༤༢. དེ་ས་ནཱ་ནི་དྡེ་སོ
དེ་ས་ནཱཏི –
༣༨༢. ཙཱ་གོ ཡོ བྷི་ཀྑུ་བྷཱ་ཝ་སྶ, སཱ པཱ་རཱ་ཛི་ཀ་དེ་ས་ནཱ;
ཡ་ཐཱ་ཝུ་ཏྟེ་ན ཝུ་ཊྛཱ་ནཾ, ག་རུ་ཀཱ་པ་ཏྟི་དེ་ས་ནཱ.
༣༨༣. ཨུ་ཀྐུ་ཊི་ཀཾ ནི་སཱི་དི་ཏྭཱ, པ་གྒ་ཎྷི་ཏྭཱ་ན ཨ་ཉྫ་ལིཾ;
ཐུ་ལླ་ཙྩ་ཡཱ་དིཾ དེ་སེ་ཡྻ, ཨེ་ཝ་མེ་ཀ་སྶ ས་ནྟི་ཀེ.
༣༨༤. ‘‘ཨ་ཧཾ, བྷ་ནྟེ, ཨེ་ཀཾ ཐུ་ལླ་ཙྩ་ཡཱ་པ་ཏྟིཾ ཨཱ་པ་ཛྫིཾ, ཏཾ ཏུ་མྷ་མཱུ་ལེ པ་ཊི་དེ་སེ་མཱི’’ཏི ཝ་ཏྭཱ ཏེ་ན ‘‘པ་སྶ་སི, ཨཱ་ཝུ་སོ, ཏཾ ཨཱ་པ་ཏྟི’’ནྟི ཝུ་ཏྟེ ‘‘ཨཱ་མ, བྷ་ནྟེ, པ་སྶཱ་མཱི’’ཏི ཝ་ཏྭཱ པུ་ན ཏེ་ན ‘‘ཨཱ་ཡ་ཏིཾ, ཨཱ་ཝུ་སོ, སཾ་ཝ་རེ་ཡྻཱ་སཱི’’ཏི ཝུ་ཏྟེ ‘‘སཱ་དྷུ སུ་ཊྛུ, བྷ་ནྟེ, སཾ་ཝ་རི་སྶཱ་མཱི’’ཏི ཝ་ཏྟ་བྦཾ. ‘‘ཨ་ཧཾ, བྷ་ནྟེ, དྭེ ཐུ་ལླ་ཙྩ་ཡཱ་པ་ཏྟི་ཡོ ཨཱ་པ་ཛྫིཾ, ཨ་ཧཾ བྷ་ནྟེ ས་མྦ་ཧུ་ལཱ ཐུ་ལླ་ཙྩ་ཡཱ་པ་ཏྟི་ཡོ ཨཱ་པ་ཛྫིཾ, ཏཱ ཏུ་མྷ་མཱུ་ལེ པ་ཊི་དེ་སེ་མཱི’’ཏི ཝ་ཏྟ་བྦཾ.
ནི་སྶ་གྒི་ཡེ་སུ པ་ན ‘‘ཨི་དཾ མེ, བྷ་ནྟེ, ཙཱི་ཝ་རཾ ད་སཱ་ཧཱ་ཏི་ཀྐ་ནྟཾ ནི་སྶ་གྒི་ཡཾ, ཨི་མཱ་ཧཾ ཨཱ་ཡ་སྨ་ཏོ ནི་སྶ་ཛྫཱ་མཱི’’ཏི. ‘‘ཨི་མཱ་ནི མེ, བྷ་ནྟེ, ཙཱི་ཝ་རཱ་ནི…པེ… ཨེ་ཏཾ མེ, བྷ་ནྟེ, ཙཱི་ཝ་རཾ…པེ… ཨེ་ཏཱ་ནི མེ, བྷ་ནྟེ, ཙཱི་ཝ་རཱ་ནི ད་སཱ་ཧཱ་ཏི་ཀྐ་ནྟཱ་ནི ནི་སྶ་གྒི་ཡཱ་ནི, ཨེ་ཏཱ་ནཱ་ཧཾ ཨཱ་ཡ་སྨ་ཏོ ནི་སྶ་ཛྫཱ་མཱི’’ཏི.
