བྷི་ཀྑུ་ནི་ཝི་བྷ་ངྒོ
༡༧༠. ཝི་ན་ཡ་སྶ ཝི་ནི་ཙྪ་ཡེ བྷི་ཀྑཱུ་ནཾ པཱ་ཊ་ཝ་ཏྠཱ་ཡཱཏི བྷི་ཀྑུ་ནཱི་ནཾ པཱ་ཊ་ཝ་སྶཱ་པི ཏ་ད་དྷཱི་ན་ཏྟཱ པ་དྷཱ་ན་ད་སྶ་ན་ཝ་སེ་ན ཝུ་ཏྟཾ. ཨ་ཐ ཝཱ ད་སྶ་ན་ལི་ངྒ་ནྟ་ར་སཱ་དྷཱ་ར་ཎ་ཏྟེ ཨི་ཙྪི་ཏེ པུ་ལླི་ངྒེ་ན, ན་པུཾ་ས་ཀ་ལི་ངྒེ་ན ཝཱ ནི་དྡེ་སོ ས་དྡ་ས་ཏྠཱ་ནུ་ཡོ་ག་ཏོ་ཏི ‘‘བྷི་ཀྑཱུ་ན’’ནྟི པུ་ལླི་ངྒེ་ན ཝུ་ཏྟཾ.
༡༧༡. ན་ནྡ་ནྟཱི སཱ་དི་ཡ་ནྟཱི.
༡༧༢. ཏི་སྶོ ཨཱ་པ་ཏྟི་ཡོ ཕུ་སེ་ཏི ཡོ་ཛ་ནཱ. ཛཱ་ཎུ་སྶ ཨུ་དྡྷཾ, ཨ་ཀྑ་ཀ་སྶ ཨ་དྷོ ག་ཧ་ཎཾ སཱ་དི་ཡ་ནྟི་ཡཱ ཏ་སྶཱ པཱ་རཱ་ཛི་ཀ་ནྟི ཡོ་ཛ་ནཱ.
༡༧༣. ཀཱ་ཡ་པ་ཊི་བ་དྡྷེ ཝཱ ག་ཧ་ཎཾ སཱ་དི་ཡ་ནྟི་ཡཱ དུ་ཀྐ་ཊཾ.
༡༧༤. ཝ་ཛྫནྟི ཨ་ཉྙི་སྶཱ བྷི་ཀྑུ་ནི་ཡཱ པཱ་རཱ་ཛི་ཀཱ་པ་ཏྟིཾ.
༡༧༦. ཏཾ ལ་དྡྷིནྟི ཨུ་ཀྑི་ཏྟ་སྶ ཡཾ ལ་དྡྷིཾ ཨ་ཏྟ་ནོ རོ་ཙེ་སི, ཏཾ ལ་དྡྷིཾ ན ནི་སྶ་ཛྫ་ནྟཱི་ཏི ཡོ་ཛ་ནཱ.
༡༧༨. ‘‘ཨི་དྷ ཨཱ་ག་ཙྪཱ’’ཏི པ་ད་ཙྪེ་དོ. ‘‘ཝུ་ཏྟཱ ཨཱ་ག་ཙྪ་ཏཱི’’ཏི པ་ད་ཙྪེ་དོ.
༡༧༩. ཧ་ཏྠ་པཱ་ས་པྤ་ཝེ་ས་ནེཏི ཧ་ཏྠ་པཱ་སཱུ་པ་ག་མ་ནེ. ‘‘ཧ་ཏྠ་ག་ཏ་པྤ་ཝེ་ས་ནེ’’ཏི ཝཱ པཱ་ཋོ, སོ་ཡེ་ཝ ཨ་ཏྠོ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ བྷི་ཀྑུ་ནི་ཝི་བྷ་ངྒེ
པཱ་རཱ་ཛི་ཀ་ཀ་ཐཱ་ཝ་ཎྞ་ནཱ ནི་ཊྛི་ཏཱ.
༡༨༠. ཨེ་ཀ་སྶཱཏི ཨ་ཏྟ་ནོ ཨ་ཏྟ་ནོ ཨ་ཊྚ་ཀཱ་ར་སྶ ཝཱ. ཨཱ་རོ་ཙ་ནེཏི ཝ་ཏྟ་བྦ་སྶ ཝོ་ཧཱ་རི་ཀཱ་ནཾ ནི་ཝེ་ད་ནེ.
༡༨༡. དུ་ཏི་ཡཱ་རོ་ཙ་ནེཏི དུ་ཏི་ཡ་སྶ, དུ་ཏི་ཡཾ ཨེ་ཝཾ ཨཱ་རོ་ཙ་ནེ.
༡༨༢. དྭཱི་ཧཱིཏི དྭཱི་ཧི ཀ་མྨ་ཝཱ་ཙཱ་ཧི. ཀ་མྨ་ཝཱ་ཙོ་སཱ་ནེཏི ཀ་མྨ་ཝཱ་ཙཱ་ཨོ་སཱ་ནེ.
༡༨༣. པ་རི་ཀྑེ་པེ ཨ་ཏི་ཀྐ་ནྟེཏི ཨ་ཏྟ་ནོ གཱ་མ་ཏོ ག་ནྟྭཱ ཨི་ཏ་རཾ གཱ་མཾ པ་ཝི་ས་ནྟི་ཡཱ པ་ཋ་མེ་ན པཱ་དེ་ན ཏ་སྶ གཱ་མ་སྶ པ་རི་ཀྑེ་པེ ཨ་ཏི་ཀྐ་ནྟེ, པ་ཋ་མ་པཱ་དེ པ་རི་ཀྑེ་པཾ ཨ་ཏི་ཀྐ་མེ་ཏྭཱ ཨ་ནྟོ་གཱ་མ་ས་ངྑེ་པཾ ག་ཏེ་ཏི ཨ་ཏྠོ.
