༤༡. པ་ཀི་ཎྞ་ཀ་ནི་དྡེ་ས་ཝ་ཎྞ་ནཱ
༣༣༥. ས་དྭཱ་ར་བ་ནྡྷ་ནེ སོ་དུ་ཀྑ་ལ་ཀ་པཱ་ས་ཀེ ཋཱ་ནེ དི་ཝཱ ས་ཡ་ནྟེ་ན པ་རི་ཝ་ཏྟ་ཀཾ དྭཱ་རཾ བ་ནྡྷེ་ཡྻཱ་ཏི ས་མྦ་ནྡྷོ. དྭཱ་ར་ཉྩ དྭཱ་ར་བ་ནྡྷ་ན་ཉྩ དྭཱ་ར་བ་ནྡྷ་ནཱ་ནི མ་ཛ྄ཛྷེ་པ་ད་ལོ་པ་ཝ་སེ་ན, བ་ནྡྷ་ན-ས་དྡེ་ནེ་ཝ ཝཱ དྭཱ་ར་བཱ་ཧཱ ཝུ་ཙྩ་ནྟི, ས་ཧ དྭཱ་ར་བ་ནྡྷ་ནེ་ཧཱི་ཏི ས་དྭཱ་ར་བ་ནྡྷ་ནཾ, ཋཱ་ནཾ. ཧེ་ཊྛཱ ཨུ་དུ་ཀྑ་ལ་ཀ་ཉྩ ཨུ་པ་རི པཱ་ས་ཀོ ཙ, ས་ཧ ཨུ་དུ་ཀྑ་ལ་པཱ་ས་ཀེ་ཧཱི་ཏི ས་མཱ་སོ. ཏཱ་དི་སེ ཋཱ་ནེ པཱ་ཀཱ་རཱ་དི་པ་རི་ཀྑེ་པེ་ན བྷ་ཝི་ཏ་བྦ་ནྟི པ་རི་ཀྑི་ཏྟེ་ཏི ཝི་ཉྙཱ་ཡ་ཏི. སོ ཙ ཨུ་ཙྩ་ཏོ ས་ཧ་སེ་ཡྻ་པྤ་ཧོ་ན་ཀེ ཝུ་ཏྟ་ན་ཡོ་ཏི ཝ་ད་ནྟི. ས་ཡ་ནྟེ་ནཱཏི པཱ་དེ བྷཱུ་མི་ཏོ མོ་ཙེ་ཏྭཱ ནི་པ་ཛྫ་ནྟེ་ན. པ་རི་ཝ་ཏྟ་ཀནྟི སཾ་ཝ་ར་ཎ་ཝི་ཝ་ར་ཎ་ཝ་སེ་ན ཨི་ཏོ ཙི་ཏོ ཙ པ་རི་ཝ་ཏྟ་ན་ཡོ་གྒཾ. དྭཱ་རནྟི ཨ་ནྟ་མ་སོ དུ་སྶ་སཱ་ཎི་དྭཱ་ར་མྤི. བ་ནྡྷེ་ཡྻཱཏི ས་བྦ་ནྟི་མེ་ན ཝི་དྷི་ནཱ ཡཱ་ཝ་ཏཱ སཱི་སཾ ན པ་ཝི་ས་ཏི, ཏཱ་ཝ་ཏཱ་པི བ་ནྡྷེ་ཡྻ, སཾ་ཝ་རེ་ཡྻཱ་ཏི ཝུ་ཏྟཾ ཧོ་ཏི.
༣༣༦. ཨཱ་བྷོ་གོ ཙཱ་པཱིཏི ‘‘ཨེ་ས ཛ་གྒི་སྶ་ཏཱི’’ཏི ཨཱ་བྷོ་གོ ཙཱ་པི. ཙ-ས་དྡེ་ན ‘‘དྭཱ་རཾ ཛ་གྒཱ་ཧཱི’’ཏི ཝ་ཙ་ན་མྤི ས་མུ་ཙྩི་ནོ་ཏི. ས་ཝ་སེ ཏཾ ཨཱ་ཀཱ་རཾ ཝི་ནཱཏི ས་སྶ ཨ་ཏྟ་ནོ ཝ་སེ ཨཱ་ཡ་ཏྟེ ཋཱ་ནེ, ཡ་ཏྠ པ་ན བ་ཧཱུ་ནཾ ས་ཉྩ་ར་ཎ་ཏྟཱ དྭཱ་རཾ སཾ་ཝུ་ཏ་མྤི སཾ་ཝུ་ཏ་ཊྛཱ་ནེ ན ཏི་ཊྛ་ཏི, དྭཱ་རཾ ཨ་ལ་བྷ་ནྟཱ པཱ་ཀཱ་རཾ ཨ་བྷི་རུ་ཧི་ཏྭཱ་པི ཝི་ཙ་ར་ནྟི, ཏཱ་དི་སེ པ་རི་ཝེ་ཎེ སཾ་ཝ་ར་ཎ་ཀི་ཙྩཾ ན་ཏྠི. ཨ་ཐ ཝཱ ས་སྶ ཝ་སོ ཨཱ་ཡ་ཏྟོ, ན ཡ་ཀྑཱ་དཱི་ནཾ ཏེ་ཧི ག་ཧི་ཏ་ཀ་ཏྟ་སྶ, བ་ནྡྷི་ཏྭཱ ནི་པ་ཛྫཱ་པི་ཏ་ཏྟ་སྶ ཙ ཨ་བྷཱ་ཝེ་ནཱ་ཏི ས་ཝ་སོ. ཏ་སྨིཾ ས་ཏི པུ་བྦེ ཝུ་ཏྟ་དྭཱ་རཾ སཾ་ཝ་ར་ཎ་ཨཱ་བྷོ་ག་ཀ་ར་ཎ་ཝ་ཙ་ན་ས་ངྑཱ་ཏཾ ཨཱ་ཀཱ་ར་ནྟི ཨ་ཏྠོ.
༣༣༧. ར་ཏ་ནཱ་ནཱིཏི མུ་ཏྟཱ་དཱི་ནི ད་ས་ཝི་དྷཱ་ནི. ཏ་ཏྠ པ་ན ཛཱ་ཏི་ཕ་ལི་ཀཾ ཨུ་པཱ་དཱ་ཡ ས་བྦོ་པི མ་ཎི ཝེ་ལུ༹་རི་ཡོ་པི ལོ་ཧི་ཏ་ངྐོ མ་སཱ་ར་ག་ལློ ཙ དྷོ་ཏཱ་པི ཨ་དྷོ་ཏ་ཝི་དྡྷཱ་པི ཨ་ནཱ་མཱ་སཱ, ཀཱ་ཙ་མ་ཎི ཙ པཱ་ནཱི་ཡ་ས་ངྑོ དྷོ་ཏོ ཨ་དྷོ་ཏོ་པི ཨཱ་མཱ་སཱ, སི་ལཱ དྷོ་ཏ་ཝི་དྡྷཱ སུ་ཝ་ཎྞེ་ན ས་དྡྷིཾ པ་ཙི་ཏཱ མུ་གྒ་ཝ་ཎྞཱ ཙ ཨ་ནཱ་མཱ་སཱ. ཙེ་ཏི་ཡ་གྷ་ར་གོ་པ་ཀཱ་ནཾ སུ་ཝ་ཎྞ་ཙེ་ཏི་ཡེ ཀ་ཙ་ཝ་ར་མེ་ཝ ཧ་རི་ཏུཾ ཝ་ཊྚ་ཏི. ཨཱ་ར་ཀཱུ་ཊ་ལོ་ཧ་མྤི ཛཱ་ཏ་རཱུ་པ་ག་ཏི་ཀ་མེ་ཝ. ཨི་ཏྠི་རཱུ་པཱ་ནཱིཏི ཨ་ནྟ་མ་སོ པི་ཊྛ་མ་ཡ་ཨི་ཏྠི་རཱུ་པཱ་ནི་པི. དྷ་ཉྙནྟི ཨ་ནྟ་མ་སོ ཏ་ཏྠ་ཛཱ་ཏ་ཀ་མྤི མ་གྒེ པ་སཱ་རི་ཏ་མྤི ས་ཏྟ་ཝི་དྷཾ དྷ་ཉྙཾ. ཀཱི་ལཱ༹་ཝ་སེ་ན ཨ་པ་ར་ཎྞཱ་ནི ཏཱ་ལ་ཕ་ལཱ་དཱི་ནི་པི ཨ་ནཱ་མཱ་སཱ་ནི, པ་སཱ་རི་ཏ་མྤི ན མ་དྡ་ནྟེ་ན ག་ནྟ་བྦཾ, ཨ་ས་ཏི མ་གྒེ མ་གྒཾ ཨ་དྷི་ཊྛཱ་ཡ ག་ནྟ་བྦཾ. ཨི་ཏྠི་པ་སཱ་དྷ་ནནྟི ཨ་ནྟ་མ་སོ པི་ལ༹་ནྡྷ་ན་ཏྠཱ་ཡ ཋ་པི་ཏཾ ནི་ཝཱ་ས་ན་ཏཱ་ལ་པ་ཎྞ་མུ་དྡི་ཀ་མྤི.
༣༣༨. སི་ཏྠ་ཏེ་ལོ་ད་ཏེ་ལེ་ཧཱིཏི མ་དྷུ་སི་ཏྠ་ཀ་ནི་ཡྻཱ་སཱ་དཱི་སུ ཡེ་ན ཀེ་ན་ཙི ཏེ་ལ་མི་སྶ་ཀ་སི་ལེ་སེ་ན ཙ ཨུ་ད་ཀ་མི་སྶ་ཀ་ཏེ་ལེ་ན ཙ. ཕ་ཎ་ཧ་ཏྠ་ཕ་ཎེ་ཧཱིཏི ཕ་ཎ་མི་ཝ ཕ་ཎཾ, ཨ་ངྒུ་ལཱི་ཧི ཕ་ཎ་ཀི་ཙྩ་ཀ་ར་ཎེ་ན ཧ་ཏྠོ་ཡེ་ཝ ཕ་ཎཾ ཧ་ཏྠ་ཕ་ཎཾ, ད་ནྟ་མ་ཡཱ་དི ཡཾ ཀི་ཉྩི ཕ་ཎ་ཉྩེ་ཝ ཧ་ཏྠ་ཕ་ཎ་ཉྩཱ་ཏི དྭ་ནྡོ. ཨོ་ས་ཎྛེ་ཡྻཱཏི ཨོ་ལི་ཁི་ཏྭཱ ས་ནྣི་སཱི་དཱ་པེ་ཡྻ.
༣༣༩. ཨེ་ཀ་པཱ་ཝུ་ར་ཎཱ ཝཱ ཨེ་ཀ་ཏྠ་ར་ཎཱ ཝཱ ན ཏུ་ཝ་ཊྚ་ཡུཾ, ཨེ་ཀ་མ་ཉྩེ ན ཏུ་ཝ་ཊྚ་ཡུ་ནྟི ཡོ་ཛ་ནཱ. ཨེ་ཀཾ པཱ་ཝུ་ར་ཎཾ ཨེ་ཀཾ ཨ་ཏྠ་ར་ཎཾ ཨེ་ཏེ་ས་ནྟི ཝི་གྒ་ཧོ. ན ཏུ་ཝ་ཊྚ་ཡུནྟི ན ནི་པ་ཛྫེ་ཡྻུཾ. ཨེ་ཀ་སྨིཾ བྷཱ་ཛ་ནེ ཝཱ་པི ན བྷུ་ཉྫེ་ཡྻུ་ནྟི ཡོ་ཛེ་ཏ་བྦཾ.
༣༤༠. མ་ནུ་སྶཱ་ནཾ པ་མཱ་ཎ་ངྒུ་ལེ་ན ཨ་ཊྛ ཨ་ངྒུ་ལཱ་ནི ཡ་སྶ, ཨ་དྷི་ཀེ་ན ས་ཧི་ཏཾ ཨ་ཊྛ་ངྒུ་ལ་ནྟི ས་མཱ་སོ. ལ་སུ་ཎཾ མ་ག་དྷེ་སུ ཛཱ་ཏཾ ཨཱ་མ་ལ་ཀ་བྷ་ཎྜི་ཀཾ ལ་སུ་ཎཾ ན ཁཱ་དེ་ཡྻཱ་ཏི ས་མྦ་ནྡྷོ. ན ཨ་ཀ་ལླ་ཀོཏི ཨ་གི་ལཱ་ནོ.
