༩. ཙ་མྤེ་ཡྻ་ཀྑ་ནྡྷ་ཀཾ
༢༣༤. ཀ་སྶ་པ་གོ་ཏྟ་བྷི་ཀྑུ་ཝ་ཏྠུ་ཀ་ཐཱ
༣༨༠. ཙ་མྤེ་ཡྻ་ཀྑ་ནྡྷ་ཀེ ག་གྒ་རཱ་ཡ པོ་ཀྑ་ར་ཎི་ཡཱཏི ཨེ་ཏྠ ག་གྒ་ར་ས་དྡ་སྶ ནཱ་མ་ས་དྡ་བྷཱ་ཝཾ ད་སྶེ་ནྟོ ཨཱ་ཧ ‘‘ག་གྒ་ར་ནཱ་མི་ཀཱ་ཡ ཨི་ཏྠི་ཡཱ’’ཏི. ཨི་མི་ནཱ ག་གྒ་ར་ས་དྡོ ག་གྒ་ར་ཨི་ཏི ནཱ་མཾ པ་ཝ་ཏྟི་ནི་མི་ཏྟཾ ཀ་ཏྭཱ ཨི་ཏྠི་ད་བྦཾ ཝ་ད་ཏཱི་ཏི ད་སྶེ་ཏི. ཏ་ནྟི་པ་ཊི་བ་དྡྷོཏི ཏ་ནྟི་ཡཱ པ་ཊི་བ་དྡྷོ. ‘‘ཨུ་སྶུ་ཀྐ་མྤི ཨ་ཀཱ་སི ཡཱ་གུ་ཡཱ’’ཏི་ཨཱ་དཱི་སུ ཨེ་ཝཾ ཝི་ནི་ཙྪ་ཡོ ཝེ་དི་ཏ་བྦོ་ཏི ཡོ་ཛ་ནཱ. ཏ་སྶ བྷི་ཀྑུ་ནོཏི ཀ་སྶ་པ་གོ་ཏྟ་ནཱ་མ་ཀ་སྶ ཏ་སྶ བྷི་ཀྑུ་ནོ. ཏ་ཏྠེ་ཝཱཏི ཝཱ་ས་བྷ་གཱ་མེ་ཡེ་ཝ.
༣༨༢. ཨ་དྷ་མྨེ་ན ཝ་གྒ་ཀ་མྨཾ ཀ་རོ་ནྟཱི་ཏི་ཨཱ་དཱི་ནཾ ནཱ་ནཱ་ཀ་ར་ཎ་ནྟི ས་མྦ་ནྡྷོ.
༢༣༦. ཉ་ཏྟི་ཝི་པ་ནྣ་ཀ་མྨཱ་དི་ཀ་ཐཱ
༣༨༥. ཨ་ཉྙ་ཏྲཱ་པི དྷ་མྨཱཏི ཨེ་ཏྠ དྷ་མྨཱཏི ཨུ་པ་ཡོ་ག་ཏྠེ ནི་སྶ་ཀྐ་ཝ་ཙ་ན་མེ་ཏ་ནྟི ཨཱ་ཧ ‘‘ཨ་ཉྙ་ཏྲ དྷ་མྨ’’ནྟི. ‘‘ཨ་ཉྙ་ཏྲཱ’’ཏི ནི་པཱ་ཏ་པ་ཡོ་གེ དུ་ཏི་ཡཱ་ཏ་ཏི་ཡཱ་པ་ཉྩ་མཱི་སུ ཨ་ཉྙ་ཏ་ར་སྶ ས་མྦྷ་ཝ་ཏོ ཨུ་པ་ཡོ་ག་ཝ་ཙ་ན་མྤི ཧོ་ཏི. ཏ་སྨཱ ཝུ་ཏྟཾ ‘‘ཨ་ཡ་མེ་ཝ ཝཱ པཱ་ཋོ’’ཏི. ‘‘བྷཱུ་ཏེ་ན ཝ་ཏྠུ་ནཱ’’ཏི ཨི་མི་ནཱ དྷ་མྨ་ས་དྡ་སྶ ས་ཙྩ་ཏྠཾ ད་སྶེ་ཏི. ‘‘ཨེ་སེ་ཝ ན་ཡོ’’ཏི ཨི་མི་ནཱ ས་དྡ་ས་བྷཱ་ཝ་མེ་ཝ ས་ནྡྷཱ་ཡ ཨ་ཏི་དི་ས་ཏི, ན ཨ་ཏྠཾ. ཏེ་ན ཝུ་ཏྟཾ ‘‘ཨེ་ཏྠ པ་ནཱ’’ཏི་ཨཱ་དི. ས་ཏྠུ་སཱ་ས་ནནྟི ས་ཏྠུ ཨཱ་ཎཱ. ས་ཏྠུ་ཨཱ་ཎཱ ནཱ་མ ཉ་ཏྟི་ཨ་ནུ་སཱ་ཝ་ནཱ་ནཾ ས་མྤ་དཱ་ཏི ཨཱ་ཧ ‘‘ཉ་ཏྟི་ས་མྤ་དཱ ཨ་ནུ་སཱ་ཝ་ན་ས་མྤ་དཱ ཙཱ’’ཏི. ‘‘པ་ཊི་ཀུ་ཊྛ་ཉྩེ་ཝ ཀ་ཏ་ཉྩཱ’’ཏི ཨི་མི་ནཱ པ་ཊི་ཀུ་ཊྛ་ཀ་ཏནྟི པ་ད་སྶ དྭ་ནྡ་ཝཱ་ཀྱཾ ད་སྶེ་ཏི. པ་ཊི་ཀུ་སི་ཏ་བྦ་ནྟི པ་ཊི་ཀུ་ཊྛཾ, ཀ་ཏྟ་བྦ་ནྟི ཀ་ཏཾ, ཀ་མྨཾ. ཏ་མེ་ཝ་ཏྠཾ ད་སྶེ་ནྟོ ཨཱ་ཧ ‘‘ཡཾ ཨ་ཉྙེ་སཱུ’’ཏི་ཨཱ་དི. ཏ་ཏྠ ཡནྟི ཀ་མྨཾ.
༣༨༧. པཱ་ལི༹་ཡཱཏི ཝི་ན་ཡ་པཱ་ལི༹་ཡཱ. ཡནྟི ཀ་མྨཾ, ན ཀ་རི་ཡ་ཏཱི་ཏི ས་མྦ་ནྡྷོ. ཨེ་ཏྠཱཏི ཨ་ཊྛ་ཀ་ཐཱ་ཡཾ. སོ ཙ ཁོཏི སོ ཙ ཝི་ཏྠཱ་རོ, ཨཱ་ག་ཏོ་ཏི ས་མྦ་ནྡྷོ. ཀ་སྨཱ ཉ་ཏྟི་དུ་ཏི་ཡ་ཉ་ཏྟི་ཙ་ཏུ་ཏྠ་ཀ་མྨཱ་ན་མེ་ཝ ཝ་སེ་ན ཨཱ་ག་ཏོ, ན་ནུ ཉ་ཏྟི་ཨ་པ་ལོ་ཀ་ན་ཀ་མྨ་ཝ་སེ་ན་པི ཨཱ་ག་ཏེ་ན བྷ་ཝི་ཏ་བྦ་ནྟི ཨཱ་ཧ ‘‘ཡ་སྨཱ པ་ནཱ’’ཏི་ཨཱ་དི. ཉ་ཏྟི་དུ་ཏི་ཡ་ཉ་ཏྟི་ཙ་ཏུ་ཏྠེ་སུ ཧཱ་པ་ནཾ ཝཱ ཨ་ཉྙ་ཐཱ ཀ་ར་ཎཾ ཝཱ ཨ་ཏྠི ཝི་ཡ ཉ་ཏྟི་ཀ་མྨེ ན་ཏྠཱི་ཏི ཡོ་ཛ་ནཱ. ཉ་ཏྟི་ཀ་མྨེ ཉ་ཏྟི་ཊྛ་པ་ན་ཏོ ཨ་ཉྙ་ཀི་ཙྩ་སྶ ཨ་ས་མྦྷ་ཝ་ཏོ ཧཱ་པ་ནཾ ཝཱ ཨ་ཉྙ་ཐཱ ཀ་ར་ཎཾ ཝཱ ན་ཏྠཱི་ཏི ཨ་དྷི་པྤཱ་ཡོ. ཏཱ་ནཱིཏི ཉ་ཏྟི་ཀ་མྨ་ཨ་པ་ལོ་ཀ་ན་ཀ་མྨཱ་ནི. ས་བྦེ་ས་མྤི ཀ་མྨཱ་ནནྟི ས་བྦེ་ས་མྤི ཙ་ཏུ་ནྣཾ ཀ་མྨཱ་ནཾ. པ་ར་ཏོཏི པ་ར་སྨིཾ པ་རི་ཝཱ་རཱ་ཝ་སཱ་ནེ (པ་རི. ཨ་ཊྛ. ༤༨༢).
༢༣༧. ཙ་ཏུ་ཝ་གྒ་ཀ་ར་ཎཱ་དི་ཀ་ཐཱ
༣༨༨. ཡ་དི་དཾ ཀ་མྨ་ནྟི ཡོ་ཛ་ནཱ. ཏེ་སནྟི ས་ངྒྷཱ་ནཾ. ཀ་མྨ་པྤ་ཏྟོཏི ཨེ་ཏྠ ཀ་མྨེ་ན, ཀ་མྨ་སྶ ཝཱ པ་ཏྟོ་ཏི ཨ་ཏྠཾ པ་ཊི་ཀྑི་པ་ནྟོ ཨཱ་ཧ ‘‘ཀ་མྨཾ པ་ཏྟོ’’ཏི. ‘‘ས་བྦ་ཀ་མྨེ་སུ ཀ་མྨ་པ་ཏྟོ’’ཏི པཱ་ལི༹་ན་ཡེ་ན ‘‘ཀ་མྨེ་སུ པ་ཏྟོ’’ཏི ཨ་ཏྠོ་པི ཡུ་ཛྫ་ཏི. ལོ་ཀ་ཝོ་ཧཱ་ར་ཝ་སེ་ན ‘‘ཀ་མྨེ་ན ཀ་མྨ་སྶ ཝཱ པ་ཏྟོ’’ཏི ཨ་ཏྠོ་པི ཡུ་ཛྫ་ཏེ་ཝ.
༣༨༩. པ་རི་ས་ཏོཏི པ་རི་ས་ཀཱ་ར་ཎཱ. ཏ་ཏྠཱཏི ‘‘ཙ་ཏུ་ཝ་གྒ་ཀ་ར་ཎ་ཉྩེ བྷི་ཀྑ་ཝེ’’ཏི་ཨཱ་དི་པཱ་ཋེ, ཙ་ཏུ་ཝཱི་ས་ཏི་པུ་གྒ་ལེ་སུ ཝཱ. ཀ་མྨ་ནཱ་ནཱ་སཾ་ཝཱ་ས་ཀོཏི ཨུ་ཀྑེ་པ་ནཱི་ཡ་ཀ་མྨ་ཀ་ཏོ. ལ་དྡྷི་ནཱ་ནཱ་སཾ་ཝཱ་ས་ཀོཏི ཨུ་ཀྑི་ཏྟཱ་ནུ་ཝ་ཏྟ་ཀོ. ‘‘ཧུ་ཏྭཱ’’ཏི ཨི་མི་ནཱ ‘‘བྷི་ཀྑུ་ནཱི་ཙ་ཏུ་ཏྠོ’’ཏི་ཨཱ་དཱི་སུ ཙ་ཏུ་ཝཱི་ས་ཏི་ཡཱ ཋཱ་ནེ་སུ ཀི་རི་ཡཱ་ཝི་སེ་ས་ན་བྷཱ་ཝཾ ད་སྶེ་ཏི. བྷི་ཀྑུ་ནཱི ཙ་ཏུ་ཏྠཱི ཨེ་ཏ་སྶཱ་ཏི བྷི་ཀྑུ་ནཱི་ཙ་ཏུ་ཏྠོ, ཙ་ཏུ་ཝ་གྒོ ས་ངྒྷོ་ཏི་ཨཱ་དི་ནཱ ཝ་ཙ་ན་ཏྠོ ཀཱ་ཏ་བྦོ.
༣༩༣. པ་རི་ཝཱ་སཱ་དཱིཏི་ཨཱ་དི་ས་དྡེ་ན མཱུ་ལཱ་ཡ་ཀ་སྶ་ན་མཱ་ན་ཏྟ་ཨ་བྦྷཱ་ནཱ་ནི ས་ངྒ་ཎྷཱ་ཏི. ཏེ་སནྟི པ་རི་ཝཱ་སཱ་དི་ཀ་མྨཱ་ནཾ. པ་ར་ཏོཏི པ་ར་སྨིཾ ཙཱུ་ལ༹་ཝ་གྒེ (ཙཱུ་ལ༹་ཝ. ཨ་ཊྛ. ༧༥ ཨཱ་ད་ཡོ).
༣༩༤. པ་ཊི་ཀུ་ཊྛ་ཀ་ཏ་ཀ་མྨ་སྶཱཏི པ་ཊི་ཀུ་ཊྛ་སྶ ཧུ་ཏྭཱ ཀ་ཏ་སྶ ཀ་མྨ་སྶ. པ་ཀ་ཏ་ཏྟ་སྶཱཏི ཨེ་ཏྠ པ་ཀ་ཏི་སཱི་ལ་ས་ངྑཱ་ཏོ ཨ་ཏྟཱ ས་བྷཱ་ཝོ ཨེ་ཏ་སྶཱ་ཏི པ་ཀ་ཏ་ཏྟོ་ཏི ཨ་ཏྠཾ ད་སྶེ་ནྟོ ཨཱ་ཧ ‘‘ཨ་ཝི་པ་ནྣ་སཱི་ལ་སྶཱ’’ཏི. ས་ངྒྷཱ་དི་སེ་སཾ ཨ་ནཱ་པ་ཛྫ་ནྟ་སྶཱ་པི ཨ་ཝི་པ་ནྣ་སཱི་ལ་ཏྟཱ ཝུ་ཏྟཾ ‘‘པཱ་རཱ་ཛི་ཀཾ ཨ་ན་ཛ྄ཛྷཱ་པ་ནྣ་སྶཱ’’ཏི. ཨི་མི་ནཱ ས་ངྒྷཱ་དི་སེ་སཾ ཨཱ་པ་ཛྫ་ནྟོ་པི པ་ཀ་ཏ་ཏྟོ་ཡེ་ཝཱ་ཏི ད་སྶེ་ཏི. སོ་པི ཧི ཨི་དྷ ཨ་ཝི་པ་ནྣ་སཱི་ལོ ནཱ་མ, ཨ་ཉྙ་ཏྠ པ་ན ས་ངྒྷཱ་དི་སེ་ས་སྶ སཱི་ལ་ཝི་པ་ཏྟི་བྷཱ་ཝ་ཏོ ཏཾ ཨཱ་པ་ཛྫ་ནྟོ་པི ཝི་པ་ནྣ་སཱི་ལོ་ཡེ་ཝ ནཱ་མ. ཨཱ་ན་ནྟ་རི་ཀ་སྶཱཏི ཨེ་ཏྠ ཨ་ན་ནྟ་ར་ས་དྡ་སྶ ས་མྦ་ནྡྷ་ཉྩ ཎི་ཀ་པ་ཙྩ་ཡ་སྶ ཨ་ཏྠ་ཉྩ ད་སྶེ་ནྟོ ཨཱ་ཧ ‘‘ཨ་ཏྟ་ནོ ཨ་ན་ནྟ་རཾ ནི་སི་ནྣ་སྶཱ’’ཏི. ཏ་ཏྠ ‘‘ཨ་ཏྟ་ནོ’’ཏི ཨི་མི་ནཱ ཨ་ན་ནྟ་ར་ས་དྡ་སྶ ས་མྦ་ནྡྷཾ ད་སྶེ་ཏི. ‘‘ནི་སི་ནྣ་སྶཱ’’ཏི ཨི་མི་ནཱ ཎི་ཀ་པ་ཙྩ་ཡ་སྶ ཨ་ཏྠཾ ད་སྶེ་ཏི.
