༣༥. པ་རི་ཀྑཱ་ར་ནི་དྡེ་ས་ཝ་ཎྞ་ནཱ

༢༥༩-༢༦༠. གི་རི་ཀཱུ་ཊནྟི མ་ཀ་ར་ད་ནྟ་ཀཾ. སི་བྦི་ཏུ་ཉྩ ཚི་ནྡི་ཏུ་ཉྩ ན ཝ་ཊྚ་ཏཱི་ཏི ས་བྦ་ཏྠ ཡོ་ཛ་ནཱ. ད་ཎྜེཏི ཚ་ཏྟ་ད་ཎྜེ.

༢༦༡. སི་བྦི་ཏུཾ ཝཱ པ་ཉྫ་རཾ ཝི་ན་ནྡྷི་ཏུཾ ཝཱ ཐི་ར་ཏྠཾ ཚ་ཏྟེ བ་ནྡྷི་ཏུཾ ད་ཎྜེ ལེ་ཁཱ ཝ་ཊྚ་ཏཱི་ཏི ས་མྦ་ནྡྷོ. ས་ཙེ ཝུ་ཏྟ་པྤ་ཀཱ་རཾ ཨ་ཀ་པྤི་ཡ་ཚ་ཏྟཾ ལ་བྷ་ཏི, གྷ་ཊ་ཀ་མྤི ཝཱ་ལ༹་རཱུ་པ་མྤི ཚི་ནྡི་ཏྭཱ དྷཱ་རེ་ཏ་བྦཾ, ལེ་ཁཱ་པི གྷཾ་སེ་ཏྭཱ ཨ་པ་ནེ་ཏ་བྦཱ, སུ་ཏྟ་ཀེ་ན ཝཱ ད་ཎྜོ ཝེ་ཋེ་ཏ་བྦོ.

༢༦༢. ཨ་ནུ་ཝཱ་ཏཾ ས་ནྡྷཱ་ཡ ‘‘ཨ་ནྟེ ཝཱ’’ཏི ཝུ་ཏྟཾ. དྭི་ནྣཾ པ་ཊྚཱ་ནཾ ས་ངྒྷ་ཊི་ཏ་ཊྛཱ་ནཾ ས་ནྡྷཱ་ཡ ‘‘པ་ཊྚ་མུ་ཁེ ཝཱ་པཱི’’ཏི ཝུ་ཏྟཾ. ཝ་ར་ཀ་སཱི་སཱ་ཀཱ་རེ་ན སི་བྦ་ནཾ ས་ནྡྷཱ་ཡ ‘‘ཝེ་ཎི་ཀཱ’’ཏི ཙ ས་ཏ་པ་དཱ་ཀཱ་རེ་ན སི་བྦ་ནཾ ས་ནྡྷཱ་ཡ ‘‘ས་ངྑ་ལི་ཀཱ་པི ཝཱ’’ཏི ཙ ཝུ་ཏྟཾ. ས་ཏ་པ་དི་ས་དི་སཾ ཨ་ཉྙཾ ཝཱ སཱུ་ཙི་ཝི་ཀཱ་རཾ ན ཀ་པྤ་ཏི, པ་ཀ་ཏི་སཱུ་ཙི་ཀ་མྨ་མེ་ཝ ཝ་ཊྚ་ཏཱི་ཏི ཨ་ཏྠོ. པཱ་ལི༹་ཀ་ཎྞི་ཀ་ཨཱ་དི་ཀཾ ཙཱི་ཝ་རེ ན ཙ ཀ་པྤ་ཏཱི་ཏི ས་མྦ་ནྡྷོ.

༢༦༣-༤. ཙ་ཏུ་ཀོ་ཎཱ་ཝ (པཱ་རཱ. ཨ་ཊྛ. ༡.༨༥) ཀ་པྤ་རེ་ཏི ས་མྦ་ནྡྷོ. ཨ་གྒྷི་ཀནྟི ཨ་གྒྷི་ཡཾ ཙེ་ཏི་ཡ་ས་དི་སཾ. ཨེ་ཏྠཱཏི ག་ཎྛི་པཱ་ས་ཀ་པ་ཊྚེ. ཀོ་ཎ་སུ་ཏྟཱ ཙ པཱི་ལ༹་ཀཱཏི ན ཀེ་ཝ་ལཾ ཙ་ཏུ་ཀོ་ཎཱ ག་ཎྛི་ཀ་པཱ་ས་ཀ་པ་ཊྚཱ་ཝ ཀ་པྤ་ནྟི, ཨ་ཐ ཁོ དུ་ཝི་ཉྙེ་ཡྻཱ ཀོ་ཎ་སུ་ཏྟ་པཱི་ལ༹་ཀཱ ཙ ཀ་པྤ་རེ་ཏི ཨ་ཏྠོ. ག་ནྡྷཾ ཏེ་ལཾ ཝཱཏི ག་ནྡྷཾ ཝཱ ཏེ་ལཾ ཝཱ.