༣༨༥. ནི་སྶ་ཛྫི་ཏྭཱ་ན དེ་སེ་ཡྻ, ཨཱ་པ་ཏྟིཾ ཏེ་ན བྷི་ཀྑུ་ནཱ;
པ་ཊི་གྒ་ཧེ་ཏྭཱ ཨཱ་པ་ཏྟིཾ, དེ་ཡྻཾ ནི་སྶ་ཊྛ་ཙཱི་ཝ་རཾ.
‘‘ཨི་མཾ, ཨི་མཱ་ནི, ཨེ་ཏཾ, ཨེ་ཏཱ་ནི ཙཱི་ཝ་རཱ་ནི ཨཱ་ཡ་སྨ་ཏོ ད་མྨཱི’’ཏི.
༣༨༦. (ཀ) ཨི་དཾ མེ, བྷ་ནྟེ, ཙཱི་ཝ་རཾ ར་ཏྟི་ཝི་པྤ་ཝུ་ཏྠཾ ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ ནི་སྶ་གྒི་ཡཾ.
(ཁ) ཨི་དཾ མེ, བྷ་ནྟེ, ཨ་ཀཱ་ལ་ཙཱི་ཝ་རཾ མཱ་སཱ་ཏི་ཀྐ་ནྟཾ ནི་སྶ་གྒི་ཡཾ.
(ག) ཨི་དཾ མེ, བྷ་ནྟེ, པུ་རཱ་ཎ་ཙཱི་ཝ་རཾ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ དྷོ་ཝཱ་པི་ཏཾ ནི་སྶ་གྒི་ཡཾ.
(གྷ) ཨི་དཾ མེ, བྷ་ནྟེ, ཙཱི་ཝ་རཾ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཧ་ཏྠ་ཏོ པ་ཊི་གྒ་ཧི་ཏཾ ཨ་ཉྙ་ཏྲ པཱ་རི་ཝ་ཏྟ་ཀཱ ནི་སྶ་གྒི་ཡཾ.
(ང) ཨི་དཾ མེ, བྷ་ནྟེ, ཙཱི་ཝ་རཾ ཨ་ཉྙཱ་ཏ་ཀཾ ག་ཧ་པ་ཏི་ཀཾ ཨ་ཉྙ་ཏྲ ས་མ་ཡཱ ཝི་ཉྙཱ་པི་ཏཾ ནི་སྶ་གྒི་ཡཾ.
(ཙ) ཨི་དཾ མེ, བྷ་ནྟེ, ཙཱི་ཝ་རཾ ཨ་ཉྙཱ་ཏ་ཀཾ ག་ཧ་པ་ཏི་ཀཾ ཏ་ཏུ་ཏྟ་རི ཝི་ཉྙཱ་པི་ཏཾ ནི་སྶ་གྒི་ཡཾ.
(ཚ) ཨི་དཾ མེ, བྷ་ནྟེ, ཙཱི་ཝ་རཾ པུ་བྦེ ཨ་པྤ་ཝཱ་རི་ཏོ ཨ་ཉྙཱ་ཏ་ཀཾ ག་ཧ་པ་ཏི་ཀཾ ཨུ་པ་ས་ངྐ་མི་ཏྭཱ ཝི་ཀ་པྤཾ ཨཱ་པ་ནྣཾ ནི་སྶ་གྒི་ཡཾ.
(ཛ) ཨི་དཾ མེ, བྷ་ནྟེ, ཙཱི་ཝ་རཾ པུ་བྦེ ཨ་པྤ་ཝཱ་རི་ཏོ ཨ་ཉྙཱ་ཏ་ཀེ ག་ཧ་པ་ཏི་ཀེ ཨུ་པ་ས་ངྐ་མི་ཏྭཱ ཝི་ཀ་པྤཾ ཨཱ་པ་ནྣཾ ནི་སྶ་གྒི་ཡཾ.
