༡༡༢. པ་ཧི་ཏེ་ཡེ་ཝ་ཨ་ནུ་ཛཱ་ན་ན་ཀ་ཐཱ

༡༩༩. བྷི་ཀྑུ་ག་ཏི་ཀོཏི བྷི་ཀྑུ ཨེ་ཝ ག་ཏི པ་ཏི་ཊྛཱ ཨེ་ཏ་སྶཱ་ཏི བྷི་ཀྑུ་ག་ཏི་ཀོ་ཏི ཝུ་ཏྟེ བྷི་ཀྑུ་ནི་སྶི་ཏ་ཀོ པུ་རི་སོ་ཏི ཨཱ་ཧ ‘‘བྷི་ཀྑཱུ་ཧི ས་དྡྷིཾ ཝ་ས་ན་ཀ་པུ་རི་སོ’’ཏི. པ་ལུ་ཛྫ་ཏཱིཏི ཝི་ན་སྶ་ཏི. བྷ་ཎྜཾ ཚེ་དཱ་པི་ཏནྟི ཨེ་ཏྠ བྷ་ཎྜ་ས་དྡོ པ་རི་ཀྑཱ་ར་ཏྠོ ཨེ་ཝ, ན མཱུ་ལ་དྷ་ན་ཏྠོ་ཏི ཨཱ་ཧ ‘‘ད་བྦ་ས་མྦྷཱ་ར་བྷ་ཎྜ’’ནྟི. ཚེ་དཱ་པི་ཏནྟི ཙུ་རཱ་དི་ག་ཎི་ཀ་དྷཱ་ཏུཾ ‘‘ཚི་ནྡཱ་པི་ཏ’’ནྟི རུ་དྷཱ་དི་ག་ཎི་ཀ་དྷཱ་ཏུ་ཡཱ ཝ་ཎྞེ་ཏི. ད་ཛྫཱ་ཧནྟི ཨེ་ཀཱ་ར་ལོ་པ་ས་ནྡྷཱི་ཏི ཨཱ་ཧ ‘‘ད་ཛྫེ ཨ་ཧ’’ནྟི. ‘‘ད་ཛྫེ་ཧ’’ནྟི་པི པཱ་ཋོ. ཨེ་ཝ་ཉྷི ས་ཏི ཨ་ཀཱ་ར་ལོ་པ་ས་ནྡྷི. ད་ཛྫེཏི ད་དེ་ཡྻཾ, ད་དཱ་མི ཝཱ. ས་ངྒྷ་ཀ་ར་ཎཱི་ཡེ་ནཱཏི ས་ངྒྷ་སྶ ཀཱ་ཏ་བྦེ་ན ཀི་ཙྩེ་ན. ཏ་མ་ཏྠཾ ད་སྶེ་ནྟོ ཨཱ་ཧ ‘‘ཡཾ་ཀི་ཉྩཱི’’ཏི་ཨཱ་དི. ཏ་ཏྠ ཡཾ་ཀི་ཉྩི ཀཱ་ཏ་བྦ་ནྟི ཡོ་ཛ་ནཱ. ཙེ་ཏི་ཡ་ཚ་ཏྟ་ཝེ་དི་ཀཱ་དཱི་སཱུཏི ཙེ་ཏི་ཡ་སྶ ཚ་ཏྟེ ཙ ཝེ་དི་ཀཱ་ཡ ཙ. ཨཱ་དི་ས་དྡེ་ན སུ་དྷཱ་ལི་མྤཱ་ད་ཡོ ས་ངྒ་ཎྷཱ་ཏི. ཏ་སྶཱཏི ས་ངྒྷ་ཀ་ར་ཎཱི་ཡ་སྶ. ནི་པྥཱ་ད་ན་ཏྠཾ ག་ནྟ་བྦ་ནྟི ས་མྦ་ནྡྷོ.

ཨེ་ཏྠཱཏི ཝ་སྶཱུ་པ་ནཱ་ཡི་ཀ་ཀྑ་ནྡྷ་ཀེ. ‘‘ཨ་ནི་མ་ནྟི་ཏེ་ནཱ’’ཏི པ་དཾ ‘‘ག་ནྟུ’’ནྟི པ་དེ བྷཱ་ཝ་ཀ་ཏྟཱ. ག་ནྟུནྟི ག་མི་ཏུཾ, ག་མ་ནཾ ཝཱ ‘‘ན ཝ་ཊྚ་ཏཱི’’ཏི པ་དེ ཀ་ཏྟཱ. པ་ཋ་མཾ་ཡེ་ཝཱཏི དྷ་མྨ་སྶ་ཝ་ན་ཏོ པ་ཋ་མ་མེ་ཝ. ས་ནྣི་པ་ཏི་ཏ་བྦཾ ཨི་ཏི ཀ་ཏི་ཀཱ ཀ་ཏཱ ཧོ་ཏཱི་ཏི ཡོ་ཛ་ནཱ. བྷ་ཎྜ་ཀནྟི ཙཱི་ཝ་རཱ་དི་བྷ་ཎྜ་ཀཾ. ག་ནྟུཾ ན ཝ་ཊྚ་ཏཱིཏི ས་ཡ་མེ་ཝ ག་ནྟུཾ ན ཝ་ཊྚ་ཏཱི་ཏི ཨ་ཏྠོ ད་ཊྛ་བྦོ. ཏེ་ན ཝུ་ཏྟཾ ‘‘ས་ཙེ པ་ནཱ’’ཏི་ཨཱ་དི. ཏ་ཏྠཱཏི ཏཾ ཝི་ཧཱ་རཾ. ‘‘ཝ་ཊྚ་ཏཱི’’ཏི ཨི་མི་ནཱ ཝ་སྶ་ཙྪེ་དོ ཙ ཨཱ་པ་ཏྟི ཙ ན ཧོ་ཏཱི་ཏི ད་སྶེ་ཏི. ཨ་ཏྠཱ་ཡ་པཱིཏི པི་ས་དྡེ་ན ‘‘བྷ་ཎྜ་ཀཾ དྷོ་ཝི་སྶཱ་མཱི’’ཏི ཨ་ཏྠཾ ཨ་པེ་ཀྑ་ཏི. ནནྟི ཨ་ནྟེ་ཝཱ་སི་ཀཾ. ཝ་ཊྚ་ཏཱིཏི ཨཱ་ཙ་རི་ཡ་སྶ ཨཱ་ཎཱ་ཡ ས་ཏྟཱ་ཧེ ཨ་ན་ཏི་ཀྐ་ནྟེ ཝ་ཊྚ་ཏི, ཝ་སྶ་ཙྪེ་དོ ཙ ཨཱ་པ་ཏྟི ཙ ན ཧོ་ཏི. ས་ཏྟཱ་ཧེ ཨ་ཏི་ཀྐ་ནྟེ ཝ་སྶ་ཙྪེ་དོ་ཝ ཧོ་ཏི, ན ཨཱ་པ་ཏྟཱི་ཏི ཨ་དྷི་པྤཱ་ཡོ.