༧. པ་ཝཱ་ར་ཎཱ་ནི་དྡེ་ས་ཝ་ཎྞ་ནཱ
༧༣. ཨི་དཱ་ནི པ་ཝཱ་ར་ཎཱ་ཝི་དྷིཾ ད་སྶེ་ཏུཾ ‘‘པ་ཝཱ་ར་ཎཱ’’ཏི (པཱ་ཙི. ༢༣༨-༢༣༩; པཱ་ཙི. ཨ་ཊྛ. ༢༣༨-༢༣༩; ཀ་ངྑཱ. ཨ་ཊྛ. པ་ཋ་མ་པ་ཝཱ་ར་ཎཱ་སི་ཀྑཱ་པ་ད་ཝ་ཎྞ་ནཱ) པ་དཾ ཨུ་དྡྷ་ཊཾ. ཏ་ཏྠ ཨི་རི་ཡཱ་པ་ཐེ་ནཱཏི ཋཱ་ན་ག་མ་ན་ས་ཡ་ན་ནི་ས་ཛྫཱ་ནཾ ཨ་ཉྙ་ཏ་རེ་ན ཨི་རི་ཡཱ་པ་ཐེ་ནཱ་ཏི ཨ་ཏྠོ. ཏ་ཏོ ཨི་རི་ཡཱ་པ་ཐ་ཏོ ཨ་ཉྙེ་ན ཨི་རི་ཡཱ་པ་ཐེ་ན ཨ་ན་ཏི་རི་ཏྟ་ཀཾ པ་རི་བྷུ་ཉྫེ་ཡྻ ཙེ, པཱ་ཙི་ཏྟི་ཡ་ནྟི ཨ་ཏྠོ. པཱ་ཙི་ཏྟི་ན་ཏི་རི་ཏྟ་ཀནྟི པཱ་ཙི་ཏྟི ཨ་ན་ཏི་རི་ཏྟ་ཀཾ.
༧༤. ཨི་དཱ་ནི ཡེ་ཧི ཨ་ངྒེ་ཧི པ་ཝཱ་ར་ཎཱ ཧོ་ཏི, ཏཱ་ནི ཨ་ངྒཱ་ནི ད་སྶེ་ཏུཾ ‘‘ཨ་ས་ན’’ནྟི་ཨཱ་དི་མཱ་ཧ. ཏ་ཏྠ ཨ་ས་ནནྟི ཨེ་ཏེ་ན ཨ་ཝི་པྤ་ཀ་ཏ་བྷོ་ཛ་ན་ཏཱ ཝུ་ཏྟཱ, བྷུ་ཉྫ་མཱ་ནོ ཙ སོ པུ་གྒ་ལོ ཧོ་ཏཱི་ཏི ཨ་ཏྠོ. བྷོ་ཛ་ན་ཉྩེ་ཝཱཏི ཡཾ བྷུ་ཉྫ་ནྟོ པ་ཝཱ་རེ་ཏི, ཏཾ ཨོ་ད་ནོ ཀུ་མྨཱ་སོ ས་ཏྟུ མ་ཙྪོ མཾ་ས་ནྟི ཨི་མེ་སུ ཨ་ཉྙ་ཏ་རཾ ཧོ་ཏཱི་ཏི ཨ་ཏྠོ. ཨ་བྷི་ཧཱ་རོཏི དཱ་ཡ་ཀོ ཏ་སྶ ཏཾ བྷ་ཏྟཾ ཀཱ་ཡེ་ན ཨ་བྷི་ཧ་ར་ཏཱི་ཏི ཨ་ཏྠོ, ཝཱ་ཙཱ་བྷི་ཧཱ་རོ པ་ན ན ག་ཧེ་ཏ་བྦོ. ས་མཱི་པ་ཏཱཏི དཱ་ཡ་ཀོ པ་ཝཱ་ར་ཎ་པྤ་ཧོ་ན་ཀ་བྷོ་ཛ་ནཾ ག་ཧེ་ཏྭཱ ཨ་ཌྜྷ་ཏེ་ཡྻ་ཧ་ཏྠ་པྤ་མཱ་ཎེ ཨོ་ཀཱ་སེ ཧོ་ཏཱི་ཏི