༦༤. ཙ་ཏྟཱ་རོ་ནི་སྶ་ཡཱ་དི་ཀ་ཐཱ

༡༢༨. ཨུ་པ་ས་མྤ་ནྣ་ས་མ་ན་ནྟ་ར་མེ་ཝཱཏི ཨུ་པ་ས་མྤ་ནྣོ ཧུ་ཏྭཱ ས་མ་ན་ནྟ་ར་མེ་ཝ, ན ཀཱ་ལ་ནྟ་རེ་ཏི ཨ་ཏྠོ. ཨེ་ཀ་པོ་རི་སཱཏི ཨེ་ཏྠ པོ་རི་ས་ས་དྡོ ཨུ་པ་རི ཝི་ཏྠ་ཏེ བྷུ་ཛ་པ་མཱ་ཎེ ཙ པོ་ས་པ་མཱ་ཎེ ཙ ཝ་ཏྟ་ཏི. པུ་རི་ས་སྶ པ་མཱ་ཎཱ པོ་རི་སཱ, པ་མཱ་ཎ་ཏྠེ ཎ་པ་ཙྩ་ཡོ. ཚཱ་ཡཱཏི ཨཱ་ཏ་པཱ་བྷཱ་ཝོ. མེ་ཏ་བྦཱཏི པ་མེ་ཏ་བྦཱ. ‘‘ཝ་སྶཱ་ནོ’’ཏི་ཨཱ་དི ‘‘ཨུ་ཏུ་པ་མཱ་ཎཾ ཨཱ་ཙི་ཀྑི་ཏ་བྦ’’ནྟི ཨེ་ཏྠ ཨཱ་ཙི་ཀྑ་ཎཱ་ཀཱ་ར་ད་སྶ་ནཾ. ཨུ་ཏུ་ནོ པ་མཱ་ཎ་ནྟི ཨ་ཏྠཾ ནི་ཝཱ་རེ་ནྟོ ཨཱ་ཧ ‘‘ཨེ་ཏྠ ཙཱ’’ཏི་ཨཱ་དི. ཨ་ར་ཏི པུ་ན་པྤུ་ནཾ ག་ཙྪ་ཏཱི་ཏི ཨུ་ཏུ, པ་མི་ཡ་ཏི སཾ་ཝ་ཙྪ་རོ པ་རི་ཙྪི་ཛྫི་ཡ་ཏི ཨ་ནེ་ནཱ་ཏི པ་མཱ་ཎཾ. ཡ་ཏྟ་ཀེ་ཧི དི་ཝ་སེ་ཧི ཨ་པ་རི་པུ་ཎྞོ་ཏི ས་མྦ་ནྡྷོ. ཡ་སྶཱཏི དི་ཝ་ས་བྷཱ་ག་སྶ. ཡོ ཨུ་ཏུ ཨ་པ་རི་པུ་ཎྞོ, ཏ་སྶ ཨུ་ཏུ་ནོ་ཏི པཱ་ཋ་སེ་སོ ཡོ་ཛེ་ཏ་བྦོ. ‘‘ཨུ་ཏུ་པ་མཱ་ཎཾ ཨཱ་ཙི་ཀྑི་ཏ་བྦཾ, དི་ཝ་ས་བྷཱ་གོ ཨཱ་ཙི་ཀྑི་ཏ་བྦོ’’ཏི པ་དཱ་ནཾ ཨ་པ་ར་མྤི ཨ་ཏྠ་ཝི་ཀ་པྤཾ ད་སྶེ་ནྟོ ཨཱ་ཧ ‘‘ཨ་ཐ ཝཱ’’ཏི་ཨཱ་དི. ཏ་ཏྠ ཨ་ཡཾ ནཱ་མ ཨུ་ཏཱུཏི ཨ་ཡཾ ཨུ་ཏུ ཝ་སྶཱ་ནོ ནཱ་མཱ་ཏི ཝཱ ཧེ་མ་ནྟོ ནཱ་མཱ་ཏི ཝཱ གི་མྷོ ནཱ་མཱ་ཏི ཝཱ. པུ་བྦ་ནྷོཏི ཨ་ཧ་སྶ པུ་བྦོ པུ་བྦ་ནྷོ. ཏ་ཏྠ པ་ཙྪི་མ་ན་ཡོ་ཝ པཱ་སཾ་ས་ཏ་རོ. ཀ་སྨཱ? པུ་རི་མ་ན་ཡེ ཨུ་ཏུ་པ་རི་པུ་ཎྞེ དི་ཝ་ས་བྷཱ་གཱ་ཙི་ཀྑ་ཎ་སྶ ཨ་བྷཱ་ཝཱ, པ་ཙྪི་མ་ན་ཡེ པ་ན པ་རི་པུ་ཎྞཾ ཝཱ ཨ་པ་རི་པུ་ཎྞཾ ཝཱ ཨུ་ཏུ་པ་མཱ་ཎཾ ཨཱ་ཙི་ཀྑི་ཏ་བྦཾ. ཨུ་པ་ས་མྤ་ནྣ་དི་ཝ་ས་བྷཱ་གོ་ཝ ‘‘པུ་བྦ་ནྷོ’’ཏི ཝཱ ‘‘སཱ་ཡ་ནྷོ’’ཏི ཝཱ ཨཱ་ཙི་ཀྑི་ཏ་བྦོ. སཾ་གཱི་ཏཱིཏི ཨེ་ཏྠ སཾ ཨེ་ཀ་ཏོ ཀ་ཏྭཱ གཱ་ཡི་ཏ་བྦཱ ཀ་ཐེ་ཏ་བྦཱ་ཏི སཾ་གཱི་ཏཱི་ཏི ཝ་ཙ་ན་ཏྠཾ ད་སྶེ་ནྟོ ཨཱ་ཧ ‘‘ཨི་ད་མེ་ཝ ས་བྦཾ ཨེ་ཀ་ཏོ ཀ་ཏྭཱ’’ཏི་ཨཱ་དི. ཏ་ཏྠ ཀིནྟི ཀིཾ ཨུ་ཏུཾ. ཨི་དཾ ནཱ་མཱཏི ཨི་དཾ ནཱ་མ ཨུ་ཏུཾ. ཝ་དེ་ཡྻཱ་སཱིཏི ཨཱ་ག་ནྟུ་ཀཱ་ནཾ ཝུ་ཌྜྷ་ན་ཝ་ཀ་བྷཱ་ཝཱ་དི་ཉཱ་པ་ན་ཏྠཾ ཀ་ཐེ་ཡྻཱ་སི.