༣༤༡. ཧཱི་ནུ་ཀྐ་ཊྛེ་ཧི ཛཱ་ཏི་ཨཱ་དཱི་ཧི ཨུ་ཀྐ་ཊྛཾ ཝཱ ཧཱི་ནཾ ཝཱ ཨུ་ཛུཾ ཝཱ ཨ་ཉྙཱ་པ་དེ་སེ་ན ཝཱ ད་ཝཱ ཝ་དེ, དུ་བྦྷཱ་སི་ཏ་ནྟི ས་མྦ་ནྡྷོ. ཛཱ་ཏི་ཨཱ་དཱི་ཧཱིཏི ཛཱ་ཏི་ནཱ་མ་གོ་ཏྟ་ཀ་མྨ་སི་པྤ་ཨཱ་བཱ་དྷ་ལི་ངྒ་ཀི་ལེ་ས་ཨཱ་པ་ཏྟི་ཨ་ཀྐོ་སེ་ཧི. ཨུ་ཀྐ་ཊྛནྟི ཛཱ་ཏྱཱ་དཱི་ཧི་ཡེ་ཝ ཨུ་ཀྐ་ཊྛཾ ཨུ་པ་ས་མྤ་ནྣཾ ཨ་ནུ་པ་ས་མྤ་ནྣཾ ཝཱ. ད་ཝཱཏི ཀེ་ལི༹་ཧ་སཱ་དྷི་པྤཱ་ཡ་ཏཱ་ཡ. ཨུ་ཛུཾ ཝཱཏི ‘‘ཙ་ཎྜཱ་ལོ་སཱི’’ཏི་ཨཱ་དི་ནཱ ན་ཡེ་ན. ཨ་ཉྙཱ་པ་དེ་སེ་ན ཝཱཏི ‘‘ས་ནྟི ཨི་དྷེ་ཀ་ཙྩེ ཙ་ཎྜཱ་ལཱ’’ཏི་ཨཱ་དི་ནཱ ན་ཡེ་ན.
༣༤༢. དཱི་གྷེ ན་ཁེཏི མཾ་ས་པྤ་མཱ་ཎ་ཏོ. དཱི་གྷེ ཀེ་སེཏི དྭ་ངྒུ་ལ་ཏོ. ས་ཙེ་པི ན དཱི་གྷཱ, དུ་མཱ་ས་ཏོ ཨེ་ཀ་དི་ཝ་ས་མྤི ཨ་ཏི་ཀྐཱ་མེ་ཏུཾ ན ལ་བྷ་ཏི. དཱི་གྷེ ནཱ་ས་ལོ་མེཏི ནཱ་ས་ཏོ བ་ཧི ནི་ཀྑ་ནྟེ. ཝཱི་ས་ཏི་མ་ཊྛནྟི ཝཱི་ས་ཏི་ཡཱ ན་ཁཱ་ནཾ མ་ཊྛ་ཉྩ. ས་མྦཱ་དྷེཏི ཨུ་བྷོ་སུ ཨུ་པ་ཀ་ཙྪ་ཀེ་སུ, མུ་ཏྟ་ཀ་ར་ཎེ ཙ ལོ་མ་ཧཱ་ར་ཎ་ཉྩ ན ལ་བྦྷཱ་ཏི ས་མྦ་ནྡྷ་ནཱི་ཡཾ. ན ལ་བྦྷཱཏི ཨེ་ཏེ མ་ཊྛཱ་ད་ཡོ ན ལ་བྦྷ་ནྟཱི་ཏི ཨ་ཏྠོ, ནི་པཱ་ཏོ ཝཱ ལ་བྦྷཱཏི. ཨཱ་བཱ་དྷ་པྤ་ཙྩ་ཡཱ པ་ན ས་མྦཱ་དྷེ ལོ་མཾ སཾ་ཧ་རི་ཏུཾ ཝ་ཊྚ་ཏི.
༣༤༣. ས་ངྒྷུ་དྡི་ཊྛཾ ཝཱ ས་ངྒྷི་ཀཾ ཝཱ ས་ཡ་ནཱ་ས་ནཾ ཡ་ཐཱ་ཝུ་ཌྜྷཾ ན བཱ་དྷེ་ཡྻཱ་ཏི ཡོ་ཛ་ནཱ. ས་ངྒྷ་སྶ ཨུ་དྡི་ཊྛཾ ས་ངྒྷུ་དྡི་ཊྛཾ, ས་ངྒྷཾ ཨུ་དྡི་སྶ ཀ་ཏ་ནྟི ཨ་དྷི་པྤཱ་ཡོ. ཡོ ཡོ ཝུ་ཌྜྷོ ཡ་ཐཱ་ཝུ་ཌྜྷཾ, ཝུ་ཌྜྷ་པྤ་ཊི་པཱ་ཊི་ཡཱ་ཏི ཨ་ཏྠོ. ན བཱ་དྷེ་ཡྻཱཏི ན པ་ཊི་བཱ་ཧེ་ཡྻ. ཨ་ལླ་པཱ་དཱ ནཱ་མ ཡེ་ཧི ཨ་ཀྐ་ནྟ་ཊྛཱ་ནེ ཨུ་ད་ཀཾ པ་ཉྙཱ་ཡ་ཏི. ས་ཡ་ནཱ་ས་ནནྟི མ་ཉྩ་པཱི་ཋཱ་དི, ཨི་མི་ནཱ པ་རི་བྷ་ཎྜ་ཀ་ཏཱ བྷཱུ་མཱི་ཏི་པི ཨུ་པ་ལ་ཀྑི་ཏཱ. སུ་དྷོ་ཏ་པཱ་ད་ཀཾ ཝཱ་པི ས་ཨུ་པཱ་ཧ་ནོ ཏ་ཐེ་ཝཱ་ཏི ས་མྦ་ནྡྷོ. སུ་དྷོ་ཏ་པཱ་ད་ཀནྟི དྷོ་ཏ་པཱ་དེ་ཧེ་ཝ ཨ་ཀྐ་མི་ཏ་བྦ་ཊྛཱ་ནཾ. དྷོ་ཏཱ པཱ་དཱ ཡ་སྶ ཨ་ཀྐ་མ་ན་སྶཱ་ཏི ཀི་རི་ཡཱ་ཝི་སེ་ས་ན་ས་མཱ་སོ. ཡ་དི པ་ན ཏ་ཏྠ ནེ་ཝཱ་སི་ཀཱ ཨ་དྷོ་ཏ་པཱ་དེ་ཧི་པི ཝ་ལ༹་ཉྫེ་ནྟི, ཏ་ཐེ་ཝ ཝ་ལ༹་ཉྫེ་ཏུཾ ཝ་ཊྚ་ཏི. ཏ་ཐེ་ཝཱཏི པ་རི་བྷ་ཎྜ་ཀ་ཏཾ བྷཱུ་མིཾ སེ་ནཱ་ས་ནཾ ཝཱ ན་ཀྐ་མེ་ཏི ཨ་ཏྠོ.
༣༤༤. ས་ངྒྷཱ་ཊི་ཡཱཏི ཨ་དྷི་ཊྛི་ཏ་ས་ངྒྷཱ་ཊི་ཡཱ. པཱ་དེ པ་རི་གྒ་ཧེ་ཏྭཱ ཨཱ་ས་ནཾ པ་ལླ་ཏྠོ, པ་ལླ་ཏྠཾ ཀ་རོ་ཏཱི་ཏི པ་ལླ་ཏྠཱ་ཏི་དྷཱ་ཏུ་སྶ པ་ལླ་ཏྠེ་ཏི རཱུ་པཾ. ཝི་ཧཱ་རེ་པི ཨ་ནྟ་ར་གྷ་རེ་པི པ་ལླ་ཏྠི་ཀཱ་ཡ ན ནི་སཱི་དེ་ཡྻཱ་ཏི ཨ་དྷི་པྤཱ་ཡོ, པ་རི་ཀ་མྨ་ཀ་ཏཾ བྷི་ཏྟཱ་དི་ནྟི ཡོ་ཛ་ནཱ. པ་རི་ཀ་མྨ་ཀ་ཏནྟི སེ་ཏ་ཝ་ཎྞེ་ན ཝཱ ཙི་ཏྟ་ཀ་མྨེ་ན ཝཱ ཀ་ཏ་པ་རི་ཀ་མྨཾ. ཨཱ་དི-ས་དྡོ དྭཱ་ར་ཝཱ་ཏ་པཱ་ནཱ་དིཾ ས་ངྒ་ཎྷཱ་ཏི. ན ཨ་པ་སྶ་ཡེཏི ཙཱི་ཝ་རཱ་དི་ནཱ ཨ་པྤ་ཊི་ཙྪཱ་དེ་ཏྭཱ ཨ་པ་སྶ་ཡ་ནཾ ན ཀ་རེ་ཡྻ. ནོ ན ཨཱ་ཙ་མེཏི ནེ་ཝ ན ཨཱ་ཙ་མེ, ཨཱ་ཙ་མེ་ཡྻཱ་ཏི ཨ་ཏྠོ. དྭེ པ་ཊི་སེ་དྷཱ པ་ཀ་ཏི་ཡ་ཏྠཾ ག་མེ་ནྟཱི་ཏི. ས་ནྟེཏི ཨི་མི་ནཱ ཨུ་ད་ཀེ ཨ་ས་ནྟེ ཨ་ནཱ་པ་ཏྟཱི་ཏི དཱི་པེ་ཏི.
༣༤༥. ཨ་ཀ་པྤི་ཡ་ས་མཱ་དཱ་ནེཏི བྷི་ཀྑཱུ་ནཾ སཱ་མ་ཎེ་རཱ་ནཾ ཨ་ཀ་པྤི་ཡེ ས་མཱ་དཱ་ནེ. ད་ཝཱཏི ནི་པཱ་ཏོ, ཀཱི་ལཱ༹་དྷི་པྤཱ་ཡེ་ནཱ་ཏི ཨ་ཏྠོ. སི་ལཱ་པ་ཝི་ཛ྄ཛྷ་ནེཏི ཨ་ནྟ་མ་སོ ཧ་ཏྠ་ཡ་ནྟེ་ན་པི ས་ཀྑ་རི་ཀཱ་ཡ་པི ཁི་པ་ནེ. ས་བྷཱ་གཱ་ཡ དེ་ས་ནཱ་ཡ ཨཱ་ཝི་ཀ་མྨེ ཙ དུ་ཀྐ་ཊ་ནྟི ཡོ་ཛེ་ཏ་བྦཾ. ས་བྷཱ་གཱ་ཡཱཏི ཝ་ཏྠུ་ཝ་སེ་ན ས་མཱ་ནོ བྷཱ་གོ ཨེ་ཏི་སྶཱ ཨཱ་པ་ཏྟི་ཡཱ་ཏི ཝི་གྒ་ཧོ. ཙ-ས་དྡོ ཏཱ་དི་སི་ཡཱ པ་ཊི་གྒ་ཧ་ཎ་མ་ཏྟཾ ས་མུ་ཙྩི་ནོ་ཏི.
༣༤༦. པ་ཊི་སྶ་ཝོ ནཱ་མ ‘‘ཨུ་བྷོ་པི མ་ཡཾ ཨི་དྷ ཝ་སྶཾ ཝ་སི་སྶཱ་མ, ཨེ་ཀ་ཏོ ཨུ་དྡི་སཱ་པེ་མཱ’’ཏི་ཨཱ་དི་པ་ཊི་ཛཱ་ན་ནཾ, ཏ་སྶ ཝི་སཾ་ཝཱ་དོ པ་ཙྪཱ ཨ་ཀ་ར་ཎཾ པ་ཊི་སྶ་ཝ་ཝི་སཾ་ཝཱ་དོ, ཏ་སྨིཾ, ནི་མི་ཏྟ་ཏྠེ བྷུ་མྨཾ. སུ་དྡྷ་ཙི་ཏྟ་སྶཱཏི ཀ་ཐ་ན་ས་མ་ཡེ ‘‘ཀ་རི་སྶཱ་མཱི’’ཏི ཨེ་ཝཾ པ་ཝ་ཏྟ་ཙི་ཏྟ་སྶ. ཨི་ཏ་ར་སྶཱཏི ཨ་ཉྙ་སྶ ཨ་སུ་དྡྷ་ཙི་ཏྟ་སྶ.
༣༤༧. ཀི་ཙྩེཏི སུ་ཀྑ་ཀ་ཊྛཱ་དི་གྒ་ཧ་ཎ་ཀི་ཙྩེ ས་ཏི ཨེ་ཝ པོ་རི་སཾ པུ་རི་ས་པྤ་མཱ་ཎཾ ཨ་བྷི་རུ་ཧེ་ཡྻཱ་ཏི ས་མྦ་ནྡྷོ. ཨཱ་པ་དཱ་སཱུཏི ཝཱ་ལ༹་མི་ག་ད་སྶ་ནཱ་དཱི་སུ.
