༦. སེ་ནཱ་ས་ན་ཀྑ་ནྡྷ་ཀ་ཝ་ཎྞ་ནཱ
ཝི་ཧཱ་རཱ་ནུ་ཛཱ་ན་ན་ཀ་ཐཱ་ཝ་ཎྞ་ནཱ
༢༩༤. ནི་ལཱི་ཡ་ནྟི བྷི་ཀྑཱུ ཨེ་ཏྠཱ་ཏི ཝི་ཧཱ་རཱ་ད་ཡོ ལེ་ཎཱ་ནི ནཱ་མ. ཨཱ་ག་ཏ-ཝ་ཙ་ནེ་ན ཏ་སྶཱ་ག་ཏ་ས་ངྒྷོ་ཝ སཱ་མཱི, ན ཨ་ནཱ་ག་ཏོ་ཏི ཀེ་ཙི, ཏཾ ན ཡུ་ཛྫ་ཏི ས་མཱ་ན་ལཱ་བྷ་ཀ་ཏི་ཀཱ་ཡ སི་དྡྷ་ཏྟཱ.
༢༩༦-༧. དཱི་པི་ན་ངྒུ་ཊྛེ་ནཱཏི ཨེ་ཏྠ ‘‘དཱི་པི་ནཱ ཨ་ཀ་པྤི་ཡ་ཙ་མྨཾ ད་སྶེ་ཏཱི’’ཏི ལི་ཁི་ཏཾ. ཐ་མྦྷ་ཀ་ཝཱ་ཏ་པཱ་ནཾ ནཱ་མ ཏི་རི་ཡཾ དཱ་རཱུ་ནི ཨ་ད་ཏྭཱ ཨུ་ཛུ་ཀཾ ཋི་ཏེ་ཧེ་ཝ དཱ་རཱུ་ཧི ཀ་ཏྟ་བྦཾ. བྷི་སཱི་ནཾ ཨ་ནུ་ཉྙཱ་ཏཾ ཝ་ཊྚ་ཏཱི་ཏི བི་མྦོ་ཧ་ནེ ཝ་ཊྚ་ཏཱི་ཏི ཨ་ཏྠོ. ཏཱུ་ལ་པཱུ་རི་ཏཾ བྷི་སིཾ ཨ་པ་སྶ་ཡི་ཏུཾ ན ཝ་ཊྚ་ཏི ཨུ་ཎྞཱ་དཱི་ནཾ་ཡེ་ཝ ཨ་ནུ་ཉྙཱ་ཏ་ཏྟཱ. ནི་སཱི་ད་ན་ནི་པ་ཛྫ་ནཾ ས་ནྡྷཱ་ཡ ཝུ་ཏྟཾ, ཏ་སྨཱ ཨ་པ་སྶ་ཡི་ཏུཾ ཝ་ཊྚ་ཏཱི་ཏི ཙེ? ཨ་ཀ་པྤི་ཡ་ནྟི ན ཝ་ཊྚ་ཏཱི་ཏི ཀེ་ཙི. ཡ་དི ཨེ་ཝཾ ཨ་ཀ་པྤི་ཡ་མ་ཉྩ་ཉྩ ཨ་པ་སྶ་ཡི་ཏུཾ ན ཝ་ཊྚེ་ཡྻ. ཡ་སྨཱ ཝ་ཊྚ་ཏི, ཏ་སྨཱ དོ་སོ ན་ཏྠི. ཨ་པི་ཙ གི་ལཱ་ན་སྶ བི་མྦོ་ཧ་ནཾ ནི་པ་ཛྫི་ཏུ་མྤི ཨ་ནུ་ཉྙཱ་ཏཾ, ཏ་སྨཱ བྷི་སི་པི ཝ་ཊྚ་ཏི ཨ་པ་སྶ་ཡི་ཏུཾ. ཨཱ་ཙ་རི་ཡཱ ཙ ཨ་ནུ་ཛཱ་ན་ནྟི, ཝ་ལ༹་ཉྫེ་ནྟི ཙཱ་ཏི ཨེ་ཀེ. སི་མྦ་ལི་ཏཱུ་ལ་སུ་ཏྟེ་ན སི་བྦི་ཏཾ ཙཱི་ཝ་རཾ ཝ་ཊྚ་ཏི. ཀ་སྨཱ? ཀ་པྤཱ་ས་སྶ ཨ་ནུ་ལོ་མ་ཏོ. ‘‘ཨ་ཀྐ་ཕ་ལ་སུ་ཏྟ་མ་ཡ་མྤི ཨ་ཀྐ་ཝཱ་ཀ་མ་ཡ་མེ་ཝ པ་ཊི་ཀྑི་ཏྟ’’ནྟི ཏེ ཨེ་ཝ ཝ་ད་ནྟི.
༢༩༨. ཨ་ནི་བ་ནྡྷ་ནཱི་ཡོ ཨ་ལ་གྒོ. པ་ཊི་བཱ་ཧེ་ཏྭཱཏི མ་ཊྛཾ ཀ་ཏྭཱ. ‘‘སེ་ཏ་ཝ་ཎྞཱ་དཱི་ནཾ ཡ་ཐཱ་ས་ངྑྱཾ ཨི་ཀྐཱ་སཱ་ད་ཡོ བ་ནྡྷ་ན་ཏྠཾ ཝུ་ཏྟཱ’’ཏི ལི་ཁི་ཏཾ.
༣༠༠. པ་ཀུ་ཊྚཾ ས་མ་ནྟ་ཏོ ཨཱ་ཝི་དྡྷ་པ་མུ་ཁཾ.
༣༠༣. སུ་དྷཱ་ལེ་པོཏི སུ་དྷཱ་མ་ཏྟི་ཀཱ་ལེ་པོ.
༣༠༥. ཨཱ་ས་ཏྟི ཏ་ཎྷཱ. ས་ནྟིཾ ཨ་ད་རཾ.
༣༠༧. ཀེ་ཏུནྟི ཀ་ཡེ་ན ག་ཧེ་ཏུཾ.
༣༠༨. ཙི་ཏཱཏི ཨི་ཊྛ་ཀཱ་ཡོ ཀ་བ་ལེ༹་ན ནི་དྡྷ་མ་ན་ཝ་སེ་ན ཚི་ནྡི་ཏྭཱ ཀ་ཏཱ་ཏི ཨ་ཏྠོ.
