༨. ཨ་དྷི་ཀ་ར་ཎ་ཀ་ཐཱ
༢༡༥. ཝི་པ་ཙྩ་ཏཱ་ཡཱཏི ཨེ་ཏྠ ཝི་ཀཱ་ར་བྷཱ་ཝེ་ན པ་ཏ་ཏི པ་ཝ་ཏྟ་ཏཱི་ཏི ཝི་པ་ཙྩཾ, ཙི་ཏྟ་དུ་ཀྑཾ, ཏ་དེ་ཝ ཝི་པ་ཙྩ་ཏཱ, ཏ་ད་ཏྠཱ་ཡཱ་ཏི ད་སྶེ་ནྟོ ཨཱ་ཧ ‘‘ཙི་ཏྟ་དུ་ཀྑ་ཏྠ’’ནྟི. ‘‘ཕ་རུ་ས་ཝ་ཙ་ན’’ནྟི ཨི་མི་ནཱ ཝོ་ཧཱ་ར ས་དྡོ ཝ་ཙ་ན་པ་རི་ཡཱ་ཡོ་ཏི ད་སྶེ་ཏི. ཡོ ཏ་ཏྠཱཏི ཨེ་ཏྠ ཏ་ས་དྡ་སྶ ཝི་ས་ཡཾ ད་སྶེ་ནྟོ ཨཱ་ཧ ‘‘ཏེ་སུ ཨ་ནུ་ཝ་ད་ནྟེ་སཱུ’’ཏི. ཡོ ཨུ་པ་ཝཱ་དོ་ཏི ཡོ་ཛ་ནཱ. ‘‘ཨ་ནུ་ཝ་ད་ནཱ’’ཏི ཨེ་ཏཾ པ་ད་ནྟི ཡོ་ཛ་ནཱ. ཨཱ་ཀཱ་ར་ད་སྶ་ནནྟི ཨ་ནུ་ཝ་ད་ན་སྶ ཨཱ་ཀཱ་ར་ད་སྶ་ནཾ, ད་སྶ་ན་ཧེ་ཏུ ཝཱ. ‘‘པུ་ན་པྤུ་ན’’ནྟི ཨི་མི་ནཱ ཨ་ནུ་ས་མྤ་ཝ་ངྐ་ཏཱཏི ཨེ་ཏྠ ཨ་ནུ་ས་དྡ་སྶ ན ཨུ་པ་ཙྪི་ནྣ་ཏྠཾ ད་སྶེ་ཏི. ཏ་ཏྠེ་ཝཱཏི ཨ་ནུ་ཝ་ད་ནེ ཨེ་ཝ. ས་མྤ་ཝ་ངྐ་ཏཱཏི ས་མྨཱ པ་ཀཱ་རེ་ན ནི་ནྣ་པོ་ན་པ་བྦྷཱ་ར་ཏཱ. ཨ་བྦྷུ་སྶ་ཧ་ན་ཏཱཏི ཨེ་ཏྠ ཨ་ཏི་རེ་ཀཾ ཨུ་སྶཱ་ཧ་ན་ཏཱ་ཏི ད་སྶེ་ནྟོ ཨཱ་ཧ ‘‘ཀ་སྨཱ’’ཏི་ཨཱ་དི. ཨ་ནུ་བ་ལ་པྤ་དཱ་ནནྟི ཨེ་ཏྠ པུ་ན་པྤུ་ནཾ བ་ལ་སྶ པ་དཱ་ན་ནྟི ད་སྶེ་ནྟོ ཨཱ་ཧ ‘‘པུ་རི་མ་ཝ་ཙ་ན་སྶཱ’’ཏི་ཨཱ་དི.
ཀི་ཙྩ་ཡ་ཏཱཏི ཨེ་ཏྠ ‘‘མཱ པ་ཎྜི་ཙྩ་ཡ’’ནྟི་ཨཱ་དཱི་སུ (ཛཱ. ༢.༢༢.༡) ཝི་ཡ བྱ་ཉྫ་ན་ཝ་ཌྜྷ་ན་ཝ་སེ་ན ཡ་ཀཱ་རཱ་ག་མོ་ཏི ཨཱ་ཧ ‘‘ཀི་ཙྩ་མེ་ཝ ཀི་ཙྩ་ཡ’’ནྟི. ‘‘ཨུ་བྷ་ཡཾ་པེ་ཏཾ ས་ངྒྷ་སྶེ་ཝ ཨ་དྷི་ཝ་ཙ་ན’’ནྟི ཨི་མི་ནཱ ཀི་ཙྩ་ཀ་ར་ཎཱི་ཡ་ས་དྡོ ཀ་ཏྟུ་ཝཱ་ཙ་ཀོ་ཏི ད་སྶེ་ཏི, ས་ངྒྷོ ཧི ཀ་རོ་ཏཱི་ཏི ཝ་ཙ་ན་ཏྠེ་ན ཀི་ཙྩོཏི ཙ ཀ་ར་ཎཱི་ཡོཏི ཙ ཝུ་ཙྩ་ཏི. ཏ་སྶ བྷཱ་ཝོ, ཀི་ཙྩ་ཡ་ཏཱ ཀ་ར་ཎཱི་ཡ་ཏཱཏི ཝུ་ཏྟེ ས་ངྒྷ་ཀ་མྨཾ་ཡེ་ཝ ལ་བྦྷ་ཏི. ཏེ་ན ཝུ་ཏྟཾ ‘‘ཨུ་བྷ་ཡཾ་པེ་ཏཾ ས་ངྒྷ་ཀ་མྨ་སྶེ་ཝ ཨ་དྷི་ཝ་ཙ་ན’’ནྟི. ཡ་དི ཀ་མྨ་ཝཱ་ཙ་ཀོ བྷ་ཝེ་ཡྻ, ‘‘ཀ་ཏྟ་བྦ་ནྟི ཀི་ཙྩཾ, ཀ་ར་ཎཱི་ཡ’’ནྟི ཝུ་ཏྟེ་ཡེ་ཝ ས་ངྒྷ་ཀ་མྨ་སྶ ལ་བྷ་ན་ཏོ ཏཱ་པ་ཙྩ་ཡོ སྭ་ཏྠོ བྷ་ཝེ་ཡྻ. ཨེ་ཝ་ཉྷི ས་ཏི ཀི་ཙྩ་ཡ་སྶ བྷཱ་ཝོ ཀི་ཙྩ་ཡ་ཏཱ ཀ་ར་ཎཱི་ཡ་སྶ བྷཱ་ཝོ ཀ་ར་ཎཱི་ཡ་ཏཱཏི ཝ་ཙ་ན་ཏྠོ ན ཀ་ཏྟ་བྦོ བྷ་ཝེ་ཡྻ, ཀ་ཏོ ཙ, ཏ་སྨཱ ན ཀ་མྨ་ཝཱ་ཙ་ཀོ་ཏི ད་ཊྛ་བྦཾ. ཏ་སྶེ་ཝཱཏི ས་ངྒྷ་ཀ་མྨ་སྶེ་ཝ. ཏ་ཏྠཱཏི ཨ་པ་ལོ་ཀ་ནཱ་དཱི་སུ ཙ་ཏཱུ་སུ ཀ་མྨེ་སུ. སཱི་མ་ཊྛ་ཀ་ས་ངྒྷནྟི ‘‘ཨུ་པ་ཙཱ་ར་སཱི་མཱ་དཱི་སུ ཋི་ཏཾ ས་ངྒྷཾ. སོ་དྷེ་ཏྭཱཏི ཨེ་ཏྠ སོ་དྷ་ནཾ ནཱ་མ སཱི་མ་ཊྛ་ཀ་ས་ངྒྷ་སྶ ཧ་ཏྠ་པཱ་ས་ན་ཡ་ནཾ, ཚ་ནྡཱ་ར་ཧཱ་ནཾ ཚ་ནྡ་སྶ ཨཱ་ཧ་ར་ཎཾ, སཱི་མ་ཏོ བ་ཧི་ཀ་ར་ཎཾ. ཏ་མེ་ཝ་ཏྠཾ ཨེ་ཀ་དེ་ས་ཏོ ད་སྶེ་ཏུཾ ཝུ་ཏྟཾ ‘‘ཚ་ནྡཱ་ར་ཧཱ་ནཾ ཚ་ནྡཾ ཨཱ་ཧ་རི་ཏྭཱ’’ཏི. ཨ་པ་ལོ་ཀེ་ཏི ཨཱ་པུ་ཙྪ་ཏི ཨ་ནེ་ནཱ་ཏི ཨ་པ་ལོ་ཀ་ནཾ, ཏཾ་ཡེ་ཝ ཀ་མྨཾ ཨ་པ་ལོ་ཀ་ན་ཀ་མྨཾ. ཝུ་ཏྟ་ན་ཡེ་ནེ་ཝཱཏི ‘‘སཱི་མ་ཊྛ་ཀ་ས་ངྒྷཾ སོ་དྷེ་ཏྭཱ’’ཏི་ཨཱ་དི་ནཱ ཝུ་ཏྟ་ན་ཡེ་ནེ་ཝ. ‘‘སུ་ཎཱ་ཏུ མེ’’ཏི་ཨཱ་དི་ནཱ ས་ངྒྷ་ག་ཎ་པུ་གྒ་ལེ ཉཱ་པེ་ཏི ཨེ་ཏཱ་ཡཱ་ཏི ཉ་ཏྟི, སཱ་ཡེ་ཝ ཀ་མྨཾ ཉ་ཏྟི་ཀ་མྨཾ, ཉ་ཏྟི་ཡེ་ཝ དུ་ཏི་ཡཾ ཉ་ཏྟི་དུ་ཏི་ཡཾ, ཏ་མེ་ཝ ཀ་མྨཾ ཉ་ཏྟི་དུ་ཏི་ཡ་ཀ་མྨཾ. ཨེ་ཏྠ ཀི་ཉྩཱ་པི ཉ་ཏྟི པ་ཋ་མཾ ཋ་པི་ཏཱ, ཀ་མྨ་ཝཱ་ཙཱ་ཡེ་ཝ དུ་ཏི་ཡཱ ཧོ་ཏི, ‘‘ཕ་སྶ་པ་ཉྩ་མཱ’’ཏི་ཨཱ་དཱི་སུ (དྷཱ་ཏུ. ༣༡༦) ཝི་ཡ པ་ན པ་ཊི་ལོ་མ་ཝ་སེ་ན ཝོ་ཧཱ་རཾ ཀ་ཏྭཱ ‘‘ཉ་ཏྟི་དུ་ཏི་ཡཱ’’ཏི ཝུ་ཏྟཾ. ཕ་སྶ་པ་ཉྩ་མཱཏི ཨེ་ཏྠ ཀི་ཉྩཱ་པི དྷ་མྨ་ས་ངྒ་ཎི་ཡཾ (དྷ. ས. ༡ ཨཱ་ད་ཡོ) ‘‘ཕ་སྶོ ཧོ་ཏི, ཝེ་ད་ནཱ ཧོ་ཏི, ས་ཉྙཱ ཧོ་ཏི, ཙེ་ཏ་ནཱ ཧོ་ཏི, ཙི་ཏྟཾ ཧོ་ཏཱི’’ཏི ཕ་སྶཾ པ་ཋ་མཾ ཝུ་ཏྟཾ, པ་ཊི་ལོ་མ་ཝ་སེ་ན པ་ན ཝོ་ཧཱ་རཾ ཀ་ཏྭཱ ‘‘ཕ་སྶ་པ་ཉྩ་མཱ’’ཏི དྷཱ་ཏུ་ཀ་ཐཱ་ཡཾ ཝུ་ཏྟ་ནྟི ད་ཊྛ་བྦཾ. ཨེ་སེ་ཝ ན་ཡོ ཉ་ཏྟི ཙ་ཏུ་ཏྠ་ཀ་མྨེ་པི. ཨེ་ཀཱ་ཡ ཙ ཨ་ནུ་སཱ་ཝ་ནཱ་ཡཱཏི ཉ་ཏྟི་ཏོ ཨ་ནུ་པ་ཙྪཱ སཱ་ཝེ་ཏ་བྦཱ་ཏི ཨ་ནུ་སཱ་ཝ་ནཱ, ཏཱ་ཡ, ཏཱི་ཧི ཙ ཨ་ནུ་སཱ་ཝ་ནཱ་ཧཱིཏི ཉ་ཏྟི་ཏོ་ཨ་ནུ པ་ཙྪཱ, པུ་ན་པྤུ་ནཾ ཝཱ ཏི་ཀྑ་ཏྟུཾ སཱ་ཝེ་ཏ་བྦཱ་ཏི ཨ་ནུ་སཱ་ཝ་ནཱ, ཏཱ་ཧི. ཏ་ཏྠཱཏི ཙ་ཏཱུ་སུ ཀ་མྨེ་སུ.
