༤༥. པ་ཝཱ་ར་ཎཱ་ནི་དྡེ་ས་ཝ་ཎྞ་ནཱ
༤༣༣. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་ཉྩ་ནྣཾ ས་ངྒྷེ པ་ཝཱ་རེ་ཏུ’’ནྟི (མ་ཧཱ་ཝ. ༢༡༥) ཝུ་ཏྟ་ཏྟཱ ‘‘སེ་སཱ ས་ངྒྷ་པྤ་ཝཱ་ར་ཎཱ’’ཏི (མ་ཧཱ་ཝ. ༢༡༥ ཨཱ་ད་ཡོ) ཝུ་ཏྟཱ.
༤༣༤. ཨ་ཛྫ པ་ཝཱ་ར་ཎཱཏི ཨེ་ཏྠ (མ་ཧཱ་ཝ. ༢༡༥ ཨཱ་ད་ཡོ) པ་ན ཙཱ་ཏུ་དྡ་སི་ཀཱ་ཡ པ་ཝཱ་ར་ཎཱ་ཡ ‘‘ཨ་ཛྫ པ་ཝཱ་ར་ཎཱ ཙཱ་ཏུ་དྡ་སཱི’’ཏི པུ་བྦ་ཀི་ཙྩཾ ཀཱ་ཏ་བྦཾ, པ་ནྣ་ར་སི་ཡཾ ‘‘ཨ་ཛྫ པ་ཝཱ་ར་ཎཱ པ་ནྣ་ར་སཱི’’ཏི.
༤༣༧. ཐེ་རེ་སུ ཨུ་ཀྐུ་ཊི་ཀཾ ནི་ས་ཛྫ པ་ཝཱ་རེ་ནྟེ་སུ ས་ཡཾ པ་ན ན་ཝོ ཡཱ་ཝ པ་ཝཱ་རེ་ཏི, ཏཱ་ཝ ཨུ་ཀྐུ་ཊི་ཀོ་ཝ ཨ་ཙྪ་ཏཱུ་ཏི ཨ་ཏྠོ. ‘‘ན བྷི་ཀྑ་ཝེ ཐེ་རེ་སུ ཨུ་ཀྐུ་ཊི་ཀཾ ནི་སི་ནྣེ་སུ པ་ཝཱ་ར་ཡ་མཱ་ནེ་སུ ཨཱ་ས་ནེ་སུ ཨ་ཙྪི་ཏ་བྦཾ. ཡོ ཨ་ཙྪེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཏ་ད་མ་ནྟ་རཱ ཨུ་ཀྐུ་ཊི་ཀཾ ནི་སཱི་དི་ཏུཾ, ཡཱ་ཝ པ་ཝཱ་རེ་ཏི, པ་ཝཱ་རེ་ཏྭཱ ཨཱ་ས་ནེ ནི་སཱི་དི་ཏུ’’ནྟི (མ་ཧཱ་ཝ. ༢༡༡) ཧི ཝུ་ཏྟཾ.