༡༨༤. དུ་ཏི་ཡེ་ནཱཏི གཱ་མ་པ་རི་ཀྑེ་པ་ཏོ བ་ཧི ཋི་ཏེ་ན དུ་ཏི་ཡ་པཱ་དེ་ན. ཨ་ཏི་ཀྐ་ནྟེཏི ཏ་སྨིཾ གཱ་མ་པ་རི་ཀྑེ་པེ ཨ་ཏི་ཀྐ་ནྟེ, ཏ་སྨིཾ པཱ་དེ ཨ་ནྟོ་གཱ་མཾ པ་ཝེ་སི་ཏེ་ཏི ཨ་ཏྠོ. སེ་སཾ ཨུ་ཏྟཱ་ན་ཏྠ་མེ་ཝ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ བྷི་ཀྑུ་ནི་ཝི་བྷ་ངྒེ
ས་ངྒྷཱ་དི་སེ་ས་ཀ་ཐཱ་ཝ་ཎྞ་ནཱ ནི་ཊྛི་ཏཱ.
༡༩༣. ཨི་ཧ བྷི་ཀྑུ་ནཱི པ་ཏྟ་ས་ནྣི་ཙ་ཡཾ ཀ་རོ་ནྟཱི ཧོ་ཏི, སཱ ཨེ་ཀཾ ནི་སྶ་གྒི་ཡཾ པཱ་ཙི་ཏྟི་ཡཾ་ཡེ་ཝ ཕུ་སེ་ཏི ཡོ་ཛ་ནཱ.
༡༩༤. ཨ་ཀཱ་ལ་ཙཱི་ཝ་རཾ ཀཱ་ལ་ཙཱི་ཝ་རཾ ཀ་ཏྭཱ བྷཱ་ཛཱ་པེ་ནྟི་ཡཱ་ཏི ཡོ་ཛ་ནཱ. པ་ཡོ་གེཏི བྷཱ་ཛ་ན་པ་ཡོ་གེ.
༡༩༥. ཚི་ནྣེཏི ཨ་ཙྪི་ནྣེ.
༡༩༦. ཏ་ཏོ པ་རནྟི ཏ་ཏོ པ་ཋ་མ་ཏོ ཨ་ཉྙཾ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ བྷི་ཀྑུ་ནི་ཝི་བྷ་ངྒེ
ནི་སྶ་གྒི་ཡ་ཀ་ཐཱ་ཝ་ཎྞ་ནཱ ནི་ཊྛི་ཏཱ.
༡༩༩. ལ་སུ་ཎཾ ཁཱ་ད་ཏི ཙེ, དྭེ ཨཱ་པ་ཏྟི་ཡོ ཕུ་ཊཱ་ཏི ཡོ་ཛ་ནཱ.
༢༠༠. པ་ཡོ་གེཏི སཾ་ཧཱ་རཱ་པ་ན་པ་ཡོ་གེ. སཾ་ཧ་ཊེཏི ཨ་ཏྟ་ནཱ སཾ་ཧ་ཊེ, པ་རེ་ན སཾ་ཧ་རཱ་པི་ཏེ ཙ ཨཱ་པ་ཏྟི པཱ་ཙི་ཏྟི ཧོ་ཏི.
༢༠༡. ཀ་ཏེཏི ཏ་ལ་གྷཱ་ཏེ ཀ་ཏེ.
༢༠༢. ཛ་ཏུ་ནཱ མ་ཊྛ་ཀནྟི ཛ་ཏུ་ནཱ ཀ་ཏཾ མ་ཊྛ་ད་ཎྜ་ཀཾ. ‘‘དུ་ཀྐ་ཊཾ ཨཱ་དི་ནྣེ’’ཏི པ་ད་ཙྪེ་དོ.
༢༠༤. བྷུ་ཉྫ་མཱ་ན་སྶ བྷི་ཀྑུ་སྶ ཧ་ཏྠ་པཱ་སེ་ཏི ཡོ་ཛ་ནཱ. ཧི་ཏྭཱ ཧ་ཏྠ་པཱ་སཾ.
༢༠༥. ཝི་ཉྙཱ་པེ་ཏྭཱཏི ཨ་ནྟ་མ་སོ མཱ་ཏ་ར་མྤི ཡཱ་ཙི་ཏྭཱ. ཨ་ཛ྄ཛྷོ་ཧཱ་རེ པཱ་ཙི་ཏྟིཾ དཱི་པ་ཡེ་ཏི ཡོ་ཛ་ནཱ.
༢༠༦. ཨུ་ཙྩཱ་རཱ་དིནྟི ཨཱ་དི-ས་དྡེ་ན ཝི་གྷཱ་ས་ས་ངྐཱ་ར་མུ་ཏྟཱ་ནཾ ག་ཧ་ཎཾ.
ལ་སུ་ཎ་ཝ་གྒ་ཝ་ཎྞ་ནཱ པ་ཋ་མཱ.
༢༠༩. ཨི་དྷ ཨི་མ་སྨིཾ ར་ཏྟ་ནྡྷ་ཀཱ་ར་ཝ་གྒེ. པ་ཋ་མེ, དུ་ཏི་ཡེ, ཏ་ཏི་ཡེ, ཙ་ཏུ་ཏྠེ་པི ཝི་ནི་ཙྪ་ཡོ ལ་སུ་ཎ་ཝ་གྒ་སྶ ཚ་ཊྛེ་ན སི་ཀྑཱ་པ་དེ་ན ཏུ་ལྱོ ས་དི་སོ་ཏི ཡོ་ཛ་ནཱ.
༢༡༠. ཨཱ་ས་ནེཏི པ་ལླ་ངྐེ ཏ་སྶོ་ཀཱ་ས་བྷཱུ་ཏེ. སཱ་མི་ཀེ ཨ་ནཱ་པུ་ཙྪཱཏི ཏ་སྨིཾ ཀུ་ལེ ཡཾ ཀི་ཉྩི ཝི་ཉྙུ་མ་ནུ་སྶཾ ཨ་ནཱ་པུ་ཙྪཱ.
