༥. པ་ཀི་ཎྞ་ཀ་ནི་དྡེ་ས་ཝ་ཎྞ་ནཱ
༥༣. ཨི་དཱ་ནི པ་ཀི་ཎྞ་ཀཾ ད་སྶེ་ཏུཾ ‘‘ས་ངྒྷི་ཀ’’ནྟྱཱ་དི ཨཱ་ར་དྡྷཾ. ཏ་ཏྠ ཡོ བྷི་ཀྑུ ཨི་སྶ་རོ ཧུ་ཏྭཱ ས་ངྒྷི་ཀཾ ག་རུ་བྷ་ཎྜཾ ཨ་ཉྙ་སྶ དེ་ཏི, ཏ་སྶ ཐུ་ལླ་ཙྩ་ཡཾ སི་ཡཱ. ཐེ་ཡྻཱ་ཡ ཨ་ཉྙ་སྶ དེ་ཏི, ཡ་ཐཱ་ཝ་ཏྠུ པཱ་རཱ་ཛི་ཀཱ་དི སི་ཡཱ, དུ་ཀྐ་ཊ་ཝ་ཏྠུ དུ་ཀྐ་ཊཾ, ཐུ་ལླ་ཙྩ་ཡ་ཝ་ཏྠུ ཐུ་ལླ་ཙྩ་ཡཾ, པཱ་རཱ་ཛི་ཀ་ཝ་ཏྠུ པཱ་རཱ་ཛི་ཀཾ སི་ཡཱ་ཏི ཝུ་ཏྟཾ ཧོ་ཏི.
༥༤. ཀུ་སཱ་དི་མ་ཡ་ཙཱི་རཱ་ནཱིཏི ཨེ་ཏྠ ཨཱ་དི-ས་དྡོ ཝཱ་ཀ་ཕ་ལ་ཀཾ ས་ངྒ་ཎྷཱ་ཏི, ཀུ་ས་མ་ཡ་ཙཱི་རཾ ཝཱ་ཀ་མ་ཡ་ཙཱི་རཾ ཕ་ལ་ཀ་མ་ཡ་ཙཱི་ར་ནྟི. ཏ་ཏྠ ཀུ་སེ ག་ནྠེ་ཏྭཱ ཀ་ཏ་ཙཱི་རཾ ཀུ་ས་མ་ཡ་ཙཱི་རཾ. ཝཱ་ཀ་མ་ཡ་ཙཱི་རཾ ནཱ་མ ཏཱ་པ་སཱ་ནཾ ཝ་ཀྐ་ལཾ. ཕ་ལ་ཀ་མ་ཡ་ཙཱི་རཾ ནཱ་མ ཕ་ལ་ཀ་ས་ཎྛཱ་ནཱ་ནི ཕ་ལ་ཀཱ་ནི སི་བྦེ་ཏྭཱ ཀ་ཏ་ཙཱི་རཾ. ཀ་མྦ་ལཾ ཀེ་ས་ཝཱ་ལ་ཛནྟི ཀེ་ས་ཛཾ ཀ་མྦ་ལཾ ཝཱ་ལ་ཛཾ ཀ་མྦ་ལཾ, ཀེ་ས་ཀ་མྦ་ལཾ ཝཱ་ལ་ཀ་མྦ་ལ་ནྟི ཨ་ཏྠོ. ཀེ་སེ་ཧི ཏ་ནྟེ ཝཱ་ཡི་ཏྭཱ ཀ་ཏ་ཀ་མྦ་ལཾ ཀེ་ས་ཀ་མྦ་ལཾ. ཙ་མ་རི་ཝཱ་ལེ་ཧི ཝཱ་ཡི་ཏྭཱ ཀ་ཏ་ཀ་མྦ་ལཾ ཝཱ་ལ་ཀ་མྦ་ལཾ. ས་མ་ཡཾ ཝི་ནཱཏི ན་ཊྛ་ཙཱི་ཝ་ར་ཀཱ་ལཾ ཋ་པེ་ཏྭཱ. དྷཱ་ར་ཡ་ཏོ དྷཱ་ར་ཡ་ནྟ་སྶ. ལཱུ་ཀ་པ་ཀྑཱ་ཛི་ན་ཀྑི་པནྟི ཨུ་ལཱུ་ཀ་པ་ཀྑི་ཨ་ཛི་ན་ཀྑི་པཾ. ཏ་ཏྠ ཨུ་ལཱུ་ཀ་པ་ཀྑཱི་ཏི ཨུ་ལཱུ་ཀ་ས་ཀུ་ཎ་པ་ཀྑེ་ཧི ཀ་ཏ་ནི་ཝཱ་ས་ནཾ. ཨ་ཛི་ན་ཀྑི་པནྟི ས་ལོ་མཾ ས་ཁུ་རཾ ཨ་ཛི་ན་མི་ག་ཙ་མྨཾ. ན་ཊྛ་ཙཱི་ཝ་ར་ཀཱ་ལཾ ཋ་པེ་ཏྭཱ ཨི་མེ་སུ ས་ཏྟ་སུ ཝ་ཏྠཱུ་སུ ཡཾ ཀི་ཉྩི དྷཱ་ར་ཡ་ཏོ ཐུ་ལླ་ཙྩ་ཡཾ སི་ཡཱ་ཏི ཨ་ཏྠོ.
༥༥. ས་ཏྠ་ཀེ་ན ཀ་ཏྟ་བྦཾ ཀ་མྨཾ ས་ཏྠ་ཀ་མྨཾ, ཏ་སྨིཾ ས་ཏྠ་ཀ་མྨེ. ཝ་ཏྠི་མྷི ཀ་ཏྟ་བྦཾ ཀ་མྨཾ ཝ་ཏྠི་ཀ་མྨཾ, ཏ་སྨིཾ ཝ་ཏྠི་ཀ་མྨེ. སཾ ནི་མི་ཏྟནྟི ཨ་ཏྟ་ནོ ཨ་ངྒ་ཛཱ་ཏཾ. ཏཾ ཚི་ནྡ་ཏོ ཐུ་ལླ་ཙྩ་ཡཾ སི་ཡཱ་ཏི ས་མྦ་ནྡྷོ. མཾ་སཱ་དི་བྷོ་ཛ་ནེཏི ཨེ་ཏྠ ཨཱ་དི-ས་དྡོ ཨ་ཊྛི་ལོ་ཧི་ཏ་ཙ་མྨ་ལོ་མཱ་ནི ས་ངྒ་ཎྷཱ་ཏི. ཏ་སྨཱ མ་ནུ་སྶཱ་ནཾ མཾ་ས་ཨ་ཊྛི་ལོ་ཧི་ཏ་ཙ་མྨ་ལོ་མ་བྷོ་ཛ་ན་པ་ཙྩ་ཡཱ ཐུ་ལླ་ཙྩ་ཡཾ སི་ཡཱ་ཏི ཨ་ཏྠོ.
༥༦. ཀ་ད་ལེ་ར་ཀ་ཀྐ་དུ་སྶཱ་ནཱིཏི ཨེ་ཏྠ ཀ་ད་ལི་ཨེ་ར་ཀ་ཨ་ཀྐ་ཝཱ་ཀེ་ཧི ཀ་ཏཱ་ནི ཝ་ཏྠཱ་ནི དྷཱ་ར་ཡ་ནྟ་སྶ དུ་ཀྐ་ཊཾ. པོ་ཏྠ་ཀནྟི མ་ཀ་ཙི་ཝཱ་ཀེ་ཧི ཀ་ཏཾ པོ་ཏྠ་ཀ་དུ་སྶཾ. ས་བྦ་པཱི་ཏཱ་དི་ཀནྟི ཨེ་ཏྠ ཨཱ་དི-ས་དྡེ་ན ས་བྦ་ལོ་ཧི་ཏ་ཀ་ས་བྦ་ཀ་ཎྷ་ཀ་ས་བྦ་མ་ཉྫེ་ཊྛི་ཀཾ ས་ངྒ་ཎྷཱ་ཏི. ཏ་ཏྠ ས་བྦ་མེ་ཝ ནཱི་ལ་ཀཾ ས་བྦ་ནཱི་ལ་ཀཾ. ཨེ་ཝཾ སེ་སེ་སུ་པི. ནཱི་ལཾ ཨུ་མྨཱ་ར་པུ་པྥ་ཝ་ཎྞཾ. པཱི་ཏཾ ཀ་ཎི་ཀཱ་ར་པུ་པྥ་ཝ་ཎྞཾ. ལོ་ཧི་ཏཾ ཛ་ཡ་སུ་མ་ན་པུ་པྥ་ཝ་ཎྞཾ. ཀ་ཎྷ་ཀཾ ཨ་དྡཱ་རི་ཊྛ་ཀ་ཝ་ཎྞཾ. མ་ཉྫེ་ཊྛི་ཀཾ ལཱ་ཁཱ་ར་ས་ཝ་ཎྞཾ. ཨི་མེ་སུ ཨ་ཊྛ་སུ ཝ་ཏྠཱུ་སུ ཡཾ ཀི་ཉྩི དྷཱ་ར་ཡ་ནྟ་སྶ དུ་ཀྐ་ཊཾ སི་ཡཱ་ཏི ཨ་ཏྠོ.
༥༧-༨. ཧ་ཏྠི་སྶུ་ར་ག་སོ་ཎཱ་ནནྟི ཧ་ཏྠི་ཨ་སྶ་ཨུ་ར་ག་སོ་ཎཱ་ནཾ མཾ་སཾ ཨ་ཊྛི་རུ་དྷི་ར་ཙ་མྨ་ལོ་མཱ་ནི. སཱི་ཧ་བྱ་གྒྷ་ཙྪ་དཱི་པི་ནནྟི སཱི་ཧ་བྱ་གྒྷ་ཨ་ཙྪ་དཱི་པཱི་ནཾ མཾ་སཱ་དཱི་ནི. ཏ་ར་ཙྪ་སྶ ཙ མཾ་སཱ་དིཾ ཨུ་དྡི་སྶ་ཀ་ཏ་མཾ་ས་ཉྩ ཨ་ནཱ་པུ་ཙྪི་ཏ་མཾ་ས་ཉྩ བྷུ་ཉྫ་ཏོ དུ་ཀྐ་ཊཾ སི་ཡཱ. ད་ཀ་ཏི་ཏྠཱ་དི་ཀནྟི ཨེ་ཏྠ ཨཱ་དི-ས་དྡོ ཝ་ཙྩ་པ་སྶཱ་ཝ་ཀུ་ཊི་ཡོ ས་ངྒ་ཎྷཱ་ཏི. ཏེ་ན ཡཱ་ཏཱ་ནུ་པུ་བྦཾ ཨཱ་ག་ཏ་པྤ་ཊི་པཱ་ཊིཾ ཧི་ཏྭཱ་ན ཝ་ཛྫེ་ཏྭཱ ན་ཧཱ་ན་ཏི་ཏྠ་ཉྩ ཝ་ཙྩ་ཀུ་ཊི་ཉྩ པ་སྶཱ་ཝ་ཀུ་ཊི་ཉྩ ཝ་ཛེ ཝ་ཛེ་ཡྻ ག་ཙྪེ་ཡྻ, དུ་ཀྐ་ཊཾ ཏ་སྶ སི་ཡཱ་ཏི ཨ་ཏྠོ.
༥༩. ས་ཧ་སཱཏི ཝེ་ག་སཱ ཝེ་གེ་ན. ཝུ་བྦྷ་ཛི་ཏྭཱ་ནཱཏི ཨ་ནྟ་ར་ཝཱ་ས་ཀཾ དཱུ་ར་ཏོ་ཝ ཨུ་ཀྑི་པི་ཏྭཱ, ཝ-ཀཱ་རོ ས་ནྡྷི་ཝ་སེ་ནཱ་ག་ཏོ. པ་ཝི་སེཏི པ་ཝི་སེ་ཡྻ. ཝ་ཙྩ་པ་སྶཱ་ཝ་ཀུ་ཊི་ཀནྟི ཝ་ཙྩ་ཀུ་ཊི་ཀཾ པ་སྶཱ་ཝ་ཀུ་ཊི་ཀཾ. ཝི་སེཏི པ་ཝི་སེ་ཡྻ. ཡོ བྷི་ཀྑུ ཝ་ཙྩ་པ་སྶཱ་ཝ་ཀུ་ཊི་ཀཾ ས་ཧ་སཱ པ་ཝི་སེ་ཡྻ ཝཱ ནི་ཀྑ་མེ་ཡྻ ཝཱ, ཨུ་བྦྷ་ཛི་ཏྭཱ ཝཱ པ་ཝི་སེ་ཡྻ ཝཱ ནི་ཀྑ་མེ་ཡྻ ཝཱ, ཨུ་ཀྐཱ་སི་ཀཾ ཝ་ཛྫེ་ཏྭཱ ཏཾ པ་ཝི་སེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཡོ་ཛ་ནཱ.
༦༠. ནི་ཏྠུ་ན་ནྟོ ཝ་ཙྩཾ ཀ་རེ་ཡྻ ད་ནྟ་ཀ་ཊྛ་ཉྩ ཁཱ་ད་ནྟོ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཝ་ཙྩ་པ་སྶཱ་ཝ་དོ་ཎཱི་ནཾ བ་ཧི ཝ་ཙྩཱ་དི་ཀཾ ཝ་ཙྩ་པ་སྶཱ་ཝཾ ཀ་རེ་ཡྻ, ཏ་སྶ དུ་ཀྐ་ཊཾ སི་ཡཱ.
