པ་ཀ་ར་ཎ་ན་ཡ་ཝ་ཎྞ་ནཱ
‘‘ཨི་ཏོ པ་རཾ ཨཱ་ཙ་རི་ཡ-དྷ་མྨ་པཱ་ལེ་ན ཡཱ ཀ་ཏཱ;
ས་མུ་ཊྛཱ་ནཱ་དི་ཧཱ་རཱ་དི-ཝི་ཝི་དྷ་ཏྠ་ཝི་བྷཱ་ཝ་ནཱ.
ན སཱ ཨ་མྷེ་ཧུ་པེ་ཀྑེ་ཡྻཱ, ཨ་ཡ་ཉྷི ཏ་བྦི་སོ་དྷ་ནཱ;
ཏ་སྨཱ ཏ་མྤི པ་ཝ་ཀྑཱ་མ, སོ་ཏཱུ་ནཾ ཉཱ་ཎ་ཝུ་ཌྜྷི་ཡཱ.
ཨ་ཡ་ཉྷི པ་ཀ་ར་ཎ་ན་ཡེ་ན པཱ་ལི༹་ཡཱ ཨ་ཏྠ་ཝ་ཎྞ་ནཱ – པ་ཀ་ར་ཎ་ན་ཡོ་ཏི ཙ ཏ་མྦ་པ་ཎྞི་བྷཱ་སཱ་ཡ ཝ་ཎྞ་ནཱ་ན་ཡོ. ‘‘ནེ་ཏྟི་པེ་ཊ་ཀ་པྤ་ཀ་ར་ཎེ དྷ་མྨ་ཀ་ཐི་ཀཱ་ནཾ ཡོ་ཛ་ནཱ་ན་ཡོ་ཏི་པི ཝ་ད་ནྟཱི’’ཏི ཨ་བྷི་དྷ་མྨ་ཊཱི་ཀཱ་ཡཾ ཝུ་ཏྟཾ. ཡ་སྨཱ པ་ནཱ་ཡཾ དེ་ས་ནཱ་ཡ ས་མུ་ཊྛཱ་ན་པ་ཡོ་ཛ་ན་བྷཱ་ཛ་ནེ་སུ, པི་ཎྜ་ཏྠེ་སུ ཙ པ་ཋ་མཾ ནི་དྡྷཱ་རི་ཏེ་སུ སུ་ཀ་རཱ, ཧོ་ཏི སུ་ཝི་ཉྙེ་ཡྻཱ ཙ, ཏ་སྨཱ –
ས་མུ་ཊྛཱ་ནཾ པ་ཡོ་ཛ་ནཾ, བྷཱ་ཛ་ན་ཉྩཱ་པི པི་ཎྜ་ཏྠཾ;
ནི་དྡྷཱ་རེ་ཏྭཱ་ན པ་ཎྜི་ཏོ, ཏ་ཏོ ཧཱ་རཱ་ད་ཡོ སཾ་སེ.
ཏ་ཏྠ ས་མུ་ཊྛཱ་ནཾ ནཱ་མ དེ་ས་ནཱ་ནི་དཱ་ནཾ, ཏཾ སཱ་དྷཱ་ར་ཎ་མ་སཱ་དྷཱ་ར་ཎ་ནྟི དུ་ཝི་དྷཾ, ཏ་ཐཱ སཱ་དྷཱ་ར་ཎ་མྤི ཨ་ཛ྄ཛྷ་ཏྟི་ཀ་བཱ་ཧི་ར་ཏོ. ཏ་ཏྠ སཱ་དྷཱ་ར་ཎཾ ཨ་ཛ྄ཛྷ་ཏྟི་ཀ་ས་མུ་ཊྛཱ་ནཾ ནཱ་མ བྷ་ག་ཝ་ཏོ མ་ཧཱ་ཀ་རུ་ཎཱ. ཏཱ་ཡ ཧི ས་མུ་སྶཱ་ཧི་ཏ་སྶ ལོ་ཀ་ནཱ་ཐ་སྶ ཝེ་ནེ་ཡྻཱ་ནཾ དྷ་མྨ་དེ་ས་ནཱ་ཡ ཙི་ཏྟཾ ཨུ་ད་པཱ་དི, ཏཾ ས་ནྡྷཱ་ཡ ཝུ་ཏྟཾ ‘‘ས་ཏྟེ་སུ ཀཱ་རུ་ཉྙ་ཏཾ པ་ཊི་ཙྩ བུ་དྡྷ་ཙ་ཀྑུ་ནཱ ལོ་ཀཾ ཝོ་ལོ་ཀེ་སཱི’’ཏི་ཨཱ་དི. ཨེ་ཏྠ ཙ ཏི་ཝི་དྷཱ་ཝ་ཏྠཱ་ཡ་པི མ་ཧཱ་ཀ་རུ་ཎཱ་ཡ ས་ངྒ་ཧོ ད་ཊྛ་བྦོ ཡཱ་ཝ་དེ་ཝ ས་དྡྷ་མྨ་དེ་ས་ནཱ་ཧ་ཏྠ་དཱ་ནེ་ཧི སཾ་སཱ་ར་མ་ཧོ་གྷ་ཏོ ས་ཏྟ་ས་ནྟཱ་ར་ཎ་ཏྠཾ ཏ་དུ་པྤ་ཏྟི་ཏོ. ཡ་ཐཱ ཙ མ་ཧཱ་ཀ་རུ་ཎཱ, ཨེ་ཝཾ ས་བྦ་ཉྙུ་ཏ་ཉྙཱ་ཎ་ད་ས་བ་ལ་ཉཱ་ཎཱ་ད་ཡོ་པི དེ་ས་ནཱ་ཡ སཱ་དྷཱ་ར་ཎ་མ་ཛ྄ཛྷ་ཏྟི་ཀ་ས་མུ་ཊྛཱ་ནཾ ནཱ་མ. ས་བྦ་ཉྷི ཉེ་ཡྻ་དྷ་མྨཾ ཏེ་སཾ དེ་སེ་ཏ་བྦཱ་ཀཱ་རཾ, ས་ཏྟཱ་ནཾ ཨཱ་ས་ཡཱ་ནུ་ས་ཡཱ་དི་ཀ་ཉྩ ཡཱ་ཐཱ་ཝ་ཏོ ཛཱ་ན་ནྟོ བྷ་ག་ཝཱ ཋཱ་ནཱ་ཊྛཱ་ནཱ་དཱི་སུ ཀོ་ས་ལླེ་ན ཝེ་ནེ་ཡྻ་ཛ྄ཛྷཱ་ས་ཡཱ་ནུ་རཱུ་པཾ ཝི་ཙི་ཏྲ་ན་ཡ་དེ་ས་ནཾ པ་ཝ་ཏྟེ་སི. བཱ་ཧི་རཾ པ་ན སཱ་དྷཱ་ར་ཎ་ས་མུ་ཊྛཱ་ནཾ ད་ས་ས་ཧ་སྶི་མ་ཧཱ་བྲ་ཧྨ་པ་རི་ཝཱ་ར་སྶ ས་ཧ་མྤ་ཏི་བྲ་ཧྨུ་ནོ ཨ་ཛ྄ཛྷེ་ས་ནཾ. ཏ་ད་ཛ྄ཛྷེ་ས་ན་ཉྷི པ་ཏི དྷ་མྨ་ག་མྦྷཱི་ར་ཏཱ་པ་ཙྩ་ཝེ་ཀྑ་ཎཱ་ཛ་ནི་ཏཾ ཨ་པྤོ་སྶུ་ཀྐ་ཏཾ པ་ཊི་པྤ་སྶ་མྦྷེ་ཏྭཱ དྷ་མྨ་སྶཱ་མཱི དྷ་མྨ་དེ་ས་ནཱ་ཡ ཨུ་སྶཱ་ཧ་ཛཱ་ཏོ ཨ་ཧོ་སི.
ཨ་སཱ་དྷཱ་ར་ཎ་མྤི ཨ་ཛ྄ཛྷ་ཏྟི་ཀ་བཱ་ཧི་ར་ཏོ དུ་ཝི་དྷ་མེ་ཝ. ཏ་ཏྠ ཨ་ཛ྄ཛྷ་ཏྟི་ཀཾ ཡཱ་ཡ མ་ཧཱ་ཀ་རུ་ཎཱ་ཡ, ཡེ་ན ཙ དེ་ས་ནཱ་ཉཱ་ཎེ་ན ཨི་དཾ སུ་ཏྟཾ པ་ཝ་ཏྟི་ཏཾ, ཏ་དུ་བྷ་ཡ་མེ་ཝ. སཱ་མ་ཉྙཱ་ཝ་ཏྠཱ་ཡ ཧི སཱ་དྷཱ་ར་ཎ་མྤི ས་མཱ་ནཾ མ་ཧཱ་ཀ་རུ་ཎཱ་དི་ཝི་སེ་སཱ་ཝ་ཏྠཱ་ཡ ཨ་སཱ་དྷཱ་ར་ཎཾ བྷ་ཝ་ཏི, བཱ་ཧི་རཾ པ་ན ཨ་སཱ་དྷཱ་ར་ཎ་ས་མུ་ཊྛཱ་ནཾ ཝ་ཎྞཱ་ཝ་ཎྞ་བྷ་ཎ་ན་ནྟི ཨ་ཊྛ་ཀ་ཐཱ་ཡཾ ཝུ་ཏྟཾ. ཨ་པི་ཙ ནི་ནྡཱ་པ་སཾ་སཱ་སུ ས་ཏྟཱ་ནཾ ཝེ་ནེ་ཡྻཱ་གྷཱ་ཏཱ་ན་ནྡཱ་དི་བྷཱ་ཝ་མ་ནཱ་པ་ཏྟི. ཏ་ཏྠ ཙ ཨ་ནཱ་དཱི་ན་ཝ་ད་སྶ་ནཾ བཱ་ཧི་ར་མ་སཱ་དྷཱ་ར་ཎ་ས་མུ་ཊྛཱ་ན་མེ་ཝ, ཏ་ཐཱ ནི་ནྡཱ་པ་སཾ་སཱ་སུ པ་ཊི་པ་ཛྫ་ན་ཀྐ་མ་སྶ, པ་སཾ་སཱ་ཝི་ས་ཡ་སྶ ཙ ཁུ་དྡ་ཀཱ་དི་ཝ་སེ་ན ཨ་ནེ་ཀ་ཝི་དྷ་སྶ སཱི་ལ་སྶ, ས་བྦ་ཉྙུ་ཏ་ཉྙཱ་ཎ་སྶ ཙ ས་སྶ་ཏཱ་དི་དི་ཊྛི་ཊྛཱ་ནེ, ཏ་དུ་ཏྟ་རི ཙ ཨ་པྤ་ཊི་ཧ་ཏ་ཙཱ་ར་ཏཱ་ཡ, ཏ་ཐཱ་ག་ཏ་སྶ ཙ ཀ་ཏྠ་ཙི་པི བྷ་ཝཱ་དཱི་སུ ཨ་པ་རི་ཡཱ་པ་ནྣ་ཏཱ་ཡ ས་ཏྟཱ་ན་མ་ན་ཝ་བོ་དྷོ་པི བཱ་ཧི་ར་མ་སཱ་དྷཱ་ར་ཎ་ས་མུ་ཊྛཱ་ནཾ.