༣༡༠. ཚ་བྦ་གྒི་ཡཱ་ནཾ བྷི་ཀྑཱུ་ནཾ ཨ་ནྟེ་ཝཱ་སི་ཀཱཏི ཨེ་ཏྠ ཝཱི་ས་ཏི་ཝ་སྶཾ ཨ་ཏི་ཀྐ་མི་ཏྭཱ ཚ་བྦ་གྒི་ཡཱ ཨུ་པྤ་ནྣཱ. ‘‘ཨཱ་རཱ་དྷ་ཡིཾ་སུ མེ བྷི་ཀྑཱུ ཙི་ཏྟ’’ནྟི (མ. ནི. ༡.༢༢༥) ཝུ་ཏྟ་ཏྟཱ ཨ་ཉྙ་སྨིཾ ཀཱ་ལེ སཱ་ཝ་ཏྠི་ག་མ་ནེ ཨུ་པྤ་ནྣཾ ཝ་ཏྠུཾ ཨི་དྷ ཨཱ་པ་ཏྟི་ད་སྶ་ན་ཏྠཾ ཨཱ་ཧ་རི་ཏྭཱ ཝུ་ཏྟ་ནྟི ཡུ་ཏྟཾ ཝི་ཡ, ཝི་ཙཱ་རེ་ཏྭཱ ག་ཧེ་ཏ་བྦཾ. ཝུ་དྡྷནྟི ཝུ་དྡྷ་ཏ་རཾ.
༣༡༣. ས་ནྠ་རེཏི ཏི་ཎ་ས་ནྠ་རཱ་ད་ཡོ.
སེ་ནཱ་ས་ན་གྒཱ་ཧ་ཀ་ཐཱ་ཝ་ཎྞ་ནཱ
༣༡༨. ‘‘སེ་ཡྻ་གྒེ་ནཱཏི མ་ཉྩ་ཊྛཱ་ན་པ་རི་ཙྪེ་དེ་ན. ཝི་ཧཱ་ར་གྒེ་ནཱཏི ཨོ་ཝ་ར་ཀ་གྒེ་ནཱ’’ཏི ལི་ཁི་ཏཾ. ཐཱ་ཝ་རཱཏི ནི་ཡ་ཏཱ. པ་ཙྩ་ཡེ་ནེ་ཝ ཧི ཏནྟི ཏ་སྨིཾ སེ་ནཱ་ས་ནེ མ་ཧཱ་ཐེ་རཱ ཏ་སྶ པ་ཙྩ་ཡ་སྶ ཀཱ་ར་ཎཱ ཨ་ཉྙ་ཏྠ ཨ་ག་ནྟྭཱ ཝ་ས་ནྟཱ་ཡེ་ཝ ནཾ པ་ཊི་ཛ་གྒི་སྶ་ནྟཱི་ཏི ཨ་ཏྠོ. ཨ་གྷ་ཊྚ་ན་ཀ་མྨཾ ད་སྶེ་ཏུཾ ‘‘ན ཏ་ཏྠ མ་ནུ་སྶཱ’’ཏི་ཨཱ་དི་མཱ་ཧ. ‘‘ཝི་ཏ་ཀྐཾ ཚི་ནྡི་ཏྭཱ སུ་དྡྷ་ཙི་ཏྟེ་ན ག་མ་ན་ཝ་ཏྟེ་ནེ་ཝ ག་ནྟ་བྦ’’ནྟི པཱ་ཋོ. མུ་དྡ་ཝེ་དི་ཀཱ ནཱ་མ ཙེ་ཏི་ཡ་སྶ ཧ་མྨི་ཡ་ཝེ་དི་ཀཱ. པ་ཊི་ཀྐ་མྨཱཏི ཨ་པ་ས་ཀྐི་ཏྭཱ. ས་མཱ་ན་ལཱ་བྷ་ཀ་ཏི་ཀཱ མཱུ་ལཱ་ཝཱ་སེ ས་ཏི སི་ཡཱ, མཱུ་ལཱ་ཝཱ་ས་ཝི་ནཱ་སེ་ན ཀ་ཏི་ཀཱ་པི ཝི་ན་སྶ་ཏི. ས་མཱ་ན་ལཱ་བྷ-ཝ་ཙ་ནཾ ས་ཏི དྭཱི་སུ, བ་ཧཱུ་སུ ཝཱ ཡུ་ཛྫ་ཏི, ཏེ་ནེ་ཝ ཨེ་ཀ་སྨིཾ ཨ་ཝ་སི་ཊྛེ་ཏི ནོ མ་ཏི. ཏཱ་ཝ་ཀཱ་ལི་ཀཾ ཀཱ་ལེ་ན མཱུ་ལ་ཙྪེ་ད་ན་ཝ་སེ་ན ཝཱ ཨ་ཉྙེ་སཾ ཝཱ ཀ་མྨཾ ཨ་ཉྙ་སྶ སི་ཡཱ ནཱ་ཝཱ་ཡཾ ས་ངྒ་མོ་ཏི ཨཱ་ཙ་རི་ཡོ. པུ་གྒ་ལ་ཝ་སེ་ནེ་ཝ ཀཱ་ཏ་བྦནྟི ཨ་པ་ལོ་ཀ་ན་ཀཱ་ལེ ས་ངྒྷོ ཝ་སྶཾ་ཝུ་ཏྠ་བྷི་ཀྑཱུ་ནཾ པཱ་ཊེ་ཀྐཾ ‘‘ཨེ་ཏྟ་ཀཾ ཝ་སྶཱ་ཝཱ་སི་ཀཾ ཝ་ཏྠཾ དེ་ཏི, རུ་ཙྩ་ཏི ས་ངྒྷ་སྶཱ’’ཏི པུ་གྒ་ལ་མེ་ཝ པ་རཱ་མ་སི་ཏྭཱ དཱ་ཏ་བྦཾ, ན ས་ངྒྷ་ཝ་སེ་ན ཀཱ་ཏ་བྦཾ. ན ས་ངྒྷོ ས་ངྒྷ་སྶ ཨེ་ཏྟ་ཀཾ དེ་ཏཱི་ཏི. ‘‘ཨེ་ཀ་སྨིཾ ཨཱ་ཝཱ་སེ ས་ངྒྷ་སྶ ཀ་མྨཾ ཀ་རོ་ཏཱི’ཏི ཝ་ཙ་ན་ཏོ ས་ངྒྷ་ཝ་སེ་ན ཀཱ་ཏ་བྦ’’ནྟི ལི་ཁི་ཏཾ. ན ཧི ཏ་ཐཱ ཝུ་ཏྟེ ས་ངྒྷ་སྶ ཀི་ཉྩི ཀ་མྨཾ ཀ་ཏཾ ནཱ་མ ཧོ་ཏི. ‘‘ས་མྨ་ཏ་སེ་ནཱ་ས་ན་གྒཱ་ཧཱ་པ་ཀ་ཏོ ཨ་ཉྙེ་ན གཱ་ཧི་ཏེ་པི གཱ་ཧོ རུ་ཧ་ཏི ཨ་གྒ་ཧི་ཏུ་པ་ཛ྄ཛྷཱ་ཡ་སྶ ཨུ་པ་ས་མྤ་དཱ ཝི་ཡཱ’’ཏི ལི་ཁི་ཏཾ. ‘‘ཀ་མྨ་ཝཱ་ཙཱ་ཡ་པི ས་མྨུ་ཏི ཝ་ཊྚ་ཏཱི’’ཏི ལི་ཁི་ཏཾ.