༦༡. ཁ་རེ་ན ཙཱ་ཝ་ལེ་ཁེ་ཡྻཱཏི ཕཱ་ལི་ཏ་ཀ་ཊྛེ་ན ཝཱ ཕ་རུ་སེ་ན ཝཱ ག་ཎྛི་ཀེ་ན ཝཱ པཱུ་ཏི་ཀ་ཊྛེ་ན ཝཱ སུ་སི་རེ་ན ཝཱ ཨ་ཝ་ལེ་ཁེ་ཡྻཱ་ཏི ཨ་ཏྠོ. ཀ་ཊྛནྟི ཨ་ཝ་ལེ་ཁ་ན་ཀ་ཊྛཾ. ཀཱུ་པ་ཀེཏི ཝ་ཙྩ་ཀཱུ་པ་ཀེ. ཨཱུ་ཧ་ཏ་ཉྩཱཏི གཱུ་ཐ་མ་ཀྑི་ཏ་ཉྩ. ན དྷོ་ཝེ་ཡྻཱཏི ཨ་ཏྟ་ནཱ ཝཱ ན དྷོ་ཝེ་ཡྻ པ་རེ་ན ཝཱ ན དྷོ་ཝཱ་པེ་ཡྻ. ཨུ་ཀླཱ་པ་ཉྩཱཏི ཀ་ཙ་ཝ་ར་ཉྩ. ན སོ་དྷ་ཡེན ས་མྨ་ཛྫེ་ཡྻ.
༦༢. ཙ་པུ་ཙ་པཱུཏི ས་དྡཾ ཀ་ཏྭཱ ཨུ་ད་ཀ་ཀི་ཙྩཾ ཀ་རོ་ནྟ་སྶ ཨཱ་ཙ་མ་ནྟ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཨ་ན་ཛ྄ཛྷི་ཊྛོ་ཝཱཏི ཨ་ནཱ་ཎ་ཏྟོ་ཡེ་ཝ. ཐེ་རེ་ནཱཏི ས་ངྒྷ་ཏྠེ་རེ་ན. པཱ་ཏི་མོ་ཀྑནྟི པཱ་ཏི་མོ་ཀྑུ་དྡེ་སཾ. ཨུ་དྡི་སེ ཨུ་དྡི་སེ་ཡྻ, དུ་ཀྐ་ཊཾ སི་ཡཱ.
༦༣. ཨ་ནཱ་པུ་ཙྪཱ་ཡ པ་ཉྷ་སྶ ཀ་ཐ་ནེ, ཨ་ནཱ་པུ་ཙྪཱ་ཡ པ་ཉྷ་སྶ ཝི་སྶ་ཛྫ་ནེ, ཨ་ནཱ་པུ་ཙྪཱ་ཡ ས་ཛ྄ཛྷཱ་ཡ་ཀ་ར་ཎེ, ཨ་ནཱ་པུ་ཙྪཱ་ཡ པ་དཱི་པ་ཛཱ་ལ་ནེ, ཨ་ནཱ་པུ་ཙྪཱ་ཡ པ་དཱི་པ་ཝི་ཛ྄ཛྷཱ་པ་ནེ་ཏི ཨི་མེ་སུ ཙ་ཏཱུ་སུ པ་ཙྩ་ཡེ་སུ ཏ་སྶ དུ་ཀྐ་ཊཾ སི་ཡཱ.
༦༤. ཨ་ནཱ་པུ་ཙྪཱ ཝཱ་ཏ་པཱ་ན་ཀ་ཝཱ་ཊཱ་ནི ཝི་ཝ་རེ་ཡྻ ཝཱ ཐ་ཀེ་ཡྻ ཝཱ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཝ་ནྡ་ནཱ་དིནྟི ཨེ་ཏྠ ཨཱ་དི-ས་དྡོ ཝ་ནྡཱ་པ་ནཾ ས་ངྒ་ཎྷཱ་ཏི. ཡོ བྷི་ཀྑུ ན་གྒོ ཝ་ནྡ་ནཾ ཀ་རེ་ཡྻ, ཝ་ནྡཱ་པ་ནཾ ཀ་རེ་ཡྻ, ག་མ་ནཾ ཀ་རེ་ཡྻ, བྷོ་ཛ་ནཾ ཀ་རེ་ཡྻ, པི་ཝ་ནཾ ཀ་རེ་ཡྻ, ཁཱ་ད་ནཾ ཀ་རེ་ཡྻ, ག་ཧ་ཎཾ ཀ་རེ་ཡྻ, དཱ་ནཾ ཀ་རེ་ཡྻ, ཏ་སྶ ས་བྦ་ཏྠ དུ་ཀྐ་ཊ་ནྟི ས་མྦ་ནྡྷོ.
༦༥. ཏི་པ་ཊི་ཙྪ་ནྣ་ཀཾ ཝི་ནཱཏི ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཏི་སྶོ པ་ཊི་ཙྪཱ་དི་ཡོ ཛ་ནྟཱ་གྷ་ར་པྤ་ཊི་ཙྪཱ་དིཾ ཨུ་ད་ཀ་པྤ་ཊི་ཙྪཱ་དིཾ ཝ་ཏྠ་པྤ་ཊི་ཙྪཱ་དི’’ནྟི (ཙཱུ་ལ༹་ཝ. ༢༦༡) ཨེ་ཝཾ ཝུ་ཏྟཱ ཏི་སྶོ པ་ཊི་ཙྪཱ་དི་ཡོ ས་མཱ་ཧ་ཊཱ་ཏི ‘‘ཏི་པ་ཊི་ཙྪཱ་དཱི’’ཏི ཝུ་ཏྟཾ. ཏི་པ་ཊི་ཙྪ་ནྣ་ཀཾ ཋ་པེ་ཏྭཱ པ་རི་ཀ་མྨཾ ས་ཡཾ ཀ་རེ་ཡྻ, པ་རཾ ཀཱ་རཱ་པེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཡོ བྷི་ཀྑུ ན་ཧཱ་ཡཾ ན་ཧཱ་ཡ་ནྟོ ཀུ་ཊྚེ ཝཱ ཐ་མྦྷེ ཝཱ ཏ་རུ་མྷི ཝཱ ཀཱ་ཡཾ ཨུ་པ་གྷཾ་སེ་ཡྻ, ཏ་སྶ དུ་ཀྐ་ཊཾ སི་ཡཱ.
༦༦. ཡོ བྷི་ཀྑུ ན་ཧཱ་ཡ་ནྟོ ཀུ་རུ་ཝི་ནྡ་ཀ་སུ་ཏྟེ་ན ཀཱ་ཡཾ གྷཾ་སེ་ཡྻ, ཀཱ་ཡ་ཏོ ཀཱ་ཡེ་ན ཨ་ཉྙ་མ་ཉྙཾ གྷཾ་སེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཡོ ཨ་གི་ལཱ་ནོ ས་ཨུ་པཱ་ཧ་ནོ བ་ཧཱ་རཱ་མེ བ་ཧི་ཨཱ་རཱ་མེ ཙ་རེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ.