ཨ་པ་ལོ་ཀེ་ཏྭཱ་ཝཱཏི ཨེ་ཏྠ ཨེ་ཝ་ཕ་ལཾ ད་སྶེ་ནྟོ ཨཱ་ཧ ‘‘ཉ་ཏྟི་ཀ་མྨཱ་དི་ཝ་སེ་ན ན ཀཱ་ཏ་བྦ’’ནྟི. ཉ་ཏྟི་ཀ་མྨ་མྤཱིཏི པི་ས་དྡེ་ན ན ཀེ་ཝ་ལཾ ཨ་པ་ལོ་ཀ་ན་ཀ་མྨ་མེ་ཝ, ཨ་ཐ ཁོ ཉ་ཏྟི་ཀ་མྨ་མྤཱི་ཏི ད་སྶེ་ཏི. ཉ་ཏྟི་དུ་ཏི་ཡ་ཀ་མྨཾ པ་ནཱཏི ཨེ་ཏྠ པ་ན་ས་དྡོ ཝི་སེ་ས་ཏྠ་ཛོ་ཏ་ཀོ, པ་ཀྑ་ནྟ་ར་ཛོ་ཏ་ཀོ ཝཱ. ཏ་ཏྠཱཏི དྭཱི་སུ ཀ་མྨེ་སུ. ག་རུ་ཀཱ་ནཱིཏི ཨ་ལ་ཧུ་ཀཱ་ནི. ཨ་ཝ་སེ་སཱ་ནཱིཏི ཚ་ཧི ཀ་མྨེ་ཧི ཨ་ཝ་སེ་སཱ་ནི, ཨེ་ཝ་རཱུ་པཱ་ནི ལ་ཧུ་ཀ་ཀ་མྨཱ་ནཱི་ཏི ས་མྦ་ནྡྷོ. ‘‘ཨ་ཝ་སེ་སཱ’’ཏི་པི པཱ་ཋོ, ས་མྨུ་ཏི་ཡོ་ཏི ས་མྦ་ནྡྷོ. ཨ་པ་ལོ་ཀེ་ཏྭཱ་པཱིཏི པི་ས་དྡོ ཉ་ཏྟི་དུ་ཏི་ཡ་ཀ་མྨ་ཝཱ་ཙཾ སཱ་ཝེ་ཏྭཱ་པཱི་ཏི ས་མྤི་ཎྜེ་ཏི. ཨ་ཉྙ་ཏྠཱ་པོ་ཧ་ནཾ ད་སྶེ་ནྟོ ཨཱ་ཧ ‘‘ཉ་ཏྟི་ཀ་མྨ་ཉ་ཏྟི་ཙ་ཏུ་ཏྠ་ཀ་མྨ་ཝ་སེ་ན པ་ན ན ཀཱ་ཏ་བྦ་མེ་ཝཱ’’ཏི. ཉ་ཏྟི་ཙ་ཏུ་ཏྠ་ཀ་མྨཾ ཀཱ་ཏ་བྦ་ནྟི ས་མྦ་ནྡྷོ. ཨེ་ཏྠཱཏི ས་མ་ཐ་ཀྑ་ནྡྷ་ཀེ.
