༤༠. ཨ་ཝེ་བྷ་ངྒི་ཡ་ནི་དྡེ་ས་ཝ་ཎྞ་ནཱ
༣༢༢-༥. ཨཱ་རཱ་མཱ…པེ… མ་ཏྟི་ཀ་བྷ་ཎྜཱ་ནཱི་ཏི ཨེ་ཏེ པ་ཉྩ ཨ་ཝི་བྷཱ་ཛི་ཡཱ་ཏི ས་མྦ་ནྡྷི་ཏ་བྦཾ. པ་ཉྩཱཏི ‘‘ཨཱ་རཱ་མཱ་རཱ་མ་ཝ་ཏྠཱུ་ནི ཨེ་ཀ’’ནྟི་ཨཱ་དི་ནཱ རཱ་སི་ཝ་སེ་ན པ་ཉྩ, ས་རཱུ་པ་ཝ་སེ་ན པ་ནེ་ཏཱ་ནི པ་ཎྞཾ ཏི་ཎེ པ་ཀྑི་པི་ཏྭཱ པ་ཉྩ་ཝཱི་ས་ཏི་ཝི་དྷཱ་ནི ཧོ་ནྟི. ཏ་ཐཱ ཙཱ་ཧ –
‘‘དྭི་ས་ངྒ་ཧཱ་ནི དྭེ ཧོ་ནྟི, ཏ་ཏི་ཡཾ ཙ་ཏུ་ས་ངྒ་ཧཾ;
ཙ་ཏུ་ཏྠཾ ན་ཝ་ཀོ་ཊྛཱ་སཾ, པ་ཉྩ་མཾ ཨ་ཊྛ་བྷེ་ད་ནཾ.
‘‘ཨི་ཏི པ་ཉྩ་ཧི རཱ་སཱི་ཧི, པ་ཉྩ་ནི་མྨ་ལ་ལོ་ཙ་ནོ;
པ་ཉྩ་ཝཱི་ས་ཝི་དྷཾ ནཱ་ཐོ, ག་རུ་བྷ་ཎྜཾ པ་ཀཱ་ས་ཡཱི’’ཏི. (ཙཱུ་ལ༹་ཝ. ཨ་ཊྛ. ༣༢༡);
ཏ་ཏྠ ཨཱ་རཱ་མོ ནཱ་མ པུ་པྥཱ་རཱ་མོ ཝཱ ཕ་ལཱ་རཱ་མོ ཝཱ. ཨཱ་རཱ་མ་ཝ་ཏྠུ ནཱ་མ ཏེ་སཾ་ཡེ་ཝ པ་ཏི་ཊྛཱ་ནོ་ཀཱ་སོ, ཝི་ན་ཊྛེ་སུ ཝཱ ཏེ་སུ པོ་རཱ་ཎ་ཀ་བྷཱུ་མི་བྷཱ་གོ. ཝི་ཧཱ་རོ ནཱ་མ པཱ་སཱ་དཱ་དི ཡཾ ཀི་ཉྩི སེ་ནཱ་ས་ནཾ. ལོ་ཧ་ཀུ་མྦྷཱི ནཱ་མ ཀཱ་ལ༹་ལོ་ཧེ་ན ཝཱ ཏ་མྦ་ལོ་ཧེ་ན ཝཱ ཀ་ཏ་ཀུ་མྦྷཱི. ཀ་ཊཱ་ཧཱ་དཱིསུ་པི ཨེ་སེ་ཝ ན་ཡོ. ཨེ་ཏྠ བྷཱ་ཎ་ཀནྟི ཨ་ར་ཉྫ་རོ ཝུ་ཙྩ་ཏི. ཝཱ་ར་ཀོཏི གྷ་ཊོ. རཱ་སིཾ ཨ་པེ་ཀྑི་ཏྭཱ ཨེ་ཏེཏི པུ་ལླི་ངྒ་ནི་དྡེ་སོ. ཨ་ཝི་བྷཱ་ཛི་ཡཱཏི མཱུ་ལ་ཙྪེ་ཛྫ་ཝ་སེ་ན ཨ་ཝེ་བྷ་ངྒི་ཡཱ. པ་རི་ཝ་ཏྟ་ན་ཝ་སེ་ན པ་ན པ་རི་བྷུ་ཉྫ་ནྟ་སྶ ཝི་སྶ་ཛྫེ་ནྟ་སྶ ཙ ཨ་ནཱ་པ་ཏྟི. ཨ་ཝི་སྶ་ཛྫི་ཡཱ་ནི ཙཱཏི ཙ-ས་དྡེ་ན ཨ་ཝེ་བྷ་ངྒི་ཡཱ་ནི ཙཱ་ཏི ཨ་ཝུ་ཏྟཾ ས་མྤི་ཎྜེ་ཏི.
