – ཏ་ཛྫ་ནཱི་ཡ་མྤི, ནི་ཡ་སྶ་མྤི, པ་བྦཱ་ཛ་ནཱི་ཡ་མྤི, པ་ཊི་སཱ་ར་ཎཱི་ཡ་མྤི, ཨུ་ཀྑེ་པ་ནཱི་ཡ་མྤི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑཱུ ཨ་པྤ་ཊི་ཉྙཱ་ཡ བྷི་ཀྑཱུ་ནཾ ཀ་མྨཱ་ནི ཀ་རི་སྶ་ནྟི – ཏ་ཛྫ་ནཱི་ཡ་མྤི, ནི་ཡ་སྶ་མྤི, པ་བྦཱ་ཛ་ནཱི་ཡ་མྤི, པ་ཊི་སཱ་ར་ཎཱི་ཡ་མྤི, ཨུ་ཀྑེ་པ་ནཱི་ཡ་མྤཱི’’ཏི! ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ…པེ… ‘‘ས་ཙྩཾ བྷ་ག་ཝཱ’’ཏི…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཨ་པྤ་ཊི་ཉྙཱ་ཡ བྷི་ཀྑཱུ་ནཾ ཀ་མྨཾ ཀཱ་ཏ་བྦཾ – ཏ་ཛྫ་ནཱི་ཡཾ ཝཱ, ནི་ཡ་སྶཾ ཝཱ, པ་བྦཱ་ཛ་ནཱི་ཡཾ ཝཱ, པ་ཊི་སཱ་ར་ཎཱི་ཡཾ ཝཱ, ཨུ་ཀྑེ་པ་ནཱི་ཡཾ ཝཱ. ཡོ ཀ་རེ་ཡྻ, ཨཱ་པ་ཏྟི དུ་ཀྐ་ཊ་སྶ.

༢༠༡. ‘‘ཨེ་ཝཾ ཁོ, བྷི་ཀྑ་ཝེ, ཨ་དྷ་མྨི་ཀཾ ཧོ་ཏི པ་ཊི་ཉྙཱ་ཏ་ཀ་ར་ཎཾ, ཨེ་ཝཾ དྷ་མྨི་ཀཾ. ཀ་ཐ་ཉྩ, བྷི་ཀྑ་ཝེ, ཨ་དྷ་མྨི་ཀཾ ཧོ་ཏི པ་ཊི་ཉྙཱ་ཏ་ཀ་ར་ཎཾ?

‘‘བྷི་ཀྑུ པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘པཱ་རཱ་ཛི་ཀཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ན ཁོ ཨ་ཧཾ, ཨཱ་ཝུ་སོ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ, ས་ངྒྷཱ་དི་སེ་སཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ ས་ངྒྷཱ་དི་སེ་སེ་ན ཀཱ་རེ་ཏི. ཨ་དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ.

‘‘བྷི་ཀྑུ པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘པཱ་རཱ་ཛི་ཀཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ན ཁོ ཨ་ཧཾ, ཨཱ་ཝུ་སོ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ, ཐུ་ལླ་ཙྩ་ཡཾ…པེ… པཱ་ཙི་ཏྟི་ཡཾ…པེ… པཱ་ཊི་དེ་ས་ནཱི་ཡཾ…པེ… དུ་ཀྐ་ཊཾ…པེ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ དུ་བྦྷཱ་སི་ཏེ་ན ཀཱ་རེ་ཏི. ཨ་དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ.

‘‘བྷི་ཀྑུ ས་ངྒྷཱ་དི་སེ་སཾ…པེ… ཐུ་ལླ་ཙྩ་ཡཾ…པེ… པཱ་ཙི་ཏྟི་ཡཾ…པེ… པཱ་ཊི་དེ་ས་ནཱི་ཡཾ…པེ… དུ་ཀྐ་ཊཾ…པེ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘དུ་བྦྷཱ་སི་ཏཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ན ཁོ ཨ་ཧཾ, ཨཱ་ཝུ་སོ, དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ པཱ་རཱ་ཛི་ཀེ་ན ཀཱ་རེ་ཏི. ཨ་དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ.

‘‘བྷི་ཀྑུ དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘དུ་བྦྷཱ་སི་ཏཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ན ཁོ ཨ་ཧཾ, ཨཱ་ཝུ་སོ, དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ, ས་ངྒྷཱ་དི་སེ་སཾ…པེ… ཐུ་ལླ་ཙྩ་ཡཾ…པེ… པཱ་ཙི་ཏྟི་ཡཾ…པེ… པཱ་ཊི་དེ་ས་ནཱི་ཡཾ…པེ… དུ་ཀྐ་ཊཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ དུ་ཀྐ་ཊེ་ན ཀཱ་རེ་ཏི. ཨ་དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ. ‘‘ཨེ་ཝཾ ཁོ, བྷི་ཀྑ་ཝེ, ཨ་དྷ་མྨི་ཀཾ ཧོ་ཏི པ་ཊི་ཉྙཱ་ཏ་ཀ་ར་ཎཾ.

‘‘ཀ་ཐ་ཉྩ, བྷི་ཀྑ་ཝེ, དྷ་མྨི་ཀཾ ཧོ་ཏི པ་ཊི་ཉྙཱ་ཏ་ཀ་ར་ཎཾ? བྷི་ཀྑུ པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘པཱ་རཱ་ཛི་ཀཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ཨཱ་མ, ཨཱ་ཝུ་སོ, པཱ་རཱ་ཛི་ཀཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ པཱ་རཱ་ཛི་ཀེ་ན ཀཱ་རེ་ཏི. དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ.

‘‘བྷི་ཀྑུ ས་ངྒྷཱ་དི་སེ་སཾ…པེ… ཐུ་ལླ་ཙྩ་ཡཾ…པེ… པཱ་ཙི་ཏྟི་ཡཾ…པེ… པཱ་ཊི་དེ་ས་ནཱི་ཡཾ…པེ… དུ་ཀྐ་ཊཾ…པེ… དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ ཧོ་ཏི. ཏ་མེ་ནཾ ཙོ་དེ་ཏི ས་ངྒྷོ ཝཱ, ས་མྦ་ཧུ་ལཱ ཝཱ, ཨེ་ཀ་པུ་གྒ་ལོ ཝཱ – ‘དུ་བྦྷཱ་སི་ཏཾ ཨཱ་ཡ་སྨཱ ཨ་ཛ྄ཛྷཱ་པ་ནྣོ’ཏི? སོ ཨེ་ཝཾ ཝ་དེ་ཏི – ‘ཨཱ་མ, ཨཱ་ཝུ་སོ, དུ་བྦྷཱ་སི་ཏཾ ཨ་ཛ྄ཛྷཱ་པ་ནྣོ’ཏི. ཏཾ ས་ངྒྷོ དུ་བྦྷཱ་སི་ཏེ་ན ཀཱ་རེ་ཏི. དྷ་མྨི་ཀཾ པ་ཊི་ཉྙཱ་ཏ་ཀ་ར་ཎཾ. ཨེ་ཝཾ ཁོ, བྷི་ཀྑ་ཝེ, དྷ་མྨི་ཀཾ ཧོ་ཏི པ་ཊི་ཉྙཱ་ཏ་ཀ་ར་ཎ’’ནྟི.