༢. སཾ་ས་ནྡ་ན་བྲ་ཧྨ་ཙ་རི་ཡ་ཀ་ཐཱ་ཝ་ཎྞ་ནཱ

༢༧༣. རཱུ་པཱ་ཝ་ཙ་ར་མ་གྒེ་ནཱཏི རཱུ་པཱ་ཝ་ཙ་ར་ཛ྄ཛྷཱ་ནེ་ན. ཏ་ཉྷི རཱུ་པ་བྷ་ཝཱུ་པ་པ་ཏྟི་ཡཱ ཨུ་པཱ་ཡ་བྷཱ་ཝ་ཏོ མ་གྒོ་ཏི ཝུ་ཏྟོ. ཡ་ཐཱ་ཧ ‘‘རཱུ་པུ་པ་པ་ཏྟི་ཡཱ མ་གྒཾ བྷཱ་ཝེ་ཏཱི’’ཏི (དྷ. ས. ༡༦༠). ཨི་དནྟི ཨི་དཾ རཱུ་པཱ་ཝ་ཙ་ར་ཛ྄ཛྷཱ་ནཾ. ‘‘ཨི་དྷ་ཝི་ཧཱ་ཡ་ནི་ཊྛ་ཧེ་ཏུ་བྷཱུ་ཏོ རཱུ་པཱ་ཝ་ཙ་ར་མ་གྒོ’’ཏི་ཨཱ་དི་ཀཾ དཱི་པེ་ནྟཾ ཝ་ཙ་ནཾ ཨ་ནཱ་གཱ་མི་མ་གྒ་སྶ ཏ་བྦྷཱ་ཝ་དཱི་པ་ཀེ་ན ‘‘ཨི་དྷ བྷཱ་ཝི་ཏ་མ་གྒོ’’ཏི་ཨཱ་དི་ཀེ་ན ཀ་ཐཾ ས་མེ་ཏཱི་ཏི ཙོ་དེ་ཏྭཱ ཡ་ཐཱ ས་མེ་ཏི, ཏཾ ད་སྶེ་ཏུཾ ‘‘པུ་བྦེ པ་ནཱ’’ཏི་ཨཱ་དི ཝུ་ཏྟཾ. ཏ་ཏྠ ‘‘པུ་བྦེ’’ཏི ཨི་མི་ནཱ ‘‘ཨི་དྷ བྷཱ་ཝི་ཏ་མ་གྒོ’’ཏི་ཨཱ་དི་ཀཾ ཝ་ད་ནྟི, ཨི་དྷཱ་པི པ་ན ‘‘རཱུ་པཱ་ཝ་ཙ་ར་མ་གྒེ་ནཱ’’ཏི་ཨཱ་དི་ཀཾ. ཏ་ཏྠ ཨ་ནཱ་གཱ་མཱི ཨེ་ཝཱཏི ཨ་ནཱ་གཱ་མི་ཕ་ལ་ཊྛོ ཨེ་ཝ. ཛྷཱ་ནཱ་ནཱ་གཱ་མཱིཏི ཨ་ས་མུ་ཙྪི་ནྣ་ཛ྄ཛྷ་ཏྟ་སཾ་ཡོ་ཛ་ནོ་པི རཱུ་པ་བྷ་ཝེ ཨུ་པྤ་ཛྫི་ཏྭཱ ཨ་ནཱ་ཝ་ཏྟི་དྷ་མྨ་མ་གྒཾ བྷཱ་ཝེ་ཏྭཱ ཏ་ཏྠེ་ཝ པ་རི་ནི་བྦཱ་ཡ་ན་ཏོ. ཨ་དྷི་པྤཱ་ཡོཏི ཡ་ཐཱ་ཝུ་ཏྟོ དྭི་ནྣཾ ཨ་ཊྛ་ཀ་ཐཱ་ཝ་ཙ་ནཱ་ནཾ ཨ་ཝི་རོ་དྷ་དཱི་པ་ཀོ ཨ་དྷི་པྤཱ་ཡོ.

