༣. ཨ་ཡོ་གུ་ལ༹་ཝ་གྒོ

༢. ཨ་ཡོ་གུ་ལ༹་སུ་ཏྟ་ཝ་ཎྞ་ནཱ

༨༣༤. ཨི་མི་ནཱ ཙ་ཏུ་མ་ཧཱ་བྷཱུ་ཏ་མ་ཡེ་ནཱཏི ཨི་མི་ནཱ ས་བྦ་ལོ་ཀ་པ་ཙྩ་ཀྑེ་ན ཙ་ཏཱུ་ཧི མ་ཧཱ་བྷཱུ་ཏེ་ཧི ནི་བྦ་ཏྟེ་ན ཙ་ཏུ་མ་ཧཱ་བྷཱུ་ཏ་མ་ཡེ་ན. མ་ནོ་མ་ཡོ པ་ན ནི་མྨི་ཏ་ཀཱ་ཡོ བྷ་ག་ཝ་ཏོ རུ་ཙི་ཝ་སེ་ན པ་རེ་སཾ པ་ཙྩ་ཀྑོ ཧོ་ཏི. ཨོ་མཱ་ཏཱིཏི ཨ་ཝ་མཱ་ཏི. ཨ་ཝ-པུ་བྦོ ཧི མཱ-ས་དྡོ ས་ཏྟི་ཨ་ཏྠོ་པི ཧོ་ཏཱི་ཏི ‘‘པ་ཧོ་ཏི ས་ཀྐོ་ཏཱི’’ཏི ཨ་ཏྠོ ཝུ་ཏྟོ. ཨ་ས་མྦྷི་ནྣ་པ་དནྟི ཨ་སཱ་དྷཱ་ར་ཎ་པ་དཾ ཨ་ཉྙ་ཏྠ ཨ་ནཱ་ག་ཏ་ཏྟཱ. ཀཱ་ཡ་སྶ ཙི་ཏྟེ ས་མོ་ད་ཧ་ནཾ ཨཱ་རོ་པ་ནཾ ཏ་ནྣི་སྶི་ཏ་ཏཱ་ཀ་ར་ཎ་ཉྩ ཨ་ཏྠ་ཏོ ཙི་ཏྟ་ག་ཏི་ཡཱ པ་ཝ་ཏྟ་ན་མེ་ཝཱ་ཏི ཨཱ་ཧ ‘‘ཙི་ཏྟ་ག་ཏི་ཡཱ པེ་སེ་ཏཱི’’ཏི.

