སེ་ད་མོ་ཙ་ན་ཀ་ཐཱ་ཝ་ཎྞ་ནཱ
༦༧༩. སུ་ཎ་ཏཾ སུ་ཎ་ནྟཱ་ནཾ བྷི་ཀྑཱུ་ནཾ པ་ཊུ་བྷཱ་ཝ་ཀ་རཱ ཝི་ན་ཡ་ཝི་ནི་ཙྪ་ཡེ པ་ཉྙཱ་ཀོ་ས་ལླ་སཱ་དྷི་ཀཱ ཏ་ཏོ་ཡེ་ཝ ཝ་རཱ ཨུ་ཏྟ་མཱ. སེ་ད་མོ་ཙ་ན་གཱ་ཐཱ་ཡོཏི ཨ་ཏྠ་པ་ཙྩ་ཏྠི་ཀཱ་ནཾ, སཱ་ས་ན་པ་ཙྩ་ཏྠི་ཀཱ་ན་ཉྩ ཝི་སྶ་ཛྫེ་ཏུ་མ་ས་ཀྐུ་ཎེ་ཡྻ་བྷཱ་ཝེ་ན ཙི་ནྟ་ཡ་ནྟ་སྶ ཁི་ནྣ་ས་རཱི་རཱ སེ་དེ མོ་ཙེ་ནྟཱི་ཏི སེ་ད་མོ་ཙ་ནཱ. ཨ་ཏྠཱ་ནུ་ག་ཏ་པ་ཉྷཱ ཨུ་པཱ་ལི་ཏྠེ་རེ་ན ཋ་པི་ཏཱ པ་ཉྷ་གཱ་ཐཱ་ཡོ, ཏ་པྤ་ཊི་བ་དྡྷཱ ཝི་སྶ་ཛྫ་ན་གཱ་ཐཱ་ཡོ ཙ ཨི་ཏོ པ་རཾ ཝ་ཀྑཱ་མཱི་ཏི ཡོ་ཛ་ནཱ.
༦༨༡. ཀ་བ་ནྡྷཾ ནཱ་མ ཨ་སཱི་སཾ ཨུ་ར་སི ཛཱ་ཏ་ཨ་ཀྑི་མུ་ཁ་ས་རཱི་རཾ. ཡ་ཐཱ་ཧ – ‘‘ཨ་སཱི་ས་ཀཾ ཀ་བ་ནྡྷཾ, ཡ་སྶ ཨུ་རེ ཨ་ཀྑཱི་ནི ཙེ་ཝ མུ་ཁ་ཉྩ ཧོ་ཏཱི’’ཏི (པ་རི. ཨ་ཊྛ. ༤༧༩). མུ་ཁེ་ན ཀ་ར་ཎ་བྷཱུ་ཏེ་ན. ཀ་ཏྭཱཏི སེ་ཝི་ཏྭཱ.
༦༨༢. ཏ་སྶ བྷི་ཀྑུ་ནོ ཀ་ཐཾ པཱ་རཱ་ཛི་ཀོ སི་ཡཱ པཱ་རཱ་ཛི་ཀ་དྷ་མྨོ ཀ་ཐཾ སི་ཡཱ.
༦༨༤. ཀི་ཉྩཱིཏི པཱ་དཾ ཝཱ པཱ་དཱ་ར་ཧཾ ཝཱ པ་ར་ས་ནྟ་ཀཾ. པ་ར་ཉྩ ན ས་མཱ་ད་པེཏི ‘‘ཨ་མུ་ཀ་སྶ ཨི་ཏྠ་ནྣཱ་མཾ བྷ་ཎྜཾ ཨ་ཝ་ཧ་རཱ་ཧཱི’’ཏི པ་རཾ ན ཨཱ་ཎཱ་པེ་ཡྻ.
༦༨༥. པ་ར་སྶ ཀི་ཉྩི ནཱ་དི་ཡ་ནྟོ་ཏི ས་མྦ་ནྡྷོ. ཨཱ་ཎ་ཏྟི་ཉྩཱཏི ཙ-ས་དྡེ་ན སཾ་ཝི་དྷཱ་ནཾ, ས་ངྐེ་ཏ་ཉྩ ས་ངྒ་ཎྷཱ་ཏི.
