ཨཱ་ཝ་ཏྟ་ཧཱ་ར་ཝ་ཎྞ་ནཱ

ཨཱ་གྷཱ་ཏཱ་དཱི་ན་མ་ཀ་ར་ཎཱི་ཡ་ཏཱ་ཝ་ཙ་ནེ་ན ཁ་ནྟི་སོ་ར་ཙྩཱ་ནུ་ཊྛཱ་ནཾ. ཏ་ཏྠ ཁ་ནྟི་ཡཱ ས་དྡྷཱ་པ་ཉྙཱ་པ་རཱ་པ་ཀཱ་ར་དུ་ཀྑ་ས་ཧ་ག་ཏཱ་ནཾ ས་ངྒ་ཧོ, ཏ་ཐཱ སོ་ར་ཙྩེ་ན སཱི་ལ་སྶ. ས་དྡྷཱ་དི་གྒ་ཧ་ཎེ་ན ཙ ས་དྡྷི་ནྡྲི་ཡཱ་དི་ས་ཀ་ལ་བོ་དྷི་པ་ཀྑི་ཡ་དྷ་མྨཱ ཨཱ་ཝ་ཏྟ་ནྟི. སཱི་ལ་གྒ་ཧ་ཎེ་ན ཨ་ཝི་པྤ་ཊི་སཱ་རཱ་ད་ཡོ ས་བྦེ་པི སཱི་ལཱ་ནི་སཾ་ས་དྷ་མྨཱ ཨཱ་ཝ་ཏྟ་ནྟི. པཱ་ཎཱ་ཏི་པཱ་ཏཱ་དཱི་ཧི པ་ཊི་ཝི་ར་ཏི་ཝ་ཙ་ནེ་ན ཨ་པྤ་མཱ་ད་ཝི་ཧཱ་རོ, ཏེ་ན ས་ཀ་ལཾ སཱ་ས་ན་བྲ་ཧྨ་ཙ་རི་ཡཾ ཨཱ་ཝ་ཏྟ་ཏི. ག་མྦྷཱི་ར་ཏཱ་དི་ཝི་སེ་ས་ཡུ་ཏྟ་དྷ་མྨ་གྒ་ཧ་ཎེ་ན མ་ཧཱ་བོ་དྷི་པ་ཀི་ཏྟ་ནཾ. ཨ་ནཱ་ཝ་ར་ཎ་ཉཱ་ཎ་པ་ད་ཊྛཱ་ན་ཉྷི ཨཱ་ས་ཝ་ཀྑ་ཡ་ཉཱ་ཎཾ, ཨཱ་ས་ཝ་ཀྑ་ཡ་ཉཱ་ཎ་པ་ད་ཊྛཱ་ན་ཉྩ ཨ་ནཱ་ཝ་ར་ཎ་ཉཱ་ཎཾ མ་ཧཱ་བོ་དྷཱི་ཏི ཝུ་ཙྩ་ཏི, ཏེ་ན ད་ས་བ་ལཱ་ད་ཡོ ས་བྦེ བུ་དྡྷ་གུ་ཎཱ ཨཱ་ཝ་ཏྟ་ནྟི. ས་སྶ་ཏཱ་དི་དི་ཊྛི་གྒ་ཧ་ཎེ་ན ཏ་ཎྷཱ་ཝི་ཛྫཱ་ནཾ ས་ངྒ་ཧོ, ཏཱ་ཧི ཨ་ན་མ་ཏ་གྒཾ སཾ་སཱ་ར་ཝ་ཊྚཾ ཨཱ་ཝ་ཏྟ་ཏི. ཝེ་ད་ནཱ་ནཾ ཡ་ཐཱ་བྷཱུ་ཏཾ ས་མུ་ད་ཡཱ་དི་པ་ཊི་ཝེ་དྷ་ནེ་ན བྷ་ག་ཝ་ཏོ པ་རི་ཉྙཱ་ཏྟ་ཡ་ཝི་སུ་དྡྷི, ཏཱ་ཡ པ་ཉྙཱ་པཱ་ར་མི་མུ་ཁེ་ན ས་བྦཱ་པི པཱ་ར་མི་ཡོ ཨཱ་ཝ་ཏྟ་ནྟི. ‘‘ཨ་ཛཱ་ན་ཏཾ ཨ་པ་སྶ་ཏ’’ནྟི ཨེ་ཏྠ ཨ་ཝི་ཛྫཱ་གྒ་ཧ་ཎེ་ན ཨ་ཡོ་ནི་སོ་མ་ན་སི་ཀཱ་ར་པ་རི་གྒ་ཧོ, ཏེ་ན ཙ ན་ཝ ཨ་ཡོ་ནི་སོ་མ་ན་སི་ཀཱ་ར་མཱུ་ལ་ཀཱ དྷ་མྨཱ ཨཱ་ཝ་ཏྟ་ནྟི. ‘‘ཏ་ཎྷཱ་ག་ཏཱ་ནཾ པ་རི་ཏ་སྶི་ཏ་ཝི་པྥ་ནྡི་ཏ’’ནྟི ཨེ་ཏྠ ཏ་ཎྷཱ་གྒ་ཧ་ཎེ་ན ན་ཝ ཏ་ཎྷཱ་མཱུ་ལ་ཀཱ དྷ་མྨཱ ཨཱ་ཝ་ཏྟ་ནྟི. ‘‘ཏ་ད་པི ཕ་སྶ་པ་ཙྩ་ཡཱ’’ཏི་ཨཱ་དི ས་སྶ་ཏཱ་དི་པ་ཉྙཱ་པ་ན་སྶ པ་ཙྩ་ཡཱ་དྷཱི་ན་ཝུ་ཏྟི་ད་སྶ་ནཾ, ཏེ་ན ཨ་ནི་ཙྩ་ཏཱ་དི་ལ་ཀྑ་ཎ་ཏྟ་ཡཾ ཨཱ་ཝ་ཏྟ་ཏི. ཚ་ནྣཾ ཕ་སྶཱ་ཡ་ཏ་ནཱ་ནཾ ཡ་ཐཱ་བྷཱུ་ཏཾ པ་ཛཱ་ན་ནེ་ན ཝི་མུ་ཏྟི་ས་མྤ་དཱ་ནི་དྡེ་སོ, ཏེ་ན ས་ཏྟ་པི ཝི་སུ་དྡྷི་ཡོ ཨཱ་ཝ་ཏྟ་ནྟི. ‘‘ཨུ་ཙྪི་ནྣ་བྷ་ཝ་ནེ་ཏྟི་ཀོ ཏ་ཐཱ་ག་ཏ་སྶ ཀཱ་ཡོ’’ཏི ཏ་ཎྷཱ་པ་ཧཱ་ནཾ ཝུ་ཏྟཾ, ཏེ་ན བྷ་ག་ཝ་ཏོ ས་ཀ་ལ་སཾ་ཀི་ལེ་ས་པྤ་ཧཱ་ནཾ ཨཱ་ཝ་ཏྟ་ཏཱི་ཏི ཨ་ཡཾ དེ་ས་ནཱ་ཡ ག་ཧི་ཏ་དྷ་མྨཱ་ནཾ ས་བྷཱ་ག་ཝི་ས་བྷཱ་ག་དྷ་མྨ་ཝ་སེ་ན ཨཱ་ཝ་ཏྟ་ན་ལ་ཀྑ་ཎོ ཨཱ་ཝ་ཏྟ་ཧཱ་རོ ནཱ་མ. ཡ་ཐཱ་ཧ ‘‘ཨེ་ཀ་མྷི པ་ད་ཊྛཱ་ནེ, པ་རི་ཡེ་ས་ཏི སེ་ས་ཀཾ པ་ད་ཊྛཱ་ན’’ནྟི་ཨཱ་དི (ནེ་ཏྟི. ༤.༧).