༢༡. ཨ་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༡. ཡ་སྨིཾ ས་ཏི ཡཾ ཧོ་ཏི, ཨ་ས་ཏི ཙ ན ཧོ་ཏི, སོ ཏ་སྶ པ་ཙྩ་ཡོ་ཏི ཡ་དི་དཾ ས་མཱ་ས་ཏོ པ་ཙྩ་ཡ་ལ་ཀྑ་ཎཾ ཡཾ ས་ནྡྷཱ་ཡ སུ་ཏྟེ ཝུ་ཏྟཾ ‘‘ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྨིཾ ཨ་ས་ཏི ཨི་དཾ ན ཧོ་ཏཱི’’ཏི, ཏ་ཡི་དཾ ཨ་ཏྠི་པ་ཙྩ་ཡེ ཡོ་ཛེ་ཏྭཱ ད་སྶེ་ནྟོ ‘‘ཡོ ཧཱི’’ཏི་ཨཱ་དིཾ ཝ་ཏྭཱ ཨ་ཡ་ཉྩ ན་ཡོ ནི་བྦཱ་ནེ ན ལ་བྦྷ་ཏི, ཏ་སྨཱ ནི་བྦཱ་ནཾ ཨ་ཏྠི་པ་ཙྩ་ཡ་བྷཱ་ཝེ་ན ན ཨུ་དྡྷ་ཊ་ནྟི ད་སྶེ་ཏུཾ ‘‘ནི་བྦཱ་ན་ཉྩ…པེ… ཨུ་པ་ཀཱ་ར་ཀཾ ཧོ་ཏཱི’’ཏི ཨཱ་ཧ. ཏེ་ན པ་ཙྩ་ཡ་དྷ་མྨཱ་ནཾ པ་ཙྩ་ཡ་བྷཱ་ཝོ ཝི་སེ་ས་ཏོ བྱ་ཏི་རེ་ཀ་མུ་ཁེ་ན པཱ་ཀ་ཊོ ཧོ་ཏཱི་ཏི ད་སྶེ་ཏི. ན་ཏྠི་བྷཱ་ཝོ་པ་ཀཱ་ར་ཀ་ཏཱ་ཝི་རུ་དྡྷོཏི ན་ཏྠི་པ་ཙྩ་ཡ་བྷཱ་ཝ་ཝི་རུ་དྡྷོ. ཝི་ག་ཏཱ་ཝི་ག་ཏ་པ་ཙྩ་ཡཱ ཝི་ཡ ཧི ཨ་ཉྙ་མ་ཉྙཾ ཨུ་ཛུ་པ་ཙྩ་ནཱི་ཀ་བྷཱ་ཝེ་ན ཋི་ཏཱ ན་ཏྠི་ཨ་ཏྠི་པ་ཙྩ་ཡཱ. ན ནི་བྦཱ་ནཾ ཨ་ཏྠི་པ་ཙྩ་ཡོ ན་ཏྠི་བྷཱ་ཝོ་པ་ཀཱ་ར་ཀ་ཏཱ་ཨ་ཝི་རོ་དྷ་ཏོ. ཡེ ཧི ཨ་ཏྠི་པ་ཙྩ་ཡ་དྷ་མྨཱ, ཏེ ན་ཏྠི་བྷཱ་ཝོ་པ་ཀཱ་ར་ཀ་ཏཱ་ཝི་རུ་དྡྷཱ ཨེ་ཝ དི་ཊྛཱ་ཏི ཨ་དྷི་པྤཱ་ཡོ.

