༣༡. ཝི་ཀ་པྤ་ནཱ་ནི་དྡེ་ས་ཝ་ཎྞ་ནཱ

༢༢༡. ས་མྨུ་ཁཱ པ་ར་མྨུ་ཁཱཏི ས་སྶ མུ་ཁཾ, པ་ར་སྶ མུ་ཁ་ནྟི ཝི་གྒ་ཧོ, ས་མྨུ་ཁེ་ན པ་ར་མྨུ་ཁེ་ནཱ་ཏི ཨ་ཏྠོ. ས་མྨུ་ཁཱ་ཝི་ཀ་པྤ་ནཱ པ་ར་མྨུ་ཁཱ་ཝི་ཀ་པྤ་ནཱ་ཏི བྷེ་དཱ དུ་ཝེ ཝི་ཀ་པྤ་ནཱ ཝུ་ཏྟཱ་ཏི ཡོ་ཛ་ནཱ. བྷེ་དཱཏི ཝི་སེ་ས་ཏོ. ཨ་ཐ ཝཱ ས་སྶ མུ་ཁཾ མུ་ཁ་ས་མྦ་ནྡྷི་ཝ་ཙ་ནཾ ཨ་སྶཱ ཝི་ཀ་པྤ་ནཱ་ཡཱ་ཏི ས་མཱ་སོ. ཏ་ཐཱ པ་ར་མྨུ་ཁཱ. ས་མྨུ་ཁཱ ཙ པ་ར་མྨུ་ཁཱ ཙ, ཏ་སྶཱ བྷེ་དོ, ཏ་ཏོ. ས་མྨུ་ཁཱ་ཡ ས་མྨུ་ཁ་ཝི་ཀ་པྤ་ནཱ་ཡ. བྱ་ཏྟ་སྶཱཏི ཝི་ཀ་པྤ་ན་ཝི་དྷཱ་ནཾ པ་ཙྩུ་དྡྷཱ་ར་ཝི་དྷཱ་ན་ཉྩ ཛཱ་ན་ནྟ་སྶ.

༢༢༢. ཏེ་ནཱཏི ཡ་སྶ ས་ནྟི་ཀེ ཝི་ཀ་པྤེ་ཏི, ཏེ་ན བྷི་ཀྑུ་ནཱ. པ་རི་བྷོ་གཱ་དི་ཀནྟི པ་རི་བྷོ་གཾ ཝི་སྶ་ཛྫ་ནཾ ཨ་དྷི་ཊྛཱ་ན་ཉྩ.

༢༢༤-༥. ཨ་པ་རཱ ས་མྨུ་ཁཱ་ཝེ་ཀཱཏི ཨེ་ཏྠ ཝཱ-ས་དྡོ པ་ཀྑ་ནྟ་རེ, ཨ་ཐ ཝཱ་ཏི ཨ་ཏྠོ, ཨ་པི-ས་དྡ་ཏྠོ ཝཱ ཝཱ-ས་དྡོ, སོ ཨ་པ་རཱ-ས་དྡ་ཏོ པ་རཾ ད་ཊྛ་བྦོ, ཨ་པ་རཱ་པི ཨེ་ཀཱ ས་མྨུ་ཁཱ་ཝི་ཀ་པྤ་ནཱ ཨ་ཏྠཱི་ཏི ཨ་ཏྠོ. ཀ་ཐ་ནྟི ཨཱ་ཧ ‘‘བྷི་ཀྑུ་སྶཱ’’ཏི་ཨཱ་དི. ‘‘པ་ཉྩ་ནྣཾ ས་ཧ་དྷ་མྨཱི་ན’’ནྟི ཝུ་ཏྟ་ཏྟཱ ‘‘ཏི་སྶ་སྶ བྷི་ཀྑུ་ནོ’’ཏི་ཨཱ་དཱི་སུ ཏི་སྶཱ་ཡ བྷི་ཀྑུ་ནི་ཡཱ ཏི་སྶཱ་ཡ སི་ཀྑ་མཱ་ནཱ་ཡ ཏི་སྶཱ་ཡ སཱ་མ་ཎེ་རི་ཡཱ ཏི་སྶ་སྶ སཱ་མ་ཎེ་ར་སྶཱ་ཏི་པི ཝི་ཉྙཱ་ཏ་བྦཾ.

