༡༥. ཨུ་པ་ཛ྄ཛྷཱ་ཙ་རི་ཡ་ཝ་ཏྟ་ནི་དྡེ་ས་ཝ་ཎྞ་ནཱ
༡༤༥. ཨུ་པ་ཛ྄ཛྷཱ་ཙ་རི་ཡེཏི ཨེ་ཏྠ (མ་ཧཱ་ཝ. ༦༤, ༦༧, ༧༤, ༧༨-༧༩; ཙཱུ་ལ༹་ཝ. ༣༧༥, ༣༧༧; ༣༧༩-༣༨༢; མ་ཧཱ་ཝ. ཨ་ཊྛ. ༦༤, ༦༧, ༧༥, ༧༦, ༧༧) ཨཱ་ཙ་རི་ཡོ ནཱ་མ ནི་སྶ་ཡཱ་ཙ་རི་ཡོ པ་བྦ་ཛྫཱ་ཙ་རི་ཡོ ཨུ་པ་ས་མྤ་དཱ་ཙ་རི་ཡོ དྷ་མྨཱ་ཙ་རི་ཡོ་ཏི ཙ་ཏུ་བྦི་དྷོ. ཨེ་ཏེ་སུ ཧི ནི་སྶ་ཡ་ནྟེ་ཝཱ་སི་ཀེ་ན ཡཱ་ཝ ཨཱ་ཙ་རི་ཡཾ ནི་སྶཱ་ཡ ཝ་ས་ཏི, ཏཱ་ཝ ས་བྦ་མཱ་ཙ་རི་ཡ་ཝ་ཏྟཾ ཀཱ་ཏ་བྦཾ. པ་བྦ་ཛྫཱ་ཨུ་པ་ས་མྤ་དཱ་དྷ་མྨ་ནྟེ་ཝཱ་སི་ཀེ་ཧི པ་ན ནི་སྶ་ཡ་མུ་ཏྟ་ཀེ་ཧི་པི ཨཱ་དི་ཏོ པ་ཊྛཱ་ཡ ཡཱ་ཝ ཙཱི་ཝ་ར་ར་ཛ་ནཾ, ཏཱ་ཝ ཝ་ཏྟཾ ཀཱ་ཏ་བྦཾ. ཨ་ནཱ་པུ་ཙྪི་ཏྭཱ པ་ཏྟ་དཱ་ནཱ་དི་མྷི པ་ན ཨེ་ཏེ་སཾ ཨ་ནཱ་པ་ཏྟི. ཨེ་ཏེ་སུ ཙ པ་བྦ་ཛྫ་ནྟེ་ཝཱ་སི་ཀོ ཙ ཨུ་པ་ས་མྤ་ད་ནྟེ་ཝཱ་སི་ཀོ ཙ ཨཱ་ཙ་རི་ཡ་སྶ ཡཱ་ཝ་ཛཱི་ཝཾ བྷཱ་རོ, ནི་སྶ་ཡ་ནྟེ་ཝཱ་སི་ཀོ ཙ དྷ་མྨ་ནྟེ་ཝཱ་སི་ཀོ ཙ ཡཱ་ཝ ས་མཱི་པེ ཝ་ས་ཏི, ཏཱ་ཝ་དེ་ཝ. སུ་ཊྛུ པི་ཡ་སཱི་ལོ སུ་པེ་ས་ལོ, སི་ཀྑཱ་ཀཱ་མོ་ཏི ཨ་ཏྠོ. ད་ནྟ་ཀ་ཊྛཾ དེ་ནྟེ་ན ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ མ་ཧ་ནྟཾ མ་ཛ྄ཛྷི་མཾ ཁུ་དྡ་ཀ་ནྟི ཏཱི་ཎི ད་ནྟ་ཀ་ཊྛཱ་ནི ཨུ་པ་ནེ་ཏ་བྦཱ་ནི. ཏེ་སུ ཡཾ ཏཱི་ཎི དི་ཝ་སཱ་ནི ག་ཎྷཱ་ཏི, ཏཾ ས་ལླ་ཀྑེ་ཏྭཱ ཙ་ཏུ་ཏྠ་དི་ཝ་ས་ཏོ པ་ཊྛཱ་ཡ ཏཱ་དི་སཾ་ཡེ་ཝ ས་མྨཱ ཨུ་བྷོ་ཧི ཧ་ཏྠེ་ཧི དཱ་ཏ་བྦཾ. ས་ཙེ ཡཾ ཝཱ ཏཾ ཝཱ ག་ཎྷཱ་ཏི, ཡ་ཐཱ་ལ་དྡྷཾ ཨུ་པ་ནེ་ཏ་བྦཾ. ཏོ་ཡནྟི སཱི་ཏ་ཉྩ ཨུ་ཎྷ་ཉྩ ཨུ་ད་ཀཾ ཨུ་པ་ནེ་ཏྭཱ ཡཾ ཏཱི་ཎི དི་ཝ་སཱ་ནི ཝ་ལ༹་ཉྫེ་ཏི, ཙ་ཏུ་ཏྠ་དི་ཝ་ས་ཏོ པ་ཊྛཱ་ཡ ཏཱ་དི་སཾ ཨུ་པ་ནེ་ཏ་བྦཾ. ས་ཙེ དྭེ་པི ཝ་ལ༹་ཉྫེ་ཏི, དུ་ཝི་དྷ་མྤི ཨུ་པ་ནེ་ཏ་བྦཾ. ས་ཙེ ཡཱ་གུ ཧོ་ཏི, བྷཱ་ཛ་ནཾ དྷོ་ཝི་ཏྭཱ ཨུ་པ་ནེ་ཏ་བྦཾ.