ཏ་ཏྠ ཙི་ཏྟ་ག་ཏི་ག་མ་ནཾ ནཱ་མ ཙི་ཏྟ་ཝ་སེ་ན ཀཱ་ཡ་སྶ པ་རི་ཎཱ་མ་ནེ་ན ‘‘ཨ་ཡཾ ཀཱ་ཡོ ཨི་མཾ ཙི་ཏྟཾ ཝི་ཡ ཧོ་ཏཱུ’’ཏི ཀཱ་ཡ་སྶ ཙི་ཏྟེ་ན ས་མཱ་ན་ག་ཏི་ཀ་ཏཱ་ཋ་པ་ནཾ. ཀ་ཐཾ པ་ན ཀཱ་ཡོ ད་ནྡྷ་པ་ཝ་ཏྟི་ཀོ ལ་ཧུ་པ་ཝ་ཏྟི་ནཱ ཙི་ཏྟེ་ན ས་མཱ་ན་ག་ཏི་ཀོ ཧོ་ཏཱི་ཏི? ན ས་བྦ་ཐཱ ས་མཱ་ན་ག་ཏི་ཀོ. ཡ་ཐེ་ཝ ཧི ཀཱ་ཡ་ཝ་སེ་ན ཙི་ཏྟ་པ་རི་ཎཱ་མ་ནེ ཙི་ཏྟཾ ས་བྦ་ཐཱ ཀཱ་ཡེ་ན ས་མཱ་ན་ག་ཏི་ཀཾ ན ཧོ་ཏི. ན ཧི ཀ་དཱ་ཙི ཏཾ ས་བྷཱ་ཝ་སི་དྡྷེ་ན ཨ་ཏྟ་ནོ ཁ་ཎེ་ན ཨ་ཝ་ཏྟི་ཏྭཱ ད་ནྡྷ་ཝུ་ཏྟི་ཀ་སྶ རཱུ་པ་དྷ་མྨ་སྶ ཝ་སེ་ན པ་ཝ་ཏྟི་ཏུཾ ས་ཀྐོ་ཏི, ‘‘ཨི་དཾ ཙི་ཏྟཾ ཨ་ཡཾ ཀཱ་ཡོ ཝི་ཡ ཧོ་ཏཱུ’’ཏི པ་ན ཨ་དྷི་ཊྛཱ་ནེ་ན ད་ནྡྷ་ག་ཏི་ཀ་སྶ ཀཱ་ཡ་སྶ ཨ་ནུ་ཝ་ཏྟ་ན་ཏོ ཡཱ་ཝ ཨི་ཙྪི་ཏ་ཊྛཱ་ན་པྤ་ཏྟི, ཏཱ་ཝ ཀཱ་ཡ་ག་ཏི་ཨ་ནུ་ལོ་མེ་ནེ་ཝ ཧུ་ཏྭཱ ས་ནྟཱ་ན་ཝ་སེ་ན པ་ཝ་ཏྟ་མཱ་ནཾ ཙི་ཏྟཾ ཀཱ་ཡ་ག་ཏི་ཡཱ པ་རི་ཎཱ་མི་ཏཾ ནཱ་མ ཧོ་ཏི. ཨེ་ཝཾ ‘‘ཨ་ཡཾ ཀཱ་ཡོ ཨི་དཾ ཙི་ཏྟཾ ཝི་ཡ ཧོ་ཏཱུ’’ཏི ཨ་དྷི་ཊྛཱ་ནེ་ན པ་གེ་ཝ སུ་ཁ་ལ་ཧུ་ས་ཉྙཱ་ཡ ས་མྤཱ་དི་ཏ་ཏྟཱ ཨ་བྷཱ་ཝི་ཏི་དྡྷི་པཱ་དཱ་ནཾ ཝི་ཡ ད་ནྡྷཾ ཨ་ཝ་ཏྟི་ཏྭཱ ཡ་ཐཱ ལ་ཧུ་ཀཾ ཀ་ཏི་པ་ཡ་ཙི་ཏྟ་ཝཱ་རེ་ནེ་ཝ ཨི་ཙྪི་ཏ་ཊྛཱ་ན་པྤ་ཏྟི ཧོ་ཏི, ཨེ་ཝཾ པ་ཝ་ཏྟ་མཱ་ནོ ཀཱ་ཡོ ཙི་ཏྟ་ག་ཏི་ཡཱ པ་རི་ཎཱ་མི་ཏོ ནཱ་མ ཧོ་ཏི, ན ཨེ་ཀ་ཙི་ཏྟ་ཀྑ་ཎེ་ནེ་ཝ ཨི་ཙྪི་ཏ་ཊྛཱ་ན་པྤ་ཏྟི་ཡཱ, ཨེ་ཝ་ཉྩ ཀ་ཏྭཱ བཱ་ཧཱ་ས་མི་ཉྫ་ན་པ་སཱ་ར་ཎཱུ་པ་མཱ་པི ཨུ་པ་ཙཱ་རེ་ན ཝི་ནཱ སུ་ཊྛུ་ཏ་རཾ ཡུ་ཏྟཱ ཧོ་ཏཱི་ཏི. ཨ་ཉྙ་ཐཱ དྷ་མྨ་ཏཱ་ཝི་ལོ་མ་ཏཱ སི་ཡཱ, ནཱ་པི དྷ་མྨཱ་ནཾ ལ་ཀྑ་ཎ་ཉྙ་ཐ་ཏྟཾ ཨི་དྡྷི་བ་ལེ་ན ཀཱ་ཏུཾ ས་ཀྐཱ, བྷཱ་ཝ་ཉྙ་ཐ་ཏྟ་མེ་ཝ པ་ན ཀཱ་ཏུཾ ས་ཀྐཱ་ཏི.

༣-༡༠. བྷི་ཀྑུ་སུ་ཏྟཱ་དི་ཝ་ཎྞ་ནཱ

༨༣༥-༨༤༢. ‘‘དྭི་ནྣཾ ཕ་ལཱ་ན’’ནྟི ཨཱ་ག་ཏ་སུ་ཏྟཾ ས་ནྡྷཱ་ཡ ‘‘དྭེ ཕ་ལཱ་ནི ཨཱ་དིཾ ཀ་ཏྭཱ’’ཏི ཝུ་ཏྟཾ. སེ་སཾ སུ་ཝི་ཉྙེ་ཡྻ་མེ་ཝ.

ཨ་ཡོ་གུ་ལ༹་ཝ་གྒ་ཝ་ཎྞ་ནཱ ནི་ཊྛི་ཏཱ.

ཨི་དྡྷི་པཱ་ད་སཾ་ཡུ་ཏྟ་ཝ་ཎྞ་ནཱ ནི་ཊྛི་ཏཱ.