༡༠. བྷི་ཀྑུ་ནུ་པ་སྶ་ཡ་སུ་ཏྟ་ཝ་ཎྞ་ནཱ

༣༧༦. ཀ་མྨ་ཊྛཱ་ན་ཀ་མྨི་ཀཱཏི ཀ་མྨ་ཊྛཱ་ན་མ་ནུ་ཡུ་ཏྟཱ. ཝི་སེ་སེ་ཏཱི་ཏི ཝི་སེ་སོ, ཨ་ཏི་ས་ཡོ, སྭཱ་ཡཾ པུ་བྦཱ་པ་ར་ཝི་སེ་སོ ཨུ་པཱ་དཱ་ཡུ་པཱ་དཱ་ཡ ག་ཧེ་ཏ་བྦོ་ཏི ཏཾ ད་སྶེ་ཏུཾ ‘‘ཏ་ཏྠཱ’’ཏི་ཨཱ་དི་མཱ་ཧ.

ཨུ་པྤ་ཛྫ་ཏི ཀི་ལེ་ས་པ་རི་ལཱ༹་ཧོཏི ཀཱ་ཡེ ཨ་སུ་བྷཱ་དི་ཝ་སེ་ན མ་ན་སི་ཀཱ་རཾ ཨ་ད་ཧ་ནྟ་སྶ མ་ན་སི་ཀཱ་ར་སྶ ཝཱི་ཐི་ཡཾ ཨ་པ་ཊི་པ་ནྣ་ཏཱ སུ་བྷཱ་དི་ཝ་སེ་ན ཀཱ་ཡཱ་ར་མྨ་ཎོ ཀི་ལེ་ས་པ་རི་ལཱ༹་ཧོ ཙ ཨུ་པྤ་ཛྫ་ཏི. ཝཱི་རི་ཡཱ་ར་མྦྷ་སྶ ཨ་བྷཱ་ཝེ་ན ཏ་སྨིཾ ཨཱ་ར་མྨ་ཎེ ཙེ་ཏ་སོ ཝཱ ལཱི་ན་ཏྟཾ ཧོ་ཏི, གོ་ཙ་ར་ཛ྄ཛྷ་ཏྟ་ཏོ བ་ཧི་དྡྷཱ པུ་ཐུ་ཏྟཱ་ར་མྨ་ཎེ ཙི་ཏྟཾ ཝི་ཀྑི་པ་ཏི. ཨེ་ཝཾ ཀི་ལེ་ས་པ་རི་ལཱ༹་ཧེ ཙཱཏི་ཨཱ་དི་ནཱ ཏི་ཝི་དྷ་མྤི བྷཱ་ཝ་ནཱ་ནུ་ཡོ་ག་སྶ ཀི་ལེ་ས་ཝ་ཏྠུ་བྷཱ་ཝཾ ཨུ་པཱ་དཱ་ཡ ས་མུ་ཙྩ་ཡ་ཝ་སེ་ན ཨ་ཊྛ་ཀ་ཐཱ་ཡཾ ཝུ་ཏྟཾ. ཡ་སྨཱ པ་ན ཏེ པ་རི་ལཱ༹་ཧ་ལཱི་ན་ཏྟ་ཝི་ཀྑེ་པཱ ཨེ་ཀ་ཛ྄ཛྷཾ ན པ་ཝ་ཏྟ་ནྟི, ཏ་སྨཱ པཱ་ལི༹་ཡཾ ‘‘ཀཱ་ཡཱ་ར་མྨ་ཎོ ཝཱ’’ཏི་ཨཱ་དི་ནཱ ཨ་ནི་ཡ་མ་ཏྠོ ཝཱ-ས་དྡོ ག་ཧི་ཏོ. ཀི་ལེ་སཱ་ནུ་ར་ཉྫི་ཏེ་ནཱཏི ཀི་ལེ་ས་ཝི་ཝ་ཎྞི་ཏ་ཙི་ཏྟེ་ན ཧུ་ཏྭཱ ན ཝ་ཏྟི་ཏ་བྦཾ. ཀ་ཐཾ པ་ན ཝ་ཏྟི་ཏ་བྦ་ནྟི ཨཱ་ཧ ‘‘ཀི་སྨི་ཉྩི་དེ་ཝཱ’’ཏི. ན ཙ ཝི་ཏ་ཀྐེ་ཏི ན ཙ ཝི་ཙཱ་རེ་ཏཱིཏི ཀི་ལེ་ས་ས་ཧ་ག་ཏེ ཝི་ཏ་ཀྐ་ཝི་ཙཱ་རེ ན པ་ཝ་ཏྟེ་ཏི. སུ་ཁི་ཏོཏི ཛྷཱ་ན་སུ་ཁེ་ན སུ་ཁི་ཏོ.