ཨ་ཊྛ་པི སོ་ལ༹་ས་པི ཛ་ནེཏི ཨེ་ཏྠ ཀིཾ ཝི་སུཾ ཝི་སུཾ, ཨུ་དཱ་ཧུ ཨེ་ཀ་ཏོ་ཏི? ཨེ་ཀ་ཏོ་པི ཝ་ཊྚ་ཏི. ན ཧི ཏེ ཏ་ཐཱ ས་མྨ་ཏཱ ས་ངྒྷེ་ན ཀ་མྨ་ཀ་ཏཱ ནཱ་མ ཧོ་ནྟི, ཏེ་ནེ་ཝ ས་ཏྟ་ས་ཏི་ཀ་ཀྑ་ནྡྷ་ཀེ ཨེ་ཀ་ཏོ ཨ་ཊྛ ཛ་ནཱ ས་མྨ་ཏཱ་ཏི. ཏེ་སཾ ས་མྨུ་ཏི ཀ་མྨ་ཝཱ་ཙཱ་ཡ་པཱིཏི ཉ་ཏྟི་དུ་ཏི་ཡ་ཀ་མྨ་ཝཱ་ཙཱ་ཡ་པི. ཨ་པ་ལོ་ཀ་ན་ཀ་མྨ་སྶ ཝ་ཏྠཱུ་ཧི སཱ ཨེ་ཝ ཀ་མྨ་ཝཱ་ཙཱ ལ་བྦྷ་མཱ་ནཱ ལ་བྦྷ་ཏི, ཏ་སྶཱ ཙ ཝ་ཏྠཱུ་ཧི ཨ་པ་ལོ་ཀ་ན་ཀ་མྨ་མེ་ཝ ལ་བྦྷ་མཱ་ནཾ ལ་བྦྷ་ཏི, ན ཨ་ཉྙ་ནྟི ཝེ་དི་ཏ་བྦཾ. ཨི་མཾ ན་ཡཾ མི་ཙྪཱ ག་ཎྷ་ནྟོ ‘‘ཨ་པ་ལོ་ཀ་ན་ཀ་མྨཾ ཉ་ཏྟི་དུ་ཏི་ཡ་ཀ་མྨཾ ཀཱ་ཏུཾ, ཉ་ཏྟི་དུ་ཏི་ཡ་ཀ་མྨ་ཉྩ ཨ་པ་ལོ་ཀ་ན་ཀ་མྨཾ ཀཱ་ཏུཾ ཝ་ཊྚ་ཏཱི’’ཏི ག་ཎྷཱ་ཏི, ཨེ་ཝ་ཉྩ ས་ཏི ཀ་མྨ་ས་ངྐ་ར་དོ་སོ ཨཱ་པ་ཛྫ་ཏི. མ་གྒོ པོ་ཀྑ་ར་ཎཱིཏི ཨེ་ཏྠ མ་གྒོ ནཱ་མ མ་གྒེ ཀ་ཏ་དཱི་གྷ་སཱ་ལཱ, པོ་ཀྑ་ར་ཎཱིཏི ན་ཧཱ་ཡི་ཏུཾ ཀ་ཏ་པོ་ཀྑ་ར་ཎཱི. ཨེ་ཏཱ་ནི ཧི ཨ་སེ་ནཱ་ས་ནཱ་ནཱིཏི ཨེ་ཏྠ བྷ་ཏྟ་སཱ་ལཱ ན ཨཱ་ག་ཏཱ, ཏ་སྨཱ ཏཾ སེ་ནཱ་ས་ན་ནྟི ཙེ? སཱ་པི ཨེ་ཏྠེ་ཝ པ་ཝི་ཊྛཱ ཝཱ་ས་ཏྠཱ་ཡ ཨ་ཀ་ཏ་ཏྟཱ. བྷོ་ཛ་ན་སཱ་ལཱ པ་ན ཨུ་བྷ་ཡ་ཏྠ ནཱ་ག་ཏཱ. ཀི་ཉྩཱ་པི ནཱ་ག་ཏཱ, ཨུ་པ་རི ‘‘བྷོ་ཛ་ན་སཱ་ལཱ པ་ན སེ་ནཱ་ས་ན་མེ་ཝཱ’’ཏི (ཙཱུ་ལ༹་ཝ. ཨ་ཊྛ. ༣༡༨) ཝུ་ཏྟ་ཏྟཱ སེ་ནཱ་ས་ནཾ. ‘‘ཀ་པྤི་ཡ་ཀུ་ཊི ཙ ཨེ་ཏྠ ཀཱ་ཏ་བྦཱ’’ཏི ཝ་ད་ནྟི, ཏཾ ནེ་ཏི ཨེ་ཀེ. རུ་ཀྑ་མཱུ་ལ་ཝེ་ལུ༹་གུ་མྦཱ ཚ་ནྣཱ ཀ་ཝཱ་ཊ་བ་དྡྷཱ་ཝ སེ་ནཱ་ས་ནཾ. ‘‘ཨ་ལཱ་བྷ་ཀེ་སུ ཨཱ་ཝཱ་སེ་སཱུཏི ཨ་ལཱ་བྷ་ཀེ་སུ སེ་ནཱ་ས་ནེ་སཱུ’’ཏི ལི་ཁི་ཏཾ, ཏཾ ཡུ་ཏྟཾ. ན ཧི པཱ་ཊེ་ཀྐཾ སེ་ནཱ་ས་ནཾ ཧོ་ཏི. ཏཾ ས་ཉྙཱ་པེ་ཏྭཱཏི ཨེ་ཏྠ པ་ཉྙ་ཏྟིཾ ཨ་ག་ཙྪ་ནྟེ བ་ལ་ཀྐཱ་རེ་ན་པི ཝ་ཊྚ་ཏི. ཨ་ཡ་མྤཱིཏི པ་ཙྩ་ཡོ་པི.