༢༡༡. ཨ་ནོ་ཝ་སྶནྟི བྷི་ཏྟི་ཡཱ བ་ཧི ནི་བྦ་ཀོ་ས་བྦྷ་ནྟ་རཾ. དུ་ཏི་ཡཱ་ཏི་ཀྐ་མེཏི དུ་ཏི་ཡེ་ན པཱ་དེ་ན ནི་བྦ་ཀོ་ས་སྶ ཨུ་ད་ཀ་པཱ་ཏ་ཊྛཱ་ནཱ་ཏི་ཀྐ་མེ.
༢༡༢. ནི་སཱི་དི་ཏེཏི ནི་སི་ནྣེ.
༢༡༣. པ་ཡོ་གེཏི ཨུ་ཛ྄ཛྷཱ་པ་ན་པ་ཡོ་གེ.
༢༡༤. ནི་ར་ཡཱ་དི་ནཱ ཨ་ཏྟཱ་ནཾ ཝཱ པ་རཾ ཝཱ ཨ་བྷི་ས་པྤེ་ནྟཱི ས་པ་ཐཾ ཀ་རོ་ནྟཱི དྭེ ཕུ་སེ་ཏི ཡོ་ཛ་ནཱ. ཨ་བྷི་ས་པྤི་ཏེཏི ཨ་བྷི་ས་པི་ཏེ.
༢༡༥. ཝ་དྷི་ཏྭཱཏི ཧ་ཏྠཱ་དཱི་ཧི པ་ཧ་རི་ཏྭཱ. ‘‘ཀ་རོ་ཏི ཨེ་ཀ’’ནྟི པ་ད་ཙྪེ་དོ.
ར་ཏྟ་ནྡྷ་ཀཱ་ར་ཝ་གྒ་ཝ་ཎྞ་ནཱ དུ་ཏི་ཡཱ.
༢༡༦. ན་གྒཱཏི ཨ་ནི་ཝ་ཏྠཱ ཝཱ ཨ་པཱ་རུ་ཏཱ ཝཱ. པ་ཡོ་གེཏི ཙུ་ཎྞ་མ་ཏྟི་ཀཱ་ཨ་བྷི་ས་ངྑ་ར་ཎཱ་དི་པ་ཡོ་གེ.
༢༡༧. པ་མཱ་ཎཱ་ཏི་ཀྐ་ནྟནྟི ‘‘དཱི་གྷ་སོ་ཙ་ཏ་སྶོ ཝི་ད་ཏྠི་ཡོ སུ་ག་ཏ་ཝི་ད་ཏྠི་ཡཱ, ཏི་རི་ཡཾ དྭེ ཝི་ད་ཏྠི་ཡོ’’ཏི (པཱ་ཙི. ༨༨༨) ཝུ་ཏྟ་པ་མཱ་ཎ་མ་ཏི་ཀྐ་ནྟཾ. པ་ཡོ་གེཏི ཀཱ་རཱ་པ་ན་པ་ཡོ་གེ.
༢༡༨. ཝི་སི་བྦེ་ཏྭཱཏི དུ་སྶི་བྦི་ཏཾ པུ་ན སི་བྦ་ན་ཏྠཱ་ཡ ཝི་སི་བྦེ་ཏྭཱ.
༢༡༩. པ་ཉྩ ཨ་ཧཱ་ནི པ་ཉྩཱ་ཧཾ, པ་ཉྩཱ་ཧ་མེ་ཝ པ་ཉྩཱ་ཧི་ཀཾ. ས་ངྒྷཱ་ཊཱི་ནཾ ཙཱ་རོ ས་ངྒྷཱ་ཊི་ཙཱ་རོ, པ་རི་བྷོ་ག་ཝ་སེ་ན ཝཱ ཨོ་ཏཱ་པ་ན་ཝ་སེ་ན ཝཱ ས་ངྒྷ་ཊི་ཏ་ཊྛེ་ན ‘‘ས་ངྒྷཱ་ཊཱི’’ཏི ལ་དྡྷ་ནཱ་མཱ་ནཾ ‘‘ཏི་ཙཱི་ཝ་རཾ, ཨུ་ད་ཀ་སཱ་ཊི་ཀཱ, སཾ་ཀ་ཙྩི་ཀཱ’’ཏི ཨི་མེ་སཾ པ་ཉྩ་ནྣཾ ཙཱི་ཝ་རཱ་ནཾ པ་རི་ཝ་ཏྟ་ནཾ. ཨ་ཏི་ཀྐ་མེཏི བྷི་ཀྑུ་ནཱི ཨ་ཏི་ཀྐ་མེ་ཡྻ. ཨ་སྶཱ པ་ན ཨེ་ཀཱ་ཝ པཱ་ཙི་ཏྟི པ་རི་དཱི་པི་ཏཱ་ཏི ཡོ་ཛ་ནཱ.
༢༢༠. ས་ངྐ་མ་ནཱི་ཡནྟི ས་ངྐ་མེ་ཏ་བྦཾ. ཨ་ཉྙི་སྶཱ ས་ནྟ་ཀཾ ཨ་ནཱ་པུ་ཙྪཱ ག་ཧི་ཏཾ པུ་ན དཱ་ཏ་བྦཾ པ་ཉྩ་ནྣཾ ཨ་ཉྙ་ཏ་རཾ.
༢༢༡. ག་ཎ་ཙཱི་ཝ་ར་ལཱ་བྷ་སྶཱཏི བྷི་ཀྑུ་ནི་ས་ངྒྷེ་ན ལ་བྷི་ཏ་བྦ་ཙཱི་ཝ་ར་སྶ. ཨ་ནྟ་རཱ་ཡཾ ཀ་རོ་ཏཱིཏི ཡ་ཐཱ ཏེ དཱ་ཏུ་ཀཱ་མཱ ན དེ་ནྟི, ཨེ་ཝཾ པ་ར་ཀྐ་མ་ཏི.