ཝི་ཏྠཱ་ར་ཏོ པ་ན ཨཱ་ག་ཏོ་ཡེ་ཝཱ་ཏི ས་མྦ་ནྡྷོ. ཨེ་ཏེ་སནྟི ཙ་ཏུ་ནྣཾ ཀ་མྨཱ་ནཾ. ཡཾ པ་ན ཨ་ཏྠ་ཛཱ་ཏཾ ཨ་ནུ་ཏྟཱ་ན་ནྟི ས་མྦ་ནྡྷོ. ཏ་ཏྠཱཏི ཙ་ཏཱུ་སུ ཀ་མྨེ་སུ. ཏནྟི ཨ་ཏྠ་ཛཱ་ཏཾ. ཨེ་ཝནྟི ཨེ་ཝཾ ཀ་མྨ་ཝ་གྒེ་ཡེ་ཝ ཝ་ཎྞ་ཡ་མཱ་ནེ. ཧཱིཏི ལ་དྡྷ་གུ་ཎ་ཛོ་ཏ་ཀོ. སུ་ཝི་ཉྙེ་ཡྻཱཏི སུ་ཁེ་ན ཝི་ཉྙཱ་ཏ་བྦཱ.
༢༡༦. པཱ་ལི༹་ཝ་སེ་ནེ་ཝཱཏི ན ཨ་ཊྛ་ཀ་ཐཱ་ཝ་སེ་ནཱ་ཏི ཨ་དྷི་པྤཱ་ཡོ.
༢༢༠. ཡེ་ནཱཏི ཙི་ཏྟུ་པྤཱ་དེ་ན. ཨི་མི་ནཱ ཝི་ཝ་ད་ནྟི ཨ་ནེ་ནཱ་ཏི ཝི་ཝཱ་དོཏི ཝ་ཙ་ན་ཏྠཾ ད་སྶེ་ཏི. ས་མ་ཐེ་ཧི ཙཱཏི ཙ་ས་དྡོ ས་མྤི་ཎྜ་ན་ཏྠོ. ཏེ་ན ན ཀེ་ཝ་ལཾ ཝི་ཝཱ་དོ་ཡེ་ཝ, ཨ་ཐ ཁོ ཨ་དྷི་ཀ་ར་ཎ་ཉྩཱ་ཏི ས་མྤི་ཎྜེ་ཏི, ཨ་ཐ ཝཱ ས་མ་ཐེ་ཧི ཙཱཏི ས་མ་ཐེ་ཧི ཨེ་ཝ. ཨི་མི་ནཱ ས་མ་ཐེ་ཧི ཨ་དྷི་ཀ་རཱི་ཡ་ཏི ཝཱུ་པ་ས་མཱི་ཡ་ཏཱི་ཏི ཨ་དྷི་ཀ་ར་ཎནྟི ཝ་ཙ་ན་ཏྠཾ ད་སྶེ་ཏི. ཝི་ཝཱ་དོ་ཡེ་ཝ ཨ་དྷི་ཀ་ར་ཎཾ ཝི་ཝཱ་དཱ་དྷི་ཀ་ར་ཎཾ. ཨེ་ཝ་མཱ་དི་ནཱ ན་ཡེ་ནཱཏི ཨཱ་དི་ས་དྡེ་ན ཨ་ནུ་དྡྷཾ་ས་ནེ་ན ཝ་ད་ནྟི ཨ་ནེ་ན ཙི་ཏྟུ་པྤཱ་དེ་ནཱ་ཏི ཨ་ནུ་ཝཱ་དོཏི་ཨཱ་ད་ཡོ ཝ་ཙ་ན་ཏྠེ ས་ངྒ་ཎྷཱ་ཏི.