༡༤༦. པ་ཏྟེ ཝ་ཏྟཾ ཙ་རེཏི ‘‘ཡཱ་གུཾ པཱི་ཏ་སྶ ཨུ་ད་ཀཾ ད་ཏྭཱ བྷཱ་ཛ་ནཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པ་རི་གྷཾ་ས་ནྟེ་ན དྷོ་ཝི་ཏྭཱ པ་ཊི་སཱ་མེ་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ པ་ཏྟེ ཝ་ཏྟཾ ཙ་རེ་ཏི ཨ་ཏྠོ. གཱ་མ་པྤ་ཝེ་སེ ཝ་ཏྟཾ ཙ་རེ་ཏི ཨེ་ཝཾ ས་བྦ་ཏྠ. ‘‘ས་ཙེ ཨུ་པ་ཛ྄ཛྷཱ་ཡོ ཝཱ ཨཱ་ཙ་རི་ཡོ ཝཱ གཱ་མཾ པ་ཝི་སི་ཏུ་ཀཱ་མོ ཧོ་ཏི, ནི་ཝཱ་ས་ནཾ དཱ་ཏ་བྦཾ, པ་ཊི་ནི་ཝཱ་ས་ནཾ པ་ཊི་གྒ་ཧེ་ཏ་བྦཾ, ཀཱ་ཡ་བ་ནྡྷ་ནཾ དཱ་ཏ་བྦཾ, ས་གུ་ཎཾ ཀ་ཏྭཱ ས་ངྒྷཱ་ཊི་ཡོ དཱ་ཏ་བྦཱ, དྷོ་ཝི་ཏྭཱ པ་ཏྟོ སོ་ད་ཀོ དཱ་ཏ་བྦོ’’ཏི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཨི་དཾ གཱ་མ་པྤ་ཝེ་ས་ནེ ཝ་ཏྟཾ ནཱ་མ. ‘‘ས་ཙེ ཨུ་པ་ཛ྄ཛྷཱ་ཡོ ཝཱ ཨཱ་ཙ་རི་ཡོ ཝཱ པ་ཙྪཱ་ས་མ་ཎཾ ཨཱ་ཀ་ངྑ་ཏི, ཏི་མ་ཎྜ་ལཾ པ་ཊི་ཙྪཱ་དེ་ནྟེ་ན པ་རི་མ་ཎྜ་ལཾ ནི་ཝཱ་སེ་ཏྭཱ ཀཱ་ཡ་བ་ནྡྷ་ནཾ བ་ནྡྷི་ཏྭཱ ས་གུ་ཎཾ ཀ་ཏྭཱ ས་ངྒྷཱ་ཊི་ཡོ པཱ་རུ་པི་ཏྭཱ ག་ཎྛི་ཀཾ པ་ཊི་མུ་ཉྩི་ཏྭཱ དྷོ་ཝི་ཏྭཱ པ་ཏྟཾ ག་ཧེ་ཏྭཱ ཨུ་པ་ཛ྄ཛྷཱ་ཡ་སྶ ཝཱ ཨཱ་ཙ་རི་ཡ་སྶ ཝཱ པ་ཙྪཱ་ས་མ་ཎེ་ན ཧོ་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ན་ཡེ་ན ཝུ་ཏྟཾ ག་མ་ནེ ཝ་ཏྟཾ ནཱ་མ. ‘‘ནི་ཝ་ཏྟ་ནྟེ་ན པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙཱ་པེ་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ན་ཡེ་ན ཝུ་ཏྟཾ ཨཱ་ག་མེ ཝ་ཏྟཾ ནཱ་མ. ‘‘ཨུ་པ་ཛ྄ཛྷཱ་ཡ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ པ་ཊི་སཱ་མེ་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཨེ་ཝཾ ཝུ་ཏྟཾ ཨཱ་ས་ནཱ་དཱི་སུ ཝ་ཏྟཾ ནཱ་མ. ཨུ་པཱ་ཧ་ནཱ་ཡ ཝ་ཏྟཾ ནཱ་མ ‘‘ཨུ་པཱ་ཧ་ནཱ པུ་ཉྪི་ཏ་བྦཱ, ཨུ་པཱ་ཧ་ནཱ པུ་ཉྪ་ནྟེ་ན པ་ཋ་མཾ སུ་ཀྑེ་ན ཙོ་ལ༹་ཀེ་ན པུ་ཉྪི་ཏ་བྦཱ, པ་ཙྪཱ ཨ་ལླེ་ནཱ’’ཏི་ཨཱ་དི་ནཱ (ཙཱུ་ལ༹་ཝ. ༣༥༧, ༣༥༩) ཝུ་ཏྟཾ. ཙཱི་ཝ་རེ ཝ་ཏྟཾ ནཱ་མ ‘‘ས་ཙེ ཙཱི་ཝ་རཾ སི་ནྣཾ ཧོ་ཏི, མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦཾ, ན ཙ ཨུ་ཎྷེ ཙཱི་ཝ་རཾ ནི་ད་ཧི་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ.
༡༤༧. པ་རི་བྷོ་ཛ་ནཱི་ཡ་པཱ་ནཱི་ཡ-ཝ་ཙྩ་པྤ་སྶཱ་ཝ་ཋཱ་ནི་སཱུཏི ཨེ་ཏྠ ས་ཙེ པཱ་ནཱི་ཡཾ ན ཧོ་ཏི, པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ པ་རི་བྷོ་ཛ་ནཱི་ཡཾ ན ཧོ་ཏི, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ཏ་ཐཱ པ་སྶཱ་ཝ་ཊྛཱ་ནེ ཨེ་ཝཾ ཝ་ཏྟཾ ཙ་རི་ཏ་བྦ་ནྟི ཨ་ཏྠོ. ‘‘ཝི་ཧཱ་རཾ སོ་དྷེ་ནྟེ་ན པ་ཋ་མཾ པ་ཏྟ་ཙཱི་ཝ་རཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦ’’ནྟི་ཨཱ་དི་ནཱ ན་ཡེ་ན ཝུ་ཏྟཾ ཝི་ཧཱ་ར་སོ་དྷ་ནེ ཝ་ཏྟཾ ནཱ་མ. ‘‘བྷཱུ་མ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙཱ་པེ་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ པུ་ན པ་ཉྙཱ་པ་ནེ ཝ་ཏྟཾ ནཱ་མ.
༡༤༨. ཨི་དཱ་ནི ཝི་ཧཱ་རཾ སོ་དྷེ་ནྟེ་ན ཨེ་ཝཾ སོ་དྷེ་ཏ་བྦ་ནྟི ཏཾ ད་སྶེ་ཏུཾ ‘‘ན པ་པྥོ་ཊེ་ཡྻཱ’’ཏི་ཨཱ་དི་མཱ་ཧ. ཏ་སྶ་ཏྠོ – ཝི་ཧཱ་རཾ སོ་དྷེ་ནྟོ བྷི་ཀྑུ བྷཱུ་མ་ཏྠ་ར་ཎཱ་དི་ས་ཡ་ནཱ་ས་ནཾ པ་ཊི་ཝཱ་ཏེ ཝཱ པ་ངྒ་ཎེ ཝཱ པཱ་ནཱི་ཡ་སཱ་མ་ནྟཱ ཝཱ ན པ་པྥོ་ཊེ་ཡྻཱ་ཏི. པ་ངྒ་ཎེཏི བ་ཧཱུ་ནཾ ས་ནྣི་པཱ་ཏེ ཋཱ་ནེ.