ཨུ་པ་ནི་བ་ནྡྷི་ཏྭཱཏི ཏ་སྶ ས་མཱི་པེ རུ་ཀྑ་མཱུ་ལཱ་དཱི་སུ ཝ་སི་ཏྭཱ ཏ་ཏྠ ཝ་ཏྟཾ ཀ་ཏྭཱ་ཏི ཨ་དྷི་པྤཱ་ཡོ. པ་རི་ཡ་ཏྟི་པ་ཊི་པ་ཏྟི་པ་ཊི་ཝེ་དྷ་ཝ་སེ་ན ཏི་ཝི་དྷ་མྤི. ‘‘ད་ས་ཀ་ཐཱ་ཝ་ཏྠུ་ཀཾ ད་ས་ཨ་སུ་བྷཾ ད་ས་ཨ་ནུ་སྶ་ཏི’’ནྟི པཱ་ཋོ. ‘‘པ་ཋ་མ་བྷཱ་གཾ མུ་ཉྩི་ཏྭཱཏི ཨི་དཾ ཙེ པ་ཋ་མ་གཱ་ཧི་ཏ་ཝ་ཏྠུ་ཏོ མ་ཧ་གྒྷཾ ཧོ་ཏཱི’’ཏི ལི་ཁི་ཏཾ. ཚི་ནྣ་ཝ་སྶཱ་ནཾ ཝ་སྶཱ་ཝཱ་སི་ཀཾ ནཱ་མ པུ་བྦེ ག་ཧི་ཏ་ཝ་སྶཱ་ཝཱ་སི་ཀཱ་ནཾ པ་ཙྪཱ ཚི་ནྣ་ཝ་སྶཱ་ནཾ. བྷ་ཏི་ནི་ཝི་ཊྛནྟི བྷ་ཏིཾ ཀ་ཏྭཱ ཝི་ཡ ནི་ཝི་ཊྛཾ པ་རི་ཡི་ཊྛཾ. ‘‘ས་ངྒྷི་ཀཾ པ་ན…པེ… ཝི་བྦྷ་ནྟོ་པི ལ་བྷ་ཏེ་ཝཱ’’ཏི ཨི་དཾ ཏ་ཏྲུ་པྤཱ་དཾ ས་ནྡྷཱ་ཡ ཝུ་ཏྟཾ. ཨི་མི་ནཱ ཨ་པ་ལོ་ཀ་ན་མེ་ཝ པ་མཱ་ཎཾ, ན གཱ་ཧཱ་པ་ན་ནྟི ཀེ་ཙི. ཝི་ན་ཡ་དྷ་རཱ པ་ན ‘‘ཨ་མྷཱ་ཀཾ ཝི་ཧཱ་རེ ཝ་སྶཾ ཨུ་པ་ག་ཏཱ་ནཾ ཨེ་ཀེ་ཀ་སྶ ཏི་ཙཱི་ཝ་རཾ ས་ངྒྷོ ད་སྶ་ཏཱི’ཏི་ཨཱ་དི་ནཱ ཨ་པ་ལོ་ཀི་ཏེ་པི ཨ་བྷཱ་ཛི་ཏཾ ཝི་བྦྷ་ནྟ་ཀོ ན ལ་བྷ་ཏི. ‘ཨ་པ་ལོ་ཀ་ན་ཀ་མྨཾ ཀ་ཏྭཱ གཱ་ཧི་ཏ’ནྟི ཝུ་ཏྟ་ཏྟཱ, ‘ཨ་བྷཱ་ཛི་ཏེ ཝི་བྦྷ་མ་ཏཱི’ཏི ཨེ་ཝཾ པུ་བྦེ ཝུ་ཏྟ་ཏྟཱ ཙཱ’’ཏི ཝ་ད་ནྟི. ‘‘པ་ཙྩ་ཡ་ཝ་སེ་ནཱཏི ག་ཧ་པ་ཏི་ཀཾ ཝཱ ཨ་ཉྙཾ ཝཱ ཝ་སྶཱ་ཝཱ་སི་ཀཾ པ་ཙྩ་ཡ་ཝ་སེ་ན གཱ་ཧི་ཏ’’ནྟི ལི་ཁི་ཏཾ. ‘‘ཨེ་ཀ་མེ་ཝ ཝ་ཏྠཾ དཱ་ཏ་བྦནྟི ཏ་ཏྠ ནི་སི་ནྣཱ་ནཾ ཨེ་ཀ་མེ་ཀཾ ཝ་ཏྠཾ པཱ་པུ་ཎཱ་ཏཱི’’ཏི ལི་ཁི་ཏཾ. དུ་ཏི་ཡོ ཐེ་རཱ་ས་ནེཏི ཨ་ནུ་བྷཱ་གོ. པ་ཋ་མ་བྷཱ་གོ ཨ་ཉྙ་ཐཱ ཐེ་རེ་ན ག་ཧི་ཏོ་ཏི ཛཱ་ནི་ཏ་བྦཾ.
ཨུ་པ་ན་ནྡ་ཝ་ཏྠུ་ཀ་ཐཱ་ཝ་ཎྞ་ནཱ
༣༢༠. ཏི་ཝ་སྶ་ནྟ་རེ་ནཱཏི ཏི་ཎྞཾ ཝ་སྶཱ་ནཾ ཨ་ནྟོ ཋི་ཏེ་ན. ཧ་ཏྠི་མྷི ན་ཁོ ཨ་སྶཱ་ཏི ཧ་ཏྠི་ན་ཁོ. པཱ་སཱ་ད་སྶ ན་ཁོ ནཱ་མ ཧེ་ཊྛི་མ་པ་རི་ཙྪེ་དོ. གི་ཧི་ཝི་ཀ་ཊ་ནཱི་ཧཱ་རེ་ནཱཏི གི་ཧཱི་ཧི ཀ་ཏ་ནཱི་ཧཱ་རེ་ནེ་ཝ. ‘‘ཏེ་ཧི ཨ་ཏྠ་རི་ཏྭཱ དི་ནྣཱ་ནེ་ཝ ནི་སཱི་དི་ཏུཾ ལ་བྦྷ་ནྟི, ན བྷི་ཀྑུ་ནཱ ས་ཡཾ ཨ་ཏྠ་རི་ཏྭཱ ཝི་སྶ་ཛྫི་ཏ་བྦཾ ས་ངྒྷེ་ན ཨ་ཏྠ་རཱ་པེ་ཏྭཱ ཝཱ’’ཏི ལི་ཁི་ཏཾ.