༢༢༢. ས་ནྡྷཱ་ཡ་བྷཱ་སི་ཏ་ཝ་སེ་ནཱཏི ལོ་ཀ་ཝ་ཛྫཾ ས་ནྡྷཱ་ཡ བྷཱ་སི་ཏ་སྶ ཝ་ཙ་ན་སྶ ཝ་སེ་ན. ས་ནྡྷཱ་ཡ་བྷཱ་སི་ཏ་ཏྠཾ ཝི་ཏྠཱ་རེ་ནྟོ ཨཱ་ཧ ‘‘ཡ་སྨིཾ ཧཱི’’ཏི་ཨཱ་དི. ཏ་ཏྠ པ་ཐ་ཝི་ཁ་ཎ་ནཱ་དི་ཀེ ཡ་སྨིཾ ཨཱ་པ་ཏྟཱ་དྷི་ཀ་ར་ཎེ་ཏི ཡོ་ཛ་ནཱ. ཏ་སྨིནྟི ཀུ་ས་ལ་ཙི་ཏྟ་ངྒེ ཨཱ་པ་ཏྟཱ་དྷི་ཀ་ར་ཎེ. ཏ་སྨཱཏི ཡ་སྨཱ ན ས་ཀྐཱ ཝ་ཏྟུཾ, ཏ་སྨཱ. ཨི་དནྟི ‘‘ན་ཏྠི ཨཱ་པ་ཏྟཱ་དྷི་ཀ་ར་ཎཾ ཀུ་ས་ལ’’ནྟི ཝ་ཙ་ནཾ, ཝུ་ཏྟ་ནྟི ས་མྦ་ནྡྷོ. ས་ནྡྷཱ་ཡ ཨ་ཝུ་ཏྟཾ ད་སྶེ་ཏྭཱ ས་ནྡྷཱ་ཡ ཝུ་ཏྟཾ ད་སྶེ་ནྟོ ཨཱ་ཧ ‘‘ཨི་དཾ པ་ན ས་ནྡྷཱ་ཡ ཝུ་ཏྟ’’ནྟི. ཏ་ཏྠ ཨི་དཾ པ་ནཱཏི ཀཱ་ར་ཎཾ པ་ན ས་ནྡྷཱ་ཡཱ་ཏི ས་མྦ་ནྡྷོ. ཡཾ ཨཱ་པ་ཏྟཱ་དྷི་ཀ་ར་ཎ་ནྟི ཡོ་ཛ་ནཱ. ‘‘ལོ་ཀ་ཝ་ཛྫ’’ནྟི པ་དེ ཏུ་ལྱཱ་དྷི་ཀ་ར་ཎཾ. ལོ་ཀ་སྨིཾ, ལོ་ཀེ་ཧི ཝཱ ཝ་ཛྫེ་ཏ་བྦ་ནྟི ལོ་ཀ་ཝ་ཛྫཾ. ཏནྟི ཨཱ་པ་ཏྟཱ་དྷི་ཀ་ར་ཎཾ. ཏ་ཏྠཱཏི ཨཱ་པ་ཏྟཱ་དྷི་ཀ་ར་ཎེ. ཝི་ཀ་པྤོཏི ཝི་ཝི་དྷཱ ཀ་པྤ་ནཾ, ཝི་ཝི་དྷ་ཏ་ཀྐོ ཝཱ. ཡཾ པ་ནཱཏི ཨཱ་པ་ཏྟཱ་དྷི་ཀ་ར་ཎཾ པ་ན. ‘‘པ་ཎྞ་ཏྟི་ཝ་ཛྫ’’ནྟི པ་དེ ཏུ་ལྱཱ་དྷི་ཀ་ར་ཎཾ. བྷ་ག་ཝ་ཏོ པ་ཉྙ་ཏྟི་ཡཱ ཧེ་ཏུ་བྷཱུ་ཏཱ་ཡ ཝ་ཛྫེ་ཏ་བྦ་ནྟི པ་ཎྞ་ཏྟི་ཝ་ཛྫཾ. ཏནྟི ཨཱ་པ་ཏྟཱ་དྷི་ཀ་ར་ཎཾ, ཨ་ཀུ་ས་ལཾ ཧོ་ཏཱི་ཏི ས་མྦ་ནྡྷོ. ཀི་ཉྩཱིཏི ཨ་པྤ་མ་ཏྟ་ཀཾ, ཨཱ་པ་ཏྟཱ་ནཱ་པ་ཏྟིཾ ཨ་ཛཱ་ན་ནྟ་སྶ ཨཱ་པ་ཛྫ་ན་ཏོ་ཏི ས་མྦ་ནྡྷོ. ཏ་སྨཱཏི ཡ་སྨཱ ཨ་བྱཱ་ཀ་ཏཾ ཧོ་ཏི, ཏ་སྨཱ. ཏ་ཏྠཱཏི པ་ཎྞ་ཏྟི་ཝ་ཛྫ་བྷཱུ་ཏེ ཨཱ་པ་ཏྟཱ་དྷི་ཀ་ར་ཎེ. ‘‘ཨཱ་པ་ཏྟཱ་དྷི་ཀ་ར་ཎཾ…པེ… ཀུ་ས་ལ’’ནྟི ཨི་དཾ ཝ་ཙ་ནཾ ཝུ་ཏྟ་ནྟི ཡོ་ཛ་ནཱ.