༤༤༠-༢. ཨེ་ཝཾ ཏེ་ཝཱ་ཙི་ཀ་པྤ་ཝཱ་ར་ཎཾ ད་སྶེ་ཏྭཱ ཨི་དཱ་ནི དྭེ་ཝཱ་ཙི་ཀ་ཨེ་ཀ་ཝཱ་ཙི་ཀ་ས་མཱ་ན་ཝ་སྶི་ཀ་པྤ་ཝཱ་ར་ཎཱ་སུ ཀ་ཏྟ་བྦཾ ད་སྶེ་ཏུཾ ‘‘དཱ་ནེ་ནཱ’’ཏི་ཨཱ་དི་མཱ་ཧ. ཏ་ཏྠ དཱ་ནེ་ནཱཏི དཱ་ནེ་ན ཝཱ. དྷ་མྨ་སཱ་ཀ་ཙྪཱཏི ཨི་མི་ནཱ དྷ་མྨ་ཀ་ཐཱ་སུ་ཏྟ་ས་ངྒཱ་ཡ་ནཱ་ཝི་ན་ཡ་ཝི་ནི་ཙྪ་ཡཱ་ད་ཡོ ག་ཧི་ཏཱ. དཱ་ནེ་ན ཝཱ དྷ་མྨ་སཱ་ཀ་ཙྪཱ་ཡ ཝཱ ཀ་ལ་ཧེ་ན ཝཱ ར་ཏྟི་ཡཱ ཁེ་པི་ཏ་བྷཱ་ཝ་ཏོ ཏེ་ཝཱ་ཙི་ཀཱ་ཡ ཨོ་ཀཱ་སེ ཨ་ས་ཏི ད་ས་ཝི་དྷེ ཝཱ ཨ་ནྟ་རཱ་ཡེ ཨ་ནུ་རཱུ་པ་ཏོ ཨུ་ཏྟིཾ ཋ་པེ་ཏྭཱ པ་ཝཱ་རེ་ཡྻཱ་ཏི ས་མྦ་ནྡྷོ.
ཨི་དཱ་ནི ཡ་ཐཱ་ནུ་རཱུ་པ་ཏོ ཉ་ཏྟི ཋ་པི་ཏཱ, ཏཾ ད་སྶེ་ཏུཾ ‘‘སུ་ཎཱ་ཏུ མེ’’ཏི་ཨཱ་དི་མཱ་ཧ. ཡ་ཐཱ་ཋ་པི་ཏ་ཉ་ཏྟི་ཡཱཏི ཨེ་ཏྠ ས་བྦ་ས་ངྒཱ་ཧི་ཀཱ་ཙེ་ཉ་ཏྟི་ཋ་པི་ཏཱ, ཏེ་ཝཱ་ཙི་ཀ་དྭེ་ཝཱ་ཙི་ཀ་ཨེ་ཀ་ཝཱ་ཙི་ཀཱ་ནཾ ཝ་སེ་ན པ་ཝཱ་རེ་ཏ་བྦཾ, ས་མཱ་ན་ཝ་སྶི་ཀ་པྤ་ཝཱ་ར་ཎཱ་ཝ ཨེ་ཀཱ ན ཝ་ཊྚ་ཏི. ས་ཙེ ‘‘ས་ངྒྷོ ཏེ་ཝཱ་ཙི་ཀཾ པ་ཝཱ་རེ་ཡྻཱ’’ཏི ཋ་པི་ཏཱ, ཏེ་ཝཱ་ཙི་ཀཱ ཨེ་ཝ ཝ་ཊྚ་ཏི, དྭེ་ཝཱ་ཙི་ཀཱ་ད་ཡོ ན ཝ་ཊྚ་ནྟི. ‘‘དྭེ་ཝཱ་ཙི་ཀཾ པ་ཝཱ་རེ་ཡྻཱ’’ཏི ཝུ་ཏྟེ དྭེ་ཝཱ་ཙི་ཀ་ཉྩ ཏེ་ཝཱ་ཙི་ཀ་ཉྩ ཝ་ཊྚ་ཏི, ཨེ་ཀ་ཝཱ་ཙི་ཀ་ས་མཱ་ན་ཝ་སྶི་ཀཱ ན ཝ་ཊྚ་ནྟི. ‘‘ཨེ་ཀ་ཝཱ་ཙི་ཀཾ པ་ཝཱ་རེ་ཡྻཱ’’ཏི ཝུ་ཏྟེ པ་ན ས་མཱ་ན་ཝ་སྶི་ཀཾ ཋ་པེ་ཏྭཱ སེ་སཱ ཝ་ཊྚ་ནྟི. ‘‘ས་མཱ་ན་ཝ་སྶི་ཀ’’ནྟི པ་ན ཝུ་ཏྟེ ས་བྦཾ ཝ་ཊྚ་ཏཱི་ཏི. ཨཱ་དི་ཀེ ཙེ་ཏྠ ཨཱ་ཧ་རེཏི ཨེ་ཏྠ པ་ཝཱ་ར་ཎཱ་ཡ་པི པུ་བྦེ ཨུ་པོ་ས་ཐེ ཝུ་ཏྟེ ‘‘ཡ་དི ས་མཱ ཨཱ་ག་ཙྪེ་ཡྻུ’’ནྟི་ཨཱ་དི་ཀེ ཝཱ་རེ ཨཱ་ཧ་རེ་ཏི ཨ་ཏྠོ.