(ཛྷ) ཨི་དཾ མེ, བྷ་ནྟེ, ཙཱི་ཝ་རཾ ཨ་ཏི་རེ་ཀ་ཏི་ཀྑ་ཏྟུཾ ཙོ་ད་ནཱ་ཡ ཨ་ཏི་རེ་ཀ་ཚ་ཀྑ་ཏྟུཾ ཋཱ་ནེ་ན ཨ་བྷི་ནི་པྥཱ་དི་ཏཾ ནི་སྶ་གྒི་ཡཾ.
(ཉ) ཨི་དཾ མེ, བྷ་ནྟེ, ཀོ་སི་ཡ་མི་སྶ་ཀཾ ས་ནྠ་ཏཾ ཀཱ་རཱ་པི་ཏཾ ནི་སྶ་གྒི་ཡཾ.
(ཊ) ཨི་དཾ མེ, བྷ་ནྟེ, སུ་དྡྷ་ཀཱ་ལ༹་ཀཱ་ནཾ ཨེ་ལ༹་ཀ་ལོ་མཱ་ནཾ ས་ནྠ་ཏཾ ཀཱ་རཱ་པི་ཏཾ ནི་སྶ་གྒི་ཡཾ.
(ཋ) ཨི་དཾ མེ, བྷ་ནྟེ, ས་ནྠ་ཏཾ ཨ་ནཱ་དི་ཡི་ཏྭཱ ཏུ་ལཾ ཨོ་དཱ་ཏཱ་ནཾ ཏུ་ལཾ གོ་ཙ་རི་ཡཱ་ནཾ ཀཱ་རཱ་པི་ཏཾ ནི་སྶ་གྒི་ཡཾ.
(ཌ) ཨི་དཾ མེ, བྷ་ནྟེ, ས་ནྠ་ཏཾ ཨཱུ་ན་ཀ་ཚ་བྦ་སྶཱ་ནི ཀཱ་རཱ་པི་ཏཾ ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ ནི་སྶ་གྒི་ཡཾ.
(ཌྷ) ཨི་དཾ མེ, བྷ་ནྟེ, ནི་སཱི་ད་ན་ས་ནྠ་ཏཾ ཨ་ནཱ་དི་ཡི་ཏྭཱ པུ་རཱ་ཎ་ས་ནྠ་ཏ་སྶ སཱ་མ་ནྟཱ སུ་ག་ཏ་ཝི་ད་ཏྠིཾ ཀཱ་རཱ་པི་ཏཾ ནི་སྶ་གྒི་ཡཾ.
(ཎ) ཨི་མཱ་ནི མེ, བྷ་ནྟེ, ཨེ་ལ༹་ཀ་ལོ་མཱ་ནི ཏི་ཡོ་ཛ་ན་པ་ར་མཾ ཨ་ཏི་ཀྐཱ་མི་ཏཱ་ནི ནི་སྶ་གྒི་ཡཱ་ནི.
(ཏ) ཨི་མཱ་ནི མེ, བྷ་ནྟེ, ཨེ་ལ༹་ཀ་ལོ་མཱ་ནི ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ དྷོ་ཝཱ་པི་ཏཱ་ནི ནི་སྶ་གྒི་ཡཱ་ནི.
(ཐ) ཨ་ཧཾ, བྷ་ནྟེ, རཱུ་པི་ཡཾ པ་ཊི་གྒ་ཧེ་སིཾ, ཨི་དཾ མེ, བྷ་ནྟེ, ནི་སྶ་གྒི་ཡཾ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མི.
(ད) ཨ་ཧཾ, བྷ་ནྟེ, ནཱ་ན་པྤ་ཀཱ་ར་ཀཾ རཱུ་པི་ཡ་སཾ་ཝོ་ཧཱ་རཾ ས་མཱ་པ་ཛྫིཾ, ཨི་དཾ མེ, བྷ་ནྟེ, ནི་སྶ་གྒི་ཡཾ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི.