ཨ་ཏྠོ. ཀཱ་ཡ་ཝཱ་ཙཱ་པ་ཊི་ཀྑེ་པོཏི ཧ་ཏྠ་པཱ་སེ ཋི་ཏེ་ན ཨ་བྷི་ཧ་ཊཾ བྷི་ཀྑཾ ཀཱ་ཡེ་ན ཝཱ ཝཱ་ཙཱ་ཡ ཝཱ པ་ཊི་ཀྑི་པེ་ཡྻཱ་ཏི ཨ་ཏྠོ. ཨེ་ཏྠ པ་ན ས་ཙེ བྷི་ཀྑུ ནི་སི་ནྣོ ཧོ་ཏི, ཨཱ་ནི་ས་ད་སྶ པཱ་རི་མ་ནྟ་ཏོ པ་ཊྛཱ་ཡ, ས་ཙེ ཋི་ཏོ, པ་ཎྷི་ཨ་ནྟ་ཏོ པ་ཊྛཱ་ཡ, ས་ཙེ ནི་པ་ནྣོ, ཡེ་ན པ་སྶེ་ན ནི་པ་ནྣོ, ཏ་སྶ པཱ་རི་མ་ནྟ་ཏོ པ་ཊྛཱ་ཡ དཱ་ཡ་ཀ་སྶཱ་པི ཏ་ཐཱ་ཝི་དྷ་སྶ ཋ་པེ་ཏྭཱ པ་སཱ་རི་ཏ་ཧ་ཏྠཾ ཡཾ ཏ་སྶ ཨཱ་ས་ནྣ་ཏ་རཾ ཨ་ངྒཾ, ཏ་སྶ ཝ་སེ་ན པ་རི་ཙྪེ་དོ ཀཱ་ཏ་བྦོ. པ་ཉྩ ཨ་ངྒཱ པ་ཝཱ་ར་ཎཱཏི ‘‘ཨ་ས་ནཾ པ་ཉྙཱ་ཡ་ཏི, བྷོ་ཛ་ནཾ པ་ཉྙཱ་ཡ་ཏི, ཧ་ཏྠ་པཱ་སེ ཋི་ཏོ ཨ་བྷི་ཧ་ར་ཏི, པ་ཊི་ཀྑེ་པོ པ་ཉྙཱ་ཡ་ཏཱི’’ཏི (པཱ་ཙི. ༢༣༩; པ་རི. ༤༢༨) པཱ་ལི༹་ཡཾ ཝུ་ཏྟེ་ཧི ཨི་མེ་ཧི པ་ཉྩ་ཧི ཨ་ངྒེ་ཧི པ་ཝཱ་ར་ཎཱ ཧོ་ཏཱི་ཏི ཨ་ཏྠོ.
༧༥. ཨི་དཱ་ནི ཨེ་ཏེ་སུ པ་ཉྩ་སུ བྷོ་ཛ་ནཾ ད་སྶེ་ཏུཾ ‘‘ཨོ་ད་ནོ’’ཏི་ཨཱ་དི ཝུ་ཏྟཾ. ཨི་དཱ་ནི ཨོ་ད་ནཱ་ད་ཡོ ཨི་མེ་ཧི ནི་བྦ་ཏྟཱ་ཏི ད་སྶེ་ཏུཾ ‘‘སཱ་ལཱི’’ཏི་ཨཱ་དི་མཱ་ཧ. ཏ་ཏྠ སེ་ཏ་ར་ཏྟ་ཀཱ་ལ༹་བྷེ་དཱ ས་བྦཱ་པི ཀ་ངྒུ་ཛཱ་ཏི་ཡོ ཀ་ངྒཱུཏི ག་ཧེ་ཏ་བྦཱ. ཀཱ་ལ༹་སེ་ཏཱ ཀུ་དྲཱུ་ས་ཝ་ར་ཀཱ. ཨི་མེ་སཾ ས་ཏྟ་ནྣཾ དྷ་ཉྙཱ་ནཾ ཨོ་ད་ནོ ཙ བྷོ་ཛྫ་ཡཱ་གུ ཙ ཨོ་ད་ནོ ནཱ་མཱ་ཏི ཨ་ཏྠོ.