༢༢༢. དྷ་མྨི་ཀནྟི ས་མ་གྒེ་ན ས་ངྒྷེ་ན ས་ནྣི་པ་ཏི་ཏྭཱ ཀ་རི་ཡ་མཱ་ནཾ. པ་ཊི་བཱ་ཧ་ནྟཱིཏི པ་ཊི་སེ་དྷེ་ནྟཱི. པ་ཊི་བཱ་ཧི་ཏེ པ་ཊི་སེ་དྷི་ཏེ.
༢༢༣. ཨ་གཱ་རི་ཀཱ་དི་ནོཏི ཨཱ་དི-ས་དྡེ་ན ‘‘པ་རི་བྦཱ་ཛ་ཀ་སྶ ཝཱ པ་རི་བྦཱ་ཛི་ཀཱ་ཡ ཝཱ’’ཏི (པཱ་རཱ. ༩༡༧) ཝུ་ཏྟེ ས་ངྒ་ཎྷཱ་ཏི. ས་མ་ཎ་ཙཱི་ཝ་རནྟི ཀ་པྤ་ཀ་ཏཾ ནི་ཝཱ་ས་ན་པཱ་རུ་པ་ནུ་པ་གཾ. པ་ཡོ་གེཏི དཱ་ན་པ་ཡོ་གེ.
༢༢༤. ཙཱི་ཝ་རེ དུ་བྦ་ལཱ་སཱ་ཡཱཏི དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ‘‘ས་ཙེ ས་ཀྐོ་མ, ད་སྶཱ་མཱ’’ཏི ཨེ་ཏྟ་ཀ་མ་ཏྟཾ སུ་ཏྭཱ ཨུ་པྤཱ་དི་ཏཱ་ཡ ཨཱ་སཱ་ཡཱ་ཏི ཨ་ཏྠོ. ཀཱ་ལནྟི ཙཱི་ཝ་ར་ཀཱ་ལ་ས་མ་ཡཾ. ས་མ་ཏི་ཀྐ་མེཏི བྷི་ཀྑུ་ནཱི་ཧི ཀཱ་ལ་ཙཱི་ཝ་རེ བྷཱ་ཛི་ཡ་མཱ་ནེ ‘‘ཨཱ་ག་མེ་ཐ, ཨ་ཡྻེ, ཨ་ཏྠི ས་ངྒྷ་སྶ ཙཱི་ཝ་ར་པ་ཙྩཱ་སཱ’’ཏི ཝ་ཏྭཱ ཏཾ ཙཱི་ཝ་ར་ཝི་བྷ་ངྒཾ ས་མ་ཏི་ཀྐ་མེ་ཡྻ.
༢༢༥. དྷ་མྨི་ཀཾ ཀ་ཐི་ནུ་དྡྷཱ་རནྟི ས་མ་གྒེ་ན ས་ངྒྷེ་ན ཀ་རི་ཡ་མཱ་ནཾ ཀ་ཐི་ན་སྶ ཨ་ནྟ་རུ་བྦྷཱ་རཾ. པ་ཊི་བཱ་ཧ་ནྟི་ཡཱཏི ནི་ཝཱ་རེ་ནྟི་ཡཱ.
ནྷཱ་ན་ཝ་གྒ་ཝ་ཎྞ་ནཱ ཏ་ཏི་ཡཱ.
༢༢༦. ཏུ་ཝ་ཊྚེ་ཡྻུནྟི ནི་པ་ཛྫེ་ཡྻུཾ. ཨི་ཏ་རཾ པཱ་ཙི་ཏྟི་ཡཾ.
༢༢༧. པ་ཡོ་གེཏི བྷི་ཀྑུ་ནི་ཡཱ ཨ་ཕཱ་སུ་ཀ་ཀ་ར་ཎ་པ་ཡོ་གེ ཀ་རི་ཡ་མཱ་ནེ.
༢༢༨. དུ་ཀྑི་ཏནྟི གི་ལཱ་ནཾ. ནུ་པ་ཊྛཱ་པེ་ནྟི་ཡཱ ཝཱ་པཱིཏི ཏ་སྶཱ ཨུ་པ་ཊྛཱ་ནཾ པ་རེ་ཧི ཨ་ཀཱ་རཱ་པེ་ནྟི་ཡཱ, ས་ཡཾ ཝཱ ཨ་ཀ་རོ་ནྟི་ཡཱ.
༢༢༩. ཨུ་པ་སྶ་ཡཾ ད་ཏྭཱཏི ཀ་ཝཱ་ཊ་བ་ནྡྷཾ ཨ་ཏྟ་ནོ པུ་གྒ་ལི་ཀ་ཝི་ཧཱ་རཾ ད་ཏྭཱ. ཀ་ཌྜྷི་ཏེཏི ནི་ཀྐ་ཌྜྷི་ཏེ.
༢༣༠. སཾ་ས་ཊྛཱཏི ག་ཧ་པ་ཏི་ནཱ ཝཱ ག་ཧ་པ་ཏི་པུ་ཏྟེ་ན ཝཱ སཾ་ས་ཊྛ་ཝི་ཧཱ་རཱི བྷི་ཀྑུ་ནཱི ས་ངྒྷེ་ན སཾ་ས་ཊྛ་ཝི་ཧཱ་ར་ཏོ ནི་ཝ་ཏྟི་ཡ་མཱ་ནཱ. ཉ་ཏྟི་ཡཱ དུ་ཀྐ་ཊཾ ཕུ་སེཏི ས་མ་ནུ་བྷཱ་ས་ན་ཀ་མྨ་ཉ་ཏྟི་ཡཱ དུ་ཀྐ་ཊཾ ཨཱ་པ་ཛྫེ་ཡྻ.
