༡༣. ས་མ་ཎ་ཀ་པྤ་ནི་དྡེ་ས་ཝ་ཎྞ་ནཱ
༡༢༥. བྷཱུ་ཏཱ་ནཾ ཛཱ་ཏཱ་ནཾ ནི་བྦ་ཏྟཱ་ནཾ གཱ་མོ བྷཱུ་ཏ་གཱ་མོ (པཱ་ཙི. ༩༡; པཱ་ཙི. ཨ་ཊྛ. ༩༡; ཀ་ངྑཱ. ཨ་ཊྛ. བྷཱུ་ཏ་གཱ་མ་སི་ཀྑཱ་པ་ད་ཝ་ཎྞ་ནཱ). ས་མཱ་ར་མྦྷོ་ཏི ཚེ་ད་ན་ཕཱ་ལ་ན་པ་ཙ་ནཱ་དི, ཏ་སྨིཾ བྷཱུ་ཏ་གཱ་མ་ས་མཱ་ར་མྦྷེ བྷཱུ་ཏ་གཱ་མ་ས་མཱ་ར་མྦྷ་ཧེ་ཏུ པཱ་ཙི་ཏྟི ཧོ་ཏཱི་ཏི ཨ་ཏྠོ. ཀ་ཏ་ཀ་པྤི་ཡཾ (ཀ་ངྑཱ. ཨ་ཊྛ. བྷཱུ་ཏ་གཱ་མ་སི་ཀྑཱ་པ་ད་ཝ་ཎྞ་ནཱ) པ་ན ས་མ་ཎ་ཀ་པྤི་ཡཾ བྷ་ཝེ་ཏི ས་མྦ་ནྡྷོ. ས་མ་ཎཱ་ནཾ ཀ་པྤི་ཡཾ ས་མ་ཎ་ཀ་པྤི་ཡཾ. ཨི་དཱ་ནི ཡེ་ན ཀ་ཏཾ ཀ་པྤི་ཡཾ ས་མ་ཎ་ཀ་པྤི་ཡཾ ཧོ་ཏི, ཏཾ ད་སྶེ་ཏུཾ ‘‘ན་ཁེ་ན ཝཱ’’ཏི་ཨཱ་དི་མཱ་ཧ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, པ་ཉྩ་ཧི ས་མ་ཎ་ཀ་པྤེ་ཧི ཕ་ལཾ པ་རི་བྷུ་ཉྫི་ཏུཾ, ཨ་གྒི་པ་རི་ཛི་ཏཾ ས་ཏྠ་པ་རི་ཛི་ཏཾ ན་ཁ་པ་རི་ཛི་ཏཾ ཨ་བཱི་ཛཾ ནི་བྦ་ཊྚ་བཱི་ཛ་ཉྙེ་ཝ པ་ཉྩ་མ’’ནྟི (ཙཱུ་ལ༹་ཝ. ༢༥༠) ཧི ཝུ་ཏྟཾ.
༡༢༦. ཨི་དཱ་ནི ཏཾ བྷཱུ་ཏ་གཱ་མཾ ད་སྶེ་ཏུཾ ‘‘ས་མཱུ་ལཱ’’ཏི་ཨཱ་དི་མཱ་ཧ. ཏ་ཏྠ (པཱ་ཙི. ༩༡; པཱ་ཙི. ཨ་ཊྛ. ༩༡) ས-ཨི་ཏི སོ བྷཱུ་ཏ་གཱ་མོ ནཱ་མཱ་ཏི ཨ་ཏྠོ, མཱུ་ལ་བཱི་ཛཱ་དཱི་ཧི པ་ཉྩ་ཧི བཱི་ཛེ་ཧི པ་བྷཱ་ཝི་ཏོ ཧོ་ཏཱི་ཏི ཝུ་ཏྟཾ ཧོ་ཏི. ཏ་ཏྠ མཱུ་ལ་བཱི་ཛཾ ནཱ་མ ཧ་ལི་དྡི་སི་ངྒི་ཝེ་རཱ་དི. ཁ་ནྡྷ་བཱི་ཛཾ ནཱ་མ ཨ་སྶ་ཏྠོ ནི་གྲོ་དྷོ་ཏི ཨེ་ཝ་མཱ་དི. ཨ་གྒ་བཱི་ཛཾ ནཱ་མ ཨ་ཛྫུ་ཀ་ཕ་ཎི་ཛྫ་ཀཱ་དི. ཕ་ལུ༹་བཱི་ཛཾ ནཱ་མ ཨུ་ཙྪུ་ཝེ་ལུ༹་ན་ལཱ༹་དི. ‘‘བཱི་ཛ་བཱི་ཛཾ ནཱ་མ པུ་བྦ་ཎྞཾ ཨ་པ་ར་ཎྞཾ, ཡཱ་ནི ཝཱ པ་ན་ཉྙཱ་ནི་པི ཨ་ཏྠི བཱི་ཛེ ཛཱ་ཡ་ནྟི བཱི་ཛེ ས་ཉྫཱ་ཡ་ནྟི, ཨེ་ཏཾ བཱི་ཛ་བཱི་ཛཾ ནཱ་མཱ’’ཏི ཝུ་ཏྟཾ. ཨི་དཱ་ནི ‘‘བཱི་ཛ་གཱ་མ་བྷཱུ་ཏ་གཱ་མ་ས་མཱ་ར་མྦྷཱ པ་ཊི་ཝི་ར་ཏོ ཧོ་ཏཱི’’ཏི (དཱི. ནི. ༡.༡༠, ༡༩༥; མ. ནི. ༡.༢༩༣, ༤༡༡; ༢.༡༡; ཨ. ནི. ༡༠.༩༩; པུ. པ. ༡༧༩) ཝུ་ཏྟ་ཏྟཱ དྷ་མྨཱ་ནུ་ལོ་མེ་ན ཨཱ་ག་ཏཾ བཱི་ཛ་གཱ་མ་ས་མཱ་ར་མྦྷཾ ད་སྶེ་ཏུཾ ‘‘ཨཱ་ར་མྦྷེ དུ་ཀྐ་ཊ’’ནྟི་ཨཱ་དི་མཱ་ཧ. ཏ་སྨཱ ཨེ་ཏཾ པ་ཋ་མཾ ‘‘ཀ་པྤི་ཡཾ ཀ་རོ་ཧཱི’’ཏི བྷཱུ་ཏ་གཱ་མ་པ་རི་མོ་ཙ་ནཾ ཀཱ་རེ་ཏྭཱ བཱི་ཛ་གཱ་མ་པ་རི་མོ་ཙ་ན་ཏྠཾ པུ་ན ཀ་པྤི་ཡཾ ཀཱ་རེ་ཏ་བྦཾ.
༡༢༧. ནི་བྦ་ཊྚ་བཱི་ཛཾ (པཱ་ཙི. ཨ་ཊྛ. ༩༢; ཀ་ངྑཱ. ཨ་ཊྛ. བྷུ་ཏ་གཱ་མ་སི་ཀྑཱ་པ་ད་ཝ་ཎྞ་ནཱ) ནཱ་མ ཨ་མྦ་པ་ན་སཱ་དི. ནོ་བཱི་ཛཾ ནཱ་མ ཏ་རུ་ཎ་མྦ་ཕ་ལཱ་དི, ཨེ་ཏཾ པ་ན ས་བྦཾ ཨ་ཀ་པྤི་ཡ་མྤི ཝ་ཊྚ་ཏཱི་ཏི ཨ་ཏྠོ. ཀ་ཊཱ་ཧ་བ་དྡྷ་བཱི་ཛཱ་ནི ཀ་པི་ཏྠ་ཕ་ལཱ་དཱི་ནི. བ་ཧི་དྡྷཱ ཝཱ་པི ཀཱ་ར་ཡེཏི ཀ་པཱ་ལེ་པི ཀཱ་ཏུཾ ཝ་ཊྚ་ཏི, ས་ཙེ ཨེ་ཀཱ་བ་དྡྷཱ་ནཱི་ཏི ཨ་ཏྠོ. ཀ་ཊཱ་ཧ་མུ་ཏྟཾ པ་ན བྷི་ནྡི་ཏྭཱ ཀཱ་རེ་ཏ་བྦཾ.
༡༢༨. བྷཱ་ཛ་ནེ ཝཱ བྷཱུ་མི་ཡཾ ཝཱ ཨེ་ཀཱ་བ་དྡྷེ་སུ བཱི་ཛེ་སུ ཨེ་ཀ་སྨིཾ བཱི་ཛེ ཀ་པྤི་ཡེ ཀ་ཏེ ས་བྦེ་སྭེ་ཝ ཀ་ཏཾ བྷ་ཝེ་ཏི ཨ་ཏྠོ. ཡ་ཐཱ ཙ བཱི་ཛེ, ཨེ་ཝཾ རུ་ཀྑ་ས་ཧ་སྶཾ ཝཱ ཨུ་ཙྪུ་ས་ཧ་སྶཾ ཝཱ ཚི་ནྡི་ཏྭཱ ཨེ་ཀཱ་བ་དྡྷེ ཀ་ཏེ་པི ཝི་ནི་ཙྪ་ཡོ ཝེ་དི་ཏ་བྦོ.