༢༣༩. དྭེ་ནི་སྶཱ་ར་ཎཱ་དི་ཀ་ཐཱ
༣༩༥. ཝ་ཏྠུ་ཏོཏི ཝ་ཏྠུ་ཀཱ་ར་ཎཱ. ཏ་ཏྠཱཏི ‘‘དྭེ་མཱ བྷི་ཀྑ་ཝེ’’ཏི་ཨཱ་དི་པཱ་ཋེ. ‘‘ས་ནྡྷཱ་ཡ ཝུ་ཏྟ’’ནྟི ཨི་མི་ནཱ ‘‘ཨ་པྤ་ཏྟོ’’ཏི་ཨཱ་དི་སུ་ཏྟ་སྶ ནེ་ཡྻ་ཏྠ་བྷཱ་ཝཾ ད་སྶེ་ཏི. ཧཱིཏི ས་ཙྩཾ, ཡ་སྨཱ ཝཱ. ཏནྟི པ་བྦཱ་ཛ་ནཱི་ཡ་ཀ་མྨཾ. པུ་ན ཏནྟི པ་བྦཱ་ཛ་ནཱི་ཡ་ཀ་མྨ་མེ་ཝ. ཨེ་ས བྷི་ཀྑུ ཨ་པྤ་ཏྟོ་ཏི ས་མྦ་ནྡྷོ. ཀ་སྨཱ ཨ་པྤ་ཏྟོ་ཏི ཨཱ་ཧ ‘‘ཡ་སྨཱ’’ཏི་ཨཱ་དི. ཨཱ་ཝེ་ཎི་ཀ་ལ་ཀྑ་ཎེ་ནཱཏི ཨ་ཝི་ནཱ ཧུ་ཏྭཱ པ་ཝ་ཏྟེ་ན ལ་ཀྑ་ཎེ་ན. ཨ་ཏྟ་ནཱ ཨ་ཝི་ནཱ ཧུ་ཏྭཱ ཨ་ཏྟ་ནོ ས་ནྟ་ཀེ་ན ཝི་སུཾ བྷཱུ་ཏེ་ན ལ་ཀྑ་ཎེ་ནཱ་ཏི ཝུ་ཏྟཾ ཧོ་ཏི. ཡ་དི ཨ་པྤ་ཏྟོ, ཀ་སྨཱ སུ་ནི་སྶཱ་རི་ཏོ་ཏི ཨཱ་ཧ ‘‘ཡ་སྨཱ པ་ན་སྶཱ’’ཏི་ཨཱ་དི. ཨ་སྶཱཏི བྷི་ཀྑུ་སྶ, ཀ་རེ་ཡྻཱ་ཏི ས་མྦ་ནྡྷོ. ཏཾ ཙེ ས་ངྒྷོ ཏ་ཛྫ་ནཱི་ཡ་ཀ་མྨཱ་དི་ཝ་སེ་ན ནི་སྶཱ་རེ་ཏི, སུ་ནི་སྶཱ་རི་ཏོ་ཏི ས་མྦ་ནྡྷོ. སོཏི བྷི་ཀྑུ. ཡ་སྨཱ ཨ་ནུ་ཉྙཱ་ཏཱ, ཏ་སྨཱ སུ་ནི་སྶཱ་རི་ཏོ་ཏི ཡོ་ཛ་ནཱ. ཀི་ཏྟ་ཀེ་ན ཨ་ངྒེ་ན ཨ་ནུ་ཉྙཱ་ཏཱ་ཏི ཨཱ་ཧ ‘‘ཨེ་ཀེ་ན་པི ཨ་ངྒེ་ནཱ’’ཏི.
