༡༡. ནི་སྶ་གྒི་ཡ་ནི་དྡེ་ས་ཝ་ཎྞ་ནཱ
༡༡༦-༧. ཨི་དཱ་ནི ཨ་ཙྩོ་ལཱ༹་རི་ཀཱ་ནཾ ཝ་སེ་ན ད་སྶེ་ཏུཾ ‘‘ཨ་རཱུ་པི་ཡ’’ནྟི་ཨཱ་དི ཨཱ་ར་དྡྷཾ. ཨ་ཉྙ་ཐཱ་པི ཡུ་ཏྟི པ་རི་ཡེ་སི་ཏ་བྦཱ. ཏ་ཏྠཱ་ཡཾ ས་ངྑེ་པ་ཏྠོ (པཱ་རཱ. ༥༩༡; པཱ་རཱ. ཨ་ཊྛ. ༢.༥༨༩; ཀ་ངྑཱ. ཨ་ཊྛ. ཛཱ་ཏ་རུ་པ་སི་ཀྑཱ་པ་ད་ཝ་ཎྞ་ནཱ) – ཡོ རཱུ་པི་ཡེ་ན ཨ་རཱུ་པི་ཡ་ཉྩ པ་རི་ཝ་ཏྟེ་ཡྻ, ཡོ ཙ ཨི་ཏ་རེ་ན ཙ ཨ་རཱུ་པི་ཡེ་ན རཱུ་པི་ཡཾ པ་རི་ཝ་ཏྟེ་ཡྻ, ཏ་སྶ ནི་སྶ་གྒི་ཡཾ ཧོ་ཏཱི་ཏི.
ཨི་དཱ་ནི རཱུ་པི་ཡ་ཉྩ ཨ་རཱུ་པི་ཡ་ཉྩ ད་སྶེ་ཏུཾ ‘‘ཨི་དྷ རཱུ་པི་ཡ’’ནྟི་ཨཱ་དི ཨཱ་ར་དྡྷཾ. ཨེ་ཏྠ (པཱ་རཱ. ༥༨༩; ཀ་ངྑཱ. ཨ་ཊྛ. ཛཱ་ཏ་རུ་པ་སི་ཀྑཱ་པ་ད་ཝ་ཎྞ་ནཱ) ས་ཛ྄ཛྷུ སི་ངྒཱིཏི ས་ཛ྄ཛྷཱུཏི ར་ཛ་ཏཾ. སི་ངྒཱིཏི སུ་ཝ་ཎྞཾ. ཏ་མྦ་ལོ་ཧཱ་དཱི་ཧི ཝཱ དཱ་རཱུ་ཧི ཝཱ པ་ཎྞེ་ཧི ཝཱ ལཱ་ཁཱ་ཡ ཝཱ རཱུ་པཾ ས་མུ་ཊྛཱ་པེ་ཏྭཱ ཝཱ ཨ་ས་མུ་ཊྛཱ་པེ་ཏྭཱ ཝཱ ཀ་ཏཾ ཙ་མྨ་བཱི་ཛ་མ་ཡ་མྤི་ཡཾ ཡཾ དེ་སེ ཝོ་ཧཱ་རཾ ག་ཙྪ་ཏི, ཨི་དཾ ཝོ་ཧཱ་རཱུ་པ་ག་མཱ་ས་ཀཾ ནཱ་མ. ཨི་ད་མི་དྷ རཱུ་པི་ཡ་ནྟི ཨ་དྷི་པྤེ་ཏཾ. ཝ་ཏྠཱ་དི ཙ མུ་ཏྟཱ་དི ཙ ཝ་ཏྠ་མུ་ཏྟཱ་དི. ཨི་ཏ་རནྟི ཨ་རཱུ་པི་ཡཾ ཀ་པྤི་ཡ་ཝ་ཏྠུ་ཉྩ དུ་ཀྐ་ཊ་ཝ་ཏྠུ་ཉྩ. ཀིཾ ཝུ་ཏྟཾ ཧོ་ཏི? ཝ་ཏྠཾ སུ་ཏྟཾ ཕཱ་ལོ པ་ཊ་ཀོ ཀ་པྤཱ་སོ ཨ་ནེ་ཀ་པྤ་ཀཱ་རཾ ཨ་པ་ར་ཎྞཾ ས་པྤི ན་ཝ་ནཱི་ཏཾ ཏེ་ལཾ མ་དྷུ ཕཱ་ཎི་ཏཱ་དི་བྷེ་ས་ཛྫ་ཉྩཱ་ཏི ཨི་དཾ ཀ་པྤི་ཡ་ཝ་ཏྠུ ནཱ་མ. མུ་ཏྟཱ མ་ཎི ཝེ་ལུ༹་རི་ཡོ ས་ངྑོ་སི་ལཱ པ་ཝཱ་ལ༹ཾ ལོ་ཧི་ཏ་ངྒོ མ་སཱ་ར་ག་ལླཾ ས་ཏྟ དྷ་ཉྙཱ་ནི དཱ་སཱི དཱ་སོ ཁེ་ཏྟཾ ཝ་ཏྠུ པུ་པྥཱ་རཱ་མ་ཕ་ལཱ་རཱ་མཱ་ད་ཡོ་ཏི ཨི་དཾ དུ་ཀྐ་ཊ་ཝ་ཏྠུ ནཱ་མ, ཏ་དུ་བྷ་ཡཾ ཨ་རཱུ་པི་ཡཾ ནཱ་མཱ་ཏི ཝུ་ཏྟཾ ཧོ་ཏི.
༡༡༨. ཨེ་ཏྟཱ་ཝ་ཏཱ རཱུ་པི་ཡ་སཾ་ཝོ་ཧཱ་རཾ ད་སྶེ་ཏྭཱ ཨི་དཱ་ནི ཀ་ཡ་ཝི་ཀྐ་ཡཾ ད་སྶེ་ཏུཾ ‘‘ཨི་མཾ ག་ཧེ་ཏྭཱ’’ཏི་ཨཱ་དི་མཱ་ཧ. ཏ་ཏྠ ཨི་མནྟི ཏ་ཎྜུ་ལཱ་དི་ཀཾ ཀ་པྤི་ཡ་བྷ་ཎྜཾ ག་ཧེ་ཏྭཱ ཝཱ ཨོ་ད་ནཱ་དིཾ བྷུ་ཏྭཱ ཝཱ ‘‘ཨི་མཾ ཝ་ཏྠཱ་དི་ཀཾ ཀ་པྤི་ཡ་བྷ་ཎྜཾ དེ་ཧི, ཨི་མཾ ར་ཛ་ན་པ་ཙ་ནཱ་དི་ཀཾ ཀ་ར, ར་ཛ་ན་ཀ་ཊྛཱ་དི་མཱ ན་ཡ, ཨི་མཾ ཝཱ ཏ་ཝ དེ་མི, ཏྭཾ པ་ན ཨི་མ་ཉྩ ཨི་མ་ཉྩ ཨཱ་ཧ་ར, ཀ་ར, དེ་ཧཱི’’ཏི ཨེ་ཝཾ ཀ་ཡ་ཝི་ཀྐ་ཡེ ས་མཱ་པ་ནྣེ ནི་སྶ་གྒཱིཏི ས་མྦ་ནྡྷོ.
