༧. ཀ་ཐི་ན་ཀྑ་ནྡྷ་ཀཾ

༡༨༧. ཀ་ཐི་ནཱ་ནུ་ཛཱ་ན་ན་ཀ་ཐཱ

༣༠༦. ཀ་ཐི་ན་ཀྑ་ནྡྷ་ཀེ པཱ་ཝེ་ཡྻ་ཀཱཏི ཨེ་ཏྠ པཱ་ཝཱ་ར་ཊྛེ ནི་ཝ་ས་ནྟཱི་ཏི པཱ་ཝེ་ཡྻ་ཀཱ་ཏི ཝ་ཙ་ན་ཏྠཾ ད་སྶེ་ནྟོ ཨཱ་ཧ ‘‘པཱ་ཝཱ་ར་ཊྛ་ཝཱ་སི་ནོ’’ཏི. ཏ་ཏྠཱཏི པཱ་ཝཱ་ནཱ་མ་ཀེ ར་ཊྛེ. ཨེ་ཀོ པི་ཏཱ ཨེ་ཏེ་ས་ནྟི ཨེ་ཀ་པི་ཏུ་ཀཱ. ཏེ ཙ ཏེ བྷཱ་ཏ་རོ ཙེ་ཏི ཨེ་ཀ་པི་ཏུ་ཀ་བྷཱ་ཏ་རོ, ཏེ་སཾ. ཨེ་ཏནྟི ‘‘པཱ་ཝེ་ཡྻ་ཀཱ’’ཏི ཨེ་ཏཾ ནཱ་མཾ. ཏེ་སཱུཏི པཱ་ཝེ་ཡྻ་ཀེ་སུ. ‘‘དྷུ་ཏ་ངྒ་ས་མཱ་དཱ་ན་ཝ་སེ་ནཱ’’ཏི ཝི་སེ་ས་ན་སྶ བྱ་ཝ་ཙྪེ་ད་བྷཱ་ཝཾ ད་སྶེ་ཏུཾ ཝུ་ཏྟཾ ‘‘ན ཨ་ར་ཉྙ་ཝཱ་ས་མ་ཏྟེ་ནཱ’’ཏི. ཝི་སེ་ས་ན་ཉྷི དུ་ཝི་དྷཾ བྱ་ཝ་ཙྪེ་དཾ, ཏ་པྤཱ་ཀ་ཊི་ཀ་ར་ཎ་ཉྩཱ་ཏི. ཏེ་སནྟི པཱ་ཝེ་ཡྻ་ཀཱ་ནཾ. པི་ཎྜ་པཱ་ཏི་ཀཱ་དི་བྷཱ་ཝེ་པཱི་ཏི ས་མྦ་ནྡྷོ. པིས་དྡོ ཨཱ་ར་ཉྙ་ཀཾ ཨ་པེ་ཀྑ་ཏི. ཨེ་ཏནྟི ‘‘ས་བྦེ ཨཱ་ར་ཉྙ་ཀཱ’’ཏི་ཨཱ་དི ཨེ་ཏཾ ཝ་ཙ་ནཾ. ཨི་མེ པ་ནཱཏི པཱ་ཝེ་ཡྻ་ཀཱ པ་ན. ཨུ་ད་ཀ་སཾ་ག་ཧེཏི ཨེ་ཏྠ ཨུ་ད་ཀེ་ན སཾ་ག་ཧེ་ཏ་བྦ་ནྟི ད་སྶེ་ནྟོ ཨཱ་ཧ ‘‘ཨུ་ད་ཀེ་ན སཾ་ག་ཧི་ཏེ’’ཏི. ‘‘ཐ་ལེ ཙ ནི་ནྣེ ཙཱ’’ཏི ཨི་མི་ནཱ ‘‘ཨུ་ད་ཀ་སཾ་ག་ཧེ’’ཏི པ་ད་སྶ ས་རཱུ་པཾ ད་སྶེ་ཏི.

ཨུ་ད་ཀ་ཙི་ཀྑ་ལློཏི ཨུ་ད་ཀེ་ན ལོ་ལི༹་ཏོ ཙི་ཀྑ་ལློ ཨུ་ད་ཀ་ཙི་ཀྑ་ལློ. ཨོ་ཀ་པུ་ཎྞེ་ཧཱིཏི ཨེ་ཏྠ ཨོ་ཀ་ས་དྡོ ཨུ་ད་ཀ་ཝེ་ཝ་ཙ་ནོ་ཏི ཨཱ་ཧ ‘‘ཨུ་ད་ཀ་པུ་ཎྞེ་ཧཱི’’ཏི. ཨུ་ད་ཀ་ཉྷི ཨུ་ཙ་ཡ་ཏི ས་མ་ཝཱ་ཡ་བྷཱ་ཝེ་ན པ་ཝ་ཏྟ་ཏཱི་ཏི ཨོ་ཀནྟི ཝུ་ཙྩ་ཏི. ཏེ་སནྟི པཱ་ཝེ་ཡྻ་ཀཱ་ནཾ. གྷ་ནཱ་ནཱིཏི ནི་ར་ནྟ་རཱ་ནི. ཏེ་སཱུཏི ཙཱི་ཝ་རེ་སུ. ཏེ་ནཱཏི ཙཱི་ཝ་རཱ་ནཾ གྷ་ན་ཏྟཱ, ཨུ་ད་ཀ་སྶ ཙ ན པ་གྒྷ་ར་ཎ་ཏྟཱ. བྷ་ག་ཝ་ཏཱ ‘‘ཨ་ཝི་ཝ་ད་མཱ་ནཱ ཕཱ་སུ་ཀཾ ཝ་སྶཾ ཝ་སི་ཏྠཱ’’ཏི པུ་ཙྪི་ཡ་མཱ་ནཱ་པི ཏེ བྷི་ཀྑཱུ ཡ་ཐཱ་པུ་ཙྪི་ཏཾ ཨ་ཝ་ཏྭཱ ཀ་སྨཱ ཕཱ་སུ་ཀ་པ་དཾ ཨ་པ་ནེ་ཏྭཱ ‘‘ཨ་ཝི་ཝ་ད་མཱ་ནཱ ཝ་སྶཾ ཝ་སི་མྷཱ’’ཏི ཨ་ཝོ་ཙུ་ནྟི ཨཱ་ཧ ‘‘ཨ་ཝི་ཝ་ད་མཱ་ནཱ ཝ་སྶཾ ཝ་སི་མྷཱ་ཏི ཨེ་ཏྠཱ’’ཏི་ཨཱ་དི. ཨུ་ཀྐ་ཎྛི་ཏ་ཏཱ་ཡ ཙཱཏི ཨེ་ཏྠ ཙས་དྡོ ‘‘ཕཱ་སུ་ཏཱ་ཡ ཨ་བྷཱ་ཝེ་ནཱ’’ཏི ཨེ་ཏྠཱ་པི ཡོ་ཛེ་ཏ་བྦོ. སེ་ནཱ་ས་ན་ཕཱ་སུ་ཏཱ་ཡ ཨ་བྷཱ་ཝེ་ན ཙ བྷ་ག་ཝ་ཏོ ད་སྶ་ནཱ་ལཱ་བྷེ་ན ཨུ་ཀྐ་ཎྛི་ཏ་ཏཱ་ཡ ཙཱ་ཏི ཧི ཨ་ཏྠོ. ཨ་ན་མ་ཏ་གྒི་ཡ་ཀ་ཐནྟི སཾ་ཡུ་ཏྟ་ནི་ཀཱ་ཡེ ཨ་ན་མ་ཏ་གྒི་ཡ་སུ་ཏྟ་ནྟ་ཀ་ཐཾ (སཾ. ནི. ༢.༡༣༥). ས་བྦེ་ཝ ཏེ པཱ་ཝེ་ཡྻ་ཀཱ བྷི་ཀྑཱུ་ཏི ཡོ་ཛ་ནཱ. ཏནྟི ཨ་ན་མ་ཏ་གྒི་ཡ་ཀ་ཐཾ. ཏ་ཏོཏི དྷ་མྨ་ཀ་ཐ་ན་ཏོ, པ་ར་ནྟི ས་མྦ་ནྡྷོ. བྷ་ག་ཝཱ ཨཱ་མ་ནྟེ་སཱི་ཏི ས་མྦ་ནྡྷོ. ཨེ་ཀཾ ཙཱི་ཝ་རནྟི ས་ངྒྷཱ་ཊིཾ. ས་ནྟ་རུ་ཏྟ་རེ་ནཱཏི ས་ཧ ཨ་ནྟ་རེ་ནཱ་ཏི ས་ནྟ་རཾ, ས་ནྟ་ར་ཉྩ ཏཾ ཨུ་ཏྟ་ར་ཉྩེ་ཏི ས་ནྟ་རུ་ཏྟ་རཾ, ཏེ་ན. ཨ་སྶུཏི བྷ་ཝེ་ཡྻུཾ. ཨ་བྷ་ཝི་སྶཾ་སཱུ་ཏི ཧི ཨ་ཏྠོ. ས་ཏྟ་མཱི་ཝི་བྷ་ཏྟི་ཀཱ་ལཱ་ཏི་པ་ཏྟི་ཝི་བྷ་ཏྟཱི་ནཾ ས་མཱ་ན་ཏྠ་བྷཱ་ཝོ ས་དྡ་ས་ཏྠེ་སུ ཝུ་ཏྟོ་ཡེ་ཝ. ཙས་དྡོ ཨུ་པ་ནྱཱ་ས་ཏྠོ. ཨེ་ས ཀ་ཐི་ན་ཏྠཱ་རོ ནཱ་མཱ་ཏི ཡོ་ཛ་ནཱ. ཨ་ནུ་ཛཱ་ནི་ཏུ་ཀཱ་མོ ཧུ་ཏྭཱ་ཏི ས་མྦ་ནྡྷོ.