༦༧. ས་བྦ་ནཱི་ལཱ་དི་ཀ་མྤི ཙཱཏི ཨེ་ཏྠ ཨཱ་དི-ས་དྡོ ལོ་ཧི་ཏོ་དཱ་ཏ་པཱི་ཏ་ཀ་ཎྷ་མ་ཉྫེ་ཊྛ་མ་ཧཱ་ར་ངྒ་མ་ཧཱ་ནཱ་མ་ར་ངྒ་ར་ཏྟཱ་ད་ཡོ ཨུ་པཱ་ཧ་ནཱ་ཡོ ས་ངྒ་ཎྷཱ་ཏི. ཡོ བྷི་ཀྑུ ས་བྦ་ནཱི་ལ་ས་བྦ་ལོ་ཧི་ཏཱ་དི་ཀཾ ཨུ་པཱ་ཧ་ནཾ དྷཱ་རེ་ཏི, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཡོ བྷི་ཀྑུ ར་ཏྟོ ར་ཏྟ་ཙི་ཏྟོ ཏ་ད་ཧུ་ཛཱ་ཏཱ་ཡ་པི ཨི་ཏྠི་ཡཱ ནི་མི་ཏྟཾ པ་སྶེ་ཡྻ, ཏ་སྶ དུ་ཀྐ་ཊཾ སི་ཡཱ. ཡོ བྷི་ཀྑུ བྷི་ཀྑ་དཱ་ཡི་ཡཱ བྷི་ཀྑ་དཱ་ཡི་ཀཱ་ཡ ཨི་ཏྠི་ཡཱ མུ་ཁཾ པ་སྶེ་ཡྻ, ཏ་སྶ དུ་ཀྐ་ཊཾ སི་ཡཱ.
༦༨-༩. ཡོ བྷི་ཀྑུ ཨུ་ཛ྄ཛྷཱ་ན་ས་ཉྙཱི ཧུ་ཏྭཱ ཨ་ཉྙ་སྶ བྷི་ཀྑུ་ནོ པ་ཏྟཾ ཝཱ པ་སྶེ་ཡྻ, ཏ་སྶ དུ་ཀྐ་ཊཾ སི་ཡཱ. ཨཱ་དཱ་སཱ་དི་མྷི ཨུ་ད་ཀ་པ་ཏྟེ ཨ་ཏྟ་ནོ མུ་ཁཾ པ་སྶེ་ཡྻ, ཏ་སྶ དུ་ཀྐ་ཊཾ སི་ཡཱ. ཨུ་ཙྩཱ་ས་ན་མ་ཧཱ་ས་ནེ ནི་ས་ཛྫཱ་དིཾ ནི་སཱི་ད་ན་ས་ཡ་ནཱ་དིཾ ཀ་རོ་ནྟ་སྶ བྷི་ཀྑུ་ནོ དུ་ཀྐ་ཊཾ སི་ཡཱ. ཨུ་ཀྑི་ཏྟཱ་ནུ་པ་ས་མྤ་ནྣ་ནཱ་ནཱ་སཾ་ཝཱ་ས་ཀཱ་དཱི་ནཾ ཝ་ནྡ་ནེ་པི དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཏ་ཏྠ ཨུ་ཀྑི་ཏྟོཏི ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་ཏྟ་ཀོ, ཨཱ་པ་ཏྟི་ཡཱ ཨ་པྤ་ཊི་ཀ་མྨེ ཨུ་ཀྑི་ཏྟ་ཀོ, པཱ་པི་ཀཱ་ཡ དི་ཊྛི་ཡཱ ཨ་པྤ་ཊི་ནི་སྶ་གྒེ ཨུ་ཀྑི་ཏྟ་ཀོ་ཏི ཏི་ཝི་དྷོ་པི ཨི་དྷཱ་དྷི་པྤེ་ཏོ. ཨ་ནུ་པ་ས་མྤ་ནྣོཏི ཨི་མི་ནཱ བྷི་ཀྑུ་ནི་སཱ་མ་ཎེ་ར་སཱ་མ་ཎེ་རི་སི་ཀྑ་མཱ་ན་པ་ཎྜ་ཀ་ཨི་ཏྠི་སི་ཀྑཱ་པ་ཙྩ་ཀྑཱ་ཏ་ཀཱ ག་ཧི་ཏཱ. ནཱ་ནཱ་སཾ་ཝཱ་ས་ཀཱཏི ལ་དྡྷི་ནཱ་ནཱ་སཾ་ཝཱ་ས་ཀཱ ག་ཧི་ཏཱ. ཨཱ་དི-ས་དྡེ་ན ཚི་ནྣ་མཱུ་ལ་ཀཱ ག་ཧི་ཏཱ.
༧༠-༧༡. ཡོ དཱི་གྷཱ་ས་ནེ པ་ཎྜ་ཀི་ཏྠཱི་ཧི པ་ཎྜ་ཀེ་ན ཝཱ ཨི་ཏྠི་ཡཱ ཝཱ ཨུ་བྷ་ཏོ་བྱ་ཉྫ་ནེ་ན ཝཱ ཨེ་ཀ་ཏོ ནི་སཱི་དེ་ཡྻ, ཏ་སྶ དུ་ཀྐ་ཊཾ སི་ཡཱ. ཨ་དཱི་གྷེ ཨཱ་ས་ནེཏི ར་སྶེ ཨཱ་ས་ནེ. ཡོ བྷི་ཀྑུ ར་སྶཱ་ས་ནེ མ་ཉྩེ ཝཱ པཱི་ཋེ ཝཱ ཨ་ས་མཱ་ནཱ་ས་ནི་ཀེ་ན ཨེ་ཀ་ཏོ ས་ཡེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཕ་ལ་པུ་པྥཱ་དི་ཀནྟི ཨེ་ཏྠ ཨཱ་དི-ས་དྡེ་ན ཝེ་ལུ༹་ཙུ་ཎྞ་ད་ནྟ་ཀ་ཊྛ་མ་ཏྟི་ཀཱ་ད་ཡོ ས་ངྒ་ཧི་ཏཱ. ཀུ་ལ་ས་ངྒ་ཧ་ཏྠཱ་ཡ ཕ་ལ་པུ་པྥཱ་དི་ཀཾ ད་ད་ཏོ དུ་ཀྐ་ཊཾ སི་ཡཱ་ཏི ས་མྦ་ནྡྷོ.
