༡༤༨. དི་གུ་ཎཱ་དི་ཨུ་པཱ་ཧ་ན་པ་ཊི་ཀྑེ་པ་ཀ་ཐཱ

༢༤༥. ཨ་ཉྙཾ བྱཱ་ཀ་རོ་ནྟཱིཏི ཨེ་ཏྠ ཨ་ཉྙ་ས་དྡོ ས་བྦ་ནཱ་མ་སུ་དྡྷ་ནཱ་མ་ཝ་སེ་ན དུ་ཝི་དྷོ. ཏེ་སུ ཨི་དྷ སུ་དྡྷ་ནཱ་མཾ, ཏཾ པ་ན བཱ་ལེ ཙ དཱ་ར་ཀེ ཙ ཨ་ར་ཧ་ཏྟེ ཙ པ་ཝ་ཏྟ་ཏི, ཨི་དྷ པ་ན ཨ་ར་ཧ་ཏྟེ་ཏི ད་སྶེ་ནྟོ ཨཱ་ཧ ‘‘ཨ་ར་ཧ་ཏྟཾ བྱཱ་ཀ་རོ་ནྟཱི’’ཏི. ཡེ་ནཱཏི ས་བྷཱ་ཝེ་ན. ཨ་ར་ཧཱ་ཏི ཉཱ་ཡ་ཏཱིཏི ཨ་ར་ཧཱ་ཨི་ཏི ཨ་ཏྠོ ཉཱ་ཡ་ཏི. སོཏི ས་བྷཱ་ཝོ. སུ་ཏྟ་ཝ་ཎྞ་ནཱ་ཏོ་ཡེ་ཝཱཏི ཨ་ངྒུ་ཏྟ་ར་ཊྛ་ཀ་ཐཱ་ཏོ ཨེ་ཝ. ན ཨུ་པ་ནཱི་ཏོཏི ན ཨུ་པ་རི ནཱི་ཏོ. ཨེ་ཀ་ཙྩེ མོ་གྷ་པུ་རི་སཱཏི ཨེ་ཀ་ཙྩེ་ས་དྡོ ཨ་ཉྙེ་པ་རི་ཡཱ་ཡོ, མོ་གྷ་ས་དྡོ ཏུ་ཙྪ་ཝེ་ཝ་ཙ་ནོ་ཏི ཨཱ་ཧ ‘‘ཨ་ཉྙེ པ་ན ཏུ་ཙྪ་པུ་རི་སཱ’’ཏི. ‘‘ཧ་ས་མཱ་ནཱ ཝི་ཡཱ’’ཏི ཨི་མི་ནཱ ཧ་ས་མཱ་ན་ཀཾ མ་ཉྙེཏི ཨེ་ཏྠ མ་ཉྙེ་ས་དྡོ ཝི་ཡ་ཏྠོ་ཏི ད་སྶེ་ཏི. ཨ་ས་ནྟ་མེ་ཝཱཏི ཨ་ཝི་ཛྫ་མཱ་ནཾ་ཡེ་ཝ. ཨེ་ཀ་པ་ལཱ་སི་ཀནྟི ཨེ་ཏྠ པ་ལཱ་ས་ས་དྡོ པ་ཎྞ་ཝཱ་ཙ་ཀོ. པ་ཊ་ལཾ ནཱ་མ པ་ཎྞཾ ཝི་ཡ ཧོ་ཏི, ཏ་སྨཱ ‘‘ཨེ་ཀ་པ་ཊ་ལ’’ནྟི ཝུ་ཏྟཾ. ཨ་སཱི་ཏི་ས་ཀ་ཊ་ཝཱ་ཧེཏི ཨེ་ཏྠ ཨ་སཱི་ཏི པ་དཾ ས་ཀ་ཊ་པ་དེ་ན ས་མྦ་ནྡྷཾ ཀ་ཏྭཱ ཨ་སཱི་ཏི་ས་ཀ་ཊེ་ཧི ཝ་ཧི་ཏ་བྦེ་ཏི ཨ་ཏྠོ ད་ཊྛ་བྦོ. ‘‘དྭེ ས་ཀ་ཊ་བྷཱ་རཱ ཨེ་ཀོ ཝཱ་ཧོ’’ཏི ཨི་མི་ནཱ ཝཱ་ཧཱ་ནཾ ཙ་ཏྟཱ་ལཱི་ས་བྷཱ་ཝཾ ད་སྶེ་ཏི. ས་ཏྟ་ཧ་ཏྠི་ཀ་ཉྩ ཨ་ནཱི་ཀནྟི ཨེ་ཏྠ ཨ་ནཱི་ཀ་སྶ ས་རཱུ་པཾ ད་སྶེ་ནྟོ ཨཱ་ཧ ‘‘ཚ ཧ་ཏྠི་ནི་ཡོ ཙཱ’’ཏི་ཨཱ་དི. ས་ཏྟ་ནྣཾ ཧ་ཏྠཱི་ནཾ ས་མཱུ་ཧོ ས་ཏྟ་ཧ་ཏྠི་ཀཾ. ས་ཏྟ་ཨ་ནཱི་ཀ་ཏྟཱ ཨེ་ཀཱུ་ན་པ་ཉྙཱ་ས་ཧ་ཏྠི་ནོ ཧོ་ནྟི. ཏེ་སུ ས་ཏྟ ཧ་ཏྠི་ནོ, དྭཱ་ཙ་ཏྟཱ་ལཱི་ས ཧ་ཏྠི་ནི་ཡོ ཧོ་ནྟི. དྭི་གུ་ཎཱཏི ཨེ་ཏྠ གུ་ཎ་ས་དྡོ པ་ཊ་ལ་ཏྠོ་ཏི ཨཱ་ཧ ‘‘དྭི་པ་ཊ་ལཱ’’ཏི. གུ་ཎ་ངྒུ་ཎཱུ་པཱ་ཧ་ནཱཏི ཨེ་ཏྠ དྭི་གུ་ཎ་ཏི་གུ་ཎཱ་ནཾ ཝི་སུཾ ག་ཧི་ཏ་ཏྟཱ པཱ་རི་སེ་ས་ཏོ གུ་ཎ་ངྒུ་ཎ་བྷཱ་ཝཾ ད་སྶེ་ནྟོ ཨཱ་ཧ ‘‘ཙ་ཏུ་པ་ཊ་ལ་ཏོ པ་ཊྛཱ་ཡ ཝུ་ཙྩ་ཏཱི’’ཏི. གུ་ཎ་ངྒུ་ཎཱུ་པཱ་ཧ་ནཱཏི པ་ཊ་ལ་པ་ཊ་ལཱ ཨུ་པཱ་ཧ་ནཱ, བ་ཧུ་པ་ཊ་ལཱ ཨུ་པཱ་ཧ་ནཱ་ཏི ཨ་ཏྠོ. ཨུ་ཀཱ་རེ་ན ས་ཧ ཡོ་ཛེ་ཏྭཱ ག་ཀཱ་རོ ས་ཛ྄ཛྷཱ་ཡི་ཏ་བྦོ ཙ ལི་ཁི་ཏ་བྦོ ཙ. ཨི་དཱ་ནི པོ་ཏྠ་ཀེ་སུ པ་ན ཨུ་ཀཱ་རོ ན དི་སྶ་ཏི.