༡. ན་སུ་ཏྟཱ་ཧ་ར་ཎ་ཀ་ཐཱ་ཝ་ཎྞ་ནཱ

༢༨༠. ཡ་དི་པི པཱ་ལི༹་ཡཾ ‘‘ཏ་ཡོ མ་གྒེ བྷཱ་ཝེ་ཏཱི’’ཏི ཝུ་ཏྟཾ, མ་གྒ་བྷཱ་ཝ་ནཱ པ་ན ཡཱ་ཝ་དེ་ཝ ཀི་ལེ་ས་ས་མུ་ཙྪི་ནྡ་ན་ཏྠཱ་ཏི ཉ་ཏྭཱ ‘‘ཀི་ཙྩ་ས་བྦྷཱ་ཝ་ནྟི ཏཱི་ཧི པ་ཧཱ་ཏ་བྦ་སྶ པ་ཧཱི་ན་ཏ’’ནྟི ཨཱ་ཧ. ཏ་ཏྠ ཏཱི་ཧཱིཏི ཧེ་ཊྛི་མེ་ཧི ཏཱི་ཧི ཨ་རི་ཡ་མ་གྒེ་ཧི པ་ཧཱ་ཏ་བྦ་སྶ ཨ་ཛ྄ཛྷ་ཏྟ་སཾ་ཡོ་ཛ་ན་སྶ པ་ཧཱི་ན་ཏཾ ས་མུ་ཙྪི་ནྡ་ན་ནྟི ཨ་ཏྠོ. ཏཾ པ་ན ཀི་ཙྩནྟི ཨ་དྷོ་བྷཱ་གི་ཡ་སཾ་ཡོ་ཛ་ནེ་སུ མ་གྒ་སྶ པ་ཧཱ་ནཱ་བྷི་ས་མ་ཡ་ཀི་ཙྩཾ. ཏེ་ནེ་ཝ མ་གྒེ་ནཱཏི ཨ་ནཱ་གཱ་མི་མ་གྒེ་ནེ་ཝ. ཨེ་ཏཾ ན ས་མེ་ཏཱིཏི ཨེ་ཝཾ མ་གྒུ་པྤཱ་ད་ཏོ པ་གེ་ཝ ཀཱ་མ་རཱ་ག་བྱཱ་པཱ་དཱ པ་ཧཱི་ཡ་ནྟཱི་ཏི ལ་དྡྷི་ཀི་ཏྟ་ནཾ ཨི་མི་ནཱ མ་གྒ་སྶ ཀི་ཙྩ་ས་བྦྷཱ་ཝ་ཀ་ཐ་ནེ་ན ན ས་མེ་ཏི ན ཡུ་ཛྫ་ཏི. ཏ་སྨཱཏི ཨི་མི་ནཱ ཡ་ཐཱ་ཝུ་ཏྟ་མེ་ཝ ཝི་རོ་དྷཾ པ་ཙྩཱ་མ་ས་ཏི. པ་ཧཱི་ནཱ་ནནྟི ཝི་ཀྑ་མྦྷི་ཏཱ་ནཾ. ཡོ ཧི ཛྷཱ་ན་ལཱ་བྷཱི ཛྷཱ་ནེ་ན ཡ་ཐཱ་ཝི་ཀྑ་མྦྷི་ཏེ ཀི་ལེ་སེ མ་གྒེ་ན ས་མུ་ཙྪི་ནྡ་ཏི, སོ ཨི་དྷཱ་དྷི་པྤེ་ཏོ. ཏེ་ནཱ་ཧ ‘‘ད་སྶ་ན་མ་གྒེ…པེ… ཨ་དྷི་པྤཱ་ཡོ’’ཏི.

ཛ་ཧ་ཏི་ཀ་ཐཱ་ཝ་ཎྞ་ནཱ ནི་ཊྛི་ཏཱ.