༡༤༩. ནྷཱ་ནེཏི ‘‘ས་ཙེ ཨུ་པ་ཛ྄ཛྷཱ་ཡོ ན་ཧཱ་ཡི་ཏུ་ཀཱ་མོ ཧོ་ཏི, ན་ཧཱ་ནཾ པ་ཊི་ཡཱ་དེ་ཏ་བྦཾ. ས་ཙེ སཱི་ཏེ་ན ཨ་ཏྠོ ཧོ་ཏི, སཱི་ཏཾ པ་ཊི་ཡཱ་དེ་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦; ཙཱུ་ལ༹་ཝ. ༣༧༦) ཝུ་ཏྟཾ ན་ཧཱ་ནེ ཝ་ཏྟཾ ནཱ་མ, ‘‘ཨུ་པ་ཛ྄ཛྷཱ་ཡ་སྶ ག་ཏྟ་ཏོ ཨུ་ད་ཀཾ ས་མྨ་ཛྫི་ཏ་བྦཾ, ནི་ཝཱ་ས་ནཾ དཱ་ཏ་བྦ’’ནྟི་ཨཱ་དི་ནཱ (མ་ཧཱ་ཝ. ༦༦; ཙཱུ་ལ༹་ཝ. ༣༧༦) ཝུ་ཏྟཾ ན་ཧཱ་ཏ་སྶ ཀཱ་ཏ་བྦཾ ནཱ་མ. ར་ངྒ་པཱ་ཀེཏི ‘‘ས་ཙེ ཨུ་པ་ཛ྄ཛྷཱ་ཡ་སྶ ཨཱ་ཙ་རི་ཡ་སྶ ར་ཛ་ནཾ པ་ཙི་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན ཨ་ནྟེ་ཝཱ་སི་ཀེ་ན པ་ཙི་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ. དྷོ་ཝ་ནེཏི ‘‘ས་ཙེ ཨུ་པ་ཛ྄ཛྷཱ་ཡ་སྶ ཨཱ་ཙ་རི་ཡ་སྶ ཙཱི་ཝ་རཾ དྷོ་ཝི་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན ཨ་ནྟེ་ཝཱ་སི་ཀེ་ན དྷོ་ཝི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ. སི་བྦ་ནེཏི ‘‘ས་ཙེ ཨུ་པ་ཛ྄ཛྷཱ་ཡེ་ན ཨཱ་ཙ་རི་ཡེ་ན ཙཱི་ཝ་རཾ ཀཱ་ཏ་བྦཾ ཧོ་ཏི, ས་དྡྷི་ཝི་ཧཱ་རི་ཀེ་ན ཨ་ནྟེ་ཝཱ་སི་ཀེ་ན ཀཱ་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཝུ་ཏྟཾ. ཙཱི་ཝ་རེ ཐེ་ཝེ ཋི་ཏེ ར་ཛ་ནྟོ ན ཝ་ཛེ ན པ་ཀྐ་མེ་ཡྻཱ་ཏི ཨ་ཏྠོ. ‘‘ཙཱི་ཝ་རཾ ར་ཛ་ནྟེ་ན སཱ་དྷུ་ཀཾ ས་མྤ་རི་ཝ་ཏྟ་ཀཾ ས་མྤ་རི་ཝ་ཏྟ་ཀཾ ར་ཛི་ཏ་བྦཾ, ན ཙ ཨ་ཙྪི་ནྣེ ཐེ་ཝེ པ་ཀྐ་མི་ཏ་བྦ’’ནྟི (མ་ཧཱ་ཝ. ༦༦, ༧༨; ཙཱུ་ལ༹་ཝ. ༣༧༦, ༣༨༠) ཧི ཝུ་ཏྟཾ.
༡༥༠. ཨེ་ཀ་ཙྩ་སྶཱཏི ཨཱ་ཙ་རི་ཡུ་པ་ཛ྄ཛྷཱ་ཡཱ་ནཾ ཝི་ས་བྷཱ་ག་སྶ ཨ་ན་ཏྠ་ཀཱ་མ་སྶ ཝེ་རི་པུ་གྒ་ལ་སྶ. ཨ་ནཱ་པུ་ཙྪཱཏི ཨཱ་ཙ་རི་ཡུ་པ་ཛ྄ཛྷཱ་ཡཱ་ནཾ ཨ་ནཱ་རོ་ཙེ་ཏྭཱ. ཀི་ཉྩ་ནནྟི ཡཾ ཀི་ཉྩི.