༢༣༡. ཨ་ནྟོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏ་སྶ ར་ཊྛེ. པ་ཊི་པ་ནྣཱ་ཡཱཏི ཙཱ་རི་ཀཾ ཀ་པྤེ་ནྟི་ཡཱ. སེ་ས་ཀནྟི པཱ་ཙི་ཏྟི་ཡཾ.
ཏུ་ཝ་ཊྚ་ཝ་གྒ་ཝ་ཎྞ་ནཱ ཙ་ཏུ་ཏྠཱ.
༢༣༣. རཱ་ཛཱ་གཱ་རཱ་དི་ཀནྟི ཨཱ་དི-ས་དྡེ་ན ཙི་ཏྟཱ་གཱ་རཱ་དཱི་ནཾ ག་ཧ་ཎཾ.
༢༣༥. པ་ཡོ་གེཏི ཀ་པྤཱ་ས་ཝི་ཙཱ་ར་ཎཾ ཨཱ་དིཾ ཀ་ཏྭཱ ས་བྦ་པ་ཡོ་གེ. ཨུ་ཛྫ་ཝུ་ཛྫ་ཝ་ནེཏི ཡ་ཏྟ་ཀཾ ཧ་ཏྠེ་ན ཨ་ཉྪི་ཏཾ ཧོ་ཏི, ཏ་སྨིཾ ཏ་ཀྐ་མྷི ཝེ་ཋི་ཏེ.
༢༣༧. པ་ཡོ་གེཏི ཨ་གཱ་རི་ཀ་སྶ ཝཱ པ་རི་བྦཱ་ཛ་ཀ་སྶ ཝཱ པ་རི་བྦཱ་ཛི་ཀཱ་ཡ ཝཱ ས་ཧ་ཏྠཱ ཁཱ་ད་ནཱི་ཡཱ་དཱི་ནཾ དཱ་ན་པ་ཡོ་གེ.
༢༣༨. ‘‘ས་མཾ ཨཱ་པ་ཏྟི་པ་བྷེ་ད་ཏོ’’ཏི པ་ད་ཙྪེ་དོ.
༢༣༩. ཏི་ར་ཙྪཱ་ན་ག་ཏཾ ཝི་ཛྫནྟི ཡཾ ཀི་ཉྩི བཱ་ཧི་ར་ཀཾ ཨ་ན་ཏྠ་སཾ་ཧི་ཏཾ པ་རཱུ་པ་གྷཱ་ཏ་ཀ་རཾ ཧ་ཏྠི་སི་ཀྑཱ་དི་སི་པྤཾ. པ་ཋ་ནྟི་ཡཱཏི སི་ཀྑ་ནྟི་ཡཱ. པ་ཡོ་གེཏི དུ་རུ་པ་ས་ངྐ་མ་ནཱ་དི་པ་ཡོ་གེ. པ་དེ པ་དེཏི པ་དཱ་དི་ཝ་སེ་ན པ་རི་ཡཱ་པུ་ཎ་ནྟི་ཡཱ པ་དེ པ་དེ ཨ་ཀྑ་ར་པ་དཱ་ནཾ ཝ་སེ་ན.
༢༤༠. ན་ཝ་མེ ‘‘པ་རི་ཡཱ་པུ་ཎཱ་ཏཱི’’ཏི པ་དཾ, ད་ས་མེ ‘‘ཝཱ་ཙེ་ཏཱི’’ཏི པ་ད་ནྟི ཨེ་ཝཾ པ་ད་མ་ཏྟ་མེ་ཝ ཨུ་བྷི་ནྣཾ ཝི་སེ་ས་ཀཾ བྷེ་ད་ཀཾ.
ཙི་ཏྟཱ་གཱ་ར་ཝ་གྒ་ཝ་ཎྞ་ནཱ པ་ཉྩ་མཱ.
༢༤༡. ཏ་མཱ་རཱ་མནྟི ཡ་ཏྠ བྷི་ཀྑཱུ རུ་ཀྑ་མཱུ་ལེ་པི ཝ་ས་ནྟི, ཏཾ ས་བྷི་ཀྑུ་ཀཾ པ་དེ་སཾ.
༢༤༣. ཨ་ཀྐོ་ས་ཏཱིཏི ད་ས་ནྣཾ ཨ་ཀྐོ་ས་ཝ་ཏྠཱུ་ནཾ ཨ་ཉྙ་ཏ་རེ་ན ས་མྨུ་ཁཱ ཝཱ པ་ར་མྨུ་ཁཱ ཝཱ ཨ་ཀྐོ་ས་ཏི. པ་རི་བྷཱ་ས་ཏཱིཏི བྷ་ཡ་ད་སྶ་ནེ་ན ཏ་ཛྫེ་ཏི. ‘‘པཱ་ཙི་ཏྟི ཨ་ཀྐོ་སི་ཏེ’’ཏི པ་ད་ཙྪེ་དོ.
༢༤༤. ཙ་ཎྜི་ཀ་བྷཱ་ཝེ་ནཱཏི ཀོ་དྷེ་ན. ག་ཎནྟི བྷི་ཀྑུ་ནི་ས་ངྒྷཾ. པ་རི་བྷཱ་ས་ཏཱིཏི ‘‘བཱ་ལཱ ཨེ་ཏཱ’’ཏི་ཨཱ་དཱི་ཧི ཝ་ཙ་ནེ་ཧི ཨ་ཀྐོ་ས་ཏི. པ་ཡོ་གེཏི པ་རི་བྷཱ་ས་ན་པ་ཡོ་གེ. པ་རི་བྷ་ཊྛེཏི ཨ་ཀྐོ་སི་ཏེ. ཨི་ཏ་རཾ པཱ་ཙི་ཏྟི་ཡཾ.