ཡ་དི ཀུ་ས་ལ་ཙི་ཏྟོ ཨཱ་པ་ཛྫ་ཏི, ཨ་ཐ ན་ནུ ཨཱ་པ་ཏྟཱ་དྷི་ཀ་ར་ཎཾ ཀུ་ལ་ལ་ནྟི ཝ་ཏྟ་བྦོ བྷ་ཝེ་ཡྻཱ་ཏི ཨཱ་ཧ ‘‘ས་ཙེ པ་ནཱ’’ཏི་ཨཱ་དི. ཡ་ནྟི ཨཱ་པ་ཏྟཱ་དྷི་ཀ་ར་ཎཾ. ‘‘ཨི་དཾ ཝུ་ཙྩ་ཏི…པེ… ཀུ་ས་ལ’’ནྟི ཝ་དེ་ཡྻ ས་ཙེ་ཏི ཡོ་ཛ་ནཱ. ཨེ་ལ༹་ཀ་ལོ་མ་ཉྩ པ་ད་སོ་དྷ་མྨ་ཉྩ ཨེ་ལ༹་ཀ་ལོ་མ་པ་ད་སོ་དྷ་མྨཱ་ནི, ཏཱ་ནི ཨཱ་དཱི་ནི ཡེ་སཾ ཏཱ་ནཱི་ཏི ཨེ་ལ༹་ཀ་ལོ་མ་པ་ད་སོ་དྷ་མྨཱ་དཱི་ནི, ཏཱ་ནི ས་མུ་ཊྛཱ་ནཱ་ནི ཡཱ་ས་ནྟི ཨེ་ལ༹་ཀ་ལོ་མ་པ་ད་སོ་དྷ་མྨཱ་དི་ས་མུ་ཊྛཱ་ནཱ, ཏཱ་སཾ ཨཱ་པ་ཏྟཱི་ན་མྤཱི་ཏི ས་མྦ་ནྡྷོ. ཏ་ཏྠཱཏི ཨེ་ལ༹་ཀ་ལོ་མ་པ་ད་སོ་དྷ་མྨཱ་དི་ས་མུ་ཊྛཱ་ནཱ་སུ ཨཱ་པ་ཏྟཱི་སུ. ཨཱ་པ་ཏྟི་ཡཱ ཨ་ངྒནྟི ཨཱ་པ་ཏྟི་ཡཱ ཀཱ་ར་ཎཾ. ཨེ་ཝཾ ཨཱ་པ་ཏྟི་ཡཱ ཨ་ན་ངྒཾ ད་སྶེ་ཏྭཱ ཏ་སྶཱ་ཡེ་ཝ ཨ་ངྒཾ ད་སྶེ་ནྟོ ཨཱ་ཧ ‘‘ཀཱ་ཡ་ཝ་ཙཱི་ཝི་ཉྙ་ཏྟི་ཝ་སེ་ན པ་ནཱ’’ཏི་ཨཱ་དི. ཏ་ཏྠ ཙ་ལི་ཏ་པྤ་ཝ་ཏྟཱ་ནནྟི ཙ་ལི་ཏེ་ན ཧེ་ཏུ་བྷཱུ་ཏེ་ན པ་ཝ་ཏྟཱ་ནཾ. ཨ་ཐ ཝཱ ཙ་ལི་ཏོ ཙ ཀཱ་ཡོ, པ་ཝ་ཏྟཱ ཙ ཝཱ་ཙཱ་ཏི ཙ་ལི་ཏ་པྤ་ཝ་ཏྟཱ, ཏཱ་སཾ ཙ་ལི་ཏ་པྤ་ཝ་ཏྟཱ་ནཾ ཀཱ་ཡ་ཝཱ་ཙཱ་ནཾ. ཏ་ཉྩཱཏི ཀཱ་ཡ་ཝཱ་ཙཱ་ནཾ ཨ་ཉྙ་ཏ་ར་ཉྩ. ཨ་བྱཱ་ཀ་ཏནྟི ཨེ་ཏྠ ཨི་ཏི་ས་དྡོ པ་རི་ས་མཱ་པ་ན་ཏྠོ.