༣༢༦-༨. ཨེ་ཀ་ནྟ་ག་རུ་བྷ་ཎྜ་ཏྟཱ ཨཱ་དི་ཏོ ཏ་ཡོ རཱ་སཱི ཋ་པེ་ཏྭཱ ཙ་ཏུ་ཏྠ་རཱ་སི་ཏོ པ་ཊྛཱ་ཡ ག་རུ་བྷ་ཎྜཱ་ག་རུ་བྷ་ཎྜེ ཝི་བྷ་ཛི་ཏུཾ ‘‘ཝ་ལླཱི’’ཏི་ཨཱ་དི ཨཱ་ར་དྡྷཾ. ཨ་ཌྜྷ་བཱ་ཧུ་མ་ཏྟཱ་པི ཝ་ལླི ཙ ཨ་ཊྛ་ངྒུ་ལཱ་ཡ་ཏོ ཝེ་ལུ༹ ཙ མུ་ཊྛི་མ་ཏྟ་མྤི ཏི་ཎཱ་དི ཙ ཨེ་ཀ་མྤི པ་ཎྞ་ཉྩ པཱ་ཀ་ཏཱ ཝཱ པ་ཉྩ་ཝ་ཎྞཱ ཝཱ ཏཱ་ལ་པ་ཀྐ་པྤ་མཱ་ཎཱ་པི མ་ཏྟི་ཀཱ ཙ ཏཱ་ལ་པ་ཀྐ་པྤ་མཱ་ཎཱ་པི སུ་དྷཱ ཙ ཏཱ་ལ་པ་ཀྐ་པྤ་མཱ་ཎཱ་པི ཀ་ངྒུ་ཊྛ་ཨཱ་དི་ཀཱ ཙ དི་ནྣཱ ཝཱ ཏ་ཏྠ་ཛཱ་ཏ་ཀཱ ཝཱ ས་ངྒྷི་ཀཱ ར་ཀྑི་ཏཱ ཨ་བྷཱ་ཛི་ཡཱ, ར་ཛྫུ་ཡོ་ཏྟཱ་དི ཙ དི་ནྣཱ ས་ངྒྷི་ཀཱ ཨ་བྷཱ་ཛི་ཡཱ་ཏི ཡོ་ཛ་ནཱ. ཝེ་ལུ༹ པ་རི་ཎཱ་ཧ་ཏོ པ་ཎྞ་སཱུ་ཙི་ད་ཎྜ་མ་ཏྟོ ག་ཧེ་ཏ་བྦོ. ཏི་ཎཾ མུ་ཉྫཾ པ་བྦ་ཛ་ཉྩ ཨཱ་དི་ས་དྡ་ས་ངྒ་ཧི་ཏཾ ཋ་པེ་ཏྭཱ ཨ་ཝ་སེ་སཾ ཡཾ ཀི་ཉྩི ཏི་ཎཾ. པ་ཎྞོ ཨ་ཊྛ་ངྒུ་ལ་པྤ་མཱ་ཎོ རི་ཏྟ་པོ་ཏྠ་ཀོ ག་རུ་བྷ་ཎྜ་མེ་ཝ. པཱ་ཀ་ཏཱཏི པ་ཀ་ཏི་ཡཱ ཛཱ་ཏཱ. པ་ཉྩ་ཝ་ཎྞཱཏི ར་ཏྟ་སེ་ཏཱ་དི་པ་ཉྩ་ཝ་ཎྞཱ. སུ་དྷཱ་ཀ་ངྒུ་ཊྛཱ་ད་ཡོ མ་ཏྟི་ཀ་གྒ་ཧ་ཎེ་ན ག་ཧི་ཏཱ. ཀ་ངྒུ་ཊྛ་ཨཱ་དི་ཀཱཏི ཨཱ་དི-ས་དྡེ་ན ས་ཛྫུ་ར་ས་ཛཱ་ཏི་ཧི་ངྒུ་ལ་ཀཱ་དཱི་ནཾ ག་ཧ་ཎཾ. དི་ནྣཱཏི ས་ངྒྷ་སྶ དི་ནྣཱ. ཏ་ཏྠ་ཛཱ་ཏཱཏི ས་ངྒྷི་ཀ་བྷཱུ་མི་ཡཾ ཛཱ་ཏཱ. ར་ཛྫུ་ཡོ་ཏྟཱ་དཱིཏི སུ་ཏྟ་མ་ཀ་ཙི་ཝཱ་ཀ་ནཱ་ལི༹་ཀེ་ར་ཧཱི་ར་ཙ་མྨ་མ་ཡཱ ར་ཛྫུ ཙ ཡོ་ཏྟཱ་དི ཙ. ཨཱ་དི-ས་དྡེ་ན མ་ཀ་ཙི་ཝཱ་ཀཱ་དི་ཀེ ཝ་ཊྚེ་ཏྭཱ ཀ་ཏཱ ཨེ་ཀ་ཝ་ཊྚཱ ག་ཧི་ཏཱ. བྱ་ཏི་རེ་ཀ་ཝ་སེ་ན པ་ནེ་ཏྠ ཙ་ཏུ་ཏྠ་རཱ་སི་མྷི ཨི་ཏ་རེ བྷཱ་ཛི་ཡཱ་ཏི ཝེ་དི་ཏ་བྦཱ. ས་ངྒྷི་ཀེ ཀ་མྨེ, ཙེ་ཏི་ཡ་སྶ ཝཱ ཀ་མྨེ ནི་ཊྛི་ཏེ བྷཱ་ཛི་ཡཱ་ཏི ཡོ་ཛ་ནཱི་ཡཾ.
༣༢༩. ལོ་ཧ་བྷ་ཎྜེ་སུ བྷི་ཀྑུ་སཱ་རུ་པྤཾ པ་ཏྟཱ་དི ཝཱ ཏ་ཐཱ ཝི་པྤ་ཀ་ཏཱ་ཀ་ཏཾ ལོ་ཧ་བྷ་ཎྜཾ ཏ་ཐཱ པཱ་ད་ག་ཎྷ་ཀཾ ཝཱ་ར་ཀཾ བྷཱ་ཛི་ཡ་ནྟི ཡོ་ཛ་ནཱ. པ་ཏྟཱ་དཱིཏི ཨ་ཡོ་པ་ཏྟོ ཨ་ཡ་ཐཱ་ལ་ཀཾ ཏ་མྦ་ལོ་ཧ་ཐཱ་ལ་ཀཾ ཨ་ཉྫ་ནི་ས་ལཱ་ཀཱ ཀ་ཎྞ་མ་ལ་ཧ་ར་ཎཱི སཱུ་ཙི པ་ཎྞ་སཱུ་ཙི ཁུ་དྡ་ཀོ པི་པྥ་ལ་ཀོ ཁུ་དྡ་ཀཾ ཨཱ་ར་ཀ་ཎྜ་ཀཾ ཀུ་ཉྩི་ཀཱ ཏཱ་ལཱ༹་དི. ཝི་པྤ་ཀ་ཏནྟི ཨ་པ་རི་ནི་ཊྛི་ཏཾ. ཨ་ཀ་ཏནྟི ས་བྦ་སོ ཨ་ཀ་ཏཾ. པཱ་ད་ག་ཎྷ་ཀནྟི སཱི་ཧ་ལ༹་དཱི་པེ པཱ་ད་ག་ཎྷ་ན་ཀཾ. པཱ་དོ ནཱ་མ ཙ་ཏུ་ཏྠཾ་སོ, མ་ག་དྷ་ནཱ་ལི༹་ཡཱ པ་ཉྩ་ནཱ་ལི༹་མ་ཏྟཱ. མ་ག་དྷ་ནཱ་ལི༹ ཙ ནཱ་མེ་སཱ ཨཱུ་ན་པ་ཉྩ་པ་ས་ཏཱ ཝེ་དི་ཏ་བྦཱ. ཏ་ཐཱ གྷ་ཊ་ཀོ ཏེ་ལ་བྷཱ་ཛ་ན་ཉྩ. ཡཱ་ཡ ཝཱ་སི་ཡཱ ཋ་པེ་ཏྭཱ ད་ནྟ་ཀ་ཊྛ་ཙྪེ་ད་ནཾ ཝཱ ཨུ་ཙྪུ་ཏ་ཙྪ་ནཾ ཝཱ ཨ་ཉྙཾ མ་ཧཱ་ཀ་མྨཾ ཀཱ་ཏུཾ ན ས་ཀྐཱ, ཨ་ཡཾ བྷཱ་ཛི་ཡཱ. ས་མྨུ་ཉྫ་ནི་ད་ཎྜ་ཁ་ཎ་ན་ཀཾ པ་ན ཨ་ད་ཎྜ་ཀཾ ཕ་ལ་མ་ཏྟ་མེ་ཝ, ཡཾ ས་ཀྐཱ སི་པཱ་ཊི་ཀཱ་ཡ པ་ཀྑི་པི་ཏྭཱ པ་རི་ཧ་རི་ཏུཾ, ཨ་ཡཾ བྷཱ་ཛ་ནཱི་ཡཱ. ཏི་པུ་ཀོ་ཊྚ་ཀ་ཨུ་པ་ཀ་ར་ཎེ་སུ ཏི་པུ་ཙྪེ་ད་ན་ཀ་ས་ཏྠ་ཀཾ སུ་ཝ་ཎྞ་ཀཱ་རཱུ་པ་ཀ་ར་ཎེ་སུ སུ་ཝ་ཎྞ་ཙྪེ་ད་ན་ཀ་ས་ཏྠ་ཀཾ ཙ་མྨ་ཀཱ་ར་ཨུ་པ་ཀ་ར་ཎེ་སུ ཙ་མྨ་ཚི་ནྡ་ན་ཀཾ ཁུ་དྡ་ཀ་ས་ཏྠཾ ན་ཧཱ་པི་ཏ་ཏུ་ཎྞ་ཀཱ་ར་ཨུ་པ་ཀ་ར་ཎེ་སུ ཋ་པེ་ཏྭཱ མ་ཧཱ་ཀ་ཏྟ་རིཾ མ་ཧཱ་ས་ཎྜཱ་ས་ཉྩ མ་ཧཱ་པི་པྥ་ལ་ཀ་ཉྩ ས་བྦཱ་ནི བྷཱ་ཛ་ནཱི་ཡ་བྷ་ཎྜཱ་ནི. ཏ་ཐཱ ཀུ་ཉྩི་ཀཱ. ཝུ་ཏྟ་ཝི་པ་ལླཱ་སེ་ན པ་ན ལོ་ཧ་བྷ་ཎྜེ ཨ་བྷཱ་ཛི་ཡཱ་ཏི ཝེ་དི་ཏ་བྦཱ.
༣༣༠. ‘‘ཝེ་ལུ༹་མྷཱི’’ཏི་ཨཱ་དི་ནཱ དཱ་རུ་བྷ་ཎྜཱ་ནི ད་སྶེ་ཏི. དཱ་རུ་བྷ་ཎྜེ་ན པ་ན ས་ངྒ་ཧེ་ཏྭཱ ས་བྦཱ་པི དཱ་རུ་ཝེ་ལུ༹་ཙ་མྨུ་པཱ་ཧ་ནཱ་དི་ཝི་ཀ་ཏི ཝེ་དི་ཏ་བྦཱ. ཚ་ཏྟ་ད་ཎྜོ ཙ ས་ལཱ་ཀཱ ཙཱ་ཏི དྭ་ནྡོ. ཨུ་པཱ་ཧ་ནཱ་ཡ ད་ཎྜ་ཀོ ཨུ་པཱ་ཧ་ན་ད་ཎྜ་ཀོ.