༦༨༦. ག་རུ་ཀཾ བྷ་ཎྜནྟི པཱ་ད་གྒྷ་ན་ཀ་བྷཱ་ཝེ་ན ག་རུ་བྷ་ཎྜཾ. ‘‘པ་རི་ཀྑཱ་ར’’ནྟི ཨེ་ཏ་སྶ ཝི་སེ་ས་ནཾ. པ་ར་སྶ པ་རི་ཀྑཱ་རནྟི པ་ར་ས་ནྟ་ཀཾ ཡཾ ཀི་ཉྩི པ་རི་ཀྑཱ་རཾ.
༦༩༢. མ་ནུ་སྶུ་ཏྟ་རི་ཀེ དྷ་མྨེཏི ཨུ་ཏྟ་རི་མ་ནུ་སྶ་དྷ་མྨ་ཝི་ས་ཡེ. ཀ་ཏི་ཀཾ ཀ་ཏྭཱ་ནཱཏི ‘‘ཨེ་ཝཾ ནི་སི་ནྣེ ཨེ་ཝཾ ཋི་ཏེ ཨེ་ཝཾ ག་མ་ནེ ཨ་ཏྠཾ ཨཱ་ཝི་ཀ་རོ་ཏཱི’’ཏི་ཨཱ་དིཾ ཀ་ཏྭཱ. ས་མྦྷཱ་ཝ་ནཱ་དྷི་པྤཱ་ཡོཏི ‘‘ཨ་ར་ཧཱ’’ཏི ག་ཧེ་ཏྭཱ མ་ཧཱ་ས་མྦྷཱ་ཝ་ནཾ ཀ་རོ་ཏཱི་ཏི ཨ་དྷི་པྤཱ་ཡོ ཧུ་ཏྭཱ. ཨ་ཏི་ཀྐ་མ་ཏི ཙེཏི ཏ་ཐཱ ཀ་ཏཾ ཀ་ཏི་ཀཾ ཨ་ཏི་ཀྐ་མ་ཏི ཙེ, ཏ་ཐཱ་རཱུ་པཾ ནི་ས་ཛྫཾ ཝཱ ཋཱ་ནཾ ཝཱ ག་མ་ནཾ ཝཱ ཀ་རོ་ཏཱི་ཏི ཨ་ཏྠོ. ཙུ་ཏོཏི ཏ་ཐཱ་རཱུ་པཾ ནི་ས་ཛྫཱ་དིཾ དི་སྭཱ ཀེ་ན་ཙི མ་ནུ་སྶ་ཛཱ་ཏི་ཀེ་ན ‘‘ཨ་ར་ཧཱ’’ཏི ཏ་ངྑ་ཎེ ཉཱ་ཏེ སོ པུ་གྒ་ལོ པཱ་རཱ་ཛི་ཀཾ ཨཱ་པ་ཛྫ་ཏི.
༦༩༣. ཨེ་ཀ་ཝ་ཏྠུ་ཀཱ ཀ་ཐཾ བྷ་ཝེ་ཡྻུ་ནྟི ཡོ་ཛ་ནཱ.
༦༩༤. ཨི་ཏྠི་ཡཱཏི ཨེ་ཀི་སྶཱ ཨི་ཏྠི་ཡཱ. པ་ཊི་པ་ཛྫ་ནྟོཏི ཨེ་ཀ་ཀྑ་ཎེ ཨ་ཉྙེ་ན པུ་རི་སེ་ན ཝུ་ཏྟ་སཱ་ས་ནཾ ཝ་ཏྭཱ, ཨི་མི་ནཱ ཙ ‘‘པ་ཊི་གྒ་ཎྷཱ་ཏི, ཝཱི་མཾ་ས་ཏཱི’’ཏི ཨ་ངྒ་དྭ་ཡ་སྶ པུ་རི་མ་སི་དྡྷ་ཏཾ དཱི་པེ་ཏི ཨི་མ་སྶ པ་ཙྩཱ་ཧ་ར་ཎ་ཀ་ཏ་ཉྩ. ཀཱ་ཡ་སཾ་ས་གྒཾ ས་མཱ་པ་ཛྫི་ཏྭཱ དུ་ཊྛུ་ལླཾ ཝ་ཏྭཱ ཨ་ཏྟ་ཀཱ་མ་པཱ་རི་ཙ་རི་ཡཱ་ཡ ཝ་ཎྞཾ བྷ་ཎ་ནྟོ.