༧༢-༣. ཡོ བྷི་ཀྑུ ག་ནྠི་མཱ་དིཾ ས་ཡཾ ཀ་རེ་ཡྻ, པ་རཾ ཀཱ་རཱ་པེ་ཡྻ, ཏ་སྶ དུ་ཀྐ་ཊཾ སི་ཡཱ. ཡོ བྷི་ཀྑུ ཛི་ནེ་ན ཝཱ་རི་ཏ་པ་ཙྩ་ཡེ པ་རི་བྷུ་ཉྫེ་ཡྻ, ཏ་སྶ དུ་ཀྐ་ཊཾ སི་ཡཱ. ཨ་བྱ་ཏྟོ བཱ་ལོ ཡོ བྷི་ཀྑུ ཨཱ་ཙ་རི་ཡུ་པ་ཛ྄ཛྷཱ་ཡེ ཨ་ནི་སྶཱ་ཡ ནི་སྶ་ཡཾ ཨ་གྒ་ཧེ་ཏྭཱ ཝ་སེ་ཡྻ, ཏ་སྶ དུ་ཀྐ་ཊཾ སི་ཡཱ. ཡོ བྷི་ཀྑུ ཨ་ནུ་ཉྙཱ་ཏེ་ཧི མཱ་ཏཱ་པི་ཏུ་ཨཱ་དཱི་ཧི པུ་གྒ་ལེ་ཧི ཨ་ཉྙ་སྶ པུ་གྒ་ལ་སྶ བྷེ་ས་ཛྫཾ ཀ་རེ་ཡྻ ཝཱ ཝ་དེ་ཡྻ ཝཱ, ཏ་སྶ དུ་ཀྐ་ཊཾ སི་ཡཱ. སཱ་པ་ཏྟི་ཀོ ཡོ བྷི་ཀྑུ ཨུ་པོ་ས་ཐ་པྤ་ཝཱ་ར་ཎཾ ཀ་རེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཏ་ཏྠ ཛི་ནེ་ན བྷ་ག་ཝ་ཏཱ ཝཱ་རི་ཏཱ ཛི་ན་ཝཱ་རི་ཏཱ, ཛི་ན་ཝཱ་རི་ཏཱ ཙ ཏེ པ་ཙྩ་ཡཱ ཙེ་ཏི ཛི་ན་ཝཱ་རི་ཏ་པ་ཙྩ་ཡཱ, ཏེ ཛི་ན་ཝཱ་རི་ཏ་པ་ཙྩ་ཡེ. དྭེ་མཱ་ཏི་ཀཱ་ཨ་པྤ་གུ་ཎ་ཏཱ་ཡ ཨ་བྱ་ཏྟོ.
༧༤. ཡོ བྷི་ཀྑུ ཨཱ་བྷོ་གཾ ཝཱ ནི་ཡོ་གཾ ཝཱ ཝ་ཛྫེ་ཏྭཱ དྭཱ་ར་བ་ནྡྷཱ་དི་ཀེ ཋཱ་ནེ པ་རི་ཝ་ཏྟ་ཀ་ཝཱ་ཊ་ཀཾ ཨ་པི་དྷཱ་ཡ དི་ཝཱ ས་ཡེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. དྭཱ་ར་བ་ནྡྷཱ་དི་ཀེཏི ཡེ་ན ཀེ་ན་ཙི པ་རི་ཀྑི་ཏྟེ ཨ་བྦྷོ་ཀཱ་སེ་པི རུ་ཀྑ་མཱུ་ལེ་པི ཨ་ནྟ་མ་སོ ཨི་མི་ནཱ ལ་ཀྑ་ཎེ་ན ཡུ་ཏྟ་ཨཱ་ཀཱ་ས་ངྒ་ཎེ་པི. ཨ་པི་དྷཱ་ཡཱཏི ཨ་པི་ད་ཧི་ཏྭཱ. ཝི་ནཱ་བྷོ་གནྟི ‘‘ཨེ་ས དྭཱ་རཾ ཛ་གྒི་སྶ་ཏཱི’’ཏི ཨཱ་བྷོ་གཾ ཋ་པེ་ཏྭཱ་ཏི ཨ་ཏྠོ. ནི་ཡོ་གནྟི ཨ་ཝ་ས་ཊྛཱ་ནཾ, ཨ་ཏྟ་ནོ ཨ་ཝ་སཾ བ་ཧུ་སཱ་དྷཱ་ར་ཎ་ཊྛཱ་ནཾ ཋ་པེ་ཏྭཱ. ‘‘ས་ཝ་སོ’’ཏི ཝཱ པཱ་ཋོ, ས་ཝ་སོ ཧུ་ཏྭཱ་ཏི ཨ་ཏྠོ. དི་ཝཱཏི དི་ཝཱ་ཀཱ་ལེ.
༧༥. དྷ་ཉྙནྟི སཱ་ལི ཝཱི་ཧི ཡ་ཝོ གོ་དྷུ་མོ ཀ་ངྒུ ཝ་ར་ཀོ ཀུ་དྲཱུ་ས་ཀོ་ཏི ས་ཏྟ་ཝི་དྷཾ དྷ་ཉྙཾ. ཨི་ཏྠི་རཱུ་པནྟི དཱ་རུ་ལོ་ཧ་མ་ཡཱ་དི་ཨི་ཏྠི་རཱུ་པཾ. ར་ཏ་ནནྟི མུ་ཏྟཱ་དི་ད་ས་ཝི་དྷཾ ར་ཏ་ནཾ. ཨཱ་ཝུ་དྷནྟི ས་ཏྟི་ཏོ་མ་རཱ་དི་ས་བྦཱ་ཝུ་དྷ་བྷ་ཎྜཾ. ཨི་ཏྠི་པ་སཱ་དྷ་ནནྟི ཨི་ཏྠི་ཡཱ སཱི་སཱ་དི་ཨ་ལ་ངྐཱ་རཾ. ཏཱུ་རི་ཡ་བྷ་ཎྜནྟི དྷ་མ་ན་ས་ངྑཱ་དི་ས་བྦཾ ཏཱུ་རི་ཡ་བྷ་ཎྜཾ. ཕ་ལ་རུ་ཀྑེཏི ཕ་ལི་ཏ་རུ་ཀྑེ. པུ་བྦ་ཎྞཱ་དི་ཀནྟི མུ་གྒ་མཱ་སཱ་དི་ཀཾ. ཨཱ་དི-ས་དྡེ་ན ཝཱ་ཀུ་ར་ཀུ་མི་ནཱ་ད་ཡོ ག་ཧི་ཏཱ. ཨེ་ཏེ་སུ ཡཾ ཀི་ཉྩི ཨཱ་མ་སེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ.
༧༦. ས་སི་ཏྠོ་ད་ཀ་ཏེ་ལེ་ཧཱིཏི ཡོ པ་ན མ་དྷུ་སི་ཏྠ་ཀ་ཏེ་ལེ་ན ཝཱ ཨུ་ད་ཀ་མི་སྶ་ཀ་ཏེ་ལེ་ན ཝཱ ཡེ་ན ཀེ་ན་ཙི ཙི་ཀྑ་ལླེ་ན ཝཱ. ཕ་ཎ་ཧ་ཏྠ་ཕ་ཎེ་ཧི ཝཱཏི ད་ནྟ་མ་ཡཱ་དི་ཕ་ཎེ་ན ཝཱ ཕ་ཎ་ཀི་ཙྩ་སཱ་དྷ་ཀེ་ཧི ཧ་ཏྠ་ངྒུ་ལཱི་ཧི ཝཱ ཀོ་ཙྪེ་ན ཝཱ ཀེ་ས་མོ་ས་ཎྛ་ནེ དུ་ཀྐ་ཊཾ སི་ཡཱ་ཏི ཨ་ཏྠོ. ཨེ་ཀ་སྨིཾ བྷཱ་ཛ་ནེ བྷོ་ཛ་ན་ནི་མི་ཏྟེ དུ་ཀྐ་ཊཾ སི་ཡཱ་ཏི ཨ་ཏྠོ.