པ་ཡོ་ཛ་ནམྤི སཱ་དྷཱ་ར་ཎཱ་སཱ་དྷཱ་ར་ཎ་ཏོ དུ་ཝི་དྷཾ. ཏ་ཏྠ སཱ་དྷཱ་ར་ཎཾ ཨ་ནུ་པཱ་དཱ་པ་རི་ནི་བྦཱ་ནཾ ཝི་མུ་ཏྟི་ར་ས་ཏྟཱ ས་བྦཱ་ཡ་པི བྷ་ག་ཝ་ཏོ དེ་ས་ནཱ་ཡ, ཏེ་ནེ་ཝཱ་ཧ ‘‘ཨེ་ཏ་ད་ཏྠཱ ཀ་ཐཱ, ཨེ་ཏ་ད་ཏྠཱ མ་ནྟ་ནཱ’’ཏི་ཨཱ་དི (པ་རི. ༣༦༦) ཨ་སཱ་དྷཱ་ར་ཎཾ པ་ན བཱ་ཧི་ར་ས་མུ་ཊྛཱ་ན་ཏོ ཝི་པ་རི་ཡཱ་ཡེ་ན ཝེ་དི་ཏ་བྦཾ. ནི་ནྡཱ་པ་སཾ་སཱ་སུ ཧི ས་ཏྟཱ་ན་ནྭེ་ནེ་ཡྻཱ་གྷཱ་ཏཱ་ན་ནྡཱ་དི་བྷཱ་ཝ་པྤ་ཏྟི་ཨཱ་དི་ཀཾ ཨི་མི་སྶཱ དེ་ས་ནཱ་ཡ ཕ་ལ་བྷཱུ་ཏཾ ཀཱ་ར་ཎ་བྷཱ་ཝེ་ན ཨི་མཾ དེ་ས་ནཾ པ་ཡོ་ཛེ་ཏི. ཕ་ལ་ཉྷི ཏ་དུ་པྤཱ་ད་ཀ་ས་ཏྟི་ཡཱ ཀཱ་ར་ཎཾ པ་ཡོ་ཛེ་ཏི ནཱ་མ ཕ་ལེ ས་ཏི་ཡེ་ཝ ཏཱ་ཡ ས་ཏྟི་ཡཱ ཀཱ་ར་ཎ་བྷཱ་ཝ་པྤ་ཏྟི་ཏོ. ཨ་ཐ ཝཱ ཡ་ཐཱ་ཝུ་ཏྟཾ ཕ་ལཾ ཨི་མཱ་ཡ དེ་ས་ནཱ་ཡ བྷ་ག་ཝ་ནྟཾ པ་ཡོ་ཛེ་ཏཱི་ཏི ཨཱ་ཙ་རི་ཡ་སཱ་རི་པུ་ཏྟ་ཏྠེ་རེ་ན ཝུ་ཏྟཾ. ཡ་ཉྷི དེ་ས་ནཱ་ཡ སཱ་དྷེ་ཏ་བྦཾ ཕ་ལཾ, ཏཾ ཨཱ་ཀ་ངྑི་ཏ་བྦ་ཏྟཱ དེ་ས་ནཱ་ཡ དེ་ས་ཀཾ པ་ཡོ་ཛེ་ཏི ནཱ་མ. ཨ་པི་ཙ ཀུ་ཧ་ན་ལ་པ་ནཱ་དི་ནཱ་ནཱ་ཝི་དྷ་མི་ཙྪཱ་ཛཱི་ཝ་ཝི་དྡྷཾ་ས་ནཾ, དྭཱ་ས་ཊྛི་དི་ཊྛི་ཛཱ་ལ་ཝི་ནི་ཝེ་ཋ་ནཾ, དི་ཊྛི་སཱི་སེ་ན པ་ཙྩ་ཡཱ་ཀཱ་ར་ཝི་བྷཱ་ཝ་ནཾ, ཚ་ཕ་སྶཱ་ཡ་ཏ་ན་ཝ་སེ་ན ཙ་ཏུ་ས་ཙྩ་ཀ་མྨ་ཊྛཱ་ན་ནི་དྡེ་སོ, ས་བྦ་དི་ཊྛི་ག་ཏཱ་ནཾ ཨ་ན་ཝ་སེ་ས་པ་རི་ཡཱ་དཱ་ནཾ, ཨ་ཏྟ་ནོ ཨ་ནུ་པཱ་དཱ་པ་རི་ནི་བྦཱ་ན་དཱི་པ་ན་ཉྩ པ་ཡོ་ཛ་ན་མེ་ཝ.
བྷཱ་ཛ་ནཾ པ་ན དེ་ས་ནཱ་དྷི་ཊྛཱ་ནཾ. ཡེ ཧི ཝ་ཎྞཱ་ཝ་ཎྞ་ནི་མི་ཏྟ་ཨ་ནུ་རོ་དྷ་ཝི་རོ་དྷ་ཝ་ནྟ་ཙི་ཏྟཱ ཀུ་ཧ་ནཱ་དི་ཝི་ཝི་དྷ་མི་ཙྪཱ་ཛཱི་ཝ་ནི་ར་ཏཱ ས་སྶ་ཏཱ་དི་དི་ཊྛི་པ་ངྐ་ནི་མུ་གྒཱ སཱི་ལ་ཀྑ་ནྡྷཱ་དཱི་སུ ཨ་པ་རི་པཱུ་ར་ཀཱ་རི་ནོ ཨ་བུ་དྡྷ་གུ་ཎ་ཝི་སེ་ས་ཉཱ་ཎཱ ཝེ་ནེ་ཡྻཱ, ཏེ ཨི་མི་སྶཱ དེ་ས་ནཱ་ཡ བྷཱ་ཛ་ནཾ.