༣༤༨. པ་རི་སྶཱ་ཝ་ནཾ ཝི་ནཱ་ཏི ས་མྦ་ནྡྷོ. ཨ་དྡྷཱ་ནནྟི ཧེ་ཊྛི་མ་ནྟེ་ན ཨ་དྡྷ་ཡོ་ཛ་ན་ས་ངྑཱ་ཏཾ ཨ་དྡྷཱ་ནཾ. ས་ཙེ ན ཧོ་ཏི པ་རི་སྶཱ་ཝ་ནཾ ཝཱ དྷ་མྨ་ཀ་ར་ཎོ ཝཱ, ས་ངྒྷཱ་ཊི་ཀ་ཎྞོ་པི ཨ་དྷི་ཊྛཱ་ཏ་བྦོ. ཡཱ་ཙ་མཱ་ན་སྶཱཏི པ་རི་སྶཱ་ཝ་ནཾ ཡཱ་ཙ་ནྟ་སྶ.
༣༤༩. ཨཱ་བཱ་དྷ་པྤ་ཙྩ་ཡཱ ཨ་ཉྙ་ཏྲ སེ་ས་ངྒེ ཙ ཨ་ཏྟ་གྷཱ་ཏ་ནེ ཙ དུ་ཀྐ་ཊ་ནྟི ཡོ་ཛ་ནཱ. སེ་ས་ངྒེཏི ཨ་ངྒ་ཛཱ་ཏ་ཏོ ཀ་ཎྞ་ནཱ་སཱ་དི་ཨ་ཝ་སེ་སེ ཨ་ཝ་ཡ་ཝ་ཙྪེ་ད་ནེ. ཨ་ཏྟ་གྷཱ་ཏ་ནེཏི ཨཱ་ཧཱ་རུ་པ་ཙྪེ་དཱ་དི་ནཱ ཨ་ཏྟ་ནོ མཱ་ར་ཎེ.
༣༥༠. ཏཱུ་ལི་ཀཱ་ཡ ཀ་ཡི་ར་མཱ་ནཾ ཨི་ཏྠི་པུ་རི་སཱ་དི་ཀཾ ཙི་ཏྟ་ཉྩ པོ་ཏྠ་ཀ་ཉྩ ཀ་ཊྛཱ་དཱི་སུ ཀ་ཡི་ར་མཱ་ནཾ ཙི་ཏྟ་པོ་ཏྠ་ཀཱ་ནི, ཏཱ་ནི་ཡེ་ཝ རཱུ་པཱ་ནཱི་ཏི ས་མཱ་སོ. ཛཱ་ཏ་ཀཱ་དཱི་ནི པ་ན པ་རེ་ཧི ཀཱ་རཱ་པེ་ཏུཾ ལ་བྦྷ་ནྟི. མཱ་ལཱ་ཀ་མྨཱ་དཱི་ནི ས་ཡ་མྤི ཀཱ་ཏུཾ ལ་བྦྷ་ནྟི. ཨཱ་རཱ་མཱ་ར་ཉྙ་གེ་ཧེ་སུ བྷུ་ཉྫ་ནྟཾ ན ཨུ་ཊྛཱ་པེ་ཡྻཱ་ཏི ཡོ་ཛེ་ཏ་བྦཾ. ཝི་ཧཱ་ར་ས་ངྑཱ་ཏོ ཨཱ་རཱ་མོ ཙ ཨ་ར་ཉྙ་ཉྩ ཨ་ནྟ་ར་གྷ་ར་ས་ངྑཱ་ཏཾ གེ་ཧ་ཉྩཱ་ཏི དྭ་ནྡོ. ‘‘ཨཱ་རཱ་མ…པེ… གེ་ཧེ་སཱུ’’ཏི ཝ་ཏྟ་བྦེ ཨེ-ཀཱ་ར་སྶ ཨ-ཀཱ་ར་ཀ་ར་ཎེ་ན གཱ་ཐཱ་བ་ནྡྷ་ཝ་སེ་ན ཝུ་ཏྟཾ. ཨོ་ཀཱ་སེ ཀ་ཏེ པ་ན ‘‘པ་ཝི་ས་ཐཱ’’ཏི ཝུ་ཏྟེ ཙ པ་ཝི་སི་ཏ་བྦཾ ཨུ་པ་ནི་སཱི་དི་ཏ་བྦ་ཉྩ.
༣༥༡. པུ་མ་ཡུ་ཏྟཱ་ནི ཡཱ་ནཱ་ནི ཙ སི་ཝི་ཀ་ཉྩ ཧ་ཏྠ་ཝ་ཊྚ་ཀ་ཉྩ པཱ་ཊ་ངྐི་ཉྩ ཨ་བྷི་རུ་ཧི་ཏུཾ གི་ལཱ་ན་སྶ ཀ་པྤ་ཏེ་ཏི ས་མྦ་ནྡྷོ. པུ་མ་ཡུ་ཏྟཱ་ནཱིཏི ཨ་སྶ་ག་ཝཱ་དི་པུ་རི་ས་ཡུ་ཏྟཱ་ནི, ན དྷེ་ནུ་ཡུ་ཏྟཱ་ནི, སཱ་ར་ཐི པ་ན ཨི་ཏྠཱི ཝཱ ཧོ་ཏུ པུ་རི་སོ ཝཱ, ཝ་ཊྚ་ཏི. ཧ་ཏྠ་ཝ་ཊྚ་ཀེ་པི ཨེ་སེ་ཝ ན་ཡོ, ཡཱ་ནཱ་ནཱིཏི ར་ཐ་ས་ཀ་ཊཱ་དཱི་ནི, སི་ཝི་ཀནྟི པཱི་ཋ་ཀ་སི་ཝི་ཀཾ, པཱི་ཋ་ཀ་ཡཱ་ན་ནྟི ཨ་ཏྠོ. པཱ་ཊ་ངྐཱིཏི ཨ་ནྡོ་ལི་ཀཱ. གི་ལཱ་ན་སྶཱཏི ཨེ་ཏྠ གི་ལཱ་ནོ ནཱ་མ ན ཨ་པྤ་ཀེ་ན་པི སཱི་སཱ་བཱ་དྷཱ་དི་མ་ཏྟེ་ན ཝེ་དི་ཏ་བྦོ, ཡོ པ་ན ན ས་ཀྐོ་ཏི ཝི་ནཱ ཡཱ་ནེ་ན ག་ནྟུཾ, ཨེ་ཝ་རཱུ་པོ ཝེ་དི་ཏ་བྦོ. ཏ་ཐཱ ཧི ཡཱ་ནཾ ཨ་ནུ་ཛཱ་ན་ནྟེ་ན བྷ་ག་ཝ་ཏཱ ཀོ་ས་ལེ་སུ ཛ་ན་པ་དེ་སུ བྷ་ག་ཝ་ནྟཾ ད་སྶ་ནཱ་ཡ སཱ་ཝ་ཏྠིཾ ག་ཙྪ་ནྟཾ ཨ་ཉྙ་ཏ་རཾ གི་ལཱ་ནཾ བྷི་ཀྑུཾ ག་ནྟུ་མ་ས་ཀྐུ་ཎེ་ཡྻ་ཏཱ་ཡ ཨ་ཉྙ་ཏ་ར་སྨིཾ རུ་ཀྑ་མཱུ་ལེ ནི་སི་ནྣཾ དི་སྭཱ མ་ནུ་སྶེ་ཧི ཏཾ པ་ཝ་ཏྟིཾ ཉ་ཏྭཱ ‘‘ཨེ་ཧི, བྷ་ནྟེ, ག་མི་སྶཱ་མཱ’’ཏི ཝུ་ཏྟེ ‘‘ནཱ་ཧཾ, ཨཱ་ཝུ་སོ, ག་མི་སྶཱ་མི, གི་ལཱ་ནོ་མྷཱི’’ཏི ཝུ་ཏྟ་ཝ་ཏྠུ་སྨིཾ (མ་ཧཱ་ཝ. ༢༥༣) ཨ་ནུ་ཉྙཱ་ཏཾ, ཏ་ཐཱ ཝ་ད་ནྟོ ཙ སོ བྷི་ཀྑུ ག་མ་ནུ་པ་ཙྪེ་ད་སཱ་དྷ་ཀ་མེ་ཝ གེ་ལ་ཉྙཾ ས་ནྡྷཱ་ཡཱ་ཧཱ་ཏི ཝི་ཉྙཱ་ཡ་ཏི ཨ་དྷི་པྤེ་ཏ་ཏྠ་ནི་པྥ་ཏྟི་ཡཱ ཨུ་པ་ཙྪི་ནྣ་ཏྟཱ, ཨ་པི་ཙ ཡཱ་ནེ་ན ཨེ་ཀ་པ་རི་ཙྪེ་དཱ་ཡ ཨུ་པཱ་ཧ་ནཱ་ཡ པ་རི་ཙྪེ་དཾ ཋ་པེ་ནྟེ་ན ཨ་ཊྛ་ཀ་ཐཱ་ཙ་རི་ཡེ་ན ‘‘གི་ལཱ་ནེ་ན བྷི་ཀྑུ་ནཱ ས་ཨུ་པཱ་ཧ་ནེ་ནཱ་ཏི ཨེ་ཏྠ གི་ལཱ་ནོ ནཱ་མ ཡོ ན ས་ཀྐོ་ཏི ཨ་ནུ་པཱ་ཧ་ནེ་ན གཱ་མཾ པ་ཝི་སི་ཏུ’’ནྟི ཨ་ཊྛ་ཀ་ཐཱ་ཡཾ (མ་ཧཱ་ཝ. ཨ་ཊྛ. ༢༥༦) ཝུ་ཏྟཾ, ཏ་སྨཱ ཡ་ཐཱ་ཝུ་ཏྟ་གི་ལཱ་ནོ་ཝ གི་ལཱ་ནོ་ཏི ནི་ཊྛ་མེ་ཏྠ ག་ནྟ་བྦཾ.
༣༥༢. ད་ཝཾ ཀ་ར་ཎེཏི ཀེ་ལི༹་ཡཱ ཀ་ར་ཎེ. ཨ་ཉྙ་སྶཱཏི ཨ་ནྟ་མ་སོ དུ་སྶཱི་ལ་སྶཱ་པི. ཨུ་པ་ལཱ་ལ༹་ནེཏི ‘‘པ་ཏྟཾ ད་སྶཱ་མི, ཙཱི་ཝ་རཾ ད་སྶཱ་མཱི’’ཏི་ཨཱ་དི་ནཱ.
༣༥༣. ཝི་ཝ་རི་ཏྭཱ ན ད་སྶ་ཡེ་ཏི ས་མྦ་ནྡྷ་ནཱི་ཡཾ. ཏཱ བྷི་ཀྑུ་ནི་ཡོ.
༣༥༤. ཨོ་ཝཱ་དནྟི བྷི་ཀྑུ་ནཱི་ཧི ཏེ་ར་སི་ཡཾ ཝཱ ཙཱ་ཏུ་དྡ་སི་ཡཾ ཝཱ ཨཱ་ག་ནྟྭཱ ཨུ་པོ་ས་ཐཾ པུ་ཙྪི་ཏྭཱ ‘‘ཙཱ་ཏུ་དྡ་སོ’’ཏི་ཨཱ་དི་ནཱ བྷི་ཀྑུ་ནཱ ཨཱ་ཙི་ཀྑི་ཏེ པུ་ན ཏཱ་ཧི ཨུ་པོ་ས་ཐ་དི་ཝ་སེ ས་མཱ་ག་ནྟྭཱ ཨོ་ཝཱ་དཱུ་པ་ས་ངྐ་མ་ན་ཡཱ་ཙ་ནཾ, ཏཾ པཱ་ཏི་མོ་ཀྑུ་དྡེ་ས་ཀ་སྶ ཨཱ་རོ་ཙེ་ཏྭཱ ཏེ་ན ཀ་ཏ་ས་ནྣི་ཊྛཱ་ནཾ ག་ཧེ་ཏྭཱ པཱ་ཊི་པ་དེ པ་ཙྩཱ་ཧ་རི་ཏ་བྦ་ནྟི ཨ་ཛཱ་ན་ན་ཀཾ བཱ་ལཉྩ ཏ་ཐཱ ཀཱ་ཏུཾ ཨ་ས་མ་ཏྠཾ གི་ལཱ་ནཉྩ པཱ་ཊི་པ་དེ ག་ནྟུ་ཀཱ་མཾ ག་མི་ཡཉྩ ཝ་ཛྫེ་ཏྭཱ ཨ་ཉྙ་སྶ ག་ཧ་ཎ་པ་ཙྩཱ་ཧ་ར་ཎཱ་ནི ཨ་ཀཱ་ཏུཾ ན ཝ་ཊྚ་ཏི. ཏེ་ན ཝུ་ཏྟཾ ‘‘ན ག་ཎྷ་ཏོ’’ཏི་ཨཱ་དི.
