༩. ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ

༩. ཨུ་པ་ནི་སྶ་ཡེ ཏ་ཡོཏི ཨ་ན་ནྟ་རཱ་ར་མྨ་ཎ་པ་ཀ་ཏཱུ་པ་ནི་སྶ་ཡ་པྤ་བྷེ་དེ ཏ་ཡོ ཨུ་པ་ནི་སྶ་ཡེ. ཨ་ནེ་ཀ་ས་ངྒཱ་ཧ་ཀ་ཏཱ་ཡཱཏི ཨ་ནེ་ཀེ་སཾ པ་ཙྩ་ཡ་དྷ་མྨཱ་ནཾ ས་ངྒ་ཧ་ཎ་ཏོ. ཨེ་ཀ་ནྟེ་ནེ་ཝ ཧོ་ནྟི ཙི་ཏྟ་ནི་ཡ་མ་ཧེ་ཏུ་བྷཱ་ཝེ་ན པ་ཝ་ཏྟི་ནི་ཡ་མ་ཏོ. ཡེ་སུ པ་དེ་སཱུཏི ཡེ་སུ ཀུ་ས་ལཱ་དི་པ་དེ་སུ. ས་ངྒ་ཧི་ཏོཏི ས་ངྒ་ཧཾ ག་ཏོ, ཀུ་ས་ལཱ་དི་པ་དེ་སུ ཡེ་སཾ པ་དཱ་ནཾ་ཡེ་ཝ ཨ་ན་ནྟ་རཱུ་པ་ནི་སྶ་ཡོ ལ་བྦྷ་ཏཱི་ཏི ཨ་ཏྠོ. ཏེ་སུ ‘‘ཀེ་ས་ཉྩཱི’’ཏི ན ཝུ་ཏྟཾ. ཀ་སྨཱ? ན ས་ཀྐཱ ཝ་ཏྟུཾ ཨེ་ཀ་ནྟེ་ནེ་ཝ ཨུ་པ་ལ་བྦྷ་ན་ཏོ. ཏེ་སཱུཏི ཀུ་ས་ལཱ་ཀུ་ས་ལ་པ་དེ་སུ. ན ཧི ཀུ་ས་ལོ ཨ་ཀུ་ས་ལ་སྶ ཨ་ན་ནྟ་རཱུ་པ་ནི་སྶ་ཡོ ཧོ་ཏི, ཨ་ཀུ་ས་ལོ ཝཱ ཀུ་ས་ལ་སྶ, ཨཱ་ར་མྨ་ཎ་པ་ཀ་ཏཱུ་པ་ནི་སྶ་ཡཱ པ་ན ཨ་ནེ་ཀ་ནྟི་ཀཱ, ཏ་སྨཱ ཏ་ཏྠ ‘‘ཀེ་ས་ཉྩཱི’’ཏི ཝུ་ཏྟཾ. སི་དྡྷཱ་ནཾ པ་ཙྩ་ཡ་དྷ་མྨཱ་ནནྟི པ་ཙྩ་ཡ་བྷཱ་ཝེ་ན པུ་རི་མ་ནི་པྥ་ནྣཱ་ནཾ ཀུ་ས་ལཱ་དཱི་ནཾ ཀུ་ས་ལ་སྶ ཨ་ཀུ་ས་ལ་སྶ ཝཱ་ཏི ཨ་ཏྠོ. ཨ་ཀུ་ས་ལཱ་དཱི་ཧཱིཏི ཡ་ཐཱ་ས་ངྑྱཾ ཨ་ཀུ་ས་ལེ་ན ཀུ་ས་ལེ་ན ཝཱ. ཨ་ཝི་སེ་སེ་ནཱཏི ཡ་ཐཱ་ཝུ་ཏྟ་ཝི་སེ་སེ ནི་ཡ་མཾ ཨ་གྒ་ཧེ་ཏྭཱ ཨ་ཀུ་ས་ལཱ་དཱི་སུ ཨ་ཀུ་ས་ལ་ཀུ་ས་ལཱ་ནཾ ‘‘ཀེ་ས་ཉྩཱི’’ཏི་ཨཱ་དི་ནཱ.