ཨ་ཝི་སྶ་ཛྫི་ཡ་ཝ་ཏྠུ་ཀ་ཐཱ་ཝ་ཎྞ་ནཱ
༣༢༡. ‘‘ན ཝི་སྶ་ཛྫེ་ཏ་བྦཾ ས་ངྒྷེ་ན ཝཱ ག་ཎེ་ན ཝཱ པུ་གྒ་ལེ་ན ཝཱ’’ཏི ཝ་ཙ་ནཾ ‘‘ཡཾ ཨ་ག་རུ་བྷ་ཎྜཾ ཝི་སྶ་ཛྫི་ཡཾ ཝེ་བྷ་ངྒི་ཡཾ ས་ངྒྷི་ཀཾ, ཏཾ ག་ཎོ ཙེ ཏ་སྨིཾ ཨཱ་ཝཱ་སེ ཝ་ས་ཏི པུ་གྒ་ལོ་པི ཝཱ, ག་ཎེ་ན ཝཱ པུ་གྒ་ལེ་ན ཝཱ ཝི་སྶ་ཛྫི་ཏཾ ས་ངྒྷེ་ན ཝི་སྶ་ཛྫི་ཏ་ས་དི་ས་མེ་ཝ ཧོ་ཏཱི’’ཏི ཨ་ཊྛ་ཀ་ཐཱ་ཡཾ ཝུ་ཏྟ་ཝ་ཙ་ནཾ སཱ་དྷེ་ཏི, ཨ་ཉྙ་ཐཱ ཨེ་ཏྠ ག་ཎ་པུ་གྒ་ལ་གྒ་ཧ་ཎཾ ནི་ར་ཏྠ་ཀཾ. ཨ་ར་ཉྫ་རོ ཨུ་ད་ཀ་ཙཱ་ཊི, ཨ་ལ་ཉྫ་ལོ, བ་ཧུ་ཨུ་ད་ཀ་ག་ཎྷ་ན་ཀོ་ཏི ཨ་ཏྠོ. ‘‘ཝ་ཊྚ་ཙཱ་ཊི ཝི་ཡ ཧུ་ཏྭཱ ཐོ་ཀཾ དཱི་གྷ་མུ་ཁོ མ་ཛ྄ཛྷེ པ་རི་ཙྪེ་དཾ ད་སྶེ་ཏྭཱ ཀ་ཏོ’’ཏི ལི་ཁི་ཏཾ. མཾ་ས་དི་བྦ་དྷ་མྨ་བུ་དྡྷ་ས་མ་ནྟ་ཙ་ཀྑུ་ཝ་སེ་ན པ་ཉྩ.
ག་རུ་བྷ་ཎྜེ་ན ཙ ག་རུ་བྷ་ཎྜནྟི སཾ་ཧཱ་རི་མཾ ས་ནྡྷཱ་ཡ ཝུ་ཏྟཾ. པ་ཏྟ་ཙཱི་ཝ་རཾ ནི་ཀྑི་པི་ཏུནྟི ཨ་ཊྚ་ཀ་ཙྪ་ནྣེ་ན ཀ་ཏེ མ་ཉྩེ. ཝ་ཊྚ་ལོ་ཧཾ ནཱ་མ པཱི་ཏ་ཝ་ཎྞཾ. པཱ་རི་ཧཱ་རི་ཡཾ ན ཝ་ཊྚ་ཏཱིཏི ཨཱ་ག་ནྟུ་ཀ་སྶ ཨ་ད་ཏྭཱ པ་རི་ཙཱ་རི་ཀ་ཧ་ཏྠ་ཏོ ཨ་ཏྟ་ནོ ནཱ་མཾ ལི་ཁཱ་པེ་ཏྭཱ ག་ཧེ་ཏྭཱ ཡ་ཐཱ་སུ་ཁཾ པ་རི་ཧ་རི་ཏུཾ ན ཝ་ཊྚ་ཏི. ‘‘གི་ཧི་ཝི་ཀ་ཊ་ནཱི་ཧཱ་རེ་ནེ་ཝཱཏི ཡཱ་ཝ ཨ་ཏྟ་ནོ ཀ་མྨ་ནི་བྦ་ཏྟི, ཏཱ་ཝ ག་ཧེ་ཏྭཱ དེ་ཏཱི’’ཏི ལི་ཁི་ཏཾ. སི་ཁ་རཾ ནཱ་མ ཡེ་ན པ་རི་བྦྷ་མ་ནྟཱ ཚི་ནྡ་ནྟི. པ་ཏྟ་བ་ནྡྷ་ཀོ ནཱ་མ པ་ཏྟ་སྶ ག་ཎྛི་ཨཱ་དི་ཀཱ་ར་ཀོ. ‘‘པ་ཊི་མཱ་ནཾ སུ་ཝ་ཎྞཱ་དི་པ་ཏྟ་ཀཱ་ར་ཀོ’’ཏི་པི ཝ་ད་ནྟི. ‘‘ཨ་ཌྜྷ་བཱ་ཧཱུཏི ཀ་པྤ་ར་ཏོ པ་ཊྛཱ་ཡ ཡཱ་ཝ ཨཾ་ས་ཀཱུ་ཊ’’ནྟི ལི་ཁི་ཏཾ. ཨི་ཏོ པ་ཊྛཱ་ཡཱཏི ཨི་མཾ པཱ་ལི༹ཾ ཨཱ་དིཾ ཀ་ཏྭཱ. ད་ཎྜ་མུ་གྒ་རོ ནཱ་མ ཡེ་ན ར་ཛི་ཏ་ཙཱི་ཝ་རཾ པོ་ཐེ་ནྟི. ‘པ་ཙྩ་ཏྠ་ར་ཎ་ག་ཏི་ཀ’ནྟི ཝུ་ཏྟ་ཏྟཱ, ‘‘ཏ་མྤི ག་རུ་བྷ་ཎྜ་མེ་ཝཱ་ཏི ཝུ་ཏྟ་ཏྟཱ ཙ ཨ་པི-ས་དྡེ་ན པཱ་ཝཱ་རཱ་དི་པ་ཙྩ་ཏྠ་ར་ཎཾ ས་བྦཾ ག་རུ་བྷ་ཎྜ་མེ་ཝཱ’’ཏི ཝ་ད་ནྟི. ཨེ་ཏེ་ནེ་ཝ སུ་ཏྟེ་ན ཨ་ཉྙ་ཐཱ ཨ་ཏྠཾ ཝ་ཏྭཱ ‘‘པཱ་ཝཱ་རཱ་དི་པ་ཙྩ་ཏྠ་ར་ཎཾ ན ག་རུ་བྷ་ཎྜཾ, བྷཱ་ཛ་ནཱི་ཡ་མེ་ཝ, སེ་ནཱ་ས་ན་ཏྠཱ་ཡ དི་ནྣ་པ་ཙྩ་ཏྠ་ར་ཎ་མེ་ཝ ག་རུ་བྷ་ཎྜ’’ནྟི ཝ་ད་ནྟི, ཨུ་པ་པ་རི་ཀྑི་ཏ་བྦཾ. ག་ཎྛི་ཀཱཏི ཙཱི་ཝ་ར་ག་ཎྛི་ཀཱ. བྷ་ཉྩ་ཀོ ནཱ་མ ས་ར་ཀོ.