༦༩༥. ཡ་ཐཱ་ཝུ་ཏྟཾ ཝ་ཏྟཾ ཨ་ཙ་རི་ཏྭཱཏི བྷ་ག་ཝ་ཏཱ ཝུ་ཏྟཾ པ་རི་ཝཱ་སཱ་དི་ཝ་ཏྟཾ ཨ་ཙ་རི་ཏྭཱ.
༦༩༦. བྷི་ཀྑུ་ནཱི་ཧི ཨ་སཱ་དྷཱ་ར་ཎ་སི་ཀྑཱ་པ་ད་ཏྟཱ ཨཱ་ཧ ‘‘ན་ཏྠི ས་ངྒྷཱ་དི་སེ་ས་ཏཱ’’ཏི.
༦༩༧. ཡེ་ན ཀུ་དྡྷོ པ་སཾ་སི་ཏོཏི ཨེ་ཏྠ ‘‘ནི་ནྡི་ཏོ ཙཱ’’ཏི སེ་སོ.
༦༩༨. ཏི་ཏྠི་ཡཱ་ནཾ ཝ་ཎྞ་མྷི བྷ་ཉྙ་མཱ་ནེ ཡོ ཀུ་ཛ྄ཛྷ་ཏི, སོ ཨཱ་རཱ་དྷ་ཀོ་ཏི ཡོ་ཛ་ནཱ, པ་རི་ཏོ་སི་ཏོ པ་སཾ་སི་ཏོ་ཏི ཨ་དྷི་པྤཱ་ཡོ. ཏི་ཏྠི་ཡ་པུ་བྦོ ཨི་མ་སྨིཾ སཱ་ས་ནེ པ་བྦ་ཛྫཾ ལ་བྷི་ཏྭཱ ཏི་ཏྠི་ཡཱ་ནཾ ཝ་ཎྞ་སྨིཾ བྷ་ཉྙ་མཱ་ནེ སུ་ཏྭཱ ས་ཙེ ཀུ་པྤ་ཏི ཨ་ན་ཏྟ་མ་ནཾ ཀ་རོ་ཏི, ཨཱ་རཱ་དྷ་ཀོ ས་ངྒྷཱ་རཱ་དྷ་ཀོ ས་ངྒྷཾ པ་རི་ཏོ་སེ་ནྟོ ཧོ་ཏི, ས་མྦུ་དྡྷ་སྶ ཝ་ཎྞ་སྨིཾ བྷ་ཉྙ་མཱ་ནེ ཡ་དི ཀུ་ཛ྄ཛྷ་ཏི, ནི་ནྡི་ཏོ་ཏི ཡོ་ཛ་ནཱ. ཨེ་ཏྠ ས་མྦུ་དྡྷ་སྶཱཏི ཨུ་པ་ལ་ཀྑ་ཎཾ.
༧༠༡. ག་ཧེ་ཏྭཱཏི པ་ཊི་གྒ་ཧེ་ཏྭཱ.
༧༥༡. ‘‘ན ར་ཏྟ་ཙི་ཏྟོ’’ཏི་ཨཱ་དི་ནཱ པུ་རི་མཱ་ནཾ ཏི་ཎྞཾ པཱ་རཱ་ཛི་ཀཱ་ནཾ ཝཱི་ཏི་ཀྐ་མ་ཙི་ཏྟུ་པྤཱ་ད་མ་ཏྟ་སྶཱ་པི ཨ་བྷཱ་ཝཾ དཱི་པེ་ཏི. མ་ར་ཎཱ་ཡཱཏི ཨེ་ཏྠ ‘‘མ་ནུ་སྶ་ཛཱ་ཏི་ཀ་སྶཱ’’ཏི ཨི་དཾ པཱ་རཱ་ཛི་ཀ་པ་ཀ་ར་ཎ་ཏོ་ཝ ལ་བྦྷ་ཏི. ཏ་སྶཱཏི ཀི་ཉྩི དེ་ནྟ་སྶ. ཏནྟི ཏ་ཐཱ དཱི་ཡ་མཱ་ནཾ.