ཨ་ནཱ་ར་མྨ་ཎ་ཏྟཱ ཨཱ་ར་མྨ་ཎཱུ་པ་ནི་སྶ་ཡཾ པུ་བྦཱ་པ་ར་ནི་ཡ་མེ་ན ཨ་པྤ་ཝ་ཏྟི་ཏོ ཨ་ན་ནྟ་རཱུ་པ་ནི་སྶ་ཡཾ ན ལ་བྷ་ཏཱི་ཏི ཡོ་ཛ་ནཱ. པ་ཀ་ཏ་སྶཱཏི ནི་པྥཱ་དི་ཏ་སྶ, ཨུ་པ་སེ་ཝི་ཏ་སྶ ཝཱ. ན ཧི རཱུ་པ་ས་ནྟཱ་ན་སྶ ས་དྡྷཱ་དི་ནི་པྥཱ་ད་ནཾ ཨ་ཏྠི, ཨུ་ཏུ་བྷོ་ཛ་ནཱ་དི་ཨུ་པ་སེ་ཝ་ནཾ ཝཱ ས་མྦྷ་ཝ་ཏི. ཏེ་ནཱ་ཧ ‘‘ཡ་ཐཱ ཧི…པེ… རཱུ་པ་ས་ནྟཱ་ནེ་ནཱ’’ཏི. ན་ནུ ཙ རཱུ་པ་ས་ནྟཱ་ནེ པུ་བྦེ་ནཱ་པ་རཾ ཝི་སེ་སོ ལ་བྦྷ་ཏི, སོ ཙ ན ཝི་ནཱ ས་མཱ་ན་ཛཱ་ཏི་ཡེ་ན ཀཱ་ར་ཎེ་ནཱ་ཏི སྭཱ་ཡཾ པ་ཀ་ཏཱུ་པ་ནི་སྶ་ཡ་ལཱ་བྷོ་ཏི ཀ་དཱ་ཙི ཨཱ་ས་ངྐེ་ཡྻཱ་ཏི ཨཱ་ཧ ‘‘ཡ་སྨི་ཉྩཱ’’ཏི་ཨཱ་དི. ཏ་ཏྠ ཏནྟི ཨུ་ཏུ་བཱི་ཛཱ་དི་ཀཾ ཀ་མྨཱ་དི ཙ ཏེ་ན རཱུ་པེ་ན པུ་རི་མ་ནི་པྥ་ནྣེ་ན. ཨུ་པྤཱ་ད་ནཾ སཱ་བྷི་ས་ནྡྷི་ཀཾ ད་ཊྛ་བྦཾ. ཨ་དྷི་པ་ཏཱི་སུ པུ་བྦཱ་བྷི་ས་ངྑཱ་རོ ཝི་ཡ པ་ཀ་པྤ་ནཾ སཾ་ཝི་ད་ཧ་ནཾ. པ་ཀ་ར་ཎཾ ཝུ་ཏྟ་ལ་ཀྑ་ཎེ་ན ཀཱ་ར་ཎ་བྷཱ་ཝེ་ན ཨ་ཝ་ཊྛཱ་ནཾ, ཡ་ཏོ ཀཱ་ར་ཎ་ཝི་སེ་སོ ‘‘པ་ཀ་ཏཱི’’ཏི ཝུ་ཙྩ་ཏི. ཡ་དི ཨེ་ཝཾ ཀ་སྨཱ རཱུ་པ་སྶེ་ཝ ཏཾ པ་ཊི་ཀྑི་པཱི་ཡ་ཏཱི་ཏི ཨཱ་ཧ ‘‘ཡ་ཐཱ ཙ…པེ… ད་ཊྛ་བྦཱ’’ཏི. ཨེ་ཝ་མྤི ཨུ་ཏུ་བཱི་ཛཱ་དཱི་ནཾ ཨ་ངྐུ་རཱ་དཱི་སུ ཀ་ཐཾ པ་ཙྩ་ཡ་ཝི་སེ་ས་བྷཱ་ཝོ་ཏི ཨཱ་ཧ ‘‘ཨུ་ཏུ་བཱི་ཛཱ་ད་ཡོ པ་ན…པེ… བྷཱ་ཝ་ཏོ’’ཏི. ཨུ་པ་ནི་སྶ་ཡོ་ཏི ཙ ཡ་སྨཱ བ་ལ་ཝ་ཏཱ་ཀཱ་ར་ཎཾ ཨ་དྷི་པྤེ་ཏཾ, ཏ་སྨཱ ན ཨེ་ཏྠ ཨེ་ཀ་ནྟེ་ན པུ་རི་མ་ནི་པྥ་ཏྟི ཨི་ཙྪི་ཏ་བྦཱ. ཡ་དི ཨེ་ཝཾ པཱ་ལི༹་ཡཾ ཀ་ཐཾ པུ་རི་མ་གྒ་ཧ་ཎ་ནྟི ཨཱ་ཧ ‘‘པུ་རི་མ་པུ་རི་མཱ་ནཾ་ཡེ་ཝ པ་ནཱ’’ཏི་ཨཱ་དི. ཏེ་པི ཝཱ པ་རི་ཀ་པྤ་ན་ཝ་སེ་ན པུ་རི་མ་ནི་པྥ་ནྣཱ་ཡེ་ཝ ནཱ་མ ཧོ་ནྟི. ན ཧི ཨ་སཾ་ཝི་དི་ཏཱ་ཀཱ་རེ ཝ་ཏྠུ་སྨིཾ པ་ཏྠ་ནཱ་པ་ཝ་ཏྟཱི་ཏི. ཏེ་ནཱ་ཧ ‘‘ཏཾ་ས་མཱ་ན་ལ་ཀྑ་ཎ་ཏཱ་ཡཱ’’ཏི.

དྷ་མྨེཏི པུ་གྒ་ལ་སེ་ནཱ་ས་ན་པ་ཉྙ་ཏྟཱི་ནཾ ཨུ་པཱ་དཱ་ན་བྷཱུ་ཏེ དྷ་མྨེ. ཨ་ཡཾ ན་ཡོཏི པ་ཉྙ་ཏྟི་མུ་ཁེ་ན པ་ཉྙ་པེ་ཏ་བྦཱ ཏ་དུ་པཱ་དཱ་ན་བྷཱུ་ཏཱ དྷ་མྨཱ ག་ཡ྄ཧ་ནྟཱི་ཏི ཡ་ཐཱ་ཝུ་ཏྟོ ན་ཡོ. ཨེ་ཏྠེ་ཝཱཏི ‘‘སེ་ནཱ་ས་ན་མྤི ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི ཨེ་ཏ་སྨིཾ་ཡེ་ཝ ཝ་ཙ་ནེ. ཀ་ཐཾ པ་ཙྩུ་པྤ་ནྣ་སྶ པ་ཀ་ཏཱུ་པ་ནི་སྶ་ཡ་བྷཱ་ཝོ་ཏི ཙོ་ད་ནཱ་ཡ ‘‘ཝ་ཀྑ་ཏཱི’’ཏི་ཨཱ་དི་ནཱ ཨཱ་ག་མཾ ད་སྶེ་ཏྭཱ ཡུ་ཏྟིཾ ད་སྶེ་ཏུཾ ‘‘པ་ཙྩུ་པྤ་ནྣཱ་ན་མྤི་ཙ ཏཱ་དི་སཱ་ནཾ པུ་བྦེ པ་ཀ་ཏ་ཏྟཱ’’ཏི ཝུ་ཏྟཾ. ཏཱ་དི་སཱ་ནནྟི ཡཱ་དི་སཱ ཨུ་ཏུ་ཨཱ་ད་ཡོ པ་ཙྩུ་པ་ཊྛི་ཏཱ, ཏཱ་དི་སཱ་ནཾ ཏ་ཏོ པུ་བྦེ པུ་རེ་ཏ་རཾ པ་ཀ་ཏ་ཏྟཱ པ་ཀ་ཏཱུ་པ་ནི་སྶ་ཡ་ཡོ་གྱ་ཏཱ་ཡ ཨཱ་པཱ་དི་ཏ་ཏྟཱ.

