ཨུ་པཱ་ལི་པ་ཉྩ་ཀཾ
ན་པྤ་ཊི་པྤ་སྶ་མྦྷ་ན་ཝ་གྒ་ཝ་ཎྞ་ནཱ
༤༢༡. ས་མ་གྒེ་ཧི ཀ་ར་ཎཱི་ཡཱ་ནཱིཏི ཝི་ཝཱ་དཱ་དྷི་ཀ་ར་ཎེ་ཧི པུ་བྦེ ཨ་ས་མ་གྒཱ ཧུ་ཏྭཱ པ་ཙྪཱ སཱ་མ་གྒིཾ ཨུ་པ་ག་ཏེ་ཧི ཀ་ཏྟ་བྦཱ་ནི. ཀིཾ པ་ན ཨ་ས་ཉྙ་ཏ་མི་སྶ་པ་རི་སཱ་ཡ ས་དྡྷིཾ ལ་ཛྫི་ནོ སཱ་མ་གྒིཾ ཀ་རོ་ནྟཱི་ཏི ཨཱ་ཧ ‘‘ཨུ་པོ་ས་ཐ་པ་ཝཱ་ར་ཎཱ་དཱི་སུ ཧཱི’’ཏི་ཨཱ་དི. ཏ་ཏྠ ཋི་ཏཱ་སཱུཏི ཨུ་པོ་ས་ཐ་པ་ཝཱ་ར་ཎཱ་སུ ཨ་པྤ་ཝ་ཏྟཱི་སུ. ཨུ་པ་ཏྠ་མྦྷོ ན དཱ་ཏ་བྦོཏི ཨུ་པ་རཱུ་པ་རི ཨ་པྤ་ཝ་ཏྟ་ན་ཏྠཱ་ཡ མ་ཡ་མྤི ཨུ་པོ་ས་ཐཾ ན ཀ་རི་སྶཱ་མཱ་ཏི་ཨཱ་དི་ནཱ ཀ་ལ་ཧ་སྶ ཨུ་པ་ཏྠ་མྦྷོ ན དཱ་ཏ་བྦོ, དྷ་མྨེ་ན ཝི་ན་ཡེ་ན སཱ་མ་གྒིཾ ཀ་ཏྭཱ ས་མ་གྒེ་ཧེ་ཝ ཨ་ས་ཉྙ་ཏཱ བྷི་ཀྑཱུ ཝི་ནེ་ཏ་བྦཱ་ཏི ཨ་དྷི་པྤཱ་ཡོ. ཏེ་ནཱ་ཧ ‘‘ས་ཙེ ས་ངྒྷོ ཨ་ཙྩ་ཡཾ དེ་སཱ་པེ་ཏྭཱ’’ཏི་ཨཱ་དི. བྷི་ཀྑུ་ནོ ན་ཀྑ་མ་ཏཱིཏི ཀེ་སུ་ཙི པུ་གྒ་ལེ་སུ ཨ་པྤ་མ་ཏྟ་ཀ་དོ་ས་ད་སྶ་ནེ་ན ན རུ་ཙྩ་ཏི. དི་ཊྛཱ་ཝི་ཀ་མྨ་མྤི ཀ་ཏྭཱཏི ‘‘ན མེ་ཏཾ ཁ་མ་ཏཱི’’ཏི ས་བྷཱ་ག་སྶ བྷི་ཀྑུ་ནོ ཨ་ཏྟ་ནོ དི་ཊྛིཾ ཨཱ་ཝི་ཀ་ཏྭཱ. ཨུ་པེ་ཏ་བྦཱཏི སཱ་ས་ན་ཧཱ་ནི་ཡཱ ཨ་བྷཱ་ཝཱ སཱ་མ་གྒིཾ ཨ་ཀོ་པེ་ཏྭཱ ཀཱ་ཡ་སཱ་མ་གྒཱི དཱ་ཏ་བྦཱ, ཨཱི་དི་སེ ཋཱ་ནེ ཨ་ལ་ཛྫི་པ་རི་བྷོ་གོ ཨཱ་པ་ཏྟི་ཀ་རོ ན ཧོ་ཏི, ཝ་ཊྚ་ཏི་ཡེ་ཝ. ཡེ པ་ན སཱ་ས་ན་ཝི་ནཱ་སཱ་ཡ པ་ཊི་པ་ནྣཱ, ཏེ་ཧི ས་ཧ ན ཝ་ཏྟ་ཏི, ཨཱ་པ་ཏྟི ཨེ་ཝ ཧོ་ཏི སཱ་ས་ན་ཝི་ནཱ་སོ ཙ. ཏེ་ནཱ་ཧ ‘‘ཡ་ཏྲ པ་ན ཨུ་དྡྷ་མྨ’’ནྟི་ཨཱ་དི. ‘‘དི་ཊྛཱ་ཝི་ཀ་མྨཾ ན ཝ་ཊྚ་ཏཱི’’ཏི ཨི་མི་ནཱ དི་ཊྛི་ཡཱ ཨཱ་ཝི་ཀ་ཏཱ་ཡ་པི ཨཱ་པ་ཏྟིཾ ད་སྶེ་ཏི.
༤༢༢. ཀ་ཎྷ་ཝཱ་ཙོཏི རཱ་ག་དོ་སཱ་དཱི་ཧི ཀི་ལི་ཊྛ་ཝ་ཙ་ནོ. ཨ་ན་ཏྠ་ཀ་ཝ་ཙ་ན་སྶ དཱི་པ་ནཾ པ་ཀཱ་ས་ནཾ ཨ་སྶཱ་ཏི ཨ་ན་ཏྠ་ཀ་དཱི་པ་ནོ. མཱ་ནཾ ནི་སྶཱ་ཡཱཏི ཝི་ནི་ཙྪ་ཡ་ཀ་ར་ཎཾ ཏ་ཝ བྷཱ་རོ་ཏི ས་ངྒྷེ་ན བྷཱ་རེ ཨ་ཀ་ཏེ་པི ‘‘ཨ་ཧ་མེ་ཝེ་ཏྠ ཝོ་ཧ་རི་ཏུཾ ཨ་ར་ཧ་རཱུ་པོ’’ཏི མཱ་ནཾ ནི་སྶཱ་ཡ. ཡ་ཐཱ་དི་ཊྛི་ཡཱཏི ཨ་ནུ་རཱུ་པ་ལ་དྡྷི་ཡཱ. ཡ་སྶ ཧི ཨ་ཏྠ་སྶ ཡཱ་དི་སཱི དི་ཊྛི ཨ་ནུ་རཱུ་པཱ, ཏཾ ག་ཧེ་ཏྭཱ ན བྱཱ་ཀ་ཏཱ་ཏི ཨ་ཏྠོ.ཨ་སྶ ཨ་ཏྟ་ནོཏི ཨ་དྷ་མྨཱ་དི་ཨ་ཏྠཾ ས་ནྡྷཱ་ཡ ཝ་ད་ཏི, ན པུ་གྒ་ལཾ, ཨ་སྶ ཨ་དྷ་མྨཱ་དི་ཨ་ཏྠ་ས་ངྑཱ་ཏ་སྶ ཨ་ཏྟ་ནོ ས་རཱུ་པ་སྶ ཡཱ ཨ་ནུ་རཱུ་པཱ དི་ཊྛཱི་ཏི ཨ་ཏྠོ. ལ་དྡྷིཾ ནི་ཀྑི་པི་ཏྭཱཏི ཨ་ནུ་རཱུ་པ་ལ་དྡྷིཾ ཚ་ཌྜེ་ཏྭཱ, ཨ་གྒ་ཧེ་ཏྭཱ་ཏི ཨ་ཏྠོ. ཏེ་ནཱ་ཧ ‘‘ཨ་དྷ་མྨཱ་དཱི་སུ དྷ་མྨཱ་དི་ལ་དྡྷི་ཀོ ཧུ་ཏྭཱ’’ཏི. ཨ་ཐ ཝཱ ཨ་ཏྟ་ནོ ལ་དྡྷིཾ ནི་གཱུ་ཧི་ཏྭཱ པུ་གྒ་ལཱ་ནུ་གུ་ཎཾ ཏ་ཐཱ བྱཱ་ཀ་རོ་ནྟོ ན ཡ་ཐཱ་དི་ཊྛི་ཡཱ བྱཱ་ཀ་ཏཱ ནཱ་མ. ཨི་མ་སྨིཾ པ་ཀྑེ ཨ་དྷ་མྨཱ་དཱི་སུ དྷ་མྨཱ་དི་ལ་དྡྷི་ཀོ ཧུ་ཏྭཱཏི ཨེ་ཏྠ ཨ་དྷ་མྨཱ་དཱི་སུ དྷ་མྨཱ་དི་ལ་དྡྷི་ཀོ ཝི་ཡ ཧུ་ཏྭཱ་ཏི ཨ་ཏྠོ ག་ཧེ་ཏ་བྦོ.
ན་པྤ་ཊི་པྤ་སྶ་མྦྷ་ན་ཝ་གྒ་ཝ་ཎྞ་ནཱ ནི་ཊྛི་ཏཱ.
ཝོ་ཧཱ་ར་ཝ་གྒཱ་དི་ཝ་ཎྞ་ནཱ
༤༢༤. ཀ་མྨ་ཉ་ཏྟཱིཏི ཀ་མྨ་བྷཱུ་ཏཱ ཉ་ཏྟི. ཨ་ནུ་སྶཱ་ཝ་ན་ནི་ར་པེ་ཀྑཱ ཉ་ཏྟི་ཀ་མྨ་བྷཱུ་ཏཱ ཉ་ཏྟཱི་ཏི ཨ་ཏྠོ. ཀ་མྨ་པཱ་ད་ཉ་ཏྟི ནཱ་མ ཉ་ཏྟི་དུ་ཏི་ཡ་ཀ་མྨཱ་དཱི་སུ ཨ་ནུ་སྶཱ་ཝ་ན་ཀ་མྨ་སྶ པཱ་ད་བྷཱུ་ཏཱ ཨ་དྷི་ཊྛཱ་ན་བྷཱུ་ཏཱ ཉ་ཏྟི. ན་ཝ་སུ ཋཱ་ནེ་སཱུཏི ཨོ་སཱ་ར་ཎཱ་དཱི་སུ ན་ཝ་སུ ཋཱ་ནེ་སུ. དྭཱི་སུ ཋཱ་ནེ་སཱུཏི ཉ་ཏྟི་དུ་ཏི་ཡ་ཉ་ཏྟི་ཙ་ཏུ་ཏྠ་ཀ་མྨེ་སུ.
སུ་ཏྟཱ་ནུ་ལོ་མནྟི ཨུ་བྷ་ཏོ་ཝི་བྷ་ངྒེ སུ་ཏྟཱ་ནུ་ལོ་མ་བྷཱུ་ཏེ མ་ཧཱ་པ་དེ་སེ ས་ནྡྷཱ་ཡ ཝུ་ཏྟཾ. ཝི་ན་ཡཱ་ནུ་ལོ་མནྟི ཁ་ནྡྷ་ཀ་པ་རི་ཝཱ་རཱ་ནུ་ལོ་མ་བྷཱུ་ཏེ མ་ཧཱ་པ་དེ་སེ. སུ་ཏྟ་ནྟི་ཀེ ཙ་ཏྟཱ་རོ མ་ཧཱ་པ་དེ་སེཏི སུ་ཏྟཱ་བྷི་དྷ་མྨ་པི་ཊ་ཀེ་སུ ཨ་ནུ་ཉྙཱ་ཏ་པ་ཊི་ཀྑི་ཏྟ་སུ་ཏྟཱ་ནུ་ལོ་མ་ཝ་སེ་ན ན་ཡ་ཏོ ག་ཧེ་ཏ་བྦེ ཙ་ཏྟཱ་རོ ཨ་ཏྠེ.