༢༤༥. ནི་མ་ནྟི་ཏཱཏི ག་ཎ་བྷོ་ཛ་ནེ ཝུ་ཏྟ་ན་ཡེ་ན ནི་མ་ནྟི་ཏཱ. པ་ཝཱ་རི་ཏཱཏི པ་ཝཱ་ར་ཎ་སི་ཀྑཱ་པ་དེ ཝུ་ཏྟ་ན་ཡེ་ན ཝཱ་རི་ཏཱ. ཁཱ་ད་ནཾ བྷོ་ཛ་ན་མྤི ཝཱཏི ཡཱ་གུ་པཱུ་ཝ་ཁ་ཛྫ་ཀཾ, ཡཱ་ཝ་ཀཱ་ལི་ཀཾ མཱུ་ལ་ཁཱ་ད་ནཱི་ཡཱ་དི་ཁཱ་ད་ནཱི་ཡཾ, ཨོ་ད་ནཱ་དི་བྷོ་ཛ་ན་མྤི ཝཱ ཡཱ བྷི་ཀྑུ་ནཱི བྷུ་ཉྫ་ནྟཱི ཧོ་ཏི, སཱ པ་ན དྭེ་ཡེ་ཝ ཨཱ་པ་ཏྟི་ཡོ ཕུ་སེ་ཏི ཡོ་ཛ་ནཱ.
༢༤༧. མ་ཙྪ་རཱ་ཡ་ནྟཱིཏི མ་ཙྪ་རཾ ཀ་རོ་ནྟཱི, ཨ་ཏྟ་ནོ པ་ཙྩ་ཡ་དཱ་ཡ་ཀ་ཀུ་ལ་སྶ ཨ་ཉྙེ་ཧི སཱ་དྷཱ་ར་ཎ་བྷཱ་ཝཾ ཨ་ས་ཧ་ནྟཱི་ཏི ཨ་ཏྠོ. པ་ཡོ་གེཏི ཏ་ད་ནུ་རཱུ་པེ ཀཱ་ཡ་ཝ་ཙཱི་པ་ཡོ་གེ. མ་ཙྪ་རི་ཏེཏི མ་ཙྪ་ར་ཝ་སེ་ན ཀ་ཏ་པ་ཡོ་གེ ནི་པྥ་ནྣེ.
༢༤༨. ཨ་བྷི་ཀྑུ་ཀེ པ་ནཱ་ཝཱ་སེཏི ཡ་ཏོ བྷི་ཀྑུ་ནུ་པ་སྶ་ཡ་ཏོ ཨ་དྡྷ་ཡོ་ཛ་ན་བྦྷ་ནྟ་རེ ཨོ་ཝཱ་ད་དཱ་ཡ་ཀཱ བྷི་ཀྑཱུ ན ཝ་ས་ནྟི, མ་གྒོ ཝཱ ཨ་ཁེ་མོ ཧོ་ཏི, ན ས་ཀྐཱ ཨ་ན་ནྟ་རཱ་ཡེ་ན ག་ནྟུཾ, ཨེ་ཝ་རཱུ་པེ ཨཱ་ཝཱ་སེ. པུ་བྦ་ཀི་ཙྩེ་སཱུཏི ‘‘ཝ་སྶཾ ཝ་སི་སྶཱ་མཱི’’ཏི སེ་ནཱ་ས་ན་པ་ཉྙཱ་པ་ན་པཱ་ནཱི་ཡ་ཨུ་པ་ཊྛཱ་པ་ནཱ་དི་པུ་བྦ་ཀི་ཙྩེ པ་ན ཀ་རི་ཡ་མཱ་ནེ དུ་ཀྐ་ཊཾ བྷ་ཝེ་ཏི ཡོ་ཛ་ནཱ.
༢༤༩. ཝ་སྶཾ་ཝུ་ཏྠཱཏི པུ་རི་མཾ ཝཱ པ་ཙྪི་མཾ ཝཱ ཏེ་མཱ་སཾ ཝུ་ཏྠཱ. ཨུ་བྷ་ཏོ་ས་ངྒྷེཏི བྷི་ཀྑུ་ནི་ས་ངྒྷེ, བྷི་ཀྑུ་ས་ངྒྷེ ཙ. ཏཱི་ཧི་པི ཋཱ་ནེ་ཧཱིཏི ‘‘དི་ཊྛེ་ན ཝཱ’’ཏི་ཨཱ་དི་ནཱ ཝུ་ཏྟེ་ཧི ཏཱི་ཧི ཀཱ་ར་ཎེ་ཧི.
༢༥༠. ཨོ་ཝཱ་ད་ཏྠཱ་ཡཱཏི ག་རུ་དྷ་མྨོ་ཝཱ་ད་ན་ཏྠཱ་ཡ. སཾ་ཝཱ་ས་ཏྠཱ་ཡཱཏི ཨུ་པོ་ས་ཐ་པུ་ཙྪ་ན་ཏྠཱ་ཡ ཙེ་ཝ པ་ཝཱ་ར་ཎ་ཏྠཱ་ཡ ཙ. ན ག་ཙྪ་ཏཱིཏི བྷི་ཀྑུཾ ན ཨུ་པ་ག་ཙྪ་ཏི.
༢༥༡. ཨོ་ཝཱ་ད་མྤི ན ཡཱ་ཙ་ནྟཱིཏི ཨུ་པོ་ས་ཐཱ་དི་ཝ་སེ་ན ཨོ་ཝཱ་དཱུ་པ་ས་ངྐ་མ་ནཾ བྷི་ཀྑུཾ ན ཡཱ་ཙ་ནྟཱི ན པུ་ཙྪ་ནྟཱི. ཨུ་པོ་ས་ཐནྟི ཨུ་པོ་ས་ཐ་དི་ཝ་ས་ཏོ པུ་རི་མ་དི་ཝ་སེ ཏེ་ར་སི་ཡཾ ཝཱ ཙཱ་ཏུ་དྡ་སི་ཡཾ ཝཱ ཨུ་པོ་ས་ཐཾ ན པུ་ཙྪ་ནྟཱི.