ཏ་ཏྠཱཏི ‘‘ཨ་ནུ་ཛཱ་ནཱ་མི བྷི་ཀྑ་ཝེ’’ཏི་ཨཱ་དི་པཱ་ཋེ. ཝོཀཱ་ར་སྶ ནི་པཱ་ཏ་མ་ཏྟེ ས་ཏི ཀ་ཐ་མ་ཏྠོ བྷ་ཝི་སྶ་ཏཱི་ཏི ཨཱ་ཧ ‘‘ཨ་ཏྠ་ཏ་ཀ་ཐི་ནཱ་ན་ནྟི ཨ་ཏྠོ’’ཏི. ཨ་ཏྠ་ཏ་ཀ་ཐི་ནཱ་ནཾ བྷི་ཀྑཱུ་ན་ནྟི ས་མྦ་ནྡྷོ. ལ་དྡྷ་གུ་ཎཾ ད་སྶེ་ནྟོ ཨཱ་ཧ ‘‘ཨེ་ཝ་ཉྷཱི’’ཏི་ཨཱ་དི. ཧིས་དྡོ ལ་དྡྷ་གུ་ཎ་ཛོ་ཏ་ཀོ. པ་ར་ཏོཏི པ་ར་མྷི. ‘‘སོ ཏུ་མྷཱ་ཀ’’ནྟི ཝཱ ‘‘སོ ཝོ’’ཏི ཝཱ ཨ་ཝ་ཏྭཱ ‘‘སོ ནེ་སཾ བྷ་ཝི་སྶ་ཏཱི’’ཏི ཝུ་ཏྟ་ཏྟཱ ཝོ-ཀཱ་རོ ནི་པཱ་ཏ་མ་ཏྟོ་ཏི ཨ་དྷི་པྤཱ་ཡོ. ‘‘ཝོ་ཏི སཱ་མི་ཝ་ཙ་ན་མེ་ཝེ་ཏ’’ནྟི ཨི་མི་ནཱ ཝོ ཏུ་མྷཱ་ཀ་ནྟི ཨ་ཏྠཾ ད་སྶེ་ཏི. ཨེ་ཝཾ ས་ཏི ‘‘པ་ར་ཏོ སོ ནེ་ས’’ནྟི ཨེ་ཏྠ ཀ་ཐ་མ་ཏྠོ བྷ་ཝི་སྶ་ཏཱི་ཏི ཨཱ་ཧ ‘‘སོ ནེ་ས་ནྟི ཨེ་ཏྠ པ་ནཱ’’ཏི་ཨཱ་དི. ཡེ ཏུ་མྷེ ཨ་ཏྠ་ཏ་ཀ་ཐི་ནཱ, ཏེ་སཾ ཏུ་མྷཱ་ཀ་ནྟི ཡོ་ཛ་ནཱ. ཀ་ཐི་ནས་དྡོ ཐི་ར་ཏྠ་ཝཱ་ཙ་ཀོ ཨ་ནི་པྥ་ནྣ་པཱ་ཊི་པ་དི་ཀོ. ཨ་ནཱ་མ་ནྟ་ཙཱ་རཱ་དི་ཀཱ་ནཾ པ་ཉྩཱ་ནི་སཾ་སཱ་ནཾ ཨ་ནྟོ་ཀ་ར་ཎ་ས་མ་ཏྠ་བྷཱ་ཝེ ཐི་ར་ནྟི ཨ་ཏྠོ.