༧༥༢. ‘‘པ་རཱ་ཛ་ཡོ’’ཏི ཨི་དཾ ཨ་བྷ་བྦ་པུ་གྒ་ལེ་སུ ས་ངྒྷ་བྷེ་ད་ཀ་སྶ ཨ་ནྟོ་ག་དྷ་ཏྟཱ ཝུ་ཏྟཾ. ས་ལཱ་ཀ་གྒཱ་ཧེ་ནཱ་པི ས་ངྒྷཾ བྷི་ནྡ་ནྟོ ས་ངྒྷ་བྷེ་ད་ཀོ་ཝ ཧོ་ཏི.
༧༥༣. ཨ་དྡྷ་ཡོ་ཛ་ནེ ཡཾ ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཨེ་ཀཾ ཙཱི་ཝ་རཾ ནི་ཀྑི་པི་ཏྭཱ་ནཱ་ཏི ཡོ་ཛ་ནཱ.
༧༥༤. སུ་པྤ་ཏི་ཊྛི་ཏ་ནི་གྲོ་དྷ་ས་དི་སེ རུ་ཀྑ་མཱུ་ལ་ཀེ ཏི་ཙཱི་ཝ་རཾ ནི་ཀྑི་པི་ཏྭཱ ཨ་དྡྷ་ཡོ་ཛ་ནེ ཨ་རུ་ཎཾ ཨུ་ཊྛཱ་པེ་ནྟ་སྶཱ་ཏི ཡོ་ཛ་ནཱ.
༧༥༥. ཀཱ་ཡི་ཀཱ ནཱ་ནཱ་ཝ་ཏྠུ་ཀཱ་ཡོ ས་མྦ་ཧུ་ལཱ ཨཱ་པ་ཏྟི་ཡོ ཨ་པུ་བྦཾ ཨ་ཙ་རི་མཾ ཨེ་ཀ་ཀྑ་ཎེ ཀ་ཐཾ ཕུ་སེ་ཏི ཡོ་ཛ་ནཱ.
༧༥༧. ཝཱ་ཙ་སི་ཀཱ ན ཀཱ་ཡི་ཀཱ ནཱ་ནཱ་ཝ་ཏྠུ་ཀཱ་ཡོ ས་མྦ་ཧུ་ལཱ ཨཱ་པ་ཏྟི་ཡོ ཨ་པུ་བྦཾ ཨ་ཙ་རི་མཾ ཨེ་ཀ་ཀྑ་ཎེ ཀ་ཐཾ ཕུ་སེ་ཏི ཡོ་ཛ་ནཱ.
༧༥༨. ཝི་ན་ཡ་ན་ས་ཏྠེཏི ཝི་ན་ཡ་པི་ཊ་ཀེ. ཏ་སྶ བྷི་ཀྑུ་སྶ.
༧༥༩. ‘‘ཨི་ཏྠི་ཡཱ’’ཏི་ཨཱ་དཱི་སུ ས་ཧ་ཏྠེ ཀ་ར་ཎ་ཝ་ཙ་ནཾ. ཨི་ཏྠི་ཡཱ ཝཱ པུ་རི་སེ་ན ཝཱ པ་ཎྜ་ཀེ་ན ཝཱ ནི་མི་ཏྟ་ཀེ མེ་ཐུ་ནཾ ན སེ་ཝ་ནྟོ ན པ་ཊི་སེ་ཝ་ནྟོ མེ་ཐུ་ན་པ་ཙྩ་ཡཱ ཙུ་ཏོ་ཏི ཡོ་ཛ་ནཱ.
༧༦༠. ཀཱ་ཡ་སཾ་ས་གྒོ་ཡེ་ཝ ཀཱ་ཡ་སཾ་ས་གྒ་ཏཱ, ཏཾ ཨཱ་པ་ནྣཱ. ཨ་ཊྛ་ཝ་ཏྠུ་ཀཾ ཚེ་ཛྫནྟི ཨེ་ཝཾ་ནཱ་མ་ཀཾ པཱ་རཱ་ཛི་ཀཾ.
