༡. པ་རི་མ་ཎྜ་ལཱ་དི་སི་ཀྑཱ་པ་ད་ཝ་ཎྞ་ནཱ
སེ་ཁི་ཡཱ་ནི ཙེ་ཝཱཏི པ་ཉྩ་ས་ཏྟ་ཏི སེ་ཁི་ཡཱ་ནི ཙེ་ཝ. ‘‘བྷི་ཀྑུ་པཱ་ཏི་མོ་ཀྑ་ཝ་ཎྞ་ནཱ་ཡཾ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ’’ཏི ཨི་མི་ནཱ ཡ་སྨཱ ཏཱ་དི་སཾ་ཡེ་ཝེ་ཏྠ ཨ་ཏྠ་ཝི་ནི་ཙྪ་ཡཾ ཝི་དཱུ ཝ་ད་ནྟི, ཏ་སྨཱ ཝི་སུཾ ཏེ་སཾ ཨ་ཏྠ་ཝ་ཎྞ་ནཱ ན ཝུ་ཏྟཱ. ཏ་ཏྠ ཡཱ ཝུ་ཏྟཱ, སཱ ཨི་དྷཱ་པི ཝུ་ཏྟཱ་ཡེ་ཝཱ་ཏི ད་སྶེ་ཏི.
པ་རི་མ་ཎྜ་ལཱ་དི་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ཨི་ཏི ཀ་ངྑཱ་ཝི་ཏ་ར་ཎི་ཡཱ པཱ་ཏི་མོ་ཀྑ་ཝ་ཎྞ་ནཱ་ཡ
ཝི་ན་ཡ་ཏྠ་མ་ཉྫཱུ་སཱ་ཡཾ ལཱི་ན་ཏྠ་པྤ་ཀཱ་ས་ནི་ཡཾ
བྷི་ཀྑུ་ནི་པཱ་ཏི་མོ་ཀྑ་ཝ་ཎྞ་ནཱ ནི་ཊྛི་ཏཱ.
ནི་ག་མ་ན་ཀ་ཐཱ་ཝ་ཎྞ་ནཱ
ཡཾ པཱ་ཏི་མོ་ཀྑ་སྶ ཝ་ཎྞ་ནཾ ཨཱ་ར་བྷི་ནྟི ས་མྦ་ནྡྷོ. ‘‘མ་ཧཱ་ཝི་ཧཱ་ར་ཝཱ་སཱི་ན’’ནྟི ཨི་དཾ པུ་རི་མ་པ་ཙྪི་མ་པ་དེ་ཧི ས་དྡྷིཾ ས་མྦ་ནྡྷི་ཏ་བྦཾ, མ་ཧཱ་ཝི་ཧཱ་ར་ཝཱ་སཱི་ནཾ པོ་རཱ་ཎ་ཊྛ་ཀ་ཐཱ་ཧི ཝཱ་ཏི ཙ. པཱ་ལི༹་ཡ་ཏྠ་ཉྩ ཀེ་ཝ་ལནྟི ས་ཀ་ལཾ པཱ་ལི༹་ཨ་ཏྠ་ཉྩ, ཨུ་བྷ་ཏོ་ཝི་བྷ་ངྒ་ཉྩཱ་ཏི ཝུ་ཏྟཾ ཧོ་ཏི. ཨེ་ཏྠཱཏི ཨེ་ཏི་སྶཾ ཀ་ངྑཱ་ཝི་ཏ་ར་ཎི་ཡཾ. ཡ་སྨཱ ན ཧི ཨ་ཏྠཱི་ཏི ས་མྦ་ནྡྷོ. ཡནྟི ཡཾ པ་དཾ. སཱི་ཧ་ལ༹་ཊྛ་ཀ་ཐཱ་ན་ཡནྟི སཱི་ཧ་ལ༹་མཱ་ཏི་ཀ་ཊྛ་ཀ་ཐཱ་ན་ཡཾ. ཨ་ཊྛ་ཀ་ཐཱ་སཱ་རནྟི སཱི་ཧ་ལ༹་མཱ་ཏི་ཀ་ཊྛ་ཀ་ཐཱ་ཡཾ ཨ་ཏྠ་སཱ་རཾ, ཨ་ཐ ཝཱ ཝི་ན་ཡ་ཊྛ་ཀ་ཐཱ་སུ ཨ་ཏྠ་སཱ་རཾ. ཏེ་ནེ་ཏཾ ད་སྶེ་ཏི – སཱི་ཧ་ལ༹་མཱ་ཏི་ཀ་ཊྛ་ཀ་ཐཱ་ཡཾ ཨ་ཏྠ་སཱ་རཾ ཨཱ་དཱ་ཡ ཨི་མཾ ཀ་ངྑཱ་ཝི་ཏ་ར་ཎིཾ ཀ་རོ་ནྟོ ཝི་ན་ཡ་ཊྛ་ཀ་ཐཱ་སུ་པི ཨི་དྷ ཝི་ནི་ཙྪ་ཡེ ཡོ་ག་ཀྑ་མཾ ཨ་ཏྠ་སཱ་རཾ ཨཱ་དཱ་ཡེ་ཝ ཨ་ཀཱ་སི་ནྟི.