༣༥༥. ལོ་ཀཱ་ཡ་ཏནྟི ནི་ར་ཏྠ་ཀ་ཀཱ་ར་ཎ་པྤ་ཊི་སཾ་ཡུ་ཏྟཾ ཏི་ཏྠི་ཡ་ས་ཏྠཾ. ཏི་ར་ཙྪཱ་ན་ཝི་ཛྫཱ ཙ ཨི་མི་ནཱ་ཝ ཨུ་པ་ལ་ཀྑི་ཏཱ. ན ཝཱ་ཙེ་ཡྻཱཏི པ་རེ་སཾ ན ཝཱ་ཙེ་ཡྻ. ཨི་མི་ནཱ་ཝ ཨ་ཏྟ་ནོ པ་རི་ཡཱ་པུ་ཎ་ན་མྤི པ་ཊི་ཀྑི་ཏྟཾ ལོ་ཀཱ་ཡ་ཏ་ཏི་ར་ཙྪཱ་ན་ཝི་ཛྫཱ་ཏི ཙ རཱ་ག་དོ་ས་མོ་ཧ་ཝ་ཌྜྷཱ་ནི བུ་དྡྷཱ་དི་ག་ར་ཧི་ཏཱ ས་གྒ་མོ་ཀྑཱ་ནཾ ཏི་རོ ཏི་རི་ཡ་ཏོ ཨ་ཉྩི་ཏཱ ག་ཏཱ པ་ཝ་ཏྟཱ ཀ་བྦ་ནཱ་ཊ་ཀཱ་དི་ཀཱ ས་བྦཱ་པི ཝི་ཛྫཱ ཨ་ནུ་ལོ་མ་ཝ་སེ་ན ཝཱ ཝི་ན་ཡ་པ་རི་ཡཱ་ཡཾ པ་ཏྭཱ ག་རུ་ཀེ ཋཱ་ཏ་བྦ་ནྟི ཝི་ན་ཡ་ཡུ་ཏྟི་ཏོ་པི ས་ངྒ་ཧི་ཏཱ་ཏི ཝེ་དི་ཏ་བྦཱ. ཨེ་ཝ་ཉྩ ནོ ག་རཱུ་ན་མུ་པ་དེ་སོ. པེ་ལཱ༹་ཡ་པཱིཏི ཡ་ཏྠ པཱ་ཏིཾ ཋ་པེ་ཏྭཱ སུ་ཁི་ནོ བྷུ་ཉྫ་ནྟི, ཏ་མྦ་ལོ་ཧེ་ན ར་ཛ་ཏེ་ན ཝཱ ཀ་ཏཱ་ཡ ཏཱ་ཡ ཨཱ་སི་ཏྟ་ཀཱུ་པ་དྷཱ་ན་ས་ངྑཱ་ཏཱ་ཡ པེ་ལཱ༹་ཡ ཋ་པེ་ཏྭཱ.
༣༥༦. པཱ་རུ་ཏ་ཉྩ ནི་ཝཱ་ས་ན་ཉྩ, གི་ཧཱི་ནཾ ཧ་ཏྠི་སོ་ཎྜཱ་དི་ཝ་སེ་ན པཱ་རུ་ཏ་ནི་ཝཱ་ས་ནཾ ཡ་སྶ པཱ་རུ་པ་ན་སྶ ནི་ཝཱ་ས་ན་སྶཱ་ཏི ཀི་རི་ཡཱ་ཝི་སེ་ས་ན་ས་མཱ་སོ. གི་ཧི་པཱ་རུ་ཏ་ནི་ཝཱ་ས་ནཾ ན པཱ་རུ་པེ ན ནི་ཝཱ་སེ་ཡྻཱ་ཏི ས་མྦ་ནྡྷོ. སཾ་ཝེ་ལླི་ཡཾ ན ནི་ཝཱ་སེ་ཡྻཱཏི མ་ལླ་ཀ་མྨ་ཀ་རཱ་ད་ཡོ ཝི་ཡ ཀ་ཙྪཾ ཀ་ཏྭཱ ན ནི་ཝཱ་སེ་ཡྻ. ཨེ་ཝཾ ནི་ཝཱ་སེ་ཏུཾ གི་ལཱ་ན་སྶཱ་པི མ་གྒ་པྤ་ཊི་པ་ནྣ་སྶཱ་པི ན ཝ་ཊྚ་ཏི. ཡ་མྤི མ་གྒཾ ག་ཙྪ་ནྟཱ ཨེ་ཀཾ ཝཱ དྭེ ཝཱ ཀོ་ཎེ ཨུ་ཀྑི་པི་ཏྭཱ ཨ་ནྟ་ར་ཝཱ་ས་ཀ་སྶ ཨུ་པ་རི ལ་གྒ་ནྟི, ན ཝ་ཊྚ་ཏི. ཨེ་ཝཾ ཨ་པཱ་རུ་པི་ཏྭཱ ཨ་ནི་ཝཱ་སེ་ཏྭཱ ཙ ནི་བྦི་ཀཱ་རཾ པ་རི་མ་ཎྜ་ལཾ པཱ་རུ་པི་ཏ་བྦཾ ཏི་མ་ཎྜ་ལཾ པ་ཊི་ཙྪཱ་དེ་ནྟེ་ན པ་རི་མ་ཎྜ་ལཾ ནི་ཝཱ་སེ་ཏ་བྦ་ཉྩ, ཏ་ཐཱ ཨ་པཱ་རུ་པི་ཏྭཱ ཨ་ནི་ཝཱ་སེ་ཏྭཱ ཙ ཨཱ་རཱ་མེ ཝཱ ཨ་ནྟ་ར་གྷ་རེ ཝཱ ཨ་ནཱ་ད་རེ་ན ཡཾ ཀི་ཉྩི ཝི་ཀཱ་རཾ ཀ་རོ་ནྟ་སྶ དུ་ཀྐ་ཊཾ. དཱ་ཡནྟི ཝ་ནཾ. ནཱ་ལི་མྤ་ཡེ་ཡྻཱཏི ‘‘ས་བྦཱུ་པ་ཀཱ་རཱ་ནི ཝི་ན་སྶ་ནྟཱུ’’ཏི ཝཱ ཁི་ཌྜཱ་དྷི་པྤཱ་ཡེ་ན ཝཱ ནཱ་ལི་མྤ་ཡེ་ཡྻ.
༣༥༧. ཝ་ཌྜྷིཾ ནོ པ་ཡོ་ཛ་ཡེ ཨ་ཉྙཱ་ཏ་ཀ་པྤ་ཝཱ་རི་ཏེ ནོ ཡཱ་ཙེ་ཏི ཡོ་ཛ་ནཱ. ཨ་ཉྙ་སྶཱཏི ས་ཧ་དྷ་མྨི་ཀ་སྶཱ་པི. ཀ་ཏི་པཱ་ཧཾ བྷུ་ཏྭཱ ཝཱ་ཏི ཡོ་ཛ་ནཱི་ཡཾ. པུ་ནོཏི ནི་པཱ་ཏོ.
༣༥༨. ད་ཎྜི་ནཾ ཉ་ཏྭཱ ཝཱ ཨ་ཉ་ཏྭཱ ཝཱ ཨུ་དྡི་སྶ ར་ཀྑཾ ཡཱ་ཙ་ནེ ད་ཎྜི་ཏེ ད་ཎྜོ ཨ་སྶ གཱི་ཝཱ་ཏི ཡོ་ཛ་ནཱ. ད་ཎྜཾ ག་ཎྷ་ཏཱི་ཏི པ་ཙྩ་ཡ་ནྟ་སྶ ད་ཎྜི་ནཾ ད་ཎྜ་གྒ་ཧ་ཎ་ནྟི ཨ་ཏྠོ. ཨུ་དྡི་སྶཱཏི ‘‘ཨ་མྷཱ་ཀཾ ཝི་ཧཱ་རེ ཨ་སུ་ཀེ་ན ཙ ཨ་སུ་ཀེ་ན ཙ ཨི་དཾ ནཱ་མ ཀ་ཏ’’ནྟི, ‘‘ཀ་རི་སྶ’’ནྟི ཝཱ ཨེ་ཝཾ ཨ་ཏཱི་ཏཾ ཝཱ ཨ་ནཱ་ག་ཏཾ ཝཱ ཨཱ་ར་བྦྷ. ཡཱ་ཙ་ནེཏི ཝོ་ཧཱ་རི་ཀེ་སུ ཡཱ་ཙ་ནེ ས་ཏི. ད་ཎྜི་ཏེཏི ཏེ་ཧི ད་ཎྜེ ག་ཧི་ཏེ སོ ད་ཎྜོ ཨ་སྶ ཡཱ་ཙ་ཀ་སྶ བྷི་ཀྑུ་ནོ གཱི་ཝཱ, ཨི་ཎཾ ཧོ་ཏཱི་ཏི ཨ་ཏྠོ. ཝོ་ཧཱ་རི་ཀེ་ཧི པ་ན ‘‘ཀེ་ནཱ’’ཏི ཝུ་ཏྟེ ‘‘ཨ་སུ་ཀེ་ནཱ་ཏི ཝ་ཏྟུཾ ཨ་མྷཱ་ཀཾ ན ཝ་ཊྚ་ཏི, ཏུ་མྷེ་ཡེ་ཝ ཛཱ་ནི་སྶ་ཐ, ཀེ་ཝ་ལ་ཉྷི མ་ཡཾ ར་ཀྑཾ ཡཱ་ཙཱ་མ, ཏཾ ནོ དེ་ཐ, ཨ་ཝ་ཧ་ཊ་བྷ་ཎྜ་ཉྩ མཾ ཨཱ་ཧ་རཱ་པེ་ཐཱ’’ཏི ཝ་ཏྟ་བྦཾ. ཨེ་ཝཾ ཨ་ནོ་དི་སྶ ཨཱ་ཙི་ཀྑ་ཎཱ ཧོ་ཏི, སཱ ཝ་ཊྚ་ཏི. པཱ་རཱ་ཛི་ཀཱ་དི་ཀཱཏི པཱ་རཱ་ཛི་ཀ་ཐུ་ལླ་ཙྩ་ཡ་དུ་ཀྐ་ཊཱ་ནི.
༣༥༩. ‘‘ཧ་ར་ནྟེ་སུ པ་རི་ཀྑཱ་རཾ,
ཙོ་རོ ཙོ་རོ་ཏི བྷཱ་སི་ཏེ;
ཨ་ན་ཏྠཱ་ཡེ་སཾ ག་ཎྷ་ནྟེ’’ཏི. –
པཱ་ཋེ་ཧི བྷ་ཝི་ཏ་བྦཾ. ཨེ་ཝ་ཉྷི ས་ཏི ‘‘ཧ་ར་ནྟེ་སཱུ’’ཏི བ་ཧུ་ཝ་ཙ་ནེ་ན ས་ཧ གྷ་ཊ་ཏེ. པ་རི་ཀྑཱ་རཾ ཧ་ར་ནྟེ་སུ ཨེ་སཾ ཨ་ན་ཏྠཱ་ཡ ‘‘ཙོ་རོ ཙོ་རོ’’ཏི བྷཱ་སི་ཏེ ད་ཎྜཾ ག་ཎྷ་ནྟེ ཏ་ཏྟ་ཀཾ ཨ་སྶ གཱི་ཝཱ་ཏི ཡོ་ཛེ་ཏ་བྦཾ. ཧ་ར་ནྟེ་སཱུཏི ཙོ་རེ་སུ ག་ཧེ་ཏྭཱ ག་ཙྪ་ནྟེ་སུ. ཨེ་སནྟི ཙོ་རཱ་ནཾ. ག་ཎྷ་ནྟེཏི ཝོ་ཧཱ་རི་ཀ་ཛ་ནེ ག་ཎྷ་ནྟེ. ཡ་ཏྟ་ཀཾ ག་ཧི་ཏཾ, ཏ་ཏྟ་ཀཾ ཨ་སྶ བྷི་ཀྑུ་ནོ གཱི་ཝཱ, བྷ་ཎྜ་དེ་ཡྻཾ ཧོ་ཏཱི་ཏི ཨ་ཏྠོ.
༣༦༠. པཱ་ཀཱ་ར་ཀུ་ཊྚཱ་ནཾ བ་ཧི ཝ་ལ༹་ཉྫེ ཝཱ་པི ཝཱི་ཧཱ་དི་ནཱ་ལི༹་ཀེ་རཱ་དི་རོ་པི་མེ ཧ་རི་ཏེ ཝཱ་པི ཝི་གྷཱ་སུ་ཙྩཱ་ར་ས་ངྐཱ་ར་མུ་ཏྟཾ ནཱ་ཝ་ལོ་ཀི་ཡ ཚ་ཌྜེ་ཡྻ, དུ་ཀྐ་ཊ་ནྟི ས་མྦ་ནྡྷོ. ཝ་ལ༹་ཉྫེ ནཱ་ཝ་ལོ་ཀི་ཡཱཏི ཙ ཨི་མི་ནཱ ཨོ་ལོ་ཀེ་ཏྭཱ ཝཱ ཨ་ཝ་ལ༹་ཉྫེ ཝཱ ཝི་གྷཱ་སཱ་དཱི་ནི ཚ་ཌྜེ་ནྟ་སྶ ཨ་ནཱ་པ་ཏྟཱི་ཏི དཱི་པེ་ཏི. ཝཱི་ཧི ཨཱ་དི ཡེ་སཾ སཱ་ལི་ཨཱ་དཱི་ནཾ ཏེ ཝཱི་ཧཱ་ད་ཡོ, ནཱ་ལི༹་ཀེ་རོ ཨཱ་དི ཡེ་སཾ ཨ་མྦ་པ་ན་སཱ་དཱི་ནཾ ཏེ ནཱ་ལི༹་ཀེ་རཱ་ད་ཡོ, ཝཱི་ཧཱ་ད་ཡོ ཙ ནཱ་ལི༹་ཀེ་རཱ་ད་ཡོ ཙཱ་ཏི དྭ་ནྡོ, ཏེ་སཾ རོ་པོ, ཏེ་ན ནི་བྦ་ཏྟཾ ཝཱི་ཧཱ་དི…པེ… རོ་པི་མཾ. ཧ་རི་ཏེཏི ཧ་རི་ཏ་ཊྛཱ་ནེ. ཝི་གྷཱ་སོ ནཱ་མ ཨུ་ཙྪི་ཊྛོ་ད་ཀ་ཙ་ལ་ཀཱ་དི.
༣༦༡. དྷ་མྨ་ཡུ་ཏྟ་མྤི ན་ཙྩ་ཉྩ གཱི་ཏ་ཉྩ ཝཱ་དི་ཏ་ཉྩ ཡོ་ཛཱ་པེ་ཏུ་ཉྩ པ་ཡོ་ཛེ་ཏུ་ཉྩ པ་ཡུ་ཏྟཱ་ནི པ་སྶི་ཏུ་ཉྩ ‘‘ཨུ་པ་ཧཱ་རཾ ཀ་རོ་མཱ’’ཏི ཝུ་ཏྟེ ས་མྤ་ཊི་ཙྪི་ཏུཾ ཝཱ ན ལ་བྦྷ་ནྟི ས་མྦ་ནྡྷོ. དྷ་མྨ་ཡུ་ཏྟ་མྤཱིཏི ར་ཏ་ན་ཏྟ་ཡ་གུ་ཎཱུ་པ་སཾ་ཧི་ཏ་ཏཱ་ཡ ཨ་ནྟ་མ་སོ དྷ་མྨེ་ན པུ་ཉྙེ་ན སཾ་ཡུ་ཏྟ་མྤི. ན་ཙྩནྟི ཨ་ནྟ་མ་སོ མོ་ར་སུ་ཀ་མ་ཀྐ་ཊཱ་དཱི་ནཾ ན་ཙྩ་མྤི. གཱི་ཏནྟི ཨ་ནྟ་མ་སོ གཱི་ཏ་སྶ པུ་བྦ་བྷཱ་གེ ཀ་ཡི་ར་མཱ་ནཾ ད་ནྟ་གཱི་ཏ་མྤི. ཝཱ་དི་ཏནྟི ཨ་ནྟ་མ་སོ ཨུ་ད་ཀ་བྷེ་རི་ཝཱ་དི་ཏ་མྤི. ཡོ་ཛཱ་པེ་ཏུནྟི ཨ་ཉྙེ་ཧི ཀཱ་རཱ་པེ་ཏུཾ. པ་ཡོ་ཛེ་ཏུནྟི ཨ་ཏྟ་ནཱ ཀཱ་ཏུཾ. ཨཱ་ཡ་ཏ་ཀེ་ན གཱི་ཏ་སྶ་རེ་ན དྷ་མྨ་མྤི བྷཱ་སི་ཏུཾ ན ཝ་ཊྚ་ཏི. པ་ཡུ་ཏྟཱ་ནཱིཏི པ་རེ་ཧི ཡེ་ཧི ཀེ་ཧི་ཙི ཀ་ཏཱ་ནི. པ་སྶི་ཏུནྟི ཨི་མི་ནཱ ཨ་ནོ་ལོ་ཙ་ན་ད་སྶ་ན་མྤི ག་ཧི་ཏ་ནྟི སོ་ཏུ་ནྟི་པི ཨ་ཏྠོ ཝི་ཉྙཱ་ཡ་ཏི. ཨ་ནྟ་རཱ་རཱ་མེ ཋི་ཏ་སྶ པ་སྶ་ཏོ ཨ་ནཱ་པ་ཏྟི. ཝཱི་ཐི་ཡཾ ཋ་ཏྭཱ གཱི་ཝཾ པ་རི་ཝ་ཏྟེ་ཏྭཱ པ་སྶ་ཏོ་པི ཨཱ་པ་ཏྟི་ཡེ་ཝ. ཡེ་ན ཀེ་ན་ཙི ཀ་ར་ཎཱི་ཡེ་ན ག་ཏ་ཊྛཱ་ནེ པ་སྶ་ཏི, སུ་ཎཱ་ཏི ཝཱ, ཨ་ནཱ་པ་ཏྟི. ས་མྤ་ཊི་ཙྪི་ཏུནྟི ‘‘སཱ་དྷཱུ’’ཏི ས་མྤ་ཊི་ཙྪི་ཏུཾ. ‘‘ཨུ་པ་ཧཱ་ར་ཀ་ར་ཎཾ ནཱ་མ སུ་ནྡ་ར’’ནྟི ཝ་ཏྟུཾ ཝ་ཊྚ་ཏི. ཝཱ-ས་དྡོ ས་མུ་ཙྩ་ཡེ.
༣༦༢. ‘‘ཀཱི་ལ༹་ཏྠཾ ཀ་ཏཾ རཱ་ཛཱ་གཱ་ར’’ནྟི་ཨཱ་དི་ནཱ ས་མྦ་ནྡྷི་ཏ་བྦཾ. ཙི་ཏྟེ་ན ཝི་ཙི་ཏྟ་ཀཾ ཨཱ་གཱ་རཾ ཙི་ཏྟཱ་གཱ་ར་ཀཾ.
༣༦༣. ཨཱ་ས་ནེ་ན ན་ཝེ ན པ་ཊི་བཱ་ཧེ་ཡྻཱ་ཏི ཡོ་ཛ་ནཱ. ཨཱ་ས་ནེ་ནཱཏི ཨཱ་ས་ན་ཏོ. ན པ་ཊི་བཱ་ཧེ་ཡྻཱཏི ན ཨུ་ཊྛཱ་པེ་ཡྻ. ཨུ་ཎྷེ ཙཱི་ཝ་རཾ ན ནི་ད་ཧེ་ཡྻཱ་ཏི ཡོ་ཛ་ནཱི་ཡཾ. ན ནི་ད་ཧེ་ཡྻཱཏི ཨ་དྷི་ཀཾ ན ནི་ད་ཧེ་ཡྻ. ག་རུ་ནཱཏི ཨཱ་ཙ་རི་ཡུ་པ་ཛ྄ཛྷཱ་ཡེ་ན. པ་ཎཱ་མི་ཏོཏི ‘‘མཱ ཨི་དྷ པ་ཝི་སཱ’’ཏི་ཨཱ་དི་ནཱ ནི་ཀྐ་ཌྜྷི་ཏོ.
༣༦༤. ས་ཏྟ་ཧི ཨཱ་པ་ཏྟཱི་ཧི ཙ བྷི་ཀྑུཾ ཝཱ་པི ཨ་ཉྙེ་ནེ་ཝ ཙ ཨུ་པཱ་ས་ཀཾ ཝཱ་པི པ་ར་མྨུ་ཁཱ ཨ་ཀྐོ་ས་ནེ དུ་ཀྐ་ཊ་ནྟི ཡོ་ཛེ་ཏ་བྦཾ. ཨཱ་པ་ཏྟཱི་ཧི ཙཱཏི ཙ-ས་དྡོ ཨ་ཝ་དྷཱ་ར་ཎེ. ཨ་ཉྙེ་ནེ་ཝ ཙཱཏི ཨེ་ཏྠ ཨེ་ཝ ཙཱཏི ནི་པཱ་ཏ་ས་མུ་དཱ་ཡོ, ཨེ་ཀོ ཨེ་ཝ ཝཱ ཨ་ཝ་དྷཱ་ར་ཎེ, ཝུ་ཏྟ་ཏོ ཨ་ཉྙེ་ནེ་ཝ ‘‘ཨ་ས་དྡྷོ’’ཏི་ཨཱ་དི་ནཱ་ཏི ཨ་ཏྠོ. པ་ར་མྨུ་ཁཱཏི ནི་པཱ་ཏོ, ཏ་སྶ ཨ་ས་མྨུ་ཁེ་ཏི ཨ་ཏྠོ. ས་མྨུ་ཁཱ ཝ་ད་ནྟ་སྶ པཱ་ཙི་ཏྟི་ཡཾ. པཱ་པ་ག་ར་ཧ་ཎ་ཝ་སེ་ན པ་ན ཝ་ད་ཏོ ཨ་ནཱ་པ་ཏྟི.
༣༦༥. ས་དྡྷཱ་དེ་ཡྻཾ ས་དྡྷཱ་ཡ དཱ་ཏ་བྦཾ ཙཱི་ཝ་ར་ཉྩ ཙ-ས་དྡེ་ན ཨ་ཝ་སེ་ས་མྤི ཝི་ནི་པཱ་ཏེ་ཏུཾ ནཱ་སེ་ཏུཾ ན ལ་བྦྷཾ, པི་ཏཱུ་ནཾ ལ་བྦྷ་ནྟི ས་མྦ་ནྡྷོ. ཉཱ་ཏཱི་ན་མྤཱིཏི པི-ས་དྡོ ས་མྦྷཱ་ཝ་ནེ.
༣༦༦. ཨ་ཉྙ་ཏྲ ཝ་སྶཾ་ཝུ་ཏྠོ ཨ་ཉྙ་ཏོ བྷཱ་གཾ ག་ཎྷེ་ཡྻ, དུ་ཀྐ་ཊ་ནྟི ས་མྦ་ནྡྷོ. ཨ་ཉྙ་ཏྲཱཏི ཨ་ཉྙ་སྨིཾ ཝི་ཧཱ་རེ. ཨ་ཉྙ་ཏོཏི ཨ་ཉྙ་ཝི་ཧཱ་ར་ཏོ. པ་ཊི་དེ་ཡྻཱཏི ག་ཧི་ཏ་ཊྛཱ་ནེ ད་དེ་ཡྻ. ག་ཧི་ཏེ ཏ་སྨིཾ ཝ་ཏྠུ་སྨིཾ ན་ཊྛེ ཝཱ ཛི་ཎྞེ ཝཱ ཏ་སྶ གཱི་ཝཱ་ཧོ ཏཱི་ཏི ས་མྦ་ནྡྷོ. ཙོ་དི་ཏོ ནོ ད་དེ་ཡྻ, ཏེ་སཾ དྷུ་ར་ནི་ཀྑེ་པ་ཏོ བྷ་ཎྜ་གྒྷ་ཀཱ་རི་ཡོ ཧོ་ཏཱི་ཏི ཡོ་ཛ་ནཱ. ཙོ་དི་ཏོཏི ཝ་ཏྠུ་སཱ་མི་ཀེ་ཧི ‘‘དེ་ཧཱི’’ཏི ཝུ་ཏྟོ. ཏེ་སནྟི ཏ་སྨིཾ ཝི་ཧཱ་རེ ལཱ་བྷཱི་ནཾ བྷི་ཀྑཱུ་ནཾ.