ན་ཝ་ཀ་མྨ་དཱ་ན་ཀ་ཐཱ་ཝ་ཎྞ་ནཱ
༣༢༣-༤. ཨ་གྒ་ལ༹་བ་ནྡྷ་སཱུ་ཙི་དྭཱ་ར་ཀ་ར་ཎ་མ་ཏྟེ་ན་པི. ‘‘ཀ་པོ་ཏ་བྷ་ཎྜི་ཀཱ ནཱ་མ ཝ་ལ༹་བྷི་ཡཱ ཨུ་པ་རི ཋ་པེ་ཏ་བྦ་ཝ་ལ་ཡཾ ཝཱ ཏི་ཎ་ཙྪ་ད་ན་གེ་ཧ་སྶ པི་ཊྛི་ཝཾ་ས་སྶ ཧེ་ཊྛཱ ཋ་པེ་ཏ་བྦཾ ཝཱ ཨུ་བྷ་ཡ་མ་སྶ ག་ཏཱ དཱ་རཱུ’’ཏི ལི་ཁི་ཏཾ. ཀཱ་ར་ནྟ་རཱཏི ཏ་དཱ པུ་ན པ་ཝི་ས་ཊྛཾ པུ་བྦ་པ་ཡོ་ཛི་ཏཱ་ནཱ་ནཾ ཝ་ཙ་ན་པཱ་ཏ་སེ་ནཱ་ས་ན་ཝཱ་སོ. ན པ་ན པ་ཏི་ས་ཊྛ་ཏོ་ཏི ད་ཊྛ་བྦཾ. ས་བྦ་ཏྠ ཝི་ན་ཊྛ་ཝཱ་སོ ན ཙ པ་ཊི་སེ་དྷ་ཀོ ཧོ་ཏཱི་ཏི ད་ཊྛ་བྦོ. དྭཱ་ར་ཝཱ་ཏ་པཱ་ནཱ་དཱི་ནི ཨ་པ་ཧ་རི་ཏྭཱ དཱ་ཏུཾ ཨ་ས་ཀྐུ་ཎེ་ཡྻ་ཏོ ‘‘པ་ཊི་དཱ་ཏ་བྦཱ་ནི་ཡེ་ཝཱ’’ཏི ཝུ་ཏྟཾ. གོ་པཱ་ན་སི་ཨཱ་ད་ཡོ དེ་ནྟ་སྶ ཝི་ཧཱ་རོ པ་ལུ་ཛྫ་ཏཱི་ཏི ‘‘མཱུ་ལཾ ཝཱ དཱ་ཏ་བྦ’’ནྟི་ཨཱ་དི ཝུ་ཏྟ་ནྟི ཨེ་ཀེ. ‘‘ནེ་ཝཱ་སི་ཀཱ པ་ཀ་ཏི་ཡཱ ཨ་ན་ཏྠ་ཏཱ་ཡ བྷཱུ་མི་ཡཱ ཋ་པེ་ནྟི ཙེ, ཏེ་ས་མྤི ཨ་ནཱ་པ་ཏྟི་ཡེ་ཝཱ’’ཏི ལི་ཁི་ཏཾ. ‘‘དྭཱ་ར་ཝཱ་ཏ་པཱ་ནཱ་ད་ཡོ ཨ་པ་རི་ཀ་མྨ་ཀ་ཏཱ་པི ཨ་པ་ཊི་ཙྪཱ་དེ་ཏྭཱ ན ཨ་པ་སྶ་ཡི་ཏ་བྦཱ’’ཏི ལི་ཁི་ཏཾ.