༡༡༩. ཨི་དཱ་ནི པ་རི་ཎཱ་མ་ཝ་སེ་ན ཨཱ་པ་ཏྟི་བྷེ་དཾ ད་སྶེ་ཏུཾ ‘‘ཨ་ཏྟ་ནོ’’ཏི་ཨཱ་དི ཨཱ་ར་དྡྷཾ. ཏ་ཏྲཱ་ཡཾ པི་ཎྜ་ཏྠོ (པཱ་རཱ. ༦༥༩; པཱ་རཱ. ཨ་ཊྛ. ༢.༦༥༨; ཀ་ངྑཱ. ཨ་ཊྛ. པ་རི་ཎ་ཏ་སི་ཀྑཱ་པ་ད་ཝ་ཎྞ་ནཱ) – ས་ངྒྷ་སྶ ཝཱ ཨ་ཉྙ་སྶ ཝཱ ན་ཏཾ པ་རི་ཎ་ཏཾ ལཱ་བྷཾ ལ་བྷི་ཏ་བྦཾ ཙཱི་ཝ་རཱ་དི་པ་ཙྩ་ཡཾ ཨ་ཏྟ་ནོ ཝཱ ཨ་ཉྙ་སྶ ཝཱ པ་རི་ཎཱ་མེ་ཡྻ, ནི་སྶ་གྒི་ཡ་ཨཱ་དཱི་ནི ཧོ་ནྟཱི་ཏི. ཀ་ཐཾ? ཡོ པ་ན མཱ་ཏུ་ས་ནྟ་ཀ་མྤི ས་ངྒྷ་སྶ པ་རི་ཎ་ཏཾ ཨ་ཏྟ་ནོ པ་རི་ཎཱ་མེ་ཏི, ནི་སྶ་གྒི་ཡཾ. ཨ་ཉྙ་སྶ པུ་གྒ་ལ་སྶ པ་རི་ཎཱ་མེ་ཏི, སུ་དྡྷི་ཀ་པཱ་ཙི་ཏྟི་ཡཾ. ཨ་ཉྙ་སྶ ས་ངྒྷ་སྶ ཝཱ ཙེ་ཏི་ཡ་སྶ ཝཱ པ་རི་ཎཱ་མེ་ཏི, དུ་ཀྐ་ཊཾ. ཡོ པ་ན ཨ་ཉྙ་པུ་གྒ་ལ་སྶ ཝཱ ཙེ་ཏི་ཡ་སྶ ཝཱ པ་རི་ཎ་ཏཾ ཨ་ཏྟ་ནོ ཝཱ ཨ་ཉྙ་པུ་གྒ་ལ་སྶ ཝཱ ས་ངྒྷ་སྶ ཝཱ ཨ་ཉྙ་ཙེ་ཏི་ཡ་སྶ ཝཱ པ་རི་ཎཱ་མེ་ཏི, ཏ་སྶཱ་པི དུ་ཀྐ་ཊ་མེ་ཝཱ་ཏི.
༡༢༠. ཡོ པ་ན ནི་སྶ་གྒིཾ ནི་སྶ་ཛྫི་ཏ་བྦཾ ཨ་ནི་སྶ་ཛྫི་ཏྭཱ ཝི་ན་ཡ་ཀ་མྨཾ ཨ་ཀ་ཏྭཱ པ་རི་བྷུ་ཉྫེ་ཡྻ, ཏ་སྶ དུ་ཀྐ་ཊཾ. ཡོ ཝཱ པ་རེ་ན ཝི་ན་ཡ་ཀ་མྨ་ཏྠཱ་ཡ ནི་སྶ་ཊྛཾ ས་ཀ་ས་ཉྙཱ་ཡ ན ད་དེ་ཡྻ, ཏ་སྶཱ་པི དུ་ཀྐ་ཊཾ. ཨ་ཉྙ་ཐེ་ཏ་རནྟི ཨེ་ཏྠ ཨ་ཉྙ་ཐཱཏི ཐེ་ཡྻ་ས་ཉྙཱ་ཡ ས་ཙེ ན ད་དེ་ཡྻ, ཨི་ཏ་རཾ ཏ་སྶ ཨ་གྒྷ་ཝ་སེ་ན པཱ་རཱ་ཛི་ཀ་ཉྩ ཐུ་ལླ་ཙྩ་ཡ་ཉྩ དུ་ཀྐ་ཊ་ཉྩ ཧོ་ཏཱི་ཏི ཨ་ཏྠོ. ནི་སྶ་གྒི་ཡ་ཝི་ནི་ཙྪ་ཡོ.
ནི་སྶ་གྒི་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.