༣༦༧. ས་ནྟ་རུ་ཏྟ་རོ ཝཱ ཀ་ལློ ས་ཨུ་པཱ་ཧ་ནོ ཝཱ གཱ་མཾ ན པ་ཝི་སེ་ཡྻ, ཙཱ་མ་རཱི་མ་ཀ་ས་བཱི་ཛ་ནིཾ ན དྷཱ་རེ་ཡྻཱ་ཏི ཡོ་ཛ་ནཱི་ཡཾ. ཨ་ནྟ་ར་ཉྩ ཨུ་ཏྟ་ར་ཉྩ, ས་ཧ ཨ་ནྟ་རུ་ཏྟ་རེ་ན ས་ནྟ་རུ་ཏྟ་རོ. ཨ་གྒ་ལ༹་གུ་ཏྟེ ཝི་ཧཱ་རེ ས་ངྒྷཱ་ཊིཾ ནི་ཀྑི་པི་ཏྭཱ ག་ནྟུཾ ཝ་ཊྚ་ཏི. ཨཱ་ར་ཉྙ་ཀེ་ན པ་ན བྷ་ཎྜུ་ཀྑ་ལི་ཀཱ་ཡ པ་ཀྑི་པི་ཏྭཱ པཱ་སཱ་ཎ་རུ་ཀྑ་སུ་སི་རཱ་དཱི་སུ པ་ཊི་ཙྪ་ནྣེ་སུ ཋ་པེ་ཏྭཱ ག་ནྟ་བྦཾ. ཨ་ནྟ་རུ་ཏྟ་རཱ་ནཾ ནི་ཀྑེ་པེ ཨ་ཡ་མེ་ཝ ན་ཡོ. ཀ་ལློཏི ཨ་གི་ལཱ་ནོ. མ་ཀ་སཱ་ནཾ བཱི་ཛ་ནཱི མ་ཀ་ས་བཱི་ཛ་ནཱི, ཙ་མ་རཱི་ནཾ ཝཱ་ལེ༹་ཧི ཀ་ཏཱ མ་ཀ་ས་བཱི་ཛ་ནཱི་ཏི ས་མཱ་སོ.
༣༦༨. ཨཱ་རཱ་མ་ཏོ བ་ཧཱི་ཏི ས་མྦ་ནྡྷ་ནཱི་ཡཾ. ཨཱ་རཱ་མ་ཏོཏི ཨཱ་རཱ་མཱུ་པ་ཙཱ་ར་ཏོ. ན དྷཱ་རེ་ཡྻཱཏི ཨ་གི་ལཱ་ནོ ན དྷཱ་རེ་ཡྻ. ཡ་སྶ པ་ན ཀཱ་ཡ་དཱ་ཧོ ཝཱ པི་ཏྟ་ཀོ་པོ ཝཱ ཧོ་ཏི, ཙ་ཀྑུ ཝཱ དུ་བྦ་ལཾ, ཨ་ཉྙོ ཝཱ ཀོ་ཙི ཨཱ་བཱ་དྷོ ཝི་ནཱ ཚ་ཏྟེ་ན ཨུ་པྤ་ཛྫ་ཏི, ཏ་སྶ གཱ་མེ ཝཱ ཨ་ར་ཉྙེ ཝཱ ཚ་ཏྟཾ ཝ་ཊྚ་ཏི. གུ་ཏྟི་ཡཱ ལ་བྦྷ་ཏཱིཏི ཝ་སྶེ ཙཱི་ཝ་ར་གུ་ཏྟ་ཏྠཾ, ཝཱ་ལ༹་མི་ག་ཙོ་ར་བྷ་ཡེ་སུ ཨ་ཏྟ་གུ་ཏྟ་ཏྠ་མྤི ལ་བྦྷ་ཏཱི་ཏི ཨ་ཏྠོ. ཨེ་ཀ་པ་ཎྞ་ཚ་ཏྟཾ པ་ན ས་བྦ་ཏྠེ་ཝ ཝ་ཊྚ་ཏི.
༣༦༩. ཨུ་བྷ་ཏོ་ཀཱ་ཛཾ ན གཱ་ཧེ་ཡྻཱ་ཏི ས་མྦ་ནྡྷོ. ཨུ་བྷ་ཏོ ད་ཎྜ་སྶ ཨུ་བྷ་ཡ་ཀོ་ཊི་ཡཾ བྷཱ་ར་བ་ནྡྷ་ཀཱ་ཛཾ ཨུ་བྷ་ཏོ་ཀཱ་ཛཾ, ཨ་ལོ་པ་ཏ་པྤུ་རི་སོ. ཨེ་ཀ་ནྟ་རི་ཀ་ཀཱ་ཛ་ཀནྟི ཨ་ནྟ་ར་མེ་ཝ ཨ་ནྟ་རི་ཀཾ, ཨེ་ཀ་ཉྩ ཨ་ནྟ་རི་ཀ་ཉྩཱ་ཏི དྭ་ནྡོ, ཨེ་ཀ་ནྟ་རི་ཀེ བྷཱ་ར་བ་ནྡྷ་ཀཱ་ཛ་ནྟི ཏ་པྤུ་རི་སོ ཨེ་ཀ་ཏོ་ཀཱ་ཛ་ཀཾ, ཨ་ནྟ་རི་ཀ་ཀཱ་ཛ་ཀ་ནྟི ཝུ་ཏྟཾ ཧོ་ཏི. ཧ་ཏྠེ ཨོ་ལ་མྦོ ཨ་སྶ བྷཱ་ར་སྶཱ་ཏི ས་མཱ་སོ.
༣༧༠. ཨ་ནོ་ཀཱ་ས་ཀ་ཏནྟི ‘‘ཀ་རོ་ཏུ མེ ཨཱ་ཡ་སྨཱ ཨོ་ཀཱ་སཾ, ཨ་ཧཾ ཏཾ ཝ་ཏྟུ་ཀཱ་མོ’’ཏི ཨེ་ཝཾ ཙོ་ད་ཀེ་ན ཨོ་ཀཱ་སེ ཀཱ་རཱ་པི་ཏེ ན་ཏྠི ཨོ་ཀཱ་སོ ཀ་ཏོ ཨ་ནེ་ན ཙུ་དི་ཏ་ཀེ་ནཱ་ཏི བ་ཧུ་བྦཱི་ཧི. ཙོ་དེ་ཡྻཱཏི ཙཱ་ཝ་ན་ཨ་ཀྐོ་ས་ཀ་མྨ་ཝུ་ཊྛཱ་ནཱ་དྷི་པྤཱ་ཡེ་ན ཙོ་དེ་ཡྻ. ཨུ་པོ་ས་ཐ་པྤ་ཝཱ་ར་ཎ་ཊྛ་པ་ན་ཨ་ནུ་ཝི་ཛྫ་དྷ་མྨ་ཀ་ཐཱ་དྷི་པྤཱ་ཡེ་སུ ཨོ་ཀཱ་ས་ཀ་མྨཾ ན་ཏྠི. སུ་དྡྷ་སྶཱཏི ཨ་ནཱ་པ་ཏྟི་ཀ་ཏཱ་ཡ སུ་དྡྷ་སྶ. ཨ་ཝ་ཏྠུ་སྨིནྟི ཨ་ཀཱ་ར་ཎེ. ཏ་ཐཱཏི དུ་ཀྐ་ཊཾ ཨ་ཏི་དི་ས་ཏི. ཀ་རོ་ནྟེ་ནཱ་པི ‘‘བྷཱུ་ཏ་མེ་ཝ ནུ ཁོ ཨཱ་པ་ཏྟིཾ ཝ་ད་ཏི, ཨ་བྷཱུ་ཏ’’ནྟི ཨེ་ཝཾ ཨུ་པ་པ་རི་ཀྑི་ཏྭཱ ཀཱ་ཏ་བྦཱ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པུ་གྒ་ལཾ ཏུ་ལ་ཡི་ཏྭཱ ཨོ་ཀཱ་སཾ ཀཱ་ཏུ’’ནྟི (མ་ཧཱ་ཝ. ༡༥༣) ཧི ཝུ་ཏྟཾ.
༣༧༡. ས་ཏྟཱ་ནཾ པ་ཀ་ཏ་ངྒུ་ལེ་ན ཨ་ཊྛ་ངྒུ་ལཱ་དྷི་ཀཾ མ་ཉྩ་པྤ་ཊི་པཱ་དཾ ཝཱ ཨུ་ཙྩ་པཱ་ད་ཀཾ མ་ཉྩཾ ཝཱ ན དྷཱ་ར་ཡེ་ཏི ཡོ་ཛ་ནཱ. པ་ཀ་ཏི་ཡཱ ཨ་ངྒུ་ལཾ པ་ཀ་ཏ་ངྒུ་ལཾ. ཏ་ཉྩ ཝ་ཌྜྷ་ཀི་ཨ་ངྒུ་ལཾ ཝེ་དི་ཏ་བྦཾ. ཨ་ཊྛ ཙ ཏཱ་ནི ཨ་ངྒུ་ལཱ་ནི ཙ, ཏེ་ཧི ཏ་མ་དྷི་ཀཾ ཡ་སྶཱ་ཏི ས་མཱ་སོ. མ་ཉྩཱ་ནཾ པ་ཊི་པཱ་དོ, ཡ་ཏྠ མ་ཉྩ་པཱ་དེ ནི་ཀྑི་པ་ནྟི. ཨ་ཊྛ་ངྒུ་ལ་ཏོ ཨུ་ཙྩཱ པཱ་དཱ ཡ་སྶཱ་ཏི བ་ཧུ་བྦཱི་ཧི.
༣༧༢. མཱུ་ག་བྦ་ཏཱ་དིནྟི མཱུ་གཱ་ན་མི་ཝ ཏུ་ཎྷཱི་བྷཱ་ཝ་ས་ངྑཱ་ཏཾ ཝ་ཏཾ ཨཱ་དི ཡ་སྶ གོ་ཝ་ཏཱ་དི་ནོ ཏི་ཏྠི་ཡ་ཝ་ཏ་སྶཱ་ཏི ས་མཱ་སོ. ཁུ་ར་མེ་ཝ བྷ་ཎྜཾ ཁུ་ར་བྷ་ཎྜཾ. པུ་བྦེ ནྷཱ་པི་ཏོ ནྷཱ་པི་ཏ་པུ་བྦ་ཀོ, ཝི་སེ་ས་ན་སྶ པ་ར་ནི་པཱ་ཏོ.
༣༧༣. ཧ་ཏྠ་ཀ་མྨནྟི ཧ་ཏྠེ་ན ཀཱ་ཏ་བྦཾ ཝ་ཌྜྷ་ཀི་ཨཱ་དཱི་ནཾ ཀ་མྨཾ. ཨ་ནུ་སྶ་ར་ཎཾ ‘‘ཀ་པྤི་ཡ་ཏྟཾ མེ ཡེ་ན ཡཱ་ཙི་ཏཾ, ཨ་མྷེ་ཧི ཨི་མ་སྶ དཱ་ཏ་བྦ’’ནྟི ཨེ་ཝཾ ཙི་ཏྟ་པྤ་ཝ་ཏྟི་ཨ་ནུ་སཱ་རོ, ཏ་སྶཱ ཡཱ་ཙ་ནཱ་ཡ ཨ་ནུ་སཱ་རོ ཏ་ད་ནུ་སཱ་རོ, ཏ་ཏོ ལ་དྡྷཾ ཡཾ ཀི་ཉྩི ག་ཧེ་ཏུ་ནྟི ཡོ་ཛ་ནཱ. ཀ་མྨ་ཏོ ནི་གྒ་ཏོ ནི་ཀྐ་མྨོ, ཝི་གྷཱ་སཱ་དཱ་དི. ཏཾ ཨ་ཡཱ་ཙི་ཏྭཱ་པི ཀཱ་རེ་ཏུ་ནྟི ས་མྦ་ནྡྷོ. ཨཱ་ཧ་རཱ་པེ་ཏུནྟི ཨ་ར་ཉྙ་ཏོ ཨཱ་ནེ་ཏུཾ. ཨ་པ་ར་ས་ནྟ་ཀནྟི དཱ་རུ་ཏི་ཎ་པ་ལཱ་ལཱ་དི་ཀཾ ཨ་པ་ར་པ་རི་གྒ་ཧི་ཏཾ.