ས་ངྒྷ་བྷ་ཏྟཱ་དི་ཨ་ནུ་ཛཱ་ན་ན་ཀ་ཐཱ་ཝ་ཎྞ་ནཱ
ཨུ་དྡེ་ས་བྷ་ཏྟ་ཀ་ཐཱ་ཝ་ཎྞ་ནཱ
༣༢༥. ཡཱ བྷ་ཏྟུ་དྡེ་ས་ཊྛཱ་ན་བྷཱུ་ཏཱ་ཡ བྷོ་ཛ་ན་སཱ་ལཱ་ཡ པ་ཀ་ཏི་ཋི་ཏི་ཀཱ. དི་ནྣཾ པ་ནཱཏི ཡ་ཐཱ སོ དཱ་ཡ་ཀོ དེ་ཏི, ཏཾ ད་སྶེ་ནྟོ ‘‘ས་ངྒྷ་ཏོ བྷ་ནྟེ’’ཏི་ཨཱ་དི་མཱ་ཧ. ཨེ་ཀ་ཝ་ལ༹་ཉྫནྟི ཨེ་ཀ་དྭཱ་རེ་ན ཝ་ལ༹་ཉྫི་ཏ་བྦཾ. ཏི་ཙཱི་ཝ་ར་པ་རི་ཝཱ་རནྟི ཨེ་ཏྠ ‘‘ཨུ་ད་ཀ་མ་ཏྟ་ལཱ་བྷཱི ཝི་ཡ ཨ་ཉྙོ་པི ཨུ་དྡེ་ས་བྷ་ཏྟཾ ཨ་ལ་བྷི་ཏྭཱ ཝ་ཏྠཱ་དི་མ་ནེ་ཀ་པྤ་ཀཱ་རཾ ལ་བྷ་ཏི ཙེ, ཏ་སྶེ་ཝ ཏ’’ནྟི ལི་ཁི་ཏཾ. ‘‘ཨུ་དྡེ་ས་པ་ཏྟེ དེ་ཐཱ’ཏི ཝ་ཏྭཱ ག་ཧེ་ཏྭཱ ཨཱ་ག་ཏ་བྷཱ་ཝེ་ན ས་ངྒྷ་སྶ པ་རི་ཙྩ་ཏྟཾ ན ཧོ་ཏི་ཡེ་ཝ ཏ་སྶེ་ཝ ཧ་ཏྠེ ག་ཏ་ཏྟཱ, ཏ་སྨཱ ཏེ་ཧི ཝུ་ཏྟ་ཀྐ་མེ་ན ས་བྦེ་ཧི བྷཱ་ཛེ་ཏྭཱ བྷུ་ཉྫི་ཏ་བྦ’’ནྟི ཝུ་ཏྟཾ. པ་ཊི་པཱ་ཊི་པ་ཏྟཾ ཝཱ ཋི་ཏི་ཀཱ་ཡ ཋི་ཏ་པ་ཏྟཾ ཝཱ. ‘‘ཀཱུ་ཊ་ཊྛི་ཏི་ཀཱ ནཱ་མ ཨ་གྒ་ཧེ་ཏ་བྦཱ་ན་མྤི གཱ་ཧི་ཏ་ཏྟཱ’’ཏི ལི་ཁི་ཏཾ, ‘‘པ་ཎཱི་ཏ་བྷ་ཏྟ་ཊྛི་ཏི་ཀ་ཉྩ ཨ་ཛཱ་ནི་ཏྭཱ མི་སྶེ་ཏྭཱ གཱ་ཧི་ཏེ་པི ཨེ་ཝ་མེ་ཝ པ་ཊི་པ་ཛྫི་ཏ་བྦ’’ནྟི ཙ ལི་ཁི་ཏཾ. ཏ་ཉྩེ ཐེ་ཡྻཱ་ཡ ཧ་ར་ནྟི པ་ཏྟ་ཧཱ་ར་ཀཱ, ཨཱ་ཎཱ་པ་ཀ་སྶ གཱི་ཝཱ ཧོ་ཏི. ཨ་ཏི་ཀྐ་ནྟ་མྤི ཋི་ཏི་ཀཾ ཋ་པེ་ཏྭཱཏི ཨེ་ཏྠ ‘‘ཏཾ་དི་ཝ་ས་མེ་ཝ ཙེ བྷི་ཀྑཱ ལ་བྦྷ་ཏི, ཨ་པ་ར་དི་ཝ་ས་ཏོ པ་ཊྛཱ་ཡ ན ལ་བྦྷ་ཏི ཀི་རཱ’’ཏི ལི་ཁི་ཏཾ. པ་ཙྪཱ ‘‘ས་བྦོ ས་ངྒྷོ པ་རི་བྷུ་ཉྫ་ཏཱུ’’ཏི ཨ་ཝུ་ཏྟེ་པི བྷཱ་ཛེ་ཏྭཱ པ་རི་བྷུ་ཉྫི་ཏ་བྦཾ. ‘‘ཨེ་ཏྟ་ཀེ བྷི་ཀྑཱུ ས་ངྒྷ་ཏོ ཨུ་དྡི་སི་ཏྭཱ དེ་ཐཱ’ཏི ཨ་ཝ་ཏྭཱ ‘ཨེ་ཏྟ་ཀཱ་ནཾ བྷི་ཀྑཱུ་ནཾ བྷ་ཏྟཾ ག་ཎྷ་ཐཱ’ཏི དི་ནྣཾ ས་ངྒྷི་ཀ་ནི་མ་ནྟ་ནཾ ནཱ་མཱ’’ཏི ལི་ཁི་ཏཾ.
ནི་མ་ནྟ་ན་བྷ་ཏྟ་ཀ་ཐཱ་ཝ་ཎྞ་ནཱ
པ་ཊི་པཱ་ཊི་ཡཱཏི ཡ་ཐཱ་ལ་དྡྷ་པ་ཊི་པཱ་ཊི་ཡཱ. ཝི་ཙྪི་ནྡི་ཏྭཱཏི བྷ་ཏྟཾ ག་ཎྷ་ཐཱ་ཏི པ་དཾ ཨ་ཝ་ཏྭཱ. ཨཱ་ལོ་པ་ས་ངྑེ་པེ་ནཱཏི ཨ་ཡཾ ན་ཡོ ནི་མ་ནྟ་ནཱ་ཡ་མེ་ཝ, ཨུ་དྡེ་ས་བྷ་ཏྟེ པ་ན ཨེ་ཀ་སྶ པ་ཧོ་ན་ཀ་པྤ་མཱ་ཎེ ཨེ་ཝ ཋི་ཏི་ཀཱ ཏི་ཊྛ་ཏི. ‘‘ཨེ་ཀ་ཝཱ་རནྟི ཡཱ་ཝ ཏ་སྨིཾ ཨཱ་ཝཱ་སེ ཝ་ས་ནྟི བྷི་ཀྑཱུ, ས་བྦེ་ཝ ལ་བྷ་ནྟཱི’’ཏི ལི་ཁི་ཏཾ.