པི་ཎྜ་ཏྠོ པ་ན ཨི་དྷ ལ་བྦྷ་མཱ་ན་པ་དེ་ཧི, ས་མུ་དཱ་ཡེ་ན ཙ སུ་ཏྟ་པ་དེ་ན ཡ་ཐཱ་ས་མྦྷ་ཝཾ ས་ངྒ་ཧི་ཏོ ཨ་ཏྠོ. ཨཱ་གྷཱ་ཏཱ་དཱི་ནཾ ཨ་ཀ་ར་ཎཱི་ཡ་ཏཱ་ཝ་ཙ་ནེ་ན ཧི ད་སྶི་ཏཾ པ་ཊི་ཉྙཱ་ནུ་རཱུ་པཾ ས་མ་ཎ་ས་ཉྙཱ་ཡ ནི་ཡོ་ཛ་ནཾ, ཏ་ཐཱ ཁ་ནྟི་སོ་ར་ཙྩཱ་ནུ་ཊྛཱ་ནཾ, བྲ་ཧྨ་ཝི་ཧཱ་ར་བྷཱ་ཝ་ནཱ་ནུ་ཡོ་གོ, ས་དྡྷཱ་པ་ཉྙཱ་ས་མཱ་ཡོ་གོ, ས་ཏི་ས་མྤ་ཛ་ཉྙཱ་དྷི་ཊྛཱ་ནཾ, པ་ཊི་ས་ངྑཱ་ན་བྷཱ་ཝ་ནཱ་བ་ལ་སི་དྡྷི, པ་རི་ཡུ་ཊྛཱ་ནཱ་ནུ་ས་ཡ་པྤ་ཧཱ་ནཾ, ཨུ་བྷ་ཡ་ཧི་ཏ་པ་ཊི་པ་ཏྟི, ལོ་ཀ་དྷ་མྨེ་ཧི ཨ་ནུ་པ་ལེ་པོ ཙ –
པཱ་ཎཱ་ཏི་པཱ་ཏཱ་དཱི་ཧི པ་ཊི་ཝི་ར་ཏི་ཝ་ཙ་ནེ་ན ད་སྶི་ཏཱ སཱི་ལ་ཝི་སུ་དྡྷི, ཏཱ་ཡ ཙ ཧི་རོ་ཏྟ་པྤ་ས་མྤ་ཏྟི, མེ་ཏྟཱ་ཀ་རུ་ཎཱ་ས་མ་ངྒི་ཏཱ, ཝཱི་ཏི་ཀྐ་མ་པྤ་ཧཱ་ནཾ, ཏ་ད་ངྒ་པྤ་ཧཱ་ནཾ, དུ་ཙྩ་རི་ཏ་སཾ་ཀི་ལེ་ས་པྤ་ཧཱ་ནཾ, ཝི་ར་ཏི་ཏྟ་ཡ་སི་དྡྷི, པི་ཡ་མ་ནཱ་པ་ག་རུ་བྷཱ་ཝ་ནཱི་ཡ་ཏཱ་ནི་པྥ་ཏྟི, ལཱ་བྷ་ས་ཀྐཱ་ར་སི་ལོ་ཀ་ས་མུ་དཱ་ག་མོ, ས་མ་ཐ་ཝི་པ་སྶ་ནཱ་ནཾ ཨ་དྷི་ཊྛཱ་ན་བྷཱ་ཝོ, ཨ་ཀུ་ས་ལ་མཱུ་ལ་ཏ་ནུ་ཀ་ར་ཎཾ, ཀུ་ས་ལ་མཱུ་ལ་རོ་པ་ནཾ, ཨུ་བྷ་ཡཱ་ན་ཏྠ་དཱུ་རཱི་ཀ་ར་ཎཾ, པ་རི་སཱ་སུ ཝི་སཱ་ར་ད་ཏཱ, ཨ་པྤ་མཱ་ད་ཝི་ཧཱ་རོ, པ་རེ་ཧི དུ་པྤ་དྷཾ་སི་ཡ་ཏཱ, ཨ་ཝི་པྤ་ཊི་སཱ་རཱ་དི་ས་མ་ངྒི་ཏཱ ཙ –