༤༤༣. ཨི་དཱ་ནི ཝ་ཏྟ་བྦཾ ས་ནྡྷཱ་ཡ ‘‘ཨེ་ཝ’’ནྟི ཝུ་ཏྟཾ. ཏི་ཝ་གྒོ ཙ ཙ་ཏུ་ཝ་གྒོ ཙ ཏི་ཙ་ཏུ་ཝ་གྒོ.
༤༥༠. ‘‘ན བྷི་ཀྑ་ཝེ སཱ་པ་ཏྟི་ཀེ་ན པ་ཝཱ་རེ་ཏ་བྦཾ. ཡོ པ་ཝཱ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི (མ་ཧཱ་ཝ. ༢༣༥) ཝུ་ཏྟ་ཏྟཱ སཱ་པ་ཏྟི་ཀེ་ན་པི ཝེ་མ་ཏི་ཀེ་ན་པི པ་ཝཱ་རི་ཡ་མཱ་ནེ ཨཱ་པ་ཏྟིཾ ས་ར་ནྟེ་ན་པི ཨུ་པོ་ས་ཐེ ཝུ་ཏྟ་ན་ཡེ་ན པ་ཊི་པ་ཛྫི་ཏ་བྦཾ. ‘‘ཝ་གྒེ ས་མ་གྒེ ཝ་གྒོ་ཏི-ས་ཉྙི་ནོ ཝི་མ་ཏི་སྶ ཝཱ’’ཏི་ཨཱ་དི་གཱ་ཐཱ་ཏོ པ་ཊྛཱ་ཡ ཡཱ་ཝ ‘‘ཨ་ནྟ་རཱ་ཡཾ ཝ ས་ངྒྷཾ ཝཱ-དྷི་ཊྛཱ་ཏུཾ སཱི་མ་མེ་ཝ ཝཱ’’ཏི ཨ་ཝ་སཱ་ན་གཱ་ཐཱ, ཏཱ་ཝ སེ་སཱ ཨུ་པོ་ས་ཐེ ཝུ་ཏྟཱ གཱ་ཐཱ་ཡོ་ཏི ཨ་དྷི་པྤེ་ཏཱ.
༤༥༡. པ་ཝཱ་རི་ཏེ ཙཱཏི (མ་ཧཱ་ཝ. ༢༡༣ ཨཱ་ད་ཡོ) པ་ཋ་མ་པ་ཝཱ་ར་ཎཱ་ཡ ས་ངྒྷ་མྷི པ་ཝཱ་རི་ཏེ་ཏི ཨ་དྷི་པྤཱ་ཡོ. ཨེ་ཏྠ ཨ་ཝུ་ཏྠོཏི པ་ཙྪི་མི་ཀཱ་ཡ ཨུ་པ་ག་ཏོ ཨ་པ་རི་ནི་ཊྛི་ཏ་ཏྟཱ ‘‘ཨ་ཝུ་ཏྠོ’’ཏི ཝུ་ཙྩ་ཏི.
༤༥༢. ཙཱ་ཏུ་མཱ་སི་ནཱིཏི ཀ་ཏྟི་ཀ་པུ་ཎྞ་མཱི. ཨེ་ཏྠ ཝུ་ཏྠ་ཝ་སྶཱ ནཱ་མ པ་ཙྪི་མི་ཀཱ་ཡ ཨུ་པ་ག་ཏཱ. པ་ཝཱ་ར་ཎཱ་ཝི་ནི་ཙྪ་ཡོ.
པ་ཝཱ་ར་ཎཱ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.