ཀ་སི་ཎཱ་དཱི་ན་མྤི ཨཱ་ར་མྨ་ཎཱུ་པ་ནི་སྶ་ཡ་ཏཱ ས་མྦྷ་ཝ་ཏཱི་ཏི ཀ་ཏྭཱ ཝུ་ཏྟཾ ‘‘ཨི་མི་ནཱ ཨ་དྷི་པྤཱ་ཡེ་ན ‘ཨེ་ཀ་ཙྩཱ་ཡཱ’ཏི ཨཱ་ཧཱ’’ཏི. ཏ་ཐཱ ཧི ‘‘ཀ་སི་ཎ་མ་ཎྜ་ལཾ དི་སྭཱ’’ཏི་ཨཱ་དི་ནཱ ཏ་སྶ ཨུ་པ་ནི་སྶ་ཡ་བྷཱ་ཝོ ཨ་ཊྛ་ཀ་ཐཱ་ཡཾ ཝུ་ཏྟོ.

ཨ་རཱུ་པཱ་ཝ་ཙ་ར་ཀུ་ས་ལ་མྤི ཨུ་པ་ནི་སྶ་ཡོ ཧོ་ཏི, པ་གེ་ཝ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་ནྟི ཨ་དྷི་པྤཱ་ཡོ. ཏཾ པ་ན ཡ་ཐཱ ཨུ་པ་ནི་སྶ་ཡོ ཧོ་ཏི, ཏཾ ད་སྶེ་ཏུཾ ‘‘ཡ་སྨིཾ ཀ་སི་ཎཱ་དི་མྷཱི’’ཏི་ཨཱ་དི ཝུ་ཏྟཾ. ཨ་ནུ་པྤ་ནྣ་ཛྷཱ་ནུ་པྤཱ་ད་ནེཏི རཱུ་པཱ་ཝ་ཙ་ར་ཛ྄ཛྷཱ་ནཾ ས་ནྡྷཱ་ཡཱ་ཧ, ཨ་རཱུ་པཱ་ཝ་ཙ་ར་ཛ྄ཛྷཱ་ནེ པ་ན ཝ་ཏྟ་བྦ་མེ་ཝ ན་ཏྠི. ཏ་དུ་པྤཱ་ད་ཀ་ཀུ་ས་ལཱ་ནནྟི ཏ་སྶ རཱུ་པཱ་ཝ་ཙ་ར་ཝི་པཱ་ཀ་སྶ ཨུ་པྤཱ་ད་ཀ་ཀུ་ས་ལཱ་ནཾ, རཱུ་པཱ་ཝ་ཙ་ར་ཀུ་ས་ལཱ་ན་ནྟི ཨ་ཏྠོ. པ་ཊི་ས་ནྡྷི་ནི་ཡཱ་མ་ཀ་སྶཱཏི རཱུ་པཱ་ཝ་ཙ་ར་པ་ཊི་ས་ནྡྷི་ནི་ཡཱ་མ་ཀ་སྶ. ཙུ་ཏི་ཏོཏི རཱུ་པཱ་ཝ་ཙ་ར་པ་ཊི་ས་ནྡྷི་ཡཱ ཨ་ན་ནྟ་ར་པ་ཙྩ་ཡ་བྷཱུ་ཏཱ་ཡ ཙུ་ཏི་ཡཱ. པུ་རི་མ་ཛ་ཝ་ན་སྶ ཝ་སེ་ནཱཏི ཙུ་ཏི་ཡཱ ཨཱ་ས་ནྣ་ཛ་ཝ་ན་བྷཱ་ཝེ་ན. རཱུ་པཱ་ཝ་ཙ་ར་ཀུ་ས་ལཾ ཨ་རཱུ་པཱ་ཝ་ཙ་ར་ཝི་པཱ་ཀ་སྶཱཏི ཨེ་ཏྠཱ་པི ‘‘ཏ་དུ་པྤཱ་ད་ཀ་ཀུ་ས་ལཱ་ན’’ནྟི་ཨཱ་དི་ནཱ ཨཱ་ནེ་ཏྭཱ ཡོ་ཛེ་ཏ་བྦཾ. ཡ་ཐཱ ཙ ‘‘རཱུ་པཱ་ཝ་ཙ་ར་ཀུ་ས་ལཾ ཨ་རཱུ་པཱ་ཝ་ཙ་ར་ཝི་པཱ་ཀ་སྶ ཨུ་པ་ནི་སྶ་ཡོ’’ཏི ཝུ་ཏྟཾ, ཨེ་ཝཾ ‘‘ཀཱ་མཱ་ཝ་ཙ་ར་ཀུ་ས་ལ་མྤི ཏ་དུ་པྤཱ་ད་ཀ་ཀུ་ས་ལཱ་ན’’ནྟི་ཨཱ་དི་ནཱ ཡོ་ཛེ་ཏ་བྦཾ. ལོ་ཀུ་ཏྟ་ར་ཝི་པཱ་ཀ་སྶ ཏེ་བྷཱུ་མ་ཀ་ཀུ་ས་ལཱ་ན་མྤི པཱ་ད་ཀཱ་དི་ཝ་སེ་ན ཨུ་པ་ནི་སྶ་ཡ་བྷཱ་ཝོ པཱ་ཀ་ཊོ་ཡེ་ཝ, ཏ་ཐཱ ཏཾ་ཏཾ་བྷཱུ་མ་ཀ་ཀུ་ས་ལཱ་ནཾ ཏཾ་ཏཾ་བྷཱུ་མ་ཀ་ཀི་རི་ཡཱ་ནཾ, ཀཱ་མཱ་ཝ་ཙ་ར་ཀུ་ས་ལ་སྶ རཱུ་པཱ་རཱུ་པཱ་ཝ་ཙ་ར་ཀི་རི་ཡཱ་ནཾ, རཱུ་པཱ་ཝ་ཙ་ར་ཀུ་ས་ལ་སྶ ཨ་རཱུ་པཱ་ཝ་ཙ་ར་ཀི་རི་ཡཱ་ཡ ཨུ་པ་ནི་སྶ་ཡ་བྷཱ་ཝོ་ཏི ཨི་མ་མ་ཏྠཾ ད་སྶེ་ནྟོ ‘‘ཨེ་ཝཾ པ་ཙྩེ་ཀཾ…པེ… ཝེ་དི་ཏ་བྦོ’’ཏི ཨཱ་ཧ. ‘‘ས་དྡྷཾ ཨུ་པ་ནི་སྶཱ་ཡ དཱ་ནཾ དེ་ཏཱི’’ཏི་ཨཱ་དི་ནཱ པ་ཀ་ཏཱུ་པ་ནི་སྶ་ཡོ ཨུ་དྡེ་ས་ཝ་སེ་ནེ་ཝ པཱ་ཋོ ཨཱ་ག་ཏོ, ན ཝི་བྷ་ཛ་ན་ཝ་སེ་ནཱ་ཏི ཨཱ་ཧ ‘‘པཱ་ལི༹་ཡ་མྤི…པེ… ཝི་སྶ་ཛྫི་ཏོ’’ཏི. ཀུ་ས་ལ་ཏྟི་ཀཱ་དཱི་སུ ཨ་ནུ་ལོ་མཱ་དི་བྷེ་ད་བྷི་ནྣ་ཏྟཱ པ་ཉྷཱ་ཝཱ་རེ་སཱུཏི བ་ཧུ་ཝ་ཙ་ན་ནི་དྡེ་སོ.