‘‘ག་མྦྷཱི་རཱ’’ཏི་ཨཱ་དི་ཝ་ཙ་ནེ་ཧི ད་སྶི་ཏཾ ག་མྦྷཱི་ར་དྷ་མྨ་ཝི་བྷཱ་ཝ་ནཾ, ཨ་ལ་བྦྷ་ནེ་ཡྻ་པ་ཏི་ཊྛ་ཏཱ, ཀ་པྤཱ་ན་མ་ས་ངྑྱེ་ཡྻེ་ནཱ་པི དུ་ལླ་བྷ་པཱ་ཏུ་བྷཱ་ཝ་ཏཱ, སུ་ཁུ་མེ་ན་པི ཉཱ་ཎེ་ན པ་ཙྩ་ཀྑ་ཏོ པ་ཊི་ཝི་ཛ྄ཛྷི་ཏུ་མ་ས་ཀྐུ་ཎེ་ཡྻ་ཏཱ, དྷ་མྨ་ནྭ་ཡ་ས་ངྑཱ་ཏེ་ན ཨ་ནུ་མཱ་ན་ཉཱ་ཎེ་ནཱ་པི དུ་ར་དྷི་ག་མ་ནཱི་ཡ་ཏཱ, པ་སྶ་དྡྷ་ས་བྦ་ད་ར་ཐ་ཏཱ, ས་ནྟ་དྷ་མྨ་ཝི་བྷཱ་ཝ་ནཾ, སོ་བྷ་ན་པ་རི་ཡོ་སཱ་ན་ཏཱ, ཨ་ཏི་ཏྟི་ཀ་ར་བྷཱ་ཝོ, པ་དྷཱ་ན་བྷཱ་ཝ་པྤ་ཏྟི, ཡ་ཐཱ་བྷཱུ་ཏ་ཉཱ་ཎ་གོ་ཙ་ར་ཏཱ, སུ་ཁུ་མ་ས་བྷཱ་ཝ་ཏཱ, མ་ཧཱ་པ་ཉྙཱ་ཝི་བྷཱ་ཝ་ནཱ ཙ. དི་ཊྛི་དཱི་པ་ཀ་པ་དེ་ཧི ད་སྶི་ཏཱ ས་མཱ་ས་ཏོ ས་སྶ་ཏ་ཨུ་ཙྪེ་ད་དི་ཊྛི་ཡོ ལཱི་ན་ཏཱ་ཏི་དྷཱ་ཝ་ན་ཝི་བྷཱ་ཝ་ནཾ, ཨུ་བྷ་ཡ་ཝི་ནི་བ་ནྡྷ་ནི་དྡེ་སོ, མི་ཙྪཱ་བྷི་ནི་ཝེ་ས་ཀི་ཏྟ་ནཾ, ཀུ་མྨ་གྒ་པ་ཊི་པ་ཏྟི་པྤ་ཀཱ་ས་ནཾ, ཝི་པ་རི་ཡེ་ས་གྒཱ་ཧ་ཉཱ་པ་ནཾ, པ་རཱ་མཱ་ས་པ་རི་གྒ་ཧོ, པུ་བྦ་ནྟཱ་པ་ར་ནྟཱ་ནུ་དི་ཊྛི་པ་ཏི་ཊྛཱ་པ་ནཱ, བྷ་ཝ་ཝི་བྷ་ཝ་དི་ཊྛི་ཝི་བྷཱ་གཱ, ཏ་ཎྷཱ་ཝི་ཛྫཱ་པ་ཝ་ཏྟི, ཨ་ནྟ་ཝཱ་ན་ནྟ་ཝཱ་དི་ཊྛི་ནི་དྡེ་སོ, ཨ་ནྟ་དྭ་ཡཱ་ཝ་ཏཱ་ར་ཎཾ, ཨཱ་ས་ཝོ་གྷ་ཡོ་ག་ཀི་ལེ་ས་ག་ནྠ་སཾ་ཡོ་ཛ་ནུ་པཱ་དཱ་ན་ཝི་སེ་ས་ཝི་བྷ་ཛ་ན་ཉྩ –
