༦. ཝ་ཏྟཱ་དི་ཀ་ཎྜ་ནི་དྡེ་ས་ཝ་ཎྞ་ནཱ
༩༦. ཨི་དཱ་ནི ཝ་ཏྟཾ ད་སྶེ་ཏུཾ ‘‘ཨུ་པ་ཛ྄ཛྷཱ་ཙ་རི་ཡ་ཝ་ཏྟ’’ནྟི ཝུ་ཏྟཾ. ཏ་ཏྠ ཨུ་པ་ཛ྄ཛྷཱ་ཡ་ཝ་ཏྟ་ཉྩ ཨཱ་ཙ་རི་ཡ་ཝ་ཏྟ་ཉྩ ག་མི་ཀ་ཝ་ཏྟ་ཉྩ ཨཱ་ག་ནྟུ་ཀ་ཝ་ཏྟ་ཉྩ སེ་ནཱ་ས་ནཱ་དི་ཝ་ཏྟ་ཉྩ པི་ཡ་སཱི་ལེ་ན བྷི་ཀྑུ་ནཱ ཀཱ་ཏ་བྦ་ནྟི ས་མྦ་ནྡྷོ. ག་མི་ཀཱ་ག་ནྟུ་ཀནྟི ག་མི་ཀཾ ཨཱ་ག་ནྟུ་ཀ་ནྟི ཚེ་དོ, ག་མི་ཀ་ཝ་ཏྟཾ ཨཱ་ག་ནྟུ་ཀ་ཝ་ཏྟ་ཉྩཱ་ཏི ཨ་ཏྠོ.
༩༧. དཱ་ཏུ་ཀཱ་མོ ཧ་ཏྠ་པཱ་སེ ཋི་ཏོ ཀི་ཉྩི ག་ཧི་ཏ་བྦཾ ཨེ་ཀེ་ན པུ་རི་སེ་ན ག་ཧི་ཏ་བྦཾ ཨུ་ཀྑི་པ་ན་ཀྑ་མཾ ཝ་ཏྠུཾ ཏི་དྷཱ ཏཱི་སུ པ་ཀཱ་རེ་སུ ཨེ་ཀེ་ནཱ་ཀཱ་རེ་ན ད་དེ་ཡྻ, ག་ཧེ་ཏུ་ཀཱ་མོ བྷི་ཀྑུ དྭི་དྷཱ དྭཱི་སུ ཨེ་ཀེ་ན ག་ཎྷེ་ཡྻ, ཨ་ཡཾ པ་ཉྩ་ངྒོ པ་ཊི་གྒ་ཧོ་ཏི ཨ་ཏྠོ.
༩༨-༡༠༠. དཱུ་རེ ཋི་ཏཾ ཙཱི་ཝ་རཾ ཋ་པི་ཏོ་ཀཱ་སཾ ས་ལླ་ཀྑེ་ཏྭཱ ‘‘ཨེ་ཏ’’ནྟི ཝ་ཏྟ་བྦཾ. ཧ་ཏྠ་པཱ་སེ ཋི་ཏཾ ཧ་ཏྠེ་ན ཨཱ་མ་སི་ཏྭཱ ‘‘ཨི་མ’’ནྟི ཝ་ཏྟ་བྦཾ. ‘‘ཨེ་ཏཾ ཨ་དྷི་ཊྛཱ་མི, ཨི་མཾ ཨ་དྷི་ཊྛཱ་མཱི’’ཏི ཨི་མེ་སཾ པ་དཱ་ནཾ མ་ཛ྄ཛྷེ ས་ངྒྷཱ་ཊི་ཨཱ་དཱི་སུ པ་ཙྩེ་ཀཾ ཡོ་ཛེ་ཏྭཱ ཏི་ཙཱི་ཝ་རཾ ཨ་དྷི་ཊྛེ་ཡྻ. ཀ་ཐཾ? ‘‘ཨེ་ཏཾ ས་ངྒྷཱ་ཊིཾ ཨ་དྷི་ཊྛཱ་མི, ཨི་མཾ ས་ངྒྷཱ་ཊིཾ ཨ་དྷི་ཊྛཱ་མཱི’’ཏི ཨ་དྷི་ཊྛེ་ཡྻ. ཨེ་ཝཾ སེ་སེ་སུ ཙ ཙཱི་ཝ་རེ་སུ. ཡ་ཐཱ ཙཱི་ཝ་རཱ་དིཾ ཝི་དྷཱ་ནཾ ཨེ་ཝཾ པ་ཏྟེ་པི ཨ་དྷི་ཊྛེ་ཡྻ པ་ཙྩུ་དྡྷ་རེ་ཡྻཱ་ཏི ཨ་ཏྠོ.
