མ་ཧཱ་ས་ངྒཱ་མཾ
ཝོ་ཧ་ར་ནྟེ་ན ཛཱ་ནི་ཏ་བྦཱ་དི་ཝ་ཎྞ་ནཱ
༣༦༨-༧༤. མ་ཧཱ་ས་ངྒཱ་མེ ཨེ་ཏེ་ནེ་ཝ ན་ཡེ་ན ཝེ་དི་ཏ་བྦ་ནྟི ས་མྦ་ནྡྷོ. ཝ་ཏྠུ་ས་ངྐ་མ་ནཱ་ཀཱ་རཾ ད་སྶེ་ཏྭཱ ཨ་ཝ་ཛཱ་ན་ན་པ་ཊི་ཛཱ་ན་ནཱ་ཀཱ་རཾ ད་སྶེ་ནྟོ ཨཱ་ཧ ‘‘ཡོ པ་ནཱ’’ཏི་ཨཱ་དི. ཡོ པ་ན ཝ་ད་ཏཱི་ཏི ས་མྦ་ནྡྷོ. ཨེ་སེ་ཝཱཏི ཨེ་སོ ཨེ་ཝ, ཨ་ཝ་ཛཱ་ན་ན་པ་ཊི་ཛཱ་ན་ན་བྷི་ཀྑཱུ་ཏི ཨ་ཏྠོ.
༣༧༥. ནཱི་ལཱ་དི་ཝ་ཎྞཱ་ཝ་ཎྞ་ཝ་སེ་ནཱཏི ནཱི་ལཱ་དི་ཝ་ཎྞ་ཝ་སེ་ན ཙ ཨཱ་རོ་གྱ་ཏྠཱ་དི་ཨ་ཝ་ཎྞ་ཝ་སེ་ན ཙ. ས་ཉྩ་རི་ཏྟཾ ཡ་སྨཱ ཨ་ནེ་ན སི་ཀྑཱ་པ་དེ་ན དྷ་ནཾ ཨ་ནུ་པ་དཱི་ཡ་ཏི, ཏ་སྨཱ དྷ་ན་མ་ནུ་པྤ་དཱ་ནནྟི ཝུ་ཙྩ་ཏི. པུ་བྦ་པ་ཡོ་གོཏི པུ་བྦེ པ་ཡུ་ཛྫི་ཏ་བྦོ.
ཨ་ག་ཏི་ཨ་ག་ནྟ་བྦ་ཝ་ཎྞ་ནཱ
༣༧༩. བ་ཧུ་ཛ་ན་ཨ་ཧི་ཏཱ་ཡ པ་ཊི་པ་ནྣོ ཧོ་ཏཱིཏི པཱ་ལི༹ཾ ཝི་ཏྠཱ་རེ་ནྟོ ཨཱ་ཧ ‘‘ཝི་ན་ཡ་དྷ་རེ་ན ཧཱི’’ཏི་ཨཱ་དི. ཏ་ཏྠ ཝི་ན་ཡ་དྷ་རེ་ནཱཏི ཨ་ནུ་ཝི་ཛྫ་ཀེ་ན, ཝི་ནི་ཙྪི་ཏེ་ཏི ས་མྦ་ནྡྷོ. ཨོ་ཝཱ་དཱུ་པ་ཛཱི་ཝི་ནི་ཡོཏི བྷི་ཀྑཱུ་ནཾ ཨོ་ཝཱ་དཾ ཨུ་པ་ནི་སྶཱ་ཡ ཛཱི་ཝི་ནི་ཡོ. ཨུ་པཱ་ས་ཀཱ་པཱིཏི ར་ཏ་ན་ཏྟ་ཡཾ པ་ཊི་སྶ་ར་ཎ་ནྟི ཨུ་པཱ་ས་ཀཱ་པི. དཱ་ཡ་ཀཱ་པཱིཏི བྷི་ཀྑཱུ་ནཾ པ་ཙྩ་ཡ་དཱ་ཡ་ཀཱ་པི. ཏེ་སནྟི ཨུ་པཱ་ས་ཀཱ་དཱི་ནཾ. ཏ་ཐེ་ཝཱཏི ཡ་ཐཱ ཨུ་པཱ་ས་ཀཱ་ད་ཡོ དྭི་དྷཱ བྷི་ཛྫ་ནྟི, ཏ་ཐེ་ཝ. ཏ་ཏོཏི ཨཱ་ར་ཀྑ་དེ་ཝ་ཏཱ་ཧི པ་ར་ནྟི ས་མྦ་ནྡྷོ. ཏེ་ནཱཏི དྭི་དྷཱ་ཀཱ་ར་ཎེ་ན.
༣༨༢. ག་ཧ་ན་ནི་སྶི་ཏོཏི ཨེ་ཏྠ ག་ཧ་ན་ས་དྡོ དི་ཊྛི་པ་རི་ཡཱ་ཡོ་ཏི ཨཱ་ཧ ‘‘མི་ཙྪཱ་དི་ཊྛི་ཨ་ནྟ་གྒཱ་ཧི་ཀ་དི་ཊྛི་ས་ངྑཱ་ཏཾ ག་ཧ་ན’’ནྟི.
༣༩༣. ཏ་སྶ ཨ་ཝ་ཛཱ་ན་ནྟོཏི ཨེ་ཏྠ ‘‘ཏ་སྶཱ’’ཏི པ་དཾ ‘‘ཝ་ཙ་ན’’ནྟི པཱ་ཋ་སེ་སེ་ན ས་མྦ་ནྡྷི་ཏ་བྦ་ནྟི ཨཱ་ཧ ‘‘ཏ་སྶ ཝ་ཙ་ན’’ནྟི. ཏ་སྶཱཏི ན་ཝ་ཀ་སྶ. ཏནྟི ན་ཝ་ཀཾ.
༣༩༤. ‘‘ཡཾ་ཨ་ཏྠཱ་ཡཱ’’ཏི ཨེ་སོ ས་དྡོ ས་མཱ་སོ་ཏི ཨཱ་ཧ ‘‘ཡ་ད་ཏྠཱ་ཡཱ’’ཏི. ‘‘ཏཾ ཨ་ཏྠ’’ནྟི ཨེ་སོ ས་དྡོ ལི་ངྒ་ཝི་པ་ལླཱ་སོ་ཏི ཨཱ་ཧ ‘‘སོ ཨ་ཏྠོ’’ཏི. ཨ་ཏྠས་དྡོ ཧི པུ་ལླི་ངྒོ, པཱ་ལི༹་ཡཾ ན པ་རི་ཧཱ་པེ་ཏ་བྦནྟི ཨེ་ཏྠཱ་པི ལི་ངྒ་ཝི་པ་ལླཱ་སོ ཝེ་དི་ཏ་བྦོ. ས་བྦ་ཏྠཱཏི ས་བྦ་སྨིཾ མ་ཧཱ་ས་ངྒཱ་མེ.
ཨི་ཏི མ་ཧཱ་ས་ངྒཱ་མ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.