༧. ས་ཏྟ་མ་སི་ཀྑཱ་པ་དཾ

༨༢༢. ས་ཏྟ་མེ ‘‘པ་ཡོ་ག་དུ་ཀྐ་ཊཾ ནཱ་མཱ’’ཏི ཨི་མི་ནཱ ཧེ་ཊྛཱ ཝུ་ཏྟེ་སུ ཨ་ཊྛ་སུ དུ་ཀྐ་ཊེ་སུ པུ་བྦ་པ་ཡོ་ག་དུ་ཀྐ་ཊཾ ད་སྶེ་ཏི. ན ཀེ་ཝ་ལཾ པུ་བྦ་པ་ཡོ་ག་དུ་ཀྐ་ཊཾ ཨེ་ཏྟ་ཀ་མེ་ཝ, ཨ་ཐ ཁོ ཨ་ཉྙ་མྤི བ་ཧུ ཧོ་ཏཱི་ཏི ད་སྶེ་ནྟོ ཨཱ་ཧ ‘‘ཏ་སྨཱ’’ཏི་ཨཱ་དི. ས་ངྒྷ་ཊྚ་ནེ་སུ་པཱིཏི ཝི་ལོ་ལ༹་ནེ་སུ་པི. ད་ནྟེ་ཧི ས་ངྑཱ་ད་ཏཱིཏི ད་ནྟེ་ཧི ཙུ་ཎྞ་ཝི་ཙུ་ཎྞཾ ཀ་རོ་ཏི. ཨེ་ཏྠཱཏི ཨི་མ་སྨིཾ སི་ཀྑཱ་པ་དེ, ཨ་ཉྙཱ་ཡ བྷི་ཀྑུ་ནི་ཡཱ ཀཱ་རཱ་པེ་ཏྭཱ་ཏི ས་མྦ་ནྡྷོ. ‘‘ཨ་ཉྙཱ་ཡཱ’’ཏི་པ་དཾ ‘‘ཝི་ཉྙཱ་པེ་ཏྭཱ’’ཏི པ་དེ ཀཱ་རི་ཏ་ཀ་མྨཾ. མཱ་ཏ་ར་མྤཱིཏི ཨེ་ཏྠ པི་ས་དྡོ ཨ་ཉྙཾ ཝི་ཉྙཱ་པེ་ཏྭཱ བྷུ་ཉྫ་ནྟི་ཡཱ པ་གེ་ཝཱ་ཏི ད་སྶེ་ཏི. ཏཱ་ཡ ཝཱཏི ཝི་ཉྙཱ་པི་ཏ་བྷི་ཀྑུ་ནི་ཡཱ ཝཱ. ཏནྟི ཨཱ་མ་ཀ་དྷ་ཉྙཾ. ཏནྟི མ་ཧཱ་པ་ཙྩ་རི་ཡཾ ཝུ་ཏྟ་ཝ་ཙ་ནཾ. པུ་བྦཱ་པ་ར་ཝི་རུ་དྡྷནྟི པུ་བྦཱ་པ་ར་ཏོ ཝི་རུ་དྡྷཾ. ‘‘ཨ་ཉྙཱ་ཡ…པེ… དུ་ཀྐ་ཊ་མེ་ཝཱ’’ཏི པུ་བྦ་ཝ་ཙ་ནེ དུ་ཀྐ་ཊ་མེ་ཝ ཝུ་ཏྟཾ, པུ་ན ‘‘ཨ་ཉྙཱ་ཡ…པེ… དུ་ཀྐ་ཊ’’ནྟི ཙ པ་ཙྪི་མ་ཝ་ཙ་ནེ པཱ་ཙི་ཏྟི་ཡ་ཉྩ དུ་ཀྐ་ཊ་ཉྩ ཝུ་ཏྟཾ, ཏ་སྨཱ པུ་བྦཱ་པ་ར་ཝི་རུ་དྡྷ་ནྟི ཝུ་ཏྟཾ ཧོ་ཏི. ཧཱིཏི ས་ཙྩཾ, ཡ་སྨཱ ཝཱ.

༨༢༣. ལ་བྦྷ་མཱ་ནཾ ཨཱ་མ་ཀ་དྷ་ཉྙ་ནྟི ས་མྦ་ནྡྷོ. ཨ་ཉྙཾ ཝཱ ཡཾ་ཀི་ཉྩཱིཏི མུ་གྒ་མཱ་སཱ་དཱི་ཧི ཝཱ ལཱ་བུ་ཀུ་མྦྷ་ཎྜཱ་དཱི་ཧི ཝཱ ཨ་ཉྙཾ ཡཾ་ཀི་ཉྩི ཏི་ལཱ་དིཾ ཝཱ་ཏི. ས་ཏྟ་མཾ.