༡༠༡. ས་ཉྩ་རི་ཏྟཾ ཋ་པེ་ཏྭཱ སེ་སཱ ག་རུ་ཀཱ ཙ པཱ་རཱ་ཛི་ཀཱ ཙ ས་ཙི་ཏྟ་ཀཱ་ཏི ས་མྦ་ནྡྷོ. ཨ་ནྟི་མཱཏི པཱ་རཱ་ཛི་ཀཱ. ཨ་ཙྪི་ནྣ་སི་ཀྑཱ་པ་དཾ, པ་རི་ཎ་ཏ་སི་ཀྑཱ་པ་ད་ཉྩཱ་ཏི ཨི་མཾ དྭ་ཡཾ ཋ་པེ་ཏྭཱ སེ་སཾ ནི་སྶ་གྒི་ཡཾ ཨ་ཙི་ཏྟ་ཀ་ནྟི ཨ་ཏྠོ.
༡༠༢-༣. གཱ་མ་པྤ་ཝེ་ས་ན་ནྟེ་ཏེཏི གཱ་མ་པྤ་ཝེ་ས་ནཾ ཨི་ཏི ཨེ་ཏེ. པཱ་ཙི་ཏྟཱི་སུ ཨེ་ཏེ པ་ད་སོ་དྷ་མྨཱ་ད་ཡོ གཱ་མ་པྤ་ཝེ་ས་ན་ནྟཱ ས་ཏྟ་ར་ས སི་ཀྑཱ་པ་དཱ ཨ་ཙི་ཏྟ་ཀཱ.
༡༠༤-༥. པ་ཀི་ཎྞ་ཀེ་སུ ཨུ་དྡི་སྶ་ཀ་ཏཾ ཋ་པེ་ཏྭཱ ཨ་ཉྙ་མཾ་ས་ཀཾ སེ་ས་མཾ་སཾ ཨ་ཙི་ཏྟ་ཀ་ནྟི ཨ་ཏྠོ. ཨེ་ཏྠ པ་ཀི་ཎྞ་ཀེ་སུ ཨ་ཉྙ་མཾ་སཱ་དི་ཀཾ པ་ཏྟ་ཧ་ཏྠོ ཀ་ཝཱ་ཊ་ཀ་ནྟཾ ཏེ་ར་ས་ཝི་དྷཾ ཨི་དཾ སི་ཀྑཱ་པ་དཾ ཨ་ཙི་ཏྟ་ཀཾ, སེ་སཾ ས་བྦཾ ས་ཙི་ཏྟ་ཀ་ནྟི ཨ་ཏྠོ.
༡༠༦. ཨཱ་ཙ་རི་ཡཱ ཝཱི་ཏི་ཀྐ་མ་ན་ཙི་ཏྟེ་ན ས་ཙི་ཏྟ་ཀཾ ཨ་ཙི་ཏྟ་ཀ་ནྟི ཝ་ད་ནྟི, པ་ཉྙ་ཏྟི་ཛཱ་ན་ནེ་ན ཙི་ཏྟེ་ན ཏ་ཐཱ ས་ཙི་ཏྟ་ཀཾ ཨ་ཙི་ཏྟ་ཀ་ནྟི ཨཱ་ཙ་རི་ཡཱ ཝ་ད་ནྟཱི་ཏི ཨ་ཏྠོ. ཏ་ཐཱ-ས་དྡེ་ན ‘‘ས་ཙི་ཏྟ་ཀཾ ཨ་ཙི་ཏྟ་ཀ’’ནྟི ཨི་དཾ ག་ཧི་ཏཾ.
༡༠༧-༩. པུ་བྦ་ཀ་ར་ཎཱ་དི་ཀནྟི ཨེ་ཏྠ ཨཱ་དི-ས་དྡོ པུ་བྦ་ཀི་ཙྩཾ ས་ངྒ་ཎྷཱ་ཏི. ཏ་ཏྠ –
‘‘ས་མྨ་ཛྫ་ནཱི པ་དཱི་པོ ཙ, ཨུ་ད་ཀཾ ཨཱ་ས་ནེ་ན ཙ;
ཨུ་པོ་ས་ཐ་སྶ ཨེ་ཏཱ་ནི, པུ་བྦ་ཀ་ར་ཎ་ནྟི ཝུ་ཙྩ་ཏི.
‘‘ཚ་ནྡ་པཱ་རི་སུ་དྡྷི་ཨུ་ཏུ་ཀྑཱ་ནཾ, བྷི་ཀྑུ་ག་ཎ་ནཱ ཙ ཨོ་ཝཱ་དོ;
ཨུ་པོ་ས་ཐ་སྶ ཨེ་ཏཱ་ནི, པུ་བྦ་ཀི་ཙྩ་ནྟི ཝུ་ཙྩ་ཏཱི’’ཏི. –
ཨེ་ཝཾ པུ་བྦ་ཀ་ར་ཎཱ་དི་ཀཾ ན་ཝ་དྷཱ དཱི་པི་ཏཾ ས་བྦཾ ཨུ་པོ་ས་ཐ་པྤ་ཝཱ་ར་ཎཾ པི་ཡ་སཱི་ལི་ནཱ ཀཱ་ཏ་བྦ་ནྟི ཨ་ཏྠོ.
༡༡༢. ཡ་ཐཱ་ཀྐ་མནྟི ཨེ་ཏྠཱ་ཡ་མ་དྷི་པྤཱ་ཡོ – ག་ཎོ པཱ་རི་སུ་དྡྷི་ཨུ་པོ་ས་ཐཾ ཀ་རེ་ཡྻ, པུ་གྒ་ལོ ཨ་དྷི་ཊྛཱ་ན་ཨུ་པོ་ས་ཐཾ ཀ་རེ་ཡྻ, ས་ངྒྷོ སུ་ཏྟུ་དྡེ་ས་ཨུ་པོ་ས་ཐཾ ཀ་རེ་ཡྻཱ་ཏི.
༡༡༣. ཙཱ་ཏུ་དྡ་སོ པ་ནྣ་ར་སོ, སཱ་མ་གྒཱི དི་ན་ཏོ ཏི་དྷཱཏི ཙཱ་ཏུ་དྡ་སོ ཨུ་པོ་ས་ཐོ, པ་ནྣ་ར་སོ ཨུ་པོ་ས་ཐོ, སཱ་མ་གྒཱི་ཨུ་པོ་ས་ཐོ་ཏི དི་ན་ཏོ ཏི་དྷཱ ཧོ་ནྟི. དི་ན་ཏོ པུ་གྒ་ལ་ཏོ ཀ་ཏྟ་བྦཱ་ཀཱ་ར་ཏོ ཏེ ཨུ་པོ་ས་ཐཱ ན་ཝ ཨི་ཏི ཨཱི་རི་ཏཱ་ཏི ཨ་ཏྠོ.
༡༡༤. ཏེ་ཝཱ་ཙཱི དྭེ་ཀ་ཝཱ་ཙཱིཏི ཏེ་ཝཱ་ཙི་ཀཱ པ་ཝཱ་ར་ཎཱ, དྭེ་ཝཱ་ཙི་ཀཱ པ་ཝཱ་ར་ཎཱ, ཨེ་ཀ་ཝཱ་ཙི་ཀཱ པ་ཝཱ་ར་ཎཱ ཨི་ཏི ན་ཝ པ་ཝཱ་ར་ཎཱ ཝུ་ཏྟཱ.