༣༧༤. གི་ཧཱི་ནཾ ཡ་ཏྟ་ཀཾ དེ་ཏི, གོ་པ་ཀེ དེ་ནྟེ ག་ཧེ་ཏུཾ ལ་བྦྷཾ, ས་ངྒྷ་ཙེ་ཏི་ཡ་ས་ནྟ་ཀེ ཡ་ཐཱ་པ་རི་ཙྪེ་དཾ ག་ཧེ་ཏུཾ ལ་བྦྷ་ནྟི ཡོ་ཛ་ནཱ. དེ་ཏཱིཏི གོ་པ་ཀོ བྷི་ཀྑཱུ་ནཾ དེ་ཏི. ག་ཧེ་ཏུནྟི ཏ་ཏྟ་ཀཾ ག་ཧེ་ཏུཾ. ས་ངྒྷ་ཙེ་ཏི་ཡ་ས་ནྟ་ཀེཏི ཝེ་ཏ་ན་གོ་པ་ཀེ་ཧི དཱི་ཡ་མཱ་ནེ ས་ངྒྷ་སྶ ཙེ་ཏི་ཡ་སྶ ཙ ས་ནྟ་ཀེ. ཡ་ཐཱ་པ་རི་ཙྪེ་དནྟི ཡཾ ཏེ་སཾ ས་ངྒྷེ་ན ཨ་ནུ་ཉྙཱ་ཏཾ ཧོ་ཏི ‘‘དི་ཝ་སེ དི་ཝ་སེ ཨེ་ཏྟ་ཀཾ ནཱ་མ ཁཱ་ད་ཐཱ’’ཏི, ཏཾ པ་རི་ཙྪེ་དཾ ཨ་ན་ཏི་ཀྐ་མྨ. ས་ངྒྷི་ཀེ ཙ ཙེ་ཏི་ཡ་ས་ནྟ་ཀེ ཙ ཀེ་ཎི་ཡཱ ག་ཧེ་ཏྭཱ ཨཱ་ར་ཀྑ་ནྟ་སྶེ་ཝ ཧི དཱ་ནེ པ་རི་ཙྪེ་དོ ན་ཏྠི.
༣༧༥. ‘‘ཀཱ་ཡ་ཝཱ་ཙཱ་ཧི དྭཱི་ཧི ཨཱ་པ་ཏྟིཾ ཨཱ་པ་ཛྫེ་ཡྻཱ’’ཏི ཡེ་བྷུ་ཡྻ་ཝ་སེ་ན ཝུ་ཏྟཾ, མེ་ཐུ་ན་དྷ་མྨེ པ་རཱུ་པ་ཀྐ་མེ ས་ཏི སཱ་དི་ཡ་ནྟ་སྶ ཨ་ཀི་རི་ཡ་ས་མུ་ཊྛཱ་ན་བྷཱ་ཝ་ས་མྦྷ་ཝ་ཏོ. ཚ་ཧི ཝཱཏི ཨཱ་པ་ཏྟུ་པྤ་ཏྟི་ཀཱ་ར་ཎ་ས་ངྑཱ་ཏེ་ཧི ཚ་ཧི ས་མུ་ཊྛཱ་ནེ་ཧི ཝཱ ཨཱ་པ་ཏྟིཾ ཨཱ་པ་ཛྫེ་ཡྻཱ་ཏི ས་མྦ་ནྡྷོ. ས་བྦཱ་པ་ཏྟཱི་ན་ཉྷི ཀཱ་ཡོ ཝཱ་ཙཱ ཀཱ་ཡ་ཝཱ་ཙཱ ཀཱ་ཡ་ཙི་ཏྟཾ ཝཱ་ཙཱ་ཙི་ཏྟཾ ཀཱ་ཡ་ཝཱ་ཙཱ་ཙི་ཏྟ་ནྟི ཚ ས་མུ་ཊྛཱ་ནཱ་ནི. ཏ་ཏྠ པུ་རི་མཱ་ནི ཏཱི་ཎི ཨ་ཙི་ཏྟ་ཀཱ་ནི, པ་ཙྪི་མཱ་ནི ས་ཙི་ཏྟ་ཀཱ་ནི.
ཏི་དྷཱ ཨེ་ཀ་ས་མུ་ཊྛཱ་ནཱ, པ་ཉྩ་དྷཱ དྭི་ས་མུ་ཊྛི་ཏཱ;
དྭི་དྷཱ ཏི་ཙ་ཏུ་རོ ཋཱ་ནཱ, ཨེ་ཀ་དྷཱ ཚ་ས་མུ་ཊྛི་ཏཱ.
ཏ་ཏྠ ཙ་ཏུ་ཏྠེ་ན པ་ཉྩ་མེ་ན ཚ་ཊྛེ་ན ཙ ས་མུ་ཊྛཱ་ན་ཏོ ཨེ་ཀ་ས་མུ་ཊྛཱ་ནཱ ཏི་དྷཱ. པ་ཋ་མ་ཙ་ཏུ་ཏྠེ་ཧི ཙ དུ་ཏི་ཡ་པ་ཉྩ་མེ་ཧི ཙ ཏ་ཏི་ཡ་ཚ་ཊྛེ་ཧི ཙ ཙ་ཏུ་ཏྠ་ཚ་ཊྛེ་ཧི ཙ པ་ཉྩ་མ་ཚ་ཊྛེ་ཧི ཙ ས་མུ་ཊྛཱ་ན་ཏོ དྭི་ས་མུ་ཊྛི་ཏཱ པ་ཉྩ་དྷཱ. པ་ཋ་མེ་ཧི ཙ ཏཱི་ཧི པ་ཙྪི་མེ་ཧི ཙ ཏཱི་ཧི ས་མུ་ཊྛཱ་ན་ཏོ ཏི་ས་མུ་ཊྛཱ་ནཱ དྭི་དྷཱ. པ་ཋ་མ་ཏ་ཏི་ཡ་ཙ་ཏུ་ཏྠ་ཚ་ཊྛེ་ཧི ཙ དུ་ཏི་ཡ་ཏ་ཏི་ཡ་པ་ཉྩ་མ་ཚ་ཊྛེ་ཧི ཙ ས་མུ་ཊྛཱ་ན་ཏོ ཙ་ཏུ་ས་མུ་ཊྛཱ་ནཱ དྭི་དྷཱ. ཚ་ཧི་པི ས་མུ་ཊྛི་ཏོ ཚ་ས་མུ་ཊྛཱ་ནཱ ཨེ་ཀ་དྷཱ. ཨ་ལ་ཛྫི…པེ… ས་ཉྙི་ཏཱ་ཡ ཙཱ་ཏི ཨི་མེ་ཧི ཚ་ཧི ཝཱ ཨཱ་པ་ཏྟིཾ ཨཱ་པ་ཛྫེ་ཡྻཱ་ཏི ས་མྦ་ནྡྷོ. ཡོ ས་ཉྩི་ཙྩ ཨཱ་པ་ཏྟིཾ ཨཱ་པ་ཛྫ་ཏི, ཨཱ་པ་ཏྟིཾ པ་རི་གཱུ་ཧ་ཏི, ཨ་ག་ཏི་ག་མ་ན་ཉྩ ག་ཙྪ་ཏི, ཨེ་དི་སོ ཝུ་ཙྩ་ཏི ཨ་ལ་ཛྫཱི པུ་གྒ་ལོ. ཨ་ལ་ཛྫཱི ཙ ཨ་ཉྙཱ་ཎོ ཙ ཀུ་ཀྐུ་ཙྩ་པ་ཀ་ཏོ ཙ ཀུ་ཀྐུ་ཙྩེ་ན ཨ་བྷི་བྷཱུ་ཏོ་ཏི དྭ་ནྡོ. བྷཱ་ཝེ ཏྟ་པྤ་ཙྩ་ཡོ.
ཏ་ཏྠ ཡོ ཨ་ཀ་པྤི་ཡ་བྷཱ་ཝཾ ཛཱ་ན་ནྟོ་ཡེ་ཝ མ་དྡི་ཏྭཱ ཝཱི་ཏི་ཀྐ་མཾ ཀ་རོ་ཏི, ཨ་ཡཾ ཨ་ལ་ཛྫི་ཏཱ ཨཱ་པ་ཛྫ་ཏི. མ་ནྡོ མོ་མཱུ་ཧོ ཀ་ཏྟ་བྦཱ་ཀ་ཏྟ་བྦཾ ཨ་ཛཱ་ན་ནྟོ ཨ་ཀ་ཏྟ་བྦཾ ཀ་རོ་ཏི, ཀ་ཏྟ་བྦཾ ཝི་རཱ་དྷེ་ཏི, ཨ་ཡཾ ཨ་ཉྙཱ་ཎ་ཏྟཱ ཨཱ་པ་ཛྫ་ཏི. ཀ་པྤི་ཡཱ་ཀ་པྤི་ཡཾ ནི་སྶཱ་ཡ ཀུ་ཀྐུ་ཙྩེ ཨུ་པྤ་ནྣེ ཝི་ན་ཡ་དྷ་རཾ ཨ་པུ་ཙྪི་ཏྭཱ མ་དྡི་ཏྭཱ ཝཱི་ཏི་ཀྐ་མ་ཏི, ཨ་ཡཾ ཀུ་ཀྐུ་ཙྩ་པ་ཀ་ཏ་ཏྟཱ ཨཱ་པ་ཛྫ་ཏི. ས་ཏི་ཡཱ པླ་ཝོ ས་མྨོ་ཧོ ས་ཏི་པླ་ཝོ, ས་ཧ་སེ་ཡྻ་ཏི་ཙཱི་ཝ་ར་ཝི་པྤ་ཝཱ་སཱ་དཱི་ནི ས་ཏི་པླ་ཝཱ ཨཱ་པ་ཛྫ་ཏི. ཀ་པྤ་ཉྩ ཨ་ཀ་པྤི་ཡ་ཉྩ ཀ་པྤཱ་ཀ་པྤི་ཡཾ, ཀ་པྤཱ་ཀ་པྤི་ཡེ ས་ཉྙཱ, སཱ ཨ་སྶ ཨ་ཏྠཱི་ཏི ཀ་པྤཱ…པེ… ས་ཉྙཱི, ཏ་སྶ བྷཱ་ཝོ་ཏི ཏཱ-པ་ཙྩ་ཡོ. ཡ-ལོ་པེ་ན པ་ན ‘‘ས་ཉྙི་ཏཱ’’ཏི ཝུ་ཏྟཾ, ཀ་ར་ཎ་ཏྠེ ཝཱ པ་ཙྩ་ཏྟ་ཝ་ཙ་ནཾ. ཏེ ཙ ‘‘ཨ་ཀ་པྤི་ཡེ’’ཏི་ཨཱ་དཱི་ནཾ ཡ་ཐཱ་ཀྐ་མེ་ན ཡུ་ཛྫ་ནྟི. ཏ་ཏྠ ཡོ ཨ་ཙྪ་མཾ་སཾ ‘‘སཱུ་ཀ་ར་མཾ་ས’’ནྟི ཁཱ་ད་ཏི, ཝི་ཀཱ་ལེ ཀཱ་ལ་ས་ཉྙི་ཏཱ་ཡ བྷུ་ཉྫ་ཏི, ཨ་ཡཾ ཨ་ཀ་པྤི་ཡེ ཀ་པྤི་ཡ་ས་ཉྙི་ཏཱ་ཡ ཨཱ་པ་ཛྫ་ཏི. ཡོ པ་ན སཱུ་ཀ་ར་མཾ་སཾ ‘‘ཨ་ཙྪ་མཾ་ས’’ནྟི ཁཱ་ད་ཏི, ཀཱ་ལེ ཝི་ཀཱ་ལ་ས་ཉྙཱ་ཡ བྷུ་ཉྫ་ཏི, ཨ་ཡཾ ཀ་པྤི་ཡེ ཨ་ཀ་པྤི་ཡ་ས་ཉྙི་ཏཱ་ཡ ཨཱ་པ་ཛྫ་ཏི.
༣༧༦. ཨ་ལ་ཛྫི་ཨ་ཉྙཱ་ཎ་ཏཱ་ཡ ཀཱ་ཡ་ཝཱ་ཙཱ་ཧི ཨཱ་པ་ཏྟིཾ ཚཱ་ད་ཡེ་ཏི ཡོ་ཛ་ནཱ. ལི་ངྒེཏི ལི་ངྒ་པ་རི་ཝ་ཏྟ་ན་ནི་མི་ཏྟཾ. ལི་ངྒེ ས་ངྒྷེ ཙ ག་ཎེ ཙ ཨེ་ཀ་སྨིཾ ཙཱ་ཏི ཨཱ་པ་ཏྟི་ཝུ་ཊྛི་ཏི ཙ་ཏུ་དྷཱ ཧོ་ཏཱི་ཏི སེ་སོ.