༣༨༧. ནི་སྶ་ཛྫི་ཏྭཱ་ན ཨཱ་པ་ཏྟིཾ, དེ་སེ་ཡྻཱ་ཐ གི་ཧིཾ ཝ་དེ;
‘‘ཛཱ་ནཱ་ཧི་མ’’ནྟི ཨི་མི་ནཱ, སོ ཝ་དེ་ཡྻཱ་ཧ་རཱ་མི ཀིཾ.
༣༨༨. ཨ་ཝ་ཏྭཱ་མ་ནྟི ཏེ་ལཱ་དིཾ, ཝ་དེ བྷི་ཀྑཱུ་ན ཀ་པྤི་ཡཾ;
ཡཾ ཨཱ་ཧ་ར་ཏི སོ ཏེ་ན, པ་རི་ཝ་ཏྟེ་ཏྭཱ་ན ཀ་པྤི་ཡཾ.
༣༨༩. ལ་བྦྷཾ ཋ་པེ་ཏྭཱ དྭེ་པེ་ཏེ, སེ་སེ་ཧི པ་རི་བྷུ་ཉྫི་ཏུཾ;
ཏ་ཏོ ཨ་ཉྙེ་ན ལ་དྡྷོ་པི, བྷཱ་གོ ཏེ་སཾ ན ཀ་པྤ་ཏི.
༣༩༠. རུ་ཀྑ་ཙྪཱ་ཡཱ་པྱ་ནྟ་མ་སོ, ཏ་ནྣི་བྦ་ཏྟཱ ན ཀ་པྤ་ཏི;
ནི་སྶ་ཊྛཾ པ་ཊི་ལ་དྡྷ་མྤི, ཨཱ་དི་ཏོ ས་ནྠ་ཏ་ཏྟ་ཡཾ.
༣༩༡. ནོ ཙེ ལ་བྷེ་ཐ ཨེ་ཝཾ སོ, ཨི་མཾ ཚ་ཌྜེ་ཧི སཾ་སི་ཡོ;
ཨེ་ཝ་མྤི བྷི་ཀྑུ ཚ་ཌྜེ་ཡྻ, ནོ ཙེ ལ་བྷེ་ཐ ས་མྨ་ཏོ.
༣༩༢. ཨེ་ཏཱ་ནི དུ་ཏི་ཡོ པ་ཏྟོ, ས་ངྒྷེ སེ་སཱ་ནི ལ་བྦྷ་རེ;
ས་ངྒྷེ་ཀ་སྨིཾ ག་ཎེ ཝ་ཏྟུཾ, ལ་བྦྷཾ བྷཱ་ས་ནྟ་རེ་ན་པི.
༣༩༣. (ཀ) ཨ་ཧཾ, བྷ་ནྟེ, ནཱ་ན་པྤ་ཀཱ་ར་ཀཾ ཀ་ཡ་ཝི་ཀྐ་ཡཾ ས་མཱ་པ་ཛྫིཾ, ཨི་དཾ མེ, བྷ་ནྟེ, ནི་སྶ་གྒི་ཡཾ.
(ཁ) ཨ་ཡཾ མེ, བྷ་ནྟེ, པ་ཏྟོ ད་སཱ་ཧཱ་ཏི་ཀྐ་ནྟོ ནི་སྶ་གྒི་ཡོ.
(ག) ཨ་ཡཾ མེ, བྷ་ནྟེ, པ་ཏྟོ ཨཱུ་ན་པ་ཉྩ་བ་ནྡྷ་ནེ་ན པ་ཏྟེ་ན ཙེ་ཏཱ་པི་ཏོ ནི་སྶ་གྒི་ཡོ, ཨི་མཱ་ཧཾ ས་ངྒྷ་སྶ ནི་སྶ་ཛྫཱ་མཱི་ཏི.
༣༩༤. ནི་སྶ་ཛྫི་ཏྭཱ་ན དེ་སེ་ཡྻ, ཨཱ་པ་ཏྟིཾ པ་ཏྟ་གཱ་ཧ་ཀཾ;
ས་མྨ་ནྣི་ཏྭཱ་ན ས་ངྒྷ་སྶ, པ་ཏྟ་ནྟཾ ཏ་སྶ དཱ་པ་ཡེ.