༡༡༥. ཏ་སྶཱ་ཏི ཕ་གྒུ་ན་མཱ་ས་སྶ. ཏ་ཏོ སེ་སནྟི ཨཱ་སཱ་ལ༹ྷི་ཨ་ནྟི་མ་པ་ཀྑ་མྷཱ ཡཱ་ཝ ཀ་ཏྟི་ཀ་པུ་ཎྞ་མཱ ཝ་སྶ་ཀཱ་ལ་ནྟི ཨ་ཏྠོ. ཨེ་ཏྠ ཧི ཨེ་ཀ་སྨིཾ སཾ་ཝ་ཙྪ་རེ ཙ་ཏུ་ཝཱི་ས་ཏི་ཨུ་པོ་ས་ཐཱ ཧོ་ནྟི.
༡༡༦. ཨེ་ཏེ་སཱུཏི ཨེ་ཏེ་སུ ཏཱི་སུ ཙ་ཏཱུ་སུ ཨེ་ཀེ་ཀ་སྨིཾ ཨུ་ཏུ་མྷི ཏ་ཏི་ཡ་པ་ཀྑཱ ས་ཏྟ་མ་པ་ཀྑཱ. ཙཱ་ཏུ་དྡ་སཱཏི ཚ ཙཱ་ཏུ་དྡ་སཱ་ཏི ཨ་ཏྠོ. སེ་སཱ་ནི ཨུ་ཏྟཱ་ན་ཏྠཱ་ནེ་ཝཱ་ཏི.
ཝ་ཏྟཱ་དི་ཀ་ཎྜ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
ནི་ག་མ་ན་ཀ་ཐཱ
ཨེ་ཏྟཱ་ཝ་ཏཱ ས་མཱ་ར་དྡྷཱ, མཱུ་ལ་སི་ཀྑ་ཏྠ་ཝ་ཎྞ་ནཱ;
ནི་ཊྛི་ཏཱ ཡཱ ས་མཱ་སེ་ན, ཨ་ཌྜྷ་མཱ་ས་སྶ ཨ་ཙྩ་ཡེ.
ཨ་དྷུ་ནཱུ་པ་ས་མྤ་ནྣཱ་ནཾ, ཧི་ཏ་ཏྠཱ་ཡ ས་མཱ་ས་ཏོ;
ཨི་མཾ ཨ་ཏྠཾ ཝ་ཎྞ་ཡ་ཏཱ, ཡཾ པུ་ཉྙཾ་དྷི་ག་ཏཾ མ་ཡཱ.
ཏེ་ན པུ་ཉྙེ་ན་ཡཾ ལོ་ཀོ, སུ་ཁཱ་ཡ པ་ཊི་པ་ཏྟི་ཡཱ;
པཱ་པུ་ཎཱ་ཏུ ཝི་སུ་དྡྷཱ་ཡ, ནི་བྦཱ་ནཾ ཨ་ཛ་རཾ པ་དཾ.
ནཱ་ནཱ་ཏ་རུ་ག་ཎཱ་ཀི་ཎྞེ, ནཱ་ནཱ་ཀུ་ས་ལ་ཀཱ་མི་ནོ;
ར་མྨེ ཡུ་དྡྷཱ་ན་པ་ཏི་ནོ, ཝི་ཧཱ་རེ ཝ་ས་ཏཱ ས་ཏཱ.
སཱ་ས་ནེ སི་དྡྷི་པ་ཏྟ་སྶ, སི་དྡྷི་ནཱ ཉཱ་ཎ་སི་དྡྷི་ནཱ;
པ་ཎྜི་ཏེ་ན ཀ་ཏཱ ཨེ་སཱ, མཱུ་ལ་སི་ཀྑ་ཏྠ་ཝ་ཎྞ་ནཱ.
མཱུ་ལ་སི་ཀྑཱ-ཊཱི་ཀཱ ས་མ་ཏྟཱ.