༤. ཀཱ་མ་གུ་ཎ་སུ་ཏྟ་ཝ་ཎྞ་ནཱ

༡༡༧. ཙེ་ཏ་སོཏི ཀ་ར་ཎེ སཱ་མི་ཝ་ཙ་ནཾ. ཙི་ཏྟེ་ན སཾ་ཕུ་ས་ནཾ ནཱ་མ ཨ་ནུ་བྷ་ཝོ་ཏི ཨཱ་ཧ ‘‘ཙི་ཏྟེ་ན ཨ་ནུ་བྷཱུ་ཏ་པུ་བྦཱ’’ཏི. ཨུ་ཏུ་ཏྟ་ཡཱ་ནུ་རཱུ་པ་ཏཱ་ཝ་སེ་ན པཱ་སཱ་ད་ཏྟ་ཡཾ, ཏཾ ཝ་སེ་ན ཏི་ཝི་དྷ་ནཱ་ཊ་ཀ་བྷེ་དོ. མ་ནོ་ར་མྨ་ཏཱ་མ་ཏྟེ་ན ཀཱ་མ་གུ་ཎཾ ཀ་ཏྭཱ ད་སྶི་ཏཾ, ན ཀཱ་མ་ཝ་སེ་ན. ན ཧི ཨ་བྷི་ནི་ཀྑ་མ་ན་ཏོ ཨུ་དྡྷཾ བོ་དྷི་ས་ཏྟ་སྶ ཀཱ་མ་ཝི་ཏ་ཀྐཱ བྷཱུ་ཏ་པུ་བྦཱ. ཏེ་ནཱ་ཧ མཱ་རོ པཱ་པི་མཱ –

‘‘ས་ཏྟ ཝ་སྶཱ་ནི བྷ་ག་ཝ་ནྟཾ, ཨ་ནུ་བ་ནྡྷིཾ པ་དཱ་པ་དཾ;

ཨོ་ཏཱ་རཾ ནཱ་དྷི་ག་ཙྪི་སྶཾ, ས་མྦུ་དྡྷ་སྶ ས་ཏཱི་མ་ཏོ’’ཏི. (སུ. ནི. ༤༤༨);

མེ་ཏྟེ་ཡྻོ ནཱ་མཱཏི་ཨཱ་དི ཨ་ནཱ་ག་ཏཱ་ར་མྨ་ཎ་ད་སྶ་ན་མ་ཏྟཾ, ན བོ་དྷི་ས་ཏྟ་སྶ ཨེ་ཝཾ ཨུ་པྤ་ཛྫ་ཏཱི་ཏི. ཨ་ཏྟཱ པི་ཡཱ་ཡི་ཏ་བྦ་རཱུ་པོ ཨེ་ཏ་སྶཱ་ཏི ཨ་ཏྟ་རཱུ་པོ, ཨུ་ཏྟ་ར་པ་དེ པུ་རི་མ་པ་ད་ལོ་པེ་ནཱ་ཏི ‘‘ཨ་ཏྟ་ནོ ཧི་ཏ་ཀཱ་མ་ཛཱ་ཏི་ཀེ་ནཱ’’ཏི ཨ་ཏྠོ ཝུ་ཏྟོ. ཨ་ཏྟ་རཱུ་པེ་ནཱཏི ཝཱ པཱི་ཏི་སོ་མ་ན་སྶེ་ཧི ག་ཧི་ཏ་ས་བྷཱ་ཝེ་ན ཏུ་ཊྛ་པ་ཧ་ཊྛེ་ན ཨུ་ད་གྒུ་ད་གྒེ་ན. ཨ་པྤ་མཱ་དོཏི ཨ་པྤ་མ་ཛྫ་ནཾ ཀུ་ས་ལ་དྷ་མྨེ་སུ ཨ་ཁ་ཎྜ་ཀཱ་རི་ཏཱ་ཏི ཨཱ་ཧ ‘‘སཱ་ཏ་ཙྩ་ཀི་རི་ཡཱ’’ཏི. ཨ་ཝོ་སྶ་གྒོཏི ཙི་ཏྟ་སྶ ཀཱ་མ་གུ་ཎེ་སུ ཨ་ཝོ་སྶ་ཛྫ་ནཾ པ་ཀྑ་ནྡི་ཏུཾ ཨ་པྤ་དཱ་ནཾ. པུ་རི་མོ ཝི་ཀ་པྤོ ཀུ་ས་ལཱ་ནཾ དྷ་མྨཱ་ནཾ ཀ་ར་ཎ་ཝ་སེ་ན ད་སྶི་ཏོ, པ་ཙྪི་མོ ཨ་ཀུ་ས་ལཱ་ནཾ ཨ་ཀ་ར་ཎ་ཝ་སེ་ན. དྭེ དྷ་མྨཱཏི ཨ་པྤ་མཱ་དོ ས་ཏཱི་ཏི དྭེ དྷ་མྨཱ. ཨ་པྤ་མཱ་དོ ས་ཏི ཙ ཏ་ཐཱ པ་ཝ་ཏྟཱ ཙ་ཏྟཱ་རོ ཀུ་ས་ལ་དྷ་མྨ་ཀྑ་ནྡྷཱ ཝེ་དི་ཏ་བྦཱ. ཀ་ཏྟ་བྦཱཏི པ་ཝ་ཏྟེ་ཏ་བྦཱ.

ཏ་སྨིཾ ཨཱ་ཡ་ཏ་ནེཏི ཏ་སྨིཾ ནི་བྦཱ་ན་ས་ཉྙི་ཏེ ཀཱ་ར་ཎེ པ་ཊི་ཝེ་དྷེ. ཏཾ ཀཱ་ར་ཎནྟི ཚ་ནྣཾ ཨཱ་ཡ་ཏ་ནཱ་ནཾ ཀཱ་ར་ཎཾ. ས་ལཱ༹་ཡ་ཏ་ནཾ ནི་རུ་ཛ྄ཛྷ་ཏི ཨེ་ཏྠཱ་ཏི ས་ལཱ༹་ཡ་ཏ་ན་ནི་རོ་དྷོ ཝུ་ཙྩ་ཏི ནི་བྦཱ་ནཾ. ཏེ་ནཱ་ཧ ‘‘ནི་བྦཱ་ནཾ. ཏཾ ས་ནྡྷཱ་ཡཱ’’ཏི་ཨཱ་དི. ནི་བྦཱ་ན་སྨིནྟི ནི་བྦཱ་ན་མྷི.

ཀཱ་མ་གུ་ཎ་སུ་ཏྟ་ཝ་ཎྞ་ནཱ ནི་ཊྛི་ཏཱ.