༣༩༥. (ཀ) ཨི་དཾ མེ, བྷ་ནྟེ, བྷེ་ས་ཛྫཾ ས་ཏྟཱ་ཧཱ་ཏི་ཀྐ་ནྟཾ ནི་སྶ་གྒི་ཡཾ.
(ཁ) ཨི་དཾ མེ, བྷ་ནྟེ, ཝ་སྶི་ཀ་སཱ་ཊི་ཀ་ཙཱི་ཝ་རཾ ཨ་ཏི་རེ་ཀ་མཱ་སེ སེ་སེ གི་མྷཱ་ནེ པ་རི་ཡི་ཊྛཾ, ཨ་ཏི་རེ་ཀ་ཌྜྷ་མཱ་སེ སེ་སེ གི་མྷཱ་ནེ ཀ་ཏྭཱ པ་རི་ད་ཧི་ཏཾ ནི་སྶ་གྒི་ཡཾ.
(ག) ཨི་དཾ མེ, བྷ་ནྟེ, ཙཱི་ཝ་རཾ བྷི་ཀྑུ་སྶ སཱ་མཾ ད་ཏྭཱ ཨ་ཙྪི་ནྣཾ ནི་སྶ་གྒི་ཡཾ.
(གྷ) ཨི་དཾ མེ, བྷ་ནྟེ, ཙཱི་ཝ་རཾ སཱ་མཾ སུ་ཏྟཾ ཝི་ཉྙཱ་པེ་ཏྭཱ ཏ་ནྟ་ཝཱ་ཡེ་ཧི ཝཱ་ཡཱ་པི་ཏཾ ནི་སྶ་གྒི་ཡཾ.
(ང) ཨི་དཾ མེ, བྷ་ནྟེ, ཙཱི་ཝ་རཾ པུ་བྦེ ཨ་པྤ་ཝཱ་རི་ཏོ ཨ་ཉྙཱ་ཏ་ཀ་སྶ ག་ཧ་པ་ཏི་ཀ་སྶ ཏ་ནྟ་ཝཱ་ཡེ ཨུ་པ་ས་ངྐ་མི་ཏྭཱ ཝི་ཀ་པྤཾ ཨཱ་པ་ནྣཾ ནི་སྶ་གྒི་ཡཾ.
(ཙ) ཨི་དཾ མེ, བྷ་ནྟེ, ཨ་ཙྩེ་ཀ་ཙཱི་ཝ་རཾ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མི་ཏཾ ནི་སྶ་གྒི་ཡཾ.
(ཚ) ཨི་དཾ མེ, བྷ་ནྟེ, ཙཱི་ཝ་རཾ ཨ་ཏི་རེ་ཀ་ཚཱ་ར་ཏྟཾ ཝི་པྤ་ཝུ་ཏྠཾ ཨ་ཉྙ་ཏྲ བྷི་ཀྑུ་ས་མྨུ་ཏི་ཡཱ ནི་སྶ་གྒི་ཡཾ.
(ཛ) ཨི་དཾ མེ, བྷ་ནྟེ, ཛཱ་ནཾ ས་ངྒྷི་ཀཾ ལཱ་བྷཾ པ་རི་ཎ་ཏཾ ཨ་ཏྟ་ནོ པ་རི་ཎཱ་མི་ཏཾ ནི་སྶ་གྒི་ཡཾ, ཨི་མཱ་ཧཾ ཨཱ་ཡ་སྨ་ཏོ ནི་སྶ་ཛྫཱ་མཱི་ཏི.
༣༩༦. སེ་སཾ ས་བྦཾ ཡ་ཐཱ་ཡོ་གཾ, ཨཱ་དི་མྷི ཝི་ཡ ཡོ་ཛ་ཡེ.
༣༩༧. (ཀ) ཨ་ཧཾ, བྷ་ནྟེ, ཨེ་ཀཾ པཱ་ཙི་ཏྟི་ཡཱ་པ་ཏྟིཾ ཨཱ་པ་ཛྫིཾ. དྭེ ས་མྦ་ཧུ་ལཱ པཱ་ཙི་ཏྟི་ཡཱ་པ་ཏྟི་ཡོ ཨཱ་པ་ཛྫིཾ.