ཨི་མ་སྶ བྷི་ཀྑུ་ནོ བྷཱ་ཝ་ནཱ པ་ཝ་ཏྟཱ་ཏི ས་མྦ་ནྡྷོ. ཡ་སྨཱ ཧི ཨི་མ་སྶ བྷི་ཀྑུ་ནོ ཏཾ མཱུ་ལ་ཀ་མྨ་ཊྛཱ་ནཾ པ་རི་པ་ནྠེ ས་ཏི ཋ་པེ་ཏྭཱ བུ་དྡྷ་གུ་ཎཱ་དི་ཨ་ནུ་སྶ་ར་ཎེ་ན ཙི་ཏྟཾ པ་སཱ་དེ་ཏྭཱ མཱུ་ལ་ཀ་མྨ་ཊྛཱ་ན་བྷཱ་ཝ་ནཱ པ་ཝ་ཏྟཱ, ཏ་སྨཱ པ་ཎི་དྷཱ་ཡ བྷཱ་ཝ་ནཱ་ཏི ཝུ་ཏྟ་ནྟི ས་མྦ་ནྡྷོ. ཨ་ཊྛ་པེ་ཏྭཱཏི ཙི་ཏྟཾ ཨ་པྤ་ཝ་ཏྟེ་ཏྭཱ་ཏི ཨ་ཏྠོ ཝེ་དི་ཏ་བྦོ. ཀ་མྨ་ཊྛཱ་ནཱ་དཱི་ནཾ ཏི་ཎྞ་མྤི ཝ་སེ་ན ཨ་ཏྠ་ཡོ་ཛ་ནཱ ས་མྦྷ་ཝ་ཏི. ཏེ་ནཱ་ཧ ‘‘ཏ་ཏྠཱ’’ཏི་ཨཱ་དི. སཱ་རེ་ནྟོ ཝི་ཡཱཏི ར་ཐཾ ཝཱ་ཧ་ཡ་ནྟོ ཝི་ཡ. ས་མ་པྤ་མཱ་ཎ་ཏོ ཨ་ཊྛ་ཀཱ་དི་ཝ་སེ་ན སུ་ཏ་ཙྪི་ཏཾ པ་ཀྑི་པ་ནྟོ ཝི་ཡ. སུ་ཁེ་ནེ་ཝ ཀི་ལེ་སཱ་ནཾ ཨོ་ཀཱ་སཾ ཨ་དེ་ནྟོ ཨ་ནྟ་རཱ ཨ་ས་ཛྫ་ནྟོ ཨ་ལ་གྒ་ནྟོ. ཝི་པ་སྶ་ནཱ་ཙཱ་ར་སྶ ཨཱ་ར་དྡྷ་ཝུ་ཏྟི་ཏཾ ཨ་པ་རི་པ་ནྠ་ཏ་ཉྩ ད་སྶེ་ནྟོ ཨོ་པ་མྨ་དྭ་ཡ་མཱ་ཧ. བྱཱ་བྷ་ངྒི་ཡཱཏི ཀཱ་ཛ་ད་ཎྜེ་ན. ཀི་ལེ་ས་པ་རི་ལཱ༹་ཧཱ་དཱི་ནནྟི ཀི་ལེ་ས་པ་རི་ལཱ༹་ཧ་ལཱི་ན་ཏྟ་ཝི་ཀྑེ་པཱ་ནཾ.

གུ་ལ༹་ཁ་ཎྜཱ་དཱི་ནཱིཏི གུ་ལ༹་ཁ་ཎྜ་ས་ཀྑ་ར་ཁ་ཎྜཱ་དཱི་ནི ཨུ་ཙྪུ་ཝི་ཀཱ་ར་བྷཱུ་ཏཱ་ནི. ‘‘ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་རཱ་མཱི’’ཏི་ཨཱ་དི་ཝ་ཙ་ན་ཏོ ‘‘པུ་བྦ་བྷཱ་ག་ཝི་པ་སྶ་ནཱ ཀ་ཐི་ཏཱ’’ཏི ཝུ་ཏྟཾ.

ཨ་མྦ་པཱ་ལི་ཝ་གྒ་ཝ་ཎྞ་ནཱ ནི་ཊྛི་ཏཱ.