ལོ་ཀུ་ཏྟ་ར་ནི་བྦ་ཏྟ་ནཾ ཨུ་པ་ནི་སྶཱ་ཡ པ་ར་སྶ སི་ནེ་ཧུ་པྤཱ་ད་ནེ ལོ་ཀུ་ཏྟ་ར་དྷ་མྨཱ ཨུ་པ་ནི་སྶ་ཡོ ཝི་ཡ ཧོ་ནྟཱི་ཏི ཨ་ཡ་མེ་ཏྠ ལེ་སོ, བྷཱ་ཝི་ནོ པ་ན ལོ་ཀུ་ཏྟ་ར་སྶ ཨ་ཀུ་ས་ལཱ་ནཾ ཨུ་པ་ནི་སྶ་ཡ་ཏཱ ས་མྦྷ་ཝ་ཏཱི་ཏི ཨཱ་ཧ ‘‘ན ཨི་དཾ སཱ་ར་ཏོ ད་ཊྛ་བྦ་ནྟི ཨ་དྷི་པྤཱ་ཡོ’’ཏི. རཱུ་པཱ་ཝ་ཙ་རཱ་དི་ཀུ་ས་ལཱ་ནནྟི རཱུ་པཱ་རཱུ་པཱ་ཝ་ཙ་ར་ལོ་ཀུ་ཏྟ་ར་ཀུ་ས་ལཱ་ནཾ ཨུ་པྤཱ་དི་ཡ་མཱ་ན་སྶ རཱུ་པཱ་ཝ་ཙ་ར་ཀུ་ས་ལ་སྶཱ་ཏི ཡོ་ཛ་ནཱ. རཱུ་པཱ་ཝ་ཙ་ར་ཀི་རི་ཡ་སྶ ཙ ཨ་རཱུ་པཱ་ཝ་ཙ་ར་ཝི་པཱ་ཀོ ཨུ་པ་ནི་སྶ་ཡོ ཀ་ཐ་ནྟི ཨཱ་ཧ ‘‘པུ་བྦེ ནི་ཝུ་ཏྠཱ་དཱི་སུ…པེ… ཨ་ར་ཧ་ཏོ’’ཏི. ཏཾ ཏཾ ཝི་པཱ་ཀཾ པ་ཏྠེ་ནྟོ ཏ་སྶ ཏ་སྶ ཝི་པཱ་ཀ་སྶ ཧེ་ཏུ་བྷཱུ་ཏཾ ཀུ་ས་ལཾ ནི་བྦ་ཏྟེ་ཏཱི་ཏི ཝི་པཱ་ཀཱ་ནཾ ཀུ་ས་ལཱུ་པ་ནི་སྶ་ཡ་ཏཱ་ཏི ཨཱ་ཧ ‘‘ཙ་ཏུ་བྷཱུ་མ་ཀཱ…པེ… ཨུ་པ་ནི་སྶ་ཡོ’’ཏི. ལོ་ཀི་ཡ་ཀུ་ས་ལཱ་ནཾ པ་ན ལོ་ཀུ་ཏྟ་ར་ཝི་པཱ་ཀཱ ཨུ་པ་ནི་སྶ་ཡོ ན ཧོ་ནྟཱི་ཏི ད་སྶེ་ནྟོ ‘‘ཡ་དི་པཱི’’ཏི་ཨཱ་དི་མཱ་ཧ. ཏེ་ནེ་ཝ ཧི ‘‘ཏ་ཐཱ ཏེ་བྷཱུ་མ་ཀ་ཝི་པཱ་ཀོ’’ཏི ཏེ་བྷཱུ་མ་ཀ་གྒ་ཧ་ཎཾ ཀ་ཏཾ. ཏ་ཏྠ ཏེ་ནཱཏི ཨ་ནཱ་གཱ་མི་ནཱ. ཏནྟི ཨ་ར་ཧ་ཏྟ་ཕ་ལཾ. ཏ་སྨཱཏི ཨ་དི་ཊྛ་པུ་བྦ་ཏྟཱ. ཏཱ་ནི ཝི་ཡཱཏི སོ་ཏཱ་པ་ཏྟི་ཕ་ལཱ་ནི