(ཁ) གཱ་ར་ཡ྄ཧཾ, བྷ་ནྟེ, དྷ་མྨཾ ཨཱ་པ་ཛྫིཾ ཨ་ས་པྤཱ་ཡཾ པཱ་ཊི་དེ་ས་ནཱི་ཡཾ, ཏཾ པ་ཊི་དེ་སེ་མཱི་ཏི. ཏེ་ན ‘‘པ་སྶ་སི, ཨཱ་ཝུ་སོ, ཏཾ དྷ་མྨ’’ནྟི ཝ་ཏྟ་བྦཾ.
(ག) ཨ་ཧཾ, བྷ་ནྟེ, ཨེ་ཀཾ དུ་ཀྐ་ཊཱ་པ་ཏྟིཾ ཨཱ་པ་ཛྫིཾ. དྭེ ས་མྦ་ཧུ་ལཱ དུ་ཀྐ་ཊཱ་པ་ཏྟི་ཡོ ཨཱ་པ་ཛྫིཾ.
(གྷ) ཨ་ཧཾ, བྷ་ནྟེ, ཨེ་ཀཾ དུ་བྦྷཱ་སི་ཏཱ་པ་ཏྟིཾ ཨཱ་པ་ཛྫིཾ. དྭེ ས་མྦ་ཧུ་ལཱ དུ་བྦྷཱ་སི་ཏཱ་པ་ཏྟི་ཡོ ཨཱ་པ་ཛྫིཾ. ཏཱ ཏུ་མྷ་མཱུ་ལེ པ་ཊི་དེ་སེ་མཱི་ཏི.
(ང) ‘‘ཨ་ཧཾ, བྷ་ནྟེ, དྭེ ནཱ་ནཱ་ཝ་ཏྠུ་ཀཱ ཐུ་ལླ་ཙྩ་ཡཱ་པ་ཏྟི་ཡོ ཨཱ་པ་ཛྫིཾ. ས་མྦ་ཧུ་ལཱ ནཱ་ནཱ་ཝ་ཏྠུ་ཀཱ ཐུ་ལླ་ཙྩ་ཡཱ་པ་ཏྟི་ཡོ ཨཱ་པ་ཛྫིཾ, ཏཱ ཏུ་མྷ་མཱུ་ལེ པ་ཊི་དེ་སེ་མཱི’’ཏི ཝ་ཏྭཱ ཏེ་ན ‘‘པ་སྶ་སི, ཨཱ་ཝུ་སོ, ཏཱ ཨཱ་པ་ཏྟི་ཡོ’’ཏི ཝུ་ཏྟེ ‘‘ཨཱ་མ, བྷ་ནྟེ, པ་སྶཱ་མཱི’’ཏི ཝ་ཏྭཱ པུ་ན ཏེ་ན ‘‘ཨཱ་ཡ་ཏིཾ, ཨཱ་ཝུ་སོ, སཾ་ཝ་རེ་ཡྻཱ་སཱི’’ཏི ཝུ་ཏྟེ ‘‘སཱ་དྷུ སུ་ཊྛུ, བྷ་ནྟེ, སཾ་ཝ་རི་སྶཱ་མཱི’’ཏི ཝ་ཏྟ་བྦཾ.
༣༩༨. ཨ་དེ་ས་ནཱ་གཱ་མི་ནི་ཡཾ, ཨ་ནཱ་པ་ཏྟི་ཉྩ དེ་སི་ཏཾ;
ནཱ་ནཱ སཾ་ཝཱ་ས་ནི་སྶཱི་མ་ཊྛི་ཏཱ་ནཾ ཙ་ཏུ་པ་ཉྩ་ཧི;
མ་ན་སཱ པ་ཀ་ཏ་ཏྟཱ་ནཾ, ནཱ་ནེ་ཀཱ་ཏི ན དེ་ས་ཡེ་ཏི.