ཨི་དཱ་ནི ས་དེ་ཝ་ཀ་སྶ ལོ་ཀ་སྶ ཨ་ཙྩ་ནྟ་སུ་ཁཱ་དྷི་ག་མཱ་ཡ ཨ་ཏྟ་ནོ པུ་ཉྙཾ པ་རི་ཎཱ་མེ་ནྟོ ‘‘ཡ་ཐཱ ཙ ནི་ཊྛཾ ས་མྤ་ཏྟཱ’’ཏི་ཨཱ་དི་གཱ་ཐཱ་དྭ་ཡ་མཱ་ཧ. ཀ་ལྱཱ་ཎ་ནི་སྶི་ཏཱཏི ཀུ་ས་ལ་ནི་སྶི་ཏཱ. ས་བྦ་ས་ཏྟཱ་ནནྟི ཀཱ་མཱ་ཝ་ཙ་རཱ་དི་བྷེ་དཱ་ནཾ ས་བྦེ་སཾ ས་ཏྟཱ་ནཾ.
ནི་ག་མ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.
ནི་ག་མ་ན་ཀ་ཐཱ
ཨེ་ཏྟཱ་ཝ་ཏཱ ཙ –
༡. ལ་ངྐི་སྶ་རོ ཡོ ཝི་ཛི་ཏཱ་རི་རཱ་ཛོ;
རཱ་ཛཱ པ་ར་ཀྐ་ནྟ་བྷུ་ཛོ ཡ་ས་སྶཱི;
ཏི་དྷཱ་ག་ཏཾ སཱི་ཧ་ལ༹་མེ་ཀ་ར་ཛྫཾ;
ཨ་ཀཱ ནི་ཀཱ་ཡ་ཉྩ ཏ་ཐཱ ས་མ་གྒཾ.
༢. པུ་རེ པུ་ལ་ཏྠི་མྷི ཝ་རེ པུ་རཱ་ནཾ;
མ་ཛ྄ཛྷ་མྷི ནཱ་ནཱ་ར་ཏ་ནཱ་ཀ་རཱ་ནཾ;
ཨ་ན་ནྟ་ས་མྤ་ཏྟི་བྷ་རཱ་བྷི་རཱ་མེ;
ཝ་རཱ་ཙ་ལུ་ཏྟ་ངྒ་གྷ་རཱ་བྷི་རཱ་མེ.
༣. ཨ་བྷེ་ཛྫ་པཱ་ཀཱ་ར་སུ་གོ་པུ་ར་སྨིཾ;
ནི་རཱ་ཀུ་ལཱ་ནེ་ཀ་ཀུ་ལཱ་ཀུ་ལ་སྨིཾ;
མུ་ནི་ནྡ་དཱ་ཋ་ངྐུ་ར་ཝཱ་ས་བྷཱུ་ཏེ;
ཡོ ལོ་ཙ་ནཱ་ན་ནྡ་ཝ་ཧེ ཝ་ས་ནྟོ.