ཝི་ཡ. ཏེ་སནྟི པུ་ཐུ་ཛྫ་ནཱ་དཱི་ནཾ. ཨི་མ་སྶཱཏི ཨ་ནཱ་གཱ་མི་ནོ. ཨི་དཾ ཝུ་ཏྟཾ ཧོ་ཏི – ཡ་ཐཱ པུ་ཐུ་ཛྫ་ནཱ་དཱི་ནཾ ས་ནྟཱ་ནེ ཛྷཱ་ནཱ་དཱི་ནཾ སོ་ཏཱ་པ་ཏྟི་ཕ་ལཱ་དཱི་ནཾ ན ཨུ་པ་ནི་སྶ་ཡ་པ་ཙྩ་ཡོ ཨ་ནུ་པ་ལ་དྡྷ་པུ་བྦ་ཏྟཱ, ཨེ་ཝཾ ཨ་ནཱ་གཱ་མི་ནོ ཛྷཱ་ནཱ་དཱི་ནཾ ཨ་གྒ་ཕ་ལཾ ཨུ་པ་ནི་སྶ་ཡ་པ་ཙྩ་ཡོ ཨ་དི་ཊྛ་པུ་བྦ་ཏྟཱ. ཏེ་ནཱ་ཧ ‘‘ཨུ་པ་ལ་དྡྷ་པུ་བྦ་ས་དི་ས་མེ་ཝ ཧི ཨ་ནཱ་ག་ཏ་མྤི ཨུ་པ་ནི་སྶ་ཡོ’’ཏི. ཨ་ཊྛ་ཀ་ཐཱ་ཡཾ པ་ན ཧེ་ཊྛི་མ་ཕ་ལཱ་ནཾ ཀུ་ས་ལཱུ་པ་ནི་སྶ་ཡ་ཏཱ ཝུ་ཏྟཱ ཨེ་ཝ.

ཡ་ཐཱ ཝི་པཱ་ཀཱ ཀུ་ས་ལཱ་ནཾ, ཨེ་ཝཾ ཀི་རི་ཡཱ་པི ཏེ་སཾ ཨུ་པ་ནི་སྶ་ཡོ ཧོ་ཏཱི་ཏི ཏཾ ན་ཡཾ ད་སྶེ་ཏུཾ ‘‘ཀི་རི་ཡཾ ཨ་ཏྠ་པ་ཊི་ས་མྦྷི་དཱ་དི’’ནྟི་ཨཱ་དི ཝུ་ཏྟཾ. ཡོ་ནི་སོ་མ་ན་སི་ཀཱ་རེ ཝ་ཏྟ་བྦ་མེ་ཝ ན་ཏྠཱིཏི ཙ་ཏུ་བྷཱུ་མ་ཀ་ཀུ་ས་ལ་སྶ་པི ཡོ་ནི་སོ་མ་ན་སི་ཀཱ་རོ ཨུ་པ་ནི་སྶ་ཡོ ཧོ་ཏཱི་ཏི ཨེ་ཏྠ ཝ་ཏྟ་བྦ་མེ་ཝ ན་ཏྠི, ཏ་ད་ཏྠཾ ཡོ་ནི་སོ་མ་ན་སི་ཀཱ་རཾ པ་ཝ་ཏྟེ་ནྟ་སྶཱ་ཏི ཨ་ཏྠོ. ཏནྟི ཡོ་ནི་སོ་མ་ན་སི་ཀཱ་རཾ. ཨ་ཀུ་ས་ལ་སྶ ཙ ཙ་ཏུ་བྷཱུ་མ་ཀ་ཝི་པཱ་ཀ་སྶ ཨུ་པ་ནི་སྶ་ཡོ ཡོ་ནི་སོ་མ་ན་སི་ཀཱ་རོ་ཏི ཡོ་ཛ་ནཱ. ཨེ་ཝཾ ཀི་རི་ཡ་སྶ་པཱིཏི ཡ་ཐཱ ཀུ་ས་ལ་སྶ ཡོ་ནི་སོ་མ་ན་སི་ཀཱ་ར་སྶ ཝ་སེ་ན ཨུ་པ་ནི་སྶ་ཡོ ཝུ་ཏྟོ, ཨེ་ཝཾ ཀི་རི་ཡ་སྶ་པི ཡོ་ནི་སོ་མ་ན་སི་ཀཱ་ར་སྶ ཝ་སེ་ན ཡོ་ཛེ་ཏ་བྦ་ནྟི ཨ་ཏྠོ. སོ ཧི ཏཾ ཨུ་པ་ནི་སྶཱ་ཡ རཱ་གཱ་དི་ཨུ་པྤཱ་ད་ནེ ཨ་ཀུ་ས་ལ་སྶ ཝུ་ཏྟ་ན་ཡེ་ན ཀུ་ས་ལཱ་ཀུ་ས་ལཱུ་པ་ནི་སྶ་ཡ་བྷཱ་ཝ་མུ་ཁེ་ན ཙ་ཏུ་བྷཱུ་མ་ཀ་ཝི་པཱ་ཀ་སྶ ཨུ་པ་ནི་སྶ་ཡོ ཧོ་ཏི་ཡེ་ཝ. ཡ་དི ཀི་རི་ཡ་ས་ངྑཱ་ཏོ…པེ… ཧོ་ཏི་ཡེ་ཝ, ཨ་ཐ ཀ་སྨཱ པ་ཀ་ཏཱུ་པ་ནི་སྶ་ཡ་ཝི་བྷ་ཛ་ནེ ཀི་རི་ཡཱ ན ག་ཧི་ཏཱ, ཨུ་ཏུ་བྷོ་ཛ་ན་སེ་ནཱ་ས་ནཱ་ནི་ཡེ་ཝ ག་ཧི་ཏཱ་ནཱི་ཏི ཨཱ་ཧ ‘‘ནེ་ཝ་ཝི་པཱ་ཀ་ན་ཝི་པཱ་ཀ་དྷ་མྨ་དྷ་མྨེ་སུ…པེ… ན་ཡ་ད་སྶ་ན་མ་ཏྟ་མེ་ཝཱ’’ཏི. ཨེ་ཝ་མཱ་དི་ཀནྟི ཨཱ་དི-ས་དྡེ་ན ‘‘ཀུ་ས་ལཾ དྷ་མྨཾ ས་ཧ་ཛཱ་ཏོ ཨ་བྱཱ་ཀ་ཏོ དྷ་མྨོ ཨུ་པྤ་ཛྫ་ཏི ན ཨུ་པ་ནི་སྶ་ཡ་པ་ཙྩ་ཡཱ’’ཏི ཨེ་ཝ་མཱ་དི་ཀཾ ས་ངྒ་ཎྷཱ་ཏི. ཨུ་པ་ནི་སྶ་ཡ་པ་རི་ཡཱ་ཡོ ཨུ་པ་ནི་ས་ས་དྡོ་ཏི ཀ་ཏྭཱ ཝུ་ཏྟཾ ‘‘ཝི་ཉྙཱ་ཎཱུ་པ་ནི་སཾ ནཱ་མ་རཱུ་པཾ, ནཱ་མ་རཱུ་པཱུ་པ་ནི་ས་ཉྩ ས་ལཱ༹་ཡ་ཏ་ན་ནྟི་ཨཱ་དི་ཀེ་ནཱ’’ཏི. ཨེ་ཏྠ ཧི ཝི་ཉྙཱ་ཎ་སྶ ནཱ་མ་རཱུ་པཱ་ནཾ ཕ་སྶ་རཱུ་པཱ་དཱི་ནཾ ཙ་ཀྑཱ་ཡ་ཏ་ནཱ་དཱི་ན་ཉྩ ཨུ་པ་ནི་སྶ་ཡ་བྷཱ་ཝོ ཝུ་ཏྟོ་ཏི.

ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.