༣༩༦. ཨོ་སཱ་ར་ཎཱཏི ཨེ་ཏྠ ཨོ་ཏྱཱུ་པ་ས་གྒ་ཝ་སེ་ན ས་ར་དྷཱ་ཏུ པ་ཝེ་ས་ན་ཏྠོ་ཏི ཨཱ་ཧ ‘‘པ་ཝེ་ས་ནཱ’’ཏི. ཏ་ཏྠཱཏི ‘‘ཨོ་སཱ་ར་ཎཱ’’ཏི་ཨཱ་དི་པཱ་ཋེ. ཨོ་སཱ་རེ་ཏཱིཏི ཨེ་ཏྠ ཨ་བྦྷཱ་ནཱ་དི་ཝ་སེ་ན པ་ཝེ་ས་ནཾ པ་ཊི་ཀྑི་པ་ནྟོ ཨཱ་ཧ ‘‘ཨུ་པ་ས་མྤ་ད་ཀ་མྨ་ཝ་སེ་ནཱ’’ཏི. ས་ཧ་སྶ་ཀྑ་ཏྟུ་མྤཱིཏི པིས་དྡོ ག་ར་ཧ་ཏྠོ. ཨེ་ཀ་ཝཱ་རཱ་དི་ཀེ པ་ན ཀཱ ནཱ་མ ཀ་ཐཱ་ཏི ད་སྶེ་ཏི. སཱ་ཏི་སཱ་རཱཏི ས་དོ་སཱ. ཏ་ཐཱཏི ཡ་ཐཱ ཨཱ་ཙ་རི་ཡུ་པ་ཛ྄ཛྷཱ་ཡཱ སཱ་ཏི་སཱ་རཱ, ཏ་ཐཱ. སེ་སོ ཀཱ་ར་ཀ་ས་ངྒྷོ སཱ་ཏི་སཱ་རོ་ཏི ས་མྦ་ནྡྷོ. ‘‘ཧ་ཏྠ་ཙྪི་ནྣཱ་ད་ཡོ པ་ན དྭ་ཏྟིཾ་ས སུ་ཨོ་སཱ་རི་ཏཱ’’ཏི ཝུ་ཏྟ་ཏྟཱ ཨ་ནྡྷ་མཱུ་ག་བ་དྷི་རཱ་ནཾ ཨ་པ་བྦ་ཛི་ཏཱ་ན་མྤི ཨུ་པ་ས་མྤ་དཱ རུ་ཧ་ཏཱི་ཏི ད་ཊྛ་བྦཾ. ཏེཏི ཧ་ཏྠ་ཙྪི་ནྣཱ་ད་ཡོ དྭ་ཏྟིཾ་ས.
༣༩༧. ཨ་བྷཱུ་ཏ་ཝ་ཏྠུ་ཝ་སེ་ནཱཏི ཨ་ས་ཙྩ་ཝ་ཏྠུ་ཝ་སེ་ན, ཨ་སཾ་ཝི་ཛྫ་མཱ་ན་ཝ་ཏྠུ་ཝ་སེ་ན ཝཱ. ཏ་ཏྠཱཏི ‘‘ཨི་དྷ པ་ན བྷི་ཀྑ་ཝེ’’ཏི་ཨཱ་དི་པཱ་ཋེ. པ་ཊི་ནི་སྶ་ཛྫི་ཏཱཏི ཨེ་ཏྠ ཏ་པ་ཙྩ་ཡ་སྶ ཀ་མྨ་ཏྠེ པ་ཝ་ཏྟ་བྷཱ་ཝཾ ད་སྶེ་ནྟོ ཨཱ་ཧ ‘‘པ་ཊི་ནི་སྶ་ཛྫི་ཏ་བྦཱ’’ཏི.