༤༢༥. དི་ཊྛཱི་ནཾ ཨཱ་ཝི་ཀ་མྨཱ་ནཱིཏི ཨཱ་པ་ཏྟི་ལ་དྡྷཱི་ནཾ པ་ཀཱ་ས་ནཱ་ནི, ཨཱ་པ་ཏྟི་དེ་ས་ནཱ་ཀ་མྨཱ་ནཱི་ཏི ཨ་ཏྠོ.
ཡ་ཐཱ ཙ་ཏཱུ་ཧི པ་ཉྩ་ཧི དི་ཊྛི ཨཱ་ཝི་ཀ་ཏཱ ཧོ་ཏཱིཏི ཡ་ཐཱ ཨཱ་ཝི་ཀ་ཏེ ཙ་ཏཱུ་ཧི པ་ཉྩ་ཧི ཨེ་ཀཱི་བྷཱུ་ཏེ་ཧི ཨེ་ཀ་སྶ པུ་གྒ་ལ་སྶ ས་ནྟི་ཀེ ཨཱ་པ་ཏྟི དེ་སི་ཏཱ ནཱ་མ ཧོ་ཏི, ཨེ་ཝཾ དེ་སེ་ཏཱི་ཏི ཨ་ཏྠོ. ཨེ་ཝཾ དེ་སེ་ནྟོ ཙ ཨ་ཏྟ་ནཱ ས་དྡྷིཾ ཏ་ཡོ ཝཱ ཙ་ཏྟཱ་རོ ཝཱ བྷི་ཀྑཱུ ག་ཧེ་ཏྭཱ ཨེ་ཀ་སྶ ས་ནྟི་ཀེ དེ་སེ་ཏི. ཨེ་ཝཾ དེ་སེ་ཏུཾ ན ཝ་ཊྚ་ཏི. དེ་སི་ཏཱ ཙ ཨཱ་པ་ཏྟི ན ཝུ་ཊྛཱ་ཏི, དེ་ས་ནཱ་པ་ཙྩ་ཡཱ དུ་ཀྐ་ཊ་ཉྩ ཧོ་ཏི. དྭི་ནྣཾ ཏི་ཎྞཾ པ་ན ཨེ་ཀ་ཏོ དེ་སེ་ཏུཾ ཝ་ཊྚ་ཏི.
༤༤༤. ཨ་ད་སྶ་ནེ་ནཱཏི ཨི་མ་སྶ ཨ་ཀ་པྤི་ཡཾ པ་རི་ཝ་ཛྫེ་ནྟཱ་ནཾ ཝི་ན་ཡ་དྷ་རཱ་ནཾ པ་ཊི་པ་ཏྟི་ཡཱ ཨ་ད་སྶ་ནེ་ན, ཏེ་སཾ དི་ཊྛཱ་ནུ་ག་ཏིཾ ཨ་ནཱ་པ་ཛྫ་ནེ་ནཱ་ཏི་པི ཨ་ཏྠོ ག་ཧེ་ཏ་བྦོ. ཨ་ཀ་པྤི་ཡེ ཀ་པྤི་ཡ་ས་ཨ་ཉ་ཏཱ་ཡཱཏི ར་ཛ་ཏཱ་དི་ཨ་ཀ་པྤི་ཡེ ཏི་པུ་ཨཱ་དི་ས་ཉྙི་ཏཱ་ཡ. པུ་ཙྪི་ཏྭཱ ཝཱ ཨ་ཉྙེ་སཾ ཝཱ ཝུ་ཙྩ་མཱ་ནཾ ཨ་སུ་ཎ་ནྟོ ཨཱ་པ་ཛྫ་ཏཱིཏི ཨེ་ཏྠ པུ་ཙྪི་ཏྭཱ ཨ་སུ་ཎ་ནྟོ ཝཱ པུ་ཙྪི་ཡ་མཱ་ནཾ ཨ་སུ་ཎ་ནྟོ ཝཱ་ཏི པ་ཙྩེ་ཀཾ ཡོ་ཛེ་ཏ་བྦཾ. ཨེ་ཀ་ར་ཏྟཱ་ཏི་ཀྐ་མཱ་དི་ཝ་སེ་ནཱཏི ཨ་དྷི་ཊྛི་ཏ་ཙཱི་ཝ་རེ་ན ཝི་པྤ་ཝ་སི་ཏྭཱ ཨེ་ཀ་ར་ཏྟཱ་ཏི་ཀྐ་མེ་ན པཱ་ཙི་ཏྟི་ཡཾ ཨཱ་པ་ཛྫ་ཏི. ཨཱ་དི-ས་དྡེ་ན ཚ་ར་ཏྟཱ་ཏི་ཀྐ་མཱ་དཱི་ནཾ ས་ངྒ་ཧོ.
༤༥༠. ཨ་ན་ཏྠཾ ཀ་ལི་སཱ་ས་ནནྟི ཨ་ན་ཏྠཱ་ཝ་ཧཾ ཀོ་དྷ་ཝ་ཙ་ནཾ ཨཱ་རོ་པེ་ནྟོ དོ་སཾ ཨཱ་རོ་པེ་ནྟོ ཨུ་པ་དྡ་ཝཱ་ཡ པ་རི་ས་ཀྐ་ཏཱི་ཏི ཨ་ཏྠོ.
༤༥༤. ཝོ་ཧཱ་ར་ནི་རུ་ཏྟི་ཡནྟི ཏ་སྶ ཏ་སྶ ཨ་ཏྠ་སྶ ཝཱ་ཙ་ཀ་ས་དྡེ པ་བྷེ་ད་ག་ཏ་ཉཱ་ཎ་པྤ་ཏྟོ ན ཧོ་ཏཱི་ཏི ཨ་ཏྠོ.
༤༥༥. པ་རི་མ་ཎྜ་ལ་བྱ་ཉྫ་ནཱ་རོ་པ་ནེ ཀུ་ས་ལོ ན ཧོ་ཏཱིཏི པ་རི་མ་ཎྜ་ལེ་ན པ་ད་བྱ་ཉྫ་ནེ་ན ཝ་ཏྠུཾ, པ་རེ་ཧི ཝུ་ཏྟཾ ཛཱ་ནི་ཏུ་ཉྩ ཨ་ས་མ་ཏྠོ་ཏི ཨ་ཏྠོ.
༤༥༨. ཨ་ནུ་སྶཱ་ཝ་ནེ་ནཱཏི ཨ་ནུ ཨ་ནུ ཀ་ཐ་ནེ་ན. ཏེ་ནཱ་ཧ ‘‘ན་ནུ ཏུ་མྷེ’’ཏི་ཨཱ་དི, ཡཾ ཨ་ཝོ་ཙུ་མྷ, སྭཱ་ཡཾ པ་ཀཱ་སི་ཏོ་ཏི ས་མྦ་ནྡྷོ. ཏ་ཏྠ ཡནྟི ཨི་དཾ ཡ་སྨཱ ཝ་ཙ་ནཱ་པེ་ཀྑཾ ན ཧོ་ཏི, ཝ་ཙ་ན་ཏྠཱ་པེ་ཀྑ་མེ་ཝ, ཏ་སྨཱ ཏེ་ན ཝ་ཙ་ནེ་ན ནཱ་ནཱ་ཀ་ར་ཎཱ་བྷཱ་ཝཾ པ་ཀཱ་ས་ཡི་སྶཱ་མཱ་ཏི ཡ་མ་ཏྠཾ ཨ་ཝོ་ཙུ་མྷཱ་ཏི ཨ་ཏྠོ ག་ཧེ་ཏ་བྦོ. ཏེ་ནེ་ཝ ‘‘སྭཱ་ཡ’’ནྟི པུ་ལླི་ངྒ་ཝ་སེ་ན པ་ཊི་ནི་དྡེ་སོ ཀ་ཏོ, ཏ་སྶ སོ ཨ་ཡཾ ནཱ་ནཱ་ཀ་ར་ཎཱ་བྷཱ་ཝོ་ཏི ཨ་ཏྠོ.