༧༦༢. ས་མ་ཡེ པི་ཊྛི་ས་ཉྙི་ཏེཏི གི་མྷཱ་ནཾ པ་ཙྪི་མ་མཱ་ས་སྶ པ་ཋ་མ་དི་ཝ་ས་ཏོ ཡཱ་ཝ ཧེ་མ་ནྟ་སྶ པ་ཋ་མ་དི་ཝ་སོ, ཨེ་ཏྠ་ནྟ་རེ ས་ཏྟ་མཱ་ས་མ་ཏྟེ པི་ཊྛི་ས་ཉྙི་ཏེ ས་མ་ཡེ. ‘‘མཱ་ཏུ་ཡཱ་པི ཙཱ’’ཏི ཝ་ཏྟ་བྦེ ‘‘མཱ་ཏ་ར་མྤི ཙཱ’’ཏི ཝུ་ཏྟཾ. སོ་ཡེ་ཝ ཝཱ པཱ་ཋོ.
༧༦༤. ‘‘ཨ་ཝ་སྶུ་ཏ་ཧ་ཏྠ་ཏོ ཧི པི་ཎྜཾ ག་ཧེ་ཏྭཱ’’ཏི ཨི་མི་ནཱ ས་ངྒྷཱ་དི་སེ་ས་སྶ ཝ་ཏྠུ་མཱ་ཧ, ལ་སུ་ཎནྟི པཱ་ཙི་ཏྟི་ཡ་སྶ ཝ་ཏྠུཾ, མ་ནུ་སྶ་མཾ་སནྟི ཐུ་ལླ་ཙྩ་ཡ་ཝ་ཏྠུཾ, ཨ་ཀ་པྤ་མ་ཉྙནྟི དུ་ཀྐ་ཊ་ཝ་ཏྠུཾ. ཨ་ཀ་པྤ་མ་ཉྙནྟི ཨེ་ཏྠ ‘‘མཾ་ས’’ནྟི སེ་སོ. ‘‘ས་བྦེ ཨེ་ཀ་ཏོ’’ཏི པ་ད་ཙྪེ་དོ. ཨེ་ཀ་ཏོཏི ཨེ་ཏྠ ‘‘མ་དྡི་ཏྭཱ’’ཏི སེ་སོ, ཨ་ཀ་པྤི་ཡ་མཾ་སེ་ཧི ས་དྡྷིཾ ཨེ་ཀ་ཏོ མ་དྡི་ཏྭཱ ཁཱ་ད་ཏཱི་ཏི ཨ་ཏྠོ. ས་བྦ་མེ་ཏཾ ‘‘ག་ཧེ་ཏྭཱ, མ་དྡི་ཏྭཱ, ཁཱ་ད་ཏཱི’’ཏི ཀི་རི་ཡཱ་ནཾ ཀ་མྨ་ཝ་ཙ་ནཾ. མ་ནུ་སྶ་མཾ་ས་ཉྩཱཏི ཨེ་ཏྠ ཙ-ས་དྡོ པ་ཙྩེ་ཀཾ ཡོ་ཛེ་ཏ་བྦོ ཧོ་ཏི. ཏ་སྶཱཏི བྷི་ཀྑུ་ནི་ཡཱ. ས་ངྒྷཱ་དི་སེ་ས་པཱ་ཙི་ཏྟི་ཡ་དུ་ཀྐ་ཊ་པཱ་ཊི་དེ་ས་ནཱི་ཡ་ཐུ་ལླ་ཙྩ་ཡཱ་ནི ཨེ་ཀ་ཀྑ་ཎེ ཧོ་ནྟི.
༧༦༥. ‘‘པུ་གྒ་ལོ ཨེ་ཀོ’’ཏི པ་ད་ཙྪེ་དོ. དྭེ་པི ཙ པུ་ཎྞ་ཝ་སྶཱཏི པ་རི་པུ་ཎྞ་ཝཱི་ས་ཏི་ཝ་སྶཱ ཙ དྭེ སཱ་མ་ཎེ་རཱ. ཨེ་ཀཱ་ཝ ཏེ་སཾ པ་ན ཀ་མྨ་ཝཱ་ཙཱཏི ཏེ་སཾ ཨུ་བྷི་ནྣཾ སཱ་མ་ཎེ་རཱ་ནཾ ཨེ་ཀེ་ན ཨཱ་ཙ་རི་ཡེ་ན ཨེ་ཀཱ་ཝ ཨུ་པ་ས་མྤ་ད་ཀ་མྨ་ཝཱ་ཙཱ ཀ་ཏཱ. ཨེ་ཀ་སྶཱཏི ཨེ་ཀ་སྶཱ་པི སཱ་མ་ཎེ་ར་སྶ. ཀ་མྨནྟི ཨུ་པ་ས་མྤ་ད་ཀ་མྨཾ. ན རཱུ་ཧ་ཏེཏི ན ས་མྤ་ཛྫ་ཏི, ཀི་མེ་ཏྠ ཀཱ་ར་ཎཾ, ཝ་ད བྷ་དྡ་མུ་ཁཱ་ཏི ཨ་དྷི་པྤཱ་ཡོ.