༡༥༡-༢. ཏ་སྶཱཏི ཨེ་ཀ་ཙྩ་སྶ. ནི་ནྣེ་ཏུནྟི ནཱི་ཧ་རི་ཏུཾ. ཀི་ཙྩ་ཡཾ པ་རི་ཀ་མྨཾ ཝཱཏི ཝེ་ཡྻཱ་ཝ་ཙྩཾ ཝཱ པི་ཊྛི་པ་རི་ཀ་མྨཱ་དི་པ་རི་ཀ་མྨཾ ཝཱ ཨ་ཏྟ་ནཱ ཏ་སྶ ཀཱ་ཏུཾ ཝཱ ཏེ་ན ཨ་ཏྟ་ནོ ཀཱ་རཱ་པེ་ཏུཾ ཝཱ་ཏི ཨེ་ཝ་མ་ཏྠོ ཝེ་དི་ཏ་བྦོ.
༡༥༣. ས་ཙེ ཨཱ་ཙ་རི་ཡུ་པ་ཛ྄ཛྷཱ་ཡཱ ཨ་ཉྙ་ཏྠ ག་ཏཱ ཧོ་ནྟི, པ་རི་ཝེ་ཎཾ ག་ནྟྭཱ ཨ་པ་སྶ་ནྟེ་ཧི གཱ་མཾ པ་ཝི་སི་ཏུཾ ཝ་ཊྚ་ཏི. གཱ་མཾ པ་ཝི་ས་ནྟོ ས་ཙེ པ་སྶ་ཏི, ཨཱ་པུ་ཙྪི་ཏ་བྦ་མེ་ཝཱ་ཏི ཝ་ད་ནྟི. ‘‘ཨུ་པ་ཛ྄ཛྷཱ་ཡཾ ཨ་ནཱ་པུ་ཙྪཱ ན དི་སཱ པ་ཀྐ་མི་ཏ་བྦཱ’’ཏི (མ་ཧཱ་ཝ. ༦༦, ཙཱུ་ལ༹་ཝ. ༣༧༦) ཧི ཝུ་ཏྟཾ. ཨ་ཏྟ་ནོ ཀི་ཙྩ་ཡཾ ནཱ་མ ཨ་ནྟོ་ཝི་ཧཱ་རེ་པི ཨ་ཏྟ་ནོ པ་ཏྟ་པ་ཙ་ན་ཙཱི་ཝ་ར་ཀ་མྨ་ཀེ་ས་ཙྪེ་ད་ནཱ་དི.
༡༥༤. ས་ངྒྷཱ་ཡ་ཏྟ་ཀ་མྨཱ་ནི ནཱ་མ པ་རི་ཝཱ་ས་མཱ་ན་ཏྟ་ཨ་བྦྷཱ་ན་ཏ་ཛྫ་ནཱི་ཡ་ནི་ཡ་སྶ་པ་བྦཱ་ཛ་ནཱི་ཡ་པ་ཊི་སཱ་ར་ཎཱི་ཡ་ཨུ་ཀྑེ་པ་ནཱ་ད་ཡོ.
༡༥༥. ཝུ་ཊྛཱ་ནཾ ནེ་ས་མཱ་ག་མེཏི ‘‘ས་ཙེ ཨུ་པ་ཛ྄ཛྷཱ་ཡོ ཝཱ ཨཱ་ཙ་རི་ཡོ ཝཱ གི་ལཱ་ནོ ཧོ་ཏི, ཡཱ་ཝ་ཛཱི་ཝཾ ཨུ་པ་ཊྛཱ་ཏ་བྦོ, ཝུ་ཊྛཱ་ན་མ་སྶ ཨཱ་ག་མེ་ཏ་བྦ’’ནྟི (མ་ཧཱ་ཝ. ༦༦; ཙཱུ་ལ༹་ཝ. ༣༧༦) ཧི ཝུ་ཏྟཾ. ཨུ་པ་ཛ྄ཛྷཱ་ཙ་རི་ཡ་ཝ་ཏྟ་ཝི་ནི་ཙྪ་ཡོ.
ཨུ་པ་ཛ྄ཛྷཱ་ཙ་རི་ཡ་ཝ་ཏྟ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.