༤༣. ཚ་ནྡ་དཱ་ན་ནི་དྡེ་ས་ཝ་ཎྞ་ནཱ
༣༩༩. ཀ་མྨ་པྤ་ཏྟེ ས་ངྒྷེ ས་མཱ་ག་ཏེ་ཏི ས་མྦ་ནྡྷོ. ཨེ་ཏེ་ན ས་ངྒྷེ ཨ་ས་མཱ་ག་ཏེ ཚ་ནྡ་དཱ་ནཾ ན རུ་ཧ་ཏཱི་ཏི དཱི་པི་ཏཾ ཧོ་ཏཱི་ཏི ཝ་ད་ནྟི. ཨེ་ཏྠཱ་ཡཾ ཝི་ཙཱ་ར་ཎཱ – པ་ཉྩ་བྷི་ཀྑུ་ཀེ ཝི་ཧཱ་རེ ཨེ་ཀ་སྶ ཚ་ནྡ་པཱ་རི་སུ་དྡྷིཾ ཨཱ་ཧ་རི་ཏྭཱ སེ་སཱ་ནཾ ཨུ་པོ་ས་ཐཱ་དི་ཀ་ར་ཎཾ ཨ་ནུ་ཉྙཱ་ཏཾ པཱ་ལི༹་ཡཾ (པ་རི. ༤༩༦-༤༩༧) ཨ་ཊྛ་ཀ་ཐཱ་ཡ་ཉྩ (པ་རི. ཨ་ཊྛ. ༤༨༧-༤༨༨). ཏེ་སུ ཨེ་ཀོ ཚ་ནྡ་དཱ་ཡ་ཀོ, ཨེ་ཀོ ཚ་ནྡ་ཧཱ་ར་ཀོ, ཏེ མུ་ཉྩི་ཏྭཱ ན ཨེ་ཏྠ ས་ནྣི་པ་ཏི་ཏོ ས་ངྒྷོ ཏི་ཎྞཾ ས་མཱུ་ཧ་བྷཱ་ཝ་ཏོ, ཏ་སྨཱ ཨ་ས་མཱ་ག་ཏེ་པི དཱ་ཏུཾ ཝ་ཊྚ་ཏི. ཨཱ་རོ་ཙེ་ནྟེ་ན པ་ན ས་མཱ་ག་ཏེ ཨེ་ཝ ཨཱ་རོ་ཙེ་ཏ་བྦཾ. ཨི་དྷཱ་པི ‘‘ཧ་རེ་ཡྻཱ’’ཏི ཝུ་ཏྟཾ, ན ‘‘དེ་སེ་ཡྻཱ’’ཏི. ཏ་ཏྠ ཚ་ནྡ་ཧཱ་ར་ཀེ་ན ས་དྡྷིཾ ཀ་མྨ་པྤ་ཏྟཱ་ནཾ ས་ནྣི་པཱ་ཏོ ཝེ་དི་ཏ་བྦོ.
༤༠༠. ཨི་དཱ་ནི ཚ་ནྡ་དཱ་ན་ཝི་དྷིཾ ད་སྶེ་ཏུཾ ‘‘ཨེ་ཀཾ བྷི་ཀྑུ’’ནྟི་ཨཱ་དི་མཱ་ཧ (ཀ་ངྑཱ. ཨ་ཊྛ. ནི་དཱ་ན་ཝ་ཎྞ་ནཱ).
༤༠༡. (ཀ) ‘‘ཚ་ནྡཾ ད་མྨཱི’’ཏི ཨེ་ཏྟ་ཀ་མེ་ཝ ཨ་ལཾ, ‘‘ཧ་ར, ཨཱ་རོ་ཙེ་ཧཱི’’ཏི ཨི་མེ་ཧི ཀིཾ་པ་ཡོ་ཛ་ན་ནྟི ཙེ? ཝུ་ཙྩ་ཏེ – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཏ་ད་ཧུ་པོ་ས་ཐེ པཱ་རི་སུ་དྡྷིཾ དེ་ནྟེ་ན ཚ་ནྡ་མྤི་དཱ་ཏུཾ, ས་ནྟི ས་ངྒྷ་སྶ ཀ་ར་ཎཱི་ཡ’’ནྟི (མ་ཧཱ་ཝ. ༡༦༥) ཝུ་ཏྟ་ཏྟཱ བྷ་ག་ཝ་ཏོ ཨཱ་ཎཾ ཀ་རོ་ནྟེ་ན ‘‘ཚ་ནྡཾ ད་མྨཱི’’ཏི ཝུ་ཏྟཾ. ‘‘ཚ་ནྡ་ཧཱ་ར་ཀོ ཙེ, བྷི་ཀྑ་ཝེ, དི་ནྣེ ཚ་ནྡེ ཨ་ནྟ་རཱ་མ་གྒེ པ་ཀྐ་མ་ཏི, ཨ་ནཱ་ཧ་ཊོ་ཝ ཧོ་ཏི ཚ་ནྡོ’’ཏི (མ་ཧཱ་ཝ. ༡༦༥) ཝུ་ཏྟ་ཏྟཱ ཚ་ནྡ་ཧཱ་ར་ཀ་སྶ ཨ་ཉྙ་སྶ ཨ་པ་ཀྐ་མ་ན་ཏྠཱ་ཡ པཱ་རི་སུ་དྡྷིཾ དེ་ནྟེ་ན ‘‘ཨི་དཾ ཀ་རོ་ཧི ཨེ་ཝཱ’’ཏི ཨཱ་ཎཱ་པེ་ནྟེ་ན ‘‘ཚ་ནྡཾ མེ ཧ་རཱ’’ཏི ཝུ་ཏྟཾ. ‘‘ཚ་ནྡ་ཧཱ་ར་ཀོ ཙེ, བྷི་ཀྑ་ཝེ, དི་ནྣེ ཚ་ནྡེ ས་ངྒྷ་པྤ་ཏྟོ ས་ཉྩི་ཙྩ ནཱ་རོ་ཙེ་ཏི, ཨཱ་ཧ་ཊོ ཧོ་ཏི ཚ་ནྡོ, ཚ་ནྡ་ཧཱ་ར་ཀ་སྶ ཨཱ་པ་ཏྟི དུ་ཀྐ་ཊ་སྶཱ’’ཏི (མ་ཧཱ་ཝ. ༡༦༥) ཝུ་ཏྟ་ཏྟཱ ‘‘ཡ་དི་ཏྭཾ ས་ཉྩི་ཙྩ ནཱ་རོ་ཙེ་སྶ་སི, ཨཱ་པ་ཏྟིཾ ཨཱ་པ་ཛྫི་སྶ་སི, ཨཱ་རོ་ཙེ་ཧི ཨེ་ཝཱ’’ཏི ཏ་སྶ ཨཱ་ཙི་ཀྑ་ནྟོ ‘‘ཨཱ་རོ་ཙེ་ཧཱི’’ཏི ཨཱ་ཧཱ་ཏི ཨེ་ཝ་མེ་ཏྠ ཨི་མེ་སཾ པ་དཱ་ནཾ ས་པྤ་ཡོ་ཛ་ན་ཏཱ ཝེ་དི་ཏ་བྦཱ. ཨེ་ཝཾ པཱ་རི་སུ་དྡྷི་དཱ་ནེ་པཱི་ཏི.
༤༠༢. སེ་ས་ཀ་མྨནྟི ཡ་དི ས་ངྒྷོ ཨུ་པོ་ས་ཐ་གྒེ ཨ་ཉྙཾ ཨ་པ་ལོ་ཀ་ནཱ་དི་ཀ་མྨཾ ཀ་རོ་ཏི, ཏཾ ཀ་མྨཾ ཝི་བཱ་དྷ་ཏི, ཝི་ཀོ་པེ་ཏཱི་ཏི ཨ་ཏྠོ.
༤༠༣. དྭ་ཡནྟི ཨུ་པོ་ས་ཐ་ཉྩ སེ་ས་ཀ་མྨ་ཉྩཱ་ཏི ཨ་ཏྠོ. ན་ཏྟ་ནོཏི ཨ་ཏྟ་ནོ ཨུ་པོ་ས་ཐཾ ན ས་མྤཱ་དེ་ཏི.
༤༠༥. ‘‘ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ’’ཏི་ཨཱ་དི་ཀཾ (མ་ཧཱ་ཝ. ༢༡༣) ས་བྦཱུ་པ་ཙཱ་རཾ ཀ་ཏྭཱ་ནཱཏི ཨ་ཏྠོ.
༤༠༦. ‘‘ཨི་ཏྠ་ནྣཱ་མེ་ན པ་ཝཱ་ར་ཎཱ དི་ནྣཱ’’ཏི ཨཱ་རོ་ཙེ་ཏྭཱ.
༤༠༨. པ་ཊི་ཛཱ་ནེ་ཡྻ ནཱ་ཧ་ཊཱཏི (མ་ཧཱ་ཝ. ༡༦༤-༡༦༥, ༢༡༣) པཱ་ཋེ ན ཨཱ་ཧ་ཊཱ་ཏི ནཱ་ཧ་ཊཱ, ཨཱ་ཧ་ཊཱ ན ཧོ་ཏཱི་ཏི ཨ་ཏྠོ. ཏ་ཐཱ ཧེ་ཡྻཱཏི ཝི་བྦྷ་མ་ནཱ་དཱི་ནི ཀ་རེ་ཡྻཱ་ཏི ཨ་ཏྠོ.
༤༠༩. སུ་ཏྟོ ཝཱ ནཱ་རོ་ཙ་ཡེ་ཡྻ, ཨཱ་ཧ་ཊཱ ཧོ་ཏཱི་ཏི ས་མྦ་ནྡྷོ. ཨ་ནཱ་པ་ཏྟི་ཝཱཏི ཨ་ནཱ་པ་ཏྟི ཨེ་ཝ. ཚ་ནྡ་དཱ་ན་ཝི་ནི་ཙྪ་ཡོ.
ཚ་ནྡ་དཱ་ན་ནི་དྡེ་ས་ཝ་ཎྞ་ནཱ ནི་ཊྛི་ཏཱ.