༧༧. དྭེ བྷི་ཀྑཱུ ཨེ་ཀ་ཏྠ་ར་ཎཱ ས་ཡེ་ཡྻཱུཾ, དྭེ བྷི་ཀྑཱུ ཨེ་ཀ་པཱ་ཝུ་ར་ཎཱ ས་ཡེ་ཡྻུཾ, དྭེ བྷི་ཀྑཱུ ཨེ་ཀ་མ་ཉྩ་ཀེ ས་ཡེ་ཡྻུཾ, ཏེ་སཾ དུ་ཀྐ་ཊཱ་ནི ཧོ་ནྟཱི་ཏི ས་མྦ་ནྡྷོ. པ་མཱ་ཎ་ཏོ ཨ་དྷི་ཀཾ ཝཱ ཨཱུ་ནཾ ཝཱ ད་ནྟ་ཀ་ཊྛཾ ཁཱ་དེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཡོ་ཛ་ནཱ. ཏ་ཏྠ ཨ་དྷི་ཀནྟི ཨ་ཊྛ་ངྒུ་ལ་ཏོ ཨ་དྷི་ཀཾ. ཨཱུ་ནནྟི ཙ་ཏུ་ར་ངྒུ་ལ་ཏོ ཨཱུ་ནཾ.
༧༨. ཡོ བྷི་ཀྑུ ན་ཙྩ་ཉྩ གཱི་ཏ་ཉྩ ཝཱ་དི་ཏ་ཉྩ ཡོ་ཛེ་ཏི ཝཱ ཡོ་ཛཱ་པེ་ཏི ཝཱ, ཏ་སྶ དུ་ཀྐ་ཊཾ སི་ཡཱ. ཏེ་སཾ ན་ཙྩཱ་ནཾ ད་སྶ་ནཾ, ཏེ་སཾ གཱི་ཏཱ་ནཾ ས་ཝ་ནཾ, ཏེ་སཾ ཝཱ་དི་ཏཱ་ནཾ ས་ཝ་ན་ཉྩ ཀ་རོ་ནྟ་སྶ དུ་ཀྐ་ཊཾ སི་ཡཱ་ཏི ཨ་ཏྠོ.
༧༩. ཝཱི་ཧཱ་དི་རོ་པི་མེཏི ཝཱི་ཧི་ཨཱ་དཱི་ནཾ རུ་ཧ་ན་ཊྛཱ་ནེ. བ་ཧི་པཱ་ཀཱ་ར་ཀུ་ཊྚ་ཀེཏི པཱ་ཀཱ་ར་ཀུ་ཊྚཱ་ནཾ བ་ཧི. ཝ་ཙྩཱ་དི་ཚ་ཌྜ་ནཱ་དི་མྷཱིཏི ཝ་ཙྩ་པ་སྶཱ་ཝ་ས་ངྐཱ་ར་ཙ་ལ་ཀཱ་དཱི་ནཾ ཚ་ཌྜ་ན་ཝི་སྶ་ཛྫ་ན་པ་ཙྩ་ཡཱ དུ་ཀྐ་ཊཾ སི་ཡཱ་ཏི ཨ་ཏྠོ. དཱི་གྷ་ཀེ་སཱ་དི་དྷཱ་ར་ཎེཏི དཱི་གྷ་ཀེ་ས་དྷཱ་ར་ཎེ དཱི་གྷ་ན་ཁ་དྷཱ་ར་ཎེ དུ་ཀྐ་ཊཾ སི་ཡཱ་ཏི ཨ་ཏྠོ.
༨༠. ན་ཁ་མ་ཊྛ་ཀ་ར་ཎཱ་དི་མྷཱིཏི ཨེ་ཏྠ ཨཱ་དི-ས་དྡེ་ན ར་ཛ་ན་ཀ་ར་ཎཾ ག་ཧི་ཏཾ. ས་མྦཱ་དྷེ ལོ་མ་ཧཱ་ར་ཎེཏི ས་མྦཱ་དྷེ ཨུ་པ་ཀ་ཙྪ་ཀ་མུ་ཏྟ་ཀ་ར་ཎ་ཊྛཱ་ནེ ལོ་མུ་དྡྷ་ར་ཎེ. ས་ཨུ་པཱ་ཧ་ནོ བྷི་ཀྑུ པ་རི་ཀ་མྨ་ཀ་ཏཾ བྷཱུ་མིཾ ཨ་ཀྐ་མེ་ཡྻཱ་ཏི ས་མྦ་ནྡྷོ.
༨༡. ཨ་དྷོ་ཏ་ཨ་ལླ་པཱ་དེ་ཧཱིཏི ཡོ བྷི་ཀྑུ ཨ་དྷོ་ཏ་པཱ་དེ་ཧི ཝཱ ཨ་ལླ་པཱ་དེ་ཧི ཝཱ ས་ངྒྷི་ཀཾ མ་ཉྩཾ ཝཱ པཱི་ཋཾ ཝཱ ཨ་ཀྐ་མེ་ཡྻ, པ་རི་ཀ་མྨ་ཀ་ཏཾ བྷི་ཏྟིཾ ཝཱ ཀཱ་ཡ་ཏོ ཨཱ་མ་ས་ནྟ་སྶ དུ་ཀྐ་ཊཾ སི་ཡཱ་ཏི ཨ་ཏྠོ.
༨༢-༣. ས་ངྒྷཱ་ཊི་ཡཱ་པི པ་ལླ་ཏྠེཏི ཨ་དྷི་ཊྛི་ཏ་ཙཱི་ཝ་རེ་ན ཝི་ཧཱ་རེ ཝཱ ཨ་ནྟ་ར་གྷ་རེ ཝཱ པ་ལླ་ཏྠི་ཀཾ ཀ་རེ་ཡྻ, ཏ་སྶ དུ་ཀྐ་ཊཾ. དུ་པྤ་རི་བྷུ་ཉྫེ་ཡྻ ཙཱི་ཝ་རནྟི ཏི་ཎྞཾ ཙཱི་ཝ་རཱ་ནཾ ཨ་ཉྙ་ཏ་རཾ ཙཱི་ཝ་རཾ དུ་པྤ་རི་བྷོ་གེ་ན པ་རི་བྷུ་ཉྫེ་ཡྻ. ཨ་ཀཱ་ཡ་བ་ནྡྷ་ནོཏི ཀཱ་ཡ་བ་ནྡྷ་ན་ཝི་ར་ཧི་ཏོ བྷི་ཀྑུ གཱ་མཾ ཝ་ཛེ་ཡྻ ག་ཙྪེ་ཡྻ. ཡོ བྷི་ཀྑུ ཝ་ཙྩ་ཀཾ ཨུ་ཙྩཱ་རཾ ཀ་ཏྭཱ་ན ཨུ་ད་ཀེ ས་ནྟེ ནཱ་ཙ་མེ་ཡྻ ཨུ་ད་ཀ་སུ་དྡྷིཾ ན ཀ་རེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ས་མཱ་དེ་ཡྻ ཨ་ཀ་པྤི་ཡེཏི བྷི་ཀྑུཾ ཝཱ སཱ་མ་ཎེ་རཱ་དི་ཀེ སེ་ས་ས་ཧ་དྷ་མྨི་ཀེ ཝཱ ཨ་ཀ་པྤི་ཡེ ནི་ཡོ་ཛེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ས་བྷཱ་གཱ་པ་ཏྟི་ཡཱ དེ་ས་ནཱ་རོ་ཙ་ན་པ་ཙྩ་ཡཱ དུ་ཀྐ་ཊཾ སི་ཡཱ་ཏི ཨ་ཏྠོ. ས་བྷཱ་གཱཏི ཨེ་ཏྠ ཝ་ཏྠུ་ས་བྷཱ་ག་ཏཱ་ཝ ཨི་དྷཱ་དྷི་པྤེ་ཏཱ, ན ཨཱ་པ་ཏྟི་ས་བྷཱ་ག་ཏཱ.
