༥. ཡེ་བྷུ་ཡྻ་སི་ཀཱ

༢༠༢. ཏེ་ན ཁོ པ་ན ས་མ་ཡེ་ན བྷི་ཀྑཱུ ས་ངྒྷ་མ་ཛ྄ཛྷེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ མུ་ཁ་ས་ཏྟཱི་ཧི ཝི་ཏུ་ད་ནྟཱ ཝི་ཧ་ར་ནྟི, ན ས་ཀྐོ་ནྟི ཏཾ ཨ་དྷི་ཀ་ར་ཎཾ ཝཱུ་པ་ས་མེ་ཏུཾ. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨེ་ཝ་རཱུ་པཾ ཨ་དྷི་ཀ་ར་ཎཾ ཡེ་བྷུ་ཡྻ་སི་ཀཱ་ཡ ཝཱུ་པ་ས་མེ་ཏུཾ. པ་ཉྩ་ཧ་ངྒེ་ཧི ས་མ་ནྣཱ་ག་ཏོ བྷི་ཀྑུ ས་ལཱ་ཀ་གྒཱ་ཧཱ་པ་ཀོ ས་མྨ་ནྣི་ཏ་བྦོ – ཡོ ན ཚ་ནྡཱ་ག་ཏིཾ ག་ཙྪེ་ཡྻ, ན དོ་སཱ་ག་ཏིཾ ག་ཙྪེ་ཡྻ, ན མོ་ཧཱ་ག་ཏིཾ ག་ཙྪེ་ཡྻ, ན བྷ་ཡཱ་ག་ཏིཾ ག་ཙྪེ་ཡྻ, ག་ཧི་ཏཱ་ག་ཧི་ཏུ་ཉྩ ཛཱ་ནེ་ཡྻ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦོ. པ་ཋ་མཾ བྷི་ཀྑུ ཡཱ་ཙི་ཏ་བྦོ, ཡཱ་ཙི་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

༢༠༣. ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་ལཱ་ཀ་གྒཱ་ཧཱ་པ་ཀཾ ས་མྨ་ནྣེ་ཡྻ. ཨེ་སཱ ཉ་ཏྟི.

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ས་ངྒྷོ ཨི་ཏྠ་ནྣཱ་མཾ བྷི་ཀྑུཾ ས་ལཱ་ཀ་གྒཱ་ཧཱ་པ་ཀཾ ས་མྨ་ནྣ་ཏི. ཡ་སྶཱ་ཡ་སྨ་ཏོ ཁ་མ་ཏི ཨི་ཏྠ་ནྣཱ་མ་སྶ བྷི་ཀྑུ་ནོ ས་ལཱ་ཀ་གྒཱ་ཧཱ་པ་ཀ་སྶ ས་མྨུ་ཏི, སོ ཏུ་ཎྷ་སྶ; ཡ་སྶ ན་ཀྑ་མ་ཏི, སོ བྷཱ་སེ་ཡྻ.

‘‘ས་མྨ་ཏོ ས་ངྒྷེ་ན ཨི་ཏྠ་ནྣཱ་མོ བྷི་ཀྑུ ས་ལཱ་ཀ་གྒཱ་ཧཱ་པ་ཀོ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.

༢༠༤. ‘‘ད་ས་ཡི་མེ, བྷི་ཀྑ་ཝེ, ཨ་དྷ་མྨི་ཀཱ ས་ལཱ་ཀ་གྒཱ་ཧཱ, ད་ས དྷ་མྨི་ཀཱ [ད་ས དྷ་མྨི་ཀཱ ས་ལཱ་ཀ་གྒཱ་ཧཱ (ཀ.)]. ཀ་ཏ་མེ ད་ས ཨ་དྷ་མྨི་ཀཱ ས་ལཱ་ཀ་གྒཱ་ཧཱ? ཨོ་ར་མ་ཏྟ་ཀ་ཉྩ ཨ་དྷི་ཀ་ར་ཎཾ ཧོ་ཏི, ན ཙ ག་ཏི་ག་ཏཾ ཧོ་ཏི, ན ཙ ས་རི་ཏ་སཱ་རི་ཏཾ ཧོ་ཏི, ཛཱ་ནཱ་ཏི ཨ་དྷ་མྨ་ཝཱ་དཱི བ་ཧུ་ཏ་རཱ་ཏི, ཨ་པྤེ་ཝ ནཱ་མ ཨ་དྷ་མྨ་ཝཱ་དཱི བ་ཧུ་ཏ་རཱ ཨ་སྶཱུ་ཏི, ཛཱ་ནཱ་ཏི ས་ངྒྷོ བྷི་ཛྫི་སྶ་ཏཱི་ཏི, ཨ་པྤེ་ཝ ནཱ་མ ས་ངྒྷོ བྷི་ཛྫེ་ཡྻཱ་ཏི, ཨ་དྷ་མྨེ་ན ག་ཎྷ་ནྟི, ཝ་གྒཱ ག་ཎྷ་ནྟི, ན ཙ ཡ་ཐཱ་དི་ཊྛི་ཡཱ ག་ཎྷ་ནྟི – ཨི་མེ ད་ས ཨ་དྷ་མྨི་ཀཱ ས་ལཱ་ཀ་གྒཱ་ཧཱ.

‘‘ཀ་ཏ་མེ ད་ས དྷ་མྨི་ཀཱ ས་ལཱ་ཀ་གྒཱ་ཧཱ? ན ཙ ཨོ་ར་མ་ཏྟ་ཀཾ ཨ་དྷི་ཀ་ར་ཎཾ ཧོ་ཏི, ག་ཏི་ག་ཏ་ཉྩ ཧོ་ཏི, ས་རི་ཏ་སཱ་རི་ཏ་ཉྩ ཧོ་ཏི, ཛཱ་ནཱ་ཏི དྷ་མྨ་ཝཱ་དཱི བ་ཧུ་ཏ་རཱ་ཏི, ཨ་པྤེ་ཝ ནཱ་མ དྷ་མྨ་ཝཱ་དཱི བ་ཧུ་ཏ་རཱ ཨ་སྶཱུ་ཏི, ཛཱ་ནཱ་ཏི ས་ངྒྷོ ན བྷི་ཛྫི་སྶ་ཏཱི་ཏི, ཨ་པྤེ་ཝ ནཱ་མ ས་ངྒྷོ ན བྷི་ཛྫེ་ཡྻཱ་ཏི, དྷ་མྨེ་ན ག་ཎྷ་ནྟི, ས་མ་གྒཱ ག་ཎྷ་ནྟི, ཡ་ཐཱ་དི་ཊྛི་ཡཱ ཙ ག་ཎྷ་ནྟི – ཨི་མེ ད་ས དྷ་མྨི་ཀཱ ས་ལཱ་ཀ་གྒཱ་ཧཱ’’ཏི.