༧༦. སཱ་མཱ་ཀཱ་དི་ཏི་ཎཾ (པཱ་ཙི. ཨ་ཊྛ. ༢༣༨-༢༣༩) ཀུ་དྲཱུ་ས་ཀེ ས་ངྒ་ཧཾ ག་ཏ་ནྟི ཨ་ཏྠོ. ཝ་ར་ཀ་ཙོ་ར་ཀོ ཝ་ར་ཀེ ས་ངྒ་ཧཾ ག་ཏོ, སཱ་ལི་ཡ་ཉྩེ་ཝ ནཱི་ཝཱ་རོ ས་ངྒ་ཧཾ ག་ཏོ སེ་ཏ་ཏྟཱ་ཏི ཝ་ད་ནྟི. ཨི་མེ་སཾ ཝུ་ཏྟ་པྤ་ཀཱ་རཱ་ནཾ སཱ་ནུ་ལོ་མཱ་ནཾ ས་ཏྟ་ནྣཾ དྷ་ཉྙཱ་ནཾ ཏ་ཎྜུ་ལེ ག་ཧེ་ཏྭཱ ‘‘ཡཱ་གུཾ པ་ཙི་སྶཱ་མཱ’’ཏི ཝཱ ‘‘བྷ་ཏྟཾ པ་ཙི་སྶཱ་མཱ’’ཏི ཝཱ ཡཾ ཀི་ཉྩི ས་ནྡྷཱ་ཡ པ་ཙ་ནྟི, ས་ཙེ ཨུ་ཎྷཾ ཝཱ སཱི་ཏ་ལཾ ཝཱ བྷུ་ཉྫ་ནྟཱ་ནཾ བྷོ་ཛ་ན་ཀཱ་ལེ ག་ཧི་ཏ་ག་ཧི་ཏ་ཊྛཱ་ནེ ཨོ་དྷི པ་ཉྙཱ་ཡ་ཏི, ཨ་ཡཾ ཨོ་ད་ནོ ནཱ་མ, པ་ཝཱ་ར་ཎཾ ཛ་ནེ་ཏི. ཡོ་པི པཱ་ཡཱ་སོ ཝཱ ཨ་མྦི་ལ་ཡཱ་གུ ཝཱ ཨུ་དྡྷ་ན་ཏོ ཨོ་ཏཱ་རི་ཏ་མ་ཏྟཱ ཨ་བྦྷུ་ཎྷཱ ཨཱ་ཝི་ཛ྄ཛྷི་ཏྭཱ པི་ཝི་ཏུཾ ས་ཀྐཱ, ག་ཧི་ཏོ་ཀཱ་སེ་པི ཨོ་དྷིཾ ན ད་སྶེ་ཏི, ཨ་ཡཾ པ་ཝཱ་ར་ཎཾ ན ཛ་ནེ་ཏི. ཨུ་སུ་མཱ་ཡ པ་ན ཝི་ག་ཏཱ་ཡ གྷ་ན་བྷཱ་ཝཾ ག་ཙྪ་ཏི, ཨོ་དྷི པ་ཉྙཱ་ཡ་ཏི, པུ་ན པ་ཝཱ་ར་ཎཾ ཛ་ནེ་ཏི, པུ་བྦེ ཏ་ནུ་ཀ་བྷཱ་ཝོ ན ར་ཀྑ་ཏི. བྷ་ཏྟེ པ་ན ཨུ་ད་ཀ་ཀ་ཉྫི་ཀ་ཁཱི་རཱ་དཱི་ནི ཨཱ་ཀི་རི་ཏྭཱ ‘‘ཡཱ་གུཾ ག་ཎྷ་ཐཱ’’ཏི ཝ་ད་ནྟི, ཀི་ཉྩཱ་པི ཏ་ནུ་ཀཱ ཧོ་ཏི, པ་ཝཱ་ར་ཎཾ ཛ་ནེ་ཏི་ཡེ་ཝ ཏ་སྨིཾ ཡཱ་གུ་ཡཱ ན་ཏྠི་བྷཱ་ཝ་ཏོ. ས་ཙེ པ་ན པ་ཀྐུ་ཐི་ཏེ་སུ ཨུ་ད་ཀཱ་དཱི་སུ པ་ཀྑི་པི་ཏྭཱ པ་ཙི་ཏྭཱ དེ་ནྟི, ཡཱ་གུ་ས་ངྒ་ཧ་མེ་ཝ ག་ཙྪ་ཏི.