ཏ་ཏྠཱཏི ཨ་ནཱ་མ་ནྟ་ཙཱ་རཱ་དཱི་སུ པ་ཉྩཱ་ནི་སཾ་སེ་སུ. ཨ་ནཱ་མ་ནྟ་ཙཱ་རོཏི ཨེ་ཏྠ ཙ་ར་ཎཾ ཙཱ་རོ, ཨ་ནཱ་མ་ནྟེ་ཏྭཱ ཙཱ་རོ ཨ་ནཱ་མ་ནྟ་ཙཱ་རོ་ཏི ད་སྶེ་ནྟོ ཨཱ་ཧ ‘‘ཨ་ནཱ་མ་ནྟེ་ཏྭཱ ཙ་ར་ཎ’’ནྟི. ‘‘ཨ་ས་མཱ་དཱ་ཡ ཙ་ར་ཎ’’ནྟི ཨི་མི་ནཱ ཨ་ས་མཱ་དཱ་ན་ཙཱ་རོཏི ཨེ་ཏྠ པུ་བྦ་པ་དེ ཏྭཱ་པ་ཙྩ་ཡ་སྶ ཨ་ནཱ་དེ་སཾ ཀ་ཏྭཱ ཨ་ས་མཱ་དཱ་ན་ཙཱ་རོ་ཏི ཝུ་ཏྟ་ནྟི ད་སྶེ་ཏི. ཡཱ་ཝ་ཏ་ཏྠ་ཙཱི་ཝ་རནྟི ཨེ་ཏྠ ཨཱ་ཀཱ་ར་ལོ་པེ་ན ས་ནྡྷཱི་ཏི ཨཱ་ཧ ‘‘ཡཱ་ཝ་ཏཱ ཙཱི་ཝ་རེ་ན ཨ་ཏྠོ’’ཏི. ‘‘ཡཱ་ཝ་ད་ཏྠ་ཙཱི་ཝ་ར’’ནྟི་པི པཱ་ཋོ, ཨེ་ཝཾ ས་ཏི ད་ཀཱ་རོ པ་ད་ས་ནྡྷི་མ་ཏྟོ. ཡཱ་ཝ་ས་དྡོ པ་རི་ཙྪེ་ད་ཏྠ་ཝཱ་ཙ་ཀོ, ན ཨ་བྷི་ཝི་ཛྷ་ཏྠ་ཝཱ་ཙ་ཀོ. ཨ་ཏྠ་ས་དྡེ་ན ས་མཱ་སོ ཧོ་ཏི. ཡོ ཙ ཏ་ཏྠ ཙཱི་ཝ་རུ་པྤཱ་དོཏི ཨེ་ཏྠ ཏ་ཏྠ་ས་དྡ་སྶ ཝི་ས་ཡཾ ད་སྶེ་ནྟོ ཨཱ་ཧ ‘‘ཀ་ཐི་ན་ཏྠཱ་ར་སཱི་མཱ་ཡ’’ནྟི. ཏ་ཏྲུ་པྤཱ་དེ་ནཱཏི ཏ་ཏྲ ཀ་ཐི་ན་ཏྠཱ་ར་སཱི་མཱ་ཡཾ ཨུ་པྤཱ་དེ་ན མཱུ་ལེ་ན. ‘‘ཙཱི་ཝ་རཾ ཨུ་པྤ་ཛྫ་ཏཱི’’ཏི ཨི་མི་ནཱ ཙཱི་ཝ་རུ་པྤཱ་དོཏི ཨེ་ཏྠ ཙཱི་ཝ་ར་མེ་ཝ ཨུ་པྤཱ་དོ ཙཱི་ཝ་རུ་པྤཱ་དོ་ཏི ཝི་སེ་ས་ན་པ་ར་པ་ད་ཏྟཾ ད་སྶེ་ཏི.

ཀེཏི ཀི་ཏྟ་ཀཱ. ཨི་དཾ ‘‘ག་ཎ་ཝ་སེ་ནཱ’’ཏི ཝ་ཙ་ནཾ ས་ནྡྷཱ་ཡ ཝུ་ཏྟཾ. ཨ་ཐ ཝཱ ཀེཏི ཀི་ནྣཱ་མ ཝུ་ཏྠ་ཝ་སྶཱ. ཨི་དཾ ‘‘ཝུ་ཏྠ་ཝ་སྶ་ཝ་སེ་ནཱ’’ཏི ཝ་ཙ་ནཾ ས་ནྡྷཱ་ཡ ཝུ་ཏྟཾ. ས་ཏ་ས་ཧ་སྶ་མྤི ཛ་ནཱ ལ་བྷ་ནྟཱི་ཏི ཡོ་ཛ་ནཱ. པིས་དྡེ་ན ཏ་ཏོ ཨ་དྷི་ཀ་མྤི ལ་བྷ་ནྟཱི་ཏི ད་སྶེ་ཏི. ཚི་ནྣ་ཝ་སྶཱ ཝཱཏི པུ་རི་མི་ཀཱ་ཡ ཨུ་པ་ག་ནྟྭཱ ཚི་ནྣ་ཝ་སྶཱ ཝཱ. ཨ་ཉྙ་སྨིཾ ཝི་ཧཱ་རེཏི ཀ་ཐི་ན་ཏྠཱ་ར་ཝི་ཧཱ་ར་ཏོ ཨ་པ་ར་སྨིཾ ཝི་ཧཱ་རེ. ས་བྦེ ཚི་ནྣ་ཝ་སྶཱ་དི་ཀཱ བྷི་ཀྑཱུ པུ་རི་མི་ཀཱ་ཡ ཝ་སྶཱུ་པ་ག་ཏཱ་ནཾ བྷི་ཀྑཱུ་ནཾ ག་ཎ་པཱུ་ར་ཀཱ ཧོ་ནྟཱི་ཏི ཡོ་ཛ་ནཱ. ཨི་ཏ་རེ་སཾ་ཡེ་ཝཱཏི པུ་རི་མི་ཀཱ་ཡ ཝ་སྶཾ ཨུ་པ་ག་ནྟྭཱ པ་ཋ་མ་པ་ཝཱ་ར་ཎཱ་ཡ པ་ཝཱ་རི་ཏཱ་ན་མེ་ཝ. པ་རི་པུ་ཎྞ་ཝ་སྶོཏི པ་རི་པུ་ཎྞོ ཝཱི་ས་ཏི་ཝ་སྶོ, ཨ་ཙྪི་ནྣ་ཝ་སྶོ ཝཱ. སོཏི སཱ་མ་ཎེ་རོ. ཨི་ཏི ཨེ་ཏྠཱ་པཱིཏི ཨེ་ཝཾ ཨེ་ཏེ་སུ ཏཱི་སུ ཝཱ་རེ་སུ་པི.

ཀེ་ན དི་ནྣཾ ཀ་ཐི་ན་ཙཱི་ཝ་རཾ ཝ་ཊྚ་ཏཱི་ཏི ཡོ་ཛ་ནཱ. ཡེ་ན ཀེ་ན་ཙི དི་ནྣཾ ཙཱི་ཝ་རཾ ཝ་ཊྚ་ཏཱི་ཏི ས་མྦ་ནྡྷོ. ཏནྟི ཝ་ཏྟཾ. ཨ་ཛཱ་ན་ནྟོཏི ཨ་ཛཱ་ན་ན་ཧེ་ཏུ. ཧེ་ཏྭ་ཏྠེ ཧི ཨ་ནྟ་པ་ཙྩ་ཡོ. ཏ་སྶཱཏི ཀ་ཐི་ན་དཱ་ཡ་ཀ་སྶ. ཨེ་ཝནྟི ཨི་མི་ནཱ ཝ་ཀྑ་མཱ་ན་ན་ཡེ་ན. ཨ་ཉྙ་ཏ་ར་པ་ཧོ་ན་ཀཾ ཝ་ཏྠ་ནྟི ས་མྦ་ནྡྷོ. ཏ་སྶཱཏི ཀ་ཐི་ན་ཙཱི་ཝ་ར་སྶ. ཨེ་ཏྟ་ཀཱ ནཱ་མ སཱུ་ཙི་ཡོ ཝ་ཊྚ་ཏཱི་ཏི ས་མྦ་ནྡྷོ. ཨི་ཏི ཨཱ་ཙི་ཀྑི་ཏ་བྦ་ནྟི ཡོ་ཛ་ནཱ.

ཀ་ཐི་ན་ཏྠཱ་ར་ཀེ་ནཱ་པི ཝ་ཏྟཾ ཛཱ་ནི་ཏ་བྦ་ནྟི ས་མྦ་ནྡྷོ. པིས་དྡོ ཀ་ཐི་ན་དཱ་ཡ་ཀཾ ཨ་པེ་ཀྑ་ཏི. ཝ་ཏྟཾ ཝི་ཏྠཱ་རེ་ནྟོ ཨཱ་ཧ ‘‘ཏ་ནྟ་ཝཱ་ཡ་གེ་ཧ་ཏོ ཧཱི’’ཏི་ཨཱ་དི. ཨཱ་བྷ་ཏ་ས་ནྟཱ་ནེ་ནེ་ཝཱཏི ཨཱ་བྷ་ཏ་ས་ནྟ་ཏི་ཡཱ ཨེ་ཝ. ཁ་ལི་མ་ཀྑི་ཏ་སཱ་ཊ་ཀོཏི ཨ་ཧ་ཏ་སཱ་ཊ་ཀོ. སོ ཧི ཁ་ལེ་ན ཏ་ཀྐེ་ན ཀ་ཉྫི་ཀེ་ན མ་ཀྑི་ཏ་སཱ་ཊ་ཀ་ཏྟཱ ‘‘ཁ་ལི་མ་ཀྑི་ཏ་སཱ་ཊ་ཀོ’’ཏི ཝུ་ཙྩ་ཏི. ཀ་ཐི་ན་ཏྠཱ་ར་སཱ་ཊ་ཀནྟི ཀ་ཐི་ན་ཏྠཱ་ར་ཏྠཱ་ཡ དི་ནྣཾ སཱ་ཊ་ཀཾ. ཏ་ད་ཧེ་ཝཱཏི ཏ་སྨིཾ དི་ནྣ་ཨ་ཧ་ནི ཨེ་ཝ. ཏ་སྨིནྟི པ་ཋ་མཾ དི་ནྣེ ཀ་ཐི་ན་ཏྠཱ་ར་སཱ་ཊ་ཀེ. ཨ་ཉྙཱ་ནི ཙཱཏི ཀ་ཐི་ན་སཱ་ཊ་ཀ་ཏོ ཨ་ཉྙཱ་ནི ཙ. ཙ་ས་དྡེ་ན ན ཀ་ཐི་ན་སཱ་ཊ་ཀ་མེ་ཝ ཨཱ་ཧ་ར་ཏི, ཨ་ཉྙཱ་ནི ཙཱ་ཏི ད་སྶེ་ཏི. ཡོཏི ཀ་ཐི་ན་དཱ་ཡ་ཀོ. ཨི་ཏ་རོཏི པ་ཋ་མཾ ཀ་ཐི་ན་དཱ་ཡ་ཀོ. ཡ་ཐཱ ཏ་ཐཱ ཨོ་ཝ་དི་ཏྭཱཏི ཏ་ཝ ས་ནྟ་ཀ་ཏོ ཨེ་ཏ་སྶ ས་ནྟ་ཀཾ ས་ངྒྷ་སྶ བ་ཧུ་པ་ཀཱ་རཾ, ས་ངྒྷ་སྶ བ་ཧུ་པ་ཀཱ་ར་ཏྟཾ ཏ་ཡཱ་པི ཨི་ཙྪི་ཏ་བྦཾ, ཨེ་ཝ་མི་ཙྪ་ནྟ་སྶ བ་ཧུ་པུ་ཉྙ་ནྟི ཡེ་ན ཏེ་ནཱ་ཀཱ་རེ་ན ཨོ་ཝ་དི་ཏྭཱ.

ཀེ་ན བྷི་ཀྑུ་ནཱ་ཏི ས་མྦ་ནྡྷོ. ཡ་སྶ ས་ངྒྷོ ཀ་ཐི་ན་ཙཱི་ཝ་རཾ དེ་ཏི, ཏེ་ན བྷི་ཀྑུ་ནཱ ཨ་ཏྠ་རི་ཏ་བྦ་ནྟི ཡོ་ཛ་ནཱ. ཀ་སྶ བྷི་ཀྑུ་སྶཱ་ཏི ས་མྦ་ནྡྷོ. ཡོ ཛི་ཎྞ་ཙཱི་ཝ་རོ ཧོ་ཏི, ཏ་སྶ དཱ་ཏ་བྦ་ནྟི ཡོ་ཛ་ནཱ. མ་ཧ་ཏཱི པ་རི་སཱ ཨེ་ཏ་སྶཱ་ཏི མ་ཧཱ་པ་རི་སོ ཐེ་རོ. ‘‘ན་ཝ་ཀ་ཏ་རོ ས་ཀྐོ་ཏི, ཏ་སྶ དཱ་ཏ་བྦ’’ནྟི ཝ་ཙ་ན་སྶ ཨ་ནེ་ཀ་ནྟ་བྷཱ་ཝཾ ད་སྶེ་ནྟོ ཨཱ་ཧ ‘‘ཨ་པི ཙཱ’’ཏི་ཨཱ་དི. ཨ་པི ཙཱཏི ཨེ་ཀ་ནྟེ་ན. ཏ་ད་ཏྠཱ་ཡཱཏི ཏ་སྶ ཛི་ཎྞ་ཙཱི་ཝ་ར་སྶ ཨ་ཏྠཱ་ཡ. ཨ་སྶཱཏི བྷི་ཀྑུ་སྶ. པེ་ལ་ཝོཏི ཝི་ར་ལོ༹. ཏེ་ནཱ་པཱིཏི ཀ་ཐི་ན་ཏྠཱ་ར་ཀེ་ནཱ་པི. ཏནྟི ཝི་དྷིཾ. དཱ་ན་ཀ་མྨ་ཝཱ་ཙཱཏི དཱ་ན་ཀཱ་ར་ཎ་ཀ་མྨ་ཝཱ་ཙཱ.