༤. སུ་ཕུ་ལླི་ཏ་བྦྷོ་རུ་ཧ་སཱ་དུ་སཱི་ཏ
པ་ས་ནྣ་ནཱི་རེ་ཧི ཛ་ལཱ་ས་ཡེ་ཧི;
སུ་པུ་པྥི་ཏཱ་ནེ་ཀ་ཀ་ད་མྦ་ཛ་མྦུ-
པུ་ནྣཱ་ག་ནཱ་གཱ་དི་ཧི ཝཱ་བྷི་ར་མྨེ.
༥. སུ་དྷཱ་ཝ་དཱ་ཏེ་ཧི མ་ནོ་ཧ་རེ་ཧི;
པཱ་ཀཱ་ར་པ་ནྟཱི་ཧི ཙ གོ་པུ་རེ་ཧི;
ཝི་ཀི་ཎྞ་མུ་ཏྟཱ་ཕ་ལ་ས་ནྣི་བྷེ་ཧི;
ཝི་ལོ་ཀ་ནཱི་ཡེ་ཧི སུ་དྷཱ་ཏ་ལེ་ཧི.
༦. ཀ་ཏྭཱ་ན པཱ་སཱ་ད་ས་ཧ་སྶ་ར་མྨེ;
ཏ་ཧིཾ ཏ་ཧིཾ པཱི་ཏི་ཀ་རེ ཝི་ཧཱ་རེ;
མ་ཧཱ་ད་ཡོ ཛེ་ཏ་ཝ་ནཱ་ད་ཡོ་པི;
སུ་སཾ་ཡ་མཱ་ནཾ ཡ་ཏི་ནཾ ཨ་དཱ་སི.
༧. ཡོ སཱ་དུ་བྷཱུ་ཏཾ ཙ་ཏུ་པ་ཙྩ་ཡ་ཉྩ;
གུ་ཎ་པྤ་ས་ནྣོ ས་མ་ཎེ་སུ ཏེ་སུ;
ནི་ཙྩཾ མ་ཧོ་གྷཾ ཝི་ཡ ཝ་ཏྟ་ཡ་ནྟོ;
ཡོ་ཛེ་ཏི ཏེ ག་ནྠ་ཝི་པ་སྶ་ནཱ་སུ.
༨. ཀཱ་རི་ཏེ་སུ ཝི་ཧཱ་རེ་སུ, ཏེ་ན ཏེ་སུ ཡ་ས་སྶི་ནཱ;
ར་མྨོ ཡོ པ་ཙྪི་མཱ་རཱ་མོ, པུ་པྥཱ་རཱ་མཱ་དི་སོ་བྷི་ཏོ.
༩. པ་རི་ཝེ་ཎ་མྷི ནཱ་མེ་ན, ཏ་ཧིཾ ཙོ་ལ༹་ཀུ་ལ་ནྟི་ཀེ;
པཱ་སཱ་དེ ད་སྶ་ནཱི་ཡ་མྷི, ཝ་ས་ནྟོ ཀ་རུ་ཎཱ་པ་རོ.
༡༠. སི་སྶོ ས་སཱི་ཀ་ར་སྭ་ཙྪ-སཱི་ལཱ་ཙཱ་ར་སྶ དྷཱི་མ་ཏོ;
སཱ་རི་པུ་ཏྟ་མ་ཧཱ་ཐེ་ར-མ་ཧཱ་སཱ་མི་སྶ ཏཱ་དི་ནོ.
༡༡. དྷཱི་རཱ་ནེ་ཀ་གུ་ཎོ་གྷེ་ན, ཐེ་རེ་ན སུ་ཙི་ཝུ་ཏྟི་ནཱ;
ཝི་ན་ཡ་ཊྛི་ཏི་ཀཱ་མེ་ན, སུ་མེ་དྷེ་ནཱབྷི་ཡཱ་ཙི་ཏོ.