༢༥༢. ཨ་པུ་ཙྪི་ཏྭཱ་ཝ ས་ངྒྷཾ ཝཱཏི ས་ངྒྷཾ ཝཱ ག་ཎཾ ཝཱ ཨ་ན་པ་ལོ་ཀེ་ཏྭཱ་ཝ. ‘‘བྷེ་དཱ་པེ་ཏཱི’’ཏི ཨི་དཾ ནི་ད་སྶ་ན་མ་ཏྟཾ ‘‘ཕཱ་ལཱ་པེ་ཡྻ ཝཱ དྷོ་ཝཱ་པེ་ཡྻ ཝཱ ཨཱ་ལི་མྤཱ་པེ་ཡྻ ཝཱ བ་ནྡྷཱ་པེ་ཡྻ ཝཱ མོ་ཙཱ་པེ་ཡྻ ཝཱ’’ཏི ཨི་མེ་ས་མྤི ཀི་རི་ཡཱ་ཝི་ཀ་པྤཱ་ནཾ ས་ངྒ་ཧེ་ཏ་བྦ་ཏྟཱ. པ་སཱ་ཁ་ཛནྟི ནཱ་བྷི་ཡཱ ཧེ་ཊྛཱ, ཛཱ་ཎུ་མ་ཎྜ་ལཱ་ནཾ ཨུ་པ་རི པ་དེ་སེ ཛཱ་ཏཾ ག་ཎྜཾ ཝཱ རུ་དྷི་ཏཾ ཝཱ. པ་ཡོ་གེཏི བྷེ་དཱ་པ་ནཱ་དི་པ་ཡོ་གེ.
ཨཱ་རཱ་མ་ཝ་གྒ་ཝ་ཎྞ་ནཱ ཚ་ཊྛཱ.
༢༥༣. ག་བྦྷི་ནིནྟི ཨཱ་པ་ནྣ་ས་ཏྟཾ སི་ཀྑ་མཱ་ནཾ. ཝུ་ཊྛཱ་པེ་ནྟཱིཏི ཨུ་པ་ཛ྄ཛྷཱ་ཡཱ ཧུ་ཏྭཱ ཨུ་པ་ས་མྤཱ་དེ་ནྟཱི. པ་ཡོ་གེཏི ག་ཎ་པ་རི་ཡེ་ས་ནཱ་དི་པ་ཡོ་གེ. ཝུ་ཊྛཱ་པི་ཏེཏི ཨུ་པ་ས་མྤཱ་དི་ཏེ, ཀ་མྨ་ཝཱ་ཙཱ་པ་རི་ཡོ་སཱ་ནེ་ཏི ཨ་ཏྠོ.
༢༥༥. ས་ཧ་ཛཱི་ཝི་ནིནྟི ས་དྡྷི་ཝི་ཧཱ་རི་ནིཾ. ནཱ་ནུ་གྒ་ཎྷ་ནྟཱིཏི ཨུ་དྡེ་ས་དཱ་ནཱ་དཱི་ཧི ན ས་ངྒ་ཎྷ་ནྟཱི.
ག་བྦྷི་ནི་ཝ་གྒ་ཝ་ཎྞ་ནཱ ས་ཏྟ་མཱ.
༢༥༨. ‘‘ཨ་ལཾ ཝུ་ཊྛཱ་པི་ཏེ་ནཱ’’ཏི ཝུ་ཙྩ་མཱ་ནཱ བྷི་ཀྑུ་ནཱི་ཧི ནི་ཝཱ་རི་ཡ་མཱ་ནཱ. ཁཱི་ཡ་ཏཱིཏི ཨ་ཉྙཱ་སཾ བྱ་ཏྟཱ་ནཾ ལ་ཛྫཱི་ནཾ ཝུ་ཊྛཱ་ན་ས་མྨུ་ཏིཾ དཱི་ཡ་མཱ་ནཾ དི་སྭཱ ‘‘ཨ་ཧ་མེ་ཝ ནཱུ་ན བཱ་ལཱ’’ཏི་ཨཱ་དི་ནཱ བྷ་ཎ་མཱ་ནཱ ཁཱི་ཡ་ཏི. པ་ཡོ་གེཏི ཁཱི་ཡ་མཱ་ན་པ་ཡོ་གེ. ཁཱི་ཡི་ཏེཏི ཁཱི་ཡ་ན་པ་ཡོ་གེ ནི་ཊྛི་ཏེ.
ཀུ་མཱ་རི་བྷཱུ་ཏ་ཝ་གྒ་ཝ་ཎྞ་ནཱ ཨ་ཊྛ་མཱ.
༢༦༠. ཚ་ཏྟུ་པཱ་ཧ་ནནྟི ཝུ་ཏྟ་ལ་ཀྑ་ཎཾ ཚ་ཏྟ་ཉྩ ཨུ་པཱ་ཧ་ནཱ་ཡོ ཙ. པ་ཡོ་གེཏི དྷཱ་ར་ཎ་པ་ཡོ་གེ.
༢༦༡. ཡཱ་ནེ་ནཱཏི ཝ་ཡ྄ཧཱ་དི་ནཱ. ཡཱ་ཡ་ནྟཱིཏི ས་ཙེ ཡཱ་ནེ་ན ག་ཏཱ ཧོ་ཏི.
༢༦༢. ས་ངྒྷཱ་ཎིནྟི ཡཾ ཀི་ཉྩི ཀ་ཊཱུ་པ་གཾ. དྷཱ་རེ་ནྟི་ཡཱཏི ཀ་ཊི་ཡཾ པ་ཊི་མུ་ཙྩ་ནྟི་ཡཱ.