ཨེ་ཝཾ དི་ནྣེ པ་ན ཀ་ཐི་ནེ ནི་ཊྛཱ་པེ་ཏ་བྦཱ་ནཱི་ཏི ཡོ་ཛ་ནཱ. ཨེ་ཀེ་ནཱ་པཱིཏི པིས་དྡེ་ན པ་གེ་ཝ བ་ཧཱུ་ཧི པ་ནཱ་ཏི ད་སྶེ་ཏི. བུ་དྡྷ་པྤ་ས་ཏྠནྟི བུ་དྡྷེ་ཧི པ་ས་ཏྠཾ. ཨ་ཏཱི་ཏེ ཀ་པྤ་ས་ཏ་ས་ཧ་སྶ་མ་ཏྠ་ཀེ་ཏི ཡོ་ཛ་ནཱ. ཏ་སྶཱཏི པ་དུ་མུ་ཏྟ་ར་སྶ. ཀ་ཐི་ནཾ ག་ཎྷི ཀི་རཱ་ཏི ཡོ་ཛ་ནཱ. ཏནྟི ཀ་ཐི་ནཾ, ས་ཏྠཱ ཨ་ཀཱ་སཱི་ཏི ས་མྦ་ནྡྷོ.

ཀ་ཏ་པ་རི་ཡོ་སི་ཏཾ ཀ་ཐི་ནཾ ཀིཾ ཀཱ་ཏ་བྦ་ནྟི ཨཱ་ཧ ‘‘ཀ་ཏ་པ་རི་ཡོ་སི་ཏཾ པ་ནཱ’’ཏི་ཨཱ་དི. ཀ་ཐི་ནཾ ག་ཧེ་ཏྭཱ ཨ་ཏྠ་རི་ཏ་བྦ་ནྟི ས་མྦ་ནྡྷོ. ‘‘ཏེ་ན ཀ་ཐི་ན་ཏྠཱ་ར་ཀེ་ན བྷི་ཀྑུ་ནཱ’’ཏི པ་དཾ ‘‘ཝ་ཙ་ནཱི་ཡོ’’ཏི པ་དེ སུ་དྡྷ་ཀ་ཏྟཱ, ‘‘ཨ་ནུ་མོ་དཱ་པེ་ཏ་བྦ’’ནྟི པ་དེ ཀཱ་རི་ཏ་ཀ་ཏྟཱ. ཀིཾ ཝ་ཙ་ནཱི་ཡོ་ཏི ཨཱ་ཧ ‘‘ཨ་ཏྠ་ཏཾ…པེ… ཨ་ནུ་མོ་ད་ཐཱ’’ཏི. ‘‘ཏེ་ཧི ཨ་ནུ་མོ་ད་ཀེ་ཧི བྷི་ཀྑུ་ཧཱི’’ཏི པ་དཾ ‘‘ཝ་ཙ་ནཱི་ཡོ’’ཏི པ་དེ ཨ་ཝུ་ཏྟ་ཀ་ཏྟཱ, ‘‘ཨ་ནུ་མོ་དཱ་པེ་ཏ་བྦ’’ནྟི པ་དེ ཀཱ་རི་ཏ་ཀ་མྨཾ ཨ་ཝུ་ཏྟ་ཀ་མྨཾ, ཝཱ. ‘‘ཀ་ཐི་ན’’ནྟི དྷཱ་ཏུ་ཀ་མྨཾ ཝཱ ཝུ་ཏྟ་ཀ་མྨཾ ཝཱ ཨུ་པ་ནེ་ཏ་བྦཾ. ཀིཾ ཝ་ཙ་ནཱི་ཡོ་ཏི ཨཱ་ཧ ‘‘ཨ་ཏྠ་ཏཾ…པེ… ཨ་ནུ་མོ་དཱ་མཱ’’ཏི. ཨི་ཏ་རེ་ཧི ཙཱཏི ཨ་ནུ་མོ་ད་ཀེ་ཧི ཙ. ས་བྦེ་སནྟི ཨ་ཏྠཱ་ར་ཀ་ཨ་ནུ་མོ་ད་ཀཱ་ནཾ. ཧཱིཏི ས་ཙྩཾ. ཨེ་ཏནྟི ས་བྦེ་སཾ ཨ་ཏྠ་ཏ་བྷཱ་ཝཾ, ‘‘དྭི་ནྣཾ…པེ… ཨ་ནུ་མོ་ད་ཀ་སྶ ཙཱ’’ཏི ཝ་ཙ་ནཾ ཝཱ.

ཨེ་ཝཾ ཀ་ཐི་ནེ ཨ་ཏྠ་ཏེ ས་ཏི པ་ནཱ་ཏི ཡོ་ཛ་ནཱ. ཡེ་ནཱཏི བྷི་ཀྑུ་ནཱ. ཨ་ཝི་ཙཱ་རེ་ཏྭཱ་ཝཱཏི ‘‘ཀ་ཐི་ན་ཏྠཱ་ར་ཀ་སྶ དེ་མཱ’’ཏི ཝཱ ‘‘ས་ངྒྷ་སྶ དེ་མཱ’’ཏི ཝཱ ཨ་ཝི་ཙཱ་རེ་ཏྭཱ ཨེ་ཝ. སེ་ས་ཙཱི་ཝ་རཱ་ནི་པཱིཏི ཀ་ཐི་ན་ཏྠཱ་ར་ཙཱི་ཝ་ར་ཏོ སེ་ས་ཙཱི་ཝ་རཱ་ནི་པི. ས་ངྒྷེ་ན དཱ་ཏ་བྦཱ་ནཱི་ཏི ས་མྦ་ནྡྷོ. ‘‘ཨ་པ་ལོ་ཀེ་ཏྭཱ’’ཏི ཨི་མི་ནཱ ཀ་མྨ་ཝཱ་ཙཱ་ཡ ཀི་ཙྩཱ་བྷཱ་ཝཾ ད་སྶེ་ཏི. ཝ་སྶཱ་ཝཱ་སི་ཀ་ཊྛི་ཏི་ཀཱ་ཡཱཏི ཝ་སྶཱ་ཝཱ་ས་ཀཱ་ལེ པ་ཝ་ཏྟཱ་ཡ ཋི་ཏི་ཀཱ་ཡ. ག་རུ་བྷ་ཎྜནྟི མ་ཉྩ་བི་བྦོ་ཧ་ནཱ་དི་ག་རུ་བྷ་ཎྜཾ. ཨེ་ཀ་སཱི་མཱ་ཡཱཏི ཨེ་ཀཱ་ཡ ཨུ་པ་ཙཱ་ར་སཱི་མཱ་ཡ.