༣༣༡. ཨ་ནུ་ཉྙཱ་ཏ་ཝཱ་སི་ད་ཎྜོཏི ཨ་ནུ་ཉྙཱ་ཏ་ཝཱ་སི་ཡཱ ད་ཎྜོ. ཨ་ར་ཎ་ཉྫ་ནི་སི་ངྒཱ་དཱིཏི ཨཱ་དི-ས་དྡེ་ན ཨ་ཉྫ་ནི་ས་ལཱ་ཀཱ ཚ་ཏྟཾ མུ་ཊྛི་པ་ཎྞཾ ཨུ་པཱ་ཧ་ནཱ དྷ་མྨ་ཀ་ར་ཎོ པཱ་ད་ག་ཎྷ་ན་ཀ་ཏོ ཨ་ན་ཏི་རི་ཏྟཾ ཨཱ་མ་ལ་ཀ་ཏུ་མྦཾ ཨཱ་མ་ལ་ཀ་གྷ་ཊོ ལཱ་བུ་ཀ་ཏུ་མྦཾ ལཱ་བུ་ཀ་གྷ་ཊོ ཝི་སཱ་ཎ་ཏུ་མྦ་ནྟི ཨི་དཾ ས་ངྒ་ཎྷཱ་ཏི.
༣༣༢. ཡ་ཐཱ་ཝུ་ཏྟ་ཏོ ཨ་ཉྙཾ དཱ་རུ་བྷ་ཎྜེ་སུ ག་རུ་བྷ་ཎྜཾ. མ་ཏྟི་ཀཱ་མ་ཡོ པཱ་ད་གྷ་ཊ་ཀོ བྷཱ་ཛི་ཡོ་ཏི ཡོ་ཛ་ནཱ. པཱ་ད་གྷ་ཊ་ཀོཏི པཱ་ད་སྶ པ་ཧོ་ན་ཀོ གྷ་ཊ་ཀོ. ཨི་མི་ནཱ མ་ཏྟི་ཀཱ་བྷ་ཎྜཾ ཨུ་པ་ལ་ཀྑེ་ཏི, ཏ་སྨཱ པ་ཏྟོ ཐཱ་ལ་ཀཾ ཀུ་ཎྜི་ཀཱ་ཏི ཨི་མཱ་ནི བྷཱ་ཛ་ནཱི་ཡཱ་ནི, ཝུ་ཏྟཱ་ཝ་སེ་སཱ ཨ་བྷཱ་ཛི་ཡཱ.
༣༣༣-༤. ག་རུ་ནཱ ག་རུ་བྷ་ཎྜ་ཉྩ ཐཱ་ཝ་ར་ཉྩ པ་རི་ཝ་ཏྟེ་ཡྻ, ཐཱ་ཝ་རེ་ན ཙ ཐཱ་ཝ་ར་མྤི པ་རི་ཝ་ཏྟེ་ཡྻཱ་ཏི ཡོ་ཛེ་ཏ་བྦཾ. ག་རུ་ནཱ མ་ཉྩ་པཱི་ཋཱ་དི་ནཱ. ཐཱ་ཝ་རནྟི ཨཱ་རཱ་མཱ་དི པ་ཋ་མ་རཱ་སི་དྭ་ཡཾ. ཏ་ཐཱ ཀ་ཏྭཱ ཙ བྷུ་ཉྫི་ཏུནྟི ཨེ་ཝ་ཉྩ པ་རི་ཝ་ཏྟེ་ཏྭཱ ཏ་ཏོ ཨཱ་བྷ་ཏཾ ཀ་པྤི་ཡ་བྷ་ཎྜཾ པ་རི་བྷུ་ཉྫེ་ཡྻཱ་ཏི ཨ་ཏྠོ, ཝི་དྷི་མྷི ཨ་ཡཾ ཏུཾ་པ་ཙྩ་ཡོ. ཕཱ་ཏི་ཀ་མྨེ་ན ཝ་ལླཱ་དིཾ ག་ཎྷེ་ཏི ས་མྦ་ནྡྷ་ནཱི་ཡཾ. ཕཱ་ཏི་ཀ་མྨཾ ནཱ་མ ས་མ་ཀཾ ཝཱ ཨ་ཏི་རེ་ཀཾ ཝཱ ཏ་ད་གྒྷ་ན་ཀཾ ཝཱ ཝ་ཌྜྷི་ཀ་མྨཾ. སེ་སནྟི པ་ཋ་མ་རཱ་སི་ཏྟི་ཀ་ནྟི.
ཨ་ཝེ་བྷ་ངྒི་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.