༧༦༦. མ་ཧི་དྡྷི་ཀེ་སཱུཏི དྭཱི་སུ སཱ་མ་ཎེ་རེ་སུ. ས་ཙེ པ་ན ཨེ་ཀོ ཀེ་ས་གྒ་མ་ཏྟ་མྤི ཨཱ་ཀཱ་ས་གོ ཨཱ་ཀཱ་ས་ཊྛོ ཧོ་ཏི, ཨཱ་ཀཱ་ས་ག་ཏ་སྶེ་ཝ ཀ་ཏཾ ཏཾ ཨུ་པ་ས་མྤ་དཀ་མྨཾ ནེ་ཝ རཱུ་ཧ་ཏི ནེ་ཝ ས་མྤ་ཛྫ་ཏི, བྷཱུ་མི་ག་ཏ་སྶ རཱུ་ཧ་ཏཱི་ཏི ཡོ་ཛ་ནཱ.
༧༦༧. ཨི་དྡྷི་ཡཱ ཨཱ་ཀཱ་སེ ཋི་ཏེ་ན ས་ངྒྷེ་ན བྷཱུ་མི་ག་ཏ་སྶ སཱ་མ་ཎེ་ར་སྶ ཨུ་པ་ས་མྤ་ད་ཀ་མྨཾ ན ཀཱ་ཏ་བྦཾ. ཡ་དི ཀ་རོ་ཏི, ཀུ་པྤ་ཏཱི་ཏི ཡོ་ཛ་ནཱ. ཨི་ད་ཉྩ ས་བྦ་ཀ་མྨཱ་ནཾ སཱ་དྷཱ་ར་ཎ་ལ་ཀྑ་ཎཾ. ཡ་ཐཱ་ཧ – ‘‘ས་ངྒྷེ་ནཱ་པི ཨཱ་ཀཱ་སེ ནི་སཱི་དི་ཏྭཱ བྷཱུ་མི་ག་ཏ་སྶ ཀ་མྨཾ ན ཀཱ་ཏ་བྦཾ. ས་ཙེ ཀ་རོ་ཏི, ཀུ་པྤ་ཏཱི’’ཏི (པ་རི. ཨ་ཊྛ. ༤༨༡).
༧༦༨. ཝ་ཏྠཾ ཀ་པྤ་ཀ་ཏ་ཉྩ ན ཧོ་ཏི, ར་ཏྟ་ཉྩ ན ཧོ་ཏི, ཀེ་ས་ཀ་མྦ་ལཱ་དི ཨ་ཀ་པྤི་ཡ་ཉྩ ཧོ་ཏི, ནི་ཝ་ཏྠ་སྶ པ་ནཱ་པ་ཏྟི ཏཾ པ་ན ནི་ཝ་ཏྠ་སྶ བྷི་ཀྑུ་ནོ ཨཱ་པ་ཏྟི ཧོ་ཏི. ཨ་ནཱ་པ་ཏྟི ཀ་ཐཾ སི་ཡཱ, ཝ་ད བྷ་དྡ་མུ་ཁཱ་ཏི ཡོ་ཛ་ནཱ.