ཏ་ཐཱ ‘‘ཝེ་ད་ནཱ་ནཾ ས་མུ་ད་ཡ’’ནྟི་ཨཱ་དི་ཝ་ཙ་ནེ་ཧི ད་སྶི་ཏཱ ཙ་ཏུ་ནྣ་མ་རི་ཡ་ས་ཙྩཱ་ནཾ ཨ་ནུ་བོ་དྷ་པ་ཊི་བོ་དྷ་སི་དྡྷི, ཝི་ཀྑ་མྦྷ་ན་ས་མུ་ཙྪེ་ད་པྤ་ཧཱ་ནཾ ཏ་ཎྷཱ་ཝི་ཛྫཱ་ཝི་ག་མོ, ས་དྡྷ་མྨ་ཊྛི་ཏི་ནི་མི་ཏྟ་པ་རི་གྒ་ཧོ, ཨཱ་ག་མཱ་དྷི་ག་མ་ས་མྤ་ཏྟི, ཨུ་བྷ་ཡ་ཧི་ཏ་པ་ཊི་པ་ཏྟི, ཏི་ཝི་དྷ་པ་ཉྙཱ་པ་རི་གྒ་ཧོ, ས་ཏི་ས་མྤ་ཛ་ཉྙཱ་ནུ་ཊྛཱ་ནཾ, ས་དྡྷཱ་པ་ཉྙཱ་ས་མཱ་ཡོ་གོ, ཝཱི་རི་ཡ་ས་མ་ཏཱ་ནུ་ཡོ་ཛ་ནཾ, ས་མ་ཐ་ཝི་པ་སྶ་ནཱ་ནི་པྥ་ཏྟི ཙ –
‘‘ཨ་ཛཱ་ན་ཏཾ ཨ་པ་སྶ་ཏ’’ནྟི པ་དེ་ཧི ད་སྶི་ཏཱ ཨ་ཝི་ཛྫཱ་སི་དྡྷི, ཏ་ཐཱ ‘‘ཏ་ཎྷཱ་ག་ཏཱ་ནཾ པ་རི་ཏ་སྶི་ཏ་ཝི་པྥ་ནྡི་ཏ’’ནྟི པ་དེ་ཧི ཏ་ཎྷཱ་སི་དྡྷི, ཏ་དུ་བྷ་ཡེ་ན ཙ ནཱི་ཝ་ར་ཎ་ས་ཉྙོ་ཛ་ན་དྭ་ཡ་སི་དྡྷི, ཨ་ན་མ་ཏ་གྒ་སཾ་སཱ་ར་ཝ་ཊྚཱ་ནུ་པ་ཙྪེ་དོ, པུ་བྦ་ནྟཱ་ཧ་ར་ཎཱ་པ་ར་ནྟཱ་ནུ་ས་ནྡྷཱ་ནཱ་ནི, ཨ་ཏཱི་ཏ་པ་ཙྩུ་པྤ་ནྣ་ཀཱ་ལ་ཝ་སེ་ན ཧེ་ཏུ་ཝི་བྷཱ་གོ, ཨ་ཝི་ཛྫཱ་ཏ་ཎྷཱ་ནཾ ཨ་ཉྙ་མ་ཉྙཱ་ན་ཏི་ཝ་ཏྟ་ནཾ, ཨ་ཉྙ་མ་ཉྙཱུ་པ་ཀཱ་རི་ཏཱ, པ་ཉྙཱ་ཝི་མུ་ཏྟི་ཙེ་ཏོ་ཝི་མུ་ཏྟཱི་ནཾ པ་ཊི་པ་ཀྑ་ནི་དྡེ་སོ ཙ –