༨༤. ན ཝ་སེ ཝ་སྶནྟི ཡོ བྷི་ཀྑུ ཝ་སྶཾ ན ཝ་སེ་ཡྻ ན ཨུ་པ་ག་ཙྪེ་ཡྻ, ཏ་སྶ དུ་ཀྐ་ཊཾ སི་ཡཱ. ཝི་སཾ་ཝཱ་དེ སུ་དྡྷ་ཙི་ཏྟེཏི ཨེ་ཏྠ ས་མྤ་དཱ་ན་ཏྠེ བྷུ་མྨ་ཝ་ཙ་ནཾ, པ་ཊི་སྶ་ཝཾ ཝི་སཾ་ཝཱ་དེ་ནྟ་སྶ སུ་དྡྷ་ཙི་ཏྟ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཝ་སྶཾ ཝ་སི་ཏྭཱ ཨ་ན་ནུ་ཉྙཱ་ཏ་ཀི་ཙྩ་ཏོ ཨ་ན་ནུ་ཉྙཱ་ཏ་ཀི་ཙྩེ་ན བྷི་ཀྑུ་ནོ ག་མ་ནེ དུ་ཀྐ་ཊཾ སི་ཡཱ་ཏི ཡོ་ཛ་ནཱ.
༨༥. ཨཱ་པ་དཾ ཝ་ཛྫེ་ཏྭཱ ཏ་རུ་སྶ ཨུ་དྡྷཾ པོ་རི་ས་མྷཱ ཨ་བྷི་རུ་ཧ་ཎེ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཨཱ་པ་དནྟི ཨ་ནྟ་རཱ་ཡཾ. ཏ་རུ་སྶཱཏི རུ་ཀྑ་སྶ. པོ་རི་ས་མྷཱཏི ཨེ་ཀ་པོ་རི་ས་པྤ་མཱ་ཎཱ མ་ཛ྄ཛྷི་མ་སྶ པུ་རི་ས་སྶ པ་ཉྩ་ཧ་ཏྠཱ. ཨ་པ་རི་སྶཱ་ཝ་ནོ ཡོ བྷི་ཀྑུ ཨ་དྡྷཱ་ནཾ ག་ཙྪེ་ཡྻ, ཡོ ཙ བྷི་ཀྑུ ཏཾ པ་རི་སྶཱ་ཝ་ནཾ ཡཱ་ཙ་ཏོ ན ད་དེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཡོ་ཛ་ནཱ. ཨ་དྡྷཱ་ནནྟི ཨ་དྡྷ་ཡོ་ཛ་ན་མེ་ཝ ཨ་ནྟི་མ་མ་དྡྷཱ་ནཾ.
༨༦. ཨ་ཏྟ་ནོ གྷཱ་ཏ་ནེ དུ་ཀྐ་ཊཾ སི་ཡཱ་ཏི ས་མྦ་ནྡྷོ. ཡོ བྷི་ཀྑུ ཨི་ཏྠི་རཱུ་པཱ་དི་རཱུ་པཾ ཀ་རེ་ཡྻ ཝཱ ཀཱ་རཱ་པེ་ཡྻ ཝཱ, ཏ་སྶ དུ་ཀྐ་ཊཾ སི་ཡཱ. མཱ་ལཱ་དི་ཀཾ ཝི་ཙི་ཏྟཾ ཋ་པེ་ཏྭཱ ཛཱ་ཏ་ཀཱ་དི་ཝ་ཏྠུཾ ས་ཡཾ ཀ་རེ་ཡྻ, དུ་ཀྐ་ཊཾ སི་ཡཱ་ཏི ས་མྦ་ནྡྷོ.
༨༧. བྷུ་ཉྫ་ནྟ་མུ་ཊྛ་པེཏི ཡོ བྷི་ཀྑུ བྷུ་ཉྫ་ནྟཾ ཨུ་ཊྛཱ་པེ་ཡྻ, ཏ་སྶ དུ་ཀྐ་ཊཾ སི་ཡཱ. བྷ་ཏྟ་སཱ་ལཱ་དཱི་སུ ཝུ་ཌྜྷཱ་ནཾ ཨོ་ཀཱ་སཾ ཨ་ད་ཏྭཱ ནི་སཱི་ད་ཏོ དུ་ཀྐ་ཊཾ སི་ཡཱ་ཏི ཡོ་ཛ་ནཱ.
༨༨. ཡཱ་ནཱ་ནཱིཏི ཝ་ཡ྄ཧཾ ར་ཐོ ས་ཀ་ཊཾ ས་ནྡ་མཱ་ནི་ཀཱ་དཱི་ནི. ཀ་ལླ་ཀོཏི ཨ་གི་ལཱ་ནོ. ཨ་གི་ལཱ་ནོ ཡོ བྷི་ཀྑུ ཡཱ་ནཱ་ནི ཨ་བྷི་རུ་ཧེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཝ་དེ ད་ཝནྟི ཀེ་ལི༹ཾ ཝ་དེ་ཡྻ, ར་ཏ་ན་ཏྟ་ཡཾ ཨཱ་ར་བྦྷ ཀེ་ལི༹ཾ ཝ་དེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཨ་ཉྙ་པ་རི་སཱ་ཡ ཨུ་པ་ལཱ་ལ་ནེ དུ་ཀྐ་ཊཾ ཧོ་ཏི.
༨༩. ཀཱ་ཡཱ་དིནྟི ཨེ་ཏྠ ཨཱ་དི-ས་དྡོ ཨཱུ་རུ་ནི་མི་ཏྟཾ ས་ངྒ་ཎྷཱ་ཏི. ཀཱ་ཡཾ ཝཱ ཨཱུ་རུཾ ཝཱ ནི་མི་ཏྟཾ ཝཱ ཝི་ཝ་རི་ཏྭཱ བྷི་ཀྑུ་ནཱི་ནཾ ན ད་སྶ་ཡེ ན ད་སྶེ་ཡྻཱ་ཏི ཨ་ཏྠོ. ལོ་ཀཱ་ཡ་ཏཾ ཏི་ར་ཙྪཱ་ནཱ་དི་ཝི་ཛྫཾ ན ཙ ས་ཡཾ ཝཱ་ཙེ་ཡྻ, པ་ར་ཉྩ ན ཝཱ་ཙཱ་པེ་ཡྻ. པ་ལི་ཏཾ ག་ཎྷེ་ཡྻ ཝཱ ག་ཎྷཱ་པེ་ཡྻ ཝཱ, ཏ་སྶ དུ་ཀྐ་ཊཾ སི་ཡཱ་ཏི ཡོ་ཛ་ནཱ.