ས་ལཱ་ཀ་བྷ་ཏྟ་ཀ་ཐཱ་ཝ་ཎྞ་ནཱ
ན ཧི བ་ཧི་སཱི་མཱ་ཡ ས་ངྒྷ་ལཱ་བྷོཏི ཨེ་ཏྠ ‘‘ཨུ་དྡེ་ས་བྷ་ཏྟཱ་དཱི་སུ བ་ཧི་སཱི་མཱ་ཡ ཋི་ཏ་སྶ་པི ཙེ ཨུ་པཱ་ས་ཀཱ དེ་ནྟི, ག་ཧེ་ཏུཾ ལ་བྷ་ནྟི, ཨ་ཏྟ་ནོ་པི པཱ་པེ་ཏྭཱ ག་ཧ་ཎཾ ཨ་ནུ་ཉྙཱ་ཏཾ, ཏ་ཐཱ ཨི་དྷ ན ཝ་ཊྚ་ཏཱི’’ཏི ཝུ་ཏྟཾ. ན པཱ་པུ་ཎ་ནྟཱི་ཏི ཨུ་དྡི་སི་ཏྭཱ་པི. ཝཱ་ར་གཱ་མནྟི དཱུ་ར་ཏྟཱ ཝཱ་རེ་ན ནི་གྒ་ཧེ་ན ག་ནྟ་བྦ་གཱ་མེ. ཕཱ་ཏི་ཀ་མྨ་མེ་ཝཱཏི ཨ་ཏི་རེ་ཀ་ལཱ་བྷཱ ཙ བྷ་ཝ་ནྟི. ས་མྨུ་ཁཱི་བྷཱུ་ཏ་སྶཱཏི ཡེ་བྷུ་ཡྻེ་ན ཙེ བྷི་ཀྑཱུ བ་ཧི་སཱི་མཾ ག་ཏཱ, ས་མྨུ་ཁཱི་བྷཱུ་ཏ་སྶ པཱ་པེ་ཏ་བྦཾ. ས་བྷཱ་ག་ཏྟཱ ཧི ཨེ་ཀེ་ན ལ་དྡྷཾ ས་བྦེ་སཾ པ་ཧོ་ཏི, ཏ་སྨི་མྤི ཨ་ས་ཏི ཨ་ཏྟ་ནོ པཱ་པེ་ཏྭཱ དཱ་ཏ་བྦཾ. ‘‘ལ་དྡྷཱ ཝཱ ཨ་ལ་དྡྷཱ ཝཱ’’ཏི ཝ་ཙ་ན་སི་ལི་ཊྛ་ཝ་སེ་ན ཝུ་ཏྟཾ. ཝི་ཧཱ་རེ ཨ་པཱ་པི་ཏཾ པ་ན…པེ… ན ཝ་ཊྚ་ཏཱིཏི ས་ལཱ་ཀ་བྷ་ཏྟཾ ཝི་ཧཱ་རེ ཨུ་དྡི་སི་ཡ་ཏི. ཏེ་ན པ་ན དི་ནྣ་ས་ལཱ་ཀེ་ན. ཏ་སྶཱཏི ག་ཧེ་ཏྭཱ ག་ཏ་སྶ. ས་ལཱ་ཀཱ ག་ཧེ་ཏ་བྦཱ་ཏི ཡུ་ཏྟཾ ཝི་ཡ. ས་བྦ་པོ་ཏྠ་ཀེ་སུ ‘‘གཱ་ཧེ་ཏ་བྦཱ’’ཏི པཱ་ཋོ, ཏ་སྨཱ ཏེ་ནཱཏི ས་ལཱ་ཀ་གྒཱ་ཧཱ་པ་ཀེ་ནཱ་ཏི ཨ་ཏྠོ. ‘‘ཙོ་རི་ཀཱ་ཡ ག་ཧི་ཏ་ཏྟཱ ན པཱ་པུ་ཎཱ་ཏཱི’’ཏི ཝ་ཙ་ན་ཏོ ‘‘ཀུ་ཊི་སོ་དྷ་ནཾ ཝ་ཊྚ་ཏཱི’’ཏི ཙ དཱི་པ་ཝཱ་སི་ནོ ཝ་ད་ནྟི ཀི་ར. ཨེ་ཀཾ མ་ཧཱ་ཐེ་ར་སྶཱཏི མ་ཧཱ་ཐེ་རོ ཝི་ཧཱ་ར་ཏོ ཡེ་བྷུ་ཡྻེ་ན ན ག་ཙྪ་ཏི, ཨི་ཏ་རེ ཀ་དཱ་ཙི ག་ཙྪ་ཏི, ཏ་སྨཱ ས་བྷཱ་གཱ ཙེ, ཨ་ཏྟ་ནོ པཱ་པེ་ཏྭཱ པུ་ན ཨི་ཏ་རེ་སཾ དི་ཡྻ་ཏི. ཝི་ཧཱ་རེ ཐེ་ར་སྶ པ་ཏྟ་ས་ལཱ་ཀ་བྷ་ཏྟནྟི མ་ཧཱ་ཐེ་རོ ཨེ་ཀ་ཀོ་ཝ ཝི་ཧཱ་རེ ཨོ་ཧཱི་ནོ, ‘‘ཨ་ཝ་སྶཾ ས་བྦ་ས་ལཱ་ཀཱ ཨ་ཏྟ་ནོ པཱ་པེ་ཏྭཱ ཋི་ཏོ’’ཏི པ་ཊི་སྶ་ཡཾ ག་ནྟྭཱ ཨཱ་ག་ནྟུ་ཀ་བྷི་ཀྑཱུ་ན་མྤི ཨ་ད་སྶ་ན་ཏོ ཀུ་ཀྐུ་ཙྩཾ ཨ་ཀ་ཏྭཱ བྷུ་ཉྫ་ནྟི.
པ་ཀྑི་ཀ་བྷ་ཏྟ་ཀ་ཐཱ་ཝ་ཎྞ་ནཱ
ཨུ་པོ་ས་ཐ་དི་ཝ་སེ ཨཱ་པ་ཏྟི་དེ་ས་ནཾ ས་ནྡྷཱ་ཡ ‘‘པ་རི་སུ་དྡྷ་སཱི་ལཱ་ན’’ནྟི ཨཱ་ཧ. ལེ་ཁཾ ཀ་ཏྭཱ ནི་བ་དྡྷཱ་པི་ཏཾ. ‘‘ཨཱ་ག་ནྟུ་ཀ་བྷ་ཏྟ་མྤི ག་མི་ཀ་བྷ་ཏྟ་མྤཱི’’ཏི ཨཱ་ག་ནྟུ་ཀོ་ཝ ཧུ་ཏྭཱ ག་ཙྪ་ནྟཾ ས་ནྡྷཱ་ཡ ཝུ་ཏྟཾ. ཨ་ནཱ་ཐ་གི་ལཱ་ནུ་པ་ཊྛཱ་ཀོ་པི ཏེ་ན དི་ནྣཾ བྷུ་ཉྫ་ཏི ཙེ, ཏ་སྶ་པི པཱ་པེ་ཏ་བྦ་མེ་ཝ. གུ་ལ༹་པི་ཎྜཾ ཏཱ་ལ་པ་ཀྐ་མ་ཏྟཾ.
སེ་ནཱ་ས་ན་ཀྑ་ནྡྷ་ཀ་ཝ་ཎྞ་ནཱ ནི་ཊྛི་ཏཱ.