ཨ་ཡ་མ་ཏྠོ ཨེ་ཝཾ ཝེ་དི་ཏ་བྦོ་ཏི ཡོ་ཛ་ནཱ. ཏེ་ནཱཏི ཙི་ཏྟེ་ན. ‘‘ཨི་དཾ…པེ… ས་དྡྷི’’ནྟི ཨི་མི་ནཱ ས་ཉྫཱ་ན་ནྟོཏི ཨེ་ཏྠ སཾ་ས་དྡ་སྶ སུ་ནྡ་ར་ཏྠཾ ས་ཧ ཨཱ་ཀཱ་རེ་ན ད་སྶེ་ཏི. ‘‘ཝཱི་ཏི་ཀྐ་མ…པེ… ཀ་པྤེ་ཏྭཱ’’ཏི ཨི་མི་ནཱ ཙེ་ཙྩཱཏི པ་ད་སྶ ཨ་ཏྠཾ ས་ཧ ཝི་སེ་ས་ནེ་ན ད་སྶེ་ཏི. ‘‘ཨུ་པ་ཀྐ་མ་ཝ་སེ་ན…པེ… པེ་སེ་ཏྭཱ’’ཏི ཨི་མི་ནཱ ཨ་བྷི་ཝི་ཏ་རི་ཏྭཱཏི པ་ད་སྶ ཨ་ཏྠཾ ད་སྶེ་ཏི. པཱ་ལི༹་ཡཾ ཡཾ་ས་དྡོ་ཝཱི་ཏི་ཀྐ་མ་ཝི་ས་ཡོ་ཏི ཨཱ་ཧ ‘‘ཡཾ ཨཱ་པ་ཏྟཱ་དྷི་ཀ་ར་ཎཾ ཝཱི་ཏི་ཀྐ་མ’’ནྟི. ‘‘ཨཱ་པ་ཛྫ་ཏཱི’’ཏི ཨི་མི་ནཱ པཱ་ཋ་སེ་སཾ ད་སྶེ་ཏི. ཨེ་ཝཾ ཝཱི་ཏི་ཀྐ་མ་ཏོ ཏ་སྶ བྷི་ཀྑུ་ནོ་ཏི ཡོ་ཛ་ནཱ.
ཨ་བྱཱ་ཀ་ཏ་ཝཱ་རེ་པཱིཏི པི་ས་དྡོ ཨ་ཀུ་ས་ལ་ཝཱ་རཾ ཨ་པེ་ཀྑ་ཏི. ཏ་སྶཱཏི ཙི་ཏྟ་སྶ. ཨ་ཛཱ་ན་ནྟོཏི་ཨཱ་དཱི་ནཾ པ་དཱ་ན་མ་ཏྠོ ཨ་ཀུ་ས་ལ་ཝཱ་རེ ཝུ་ཏྟ་པ་ཊི་པ་ཀྑ་ཝ་སེ་ན ཝེ་དི་ཏ་བྦོ. ཡཾ ཨཱ་པ་ཏྟཱ་དྷི་ཀ་ར་ཎ་ནྟི་ཨཱ་དཱི་ནཾ པ་དཱ་ན་མ་ཏྠོ ཨ་ཀུ་ས་ལ་ཝཱ་རེ་ན ས་དི་སོ་ཡེ་ཝ.
༢༢༤. ཨ་ཡཾ ཝི་ཝཱ་དོ ནོ ཨ་དྷི་ཀ་ར་ཎནྟི་ཨཱ་དཱི་སུ ཨེ་ཝ་མ་ཏྠོ ཝེ་དི་ཏ་བྦོ་ཏི ས་མྦ་ནྡྷོ.