ཨི་དྷཱཏི ཀཱ་མ་ལོ་ཀེ. ཏ་ཏྠཱཏི བྲ་ཧྨ་ལོ་ཀེ. ཨེ་ཏྠ ཙ པ་ར་ཝཱ་དཱི ཨེ་ཝཾ པུ་ཙྪི་ཏ་བྦོ ‘‘ཏཱི་ཧི, བྷི་ཀྑ་ཝེ, ཋཱ་ནེ་ཧཱི’’ཏི སུ་ཏྟཾ ཀིཾ ཡ་ཐཱ་རུ་ཏ་ཝ་སེ་ན ག་ཧེ་ཏ་བྦ་ཏྠཾ, ཨུ་དཱ་ཧུ ས་ནྡྷཱ་ཡ་བྷཱ་སི་ཏ་ནྟི? ཏ་ཏྠ ཛཱ་ན་མཱ་ནོ ས་ནྡྷཱ་ཡ་བྷཱ་སི་ཏ་ནྟི ཝ་དེ་ཡྻ. ཨ་ཉྙ་ཐཱ ‘‘པ་ར་ནི་མྨི་ཏ་ཝ་ས་ཝ་ཏྟི་དེ་ཝེ ཨུ་པཱ་དཱ་ཡཱ’’ཏི་ཨཱ་དི ཝ་ཏྟུཾ ན ས་ཀྐཱ ‘‘དེ་ཝེ ཙ ཏཱ་ཝ་ཏིཾ་སེ’’ཏི ཝུ་ཏྟ་ཏྟཱ. ཡ་ཐཱ ཧི ཏ་སྶ ‘‘སེ་ཡྻ་ཐཱ་པི དེ་ཝེ་ཧི ཏཱ་ཝ་ཏིཾ་སེ་ཧི ས་དྡྷིཾ མ་ནྟེ་ཏྭཱ’’ཏི་ཨཱ་དཱི་སུ ཝི་ཡ ས་ཀྐཾ དེ་ཝ་རཱ་ཛཱ་ནཾ ཨུ་པཱ་དཱ་ཡ ཀཱ་མཱ་ཝ་ཙ་ར་དེ་ཝེ་སུ ཏཱ་ཝ་ཏིཾ་ས་དེ་ཝཱ པཱ་ཀ་ཊཱ པ་ཉྙཱ་ཏཱ་ཏི ཏེ་སཾ ག་ཧ་ཎཾ, ན ཏེ་ཡེ་ཝ ཨ་དྷི་པྤེ་ཏཱ་ཏི སུ་ཏྟ་པ་ད་སྶ ས་ནྡྷཱ་ཡ་བྷཱ་སི་ཏ་ཏྠཾ ས་མྤ་ཊི་ཙྪི་ཏ་བྦཾ, ཨེ་ཝཾ ‘‘ཨི་དྷ བྲ་ཧྨ་ཙ་རི་ཡ་ཝཱ་སོ’’ཏི ཨེ་ཏྠཱ་པི ཨ་ན་ཝ་ཛྫ་སུ་ཁ་ཨ་བྱཱ་སེ་ཀ་སུ་ཁ་ནེ་ཀྑ་མྨ་སུ་ཁཱ་དི་ས་ནྣི་སྶ་ཡ་བྷཱ་ཝེ་ན མ་ཧཱ་ནི་སཾ་ས་ཏཱ་ཡ སཱ་ས་ནེ པ་བྦ་ཛྫཱ ‘‘ཨི་དྷ བྲ་ཧྨ་ཙ་རི་ཡ་ཝཱ་སོ’’ཏི ཨི་མ་སྨིཾ སུ་ཏྟེ ཨ་དྷི་པྤེ་ཏཱ. སཱ ཧི ཨུ་ཏྟ་ར་ཀུ་རུ་ཀཱ་ནཾ དེ་ཝཱ་ན་ཉྩ ཨ་ནོ་ཀཱ་ས་བྷཱ་ཝ་ཏོ དུ་ཀྐ་རཱ དུ་ལླ་བྷཱ ཙ. ཏ་ཏྠ སཱུ་རི་ཡ་པ་རི་ཝ་ཏྟཱ་དཱི་ཧི་པི དེ་ཝེ་སུ མ་གྒ་པ་ཊི་ལཱ་བྷཱ་ཡ ཨ་ཏྠི་ཏཱ ཝི་བྷཱ་ཝེ་ཏ་བྦཱ, ཨུ་ཏྟ་ར་ཀུ་རུ་ཀཱ་ནཾ པ་ན ཝི་སེ་སཱ་ན་དྷི་ག་མ་བྷཱ་ཝོ ཨུ་བྷི་ནྣ་མྤི ཨི་ཙྪི་ཏོ ཨེ་ཝཱ་ཏི.

སཾ་ས་ནྡ་ན་བྲ་ཧྨ་ཙ་རི་ཡ་ཀ་ཐཱ་ཝ་ཎྞ་ནཱ ནི་ཊྛི་ཏཱ.

བྲ་ཧྨ་ཙ་རི་ཡ་ཀ་ཐཱ་ཝ་ཎྞ་ནཱ ནི་ཊྛི་ཏཱ.