ས་ཏི ཙ ཨུ་པྤ་ནྣ་ཏྟེ་ཏི ས་མྦ་ནྡྷོ. ཡེ་སཾ པ་ཙྩ་ཡཱ ཧོ་ནྟི ཨཱ་ཧཱ་རི་ནྡྲི་ཡཱ་ཏི ཡོ་ཛ་ནཱ. ཨེ་ཀ་ཏོཏི ས་ཧ. ས་ཧ་ཛཱ་ཏཱ་དི་པ་ཙྩ་ཡ་ཏྟཱ་བྷཱ་ཝ་ཏོཏི ས་ཧ་ཛཱ་ཏ་པུ་རེ་ཛཱ་ཏ་པ་ཙྪཱ་ཛཱ་ཏ་པ་ཙྩ་ཡ་ཏྟཱ་བྷཱ་ཝ་ཏོ. ཏ་ད་བྷཱ་ཝོཏི ས་ཧ་ཛཱ་ཏཱ་དི་པ་ཙྩ་ཡ་ཏྟཱ་བྷཱ་ཝོ. ཨེ་ཏེ་སནྟི ཨ་ཏྠི་པ་ཙྩ་ཡ་ཏཱ་ཝ་སེ་ན པ་ཝ་ཏྟ་མཱ་ནཱ་ནཾ ཨཱ་ཧཱ་རི་ནྡྲི་ཡཱ་ནཾ. དྷ་མྨ་ས་བྷཱ་ཝ་ཝ་སེ་ནཱཏི དྷ་མྨ་ཏཱ་ཝ་སེ་ན. དྷ་མྨ་ཏཱ ཧེ་སཱ, ཡ་དི་དཾ པ་ཙྩ་ཡུ་པྤ་ནྣེ་ཧི ས་ཧ པུ་རེ་ཏ་རཾ པ་ཙྪཱ ཙ ལ་བྦྷ་མཱ་ནཱ ཨཱ་ཧཱ་རི་ནྡྲི་ཡཱ ཏེ་སཾ ཨ་ཏྠི་པ་ཙྩ་ཡཱ ཧོ་ནྟི, ན ས་ཧ་ཛཱ་ཏཱ་དི་པ་ཙྩ་ཡཱ་ཏི. ཡ་ཐཱ ཝཱ ཙ་ཀྑཱ་དི་དྭཱ་རཱ་ནཾ རཱུ་པཱ་དི་ཨཱ་ར་མྨ་ཎཱ་ནཾ ས་ཏི་པི ནི་ཡ་ཏ་ཝུ་ཏྟི་ཏཱ་ཡ དྭཱ་རཱ་ར་མྨ་ཎ་ཏོ ཝི་ཉྙཱ་ཎ་སྶ ཚ་བྦི་དྷ་བྷཱ་ཝེ ཨཱ་ར་མྨ་ཎ་མ་ནཱ་མ་སི་ཏྭཱ, དྭཱ་ར་ཏོ དྭཱ་ར་མ་ནཱ་མ་སི་ཏྭཱ ཨཱ་ར་མྨ་ཎ་ཏོ ཚ་བྦི་དྷ་ཏཱ ཝུ་ཙྩ་ཏི, ཨེ་ཝ་མི་དྷཱ་པི ཨཱ་ཧཱ་རི་ནྡྲི་ཡཱ་ནཾ པ་ཙྩ་ཡུ་པྤ་ནྣེ་ཧི ས་ཏི་པི ས་ཧ་ཛཱ་ཏཱ་དི་བྷཱ་ཝེ ཨ་རཱུ་པ་ཀྑ་ནྡྷཱ་དི་ཝ་སེ་ན ས་ཧ་ཛཱ་ཏཱ་དི་བྷེ་ད་བྷི་ནྣ་སྶ ཨ་ཏྠི་པ་ཙྩ་ཡ་སྶ ད་སྶི་ཏ་ཏྟཱ པ་ཉྷཱ་ཝཱ་རེ ཨཱ་ཧཱ་རི་ནྡྲི་ཡཱ་ནཾ ཝ་སེ་ན ཨཱ་ག་ཏེ ཙ་ཏུ་ཏྠ་པ་ཉྩ་མ་ཀོ་ཊྛཱ་ས་བྷཱུ་ཏེ ཨ་ཏྠི་པ་ཙྩ་ཡ་ཝི་སེ་སེ ས་ཧ་ཛཱ་ཏཱ་དི་བྷེ་དཾ ཨཱ་མ་སི་ཏུཾ ན ལ་བྦྷ་ཏཱི་ཏི ད་སྶེ་ཏུཾ ཨ་ཊྛ་ཀ་ཐཱ་ཡཾ ‘‘ཨཱ་ཧཱ་རོ ཨི་ནྡྲི་ཡ་ཉྩ ས་ཧ་ཛཱ་ཏཱ་དི་བྷེ་དཾ ན ལ་བྷ་ཏཱི’’ཏི ཝུ་ཏྟཾ, ན པ་ན ཨཱ་ཧཱ་རི་ནྡྲི་ཡེ་སུ ས་ཧ་ཛཱ་ཏཱ་དི་བྷཱ་ཝ་སྶ ཨ་བྷཱ་ཝ་ཏོ. ཨེ་ཝ་མྤེ་ཏྠ ཨ་ཏྠོ ད་ཊྛ་བྦོ.

ཨ་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.