༡༢. སོ བུ་དྡྷ་ནཱ་ག་ཏྠེ་རོཧཾ, བྷི་ཀྑཱུ་ནཾ པ་ར་མཾ ཧི་ཏཾ;
མ་ཧཱ་ཝི་ཧཱ་ར་ཝཱ་སཱི་ནཾ, ཡ་ཏཱི་ནཾ ས་མ་ཡཱ་ནུ་གཾ.
༡༣. ཝི་ན་ཡ་ཏྠཱ་དི་མ་ཉྫཱུ་སཾ, ལཱི་ན་ཏྠ་སྶ པ་ཀཱ་ས་ནིཾ;
མཱ་ཏི་ཀ་ཊྛ་ཀ་ཐཱ་ཡེ་མཾ, ཨ་ཀཱ་སིཾ སཱ་དྷུ ཝ་ཎྞ་ནཾ.
༡༤. སཱ་ཡཾ སུ་བོ་དྷཱ བུ་དྷ་ཝ་ཎྞ་ནཱི་ཡཱ;
སཾ་ཝ་ཎྞ་ནཱ ས་ཏྟ་ས་ཧ་སྶ་མ་ཏྟཱ;
ནི་རཱ་ཀ་རོ་ནྟཱི ཝི་ན་ཡ་མྷི མོ་ཧཾ;
ཏ་མཾ ཙ་ར་ནྟཱི ས་སི ཁེ་ཝ བྷཱ་ཏུ.
༡༥. ཨཱ་ཀ་ངྑ་མཱ་ནེ་ན པ་ར་ཏྠ་མི་ཊྛཾ;
མ་ཧ་ཏྠ་སཱ་རཾ སུ་ཝི་ནི་ཙྪ་ཡ་ཉྩ;
སཾ་ཝ་ཎྞ་ནཾ སཱ་དྷུ པ་ཀུ་བྦ་ཏཱ ཡཾ;
ཙི་ཏཾ མ་ཡཱ པུ་ཉྙ་མ་ན་པྤ་བྷཱུ་ཏཾ.
༡༦. པུ་ཉྙེ་ན ཏེ་ནཱ་ཙི་ཏ་དཱ་ན་སཱི་ལ-
མ་ཡཱ་དི་ནཱ་ནེ་ཀ་ཝི་དྷེ་ན ཙེ་ཝ;
ས་ཏྟཱ ཨ་ནཱི་གྷཱ སུ་ཁི་ནོ ཨ་ཝེ་རཱ;
པ་པྤོ་ནྟུ ས་བྦེ སུ་ག་ཏིཾ སི་ཝ་ཉྩ.
༡༧. ས་དྡྷིཾ ཡ་ཐོ་པ་དྡ་ཝ་མ་ནྟ་རེ་ན;
ག་ཏཱ ཧི ལཱི་ན་ཏྠ་པ་དཱི་པ་ནཱི་ཡཾ;
ཏ་ཐཱ ཛ་ནཱ་ནཾ ཨ་པི དྷ་མྨ་ཡུ་ཏྟཱ;
མ་ནོ་ར་ཐཱ སི་དྡྷི་མུ་པེ་ནྟུ ནི་ཙྩཾ.
༡༨. ཀཱ་ལེ པ་ཝ་སྶ་ནྟུ ས་དཱ པ་ཡོ་དཱ;
དྷ་མྨེ་ན པཱ་ལེ་ནྟུ མ་ཧིཾ མ་ཧི་ནྡཱ;
ས་ཏྟཱ པ་ས་ནྣཱ ར་ཏ་ན་ཏྟ་ཡ་སྨིཾ;
དཱ་ནཱ་དི་པུ་ཉྙཱ་བྷི་ར་ཏཱ བྷ་ཝ་ནྟཱུ་ཏི.
ཝི་ན་ཡ་ཏྠ་མ་ཉྫཱུ་སཱ ལཱི་ན་ཏྠ་པྤ་ཀཱ་ས་ནཱི་ནཱ་མི་ཀཱ་ཀ་ངྑཱ་ཝི་ཏ་ར་ཎཱི་ཨ་བྷི་ན་ཝ་ཊཱི་ཀཱ ནི་ཊྛི་ཏཱ.