༢༦༣. ག་ནྡྷ་ཝ་ཎྞེ་ནཱཏི ཡེ་ན ཀེ་ན་ཙི ཝ་ཎྞེ་ན ཙ ཡེ་ན ཀེ་ན་ཙི ག་ནྡྷེ་ན ཙ. ག་ནྡྷོ ནཱ་མ ཙ་ནྡ་ནཱ་ལེ་པཱ་དི. ཝ་ཎྞོ ནཱ་མ ཀུ་ངྐུ་མ་ཧ་ལི་དྡཱ་དི. པ་ཡོ་གེཏི ག་ནྡྷཱ་དི་པ་ཡོ་གེ ར་ཙ་ན་ཏོ པ་ཊྛཱ་ཡ པུ་བྦ་པ་ཡོ་གེ.
༢༦༦. ཨ་ནཱ་པུ་ཙྪཱཏི ‘‘ནི་སཱི་དཱ་མི, ཨ་ཡྻཱ’’ཏི ཨ་ནཱ་པུ་ཙྪི་ཏྭཱ. ནི་སཱི་དི་ཏེ བྷི་ཀྑུ་སྶ ཨུ་པ་ཙཱ་རེ ཨ་ནྟ་མ་སོ ཚ་མཱ་ཡ ནི་སི་ནྣེ.
༢༦༧. ཨ་ནོ་ཀཱ་ས་ཀ་ཏནྟི ‘‘ཨ་སུ་ཀ་སྨིཾ ནཱ་མ ཋཱ་ནེ པུ་ཙྪི་སྶཱ་མཱི’’ཏི ཨེ་ཝཾ ཨ་ཀ་ཏ་ཨོ་ཀཱ་སཾ.
༢༦༨. པ་ཝི་ས་ནྟི་ཡཱཏི ཝི་ནི་ཙྪ་ཡཾ ཨཱ་རཱ་མ་ཝ་གྒ་སྶ པ་ཋ་མེ་ནེ་ཝ སི་ཀྑཱ་པ་དེ་ན ས་དི་སཾ ཀ་ཏྭཱ ཝ་དེ་ཡྻཱ་ཏི ཡོ་ཛ་ནཱ.
ཚ་ཏྟུ་པཱ་ཧ་ན་ཝ་གྒ་ཝ་ཎྞ་ནཱ ན་ཝ་མཱ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ བྷི་ཀྑུ་ནི་ཝི་བྷ་ངྒེ
པཱ་ཙི་ཏྟི་ཡ་ཀ་ཐཱ་ཝ་ཎྞ་ནཱ ནི་ཊྛི་ཏཱ.
༢༦༩-༧༠. ཨ་ཊྛ་སུ པཱ་ཊི་དེ་ས་ནཱི་ཡ་སི་ཀྑཱ་པ་དེ་སུ་པི དྭི་དྷཱ ཨཱ་པ་ཏྟི ཧོ་ཏཱི་ཏི ཡོ་ཛ་ནཱ. ཏ་ཏོཏི ག་ཧ་ཎ་ཧེ་ཏུ. ས་བྦེ་སཱུཏི པཱ་ཊི་དེ་ས་ནཱི་ཡ་སི་ཀྑཱ་པ་དེ་སུ.
པཱ་ཊི་དེ་ས་ནཱི་ཡ་ཀ་ཐཱ་ཝ་ཎྞ་ནཱ.
༢༧༡-༢. ཨི་མཾ པ་ར་མཾ ཨུ་ཏྟ་མཾ ནི་རུ་ཏྟ་རཾ ཀེ་ན་ཙི ཝཱ ཝ་ཏྟ་བྦེ་ན ཨུ་ཏྟ་རེ་ན ར་ཧི་ཏཾ ནི་དྡོ་སཾ ཨུ་ཏྟ་རཾ ཨེ་ཝཾ་ནཱ་མ་ཀཾ དྷཱི་རོ པ་ཉྙ་ཝཱ བྷི་ཀྑུ ཨ་ཏྠ་ཝ་སེ་ན ཝི་དི་ཏྭཱ དུ་རུ་ཏྟ་རཾ ཀི་ཙྪེ་ན ཨུ་ཏྟ་རི་ཏ་བྦཾ པ་ཉྙ་ཏྟ་མ་ཧཱ་ས་མུ་དྡཾ ཝི་ན་ཡ་མ་ཧཱ་སཱ་ག་རཾ སུ་ཁེ་ནེ་ཝ ཡ་སྨཱ ཨུ་ཏྟ་ར་ཏི, ཏ་སྨཱ ཀ་ངྑ་ཙྪེ་དེ ཝི་ན་ཡ་ཝི་ཙི་ཀི་ཙྪཱ་ཡ ཚི་ནྡ་ནེ ས་ཏྠེ ས་ཏྠ་ས་དི་སེ ཨ་སྨིཾ ས་ཏྠེ ཨི་མ་སྨིཾ ཨུ་ཏྟ་ར་པ་ཀ་ར་ཎེ ཨུ་སྨཱ་ཡུ་ཏྟོ ཀ་མྨ་ཛ་ཏེ་ཛོ་དྷཱ་ཏུ་ཡཱ ས་མ་ནྣཱ་ག་ཏོ ཛཱི་ཝ་མཱ་ནོ བྷི་ཀྑུ ནི་ཙྩཾ ནི་ར་ནྟ་རཾ ས་ཏྟོ ཨ་བྷི་ར་ཏོ ནི་ཙྩཾ ཡོ་གཾ ས་ཏ་ཏཱ་བྷི་ཡོ་གཾ ཀཱ་ཏུཾ ཡུ་ཏྟོ ཨ་ནུ་རཱུ་པོ་ཏི ཡོ་ཛ་ནཱ.
བྷི་ཀྑུ་ནི་ཝི་བྷ་ངྒོ ནི་ཊྛི་ཏོཏི ཨེ་ཏྠཱ་པི ཨུ་པྤ་ཏྟི ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ.
ཨི་ཏི ཨུ་ཏྟ་རེ ལཱི་ན་ཏྠ་པ་ཀཱ་ས་ནི་ཡཱ
བྷི་ཀྑུ་ནི་ཝི་བྷ་ངྒ་ཝ་ཎྞ་ནཱ ནི་ཊྛི་ཏཱ.