༧༧. བྷ་ཊྛ་དྷ་ཉྙ་མ་ཡོཏི ས་ཏྟ་ཝི་དྷཱ་ནི་པི དྷ་ཉྙཱ་ནི ག་ཧེ་ཏྭཱ ཁ་ར་པཱ་ཀ་བྷ་ཛྫི་ཏཱ་ནཾ ཏེ་སཾ ཏ་ཎྜུ་ལེ ཀོ་ཊྚེ་ཏྭཱ ཀ་ཏ་ཙུ་ཎྞ་ཀུ་ཎྜ་ཀཱ་ནི ས་ཏྟུ ནཱ་མ. ས་མ་པཱ་ཀ་བྷ་ཛྫི་ཏཱ་ནཾ པ་ན ཨཱ་ཏ་པ་སུ་ཀྑཱ་ནཾ ཝཱ ཏ་ཎྜུ་ལཱ་ནཾ ཙུ་ཎྞ་ཀུ་ཎྜ་ཀཱ་ནི ས་ཏྟུ་ས་ངྑྱཾ ན ག་ཙྪ་ནྟི. ཡ་ཝ་ས་མྦྷ་ཝོཏི ཨ་ཉྙེ་ཧི པ་ན མུ་གྒཱ་དཱི་ཧི ཀ་ཏཀུ་མྨཱ་སོ ན པ་ཝཱ་རེ་ཏཱི་ཏི ཨ་དྷི་པྤཱ་ཡོ. ཨུ་ད་ཀ་ས་མྦྷ་ཝོཏི ཨི་མི་ནཱ ཀ་ཀྐ་ཊ་ཀ་སི་པྤི་ཀ་ས་མྦུ་ཀཱ་ད་ཡོ་པི ས་ངྒ་ཧཾ ག་ཙྪ་ནྟི. ས་ཙེ ཡཱ་གུ་པཱ་ན་ཀཱ་ལེ ཨེ་ཀ་སྨིཾ བྷཱ་ཛ་ནེ ཋ་པེ་ཏྭཱ མ་ཙྪ་མཾ་སཾ ཝཱ ཁཱ་ད་ནྟི, ཏེ ཙེ ཨ་ཁཱ་ད་ནྟོ ཨ་ཉྙཾ པ་ཝཱ་ར་ཎ་པྤ་ཧོ་ན་ཀཾ པ་ཊི་ཀྑི་པ་ཏི, ན པ་ཝཱ་རེ་ཏི. ཁཱ་དི་ཏེ་པི ས་ཙེ མུ་ཁེ ཨ་ཝ་སི་ཊྛཾ ན་ཏྠི, ཏ་དཱ པ་ཊི་ཀྑི་པ་ནྟོ་པི ན པ་ཝཱ་རེ་ཏི་ཡེ་ཝ. ས་ཙེ པ་ཏྟེ ཨ་ཝ་སི་ཊྛཾ ཨ་ཏྠི, མུ་ཁེ ན་ཏྠི, ཏ་ཉྩེ ཨ་ཁཱ་དི་ཏུ་ཀཱ་མོ ཧོ་ཏི, ཨ་ཉྙ་ཏྠ ཝཱ ག་ནྟྭཱ ཁཱ་དི་ཏུ་ཀཱ་མོ, ཏ་སྨིཾ ཁ་ཎེ པ་ཊི་ཀྑི་པ་ནྟོ་པི ན པ་ཝཱ་རེ་ཏི་ཡེ་ཝ.