༧༦༩. ཨེ་ཏྠ ཨེ་ཏ་སྨིཾ ཨ་ཀ་པྤི་ཡ་ཝ་ཏྠུ་དྷཱ་ར་ཎེ ཏ་ནྣི་མི་ཏྟཾ. ཨ་ཙྪི་ནྣ་ཙཱི་ཝ་ར་སྶ བྷི་ཀྑུ་ནོ ཨ་ནཱ་པ་ཏྟི སི་ཡཱ་ཏི ཡོ་ཛ་ནཱ. ‘‘ཀི་ཉྩི་པཱི’’ཏི་ཨཱ་དི་ནཱ ཝུ་ཏྟ་མེ་ཝ་ཏྠཾ ས་མ་ཏྠེ་ཏི. ཨ་སྶ ཨ་ཙྪི་ནྣ་ཙཱི་ཝ་ར་སྶ བྷི་ཀྑུ་སྶ ཨ་ཀ་པྤི་ཡཾ ནཱ་མ ཀི་ཉྩི་པི ཙཱི་ཝ་རཾ ན ཝི་ཛྫ་ཏི, ཏ་སྨཱ ཨ་ནཱ་པ་ཏྟཱི་ཏི ཨ་དྷི་པྤཱ་ཡོ.
༧༧༠. ཀུ་ཏོ་པི ཙ པུ་རི་ས་སྶ ཧ་ཏྠ་ཏོ བྷོ་ཛ་ན་སྶ ཀི་ཉྩི ན ག་ཎྷ་ཏི, བྷོ་ཛ་ན་ཏོ ཀི་ཉྩི་པི ས་ཡ་མྤི ཀ་སྶ་ཙི པུ་རི་ས་སྶ ན དེ་ཏི, ཏ་ཐཱ་པི ག་རུ་ཀཾ ཝ་ཛྫཾ ས་ངྒྷཱ་དི་སེ་སཱ་པ་ཏྟིཾ ཨུ་པེ་ཏི ཨཱ་པ་ཛྫ་ཏི, ཏཾ ཀ་ཐ་མཱ་པ་ཛྫ་ཏི, ཏྭཾ ཡ་དི ཝི་ན་ཡེ ཀུ་ས་ལོ ཨ་སི, མེ མ་ཡ྄ཧཾ ཝ་ད ཨེ་ཏཾ ཀཱ་ར་ཎཾ ཀ་ཐེ་ཧཱི་ཏི ཡོ་ཛ་ནཱ. ཧ་ཝེཏི ནི་པཱ་ཏ་མ་ཏྟཾ.
༧༧༡. ཡཱ པ་ན བྷི་ཀྑུ་ནཱི ཨ་ཉྙཱ་ཡ བྷི་ཀྑུ་ནི་ཡཱ ‘‘ཨི་ངྒྷ, ཨ་ཡྻེ, ཡཾ ཏེ ཨེ་སོ པུ་རི་ས་པུ་གྒ་ལོ དེ་ཏི ཁཱ་ད་ནཱི་ཡཾ ཝཱ’’ཏི་ཨཱ་དི་ནཱ (པཱ་ཙི. ༧༠༥) ས་ངྒྷཱ་དི་སེ་ས་མཱ་ཏི་ཀཱ་ཡ ཝུ་ཏྟ་ན་ཡེ་ན ཨུ་ཡྻོ་ཛི་ཏཱ ཨ་ཝ་སྶུ་ཏ་མྷཱ པུ་རི་ས་པུ་གྒ་ལཱ ཡཾ ཀི་ཉྩི བྷོ་ཛ་ནཾ ཨཱ་དཱ་ཡ པ་ཊི་གྒ་ཧེ་ཏྭཱ ས་ཙེ བྷུ་ཉྫ་ཏི, སཱ ཏ་ཐཱ བྷུ་ཉྫ་ནྟཱི ཡཱ་ཡ ཨུ་ཡྻོ་ཛི་ཏཱ བྷུ་ཉྫ་ཏི, ཏ་སྶཱ ཨུ་ཡྻོ་ཛི་ཀཱ་ཡ དྷཱི་རཱ ཝི་ན་ཡ་དྷ་རཱ པ་ཎྜི་ཏཱ ས་ངྒྷཱ་དི་སེ་སཾ ཀ་ཐ་ཡ་ནྟི ཏ་སྶཱ ཨུ་ཡྻོ་ཛི་ཏཱ་ཡ བྷོ་ཛ་ན་པ་རི་ཡོ་སཱ་ནེ ཨུ་ཡྻོ་ཛི་ཀཱ་ཡ ས་ངྒྷཱ་དི་སེ་སཾ ཝ་ད་ནྟཱི་ཏི ཡོ་ཛ་ནཱ. ཡ་ཐཱ་ཧ – ‘‘ཏ་སྶཱ ཧི བྷོ་ཛ་ན་པ་རི་ཡོ་སཱ་ནེ ཨུ་ཡྻོ་ཛི་ཀཱ་ཡ ས་ངྒྷཱ་དི་སེ་སོ ཧོ་ཏཱི’’ཏི (པ་རི. ཨ་ཊྛ. ༤༨༡).
༧༧༢. ཏཾ ཀ་ཐཾ ཡ་དི བུ་ཛ྄ཛྷ་སི ཛཱ་ནཱ་སི, སཱ་དྷུ་ཀཾ བྲཱུ་ཧི ཀ་ཐེ་ཧཱི་ཏི ཡོ་ཛ་ནཱ.
༧༧༣. ནི་སེ་ཝི་ཏེཏི ཏཱ་ཡ ཨུ་ཡྻོ་ཛི་ཏཱ་ཡ བྷི་ཀྑུ་ནི་ཡཱ ཏ་སྶ པུ་རི་ས་པུ་གྒ་ལ་སྶ ཧ་ཏྠ་ཏོ པ་ཊི་གྒ་ཧི་ཏེ ཏ་སྨིཾ ད་ནྟ་པོ་ནེ པ་རི་བྷུ་ཏྟེ ཨུ་ཡྻོ་ཛི་ཀཱ ལ་ཧུ་ཝ་ཛྫཾ ཨཱ་པ་ཛྫ་ཏཱི་ཏི ཨ་ཏྠོ.
༧༧༥. ‘‘ཨུ་ཀྑི་ཏྟ་ཀོ’’ཏི ཨི་མི་ནཱ ཨཱ་པ་ཏྟི་ཝ་ཛྫ་མཱ་ཧ. ཡ་ཐཱ་ཧ – ‘‘ཏེ་ན ཧི ས་དྡྷིཾ ཝི་ན་ཡ་ཀ་མྨཾ ན་ཏྠི, ཏ་སྨཱ སོ ས་ངྒྷཱ་དི་སེ་སཾ ཨཱ་པ་ཛྫི་ཏྭཱ ཚཱ་དེ་ནྟོ ཝ་ཛྫཾ ན ཕུ་ས་ཏཱི’’ཏི.
༧༧༦. ས་པྤཱ་ཎ་པྤཱ་ཎ་ཛནྟི ས་པྤཱ་ཎ་ཀེ ཙ ཨ་པྤཱ་ཎ་ཀེ ཙ ཛཱ་ཏཾ. ནེ་ཝ ཛ་ངྒ་མནྟི པཱ་དེ་ཧི བྷཱུ་མི་ཡཾ ནེ་ཝ ཙ་ར་ནྟཾ. ན ཝི་ཧ་ངྒ་མནྟི ཨཱ་ཀཱ་སེ པ་ཀྑཾ པ་སཱ་རེ་ཏྭཱ ན ཙ་ར་ནྟཾ. དྭི་ཛནྟི དྭཱི་ཧི པ་ཙྩ་ཡེ་ཧི, དྭི་ཀྑ་ཏྟུཾ ཝཱ ཛཱ་ཏ་ཏྟཱ དྭི་ཛཾ. ཀ་ནྟནྟི མ་ནོ་ཧ་རཾ. ཨ་ཀ་ནྟནྟི ཨ་མ་ནོ་ཧ་རཾ.
༧༧༧. ས་པྤཱ་ཎ་ཛོ ས་དྡོ ཙི་ཏྟ་ཛོ ཝུ་ཏྟོ, ཨ་པྤཱ་ཎ་ཛོ ཨུ་ཏུ་ཛོ ས་དྡོ ཝུ་ཏྟོ, སོ པ་ན དྭཱི་ཧེ་ཝ པ་ཙྩ་ཡེ་ཧི ཛཱ་ཏ་ཏྟཱ ‘‘དྭི་ཛོ’’ཏི མ་ཏོ་ཏི ཡོ་ཛ་ནཱ.
༧༧༨. ‘‘ཝི་ན་ཡེ’’ཏི་ཨཱ་དི་གཱ་ཐཱ ཝ་ཎྞི་ཏ་ཏྠཱ་ཡེ་ཝ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ
སེ་ད་མོ་ཙ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.