༡༢༩. ཀ་པྤི་ཡཾ ཀ་ཏྭཱ ནི་ཀྑི་ཏྟེ བཱི་ཛ་གཱ་མེ པུ་ན མཱུ་ལ་པ་ཎྞཱ་ནི ས་ཙེ ཛཱ་ཡ་རུཾ, པུ་ན ཀ་པྤི་ཡཾ ཀཱ་རེ་ཡྻཱ་ཏི ཨ་ཏྠོ. ཏ་དཱཏི མཱུ་ལེ ཙ ཨ་ངྐུ་རེ ཙ ཛཱ་ཏེ་ཏི ཨ་ཏྠོ.
༡༣༠. ཨུ་ད་ཀ་ས་མྦྷ་ཝོཏི ཨུ་ད་ཀ་ཛཱ་ཏོ. ཙེ་ཏི་ཡཱ་དཱི་སཱུཏི ཨེ་ཏྠ ཨཱ་དི-ས་དྡེ་ན གེ་ཧ་པྤ་མུ་ཁ་པཱ་ཀཱ་ར་ཝེ་དི་ཀཱ་དཱི་སུ ནི་བྦ་ཏྟཱ ག་ཧི་ཏཱ. ནི་བྦ་ཏྟ་དྭ་ཏྟི་པ་ཏྟ་ཀོ བྷཱུ་ཏ་གཱ་མོ་ཝ, ཨ་ནི་བྦ་ཏྟ་ཀོ ཨ་གྒ་བཱི་ཛེ ས་ངྒ་ཧཾ ག་ཙྪ་ཏི. བཱི་ཛ་མྤི ཡཱ་ཝ མཱུ་ལཾ ཝཱ པ་ཎྞཾ ཝཱ ན ནི་ཀྑ་མ་ཏི, ཏཱ་ཝ བཱི་ཛ་གཱ་མོ་ཝ, མཱུ་ལེ ཙ ནི་ཀྑ་ནྟེ པ་ཎྞེ ཙ ཧ་རི་ཏེ ཛཱ་ཏེ བྷཱུ་ཏ་གཱ་མོ་ཝ ཧོ་ཏཱི་ཏི ཨ་ཏྠོ.
༡༣༡. མ་ཀུ་ལ༹ནྟི ཨ་ཕུ་ལླཾ. ཨ་ཧི་ཚ་ཏྟ་ཀཾ ནཱ་མ རུ་ཀྑེ ཛཱ་ཏཾ ཨ་ཧི་ཚ་ཏྟ་ཀཾ.
༡༣༢. ཨ་ལླ་རུ་ཀྑེ ག་ཎྷ་ཏོ་ཏི ས་མྦ་ནྡྷོ. ཏ་ཏྠཱཏི ཨ་ལླ་རུ་ཀྑེ ཚི་ནྡ་ཏོ ཝཱ་པཱི་ཏི ས་མྦ་ནྡྷོ.
༡༣༤. ‘‘ཨི་མཾ རུ་ཀྑཾ, ཨི་མཾ ལ་ཏཾ, ཨི་མཾ ཀ་ནྡཾ ཚི་ནྡ, བྷི་ནྡཱ’’ཏི་ཨཱ་དི་ནཱ ན་ཡེ་ན ནི་ཡ་མེ་ཏྭཱ བྷཱ་སི་ཏུཾ ན ཝ་ཊྚ་ཏི. ‘‘ཨི་དཾ, ཨེ་ཏ’’ནྟི ཨ་ཝ་ཏྭཱ ཀེ་ཝ་ལཾ ‘‘རུ་ཀྑཾ ཚི་ནྡཱ’’ཏི་ཨཱ་དི་ནཱ (པཱ་ཙི. ཨ་ཊྛ. ༩༢; ཀ་ངྑཱ. ཨ་ཊྛ. བྷཱུ་ཏ་གཱ་མ་ཧི་ཀྑཱ་པ་ད་ཝ་ཎྞ་ནཱ) ན་ཡེ་ན ཝ་ཏྟུཾ ཝ་ཊྚ་ཏཱི་ཏི. ས་མ་ཎ་ཀ་པྤ་ཝི་ནི་ཙྪ་ཡོ.
ས་མ་ཎ་ཀ་པྤ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.