༧༨. བྷོ་ཛ་ནནྟི (པཱ་ཙི. ཨ་ཊྛ. ༢༣༨-༢༣༩) པ་ཉྩ་སུ བྷོ་ཛ་ནེ་སུ ཡཾ ཀི་ཉྩི བྷོ་ཛ་ནཾ. ཀ་པྤི་ཡཾ ཝཱ ཨ་ཀ་པྤི་ཡཾ ཝཱ བྷུ་ཉྫ་ནྟོ་ཏི ས་མྦ་ནྡྷོ. ནི་སེ་དྷ་ཡནྟི ཀཱ་ཡེ་ནཱ་བྷི་ཧ་ཊཾ ཨ་ངྒུ་ལི་ཙ་ལ་ནཱ་དི་ནཱ ཝཱ བྷ་མུ་ཀ་ཝི་ཀཱ་རེ་ན ཝཱ ཀུ་དྡྷ་བྷཱ་ཝེ་ན ཨོ་ལོ་ཀེ་ན ཝཱ པ་ཊི་ཀྑི་པ་ནྟོ ཀཱ་ཡེ་ན ཝཱ ‘‘ཨ་ལ’’ནྟི ཝཱ ‘‘ན ག་ཎྷཱ་མཱི’’ཏི ཝཱ ‘‘མཱ ཨཱ་ཀི་རཱ’’ཏི ཝཱ ‘‘ཨ་པ་ག་ཙྪཱ’’ཏི ཝཱ ཨཱ་དི་ནཱ ན་ཡེ་ན པ་ཊི་ཀྑི་པ་ནྟོ ཝཱ་ཙཱ་ཡ ཝཱ ནི་སེ་དྷ་ཡ་ནྟོ་ཏི ཨ་ཏྠོ. ཀ་པྤནྟི ཀ་པྤི་ཡ་བྷོ་ཛ་ན་མེ་ཝ པ་ཊི་ཀྑི་པ་ནྟོ སོ པ་ཝཱ་རེ་ཏི, ཨ་ཀ་པྤི་ཡ་མཾ་སཾ ཝཱ བྷོ་ཛ་ནཾ ཝཱ པ་ཊི་ཀྑི་པ་ནྟོ ན པ་ཝཱ་རེ་ཏི. ཀ་སྨཱ? ཏ་སྶ པ་ཊི་ཀྑི་པི་ཏ་བྦ་ཊྛཱ་ནེ ཋི་ཏ་ཏྟཱ. ས་ཙེ ཀ་པྤི་ཡ་བྷོ་ཛ་ནཾ བྷུ་ཉྫ་མཱ་ནོ ཨ་ཀ་པྤི་ཡཾ པ་ཊི་ཀྑི་པ་ཏི, ན པ་ཝཱ་རེ་ཏི. ཀ་སྨཱ? ཏ་སྶ པ་ཊི་ཀྑི་པི་ཏ་བྦ་ཏོ. ཨི་དཱ་ནི མི་སྶ་ཀ་ན་ཡཾ ད་སྶེ་ཏུཾ ‘‘ཏ་ནྣཱ་མེ་ནཱ’’ཏི་ཨཱ་དི ཝུ་ཏྟཾ. ཏ་ཏྲཱ་ཡཾ པི་ཎྜ་ཏྠོ – ཏ་ནྣཱ་མེ་ན ཝཱ ཨི་མ་ནྟི ཝཱ ཨ་བྷི་ཧ་ཊཾ ཀ་པྤི་ཡཾ ནི་སེ་དྷ་ཡཾ པ་ཝཱ་རེ་ཡྻཱ་ཏི. ཀིཾ ཝུ་ཏྟཾ ཧོ་ཏི? ཡོ པ་ན མ་ཙྪ་མཾ་ས་མི་སྶཾ (ཀ་ངྑཱ. ཨ་ཊྛ. པ་ཋ་མ་པ་ཝཱ་ར་ཎཱ་སི་ཀྑཱ་པ་ད་ཝ་ཎྞ་ནཱ; པཱ་ཙི. ཨ་ཊྛ. ༢༣༨-༢༣༩) ཡཱ་གུཾ བྱ་ཉྫ་ནཾ ཝཱ ཨཱ་ཧ་རི་ཏྭཱ ‘‘མ་ཙྪཾ ག་ཎྷ་ཐ, མཾ་སཾ ག་ཎྷ་ཐཱ’’ཏི ཝ་ད་ཏི, ཏཾ པ་ཊི་ཀྑི་པ་ཏོ པ་ཝཱ་ར་ཎཱ ཧོ་ཏི. ས་ཙེ ‘‘ཡཱ་གུཾ ག་ཎྷ་ཐ, ར་ས་བྱ་ཉྫ་ནཾ ག་ཎྷ་ཐཱ’’ཏི ཝ་ད་ཏི, ཏཾ པ་ཊི་ཀྑི་པ་ཏོ པ་ཝཱ་ར་ཎཱ ན ཧོ་ཏི. ཀ་སྨཱ? ཏ་སྶཱ་པི ཨ་ཏྠི་ཏཱ་ཡ. ས་ཙེ ‘‘ཨི་མཾ ག་ཎྷ་ཐཱ’’ཏི ས་ཝ་ཏྠུ་ཀཾ ཀ་ཏྭཱ དེ་ཏི, ཏཾ པ་ཊི་ཀྑི་པ་ཏོ པ་ཝཱ་ར་ཎཱ ཧོ་ཏི. བྷ་ཏྟ་མི་སྶ་ཀེ་པི ཨེ་སེ་ཝ ན་ཡོ. ས་ཙེ ཨ་ཉྙ་སྶ ཨ་བྷི་ཧ་ཊཾ པ་ཊི་ཀྑི་པ་ཏི, པ་ཝཱ་ར་ཎཱ ན་ཏྠི་ཡེ་ཝ.
༧༩-༨༠. ཨི་དཱ་ནི པ་ཝཱ་ར་ཎཾ ཨ་ཛ་ནེ་ནྟེ ད་སྶེ་ཏུཾ ‘‘ལཱ་ཛཱ’’ཏི་ཨཱ་དི ཝུ་ཏྟཾ. ཨེ་ཏྠ ལཱ་ཛཱ ཏཾ་ས་ཏྟུ་བྷ་ཏྟཱ་ནཱིཏི (ཀ་ངྑཱ. ཨ་ཊྛ. པ་ཋ་མ་པ་ཝཱ་ར་ཎཱ་སི་ཀྑཱ་པ་ད་ཝ་ཎྞ་ནཱ) ལཱ་ཛཱ ཙ ལཱ་ཛེ་ཧི ཀ་ཏ་ས་ཏྟུ་བྷ་ཏྟཱ་ནི ཙཱ་ཏི ཨ་ཏྠོ. མ་ཙྪ་མཾ་ས་པཱུ་ཝེ་སུ པ་ན པ་ཝཱ་ར་ཎཱ ཧོ་ཏི, ཏ་སྨཱ ‘‘སུ་དྡྷ་ཁ་ཛྫ་ཀོ’’ཏི ཝུ་ཏྟཾ. བྷ་ཊྛ་པི་ཊྛནྟི པུ་བྦེ ཨཱ་མ་ཀཾ པ་ཙྪཱ བྷ་ཛྫི་ཏ་བྦ་ནྟི ཝུ་ཏྟཾ ཧོ་ཏི. ཝེ་ལུ༹་ཨཱ་དཱི་ནཾ ཝུ་ཏྟཱ་ཝ་སེ་སཱ་ནཾ བྷ་ཏྟ་ནྟི ས་མྦ་ནྡྷོ. ར་ས་ཡཱ་གུ ར་སོ པ་ཀྐ་ཡཱ་གུ. མཾ་སཱ་དཱི་ཧི ཨ་མི་སྶི་ཏཱ སུ་དྡྷ་ཡཱ་གུ. པུ་ཐུ་ཀཱ་མ་ཡཾ པ་ན ཡཾ ཀི་ཉྩི པ་ཝཱ་ར་ཎཾ ན ཛ་ནེ་ཏི.