༩༠-༩༢. ཡ་ཏྠ ཀ་ཏྠ་ཙི པེ་ལཱ༹་ཡཾ པ་ཀྑི་པི་ཏྭཱ བྷ་ཏྟཾ བྷུ་ཉྫ་ནྟ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. པ་ཏྟ་ཧ་ཏྠ་ཀོ ཡོ བྷི་ཀྑུ ཝཱ་ཏ་པཱ་ནཾ ཝཱ ཀ་ཝཱ་ཊཾ ཝཱ པ་ཎཱ་མེ པ་ཎཱ་མེ་ཡྻ, སོ་ད་ཀཾ པ་ཏྟཾ ཨུ་ཎྷེ་ཡྻ ཨུ་ཎྷེ ཨོ་ཏཱ་པེ་ཡྻ ཝཱ པ་ཊི་སཱ་མེ་ཡྻ ཝཱ, ཝོ་ད་ཀཾ པ་ཏྟཾ ཨ་ཏི་ཨུ་ཎྷེ་ཡྻ ཨ་ཏི་ཋ་པེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཡོ བྷི་ཀྑུ པ་ཏྟཾ བྷཱུ་མི་ཡཾ ཝཱ ཨ་ངྐེ ཝཱ མ་ཉྩེ ཝཱ པཱི་ཋེ ཝཱ མི་ཌྜྷ་ནྟེ ཝཱ པ་རི་བྷ་ཎྜ་ནྟེ ཝཱ པཱ་དེ ཝཱ ཚ་ཏྟེ ཝཱ ཋ་པེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ. བྷཱུ་མི་ཡནྟི ཡེ་ན ཀེ་ན་ཙི ཨ་ན་ཏྠ་ཏཱ་ཡ པཾ་སུ་ས་ཀྑ་ར་མི་སྶཱ་ཡ. ཨ་ངྐེཏི དྭི་ནྣཾ ཨཱུ་རཱུ་ནཾ མ་ཛ྄ཛྷེ. མི་ཌྜྷ་ནྟེཏི མི་ཌྜྷ་པ་རི་ཡ་ནྟེ. པ་རི་བྷ་ཎྜ་ནྟེཏི བཱ་ཧི་ར་པ་སྶེ ཀ་ཏཱ་ཡ ཏ་ནུ་ཀ་མི་ཌྜྷི་ཡཱ ཨ་ནྟེ. ཡོ བྷི་ཀྑུ ཙ་ལ་ཀཱ་དིཾ ཝཱ པ་ཏྟེ ཋ་པེ་ཡྻ, པ་ཏྟེ ཝཱ ཧ་ཏྠ་དྷོ་ཝ་ནེ ཧ་ཏྠ་སྶ དྷོ་ཝ་ན་པྤ་ཙྩ་ཡཱ ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ.
༩༣. ཨུ་ཙྪི་ཊྛཾ མུ་ཁ་དྷོ་ཝ་ནཾ ཨུ་ད་ཀ་མྤི པ་ཏྟེ་ན ནཱི་ཧ་ར་ནྟ་སྶ བྷི་ཀྑུ་ནོ དུ་ཀྐ་ཊཾ སི་ཡཱ. ཡོ བྷི་ཀྑུ ཨ་ཀ་པྤི་ཡཾ པ་ཏྟཾ པ་རི་བྷུ་ཉྫེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཏ་ཏྠ ཨ་ཀ་པྤི་ཡཾ པ་ཏྟནྟི དཱ་རུ་མ་ཡ་པ་ཏྟཱ་དིཾ.
༩༤. ཡོ བྷི་ཀྑུ ཁི་པི་ཏེ ‘‘ཛཱི་ཝཱ’’ཏི ཝ་དེ ཝ་དེ་ཡྻ, ཏ་སྶ དུ་ཀྐ་ཊཾ སི་ཡཱ་ཏི ཨ་ཏྠོ. ཡོ བྷི་ཀྑུ པ་རི་མ་ཎྜ་ལ་ཀཱ་དི་མྷི པ་ཉྩ་ས་ཏྟ་ཏི སེ་ཁི་ཡེ ཨ་ནཱ་ད་རོ ཧུ་ཏྭཱ ན སི་ཀྑ་ཏི, ཏ་སྶ དུ་ཀྐ་ཊཾ སི་ཡཱ་ཏི ས་མྦ་ནྡྷོ.
༩༥. ཡོ བྷི་ཀྑུ བྷ་ཎྜཱ་གཱ་རེ པ་ཡུ་ཏོ མཱ་ཏུ་ཡཱ པི་ཏུ་ནོ ཙ བྷ་ཎྜ་ཀཾ གོ་པེ་ཡྻ, ཨ་སྶ བྷི་ཀྑུ་ནོ པཱ་ཙི་ཏྟི་ཡཾ སི་ཡཱ་ཏི ས་མྦ་ནྡྷོ. ཏ་ཏྠ པ་ཡུ་ཏོཏི བྷ་ཎྜཱ་གཱ་རེ བྱཱ་པཱ་ར་ཝ་སེ་ན ཡུ་ཏྟ་པྤ་ཡུ་ཏྟོ. གོ་པ་ཡེཏི གོ་པེ་ཡྻ. ཡོ བྷི་ཀྑུ ད་ཝཱ་ཡ ཧཱི་ནེ་ན ཛཱ་ཏི་ཨཱ་དི་ནཱ ཨུ་ཏྟ་མ་མྤི ཝ་དེ་ཡྻ, དུ་བྦྷཱ་སི་ཏཾ སི་ཡཱ་ཏི ས་མྦ་ནྡྷོ. ཏ་ཏྠ ཧཱི་ནེ་ཧི ཝཱ ཨུ་ཀྐ་ཊྛེ་ཧི ཝཱ ཛཱ་ཏི་ཨཱ་དཱི་ཧི ཨེ་ཝཾ ཨུ་ཀྐ་ཊྛཾ ཝཱ ཧཱི་ནཾ ཝཱ ‘‘ཙ་ཎྜཱ་ལོ་སཱི’’ཏི་ཨཱ་དི་ནཱ ན་ཡེ་ན ཨུ་ཛུཾ ཝཱ ‘‘ས་ནྟི ཨི་དྷེ་ཀ་ཙྩེ ཙ་ཎྜཱ་ལ་ཝེ་ན་ནེ་སཱ་དཱ’’ཏི་ཨཱ་དི་ནཱ ན་ཡེ་ན ཨ་ཉྙཱ་པ་དེ་སེ་ན ཝཱ ཨུ་པ་ས་མྤ་ནྣཾ ཝཱ ཨ་ནུ་པ་ས་མྤ་ནྣཾ ཝཱ ཨ་ཀྐོ་སཱ་དྷི་པྤཱ་ཡཾ ཝི་ནཱ ཀེ་ཝ་ལཾ ཀཱི་ལཱ༹་དྷི་པྤཱ་ཡེ་ན ཝ་དེ་ཡྻ, དུ་བྦྷཱ་སི་ཏཾ སི་ཡཱ་ཏི.
པ་ཀི་ཎྞ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.