༢༢༦. པ་ར་མྨུ་ཁཱ་ཝི་ཀ་པྤ་ནཱཏི པ་ར་མྨུ་ཁེ་ན ཝི་ཀ་པྤ་ནེ་ན, པ་ར་མྨུ་ཁཱ་ཝི་ཀ་པྤ་ནཱ་ཏི ཝཱ ག་ཧེ་ཏ་བྦཾ, པ་ར་མྨུ་ཁཱ་ཝི་ཀ་པྤ་ནཱ ཀ་ཐ་ནྟི ཨ་ཏྠོ.

༢༢༧. མི་ཏྟོཏི ད་ལ༹ྷ་མི་ཏྟོ. ས་ནྡི་ཊྛོཏི དི་ཊྛ་མ་ཏྟ་མི་ཏྟོ. ཨེ་ཏྠ པ་ན དྭི་ནྣཾ ཝི་ཀ་པྤ་ནཱ་ནཾ ཀིཾ ནཱ་ནཱ་ཀ་ར་ཎ་ནྟི? ས་མྨུ་ཁཱ་ཝི་ཀ་པྤ་ནཱ་ཡ ཏཱ་ཝ ས་ཡཾ ཝི་ཀ་པྤེ་ཏྭཱ པ་རེ་ན པ་ཙྩུ་དྡྷ་རཱ་པེ་ཏི, ཏེ་ནེ་ཝ སཱ ས་མྨུ་ཁཱ་ཝི་ཀ་པྤ་ནཱ ནཱ་མ ཛཱ་ཏཱ. པ་ར་མྨུ་ཁཱ་ཝི་ཀ་པྤ་ནཱ་ཡ པ་རེ་ནེ་ཝ ཝི་ཀ་པྤཱ་པེ་ཏྭཱ པ་རེ་ནེ་ཝ པ་ཙྩུ་དྡྷ་རཱ་པེ་ཏི, ཏེ་ནེ་ཝ སཱ པ་ར་མྨུ་ཁཱ་ཝི་ཀ་པྤ་ནཱ ནཱ་མ ཛཱ་ཏཱ་ཏི ཨི་ད་མེ་ཏྠ ནཱ་ནཱ་ཀ་ར་ཎ་ནྟི.

༢༢༨. དཱུ་ར་ས་ནྟི་ཀ་ཏྟེ་ཀ་ཏྟནྟི ཨེ་ཏྠ ཨཱ་ས་ནྣ་དཱུ་ར་བྷཱ་ཝོ ཨ་དྷི་ཊྛཱ་ནེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦོ.