༡༢༩. དུ་ཏི་ཡནྟི ས་ཧཱ་ཡཾ བྷི་ཀྑུཾ ཝཱ སཱ་མ་ཎེ་རཾ ཝཱ པུ་རི་སཾ ཝཱ. ཨ་ཀ་ར་ཎཱི་ཡཱ་ནཱིཏི ཨུ་པ་ས་མྤ་ནྣེ་ཧི ཨ་ཀ་ཏྟ་བྦཱ་ནི. པ་ཎྜུ་པ་ལཱ་སོཏི ཨེ་ཏྠ པ་ཎྜཱུཏི སེ་ཏ་པཱི་ཏ་མི་སྶོ ཝ་ཎྞོ, པ་ལཱ་སས་དྡོ པ་ཎྞ་ཝཱ་ཙ་ཀོ, ན ཧ་རི་ཏ་ཝཱ་ཙ་ཀོ, ནཱ་པི ཀིཾ་སུ་ཀ་དུ་མ་ཝཱ་ཙ་ཀོ་ཏི ད་སྶེ་ནྟོ ཨཱ་ཧ ‘‘པ་ཎྜུ་ཝ་ཎྞོ པ་ཎྞོ’’ཏི. པ་ཎྜུ་པ་ལཱ་སོཏི ས་མཱ་སོ་པི བྱཱ་སོ་པི ཡུ་ཏྟོ་ཡེ་ཝ. ས་མཱ་ས་ཀཱ་ལེ པ་ཎྜུ ཡ་སྶ་ཏྠཱི་ཏི པ་ཎྜུ, སོ་ཡེ་ཝ པ་ལཱ་སོ པ་ཎྜུ་པ་ལཱ་སོ་ཏི ཀཱ་ཏ་བྦོ. པུ་པྥ་ཕ་ལཱ་དིཾ བ་ནྡྷ་ཏཱི་ཏི བ་ནྡྷ་ནནྟི ཝ་ཙ་ན་ཏྠེ་ན བ་ནྡྷ་ན་ས་དྡོ ཝ་ཎྚ་པ་རི་ཡཱ་ཡོ་ཏི ཨཱ་ཧ ‘‘ཝ་ཎྚ་ཏོ’’ཏི. པུ་ཐུ་སི་ལཱཏི (མ. ནི. ཨ་ཊྛ. ༣.༦༠) ཨེ་ཏྠ པུ་ཐུ་ས་དྡོ མ་ཧ་ནྟ་པ་རི་ཡཱ་ཡོ་ཏི ཨཱ་ཧ ‘‘མ་ཧཱ་སི་ལཱ’’ཏི.

༡༣༠. ཏ་སྶཱཏི ཨུ་ཀྑེ་པ་ནཱི་ཡ་ཀ་མྨཱ་ར་ཧ་སྶ བྷི་ཀྑུ་ནོ. སཱ་མ་གྒཱིཏི ས་ངྒྷ་སཱ་མ་གྒཱི. ཏེ་ནཱཏི ཨུ་ཀྑེ་པ་ནཱི་ཡ་ཀ་མྨཱ་ར་ཧེ་ན བྷི་ཀྑུ་ནཱ. ས་མྦྷོ་གེཏི ཨཱ་མི་སེ་ན ཙ དྷ་མྨེ་ན ཙ ས་མྦྷོ་ག་ཧེ་ཏུ. ཨེ་ཏྠ ས་ཧ་སེ་ཡྻཱ་པི ས་ངྒ་ཧི་ཏཱ ཨཱ་པ་ཏྟི་བྷཱ་ཝ་ཏོ. ཨ་ནཱ་པ་ཏྟཱིཏི ཨ་ནུ་ཀྑི་ཏྟ་ཀ་བྷཱ་ཝ་ཏོ པཱ་ཙི་ཏྟི་ཡཱ་པ་ཏྟི་ཡཱ ཨ་ནཱ་པ་ཏྟི, ཨ་ལ་ཛྫི་ལ་ཀྑ་ཎཱ་བྷཱ་ཝ་ཏོ དུ་ཀྐ་ཊེ་ན ཨ་ནཱ་པ་ཏྟཱི་ཏི ད་ཊྛ་བྦཾ.

ཨི་ཏི ས་མ་ནྟ་པཱ་སཱ་དི་ཀཱ་ཡ ཝི་ན་ཡ་སཾ་ཝ་ཎྞ་ནཱ་ཡ

དྭཱ་ས་ཏྟ་ཏི་ཨ་དྷི་ཀ་ཝ་ཏྠུ་ས་ཏ་པ་ཊི་མ་ཎྜི་ཏ་སྶ མ་ཧཱ་ཁ་ནྡྷ་ཀ་སྶ

ཨ་ཏྠ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.