༣༧༧. པ་ཙྩ་ཡ་དྭ་ཡེཏི ཙཱི་ཝ་རེ པི་ཎྜ་པཱ་ཏེ ཙ. པ་རི་ཀ་ཐོ་བྷཱ་ས་ཝི་ཉྙ་ཏྟཱིཏི ཨ་བྷི་ལཱ་པ་མ་ཏྟ་མེ་ཏཾ. ས་ཧ་ཙ་རི་ཏ་སྶ པ་ན ནི་མི་ཏྟ་ཀ་མྨ་སྶཱ་པི ཨེ་ཏྠེ་ཝ ས་ངྒ་ཧོ ཝེ་དི་ཏ་བྦོ. ཏ་ཏྠ པ་རི་ཡཱ་ཡེ་ན ཀ་ཐ་ནཾ པ་རི་ཀ་ཐཱ. ཨུ་ཛུ་ཀ་མེ་ཝ ཨ་ཝ་ཏྭཱ ཡ་ཐཱ ཨ་དྷི་པྤཱ་ཡོ ཝི་བྷཱུ་ཏོ ཧོ་ཏི, ཨེ་ཝཾ ཨོ་བྷཱ་ས་ནཾ ཨོ་བྷཱ་སོ. པ་ཙྩ་ཡེ ཨུ་དྡི་སྶ ཡ་ཐཱ ཨ་དྷི་པྤཱ་ཡོ ཉཱ་ཡ་ཏི, ཨེ་ཝཾ ཝི་ཉྙཱ་པ་ནཾ ཝི་ཉྙ་ཏྟི. ནི་མི་ཏྟ་ཀ་ར་ཎཾ ནི་མི་ཏྟ་ཀ་མྨཾ. ཏ་ཏི་ཡེཏི སེ་ནཱ་ས་ནེ. སེ་སེཏི གི་ལཱ་ན་པ་ཙྩ་ཡེ.
༣༧༨. པ་ཉྩ་ནྣཾ ས་ཧ་དྷ་མྨི་ཀཱ་ནཾ ཨ་ཙྩ་ཡེ དཱ་ནཾ ན རཱུ་ཧ་ཏཱི་ཏི ས་མྦ་ནྡྷོ. ཨ་ཙྩ་ཡེ དཱ་ནནྟི ‘‘མ་མ་ཙྩ་ཡེ་ན མ་ཡ྄ཧཾ ས་ནྟ་ཀཾ ཨུ་པ་ཛ྄ཛྷཱ་ཡ་སྶ ཧོ་ཏཱུ’’ཏི་ཨཱ་དི་ནཱ ཨེ་ཝཾ ཨ་ཏྟ་ནོ ཨ་པ་ག་མེ དཱ་ནཾ. ཏནྟི ཨ་ཙྩ་ཡེ་ན དི་ནྣཾ ཙཱི་ཝ་རཱ་དི་ཀཾ ས་ངྒྷ་སྶེ་ཝ ཙ ཧོ་ཏི, ན བྷི་ཀྑུ་ནོ་ཏི ཨ་དྷི་པྤཱ་ཡོ. གི་ཧཱི་ནཾ པ་ནཱཏི གི་ཧཱི་ནཾ ཨ་ཙྩ་ཡེ དཱ་ནཾ པ་ན. ཨི་ད་མེ་ཏྠ དཱ་ན་གྒ་ཧ་ཎ་ལ་ཀྑ་ཎཾ – ‘‘ཨི་དཾ ཏུ་ཡ྄ཧཾ ད་མྨཱི’’ཏི་ཨཱ་དི་ནཱ ས་མྨུ་ཁཱ ཝཱ ‘‘ཨི་ཏྠ་ནྣཱ་མ་སྶ དེ་མཱི’’ཏི་ཨཱ་དི་ནཱ པ་ར་མྨུ་ཁཱ་པི དི་ནྣཾ་ཡེ་ཝ ཧོ་ཏི. ‘‘ཏུ་ཡ྄ཧཾ ག་ཎྷཱ་ཧཱི’’ཏི ཝུ་ཏྟེ ‘‘མ་ཡ྄ཧཾ ག་ཎྷཱ་མཱི’’ཏི ཝ་ད་ཏི, སུ་དི་ནྣཾ སུ་གྒ་ཧི་ཏ་ཉྩ. ‘‘ཏ་ཝ ས་ནྟ་ཀཾ ཀ་རོ་ཧི, ཏ་ཝ ས་ནྟ་ཀཾ ཧོ་ཏུ, ཏ་ཝ ས་ནྟ་ཀཾ ཀཱ་རཱ་པེ་ཧཱི’’ཏི ཝུ་ཏྟེ ‘‘མ་མ ས་ནྟ་ཀཾ ཀ་རོ་མི, མ་མ ས་ནྟ་ཀཾ ཧོ་ཏུ, མ་མ ས་ནྟ་ཀཾ ཀ་རི་སྶཱ་མཱི’’ཏི ཝ་ད་ཏི. དུ་དྡི་ནྣཾ དུ་གྒ་ཧི་ཏ་ཉྩ. ས་ཙེ པ་ན ‘‘ཏ་ཝ ས་ནྟ་ཀཾ ཀ་རོ་ཧཱི’’ཏི ཝུ་ཏྟེ ‘‘སཱ་དྷུ, བྷ་ནྟེ, མ་ཡ྄ཧཾ ག་ཎྷཱ་མཱི’’ཏི ག་ཎྷཱ་ཏི, སུ་གྒ་ཧི་ཏ་ནྟི.
༣༧༩. བྷི་ཀྑུ ཝཱ སཱ་མ་ཎེ་རོ ཝཱ ཨུ་པ་སྶ་ཡེ བྷི་ཀྑུ་ནཱི་ནཾ ཝི་ཧཱ་རེ ཀཱ་ལཾ ཀ་ཡི་རཱ་ཐ ཡ་དི ཀཱ་ལ་ངྐ་རེ་ཡྻ, ཏ་ཏྠ ཏ་སྨིཾ ཨུ་བྷི་ནྣཾ ས་ནྟ་ཀེ བྷི་ཀྑུ་ས་ངྒྷོ ཨེ་ཝ དཱ་ཡ་ཛྫོ སཱ་མཱི ཧོ་ཏཱི་ཏི སེ་སོ. སེ་སེ་པཱིཏི ཨ་ཝ་སེ་སེ བྷི་ཀྑུ་ནི་སི་ཀྑ་མཱ་ན་སཱ་མ་ཎེ་རི་ས་ནྟ་ཀེ་པི. ཨ་ཡཾ ན་ཡོཏི ཡ་དི ཏེ བྷི་ཀྑཱུ་ནཾ ཝི་ཧཱ་རེ ཀཱ་ལཾ ཀ་རེ་ཡྻུཾ, ཏེ་སཾ ས་ནྟ་ཀེ བྷི་ཀྑུ་ནི་ས་ངྒྷོ ཨེ་ཝ དཱ་ཡ་ཛྫོ་ཏི ཨ་ཡ་མེ་ཝ ན་ཡོ་ཏི ཨ་ཏྠོ.
༣༨༠. ‘‘ཨི་མཾ ནེ་ཏྭཱ ཨ་སུ་ཀ་སྶ དེ་ཧཱི’’ཏི དི་ནྣཾ ཡཱ་ཝ པ་ར་སྶ ཧ་ཏྠཾ ན པཱ་པུ་ཎཱ་ཏི, ཏཱ་ཝ པུ་རི་མ་སྶེ་ཝ, ཡོ པ་ཧི་ཎ་ཏི, ཏ་སྶེ་ཝཱ་ཏི ཨ་ཏྠོ. ད་མྨཱིཏི ‘‘ཨི་ཏྠ་ནྣཱ་མ་སྶ དེ་མཱི’’ཏི དི་ནྣཾ པ་ན པ་ཙྪི་མ་སྶེ་ཝ, ཡ་སྶ པ་ཧི་ཎ་ཏི, ཏ་སྶེ་ཝ ས་ནྟ་ཀ་ནྟི ཨ་ཏྠོ. ཨི་མཾ ཝི་དྷིཾ ‘‘ཝུ་ཏྟ་ན་ཡེ་ན ཨི་མེ སཱ་མི་ནོ ཧོ་ནྟཱི’’ཏི ཨེ་ཏཾ པ་ཀཱ་རཾ ཉ་ཏྭཱ ཝི་སྶཱ་ས་གྒཱ་ཧཾ ཝཱ ག་ཎྷེ, མ་ཏ་ཀ་ཙཱི་ཝ་རཾ ཝཱ ཨ་དྷི་ཊྛེ་ཏི ཡོ་ཛ་ནཱ. ཝི་སྶཱ་ས་གཱ་ཧནྟི སཱ་མཱི་སུ ཛཱི་ཝ་ནྟེ་སུ ཝི་སྶཱ་སེ་ན གཱ་ཧཾ ག་ཧེ་ཏྭཱ. མ་ཏ་ཀ་ཙཱི་ཝ་རཾ ཨ་དྷི་ཊྛེཏི ཏེ་སུ མ་ཏེ་སུ ཨ་ཉྙེ ཙེ བྷི་ཀྑཱུ ན ས་ནྟི, ‘‘མ་ཡ྄ཧཾ ཏཾ པཱ་པུ་ཎཱ་ཏཱི’’ཏི མ་ཏ་ཀ་ཙཱི་ཝ་རཾ ཨ་དྷི་ཊྛེ་ཡྻ. ཨ་ཉྙེ་སཾ ཨ་ད་ཏྭཱ དཱུ་རེ ཋ་པི་ཏ་མ་ཏ་ཀ་པ་རི་ཀྑཱ་རཱ པ་ན ཏ་ཏྠ ཏ་ཏྠ ས་ངྒྷ་སྶེ་ཝ ཧོ་ནྟི. བྷི་ཀྑུ་མྷི ཀཱ་ལ་ཀ་ཏེ ས་ངྒྷོ སཱ་མཱི པ་ཏྟ་ཙཱི་ཝ་རེ, ཨ་པི་ཙ གི་ལཱ་ནུ་པ་ཊྛཱ་ཀཱ བ་ཧཱུ་པ་ཀཱ་རཱ, ས་ངྒྷེ་ན ཏི་ཙཱི་ཝ་ར་ཉྩ པ་ཏྟ་ཉྩ གི་ལཱ་ནུ་པ་ཊྛཱ་ཀཱ་ནཾ དཱ་ཏ་བྦཾ. ཡཾ ཏ་ཏྠ ལ་ཧུ་བྷ་ཎྜཾ ལ་ཧུ་པ་རི་ཀྑཱ་རཾ, ཏཾ ས་མྨུ་ཁཱི་བྷཱུ་ཏེ་ན ས་ངྒྷེ་ན བྷཱ་ཛེ་ཏ་བྦཾ. ཡཾ ཏ་ཏྠ ག་རུ་བྷ་ཎྜཾ ག་རུ་པ་རི་ཀྑཱ་རཾ, ཏཾ ཨཱ་ག་ཏཱ་ནཱ་ག་ཏ་སྶ ཙཱ་ཏུ་དྡི་ས་སྶ ས་ངྒྷ་སྶ ཨ་ཝི་སྶ་ཛྫི་ཡཾ ཨ་ཝེ་བྷ་ངྒི་ཡཾ. གི་ལཱ་ནུ་པ་ཊྛཱ་ཀོ ནཱ་མ གི་ཧཱི ཝཱ ཧོ་ཏུ པ་བྦ་ཛི་ཏོ ཝཱ, ཨ་ནྟ་མ་སོ མཱ་ཏུ་གཱ་མོ་པི, ས་བྦེ བྷཱ་གཾ ལ་བྷ་ནྟི. བ་ཧཱུ ཙེ ས་བྦེ ས་མ་གྒཱ ཧུ་ཏྭཱ ཨུ་པ་ཊྛ་ཧ་ནྟི, ས་བྦེ་སཾ ས་མ་བྷཱ་གོ དཱ་ཏ་བྦོ. ཡོ པ་ནེ་ཏྠ ཝི་སེ་སེ་ན ཨུ་པ་ཊྛ་ཧ་ཏི, ཏ་སྶ ཝི་སེ་སོ ཀཱ་ཏ་བྦོ.
༣༨༡. ‘‘ལོ་ཧ་བྷ་ཎྜེ པ་ཧ་ར་ཎིཾ ཋ་པེ་ཏྭཱ ས་བྦཾ ཀ་པྤ་ཏཱི’’ཏི་ཨཱ་དི་ནཱ ཡོ་ཛེ་ཏ་བྦཾ. པ་ཧ་ར་ཎིནྟི ཨཱ་ཝུ་དྷཾ. པཱ་དུ་ཀཱ ཙ ས་ངྐ་མ་ནཱི་ཡོ པ་ལླ་ངྐོ ཙཱ་ཏི དྭ་ནྡོ. མ་ཏྟི་ཀཱ་མ་ཡེ ཀ་ཏ་ཀཾ ཀུ་མྦྷ་ཀཱ་རི་ཀ་ཉྩ ཋ་པེ་ཏྭཱ ས་བྦཾ ཀ་པྤ་ཏཱི་ཏི ཡོ་ཛ་ནཱི་ཡཾ, དྷ་ནི་ཡ་སྶེ་ཝ ས་བྦ་མ་ཏྟི་ཀཱ་མ་ཡ་ཀུ་ཊི ཀུ་མྦྷ་ཀཱ་རི་ཀཱཏི.
པ་ཀི་ཎྞ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.