༤༦༧. མ་ཉྩ་པ་དཱ་དཱི་སུ་པི ན་ལཱ༹་ཊཾ པ་ཊི་ཧ་ཉྙེ་ཡྻཱཏི ཨ་ནྡྷ་ཀཱ་རེ ཙ་མྨ་ཁ་ཎྜཾ པ་ཉྙ་པེ་ཏྭཱ ཝ་ནྡི་ཏུཾ ཨོ་ན་མ་ནྟ་སྶ ན་ལཱ༹་ཊཾ ཝཱ ཨ་ཀྑི ཝཱ མ་ཉྩཱ་དཱི་སུ པ་ཊི་ཧ་ཉྙ་ཏི. ཨེ་ཏེ་ན ཝ་ནྡ་ཏོ་པི ཨཱ་པ་ཏྟི་ཨ་བྷཱ་ཝཾ ཝ་ཏྭཱ ཝ་ནྡ་ནཱ་ཡ ས་བྦ་ཐཱ པ་ཊི་ཀྑེ་པཱ་བྷཱ་ཝ་ཉྩ དཱི་པེ་ཏི. ཨེ་ཝཾ ས་བྦ་ཏྠ སུ་ཏྟ་ནྟ་རེ་ཧི ཨ་པྤ་ཊི་ཀྑི་ཏྟེ་སུ. ན་གྒཱ་དཱི་སུ པ་ན ཝ་ནྡི་ཏུཾ ན ཝ་ཊྚ་ཏཱི་ཏི. ཨེ་ཀ་ཏོ ཨཱ་ཝ་ཊྚོཏི ཨེ་ཀ་སྨིཾ དོ་སཱ་ག་ཏི་པ་ཀྑེ པ་རི་ཝ་ཏྟོ པ་ཝི་ཊྛོ་ཏི ཨ་ཏྠོ. ཏེ་ནཱ་ཧ ‘‘ས་པ་ཏྟ་པ་ཀྑེ ཋི་ཏོ’’ཏི. ཝ་ནྡི་ཡ་མཱ་ནོཏི ཨོ་ན་མི་ཏྭཱ ཝ་ནྡི་ཡ་མཱ་ནོ. ཝ་ནྡི་ཏ་བྦེ་སུ ཨུ་དྡེ་སཱ་ཙ་རི་ཡོ, ནི་སྶ་ཡཱ་ཙ་རི་ཡོ ཙ ཡ་སྨཱ ན་ཝ་ཀཱ་པི ཧོ་ནྟི, ཏ་སྨཱ ཏེ ཝུ་ཌྜྷཱ ཨེ་ཝ ཝ་ནྡི་ཡཱ་ཏི ཝེ་དི་ཏ་བྦཱ.
༤༧༠. པུ་བྦེ ཝུ་ཏྟ་མེ་ཝཱཏི ས་ཧ་སེ་ཡྻཱ་དི་པ་ཎྞ་ཏྟི་ཝ་ཛྫཾ. ཨི་ཏ་རནྟི ས་ཙི་ཏྟ་ཀཾ.
ཝོ་ཧཱ་ར་ཝ་གྒཱ་དི་ཝ་ཎྞ་ནཱ ནི་ཊྛི་ཏཱ.