༣༠༨. ཡ་ཐཱ ཙཱཏི ཨེ་ཏྠ ཡ་ཐཱས་དྡོ ཡཾ་ས་དྡ་ཏྠོ. ཡེ་ན ཝི་དྷི་ནཱ་ཏི ཧི ཨ་ཏྠོ. མ་ཧཱ་བྷཱུ་མི་ཀནྟི མ་ཧཱ་ཝི་ས་ཡཾ. ཙ་ཏུ་ཝཱི་ས་ཏི་ཨཱ་ཀཱ་ར་ཝ་ནྟ་ཏཱ་ཡ མ་ཧཱ་ཝི་ཏྠཱ་རི་ཀ་ནྟི ཝུ་ཏྟཾ ཧོ་ཏི. ཏ་ཏོཏི ཨ་ན་ཏྠ་ཏ་ལ་ཀྑ་ཎ་ཏོ. པ་རི་ཝཱ་རེ་པཱིཏི པིས་དྡོ ན ཨི་དྷ ཨེ་ཝཱ་ཏི ད་སྶེ་ཏི.

ཏ་ཏྠཱཏི ཙ་ཏུ་ཝཱི་ས་ཏི་ཡཱ ཨཱ་ཀཱ་རེ་སུ. ཨུ་ལླི་ཁི་ཏ་མ་ཏྟེ་ནཱཏི ཨེ་ཏྠ པ་མཱ་ཎ་སྶ ཨུ་གྒ་ཧ་ཎ་ཏྠཾ ན་ཁཱ་དཱི་ཧི ལི་ཁ་ནཾ ཨུ་ལླི་ཁི་ཏཾ, ཨུ་ལླི་ཁི་ཏཾ མ་ཏྟཾ པ་མཱ་ཎཾ ཨུ་ལླི་ཁི་ཏ་མ་ཏྟ་ནྟི ད་སྶེ་ནྟོ ཨཱ་ཧ ‘‘དཱི་གྷ་ཏོ ཙ པུ་ཐུ་ལ་ཏོ ཙ པ་མཱ་ཎ་ག་ཧ་ཎ་མ་ཏྟེ་ནཱ’’ཏི. ཏ་མེ་ཝ་ཏྠཾ ཝི་ཏྠཱ་རེ་ནྟོ ཨཱ་ཧ ‘‘པ་མཱ་ཎཾ ཧཱི’’ཏི་ཨཱ་དི. ད་སྶེ་ནྟོ ཧུ་ཏྭཱ ཨུ་ལླི་ཁ་ཏཱི་ཏི ཡོ་ཛ་ནཱ. པ་ཉྩ་ཀནྟི པ་ཉྩ་པ་མཱ་ཎཾ, པ་ཉྩ་ས་མཱུ་ཧཾ ཝཱ ཁ་ཎྜཾ. ཝཱས་དྡེ་ན ཨ་ཉྙཱ་ནི་པི ཏེ་ར་ས་ཀཱ་དཱི་ནི ས་ངྒ་ཎྷཱ་ཏི. མོ་གྷ་སུ་ཏྟ་ཀཱ་རོ་པ་ན་མ་ཏྟེ་ནཱཏི མོ་གྷ་སུ་ཏྟ་སྶ ཙཱི་ཝ་ར་སྶཱུ་པ་རི ཨཱ་རོ་པ་ན་མ་ཏྟེ་ན. དཱི་གྷ་སི་བྦི་ཏ་མ་ཏྟེ་ནཱཏི དཱི་གྷ་ཏོ སི་བྦི་ཏ་མ་ཏྟེ་ན. མུ་དྡི་ཡ་པ་ཊྚ་བ་ནྡྷ་ན་མ་ཏྟེ་ནཱཏི མུ་དྡི་ཡ་པ་ཊྚ་སྶ བ་ནྡྷ་ན་མ་ཏྟེ་ན. དྭེ ཙི་མི་ལི་ཀཱ་ཡོཏི དྭེ པི་ལོ་ཏི་ཀཱ་ཡོ. པ་ཋ་མ་ཙི་མི་ལི་ཀཱཏི ཀ་ཐི་ན་ཙི་མི་ལི་ཀ་ཏོ ཨ་ཉྙཱ ཨ་ཏྟ་ནོ པ་ཀ་ཏི་ཙི་མི་ལི་ཀཱ གྷ་ཊེ་ཏྭཱ ཋ་པི་ཏཱ ཧོ་ཏཱི་ཏི ཡོ་ཛ་ནཱ. ‘‘ཏཾ པ་ཋ་མ་ཙི་མི་ལི་ཀ’’ནྟི པཱ་ཋ་སེ་སཾ ཨ་ཛ྄ཛྷཱ་ཧ་རི་ཏྭཱ ཀ་ཐི་ན་སཱ་ཊ་ཀ་སྶ ཀུ་ཙྪི་ཙི་མི་ལི་ཀཾ ཀ་ཏྭཱ་ཏི ཨི་མི་ནཱ ས་མྦ་ནྡྷི་ཏ་བྦཾ. པ་ཀ་ཏི་ཙཱི་ཝ་ར་སྶཱཏི ཨ་ཏྟ་ནོ པ་ཀ་ཏི་ཙཱི་ཝ་ར་སྶ. པ་ཀ་ཏི་པ་ཊྚ་བ་ནྡྷ་ཙཱི་ཝ་རནྟི པ་ཀ་ཏི་པ་ཊྚེ་ན བ་ནྡྷ་ཙཱི་ཝ་རཾ. པི་ཊྛི་ཨ་ནུ་ཝཱ་ཏཱ་རོ་པ་ན་མ་ཏྟེ་ནཱཏི དཱི་གྷ་ཏོ ཨ་ནུ་ཝཱ་ཏ་སྶ ཙཱི་ཝ་ར་སྶཱུ་པ་རི ཨཱ་རོ་པ་ན་མ་ཏྟེ་ན. དཱི་གྷཱ་ནུ་ཝཱ་ཏ་ཉྷི པཱ་རུ་པ་ན་ཀཱ་ལེ པི་ཊྛི་ཡཾ ཋི་ཏ་ཏྟཱ པི་ཊྛི་ཨ་ནུ་ཝཱ་ཏ་ནྟི ཝུ་ཙྩ་ཏི. ཀུ་ཙྪི་ཨ་ནུ་ཝཱ་ཏཱ་རོ་པ་ན་མ་ཏྟེ་ནཱཏི པུ་ཐུ་ལ་ཏོ ཨ་ནུ་ཝཱ་ཏ་སྶ ཙཱི་ཝ་ར་སྶཱུ་པ་རི ཨཱ་རོ་པ་ན་མ་ཏྟེ་ན. པུ་ཐུ་ལཱ་ནུ་ཝཱ་ཏ་ཉྷི པཱ་རུ་པ་ན་ཀཱ་ལེ ཀུ་ཙྪི་ཡཾ ཋི་ཏ་ཏྟཱ ཀུ་ཙྪི་ཨ་ནུ་ཝཱ་ཏ་ནྟི ཝུ་ཙྩ་ཏི. ཨཱ་ག་ནྟུ་ཀ་པ་ཊྚཱ་རོ་པ་ན་མ་ཏྟེ་ནཱཏི ཨཱ་ག་ནྟུ་ཀ་པ་ཊྚ་སྶ ཙཱི་ཝ་ར་སྶཱུ་པ་རི ཨཱ་རོ་པ་ན་མ་ཏྟེ་ན. ཝཱཏི ཨ་ཐ་ཝཱ.

སཱ་རུ་པྤནྟི ས་མ་ཎཱ་ནུ་ཙྪ་ཝི་ཀཾ. པ་རི་ཀ་ཐཱ་ཡཱཏི པ་རི་ཡཱ་ཡེ་ན ཨུ་པྤཱ་དི་ཏཱ་ཡ ཀ་ཐཱ་ཡ. ཨ་ཏི་ཨུ་ཀྐ་ཊྛཾ ཝ་ཊྚ་ཏཱིཏི ཨ་ཏི་ཨུ་ཀྐ་ཊྛཾ ཨེ་ཝ ཝ་ཊྚ་ཏི. ཨོ་ཏི་ཎྞ་ས་དི་ས་མེ་ཝཱཏི ཨོ་ཏི་ཎྞེ་ན ཝ་ཏྠེ་ན ས་དི་ས་མེ་ཝ ཀ་ཐི་ན་ཙཱི་ཝ་ར་ནྟི ས་མྦ་ནྡྷོ. ཏ་ཏྠཱཏི དུ་ཝི་དྷེ་སུ ས་ནྣི་དྷཱི་སུ. ཏ་ད་ཧེ་ཝཱཏི ཏ་སྨིཾ དི་ནྣ་ཨ་ཧ་ནི ཨེ་ཝ.

ར་ཏྟི་ནི་སྶ་གྒི་ཡེ་ནཱཏི ར་ཏྟི་ཨ་ཏི་ཀྐ་ནྟཾ ཧུ་ཏྭཱ ནི་སྶ་གྒི་ཡེ་ན. ཨ་ཉྙེ་ནཱཏི ཏི་ཙཱི་ཝ་ར་ཏོ ཨ་ཉྙེ་ན. ས་མ་ཎྜ་ལི་ཀ་ཏནྟི ས་ཧ མ་ཧཱ་མ་ཎྜ་ལ་ཨ་ཌྜྷ་མ་ཎྜ་ལེ་ན ཀ་ཏཾ.

༣༠༩. ཨེ་ཝཾ ཙ་ཏུ་ཝཱི་ས་ཏི་ཨཱ་ཀཱ་རཾ ཨ་ན་ཏྠ་ཏ་ལ་ཀྑ་ཎཾ ད་སྶེ་ཏྭཱ ཨི་དཱ་ནི ས་ཏྟ་ར་སཱ་ཀཱ་རཾ ཨ་ཏྠ་ཏ་ལ་ཀྑ་ཎཾ ད་སྶེ་ནྟོ ཨཱ་ཧ ‘‘ཨ་ཧ་ཏེ་ནཱ’’ཏི་ཨཱ་དི. ཏ་ཏྠ པ་རི་བྷོ་གཾ ན ཧ་ནི་ཏྠ ན ག་ཙྪི་ཏྠཱ་ཏི ཨ་ཧ་ཏཾ, པ་རི་བྷོ་གེ་ན ན ཧ་ནི་ཏ་བྦཾ ན ཧིཾ་སི་ཏ་བྦ་ནྟི ཝཱ ཨ་ཧ་ཏནྟི ད་སྶེ་ནྟོ ཨཱ་ཧ ‘‘ཨ་པ་རི་བྷུ་ཏྟེ་ནཱ’’ཏི. ‘‘ཨ་ཧ་ཏ་ས་དི་སེ་ནཱ’’ཏི ཨི་མི་ནཱ ཨ་ཧ་ཏ་ཀ་པྤེ་ནཱཏི ཨེ་ཏྠ ཀ་པྤས་དྡོ ས་དི་ས་ཏྠོ་ཏི ད་སྶེ་ཏི. པཱ་པ་ཎི་ཀེ་ནཱཏི ཨེ་ཏྠ པ་སཱ་རི་ཏོ ཨཱ་པ་ཎོ པཱ་པ་ཎོ, ཏ་སྨིཾ པ་ཏི་ཏཾ པཱ་པ་ཎི་ཀ་ནྟི ད་སྶེ་ནྟོ ཨཱ་ཧ ‘‘ཨཱ་པ་ཎ་དྭཱ་རེ པ་ཏི་ཏ’’ནྟི. ‘‘པི་ལོ་ཏི་ཀ’’ནྟི ཨི་མི་ནཱ ཎི་ཀ་པ་ཙྩ་ཡ་སྶ ས་རཱུ་པཾ ད་སྶེ་ཏི. ཝུ་ཏྟ་ཝི་པ་ལླཱ་སེ་ནེ་ཝཱཏི ཝུ་ཏྟེ་ཧི ‘‘ནི་མི་ཏྟ་ཀ་ཏེ་ནཱ’’ཏི་ཨཱ་དཱི་ཧི ཝི་པ་ལླཱ་སེ་ན ཨེ་ཝ. ཏ་ཏྠཱཏི པ་རི་ཝཱ་རེ. ཧཱིཏི ས་ཙྩཾ, ཡ་སྨཱ ཝཱ. ཨི་དྷཱཏི ཀ་ཐི་ན་ཀྑ་ནྡྷ་ཀེ. ཨ་ཝུ་ཙྩ་མཱ་ནེ་ན ཏེ་ན ཝ་ཙ་ནེ་ན པ་རི་ཧཱ་ཡ་ཏཱི་ཏི ས་མྦ་ནྡྷོ.

༣༡༠. ཏ་ཏྠཱཏི ‘‘ཀ་ཐ་ཉྩ བྷི་ཀྑ་ཝེ ཨུ་བྦྷ་ཏཾ ཧོ་ཏི ཀ་ཐི་ན’’ནྟི་ཨཱ་དི་པཱ་ཋེ. ཛ་ནེ་ཏྟི་ཡོ མཱ་ཏ་རོ་ཏི ཡོ་ཛ་ནཱ. ཨི་མི་ནཱ དྷ་མྨེ་ན པུ་ཏྟེ མཱ་ནེ་ཏཱི་ཏི མཱ་ཏཱ, དྷ་མྨེ་ན པུ་ཏྟེ་ཧི མཱ་ནི་ཡ་ཏཱི་ཏི ཝཱ མཱ་ཏཱ, སཱ ཝི་ཡ ཧོ་ནྟཱི་ཏི མཱ་ཏི་ཀཱཏི ད་སྶེ་ཏི. ཀ་ཐི་ནུ་བྦྷཱ་རནྟི ཙ ཀ་ཐི་ནུ་དྡྷཱ་རནྟི ཙ ཨ་ཏྠ་ཏོ ས་དི་སཾ. ཨེ་ཏཱཏི ཨེ་ཏཱ པ་ད་ཛཱ་ཏི་ཡོ. ཏཱ་སཱུཏི ཨ་ཊྛ་སུ མཱ་ཏི་ཀཱ་སུ. ཨ་སྶཱཏི ཀ་ཐི་ནུ་བྦྷཱ་ར་སྶ.