‘‘ཏ་ད་པི ཕ་སྶ་པ་ཙྩ་ཡཱ’’ཏི པ་དེ་ན ད་སྶི་ཏཱ ས་སྶ་ཏཱ་དི་པ་ཉྙཱ་པ་ན་སྶ པ་ཙྩ་ཡཱ་དྷཱི་ན་ཝུ་ཏྟི་ཏཱ, ཏེ་ན ཙ དྷ་མྨཱ་ནཾ ནི་ཙྩ་ཏཱ་པ་ཊི་སེ་དྷོ, ཨ་ནི་ཙྩ་ཏཱ་པ་ཏི་ཊྛཱ་པ་ནཾ, པ་ར་མ་ཏྠ་ཏོ ཀཱ་ར་ཀཱ་དི་པ་ཊི་ཀྑེ་པོ, ཨེ་ཝཾ་དྷ་མྨ་ཏཱ་ནི་དྡེ་སོ, སུ་ཉྙ་ཏཱ་པ་ཀཱ་ས་ནཾ ས་མ་ཏྠ་ནི་རཱི་ཧ པ་ཙྩ་ཡ་ལ་ཀྑ་ཎ་ཝི་བྷཱ་ཝ་ན་ཉྩ –
‘‘ཨུ་ཙྪི་ནྣ་བྷ་ཝ་ནེ་ཏྟི་ཀོ’’ཏི་ཨཱ་དི་ནཱ ད་སྶི་ཏཱ བྷ་ག་ཝ་ཏོ པ་ཧཱ་ན་ས་མྤ་ཏྟི, ཝི་ཛྫཱ་ཝི་མུ་ཏྟི་ཝ་སཱི་བྷཱ་ཝོ, སི་ཀྑ་ཏྟ་ཡ་ནི་པྥ་ཏྟི, ནི་བྦཱ་ན་དྷཱ་ཏུ་དྭ་ཡ་ཝི་བྷཱ་གོ, ཙ་ཏུ་ར་དྷི་ཊྛཱ་ན་པ་རི་པཱུ་ར་ཎཾ, བྷ་ཝ་ཡོ་ནི་ཨཱ་དཱི་སུ ཨ་པ་རི་ཡཱ་པ་ནྣ་ཏཱ ཙ –
ས་ཀ་ལེ་ན པ་ན སུ་ཏྟ་པ་དེ་ན ད་སྶི་ཏོ ཨི་ཊྛཱ་ནི་ཊྛེ་སུ བྷ་ག་ཝ་ཏོ ཏཱ་དི་བྷཱ་ཝོ, ཏ་ཏྠ ཙ པ་རེ་སཾ པ་ཏི་ཊྛཱ་པ་ནཾ, ཀུ་ས་ལ་དྷ་མྨཱ་ནཾ ཨཱ་དི་བྷཱུ་ཏ་དྷ་མྨ་དྭ་ཡ་ནི་དྡེ་སོ སི་ཀྑ་ཏྟ་ཡཱུ་པ་དེ་སོ, ཨ་ཏྟ་ནྟ་པཱ་དི་པུ་གྒ་ལ་ཙ་ཏུ་ཀྐ་སི་དྡྷི, ཀ་ཎྷ་ཀ་ཎྷ་ཝི་པཱ་ཀཱ་དི་ཀ་མྨ་ཙ་ཏུ་ཀྐ་ཝི་བྷཱ་གོ, ཙ་ཏུ་ར་པྤ་མ་ཉྙཱ་ཝི་ས་ཡ་ནི་དྡེ་སོ, ས་མུ་ད་ཡ་ཏྠ་ངྒ་མཱ་དི་པ་ཉྩ་ཀ་སྶ ཡ་ཐཱ་བྷཱུ་ཏཱ་ཝ་བོ་དྷོ, ཚ་སཱ་ར་ཎཱི་ཡ་དྷ་མྨ་ཝི་བྷཱ་ཝ་ནཱ, ད་ས་ནཱ་ཐ་ཀ་དྷ་མྨ་པ་ཏི་ཊྛཱ་པ་ན་ནྟི ཨེ་ཝ་མཱ་ད་ཡོ ཡ་ཐཱ་ས་མྦྷ་ཝཾ ས་ངྒ་ཧེ་ཏྭཱ ད་སྶེ་ཏ་བྦཱ ཨ་ཏྠཱ པི་ཎྜ་ཏྠོ.