༨༡. ཝུ་ཊྛཱ་ཡཱཏི (པཱ་ཙི. ཨ་ཊྛ. ༢༣༨-༢༣༩) ཨཱ་ས་ནཱ ཨུ་ཊྛཱ་ཡ ཨ་ཏི་རི་ཏྟཾ ན ཀཱ་ཏ་བྦ་ནྟི ས་མྦ་ནྡྷོ. ས་ཙེ པ་ཝཱ་རེ་ཏྭཱ ཨཱ་ས་ནཱ ན ཝུ་ཊྛཱ་ཏི བྷི་ཀྑུ, ཏ་སྶཱ་པི ཨ་ཏི་རི་ཏྟཾ ཀཱ་ཏུཾ ལ་བྷ་ཏི. ཨ་བྷུ་ཏྟེ་ན ཙ བྷོ་ཛ་ནནྟི ཡེ་ན པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རཾ བྷོ་ཛ་ནཾ ཨ་ནྟ་མ་སོ ཀུ་ས་གྒེ་ནཱ་པི ན བྷུ་ཏྟཾ, ཏེ་ནཱ་པི ཨ་ཏི་རི་ཏྟཾ ན ཀཱ་ཏ་བྦ་ནྟི ཨ་ཏྠོ. ཡེ་ན པ་ན ཨ་རུ་ཎུ་གྒ་མེ་པི བྷུ་ཏྟཾ ཧོ་ཏི, སོ ཙེ ཨ་པ་ཝཱ་རི་ཏོ ཨཱ་ས་ནཱ ཝུ་ཊྛི་ཏོ་པི མ་ཛ྄ཛྷ་ནྷི་ཀ་ས་མ་ཡེ་པི པུ་ན ཀི་ཉྩི ཨ་བྷུ་ཏྭཱ་པི ཀཱ་ཏུཾ ལ་བྷ་ཏི. ཡེ་ན ཡཾ ཝཱ པུ་རེ ཀ་ཏནྟི ཡེ་ན ཡཾ ཝཱ པུ་བྦེ ཀ་ཏཾ, ཏེ་ན ཏ་མྤི པ་ཙྪཱ ན ཀཱ་ཏ་བྦཾ. ཨ་ཉྙེ་ན པ་ན ཏཾ ཀཱ་ཏུཾ ཝ་ཊྚ་ཏཱི་ཏི ཝ་ད་ནྟི.
༨༢. ཡཾ ཕ་ལཾ ཝཱ ཀ་ནྡ་མཱུ་ལཾ ཝཱ པ་ཉྩ་ཧི ས་མ་ཎ་ཀ་པྤེ་ཧི ཀ་ཏ་ཀ་པྤི་ཡཾ ཨ་ཉྙ་མྤི ཀ་པྤི་ཡ་བྷོ་ཛ་ནཾ ཝཱ ཀ་པྤི་ཡ་མཾ་སཾ ཝཱ, ཨི་དཾ ཀ་པྤི་ཡཾ ནཱ་མ, ཝུ་ཏྟ་པྤ་ཀཱ་ར་ཝི་པ་རཱི་ཏཾ ཨ་ཀ་པྤི་ཡཾ ནཱ་མ, ཏ་སྨིཾ ཨ་ཏི་རི་ཏྟ་ཀ་ར་ཎཾ ན རུ་ཧ་ཏི, ཡ་ཉྩ པ་ཊི་གྒ་ཧེ་ཏྭཱ ན ག་ཧི་ཏཾ, ཏ་སྨི་མྤི ན རུ་ཧ་ཏི, ཏེ་ན ཝུ་ཏྟཾ ‘‘ཀ་པྤི་ཡཾ ག་ཧི་ཏ་ཉྩེ་ཝཱ’’ཏི. ཨུ་ཙྩཱ་རི་ཏནྟི ཀ་པྤི་ཡཾ ཀཱ་རེ་ཏུཾ ཨཱ་ག་ཏེ་ན བྷི་ཀྑུ་ནཱ ཨཱི་ས་ཀ་མྤི ཨུ་ཀྑི་ཏྟཾ ཝཱ ཨ་པ་ན་མི་ཏཾ ཝཱ་ཏི ཨ་ཏྠོ. ཧ་ཏྠ་པཱ་ས་ཏོ བ་ཧི ཋི་ཏཾ ཀཱ་ཏུཾ ན ཝ་ཊྚ་ཏི, ཏེ་ན ཝུ་ཏྟཾ ‘‘ཧ་ཏྠ་པཱ་ས་ག’’ནྟི. ཨ་ཏི་རི་ཏྟཾ ཀ་རོ་ནྟེ་ཝནྟི ཨ་ཏི་རི་ཏྟཾ ཀ་རོ་ནྟོ ‘‘ཨ་ལ་མེ་ཏཾ ས་བྦ’’ནྟི ཝ་ཙཱི་བྷེ་དཾ ཀ་ཏྭཱ ཨེ་ཝཾ བྷཱ་ས་ཏཱུཏི ཨ་ཏྠོ. ‘‘ཨ་ལ་མེ་ཏཾ ས་བྦ’’ནྟི ཏི་ཀྑ་ཏྟུཾ ཝ་ཏྟ་བྦཾ, ཨ་ཡཾ ཀི་ར ཨཱ་ཙི་ཎྞོ. ཝི་ན་ཡ་དྷ་རཱ ཀི་ར པ་ན ‘‘ས་ཀིཾ ཨེ་ཝ ཝ་ཏྟ་བྦ’’ནྟི ཝ་ད་ནྟི. ཨ་ལ་མེ་ཏཾ ས་བྦནྟི ཨི་ད་མྤི ཝོ ཨ་དྷི་ཀཾ, ཨི་ཏོ ཨ་ཉྙཾ ན ལ་ཙྪ་སཱི་ཏི ཨ་ཏྠོ.
