༣༡. ཝི་ཀ་པྤ་ནཱ་ནི་དྡེ་ས་ཝ་ཎྞ་ནཱ

༢༢༡. ས་མྨུ་ཁཱ་ཡཱཏི (པཱ་ཙི. ༣༧༤; པཱ་རཱ. ཨ་ཊྛ. ༢.༤༦༩; ཀ་ངྑཱ. ཨ་ཊྛ. ཝི་ཀ་པྤ་ན་སི་ཀྑཱ་པ་ད་ཝ་ཎྞ་ནཱ) ས་མྨུ་ཁེ ཋི་ཏ་སྶཱ་ཏི ཨ་ཏྠོ. བྱ་ཏྟ་སྶཱཏི ཝི་ཀ་པྤ་ན་ཝི་དྷཱ་ནཾ པ་ཙྩུ་དྡྷ་ར་ཎཱ་དི་ཝི་དྷཱ་ན་ཉྩ ཛཱ་ན་ནྟ་སྶ. ཨ་བྱ་ཏྟོ པ་ན ‘‘ཨི་མི་ནཱ མ་ཡ྄ཧཾ དི་ནྣ’’ནྟི ག་ཧེ་ཏྭཱ་པི ག་ཙྪེ་ཡྻཱ་ཏི ཨ་ཏྠོ. ཨེ་ཀ་སྶཱཏི ཨེ་ཀ་སྶ བྷི་ཀྑུ་སྶ.

༢༢༢. ནི་དྷེ་ཏུཾ་ཝཱཏི ནི་དྷེ་ཏུཾ ཨེ་ཝ, ནི་སྶ་གྒི་ཡཾ ན ཧོ་ཏཱི་ཏི ཨ་ཏྠོ. པ་རི་བྷུ་ཉྫི་ཏུཾ ཝཱ ཝི་སྶ་ཛྫེ་ཏུཾ ཝཱ ཨ་དྷི་ཊྛཱ་ཏུཾ ཝཱ ན ཝ་ཊྚ་ཏཱི་ཏི ཨ་ཏྠོ.

༢༢༤-༥. ཨ་པ་རཱ ས་མྨུ་ཁཱ ཝཱཏི ས་མྨུ་ཁཱ ཝི་ཀ་པྤ་ནཱ ཨེ་ཝཱ་ཏི ཨ་ཏྠོ. ཨི་མཱ དྭེ ཝི་ཀ་པྤ་ནཱ ཨ་ཏྟ་ནཱ ཨེ་ཝ ཝི་ཀ་པྤེ་ཏྭཱ པ་རེ་ན པ་ཙྩུ་དྡྷ་རཱ་པི་ཏ་ཏྟཱ ས་མྨུ་ཁཱ ཝི་ཀ་པྤ་ནཱ ཨེ་ཝཱ་ཏི ཝུ་ཏྟཱ.

༢༢༧. མི་ཏྟོཏི ད་ལ༹ྷ་མི་ཏྟོ. ས་ནྡི་ཊྛོཏི དི་ཊྛ་མ་ཏྟོ ནཱ་ཏི་ད་ལ༹ྷ་མི་ཏྟོ. ‘‘ཨི་ཏ་རེ་ན ཙ པུ་བྦེ ཝུ་ཏྟ་ན་ཡེ་ན ‘ཏི་སྶོ བྷི་ཀྑཱུ’ཏི ཝཱ ‘ཏི་སྶཱ བྷི་ཀྑུ་ནཱི’ཏི ཝཱ ཝ་ཏྟ་བྦཾ. པུ་ན ཏེ་ན ‘ཨ་ཧཾ ཏི་སྶ་སྶ བྷི་ཀྑུ་ནོ, ཏི་སྶཱ་ཡ བྷི་ཀྑུ་ནི་ཡཱ ཝཱ ད་མྨཱི’ཏི ཝི་ཀ་པྤེ་ཏྭཱ ཏེ་ནེ་ཝ ‘ཏི་སྶ་སྶ བྷི་ཀྑུ་ནོ, ཏི་སྶཱ་ཡ བྷི་ཀྑུ་ནི་ཡཱ ས་ནྟ་ཀཾ པ་རི་བྷུ་ཉྫ ཝཱ ཝི་སྶ་ཛྫེ་ཧི ཝཱ ཡ་ཐཱ་པ་ཙྩ་ཡཾ ཝཱ ཀ་རོ་ཧཱི’ཏི པ་ཙྩུ་དྡྷ་རི་ཏ་བྦ’’ནྟི ཨེ་ཝཾ པཱ་ཋོ ག་ཧེ་ཏ་བྦོ.