༢༢༩. ད་སཱ་ཧཾ…པེ… པ་ཙྩཱ་སཱ་ཡ ས་ཏི མཱ་ས་ཀཾ ནཱ་དྷི་ཊྛི་ཏ་ཝི་ཀ་པྤི་ཏཾ ནི་སྶ་གྒིཾ ནུ་པྤཱ་ད་ཡ་ཏཱི་ཏི ས་མྦ་ནྡྷོ. ད་ས ཨ་ཧཱ་ནི ས་མཱ་ཧ་ཊཱ་ནི ད་སཱ་ཧཾ. ས་བྦ་ཏྠ ཨ་ཙྩ་ནྟ་སཾ་ཡོ་གེ དུ་ཏི་ཡཱ. ཏ་ཏྠ ཡཾ དི་ཝ་སཾ ཙཱི་ཝ་རཾ ཨུ་པྤ་ནྣཾ, ཏ་སྶ ཡོ ཨ་རུ་ཎོ, སོ ཨུ་པྤ་ནྣ་དི་ཝ་ས་ནི་སྶི་ཏོ, ཏ་སྨཱ ཙཱི་ཝ་རུ་པྤཱ་ད་དི་ཝ་སེ་ན ས་དྡྷིཾ ཨེ་ཀཱ་ད་སེ ཨ་རུ་ཎུ་གྒ་མ་ནེ ནི་སྶ་གྒི་ཡཾ ཧོ་ཏཱི་ཏི ཨཱ་ཧ ‘‘ད་སཱ་ཧ’’ནྟི. མཱ་ས་མེ་ཀཾ ཝཱཏི ‘‘ཨ་ན་ཏྠ་ཏེ ཀ་ཐི་ནེ ཨེ་ཀཾ པ་ཙྪི་མ་ཀ་ཏྟི་ཀ་མཱ་ས’’ནྟི (པཱ་རཱ. ༦༤༩ ཨ་ཏྠ་ཏོ ས་མཱ་ནཾ) ཝུ་ཏྟ་ཏྟཱ ཀ་ཐི་ན་ཏྠ་ཏེ པ་ཉྩ མཱ་སེ་ཏི ལ་བྦྷ་ཏི. ཀ་ཐི་ནཾ ཨ་ཏྠ་ཏཾ ཡ་སྨིཾ ཝི་ཧཱ་རེ་ཏི ས་མཱ་སོ. པཱ་རི་པཱུ་ར་ཏྠནྟི པཱ་རི་པཱུ་རི ཨ་ཏྠོ ཡ་སྶཱ་ཏི ཝི་གྒ་ཧོ. ཀི་རི་ཡཱ་ཝི་སེ་ས་ནཾ, པཱ་རི་པཱུ་རི་པྤ་ཡོ་ཛ་ནཾ ཀ་ཏྭཱ་ཏི ཨ་ཏྠོ. ཨཱུ་ན་སྶཱཏི ཡ་ཏྟ་ཀེ་ན ཀ་ཡི་ར་མཱ་ནཾ ཨ་དྷི་ཊྛཱ་ནཾ ཙཱི་ཝ་རཾ པ་ཧོ་ཏི, ཏ་ཏྟ་ཀ་ཏཱ་བྷཱ་ཝ་ཏོ ཨཱུ་ན་སྶ ཨེ་ཀཱ་ད་ས་མཱ་ས་ས་ཏྟ་མཱ་ས་ས་ངྑཱ་ཏེ པི་ཊྛི་ས་མ་ཡེ ཨུ་པྤ་ནྣ་སྶ མཱུ་ལ་ཙཱི་ཝ་ར་སྶ. པ་ཙྩཱ་སཱ ས་ཏཱིཏི ‘‘ས་ངྒྷཱ་དི་ཏོ ཡ་ཏོ ཀུ་ཏོ་ཙི ལ་ཙྪཱ་མཱི’’ཏི ཨེ་ཝཾ ས་ཏི་ཡཱ པ་ཙྩཱ་སཱ་ཡཱ་ཏི ཨ་ཏྠོ. ཨུ་བྷ་ཡ་མྤི ཡ-ཀཱ་ར་ལོ་པེ་ན ནི་དྡི་ཊྛཾ. ས་ཏཱིཏི ཝཱ ནི་པཱ་ཏོ, ལི་ངྒ་ཝི་པ་ལླཱ་སེ་ན ཝཱ་ཧ. ཨེ་ཏྠ པ་ན བྱ་ཏི་རེ་ཀ་ཝ་སེ་ན ད་སཱ་ཧཱ་ཏི་ཀྐ་མ་ནཱ་དཱི་སུ ནི་སྶ་གྒི་ཡཾ པཱ་ཙི་ཏྟི་ཡཾ ཝེ་དི་ཏ་བྦ་ནྟི.

ཝི་ཀ་པྤ་ནཱ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.