༨༣. ཨ་ནུ་པ་ས་མྤ་ནྣ་ཧ་ཏྠ་གནྟི ཀ་པྤི་ཡཾ ཀ་རོ་ནྟེ་ན པ་ན ཨ་ནུ་པ་ས་མྤ་ནྣ་སྶ ཧ་ཏྠེ ཋི་ཏཾ་ཡེ་ཝ ན ཀཱ་ཏ་བྦཾ, ཏཾ པ་ན ཨ་ཉྙེ་ན བྷི་ཀྑུ་ནཱ པ་ཊི་གྒ་ཧཱ་པེ་ཏྭཱ ཏ་སྶ ཧ་ཏྠེ ཋི་ཏཾ ཨ་ཏི་རི་ཏྟཾ ཀ་ཏྭཱ ཨ་ནུ་པ་ས་མྤ་ནྣ་སྶ དཱ་ཏུཾ ཝ་ཊྚ་ཏི. ཨ་ཏྟ་ནཱ ཨཱ་ག་ནྟྭཱ ཨ་ཉྙ་སྶ ཧ་ཏྠེ ཙ པེ་ས་ཡི་ཏྭཱ་པི ཀཱ་རེ་ཏུཾ ལ་བྦྷ་ཏེཏི ཨ་ཏྠོ. ཏཾ པ་ན ཨ་ཏི་རི་ཏྟ་ཀཱ་ར་ཀཾ ཋ་པེ་ཏྭཱ ཨ་ཉྙོ ས་བྦོ པ་ཝཱ་རི་ཏོ་པི ཨ་པྤ་ཝཱ་རི་ཏོ་པི བྷུ་ཉྫི་ཏུཾ ལ་བྷ་ཏཱི་ཏི ཨ་ཏྠོ. ས་ཙེ པ་ཝཱ་རི་ཏོ པ་རི་བྷུ་ཉྫ་ཏི, ཡ་ཐཱ ཨ་ཀ་ཏེ་ན མི་སྶཾ ན ཧོ་ཏི, ཏ་ཐཱ མུ་ཁ་ཉྩ ཧ་ཏྠ་ཉྩ སུ་དྡྷཾ ཀ་ཏྭཱ བྷུ་ཉྫི་ཏ་བྦཾ. གི་ལཱ་ན་སྶ བྷུ་ཏྟཱ་ཝ་སེ་ས་མྤི ཏ་སྶ ‘‘ཨ་ཛྫ ཝཱ སྭེ ཝཱ ཁཱ་དི་སྶ་ཏཱི’’ཏི ཨཱ་ཧ་ཊ་མྤི ཨ་ན་ཏི་རི་ཏྟ་ཀ་ཏཾ བྷུ་ཉྫི་ཏུཾ ཝ་ཊྚ་ཏཱི་ཏི. པ་ཝཱ་ར་ཎཱ་ཝི་ནི་ཙྪ་ཡོ.
པ་ཝཱ་ར་ཎཱ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.