༢༦༥. ར་ཏྟནྟི (པཱ་རཱ. ཨ་ཊྛ. ༡.༨༥) ར་ཛི་ཏཾ. ཨ་ཉྙེ་ན ཝཱཏི མུ་གྒ་རཱ་དི་ནཱ ཝཱ. ཀ་ཏྭཱཏི ཋ་པེ་ཏྭཱ. པ་ཧཱ་རེ ན ཙ མུ་ཊྛི་ནཱཏི མུ་ཊྛི་ནཱ ན པ་ཧཱ་རེ་ཡྻཱ་ཏི ཨ་ཏྠོ.

༢༦༦-༧. ཚ་ཏྟ་ཝ་ཊྚི་ཡཾ (པཱ་རཱ. ཨ་ཊྛ. ༡.༨༥) ལེ་ཁཾ ཋ་པེ་ཏྭཱ དྷ་མྨ་ཀ་ར་ཎེ ལེ་ཁཱ ན ཝ་ཊྚ་ཏཱི་ཏི ས་མྦ་ནྡྷོ. ཀུ་ཉྩི་ཀཱ་ཡ ཙ པི་པྥ་ལེ ཙ མ་ཎི་ཀཱ ཙ པཱི་ལ༹་ཀཱ ཙ ན ཝ་ཊྚ་ཏཱི་ཏི ས་མྦ་ནྡྷོ. ཏ་ཏྠ མ་ཎི་ཀཱཏི ཨེ་ཀཱ ཨེ་ཝ ཝ་ཊྚ་མ་ཎི་ཀཱ. པཱི་ལ༹་ཀཱ མུ་ཏྟ་རཱ་ཛི་ས་དི་སཱ བ་ཧཱུ.

༢༦༨-༩. མཱ་ལཱ་དྱ་ར་ཎི་ཡནྟི (པཱ་རཱ. ཨ་ཊྛ. ༡.༨༥) ཨ་ར་ཎི་ཡཾ མཱ་ལཱ་དི ཝ་ཎྞ་མ་ཊྛཾ ན ཝ་ཊྚ་ཏཱི་ཏི ས་མྦ་ནྡྷོ. ཨེ་ཝཾ ས་བྦ་ཏྠ. ཏི་པུ་སཱི་ས་མ་ཡེ པ་ཏྟ་མ་ཎྜ་ལེ བྷི་ཏྟི་ཀ་མྨ་ཉྩ ན ཝ་ཊྚ་ཏཱི་ཏི ཨ་ཏྠོ. ཧི་ཏྭཱཏི ཋ་པེ་ཏྭཱ. སཱུ་ཙི་ས་ཎྜཱ་ས་ཀོ (པཱ་རཱ. ཨ་ཊྛ. ༡.༨༥) ནཱ་མ སཱུ་ཙིཾ ཌཾ་སཱ་པེ་ཏྭཱ གྷཾ་སི་ཏུཾ ཀ་ཏོ དཱ་རུ་མ་ཡོ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, མ་ཀ་ར་ད་ནྟ་ཀཾ ཚི་ནྡི་ཏུ’’ནྟི (ཙཱུ་ལ༹་ཝ. ༢༥༣) ཝུ་ཏྟ་ཏྟཱ པ་ཏྟ་མ་ཎྜ་ལེ མ་ཀ་ར་ད་ནྟ་ཀཾ ཝ་ཊྚ་ཏི, ཨ་ཉྙཾ བྷི་ཏྟི་ཀ་མྨཱ་དི་ཝི་ཀཱ་ར་མེ་ཝ ན ཝ་ཊྚ་ཏི, ཏ་སྨཱ གི་རི་ཀཱུ་ཊཾ པ་ཏྟ་མ་ཎྜ་ལེ ཋ་པེ་ཏྭཱ ཨ་ཝ་སེ་སེ ན ཝ་ཊྚ་ཏཱི་ཏི ཝེ་དི་ཏ་བྦཾ.

༢༧༢. སེ་ནཱ་ས་ནེཏི (པཱ་རཱ. ཨ་ཊྛ. ༡.༨༥) པཱ་སཱ་དཱ་དི་སེ་ནཱ་ས་ནེ་ཏི ཨ་ཏྠོ.

༢༧༣. པུ་མི་ཏྠི་རཱུ་པ་ར་ཧི་ཏནྟི པུ་རི་ས་རཱུ་པ་ཨི་ཏྠི་རཱུ་པ་ར་ཧི་ཏ་ནྟི ཨ་ཏྠོ. པ་རི་ཀྑཱ་ར་ཝི་ནི་ཙྪ་ཡོ.

པ་རི་ཀྑཱ་ར་ནི་དྡེ་ས་ཝ་ཎྞ་ནཱ ནི་ཊྛི་ཏཱ.