༢༢༨. དཱུ་ར་ས་ནྟི་ཀ་ཏྟེ་ཀ་ཏྟ-བ་ཧུ་བྷཱ་ཝཾ ཝི་ཛཱ་ནི་ཡཱཏི ཨེ་ཏྠ དཱུ་ར་ཏྟ་ཉྩ ས་ནྟི་ཀ་ཏྟ་ཉྩ ཨེ་ཀ་ཏྟ་ཉྩ བ་ཧུ་བྷཱ་ཝ་ཉྩ ཝི་ཛཱ་ནི་ཏྭཱ་ཏི ཨ་ཏྠོ.

༢༢༩. ‘‘ད་སཱ་ཧ་པ་ར་མཾ ཨ་ཏི་རེ་ཀ་ཙཱི་ཝ་རཾ དྷཱ་རེ་ཏ་བྦ’’ནྟི (པཱ་རཱ. ༤༦༢) ཝུ་ཏྟ་ཏྟཱ ‘‘ད་སཱ་ཧཾ ཝཱ’’ཏི ཝུ་ཏྟཾ. ‘‘ཙཱི་ཝ་ར་ཀཱ་ལ་ས་མ་ཡོ ནཱ་མ ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མོ མཱ་སོ, ཨ་ཏྠ་ཏེ ཀ་ཐི་ནེ པ་ཉྩ མཱ་སཱ’’ཏི (པཱ་རཱ. ༦༤༩) ཝུ་ཏྟ་ཏྟཱ ‘‘མཱ་ས་མེ་ཀཾ ཝཱ པ་ཉྩ ཝཱ’’ཏི ཝུ་ཏྟཾ, མཱ་སཾ ཝཱ ཨེ་ཀཾ པ་ཉྩ ཝཱ མཱ་སེ་ཏི ཨ་ཏྠོ. ‘‘བྷི་ཀྑུ་ནོ པ་ནེ་ཝ ཨ་ཀཱ་ལ་ཙཱི་ཝ་རཾ ཨུ་པྤ་ཛྫེ་ཡྻ, ཨཱ་ཀ་ངྑ་མཱ་ནེ་ན བྷི་ཀྑུ་ནཱ པ་ཊི་གྒ་ཧེ་ཏ་བྦཾ. པ་ཊི་གྒ་ཧེ་ཏྭཱ ཁི་པྤ་མེ་ཝ ཀཱ་རེ་ཏ་བྦཾ. ནོ ཙ་སྶ པཱ་རི་པཱུ་རི, མཱ་ས་པ་ར་མཾ ཏེ་ན བྷི་ཀྑུ་ནཱ ཏཾ ཙཱི་ཝ་རཾ ནི་ཀྑི་པི་ཏ་བྦཾ ཨཱུ་ན་སྶ པཱ་རི་པཱུ་རི་ཡཱ ས་ཏི་ཡཱ པ་ཙྩཱ་སཱ་ཡཱ’’ཏི (པཱ་རཱ. ༤༩༩) ཝུ་ཏྟ་ཏྟཱ ‘‘པ་ཙྩཱ་སཱ ས་ཏི མཱ་ས་ཀ’’ནྟི ཝུ་ཏྟཾ. ནུ་པྤཱ་ད་ཡ་ཏཱིཏི ཨ་ན་དྷི་ཊྛི་ཏཾ ཨ་ཝི་ཀ་པྤི་ཏཾ ནི་སྶ་གྒིཾ ན ཛ་ན་ཡ་ཏཱི་ཏི ཨ་ཏྠོ. ཝི་ཀ་པྤ་ནཱ་ཝི་ནི་ཙྪ་ཡོ.

ཝི་ཀ་པྤ་ནཱ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.