༢༤༡. ཨུ་པཱ་ལི་པུ་ཙྪཱ་ཀ་ཐཱ
༤༠༠. ཏ་ཏྠཱཏི ཨུ་པཱ་ལི་པ་ཉྷེ་སུ. ཏ་སྶ་པཱ་པི་ཡ་སི་ཀཱ་དཱི་ཧི ས་དྡྷིཾ ཨེ་ཀཱ པུ་ཙྪཱ ཀ་ཏཱ་ཏི ཡོ་ཛ་ནཱ. བྷི་ཀྑཱུ་ན་མྤི ཝཱ་རེ་ཏི ས་མྦ་ནྡྷོ. པི་ས་དྡེ་ན ‘‘ན ཀེ་ཝ་ལཾ ཨུ་པཱ་ལི་པ་ཉྷེ་སུ་ཡེ་ཝ ཡོ་ཛེ་ཏ་བྦཱ་ནི, ཨ་ཐ ཁོ བྷི་ཀྑཱུ་ནཾ ཝཱ་རེ་པཱི’’ཏི ད་སྶེ་ཏི.
༢༤༢. ཏ་ཛྫ་ནཱི་ཡ་ཀ་མྨ་ཀ་ཐཱ
༤༠༧. ‘‘ཨི་དྷ པ་ན བྷི་ཀྑ་ཝེ བྷི་ཀྑུ བྷ་ཎྜ་ན་ཀཱ་ར་ཀོ’’ཏི་ཨཱ་དི ཝུ་ཏྟ་ནྟི ས་མྦ་ནྡྷོ. ཏ་ཏྠཱཏི ‘‘ཨི་དྷ པ་ན བྷི་ཀྑ་ཝེ’’ཏི་ཨཱ་དི་པཱ་ཋེ. ཨ་ན་པ་དཱ་ནོཏི ཨེ་ཏྠ ཨ་པ་པུ་བྦོ དཱ་ས་དྡོ ཨ་ཝ་ཁ་ཎྜ་ན་ཏྠོ་ཏི ཨཱ་ཧ ‘‘ཨ་པ་དཱ་ནཾ ཝུ་ཙྩ་ཏི པ་རི་ཙྪེ་དོ’’ཏི. ན་ཏྠི ཨ་པ་དཱ་ནཾ ཨ་ཝ་ཁ་ཎྜ་ནཾ ཨཱ་པ་ཏྟི་པ་རི་ཡ་ནྟོ ཨེ་ཏ་སྶཱ་ཏི ཨ་ན་པ་དཱ་ནོ་ཏི ཝ་ཙ་ན་ཏྠོ ཀཱ་ཏ་བྦོ. སཱ་ཡེ་ཝ པཱ་ལི༹ ཝུ་ཏྟཱ་ཏི ས་མྦ་ནྡྷོ. ཏ་ཏྠཱཏི ཏ་སྶཾ པཱ་ལི༹་ཡཾ. ཀི་ཉྩི ཨ་ཏྠ་ཝི་ནི་ཙྪ་ཡཾ པཱ་ལི༹་ཨ་ནུ་སཱ་རེ་ན ཝི་དི་ཏུཾ ན ས་ཀྐཱ ན ཧོ་ཏཱི་ཏི ཡོ་ཛ་ནཱ.
ཨི་ཏི ཙ་མྤེ་ཡྻ་ཀྑ་ནྡྷ་ཀ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.