༡༨༨. ཨཱ་དཱ་ཡ་ས་ཏྟ་ཀ་ཀ་ཐཱ

༣༡༡. ན པ་ཙྩེ་སྶནྟི ཨེ་ཏྠ པ་ཏཱི་ཏྱཱུ་པ་ས་གྒ་སྶ པུ་ན་ཏྠཾ, ཨི་དྷཱ་ཏུ་ཡཱ ཙ ག་ཏྱ་ཏྠཾ ད་སྶེ་ནྟོ ཨཱ་ཧ ‘‘ན པུ་ན ཨཱ་ག་མི་སྶ’’ནྟི. ཨེ་ཝཾ པ་ཀྐ་མ་ཏོ ཚི་ཛྫ་ཏཱི་ཏི ས་མྦ་ནྡྷོ.

ཨེ་ཏ་ཉྩཱཏི པ་ཀྐ་མ་ན་ནྟི་ཀཾ, ཀ་ཐི་ནུ་དྡྷཱ་ར་ཉྩ. ཏཱ་ཧནྟི ཏེ ཨ་ཧཾ. ཏེཏི ཏུ་ཡ྄ཧཾ.

ཨ་ཉྙནྟི ཨ་ཏྟ་ནོ ཝི་ཧཱ་ར་ཏོ ཨ་ཉྙཾ. ཨེ་ཝཾ ཧོ་ཏཱིཏི ཨེ་སོ པ་རི་ཝི་ཏ་ཀྐོ ཧོ་ཏི. སོཏི ཨཱ་ཝཱ་ས་པ་ལི་བོ་དྷོ. ཨཱ་དི་ཙྩ་བ་ནྡྷུ་ནཱ ཝུ་ཏྟོ་ཏི ཡོ་ཛ་ནཱ.

དྭེ པ་ལི་བོ་དྷཱ ཨེ་ཀ་ཏོ ཚི་ཛྫ་ནྟཱི་ཏི ས་མྦ་ནྡྷོ. ཨ་པུ་བྦཾ ཨ་ཙ་རི་མནྟི ཨེ་ཀ་པ་ཧཱ་རེ་ནེ་ཝ. སོ པ་ལི་བོ་དྷཱུ་པ་ཙྪེ་དོ ཀ་སྨཱ ཝི་ཏྠཱ་ར་ཏོ ན ཝུ་ཏྟོ་ཏི ཨཱ་ཧ ‘‘སོ པ་ནཱ’’ཏི་ཨཱ་དི. སོ པ་ནཱཏི པ་ལི་བོ་དྷཱུ་པ་ཙྪེ་དོ པ་ན. ན ཝུ་ཏྟོ་ཏི ས་མྦ་ནྡྷོ. ཨེ་ཏྠཱཏི ཨི་མ་སྨིཾ ཀ་ཐི་ནུ་བྦྷཱ་རེ. ཀ་སྨཱ ཨ་ཡཾ ཀ་ཐི་ནུ་དྡྷཱ་རོ ‘‘ནཱ་ས་ན་ནྟི་ཀོ’’ཏི ཝུ་ཏྟོ་ཏི ཨཱ་ཧ ‘‘ཡ་སྨཱ’’ཏི་ཨཱ་དི. ཏ་སྶཱཏི བྷི་ཀྑུ་ནོ.

ཨཱ་སཱ་ཝ་ཙྪེ་དི་ཀེ ཚི་ཛྫ་ཏཱི་ཏི ས་མྦ་ནྡྷོ. ཨ་ཡཾ པ་ནཱཏི ཨཱ་སཱ་ཝ་ཙྪེ་དི་ཀོ ཀ་ཐི་ནུ་དྡྷཱ་རོ པ་ན. ཨ་ནེ་ཀ་པ་བྷེ་དོ ཧོ་ཏཱི་ཏི ས་མྦ་ནྡྷོ. ཏ་སྶཱཏི བྷི་ཀྑུ་སྶ. ཝུ་ཏྟོཏི ཨ་ཡཾ ཨཱ་སཱ་ཝ་ཙྪེ་དི་ཀོ ཀ་ཐི་ནུ་དྡྷཱ་རོ ཝུ་ཏྟོ་ཏི ཡོ་ཛ་ནཱ. ཨེ་ཏྠ པ་ནཱཏི ཨི་མ་སྨིཾ པ་ན ཋཱ་ནེ. ཏ་ཏྠཱཏི སཱི་མཱ་ཏི་ཀྐ་ནྟི་ཀེ.

༣༡༢-༣༢༥. ཨེ་ཝནྟི་ཨཱ་དི ནི་ག་མ་ནཾ. ས་ཏྟ་ཀེཏི ཨ་ཊྛ་སུ མཱ་ཏི་ཀཱ་སུ ཨཱ་སཱ་ཝ་ཙྪེ་ད་ཏོ སེ་སེ ས་ཏྟ་པ་མཱ་ཎེ, ས་ཏྟ་ས་མཱུ་ཧེ ཝཱ. ཏེ་ཡེ་ཝཱཏི ས་ཏྟ་ཀེ ཨེ་ཝ. ཏ་ཏོཏི ཝཱ་ར་ཏོ. ཡེ ཡེཏི ཀ་ཐི་ནུ་དྡྷཱ་རཱ. ཨི་ཏ་རེ་ཧཱིཏི ཨཱ་སཱ་ཝ་ཙྪེ་ད་ཏོ ཨ་ཉྙེ་ཧི. ཡེ པ་ལི་བོ་དྷཱ ཝུ་ཏྟཱ་ཏི ས་མྦ་ནྡྷོ. ཨཱ་ཝཱ་སོ ཙ་ཛཱི་ཡ་ཏི ཨ་ནེ་ནཱ་ཏི ཙ་ཏྟནྟི ཝ་ཙ་ན་ཏྠཾ ད་སྶེ་ནྟོ ཨཱ་ཧ ‘‘ཡེ་ན ཙི་ཏྟེ་ནཱ’’ཏི་ཨཱ་དི. ཏནྟི ཙི་ཏྟཾ. ‘‘ཨེ་སེ་ཝ ན་ཡོ’’ཏི ཨི་མི་ནཱ ཨཱ་ཝཱ་སོ ཝ་མཱི་ཡ་ཏི ཨ་ནེ་ནཱ་ཏི ཝ་ནྟཾ. ཨཱ་ཝཱ་ས་ཏོ མུ་ཙྩ་ཏི ཨ་ནེ་ནཱ་ཏི མུ་ཏྟནྟི ཝ་ཙ་ན་ཏྠཾ ཨ་ཏི་དི་ས་ཏི. ས་བྦ་ཏྠཱཏི ས་བྦ་སྨིཾ ཀ་ཐི་ན་ཀྑ་ནྡྷ་ཀེ.

ཨི་ཏི ཀ་ཐི་ན་ཀྑ་ནྡྷ་ཀ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.